តើពិភពលោកនាពេលបន្តិចទៀតនេះនឹងទៅជាយ៉ាងណា? ខណៈថ្មីៗនេះប្រទេសរុស្ស៊ីបានប្រកាសថា ខ្លួនត្រៀមខ្លួនរួចជាស្រេចដើម្បីធ្វើប្រតិបត្តិការនៅក្នុងពិភពលោកថ្មីដែលគ្មានដែនកំណត់លើអាវុធនុយក្លេអ៊ែរ នៅពេលដែលសន្ធិសញ្ញា New START ជាមួយសហរដ្ឋអាមេរិកបានផុតកំណត់។ នេះបើយោងតាមការចេញផ្សាយរបស់ Reuters។

អនុរដ្ឋមន្ត្រីការបរទេសរុស្ស៊ី លោក Sergei Ryabkov បាននិយាយថា ទីក្រុងមូស្គូបានត្រៀមខ្លួនរួចជាស្រេចសម្រាប់ «ការពិតថ្មី» ដោយគ្មានការរឹតបន្តឹងជាកាតព្វកិច្ចលើឃ្លាំងអាវុធនុយក្លេអ៊ែរជាយុទ្ធសាស្ត្រ ដោយស្តីបន្ទោសកង្វះការចូលរួមពីទីក្រុងវ៉ាស៊ីនតោនលើការពង្រីក ឬជំនួសសន្ធិសញ្ញា New START រវាងអាមេរិក និង រុស្ស៊ីឡើយ ខណៈដែលវានឹងផុតកំណត់ទៅហើយនៅថ្ងៃព្រហស្បតិ៍នេះ។

ក្នុងន័យនេះ ប្រសិនបើគ្មានកិច្ចព្រមព្រៀងថ្មីនៅនាទីចុងក្រោយទេ នោះមហាអំណាចទាំងពីរនឹងគ្មានការរឹតបន្តឹងលើឃ្លាំងអាវុធនុយក្លេអ៊ែររយៈចម្ងាយឆ្ងាយជាលើកដំបូងក្នុងរយៈពេលជាងកន្លះសតវត្សរ៍។

ថ្លែងនៅក្នុងទីក្រុងប៉េកាំង លោក Ryabkov បាននិយាយថា «នេះគឺជាពេលវេលាថ្មី ភាពជាក់ស្តែងថ្មី ហើយយើងបានត្រៀមខ្លួនសម្រាប់វា»។ លោកក៏បានគូសបញ្ជាក់ផងដែរថា ការដែលប្រធានាធិបតីអាមេរិក លោក ដូណាល់ ត្រាំ មិនបានឆ្លើយតបនឹងសំណើរបស់រុស្ស៊ីដើម្បីពន្យារពេលសន្ធិសញ្ញានេះរយៈពេលមួយឆ្នាំទៀត ដើម្បីទុកពេលចរចា គឺជាសញ្ញាប្រាប់ថាអាមេរិកចង់ឱ្យវាផុតកំណត់។ ហើយលោកបញ្ជាក់ថា «ការមិនមានចម្លើយនេះហើយ គឺជាចម្លើយរបស់ងាមេរិក»។

គួរជម្រាបថា ការចុះហត្ថលេខារវាងរុស្ស៊ី និងសហរដ្ឋអាមេរិកលើសន្ធិសញ្ញា New START ត្រូវបានធ្វើឡើងកាលពីឆ្នាំ ២០១០ ដោយបានកំណត់ការដាក់ពង្រាយក្បាលគ្រាប់នុយក្លេអ៊ែរ និងរួមបញ្ចូលវិធានការផ្ទៀងផ្ទាត់រវាងប្រទេសទាំងពីរ។

ជាមួយនឹងការផុតកំណត់នៅពេលបន្តិចទៀតនេះ វានឹងធ្វើឱ្យមហាអំណាចនុយក្លេអ៊ែរធំជាងគេទាំងពីររបស់ពិភពលោកគ្មានដែនកំណត់ជាផ្លូវការលើកងកម្លាំងយុទ្ធសាស្ត្ររបស់ពួកគេតទៅទៀតហើយ ដែលបង្កើនការព្រួយបារម្ភក្នុងចំណោមអ្នកជំនាញគ្រប់គ្រងអាវុធអំពីអស្ថិរភាពកើនឡើង៕

