សូមជួយស៊ែរឲ្យអន្តរជាតិបានដឹង! កាលពីថ្មីៗនេះអង្គភាពឧក្រិដ្ឋកម្មហិង្សានៃស្ថានីយ៍ប៉ូលីស Pocheon របស់កូរ៉េខាងត្បូងបានទទួលបានបណ្ដឹ.ងពាក់ព័ន្ធនឹងការចាប់ជំរឹតមួយករណីទៀតលើបុរសម្នាក់ ក្រោយត្រូវបានគេទាក់ទងឲ្យទៅធ្វើការនៅប្រទេសថៃ។ នេះបើតាមការចុះផ្សាយរបស់សារព័ត៌មាន The JoongAnn របស់កូរ៉េខាងត្បូង។

យោងតាមស្ថានីយ៍ប៉ូលីស Pocheon ក្នុងខេត្ត Gyeonggi នៅថ្ងៃទី 1 ខែកុម្ភៈ ពួកគេបានទទួលការរាយការណ៍តាមទូរស័ព្ទពីស្រ្តីវ័យចំណាស់ម្នាក់ថាកូនប្រុសរបស់គាត់វ័យ 30ឆ្នាំ ដែលបានទៅធ្វើការនៅទីក្រុងបាងកក ប្រទេសថៃ បានលួចទាក់ទងមកគាត់ដើម្បីស្នើសុំជំនួយព្រោះពេលនេះខ្លួនត្រូវបានគេបោ.កប្រាស់ និងបង្ខំឲ្យធ្វើការងារខុសច្បាប់។

បើតាមសម្ដីម្ដាយរបស់បុរសរងគ្រោះបានរៀបរាប់ប្រាប់ប៉ូលីសថា កូនប្រុសរបស់គាត់បានចាកចេញទៅកាន់ទីក្រុងបាងកក ប្រទេសថៃ កាលពីថ្ងៃទី 26 ខែមករា បន្ទាប់ពីគេបានឃើញការផ្សាយពាណិជ្ជកម្មលើ Telegram ពាក់ព័ន្ធនឹង “ការងារដែលមានប្រាក់ខែខ្ពស់នៅក្រុមហ៊ុនរចនាមួយក្នុងប្រទេសថៃ”។ ទោះជាយ៉ាងណាក៏ដោយ ភ្លាមៗបន្ទាប់ពីមកដល់ទីនោះ គាត់ត្រូវបានគេនាំទៅកាន់ម៉ូតែលមួយក្នុងទីក្រុងបាងកក ដែលត្រូវបានឃុំខ្លួននៅក្នុងបន្ទប់មួយ ហើយក្រោយមកត្រូវបានគេបង្ខំឱ្យទទួលការបណ្តុះបណ្តាលទាក់ទងនឹងការតេទូរស័ព្ទឆបោ.ក។

ភ្លាមៗបន្ទាប់ពីទទួលបានដំណឹងនេះ ប៉ូលីសកូរ៉េខាងត្បូងបានទាក់ទងទៅកាន់ស្ថានកុងស៊ុលកូរ៉េប្រចាំប្រទេសថៃតាមរយៈបណ្តាញការទូត និងបានស្នើសុំជំនួយពីប៉ូលីសក្នុងស្រុករបស់ថៃ និងក្រោយមកទៀត បុរសរងគ្រោះក៏ត្រូវបានជួយសង្រ្គោះនិងបញ្ជូនទៅប្រទេសកូរ៉េវិញបានដោយសុវត្ថិភាព។

គួរជម្រាបថា នេះពុំមែនជាករណីដំបូងនោះទេ ដែលជនបរទេសឬជនជាតិកូរ៉េត្រូវបានគេបោ.កបញ្ឆោតឲ្យទៅធ្វើការងារខុសច្បាប់ ឬត្រូវបានបង្ខាំងទុកដោយក្រុមឧក្រិដ្ឋជនបែបនេះ។ តែទោះជាយ៉ាងណាក៏ដោយ ព័ត៌មានទាំងនេះហាក់មិនសូវជាត្រូវបានប្រព័ន្ធផ្សព្វផ្សាយនានាយកទៅចុះផ្សាយព្រោងព្រាតឡើយ ដែលនេះឆ្លុះបញ្ចាំងពីភាពលម្អៀងនិងអយុត្តិធម៌ជាខ្លាំងសម្រាប់ប្រទេសកម្ពុជា ព្រោះថានៅពេលមានករណីស្រដៀងគ្នានេះកើតឡើងនៅកម្ពុជា នោះច្បាស់ជាសារព័ត៌មានទាំងកូរ៉េ និងថៃ នាំគ្នាយកទៅចុះផ្សាយលាបពណ៌កម្ពុជាយ៉ាងផុសផុលមិនខាន៕

