សហរដ្ឋអាមេរិក ៖ ស្នាមសាក់នឹងនៅជាប់ខ្លួនយើងដល់ថ្ងៃស្លាប់ ហើយវាក៏បង្ហាញពីអត្តសញ្ញាណរបស់មនុស្សម្នាក់ៗផងដែរ ។ បើសាក់រូបអ្វីមួយលើរាងកាយ វានឹងបង្ហាញពីអត្ថន័យសម្រាប់ខ្លួនយើង ដូចជា ៖ ថ្ងៃខែឆ្នាំកំណើត, ឈ្មោះឪពុក-ម្តាយ, ឈ្មោះមនុស្សជាទីស្រឡាញ់, ឈ្មោះសត្វ, ឈ្មោះបទចម្រៀង, រូបផ្កា ឬរូបផ្សេងៗដែលយើងចូលចិត្ត ។

ប៉ុន្តែមនុស្សខ្លះទៀតសម្រេចចិត្តសាក់ពេញខ្លួនប្រាណ និងមុខមាត់ទាំងអស់ ដោយសារពួកគេចង់បង្ហាញពីខ្លួនឯងទៅកាន់សាធារណៈ និងធ្វើឱ្យខ្លួនគេមានភាពខុសប្លែក ឬមានសេរីភាពជាងមុន ។

សារព័ត៌មាន Reuters រាយការណ៍ថា អ្នកស្រី Esperance Fuerzina អាយុ៣៦ឆ្នាំ ជាអតីតទាហានអាមេរិក បានក្លាយជាស្ត្រីមានស្នាមសាក់លើរាងកាយច្រើនបំផុតលើពិភពលោក ដែលនៅមានជីវិត ។ ស្នាមសាក់របស់អ្នកស្រីនឹងត្រូវបានគេកត់ត្រាក្នុង Guinness World Records នៅឆ្នាំ២០២៥ ។ ក្រៅពីនេះ អ្នកស្រីក៏បានក្លាយជាស្ត្រីផ្លាស់ប្តូររាងកាយច្រើនបំផុតលើពិភពលោកផងដែរ រហូតដល់៨៩កន្លែង ។

អ្នកស្រីនិយាយថា អ្នកស្រីបានចំណាយពេលរហូតដល់១០ឆ្នាំឯណោះ ដើម្បីសាក់ពេញរាងកាយទាំងអស់ ឬស្មើនឹង៩៩,៩៨% ។ សូម្បីតែនៅតាមផ្នែកតូចៗ ក៏មានស្នាមសាក់ដូចគ្នាដែរ ដូចជា ៖ អញ្ចេញធ្មេញ, ត្របកភ្នែក, បាតជើង និងអណ្តែត ។ លើសពីនេះ អ្នកស្រីបានផ្លាស់ប្តូររាងកាយរបស់ខ្លួនរហូតដល់៨៩កន្លែង រួមទាំងការវះកាត់អណ្តែតជា២ផ្នែក, វះកាត់ផ្ទៃមុខ៥កន្លែង, សាក់លើស្បែកក្បាល, ត្របកភ្នែក, ចោះស្លឹកត្រចៀក និងកាត់ស្លឹកត្រចៀកចេញខ្លះ ។

អ្នកស្រីយល់ឃើញថា ស្នាមសាក់ និងការផ្លាស់ប្តូររាងកាយនេះ គឺជាសិល្បៈមួយប្រភេទដើម្បីបង្កើតការចងចាំល្អៗ ហើយវានឹងនៅជាប់ខ្លួនអ្នកស្រីគ្រប់ពេលវេលា ។ ពីដំបូង អ្នកស្រីពុំបានតាំងចិត្តសាក់ពេញខ្លួនប្រាណបែបនេះទេ ប៉ុន្តែជីវិតជាការផ្លាស់ប្តូរជានិច្ច ទើបអ្នកស្រីសម្រេចចិត្តថា សន្សំស្នាមសាក់ឱ្យបានច្រើនសម្រាប់ថ្ងៃអនាគត ។

អ្នកស្រី Fuerzina បានចាប់ផ្តើមសាក់លើរាងកាយក្នុងអំឡុងពេលអ្នកស្រីអាយុ២១ឆ្នាំ ។ ពេលនោះ អ្នកស្រីបានសម្រេចចិត្តសាក់ ដោយសារចង់បង្ហាញពីខ្លួនឯង និងភាពច្នៃប្រឌិតរបស់ខ្លួនតាមរយៈសិល្បៈស្នាមសាក់ ។ នៅឆ្នាំ២០១៤ អ្នកស្រីបានសម្រេចចិត្តវះកាត់អណ្តែតជា២ផ្នែក ពីព្រោះវាធ្វើឱ្យស្រីមានសេរីភាព និងជាម្ចាស់លើខ្លួនឯងខ្លាំងជាងមុន ។ ហេតុនេះ ស្នាមសាក់លើរាងកាយមិនត្រឹមតែបង្ហាញពីសិល្បៈប៉ុណ្ណោះទេ ប៉ុន្តែវាបង្ហាញពីអត្តសញ្ញាណ និងភាពរឹងមាំទៀតផង ។

