អ្នកនាង ផន សុផារី បានធ្វើឱ្យអ្នកគាំទ្របង្ហាញការភ្ញាក់ផ្អើលរួមជាមួយនឹងការព្រួយបារម្ភ ក្រោយពីបង្ហាញថាមានមនុស្សប្រុសមុខដដែលៗតាមក្នុងយល់សប្តិអស់រយៈពេលជិត៨ឆ្នាំមកហើយ។ អតីតតួឯកល្ខោនរូបនេះថានៅពេលនាងនិងប្តីភាពល្អូកល្អិនខ្លាំង ឬពេលនាងមិនសប្បាយចិត្តជាមួយនឹងប្តីតែងតែយល់សប្តិឃើញមនុស្សប្រុសម្នាក់ហ្នឹងហើយ។

នៅល្ងាចថ្ងៃទី៣ ខែកុម្ភៈ អ្នកនាង ផន សុផារី បានបង្ហោះវីដេអូមួយនៅលើបណ្តាញសង្គមដោយភ្ជាប់មកជាមួយនឹងចំណងជើងថា «ខ្ញុំពិតជាខ្លា.ច យប់មិញនេះគាត់មករកខ្ញុំម្តងទៀតហើយ ។ ខ្ញុំធ្លាប់ទូលសួរព្រះសង្ឃ និង គ្រូចិនសែ ចម្លើយទាំងពីរដូចគ្នាគឺ ( គាត់ជាម្ចាស់កម្មពាររបស់ខ្ញុំ…»។ អ្នកនាង ផន សុផារី បាននិយាយថា នាងតែងតែយល់សប្តិឃើញមនុស្សប្រុសមុខដដែលៗអស់រយៈជិត៨ឆ្នាំ បើសិនជានាងជួបមនុស្សប្រុសនោះនៅខាងក្រៅក៏នាងអាចចំណាំបានដែរ។

អ្នកម៉ាក់ ប៊ែលឡា និង អ៊ែលលី បន្តទៀតថា មនុស្សប្រុសម្នាក់នោះតែងតែបង្ហាញខ្លួននៅក្នុងយល់សប្តិនៅពេលណាដែលនាងនិងប្តីមានភាពល្អូនល្អិនខ្លាំង ឬពេលនាងមានអារម្មណ៍មិនសប្បាយចិត្តជាមួយនឹងប្តីខ្លួន។ អ្នកនាង ផន សុផារី ថារាល់ពេលយល់សប្តិតែងតែឃើញមនុស្សប្រុសម្នាក់នោះដឹកដៃនាងរហូតហើយស្ថិតនៅកន្លែងមួយដែលធ្វើឱ្យអារម្មណ៍របស់នាងសប្បាយមិនចង់ភ្ញាក់ពីគេងឡើយ។ អ្នកនាងបន្តថា មានពេលមួយដែលធ្វើឱ្យនាងខ្លាចដល់ឥឡូវគឺពេលនាងសុបិនឃើញគាត់ ដោយបាននិយាយថា បើនៅទីនេះសប្បាយនៅទីនេះរហូតជាមួយនឹងគាត់ទៅ ដោយគេងលក់កុំភ្ញាក់រហូតទៅនឹងនៅសប្បាយជាមួយគាត់ហើយ។

ការទម្លាយពីរឿងយល់សប្តិឃើញមនុស្សប្រុសដដែលៗចាប់តាំងពីឆ្នាំ២០១៣ របស់អ្នកនាង ផន សុផារី បានជំរុញឱ្យមតិពិភាក្សាយ៉ាងច្រើន។ មតិមួយចំនួនបានបង្ហាញថាពួកគេគេជឿនូវអ្វីដែលម្ចាស់ប្រ៊េនរូបនេះនិយាយ។ មតិមួយផ្នែកទៀតហាក់ដូចជាពុំជឿឡើយ ចំណែកឯអ្នកខ្លះទៀតគិតថាដោយសារតែអ្នកនាង ផន សុផារី មានអារម្មណ៍ធុញថប់ទើបបានជាសុបិនឃើញបែបនេះ។ គួរឱ្យដឹងថា កន្លងមកអ្នកនាង ផន សុផារី ក៏ធ្លាប់បានបង្ហាញទស្សនិកជនដែរថារូបនាងចាំជាតិផងដែរ៕