ប្រទេសចិន ៖ តុលាការចិនបានកាត់ទោ.សលោក Tang Yijun អតីតរដ្ឋមន្ត្រីក្រសួងយុត្តិធម៌ អាយុ៦៤ឆ្នាំ ឱ្យជាប់ពន្ធនា.គារមួយជីវិត ពីបទស៊ីសំណូកស្មើទឹកប្រាក់រហូតដល់ជាង១៣៧លានយាន់ (ឬជាង១៩លាន ៧សែនដុល្លារ) ព្រមទាំងរឹបអូសទ្រព្យសម្បត្តិទាំងអស់ និងដកហូតសិទ្ធិនយោបាយជារៀងរហូត ។ នេះជាការអនុវត្តច្បាប់យ៉ាងតឹងរ៉ឹងនៅប្រទេសចិនប្រឆាំងនឹងបទល្មើសសូកប៉ាន់ ដោយដាក់ទោ.សចាប់ពីមន្ត្រីថ្នាក់ក្រោម រហូតដល់ថ្នាក់លើ ។

តាមការចុះផ្សាយរបស់សារព័ត៌មានបរទេសកាលពីថ្ងៃទី២ ខែកុម្ភៈ ឆ្នាំ២០២៦ ការប្រឆាំងអំពើពុករលួយរបស់ចិនបានធ្វើឡើងជាបន្តបន្ទាប់! តុលាការខេត្តហ្វូចៀនបានកាត់ទោសលោក Tang Yijun អតីតរដ្ឋមន្ត្រីក្រសួងយុត្តិធម៌ អាយុ៦៤ឆ្នាំ ឱ្យជាប់ពន្ធនាគារមួយជីវិត ពីបទស៊ីសំណូក និងប្រើប្រាស់អំណាចខុសច្បាប់ ដែលផ្តល់ផលប្រយោជន៍ដល់បុគ្គល និងស្ថាប័នឯកជនជាច្រើន ។

លោក Tang អតីតរដ្ឋមន្ត្រីក្រសួងយុត្តិធម៌បានប្រើប្រាស់តួនាទីនយោបាយ និងប្រព័ន្ធយុត្តិធម៌ ដើម្បីស្វែងរកផលប្រយោជន៍ផ្ទាល់ខ្លួន ចាប់ពីឆ្នាំ២០០៦ ដល់ឆ្នាំ២០២២ សរុបមានរយៈពេល១៦ឆ្នាំ ដោយប្រាក់ដែលលោកទទួលបានពីការស៊ីសំណូក សរុបស្មើជាង១៣៧លានយាន់ (ឬជាង១៩លាន ៧សែនដុល្លារ) ។

ក្រៅពីការកាត់ទោសឱ្យជាប់ពន្ធនាគារមួយជីវិត តុលាការក៏បានរឹបអូសទ្រព្យសម្បត្តិទាំងអស់របស់លោក Tang និងដកហូតសិទ្ធិការធ្វើនយោបាយជារៀងរហូត ដោយគ្មានការបន្ធូរបន្ថយទោស ឬព្យួរទោសឡើយ ពីព្រោះលោកបានប្រព្រឹត្តបទល្មើសធ្ងន់ធ្ងរ និងធ្វើឱ្យប៉ះពាល់ដល់ទំនុកចិត្តក្នុងប្រព័ន្ធយុត្តិធម៌ ។