វាធ្វើឱ្យមហាជនភ្ញាក់ផ្អើលមិនតិចទេ ដែលបានឃើញស្នាមសាក់លើខ្លួនប្រាណអ្នកស្រី Fuerzina ជាពិសេស អ្នកស្រីហ៊ានផ្លាស់ប្តូររាងកាយស្ទើរទាំងអស់ដោយមិនខ្លាចគ្រោះថ្នាក់ ។ ចុះលោកអ្នកវិញយល់ឃើញយ៉ាងណាដែរ ចំពោះការសាក់ពេញខ្លួនបែបនេះ?

ប្រទេសឥណ្ឌា ៖ មហាសេដ្ឋីឥណ្ឌា២រូប និងស្ត្រីអមដំណើរម្នាក់បានធ្វើឱ្យមហាជនចាប់អារម្មណ៍យ៉ាងខ្លាំងក្នុងបណ្តាញសង្គម ក្រោយពីមានការចែកចាយវីដេអូរបស់ពួកគេធ្វើដំណើរទៅថ្វាយបង្គំព្រះក្នុងវត្តស័ក្តិសិទ្ធិមួយនៅប្រទេសឥណ្ឌា ហើយបានពាក់មាសស្រោចពេញខ្លួនទាំងអស់ ដែលមានទម្ងន់រហូតដល់២៥គីឡូក្រាម ។

កាលពីថ្ងៃទី២៤ ខែសីហា ឆ្នាំ២០២៤ សារព័ត៌មានបរទេសរាយការណ៍ថា មហាសេដ្ឋីឥណ្ឌាទាំង២រូប ព្រមទាំងស្ត្រី និងក្មេងតូចម្នាក់បានធ្វើដំណើរមកពីទីក្រុងពូណេ (Pune) ដើម្បីទៅវត្តស័ក្តិសិទ្ធិមួយនៅរដ្ឋ Andhra Pradesh ។ ពួកគេបានពាក់គ្រឿងអលង្ការធ្វើពីមាសសុទ្ធពេញខ្លួន ដូចជា ៖ ខ្សែក, កងដៃ ដែលមានទម្ងន់រហូតដល់២៥គីឡូក្រាម ។

សារព័ត៌មានឥណ្ឌារាយការណ៍ថា មហាសេដ្ឋីទាំង២រូបជាអ្នកជំនួញដ៏ល្បីឈ្មោះនៅទីក្រុងពូណេ គឺលោក សាន់នី ណាណាសាហេប វ៉ាកាសូរី (Sunny Nanasaheb Waghchoure) ជាអ្នកជំនួញ និងវិនិយោគផ្នែកភាពយន្ត ព្រមទាំងលោក សាន់ជេ គូចា (Sanjay Gujar) ជាមិត្តភក្តិ ក៏ជាអ្នកវិនិយោគផ្នែកភាពយន្តដែរ ។ មហាសេដ្ឋីទាំង២រូប ត្រូវបានគេដាក់ឈ្មោះថា «The Golden Boys ប្រចាំទីក្រុងពូណេ» ។

ការដាក់ឈ្មោះ The Golden Boys នេះ គឺដោយសារពេលទៅណា មកណា ពួកគេតែងតែពាក់គ្រឿងអលង្ការធ្វើពីមាសសុទ្ធស្រោចខ្លួនទាំងអស់ ដូចជា ៖ ខ្សែក, កងដៃ, កងជើង, ទូរស័ព្ទដៃស្រោបមាស, វ៉ែនតាមាស និងបើករថយន្តទំនើបពណ៌មាស ទៅកាន់ទីកន្លែងផ្សេងៗ ។ ប៉ុន្តែគ្មានការបញ្ជាក់លម្អិតថា តើស្ត្រីម្នាក់ទៀត និងក្មេងប្រុសដែលដើរមកជាមួយគ្នា គឺជាអ្នកណាទេ ។

ការធ្វើដំណើរមកវត្តស័ក្តិសិទ្ធិលើកនេះ បានធ្វើឱ្យមហាជនដែលធ្វើដំណើរមកវត្តដែរនោះ ផ្ទុះការចាប់អារម្មណ៍យ៉ាងខ្លាំង ។ គេសង្កេតឃើញថា ពេលមហាសេដ្ឋីទាំង២រូប និងស្ត្រីម្នាក់ទៀតធ្វើដំណើរទៅកន្លែងណា គឺមានតែមហាជនយកទូរស័ព្ទដៃមកថតរូប ។ លើសពីនេះ មានក្រុមអង្គរក្សប្រមាណ១៥នាក់ដើរហែរហមឆ្វេងស្តាំ ដើម្បីការពារសុវត្ថិភាពមហាសេដ្ឋីគ្រប់ពេលវេលា ។