រាជធានីភ្នំពេញ ៖ ដោយសង្កេតឃើញថាករណីគ្រោះថ្នាក់ចរាចរណ៍នៅទូទាំងប្រទេសមានការកើនឡើងខ្ពស់ នគរបាលជាតិ បានប្រកាសវិធានការរឹតបន្តឹងច្បាប់ចរាចរណ៍ផ្លូវគោកឡើងវិញ ចាប់ពីខែកុម្ភៈនេះតទៅ បន្ទាប់ពីបានបន្ធូរបន្ថយការត្រួតពិនិត្យ និងចុះអនុវត្តច្បាប់ចរាចរណ៍អស់រយៈពេលជាង ៥ខែកន្លងទៅ។

យោងតាមសេចក្ដីប្រកាសព័ត៌មានរបស់ក្រសួងមហាផ្ទៃ នៅថ្ងៃទី០៣ ខែកុម្ភៈ ឆ្នាំ២០២៦ នេះបានឲ្យដឹងថា ក្នុងរយៈពេល ១៦០ថ្ងៃ គិតចាប់ពីថ្ងៃទី២៥ ខែកក្កដា ដល់ថ្ងៃទី៣១ ខែធ្នូ ឆ្នាំ២០២៥ អំឡុងពេលមានជម្លោះប្រដាប់អាវុធនៅតំបន់ព្រំដែនកម្ពុជា–ថៃ ការត្រួតពិនិត្យ និងអនុវត្តច្បាប់ចរាចរណ៍ ត្រូវបានបន្ធូរបន្ថយជាបណ្តោះអាសន្ន។

ក្នុងអំឡុងពេលបន្ធូរបន្ថយនោះ ករណីគ្រោះថ្នាក់ចរាចរណ៍បានកើនឡើងចំនួន ៣៤លើក ស្មើនឹង ៣ភាគរយ អ្នកស្លាប់កើន ៦២នាក់ ស្មើ ១០ភាគរយ និងអ្នករបួសកើន ២០៩នាក់ ស្មើ ១៥ភាគរយ បើប្រៀបធៀបនឹងរយៈពេលដូចគ្នានៃឆ្នាំ២០២៤។ ដោយឡែក នៅក្នុងខែមករា ដើមឆ្នាំ២០២៦ បើធៀបនឹងខែមករា ឆ្នាំ២០២៥ ករណីគ្រោះថ្នាក់ចរាចរណ៍កើនឡើងដល់ ៤២លើក ស្មើ ១៩ភាគរយ អ្នកស្លាប់កើន ២៥នាក់ ស្មើ ១៨ភាគរយ និងអ្នករបួសកើន ៦៤នាក់ ស្មើ ២៣ភាគរយ។

តាមការបញ្ជាក់ មូលហេតុចម្បងនៃគ្រោះថ្នាក់ចរាចរណ៍ទាំងនោះ គឺបណ្ដាលមកពីការបើកបរល្មើសល្បឿន ដែលមានសមាមាត្រ ៤៧ភាគរយ បន្ទាប់មកជាការមិនគោរពសិទ្ធិ ២១ភាគរយ មិនប្រកាន់ស្តាំ ១០ភាគរយ ប្រជែង និងបត់គ្រោះថ្នាក់ ស្រវឹង មិនគោរពសញ្ញាចរាចរណ៍ ព្រមទាំងកត្តាយាន ផ្លូវ និងការងងុយ ជាដើម។
ក្នុងន័យខាងលើនេះ អគ្គស្នងការដ្ឋាននគរបាលជាតិនឹងចាប់ផ្ដើមរឹតបន្ដឹងការអនុវត្ដច្បាប់ស្ដីពីចរាចរណ៍ផ្លូវគោកឡើងវិញ ចាប់ពីខែកុម្ភៈនេះតទៅ ដើម្បីរួមចំណែកកាត់បន្ថយគ្រោះថ្នាក់ចរាចរណ៍។