លោក Tang ធ្លាប់បម្រើការងារជាមន្ត្រីរាជការជាន់ខ្ពស់មានតួនាទីសំខាន់នៅប្រទេសចិន ដោយលោកធ្វើការក្នុងវិស័យច្បាប់ និងសន្តិសុខ ។ ការដាក់ទោសអតីតរដ្ឋមន្ត្រីក្រសួងយុត្តិធម៌ត្រូវបានចាត់ទុកជាការអនុវត្តច្បាប់យ៉ាងតឹងរ៉ឹងរបស់ចិន ពីព្រោះទោសកំហុសរបស់លោក Tang ពាក់ព័ន្ធនឹងការផ្តល់ផលប្រយោជន៍ក្នុងកិច្ចសន្យាគម្រោងរបស់រដ្ឋាភិបាល ព្រមទាំងការពារផលប្រយោជន៍របស់អាជីវកម្មមួយចំនួន ជាថ្នូរនឹងការផ្តល់ប្រាក់ និងទ្រព្យសម្បត្តិផ្សេងៗ ។

ការកាត់ទោសរបស់តុលាការចិនលើអតីតមន្ត្រីជាន់ខ្ពស់ ស្របពេលប្រទេសចិនអនុវត្តគោលនយោបាយ «បង្ក្រាបមន្ត្រីរាជការពុករលួយ» បង្កើតឡើងដោយលោកប្រធានាធិបតី Xi Jinping ដែលគោលនយោបាយនេះបង្ក្រាបចាប់ពីមន្ត្រីថ្នាក់ក្រោម រហូតដល់ថ្នាក់លើ ។ ជាច្រើនឆ្នាំមកនេះ មានអតីតថ្នាក់ដឹកនាំក្រសួង កងទ័ព និងមន្ត្រីរាជការចិន ត្រូវបានតុលាការកាត់ទោសជាបន្តបន្ទាប់ ហើយគ្មានមន្ត្រីណាម្នាក់រួចផុតពីការដាក់ទោសតាមច្បាប់ទេ ប្រសិនបើប្រព្រឹត្តបទល្មើស ៕

ប្រធានាធិបតីកូរ៉េខាងត្បូងលោក លី ជេម្យុង កាលពីថ្ងៃចន្ទម្សិលមិញបានធ្វើការលុបសំណេរគំរា.មកំហែងជាភាសាខ្មែរដែលលោកបានបង្ហោះនៅលើបណ្ដាញសង្គម X ចេញវិញ ក្រោយមានការតវ៉ាពីរាជរដ្ឋាភិបាលកម្ពុជា និងទទួលបានការរិះគ.ន់ច្រើនពីសំណាក់ប្រជាជនកូរ៉េរបស់ខ្លួន។

យោងតាមការចុះផ្សាយរបស់សារព័ត៌មាន JTBC របស់កូរ៉េកាលពីថ្ងៃទី២ ខែកុម្ភៈ បានឲ្យដឹងថា សម្ដីរបស់លោកប្រធានាធិបតី លី ត្រូវបានលុបចោលហើយនៅថ្ងៃទី២នេះ។ ហើយនៅពេលមានការសួរនាំថា «ហេតុអ្វីបានជាសម្ដីនេះត្រូវបានលុបចោល» អ្នកនាំពាក្យវិមានខៀវកូរ៉េខាងត្បូង លោក កាង យូជុង បាននិយាយថា “វាត្រូវបានលុបចោល ពីព្រោះវាបង្កឲ្យមានការជជែកដេញដោលច្រើនលើសលប់ពេក”។

ការលុបចោលនេះ ធ្វើឡើងក្រោយពេលរដ្ឋាភិបាលកម្ពុជាបានកោះហៅឯកអគ្គរដ្ឋទូតកូរ៉េ គីម ចាងរីយ៉ុង ឲ្យចូលរួមកិច្ចប្រជុំមួយទាក់ទងនឹងការបង្ហោះជាភាសាខ្មែររបស់ប្រធានាធិបតី លី ជេម្យុង ដោយចោ.ទសួរថា «ហេតុអ្វីបានជាប្រធានាធិបតី លី បង្ហោះសារបែបនេះជាភាសាខ្មែរ?» លោក Kim Chang-ryong បានឆ្លើយតបថា “ដោយសារក្រុមឧក្រិដ្ឋជនទំនងជាមិនយល់ភាសាអង់គ្លេស ឬភាសាកូរ៉េ ទើបលោកបានផ្ញើសារព្រ.មានជាភាសាខ្មែរដូចនេះ”។