បន្ទាប់ពីអង្គការសប្រជាជាតិបានចេញមុខប្រកាសជាផ្លូវការថាខ្លួនប្រឈមនឹងការដួលរលំផ្នែកហិរញ្ញវត្ថុក្នុងពេលដ៏ខ្លី ប្រធានាធិបតីអាមេរិក លោក Donald Trump បានអះអាងថា អាមេរិកអាចជួយដោះស្រាយបញ្ហាបញ្ហានេះបានយ៉ាងងាយ ប្រសិនបើលោក Antonio Guterres ប្រធានអង្គការនេះហាមាត់សុំជំនួយពីលោកត្រង់ៗ។

ថ្លែងប្រាប់ទីភ្នាក់ងារ Politico នាថ្ងៃអាទិត្យ ទី១ កុម្ភៈនេះលោក Trump បាននិយាយថា លោកមិនបានដឹងអំពីបំណុលរបស់សហរដ្ឋអាមេរិកចំពោះអង្គការសហប្រជាជាតិទេ ប៉ុន្តែលោកជឿជាក់ថា លោកអាច “ដោះស្រាយបញ្ហាហិរញ្ញវត្ថុបានយ៉ាងងាយងាយ” និងធានាថាប្រទេសដទៃទៀតក៏នឹងបង់ប្រាក់ឲ្យស្ថាប័ននេះផងដែរ។

ដោយឡែកបើតាមមន្ត្រីអង្គការសហប្រជាជាតិដែលមិនបញ្ចេញឈ្មោះម្នាក់ បានរាយការណ៍ប្រាប់ ABC News កាលពីថ្ងៃសុក្រថា ទីក្រុងវ៉ាស៊ីនតោនបច្ចុប្បន្នជំពាក់ថវិការបស់អង្គការនេះចំនួន 2.2 ពាន់លានដុល្លារ និងថវិកាបន្ថែមចំនួន 1.8 ពាន់លានដុល្លារទៀតសម្រាប់ប្រតិបត្តិការរក្សាសន្តិភាព ខុសពីប្រទេសរុស្ស៊ីដែលបានបង់វិភាគទានពេញលេញដល់អង្គការសហប្រជាជាតិសម្រាប់ឆ្នាំ 2026 រួចរាល់កាលពីខែធ្នូ។

ស្ថានភាពហិរញ្ញវត្ថុគឺអាក្រក់ខ្លាំងណាស់ ដែល UN អាចបញ្ចប់ការបោះបង់ចោលទីស្នាក់ការកណ្តាលរបស់ខ្លួននៅទីក្រុងញូវយ៉ក នេះបើយោងតាមរបាយការណ៍របស់កាសែត New York Times ដោយដកស្រង់សម្តីប្រភពជាន់ខ្ពស់នៅក្នុងស្ថាប័ន។ ប៉ុន្តែត្រាំបែរជាច្រានចោលការវិវត្តបែបនេះ ដោយលើកឡើងថា «អង្គការសហប្រជាជាតិមិនចាកចេញពីទីក្រុងញូវយ៉កទេ ហើយក៏មិនចាកចេញពីទឹកដីអាមេរិកដែរ ព្រោះ UN មានសក្តានុពលយ៉ាងខ្លាំង»។

សេចក្តីថ្លែងការណ៍នេះផ្ទុយនឹងការរិះគន់ពីមុនរបស់ប្រធានាធិបតីចំពោះ UN ដែលលោកបានចោទប្រកាន់ថាគ្មានប្រសិទ្ធភាព។ កាលណោះ លោកត្រាំបានចោទថា តើគោលបំណងរបស់អង្គការសហប្រជាជាតិជាអ្វី? អ្វីដែលពួកគេធ្វើគឺសរសេរលិខិតដែលមានពាក្យពេចន៍ខ្លាំងៗ ហើយបន្ទាប់មកមិនដែលធ្វើតាមលិខិតនោះឡើយ។ វាជាពាក្យទទេ ហើយពាក្យទទេមិនអាចដោះស្រាយសង្គ្រាមបានទេ។

គួរជម្រាបថា ចាប់តាំងពីលោក Trump បានវិលត្រឡប់មកកាន់តំណែងជាប្រធានាធិបតីវិញកាលពីជិតមួយឆ្នាំមុន សហរដ្ឋអាមេរិកបានដកខ្លួនចេញពីកម្មវិធី និងអង្គការជាច្រើនរបស់អង្គការសហប្រជាជាតិ ដែលក្នុងនោះរួមមានទាំងអង្គការសុខភាពពិភពលោក និងទីភ្នាក់ងារវប្បធម៌ UNESCO ផងដែរ៕