ជាមួយគ្នានេះ អគ្គស្នងការដ្ឋាននគរបាលជាតិ អំពាវនាវដល់គ្រប់ក្រសួង ស្ថាប័ន វិស័យឯកជន សង្គមស៊ីវិល និងសាធារណជនទាំងអស់ ដែលជាអ្នកប្រើប្រាស់ផ្លូវ ឱ្យចូលរួមដោយស្មារតីទទួលខុសត្រូវ ការប្រុងប្រយ័ត្ន និងស្វ័យម្ចាស់ការ ដើម្បីរួមគ្នាកាត់បន្ថយគ្រោះថ្នាក់ចរាចរណ៍ និងបង្កើនសុវត្ថិភាពក្នុងការធ្វើដំណើរ៕

ថ្មីៗនេះតារាចម្រៀង កែវ សុបញ្ញា បានបង្ហោះសំណេរសោកសៅទាក់ទងនឹងការបញ្ចប់ទំនាក់ទំនងយ៉ាងស្ងាត់ៗដើម្បីរក្សាកិត្តិយសដោយមិនបង្ខូចគ្នាទៅវិញទៅមក។ ការបង្ហោះនេះបានជំរុញឱ្យមានការសង្ស័យថាចំណងអាពាហ៍ពិពាហ៍របស់នាងបែកបាក់។ មិនយូរប៉ុន្មានលោក ប៉ាល់ ប៉ោស៊ាង ដែលជាមន្រ្ដីកងរាជអាវុធហត្ថបានបញ្ជាក់ច្បាស់តែម្តងថាអ្នកទាំងពីរលែងលះគ្នាហើយ។

កាលពីថ្ងៃទី១ កុម្ភៈ កែវ សុបញ្ញា ដែលជាតារាចម្រៀងក្នុងទ្រនំរស្មីហង្សមាស បានបង្ហោះសំណេរនៅលើបណ្តាញសង្គមថា «និស្ស័យខ្លះ គ្រាន់តែចូលមកដើម្បីឱ្យយើងចួបគ្នា ស្គាល់គ្នាបណ្តោះអាសន្ន រួចក៏ចាកចេញក្លាយជាអ្នកដទៃលែងស្គាល់គ្នា។ គ្រាន់តែការបែកគ្នាខ្លះ យើងគ្រាន់ស្ងាត់ៗដើម្បីរក្សាកិត្តិយសដោយមិនបង្ខូចគ្នាទៅវិញទៅមក។ បុណ្យស្គាល់ម្ចាស់ បាបក៏ស្គាល់ម្ចាស់! យើងគ្រាន់តែចង់រស់នៅសុខរៀងខ្លួនប៉ុណ្ណោះទើបបញ្ចប់ទៅស្ងាត់ៗ»។

ខ្លឹមសាររបស់ម្ចាស់បទ «ពេលមួយយដែលគ្មានខ្ញុំ» បានជំរុញឱ្យមានការសង្ស័យថាចំណងអាពាហ៍ពិពាហ៍របស់នាងទំនងជារង្គោះរង្គើខណៈគេបានដឹងថារូបថតគូរបស់នាងនិងស្វាមីក៏បានលុបចេញពីបណ្តាញសង្គមផងដែរ។ គ្រប់យ៉ាងលែងជាការសង្ស័យតទៅទៀត ខណៈលោក ប៉ាល់ ប៉ោស៊ាង ចេញមកបញ្ជាក់តែម្តងថាពួកគេទាំងពីរនាក់បានលែងលះគ្នាហើយ។