គួររំលឹកថា កាលពីថ្ងៃទី៣០ ខែមករា ឆ្នាំ ២០២៦ ប្រធានាធិបតីកូរ៉េខាងត្បូងបានបង្ហោះសារព្រ.មានជាភាសាមួយដែលមានន័យថា៖ «បើហ៊ានប៉ះពាល់ជនជាតិកូរ៉េ នឹងត្រូវវិនាសអន្តរាយ… នេះមិនមែនជាការគំរាមកំហែង លេងៗទេ! ប្រទេសកូរ៉េខាងត្បូង បើថាធ្វើហើយ គឺធ្វើដល់ទីបញ្ចប់!» ជាមួយនឹងពាក្យសម្ដីទាំងនេះ ក្រោយមកត្រូវបានក្រសួងការបរទេសកូរ៉េខាងត្បូងបកស្រាយថា គឺសំដៅលើអង្គការឧក្រិដ្ឋកម្មឆបោ.កតាមអ៊ីនធឺណិតដែលកំពុងប្រតិបត្តិការនៅក្នុងប្រទេសកម្ពុជាប៉ុណ្ណោះ ពុំមែនគំរា.មកំហែងលើកម្ពុជានោះទេ។

យ៉ាងណាក៏ដោយ សកម្មភាពខាងលើនេះត្រូវបានគេមើលឃើញថា បានប៉ះពាល់យ៉ាងខ្លាំងដល់មុខមាត់របស់ប្រទេសកម្ពុជា ខណៈដែលបទល្មើសភាគច្រើនបង្កឡើងដោយជនបរទេសដែលឆបោ.កជនបរទេសគ្នាឯងឲ្យរងគ្រោះ មិនមែនប្រជាជនកម្ពុជាជាអ្នកបោ.កប្រាស់ជនជាតិកូរ៉េ ឬជនបរទេសណាឡើយ។

ទន្ទឹមនឹងប្រតិកម្មរបស់កម្ពុជា ក៏មានប្រជាជនកូរ៉េមួយចំនួនបង្ហាញការមិនពេញចិត្តរបស់ពួកគេចំពោះលោក លី ផងដែរ ដោយពួកគេរិះគ.ន់ពីភាពខ្វះការពិចារណារបស់ប្រធានាធិបតីរូបនេះមុននឹងសម្រេចចិត្តធ្វើអ្វីមួយ ដែលអាចនាំឲ្យប៉ះពាល់យ៉ាងខ្លាំងដល់ទំនាក់ទំនងការទូតរវាងប្រទេសនឹងប្រទេស៕

ឯកអគ្គរាជទូតជប៉ុនប្រចាំប្រទេសកម្ពុជា លោក UENO Atsushi នៅដើមខែកុម្ភៈ ឆ្នាំ២០២៦ បានអំពាវនាវឱ្យកម្ពុជា និងថៃ ដោះស្រាយជម្លោះតាមរយៈការចរចាដោយសន្តិវិធី និងបើកព្រំដែនផ្លូវគោកឡើងវិញដើម្បីសន្តិភាព សន្តិសុខក្នុងតំបន់ ហើយការបិទព្រំដែនផ្លូវគោករវាងប្រទេសទាំងពីរជាច្រើនខែធ្វើឱ្យប៉ះពាល់បណ្តាញផលិតកម្មក្នុងតំបន់ ជាពិសេស ក្រុមហ៊ុនជប៉ុនប្រតិបត្តិការអាជីវកម្មបែប Thailand-Plus-One ជួបការពិបាកយ៉ាងខ្លាំង ដោយសារត្រូវចំណាយដើមទុនខ្ពស់ជាងមុនលើថ្លៃដឹកជញ្ជូនទំនិញ និងភាពមិនប្រាកដប្រជាផ្នែកហិរញ្ញវត្ថុ ។