ចំណែកវត្តស័ក្តិសិទ្ធិនេះមានឈ្មោះល្បីល្បាញយ៉ាងខ្លាំង ហើយពលរដ្ឋឥណ្ឌាមានជំនឿថា មានទេវតាចុះពីលើមេឃមកជួយការពារមនុស្សឱ្យចៀសឆ្ងាយពីហេតុការណ៍អាក្រក់ ។ ហេតុនេះ ទើបពលរដ្ឋឥណ្ឌាយ៉ាងច្រើននាក់នាំគ្នាធ្វើដំណើរមកថ្វាយបង្គំព្រះ និងវត្ថុស័ក្តិសិទ្ធិនៅវត្តនេះ ចាប់ពី៧ម៉ឺន៥ពាន់នាក់ ទៅ៩ម៉ឺននាក់ក្នុង១ថ្ងៃ ៕

នៅរាត្រីថ្ងៃទី២៤ ខែសីហា កម្មវិធីប្រកួតបវរកញ្ញាភេទទី៣ Miss International Queen 2024 ដែលរៀបចំឡើងនៅប្រទេសថៃបានរកឃើញម្ចាស់ជ័យលាភីហើយគឺបានទៅលើបវរកញ្ញាភេទទី៣ មកពីប្រទេស PERU ដោយលំដាប់រងទី១ បានទៅថៃ និងលំដាប់រងទី២ បានទៅខាងវៀតណាម។ ទោះយ៉ាងណា កម្មវិធីមួយនេះបានលេចនូវភាពចម្រូងចម្រាសពេញបណ្តាញសង្គមទាំងអ្នកខ្លះថាមិនភាពយុត្តិធម៌ ចំណែកឯរឿងក្តៅជាងគេគឺរឿងបវរកញ្ញាភេទទី៣មកពីម៉ាឡេស៊ី។

ក្នុងវីដេអូដែលចែករំលែករំលែកពេញបណ្តាញសង្គមពីបវរកញ្ញាម្នាក់ដែលកំពុងប្រកែកឈ្លោះទាស់ទែងគ្នា ធ្វើឱ្យអ្នកខ្លះរិះគន់ថាចរិតពិតរបស់ Queen នៅក្រោយឆាក រួមទាំងការវែកញែកជាច្រើនទៀត។ យ៉ាងណានៅព្រឹកថ្ងៃទី២៦ ខែសីហា បវរកញ្ញាភេទទី៣ម៉ាឡេស៊ី បានចេញមកបកស្រាយហើយចំពោះភាពចម្រូងចម្រាសនៅអំឡុងការប្រកួត Miss International Queen 2024 ។

Eva Foster Miss International Queen Malaysia 2024 បានរៀបរាប់នៅលើបណ្តាញសង្គម Instagram ជាភាសាអង់គ្លេសដែលមានអត្ថន័យជាភាសាខ្មែរថា «សេចក្តីថ្លែងការណ៍របស់ប្រព័ន្ធផ្សព្វផ្សាយ និងការសូមទោសជាសាធារណៈទៅកាន់ប្រជាជនថៃ
ខ្ញុំយល់ថា អ្នកខ្លះប្រហែលជាកំពុងរង់ចាំការថ្លែងការណ៍របស់ខ្ញុំ។ ហើយខ្ញុំសូមទោសដែលទុកអ្នកឱ្យរង់ចាំ។ បន្ទាប់ពីហេតុការណ៍កាលពីពេលថ្មីៗនេះ ក្នុងព្រឹត្តិការណ៍ Miss International Queen 2024 មានរឿងជាច្រើនត្រូវបានគេប៉ាន់ស្មាន ហើយខ្ញុំមកទីនេះដើម្បីជម្រះរឿងគ្រប់យ៉ាងពីខាងខ្ញុំ ដើម្បីកុំឱ្យអ្នកទាំងអស់គ្នាយល់ច្រលំចំពោះអ្វីដែលបានកើតឡើង។ ទីមួយ ខ្ញុំមិនប្រឆាំងប្រជាជនថៃណាមួយទេ។ ខ្ញុំតែងតែទៅប្រទេសថៃដើម្បីធ្វើដំណើរ ហើយខ្ញុំគោរពអ្នកគ្រប់គ្នា។ ខ្ញុំតែងតែមានអារម្មណ៍ដូចជាផ្ទះខ្លួនឯងពេលទៅប្រទេសថៃ។ ក្នុងនាមខ្លួនខ្ញុំផ្ទាល់ ខ្ញុំសូមអភ័យទោសយ៉ាងជ្រាលជ្រៅចំពោះភាពវឹកវរដែលខ្ញុំបានធ្វើ ហើយខ្ញុំបានរៀនពីកំហុសរបស់ខ្ញុំ។ ខ្ញុំស្រលាញ់អ្នកទាំងអស់គ្នា ហើយអរគុណដែលស្វាគមន៍ខ្ញុំមកកាន់ប្រទេសដ៏ស្រស់ស្អាតរបស់អ្នក»។