ប្រទេសថៃ ៖ ប្រយោគមួយគឺ «បិទព្រំដែនជាមួយកម្ពុជា» ត្រូវបាននាយករដ្ឋមន្ត្រីថៃចាំផ្ទះ លោក Anutin Charnvirakul លើកយកមកនិយាយដដែលៗក្នុងពេលឃោសនារកសំឡេងឆ្នោត ដើម្បីឱ្យពលរដ្ឋដែលមានគំនិតជ្រុលនិយមគាំទ្រលោកឡើងកាន់តំណែងបន្តទៀត ។ លោកហាមពលរដ្ឋកុំបោះឆ្នោតឱ្យគណបក្សផ្សេងក្រៅពីគណបក្សភូមិចៃថៃ ពីព្រោះគណបក្សផ្សេងអាចនឹងបើកព្រំដែនជាមួយកម្ពុជាឡើងវិញ ។

លោក Anutin នាយករដ្ឋមន្ត្រីថៃចាំផ្ទះ និងជាប្រធានគណបក្សភូមិចៃថៃ បានដឹកនាំសមាជិកបក្សដើរឃោសនារកសំឡេងឆ្នោតនៅទូទាំងប្រទេស ដោយសុំឱ្យពលរដ្ឋបោះឆ្នោតគាំទ្រគណបក្សខ្លួនដឹកនាំរដ្ឋាភិបាលបន្ត ហើយគោលនយោបាយធំ គឺគ្មានអ្វីក្រៅពីការបន្តបិទព្រំដែនជាមួយកម្ពុជា ។ ការធ្វើសង្គ្រា.មឈ្លានពានកម្ពុជាកាលពីខែធ្នូ ឆ្នាំ២០២៥ និងមិនបើកព្រំដែន ធ្វើឱ្យនាយករដ្ឋមន្ត្រីចាំផ្ទះរូបនេះទទួលបានការគាំទ្រច្រើន បន្ទាប់ពីប្រជាប្រិយភាពធ្លាក់ចុះខ្លាំង ព្រោះអសមត្ថភាពដឹកនាំប្រទេស បណ្តោយឱ្យពលរដ្ឋភាគខាងត្បូងស្លា.ប់ជាង១ពាន់នាក់ដោយសារទឹកជំនន់ និងបទល្មើសឆបោកអនឡាញ ជួញដូរគ្រឿងញៀនរីកដុះដាលពេញប្រទេស ។

លោក Anutin គ្មានជម្រើសអ្វីក្រៅពីបិទព្រំដែនកម្ពុជា-ថៃបន្តទៀតដើម្បីឱ្យពលរដ្ឋបោះឆ្នោតគាំទ្រគណបក្សភូមិចៃថៃ និងខ្លួនលោកអាចកាន់តំណែងជានាយករដ្ឋមន្ត្រីបន្ត ខណៈកងទ័ពវិញក៏គាំទ្រគោលនយោបាយបិទព្រំដែនដែរ ។ ពេលឃោសនារកសំឡេងឆ្នោតម្តងៗ លោកនិយាយដដែលៗថា មិនបើកព្រំដែនកម្ពុជា-ថៃដាច់ខាត ប្រសិនបើគណបក្សខ្លួនឈ្នះឆ្នោតដឹកនាំរដ្ឋាភិបាល ទោះជាសហគមន៍អន្តរជាតិ និងជប៉ុនអំពាវនាវឱ្យបើកព្រំដែនឡើងវិញក៏ដោយ ។

កាលពីវេលាម៉ោង១១ព្រឹក ថ្ងៃទី៤ ខែកុម្ភៈ ឆ្នាំ២០២៦ លោក Anutin បានទៅឃោសនារកសំឡេងឆ្នោតនៅកីឡដ្ឋានខេត្តស៊ីសាកេត និងនិយាយដូចមុនថា បើគណបក្សភូមិចៃថៃឈ្នះឆ្នោតនឹងមិនបើកព្រំដែនជាមួយកម្ពុជាដាច់ខាត ពីព្រោះពលរដ្ឋថៃប្រឆាំងការបើកព្រំដែន ។ សូមពលរដ្ឋជួយបោះឆ្នោតគាំទ្រ និងកុំបោះឆ្នោតឱ្យគណបក្សផ្សេង ពីព្រោះបើគណបក្សផ្សេងឈ្នះឆ្នោត មុខជាបើកព្រំដែនជាមួយកម្ពុជាឡើងវិញ ។