នេះជាការអំពាវនាវជាថ្មីរបស់ជប៉ុន បន្ទាប់ពីកាលពីខែកញ្ញា ឆ្នាំ២០២៥ រដ្ឋាភិបាលជប៉ុន និងវិនិយោគិនជប៉ុនបានអំពាវនាវឱ្យកម្ពុជា-ថៃបើកព្រំដែនផ្លូវគោកឡើងវិញដើម្បីស្តារពាណិជ្ជកម្ម និងកុំឱ្យក្រុមហ៊ុនជប៉ុនផ្លាស់ប្តូរទីតាំងផលិតទំនិញ ។ កងទ័ពថៃបានបិទព្រំដែនជាមួយកម្ពុជាជាឯកតោភាគីក្រោមហេតុផលការពារអធិបតេយ្យរបស់ខ្លួន និងចោទប្រកាន់កម្ពុជាជាទីតាំងឆបោកអនឡាញ ខណៈថៃខ្លួនឯងជាទីតាំងឆបោកអនឡាញដ៏ធំបំផុតលើពិភពលោក ។

លោក UENO Atsushi ឯកអគ្គរាជទូតជប៉ុនថា ការបិទព្រំដែនកម្ពុជា-ថៃរយៈពេលជាច្រើនខែបណ្តាលឱ្យប៉ះពាល់ខ្សែសង្វាក់ផ្គត់ផ្គង់ ក្រុមហ៊ុនជប៉ុនជួបការពិបាកយ៉ាងខ្លាំងដែលធ្វើអាជីវកម្មនៅប្រទេសទាំងពីរ លោកបារម្ភពីវិនិយោគិនបាត់បង់ទំនុកចិត្តក្នុងការវិនិយោគដោយសារស្ថានការណ៍ព្រំដែនតានតឹង ។ ការដឹកទំនិញតាមព្រំដែនផ្លូវគោកកម្ពុជា-ថៃមានសារៈសំខាន់ណាស់សម្រាប់ក្រុមហ៊ុនជប៉ុន ប៉ុន្តែគួរឱ្យសោកស្តាយដែលព្រំដែនកម្ពុជា-ថៃបានបិទតាំងពីខែមិថុនា ឆ្នាំ២០២៥ គឺជាការគំរាមកំហែងក្រុមហ៊ុនជប៉ុនដែលប្រតិបត្តិការអាជីវកម្មបែប Thailand-Plus-One ។

លោកបន្តថា ក្រុមហ៊ុនជប៉ុនត្រូវបង្ខំចិត្តជ្រើសរើសផ្លូវដឹកជញ្ជូនទំនិញថ្មី ដែលពិបាក និងចំណាយដើមទុនខ្ពស់ជាងមុន ដូចជា ៖ ដឹកជញ្ជូនតាមផ្លូវទឹក និងផ្លូវអាកាស ពេលខ្លះ ក្រុមហ៊ុនជប៉ុនបានដឹកទំនិញក្នុងផ្លូវដ៏ឆ្ងាយ គឺដឹកពីប្រទេសថៃទៅឡាវ រួចហើយដឹកបន្តទៅវៀតណាម ទើបមកដល់កម្ពុជា ។ លោក និងឯកអគ្គរាជទូតជប៉ុនប្រចាំទីក្រុងបាងកក បានសំណូមពរឱ្យរដ្ឋាភិបាលកម្ពុជា-ថៃពិភាក្សាពីការបើកព្រំដែនឡើងវិញក្នុងកិច្ចប្រជុំគណៈកម្មការព្រំដែន ។

ឯកអគ្គរាជទូតជប៉ុនប្រចាំប្រទេសកម្ពុជា ជឿជាក់លើទំនាក់ទំនងល្អរវាងកម្ពុជា-ថៃពិតជាមានសារៈសំខាន់យ៉ាងខ្លាំងដល់សន្តិភាព និងសន្តិសុខក្នុងតំបន់អាស៊ីអាគ្នេយ៍ ហេតុនេះ ជប៉ុនសូមអំពាវនាវឱ្យប្រទេសទាំងពីរស្វែងរកដំណោះស្រាយតាមរយៈការចរចាដោយសន្តិវិធី ។ ជប៉ុនបានផ្តល់ប្រាក់ជំនួយដល់ពលរដ្ឋប្រទេសទាំងពីរដែលរងផលប៉ះពាល់ដោយសារជម្លោះព្រំដែន ក៏ដូចជាសហការជាមួយអង្គការអន្តរជាតិ និងកំពុងពិចារណាផ្តល់ការគាំទ្របន្ថែមទៀតដល់ពលរដ្ឋរងផលប៉ះពាល់ ។