Eva បន្ថែមទៀតថា «ប៉ុន្តែក្នុងអំឡុងពេលប្រកួត MIQ 2024 ខ្ញុំកំពុងចោទសួរពីរបៀបដែល Miss International Queen រៀបចំព្រឹត្តិការណ៍មួយ និងភាពឈ្លើយរបស់បុគ្គលិកម្នាក់ដែលគ្រប់គ្រងខ្ញុំ។ ការគោរពគឺទទួលបានហើយមិនត្រូវបានផ្តល់ឱ្យទេ ហើយខ្ញុំជឿថាបុគ្គលិកត្រូវយល់ថាការសម្តែងនៅតែបន្ត ទោះបីជាគ្មានខ្ញុំឡើងលើឆាកក៏ដោយ។ នៅពេលនាងនិយាយថា ‘ត្រឡប់ទៅផ្ទះវិញ’ មកខ្ញុំ ខ្ញុំមានអារម្មណ៍ថានាងដូចជាមិនគោរពការសម្រេចចិត្តរបស់ខ្ញុំ និងជាមនុស្សឈ្លើយ។ អ្នកតែងតែអាចមករកខ្ញុំ ហើយនិយាយយ៉ាងពីរោះ។ ខ្ញុំអាចនឹងផ្លាស់ប្តូរចិត្តពេលដែលអ្នកនិយាយវាល្អមកកាន់ខ្ញុំ។ នោះគឺជាវិជ្ជាជីវៈ ហើយសម្រាប់ខ្ញុំ វិជ្ជាជីវៈគឺសំខាន់ណាស់ក្នុងយុគសម័យបច្ចុប្បន្នដែលខ្ញុំដឹងថាខ្ញុំមិនខ្វះនោះទេ។

Miss International Queen Malaysia 2024 បានលើកឡើងទៀតថា «ខ្ញុំមិនខ្វល់ទេដែលមិនជាប់ក្នុង Top 12 ព្រោះខ្ញុំដឹងថាខ្ញុំមិនល្អគ្រប់គ្រាន់ ហើយគោលបំណងចូលរួម Miss International Queen គឺដោយសារតែខ្ញុំចង់ក្លាយជាសំឡេងនៃការផ្លាស់ប្តូរ ធ្វើជាអ្នកវិនិយោគដ៏មានសក្ដានុពល និងសង្ឃឹមថានឹងទទួលបានហ្វ្រេនឆាយ។ សម្រាប់សហគមន៍របស់ខ្ញុំនៅប្រទេសម៉ាឡេស៊ី។ ខ្ញុំបានឃើញប្អូនស្រីរបស់ខ្ញុំជាច្រើនដែលមានលក្ខណៈសម្បត្តិគ្រប់គ្រាន់ដើម្បីជាប់ចំណាត់ថ្នាក់កំពូលទាំង 12 ប៉ុន្តែមិនត្រូវបានគេមើលឃើញដូចជាប្រទេសឥណ្ឌូនេស៊ីទេ។ ខ្ញុំភ្ញាក់ផ្អើល។ ខ្ញុំសង្ឃឹមថា Miss International Queen 2024 នឹងផ្លាស់ប្តូរនាពេលខាងមុខនេះ។ ដើម្បីឱ្យកាន់តែរួមបញ្ចូល និងកាន់តាមគោលការណ៍ពីមុនរបស់អ្នក។ ខ្ញុំមានអារម្មណ៍ថា MIQ បានបាត់បង់វានៅពេលនេះ ហើយខ្ញុំមានការខកចិត្តទាំងស្រុង។ ខ្ញុំមិនខ្វល់នឹងការមិនមានមកុដលើក្បាលរបស់ខ្ញុំទេ។ ដរាបណាខ្ញុំដឹងថាខ្ញុំនៅតែស្មោះត្រង់នឹងខ្លួនឯង។ សម្រាប់មនុស្សជំនាន់ក្រោយ និងមនុស្សដូចខ្ញុំ កុំខ្លាចក្នុងការនិយាយ ជឿជាក់លើខ្លួនឯង ហើយដេញតាមក្តីសុបិនរបស់អ្នក ខណៈពេលដែលអ្នកនៅតែអាចធ្វើបាន។ ពីខ្ញុំឈ្មោះ Eva Foster Miss International Queen Malaysia 2024 »៕