លោកបានលើកឡើងពីគុណសម្បត្តិរបស់ខ្លួន ពេលកងទ័ពថៃបើកការវាយប្រហារឈ្លានពានកម្ពុជា លោកបារម្ភ និងយកចិត្តទុកដាក់ពីជីវភាពពលរដ្ឋខេត្តស៊ីសាកេត ហើយពលរដ្ឋនៅទូទាំងប្រទេសហាមបើកព្រំដែនកម្ពុជា-ថៃឡើងវិញ លោកនឹងធ្វើតាមការសំណូមពររបស់ពលរដ្ឋ ពីព្រោះពលរដ្ឋខ្លាចពេលបើកព្រំដែននឹងធ្វើឱ្យដំណាំកសិកម្មធ្លាក់ថ្លៃ ។ លោកថា ពលរដ្ឋត្រូវចូលរួមបោះឆ្នោតគាំទ្រគណបក្សភូមិចៃថៃ នៅថ្ងៃទី៨ ខែកុម្ភៈ ខាងមុខ ពីព្រោះមានតែគណបក្សនេះមួយគត់ដែលមានគោលនយោបាយមិនបើកព្រំដែន ។

លោកសន្យាថា បើបានឡើងកាន់តំណែងជានាយករដ្ឋមន្ត្រីបន្ត ក្រៅពីមិនបើកព្រំដែនឡើងវិញ រដ្ឋាភិបាលនឹងចែកប្រាក់ឱ្យពលរដ្ឋសម្រាប់ទុកចាយវាយទិញទំនិញប្រើប្រាស់ប្រចាំថ្ងៃ ព្រមទាំងគិតគូរពីជីវភាពកងទ័ពប្រចាំការនៅព្រំដែនផងដែរ ។

គួរបញ្ជាក់ថា រដ្ឋាភិបាល និងកងទ័ពថៃ បានបិទព្រំដែនជាមួយកម្ពុជាជាឯកតោភាគីតាំងពីខែមិថុនា ឆ្នាំ២០២៥ ក្រោមហេតុផលការពារអធិបតេយ្យ និងចោទប្រកាន់កម្ពុជាជាទីតាំងឆបោកអនឡាញ ។ ការបិទព្រំដែនធ្វើឱ្យថៃខាតបង់ចំណូលសេដ្ឋកិច្ចយ៉ាងច្រើនសន្ធឹកសន្ធាប់ ព្រមទាំងបាត់បង់ភ្ញៀវទេសចរ អាជីវកម្មសណ្ឋាគារ ផ្ទះសំណាក់ ភោជនីយដ្ឋាន ហាងលក់ទំនិញតូច-ធំនៅក្បែរព្រំដែនកម្ពុជា ដួលរលំបិទទ្វារជាបន្តបន្ទាប់ ៕

ប្រទេសចិន ៖ ចិននឹងហាមផលិត និងលក់រថយន្តអគ្គិសនីដែលគ្មានដៃទ្វារថយន្ត (ឬហាមឃាត់រថយន្តអគ្គិសនីមានទ្វារប្រភេទ Hidden Door Handles) ចាប់ពីថ្ងៃទី១ ខែមករា ឆ្នាំ ២០២៧ ដោយសារបារម្ភពីសុវត្ថិភាពអ្នកប្រើប្រាស់ បន្ទាប់ពីកើតហេតុការណ៍មនុស្សជាប់ក្នុងរថយន្តមានទ្វារប្រភេទនេះជាច្រើនលើក ។ ចិនកំណត់ឱ្យក្រុមហ៊ុននានាត្រូវផលិតរថយន្តអគ្គិសនីមានប្រព័ន្ធដោះសាទាំងខាងក្នុង ទាំងខាងក្រៅ រីឯរថយន្តអគ្គិសនីដែលទទួលបានការអនុញ្ញាតឱ្យលក់ក្នុងទីផ្សាររួចហើយ មានរយៈពេល២ឆ្នាំដើម្បីប្រមូលរថយន្តពីអតិថិជនមកកែលម្អដៃទ្វាររថយន្តឡើងវិញ ។