គួរបញ្ជាក់ថា រដ្ឋាភិបាលថៃ និងកងទ័ពថៃបានបិទព្រំដែនផ្លូវគោកជាមួយកម្ពុជាជាឯកតោភាគីតាំងពីខែមិថុនា ឆ្នាំ២០២៥ ក្រោមហេតុផលការពារអធិបតេយ្យរបស់ខ្លួន និងចោទប្រកាន់កម្ពុជាជាទីតាំងឆបោកអនឡាញ ខណៈថៃខ្លួនឯងជាទីតាំងឆបោកអនឡាញដ៏ធំបំផុតលើពិភពលោក ។ រហូតមកដល់ខែកុម្ភៈ ឆ្នាំ២០២៦ ព្រំដែនផ្លូវគោកកម្ពុជា-ថៃទាំងអស់នៅតែបន្តបិទក្រោមហេតុផលដដែល និងធ្វើឱ្យថៃបាត់បង់ប្រាក់ចំណូលសេដ្ឋកិច្ចយ៉ាងខ្លាំង គ្មានភ្ញៀវទេសចរ អាជីវកម្មថៃនៅព្រំដែនដួលរលំ មិនថាសណ្ឋាគារ ភោជនីយដ្ឋាន ការលក់ដូរទំនិញ ពលរដ្ឋថៃបាត់បង់ការងារ ។

ការបិទច្រកព្រំដែនកម្ពុជា-ថៃ ក្រៅពីថៃខាតបង់ចំណូលសេដ្ឋកិច្ចយ៉ាងធ្ងន់ធ្ងរ ក៏ប៉ះពាល់ដល់ការនាំចេញបន្លែ ផ្លែឈើ និងទំនិញប្រើប្រាស់ផ្សេងៗរបស់ថៃផងដែរ ។ កន្លងមក សភាពាណិជ្ជកម្មថៃនៅតាមបណ្តាខេត្តជាប់កម្ពុជា បានសំណូមពរឱ្យរដ្ឋាភិបាល និងកងទ័ពថៃបើកព្រំដែនឡើងវិញដើម្បីជួយស្រោចស្រង់សេដ្ឋកិច្ចថៃធ្លាក់ចុះ ប៉ុន្តែនាយករដ្ឋមន្ត្រីថៃចាំផ្ទះ លោក Anutin Charnvirakul ថា ព្រំដែននឹងបិទបន្តទៀត ប្រសិនបើគណបក្សភូមិចៃថៃឈ្នះឆ្នោត ដោយសារពលរដ្ឋថៃជ្រុលនិយមប្រឆាំងការបើកព្រំដែន ៕

ប្រទេសកូរ៉េខាងត្បូង ៖ កាលពីថ្ងៃទី២២ ខែមករា ឆ្នាំ២០២៦ ប្រទេសកូរ៉េខាងត្បូងបានប្រកាសអនុវត្តច្បាប់មូលដ្ឋានគ្រប់គ្រងបច្ចេកវិទ្យា AI (AI Basic Act) មុនគេនៅលើពិភពលោក ដើម្បីទប់ស្កាត់ហានិភ័យផ្សេងៗរបស់បច្ចេកវិទ្យាដែលមានផលប៉ះពាល់ដល់អ្នកប្រើប្រាស់ ។ ក្រុមហ៊ុនបច្ចេកវិទ្យានានាត្រូវកំណត់ឱ្យទប់ស្កាត់ខ្លឹមសារបង្កើតឡើងដោយបច្ចេកវិទ្យា AI ឬព័ត៌មានក្លែងក្លាយ និងបង់ប្រាក់ពិន័យរហូតដល់ជាង២ម៉ឺន ៥ពាន់ដុល្លារ ប្រសិនបើល្មើសច្បាប់ ។

ក្រុមហ៊ុនបច្ចេកវិទ្យានានាត្រូវតែត្រួតពិនិត្យឱ្យប្រាកដចិត្តថា តើបានគ្រប់គ្រងបច្ចេកវិទ្យា AI ដែរឬទេ ជាពិសេស ការប្រើប្រាស់បច្ចេកវិទ្យាណាមួយដែលមានហានិភ័យខ្ពស់ចំពោះអ្នកប្រើប្រាស់ គឺក្រុមហ៊ុនត្រូវត្រួតពិនិត្យសុវត្ថិភាព និងជូនដំណឹងឱ្យអ្នកប្រើប្រាស់បានជ្រាបពីគ្រោះថ្នាក់ ។