នៅយប់ថ្ងៃទី២ កុម្ភៈ មន្រ្ដីកងរាជអាវុធហត្ថរូបនេះបានបង្ហោះរូបដោយភ្ជាប់មកជាមួយនឹងខ្លឹមសារថា «ខ្ញុំបាទសូមបញ្ជាក់ និងឱ្យតម្លៃគ្នាទៅវិញទៅមក រូបខ្ញុំនិងភរិយា ឈ្មោះ កែវ សុបញ្ញា បានព្រមព្រៀងគ្នាផ្ដិតមេដៃនៅតុលាការ និង បញ្ចប់ ភាពជាប្ដី ប្រពន្ធ គ្នាចាប់ពីថ្ងៃនេះតទៅ»។

ថ្មីៗនេះ តារាចម្រៀង កែវ សុបញ្ញា ទើបតែប្រឡូកការងារសិល្បៈវិញបន្ទាប់ពីផ្អាកមួយរយៈដោយសារតែការបាត់បង់កូនជាទីស្រលាញ់។ កែវ សុបញ្ញា និងលោក ប៉ាល់ ប៉ោស៊ាង បានរៀបការជាមួយគ្នានៅខែមករា ឆ្នាំ២០២៤ បន្ទាប់ពីបានភ្ជាប់ពាក្យជាមួយគ្នាកាលពីខែកក្កដា ឆ្នាំ២០២១ ។ អ្វីដែលធ្វើឱ្យអ្នកគាំទ្រមានភាពសោកសៅនោះគឺថាទម្រាំនឹងឈានដល់ចំណុចនេះលោក ប៉ោស៊ាង បានព្យាយាមតាមសុំស្រលាញ់ កែវ សុបញ្ញា អស់រយៈពេល១៥ឆ្នាំមុនពួកគេភ្ជាប់ពាក្យ ប៉ុន្តែនៅទីបញ្ចប់ចំណងស្នេហាដ៏យូរអង្វែងមួយនេះមិនអាចរក្សាបានទៀតនោះទេ៕

ថ្មីៗនេះនៅលើបណ្តាញសង្គម ទីនីន និង ម៉ុង វិមាន មានជម្លោះពាក្យសម្តីយ៉ាងក្តៅគគុកក្រោយពីអតីតបេក្ខជន The Voice Cambodia រដូវកាលទី១ បានចេញវីដេអូមិនពេញចិត្តពាក្យសម្តីរបស់ ទីនីន និយាយនៅក្នុងកម្មវីធីផតខាស់របស់ ខេ ទាក់ទងនឹងសម្តីថាមានវីឡាឃ្វីន២លានដុល្លារចាំមកញ៉ែ។

នៅក្នុងកម្មវិធីផតខាស់នោះ ទីនីន បានលើកឡើងពី Admin ជីងចក់ តាមញ៉ែនាងដោយចង់ទិញទូរសព្ទទំនើបឱ្យមួយគ្រឿងឱ្យតែព្រមស្រលាញ់ ប៉ុន្តែនាងបានបដិសេធភ្លាមៗដោយបង្ហាញពីទូរសព្ទទំនើបរបស់ខ្លួនចំនួនពីរគ្រឿងសុទ្ធតែមានទំហំធំ។ ទីនីន ថាមនុស្សប្រុសចង់ញ៉ែនាងបើនិយាយពីរឿងលុយកាក់ចាក់ជាមួយនាងមិនចូលនោះទេ ប៉ុន្តែបើមានវីឡាឃ្វីនតម្លៃ២លានដុល្លារអីប្រហែលជាអាច។

ក្រោយពីវីដេអូនេះបានសាយភាយនៅលើបណ្តាញសង្គមស្រាប់តែគេបានឃើញ ម៉ុង វិមាន ដែលជាអតីតបេក្ខជនប្រកួតក្នុងកម្មវិធី The Voice Cambodia រដូវកាលទី១ បានចេញវីដេអូមិនពេញចិត្តជាមួយនឹងពាក្យដែលថាមានលុយ២លានដុល្លារទើបព្រមមើលមុខ ជាមួយនឹងកាយវិការស្អប់ខ្ពើម។ មិននិយាយចំឈ្មោះ វិមាន បាននិយាយដោយប្រយោលដោយចោទ ថានាងជាមនុស្សដើរលេងផឹកស៊ីបំពុលសង្គម មានការកែសម្ផស្សទម្រាំបានរូបរាងប៉ុណ្ណឹង និងថានាងជាមនុស្សមានជម្លោះជាមួយគេច្រើនជាដើម។ វីដេអូដែល ម៉ុង វិមាន បង្ហោះនៅលើបណ្តាញសង្គមបានទាក់ទាញចំណាប់អារម្មណ៍យ៉ាងខ្លាំងនិងមានប្រតិកម្មចម្រុះផងដែរ។

