លោក ជេម សុខ ដែលទស្សនិកជនស្គាល់ថាជាអ្នករិះគន់នយោបាយក្រៅសុ្រកបានចេញមករិះគន់ទៅកាន់អ្នកមួយចំនួនប្រើប្រាស់ភាសាខ្មែរមិនត្រូវក្បួនខ្នាតត្រឹមត្រូវដូចជាពាក្យ «ឆ្ងាញ់សាហាវ» ជាដើម។ ជុំវិញការរិះគន់នេះ អូនផ្កាយ បានចេញវីដេអូទាំងទឹកភ្នែកឆ្លើយតបទៅនឹងពាក្យរិះគន់ដោយបញ្ចេញប្រតិកម្មខ្លាំងៗ។
នៅថ្ងៃទី១ ខែមេសា អូនផ្កាយ បានចេញវីដេអូជាង២នាទីដោយដាក់ចំណងជើងថា «សុំអង្វរ»។ អតីតតារាសម្តែងរូបនេះបាននិយាយថាចាប់តាំងពីមានរឿងនៅខេត្តកំពតមកនាងបានព្យាយាមរក្សាភាពស្ងៀមស្ងាត់ដោយទទួលស្គាល់នូវកំហុសរបស់ខ្លួន។ ទោះយ៉ាងណា បន្ទាប់ពីឃើញវីដេអូរបស់លោក ជេម សុខ និយាយទាក់ទងនឹងពាក្យដែលនាងនិយាយថា «ឆ្ងាញ់សាហាវ» ហើយជាពាក្យធ្លាប់និយាយមកជាយូរមកត្រូវបានលោក ជេម សុខលើកយកមកនិយាយធ្វើឱ្យប៉ះពាល់ផ្លូវចិត្តរបស់នាង។
អូនផ្កាយ បន្តដោយចោទសួរថា តើនាងខុសអ្វីគ្រាន់តែធ្វើ Content រកលុយចិញ្ចឹមកូន ហើយពាក្យ ឆ្ងាញ់សាហាវ នេះមិនមែនមានតែនាងម្នាក់ជាអ្នកនិយាយនោះទេ។ តបតនឹងការរិះគន់ទាំងទឹកភ្នែកនិងសំឡេងខ្លាំងៗ អូនផ្កាយ បានចោទសួរទៅលោក ជេម សុខ ដែលអង្គុយចាំតែទើសជីវិតគ្រួសារអ្នកដទៃ។.png)
ក្រោយ អូនផ្កាយ បញ្ចេញប្រតិកម្មដោយសម្តីខ្លាំងៗលាយឡំនឹងទឹកភ្នែកទៅកាន់អ្នករិះគន់សង្គមរូបនេះមានអ្នកលេងបណ្តាញសង្គមមួយចំនួនលើកទឹកចិត្តនាងដោយកុំឱ្យខ្វាយខ្វល់នឹងសម្តីរបស់លោក ជេម សុខ។ ទោះយ៉ាងណា អ្នកមួយចំនួនក៏រិះគន់ អូនផ្កាយ ដោយចោទប្រកាន់ថានាងសម្តែងដោយចាត់ទុកថាគ្រាន់តែជារឿងតូចតាចប៉ុណ្ណោះ។
អូនផ្កាយ គឺជាអតីតតារាសម្តែងស៊ិចស៊ីមួយរូបហើយបានធ្វើឱ្យរបរលក់បាញ់ត្រាងមានភាពល្បីល្បាញយ៉ាងខ្លាំងកាលពីកន្លងមកនេះ។ បាត់មុខពីវិស័យសិល្បៈ អូនផ្កាយ ខិតខំពង្រីកមុខរបរពីមួយទៅមួយនិងប្រម៉ូតផលិតផលមួយចំនួន ។ បច្ចុប្បន្ននេះ អូនផ្កាយ មានកូនពីរនាក់នៅក្នុងបន្ទុកផងដែរ៕