ក្រៅពីនេះ ក្រុមហ៊ុនបច្ចេកវិទ្យាក៏ត្រូវទប់ស្កាត់ការផ្សព្វផ្សាយព័ត៌មានក្លែងក្លាយក្នុងអ៊ីនធើរណេត និងបញ្ជាក់ពីខ្លឹមសារ ឬរូបភាព ឬវីដេអូ ដែលបង្កើតឡើងដោយបច្ចេកវិទ្យា AI ដើម្បីការពារការបោកប្រាស់អ្នកប្រើប្រាស់ និងលុបបំបាត់ព័ត៌មានក្លែងក្លាយ ។

ក្រុមហ៊ុនបច្ចេកវិទ្យាទាំងអស់ រួមទាំងក្រុមហ៊ុនបច្ចេកវិទ្យាធំៗ ដូចជា ៖ Google និង OpenAI នឹងតម្រូវឱ្យបញ្ជូនអ្នកតំណាងរបស់ខ្លួនមកកាន់ប្រទេសកូរ៉េខាងត្បូង ដើម្បីត្រួតពិនិត្យខ្លឹមសារផ្សេងៗក្នុងបណ្តាញសង្គមដែលបង្កគ្រោះថ្នាក់ខ្លាំង ។

ប្រសិនបើល្មើសច្បាប់គ្រប់គ្រងបច្ចេកវិទ្យា AI ក្រុមហ៊ុនបច្ចេកវិទ្យានានានឹងត្រូវបង់ប្រាក់ពិន័យរហូតដល់៣០លានវ៉ុន (ឬស្មើជាង ២ម៉ឺន ៥ពាន់ដុល្លារ) ។ ប៉ុន្តែកូរ៉េខាងត្បូងនឹងទុករយៈពេលអនុគ្រោះចំនួន១ឆ្នាំ សម្រាប់ឱ្យក្រុមហ៊ុនបច្ចេកវិទ្យាមានពេលវេលាចាត់ចែង និងសម្របខ្លួនតាមច្បាប់កូរ៉េខាងត្បូង ។

គួរបញ្ជាក់ថា ការបង្កើតច្បាប់គ្រប់គ្រងបច្ចេកវិទ្យា AI ធ្វើឱ្យកូរ៉េខាងត្បូងក្លាយជាប្រទេសនាំមុខគេក្នុងការកំណត់ស្តង់ដារគ្រប់គ្រងបច្ចេកវិទ្យា AI លើសាកលលោក និងចាត់ទុកជាការដាក់ទោសក្រុមហ៊ុនបច្ចេកវិទ្យាដែលល្មើសច្បាប់យ៉ាងធ្ងន់ធ្ងរ ។ លើសពីនេះ កូរ៉េខាងត្បូងបាននាំមុខការអនុវត្តច្បាប់មូលដ្ឋានគ្រប់គ្រងបច្ចេកវិទ្យា AI (AI Basic Act) របស់សហភាពអឺរ៉ុប ដែលគ្រោងនឹងអនុវត្តនៅឆ្នាំ២០៣០ ៕

ប្រទេសបារាំង ៖ រដ្ឋាភិបាលបារាំងប្រកាសឈប់ប្រើប្រាស់កម្មវិធីប្រជុំអនឡាញដ៏ពេញនិយមរបស់អាមេរិក ដូចជា ៖ Zoom និង Microsoft Teams ចាប់ពីឆ្នាំ២០២៧ ដោយសារបារម្ភពីសុវត្ថិភាព និងការទំនាក់ទំនងគ្នាតាមអ៊ីនធើរណេតរបស់ស្ថាប័នរដ្ឋអាចបែកធ្លាយការសម្ងាត់ ។ ក្រៅពីនេះ បារាំងលើកឡើងពីហេតុផលឈប់ប្រើប្រាស់ដោយសារកម្មវិធីទាំងពីរនេះបង្កើតឡើងដោយអាមេរិក ដែលមិនមែនជាសមាជិកសហភាពអឺរ៉ុប ។