ទីនីន បានចែករំលែកបន្តពីវីដេអូរបស់ ម៉ុង វិមាន ដែលសម្តៅមកកាន់ខ្លួនជាមួយនឹងពាក្យសម្តីខ្លាំងៗវិញថា «អាសត្វ»។ ទីនីន ក៏បាននិយាយថានាងមិនចេះផឹកស្រានោះទេ ហើយនាងធ្វើតែច្រមុះប៉ុណ្ណោះ និងបានផ្លែផ្កាឱ្យ វិមានថា ដៀលនាងសុទ្ធតែផឹកស៊ីបំពុលសង្គម ប៉ុន្តែខ្លួនឯងវិញបែរជាលក់ស្រា លក់កន្ធាយ ទៅវិញ។

ក្រោយពីរឿងនេះសាយភ្លាយកាន់តែខ្លាំងៗវីដេអូរបស់ ម៉ុង វិមាន ដែលបង្ហាញកាយវិការស្អប់ ទីនីន ក៏បានបាត់ចេញពីបណ្តាញសង្គមផងដែរ។ ទោះយ៉ាងណា លោកក៏បានបង្ហោះវីដេអូនិងសំណេរបន្ថែមទៀតដោយមិនចុះញមនឹង ទីនីន ឡើយ៕

(ភ្នំពេញ) ក្រោយបានកាន់កាប់ផ្នែកខ្លះនៃទឹកដីកម្ពុជាដោយខុសច្បាប់ យោធាថៃកំពុងបង្កើនសកម្មភាពរំលោ.ភបំពា.នដែលមានទាំងការជីកលេណដ្ឋានបន្ថែម, ហ៊ំព័ទ្ធបន្លាលួស និងឈូសឆាយដីផ្ទះប្រជាជនកម្ពុជាដោយមិនខ្លាចញញើតច្បាប់អន្តរជាតិ ស្របពេលដែលកិច្ចប្រជុំ RBC រវាងភាគីទាំងពីរនៅតែពុំអាចស្វែងរកចំណុចកណ្ដាលដើម្បីឈានដល់ការដោះស្រាយបានឡើយ។

យោងសេចក្តីប្រកាសព័ត៌មានរបស់យក្រសួងការពារជាតិ កាលពីថ្ងៃទី២ ខែកុម្ភៈម្សិលមិញនេះបានឲ្យដឹងថា ក្រុមលេខាធិការដ្ឋាននៃគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៤ ភាគីកម្ពុជា និងកងទ័ពភូមិភាគទី២ ភាគីថៃ បានជួបប្រជុំគ្នាសារជាថ្មីនៅច្រកអន្តរជាតិជាំ-សាង៉ាំ ស្រុកអន្លង់វែង ខេត្តឧត្តរមានជ័យ ក្រោមការសង្កេតការណ៍ពីក្រុមអ្នកសង្កេតការណ៍អាស៊ាន (AOT)។

ទោះជាយ៉ាងណា ក្រោយកិច្ចពិភ្សាត្រូវបានបញ្ចប់ ភាគីទាំងពីរមិនទាន់អាចរកឃើញនូវចំណុចកណ្តាលរួមគ្នាណាមួយឡើយ។ ហេតុដូច្នេះហើយ ភាគីទាំងពីរក៏បានឯកភាពគ្នា ដកឃ្លាវិលត្រលប់ទៅទីបញ្ជាការរៀងខ្លួនវិញ ហើយបន្តផ្លាស់ប្តូរឯកសារ និងពិភាក្សាគ្នាឈានដល់ការឯកភាពគ្នានាពេលខាងមុខទើបមានការរៀបចំពិធីចុះហត្ថលេខា និងកិច្ចប្រជុំគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៤ របស់កម្ពុជា និងកងទ័ពភូមិភាគទី២ របស់ថៃ ។