បច្ចុប្បន្ន រថយន្តអគ្គិសនី (EV) ទទួលបានការពេញនិយមយ៉ាងខ្លាំងលើពិភពលោក បណ្តាលមកពីការរចនាម៉ូដរថយន្តទាក់ទាញជាច្រើនបែបដើម្បីឱ្យទំនើបទាន់សម័យបំផុត ក្នុងនោះក៏មានការរចនាម៉ូដរថយន្តអគ្គិសនីដែលគ្មានដៃទ្វារ (ឬរថយន្តអគ្គិសនីមានទ្វារប្រភេទ Hidden Door Handles) ដែលតម្រូវឱ្យអ្នកប្រើប្រាស់លូកដៃចូលទៅខាងក្នុងទើបអាចបើកទ្វារបាន ខណៈអ្នកបើកបរត្រូវចុចប៊ូតុងដើម្បីបើកទ្វារ ។ ការរចនាម៉ូដបែបនេះចាប់ផ្តើមពីក្រុមហ៊ុន Tesla ហើយរថយន្តអគ្គិសនីជាច្រើនម៉ាក ក៏ចាប់ផ្តើមរចនាម៉ូដគ្មានដៃទ្វាររថយន្តកាន់តែច្រើន ។

តាមការចុះផ្សាយរបស់សារព័ត៌មានបរទេសកាលពីថ្ងៃទី៣ ខែកុម្ភៈ ឆ្នាំ២០២៦ ប្រទេសចិនបានបង្កើតច្បាប់ហាមផលិត និងលក់រថយន្តអគ្គិសនីដែលគ្មានដៃទ្វាររថយន្ត (ឬហាមឃាត់រថយន្តអគ្គិសនីមានទ្វារប្រភេទ Hidden Door Handles) ដោយកំណត់ឱ្យក្រុមហ៊ុននានាត្រូវផលិតរថយន្តអគ្គិសនីមានដៃទ្វារលៀនចេញមកក្រៅ ។ ការបង្កើតច្បាប់នេះធ្វើឱ្យចិនក្លាយជាប្រទេសដំបូងគេលើពិភពលោក ដែលហាមផលិត និងលក់រថយន្តអគ្គិសនីគ្មានដៃទ្វាររថយន្ត ដោយសារបារម្ភពីសុវត្ថិភាពអ្នកប្រើប្រាស់ ប៉ុន្តែមិនបញ្ជាក់ថា តើនឹងហាមឃាត់ក្រុមហ៊ុនណាខ្លះ ។

នៅប្រទេសចិនធ្លាប់មានហេតុការណ៍គ្រោះថ្នាក់កើតឡើងចំពោះរថយន្តអគ្គិសនី Xiaomi គ្មានដៃទ្វាររថយន្ត គឺអ្នកជិះបានស្លាប់ដោយសារដាច់ចរន្តអគ្គិសនីបណ្តាលឱ្យមិនអាចបើកទ្វារចេញពីរថយន្ត ។ គ្រោះថ្នាក់នេះជាហេតុធ្វើឱ្យមនុស្សជាច្រើនបារម្ភពីសុវត្ថិភាពនៃការប្រើប្រាស់រថយន្តអគ្គិសនីគ្មានដៃទ្វារ ។

កាលពីខែតុលា ឆ្នាំ២០២៥ ភ្នាក់ងារសង្គ្រោះមិនអាចបើកទ្វាររថយន្តអគ្គិសនី Xiaomi ដែលគ្មានដៃទ្វារ ដើម្បីជួយជម្លៀសអ្នកបើកបរនៅខាងក្នុងពេលភ្លើងកំពុងឆេះរថយន្តនៅទីក្រុងឈើងទូ ស្ថិតនៅភាគនិរតីប្រទេសចិន ហើយបណ្តាលឱ្យអ្នកបើកបរស្លាប់ក្នុងរថយន្ត ។

ច្បាប់ថ្មីនេះបញ្ជាក់ថា គ្រប់រថយន្តអគ្គិសនីទាំងអស់ត្រូវតែមានដៃទ្វារផ្នែកខាងមុខដែលអាចបើកទ្វារពីខាងក្រៅ និងបើកពីខាងក្នុង លើកលែងតែទ្វាររថយន្តខាងក្រោយ ដើម្បីសុវត្ថិភាពអ្នកប្រើប្រាស់ និងបង្ការកុំឱ្យកើតហេតុការណ៍អាក្រក់ ៕