ប្រទេសជាច្រើនពេញនិយមប្រើប្រាស់កម្មវិធីដ៏ពេញនិយម Zoom និង Microsoft Teams សម្រាប់ចូលរួមប្រជុំ និងសិក្សាតាមអនឡាញ ពីព្រោះកម្មវិធីទាំងពីរអនុញ្ញាតឱ្យមានអ្នកចូលរួមច្រើន និងឃើញមុខគ្នាច្បាស់ៗ ប៉ុន្តែបារាំងនឹងឈប់ប្រើប្រាស់កម្មវិធីទាំងពីរ ហើយចាប់ផ្តើមប្រើប្រាស់កម្មវិធីបង្កើតដោយខ្លួនឯង ។ នេះជាយុទ្ធសាស្ត្រមួយរបស់បារាំងដើម្បីកាត់បន្ថយការប្រើប្រាស់កម្មវិធីអ៊ីនធើរណេតដែលបង្កើតឡើងដោយអាមេរិក និងកាត់បន្ថយការចំណាយប្រាក់សម្រាប់ប្រើប្រាស់កម្មវិធីអ៊ីនធើរណេតក្នុងស្ថាប័នរដ្ឋ ។

តាមការចុះផ្សាយរបស់សារព័ត៌មានបរទេសកាលពីថ្ងៃទី២៨ ខែមករា ឆ្នាំ២០២៦ ស្ថាប័នរដ្ឋនៅប្រទេសបារាំងនឹងឈប់ប្រើប្រាស់កម្មវិធី Zoom និង Microsoft Teams ចាប់ពីឆ្នាំ២០២៧ ដើម្បីកាត់បន្ថយការចំណាយប្រាក់រហូតដល់១លានអឺរ៉ូបក្នុង១ឆ្នាំ (ស្មើជាង១លាន ២សែនដុល្លារ) និងងាកមកប្រើប្រាស់កម្មវិធីបង្កើតដោយខ្លួនឯងដែលមានសុវត្ថិភាពជាង ។

បារាំងនឹងប្រើប្រាស់ Visio គឺជាកម្មវិធីប្រជុំតាមអនឡាញបង្កើតឡើងដោយខ្លួនឯង និងបានសាកល្បងប្រើប្រាស់កាលពីឆ្នាំ២០២៥ ដែលវាមានមុខងារប្រើប្រាស់ស្រដៀងនឹងកម្មវិធី Zoom និង Microsoft Teams ដែរ ថែមទាំងមានបច្ចេកវិទ្យា AI ជួយសម្រួលដល់ការផ្ញើសារជាអក្សរ និងសំឡេង ។ បច្ចុប្បន្ន នៅប្រទេសបារាំងមានអ្នកប្រើប្រាស់កម្មវិធី Visio ប្រមាណ៤ម៉ឺននាក់ ។

តាមការលើកឡើងរបស់រដ្ឋមន្ត្រីក្រសួងមុខងារសាធារណៈ និងកំណែទម្រង់បារាំង លោក David Amiel ការបង្កើតកម្មវិធីប្រជុំតាមអនឡាញ Visio ក្នុងគោលបំណងឈប់ប្រើប្រាស់កម្មវិធីអ៊ីនធើរណេតរបស់អាមេរិក ដែលមិនមែនបង្កើតឡើងដោយបណ្តាប្រទេសសមាជិកអឺរ៉ុប ។ កម្មវិធី Visio មានសុវត្ថិភាព និងអាចរក្សាការសម្ងាត់នៃការទំនាក់ទំនងគ្នាតាមអ៊ីនធើរណេតរបស់ស្ថាប័នរដ្ឋ ។

គួរបញ្ជាក់ថា ការបង្កើតកម្មវិធីប្រជុំអនឡាញ Visio គឺស្ថិតក្នុងគម្រោង Suite Numerique ដែលរដ្ឋាភិបាលបារាំងជំរុញឱ្យបង្កើតកម្មវិធីអនឡាញដោយខ្លួនឯងដើម្បីជំនួសកម្មវិធីរបស់អាមេរិក ។ នាថ្ងៃអនាគត បារាំងនឹងឈប់ប្រើប្រាស់កម្មវិធីអនឡាញជាច្រើនទៀតរបស់អាមេរិក ក្នុងនោះក៏មានកម្មវិធីផ្ញើអ៊ីម៉ែលផងដែរ ៕