ងាកចេញពីកិច្ចប្រជុំដែលមិនទទួលបានលទ្ធផលសម្រេច នៅតាមបណ្ដោយព្រំដែនកម្ពុជា ជាពិសេសត្រង់ចំណុចដែលថៃបានដណ្ដើមយកការកាន់កាប់ដោយខុសច្បាប់ឯណោះវិញ យោធាថៃកំពុងបង្វែរស្ថានការណ៍ដោយទាញចំណាប់អារម្មណ៍អន្តរជាតិឲ្យងាកត្រឡប់ទៅលើការប្រយុទ្ធប្រឆាំងនឹងការបោកប្រាស់នៅលើទឹកដីអធិបតេយ្យរបស់កម្ពុជាវិញ ដូចដែលពួកគេបានអះអាងពីមុននិងយកធ្វើជាលេសឈ្លានពានកម្ពុជា។

សកម្មភាពចុងក្រោយបង្អស់របស់ពួកគេ គឺតាមរយៈដឹកនាំមន្ត្រីស៊ើបអង្កេតអាមេរិក FBI និងអនុព័ន្ធយោធាបរទេសពីប្រទេសចំនួន ២០ ទៅមើលសណ្ឋាគារដែលពួកគេចោទថាជាមជ្ឈមណ្ឌលបោកប្រាស់មួយនៅតំបន់អូរស្មាច់ ខេត្តឧត្តរមានជ័យ កាលពីថ្ងៃទី២ ខែកុម្ភៈម្សិលមិញ។

ជុំវិញបញ្ហានេះ លោកបណ្ឌិត គិន ភា នាយកវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានលើកឡើងថា ការនាំមន្ត្រីយោធាបរទេស និងមន្ត្រី FBI អាមេរិកទៅទស្សនាតំបន់ទឹកដីនៃរដ្ឋអធិបតេយ្យមួយទៀតគឺជារឿងខុសច្បាប់ ដោយមិនរាប់បញ្ជូលថាតើទស្សនកិច្ចនេះធ្វើទៅកាន់មជ្ឈមណ្ឌលបោកប្រាស់តាមប្រព័ន្ធអ៊ីនធឺណិតដូចដែលថៃចោទប្រកាន់ឬយ៉ាងណានោះទេ។ លោកបានសង្កត់ធ្ងន់ថា «ប្រទេសថៃគ្មានអំណាចក្នុងការគ្រប់គ្រង ឬនាំប្រតិភូបរទេសចូលធ្វើអ្វីនៅក្នុងទឹកដីកម្ពុជានោះទេ។ នេះគឺជាការរំលោ.ភលើកិច្ចព្រមព្រៀងបទឈប់បាញ់ និងកិច្ចព្រមព្រៀងសន្តិភាពទីក្រុងកូឡាឡាំពួ ព្រមទាំងកិច្ចព្រមព្រៀង ជាច្រើនផ្សេងទៀតដែលភាគីទាំងពីរបានឯកភាពគ្នាក្នុងពេលកន្លងមក។»

ជាមួយគ្នានេះផងដែរ លោកបណ្ឌិត គិន ភា បានជំរុញឱ្យក្រសួងពាក់ព័ន្ធរបស់កម្ពុជា ដូចជាក្រសួងការបរទេស ក្រសួងការពារជាតិ ព្រមទាំងលេខាធិការដ្ឋានគណៈកម្មាធិការព្រំដែន ធ្វើការតវ៉ាជាសាធារណៈចំពោះសកម្មភាពបែបនេះដែលបានធ្វើឡើងដោយប្រទេសថៃ៕