ភាពចម្រូងចម្រាស់ទាក់ទងនឹងការបង្ហោះសារព្រ.មានជាភាសាខ្មែររបស់ប្រធានាធិបតីកូរ៉េខាងត្បូង លោក លី ចេម្យុង នៅតែជាប្រធានបទក្ដីសម្រាប់ការជជែកវែកញែកបើទោះជាសារនោះត្រូវបានលុបចេញវិញហើយក៏ដោយ។ ក្នុងនោះ លោក ចាង ដុងស៊ុក ដែលជាប្រធានគណៈបក្សប្រឆាំង ក៏បានធ្វើការរិះ.គន់យ៉ាងចាស់ដៃទៅលើប្រធានាធិបតីរូបនេះផងដែរ។

យោងតាមការចុះផ្សាយរបស់សារព័ត៌មាន The Weekly Chosun នៅថ្ងៃទី៣ ខែកុម្ភៈ នេះបានឲ្យដឹងថា មេដឹកនាំគណបក្សអំណាចប្រជាជន លោក ចាង ដុងស៊ុក បានរិះគន់ចំៗចំពោះការសម្រេចចិត្តរបស់ប្រធានាធិបតី លី ក្នុងការបង្ហោះសារនោះ ដោយនិយាយថា “វាមិនសមរម្យសោះក្នុងការចេញសារដ៏ខ្លាំងក្លាជាភាសាខ្មែរប្រឆាំងនឹងការឆបោកឆ្លងដែនបែបនោះ”។

ជាមួយគ្នានោះ លោក ចាង បានអះអាងថា “ឧក្រិដ្ឋកម្មដែលកើតមានកន្លងមក មិនមែនកម្ពុជាជាអ្នកប្រព្រឹត្តិដោយខ្លួនឯងនោះទេ ប៉ុន្តែគឺជាឧក្រិដ្ឋជនជនជាតិចិន។ ហើយដើម្បីដោះស្រាយបញ្ហានេះឱ្យបានត្រឹមត្រូវ ប្រធានាធិបតីគួរតែសរសេសារនោះជាភាសាចិនដើម្បីប្រាប់ទៅកាន់ប្រទេសចិននិងជនជាតិចិនវិញ”។

ដោយឡែក បើផ្អែកតាមការបកស្រាយរបស់លោក គីម ឆារីយ៉ុង ឯកអគ្គរដ្ឋតទូកូរ៉េថ្មីប្រចាំនៅកម្ពុជាបានឲ្យដឹងថា មូលហេតុដែលប្រធានាធិបតីកូរ៉េបានបង្ហោះសារជាភាសាខ្មែរបែបនេះ គឺដោយសារយល់ឃើញថាក្រុមឧក្រិដ្ឋជនទំនងជាអាចនឹងមិនយល់ភាសាអង់គ្លេស ឬភាសាកូរ៉េបាន។ យ៉ាងណាមិញ ក្រោយមកសារនោះត្រូវបានលុបចេញវិញទៅហើយ។

គួរបញ្ជាក់ថា បើទោះជាសារខាងលើត្រូវបានលុបចេញវិញហើយក៏ដោយ ប៉ុន្តែកេរ្តិ៍ឈ្មោះ និងមុខមាត់កម្ពុជា ដែលត្រូវបានគេលាបពណ៌នៅតែដិតដាមនៅឡើយ។ សារព្រ.មាននោះទៀតសោត បានឆ្លុះបញ្ចាំងពីចេតនារបស់រដ្ឋាភិបាលកូរ៉េខាងត្បូង ក្នុងការដាក់សម្ពាធលើប្រទេសកម្ពុជាជាធំ ព្រោះបើពិចារណាទៅនៅប្រទេសដទៃទៀត ដែលមានជាពិសេសប្រទេសនៅក្បែរខាងកម្ពុជា ក៏មានជនជាតិកូរ៉េត្រូវបានក្រុមឧក្រិដ្ឋជនបរទេសបោកប្រាស់ផងដែរ ប៉ុន្តែគេមិនឃើញប្រទេសកូរ៉េចេញវិធានការសង្កត់ធ្ងន់ដូចជាការព្រ.មាននេះឡើយ៕