តារាចម្រៀងរ៉េប វណ្ណដា និងកីឡាករប្រដាល់មីយ៉ាន់ម៉ា ដាវ លីឌុច បានជួបគ្នាដោយចៃដន្យក្នុងដំណើរកម្សាន្តនាពេលថ្មីៗនេះ។ អ្នកទាំងពីរបានធ្វើឱ្យទស្សនិកជនភ្ញាក់ផ្អើលលាយឡំដោយសំណើចដោយសារតែឃើញ វណ្ណដា និង ដាវ លីឌុច បង្ហាញស្នៀតក្បាច់គុនខ្មែរឡើងមក។
មួយរយៈចុងក្រោយនេះចាប់តាំងពីបង្ហាញការខូចចិត្តនឹងស្នេហា និងមានការសង្ស័យថា វណ្ណដា បញ្ចប់ទំនាក់ទំនងជាមួយនឹងគូស្នេហ៍គេប្រទះឃើញតារាចម្រៀងរ៉េបរូបនេះមានដំណើរកម្សាន្តញឹកញាប់ជាពិសេសគឺលំហែរចិត្តនៅសមុទ្រតែម្តង។ ជាក់ស្តែងថ្មីៗនេះលោកក៏បានទៅកម្សាន្តនៅកោះរ៉ុងម្តងទៀតរហូត នរិទ្ធ ចង់ឱ្យ វណ្ណដា ត្រឡប់មកវិញនិងចង់បាន វណ្ណដា មកវិញ។
ទោះយ៉ាងណា នៅក្នុងដំណើរកម្សាន្តចុងក្រោយនេះអ្នកគាំទ្រមានការចាប់អារម្មណ៍វីដេអូមួយគឺជាពេលដែល វណ្ណដា និងកីឡាករប្រដាល់ ដាវ លីឌុច បានជួបគ្នានៅឯកំពង់ផែ។ នៅក្នុងវីដេអូដែលមានការចែករំលែកនៅលើបណ្តាញសង្គមគេបានឃើញកីឡាករប្រដាល់ ដាវ លីឌុច បានបញ្ចេញស្នៀតក្បាច់គុន ខណៈដែល វណ្ណដា បានទប់ទល់នឹងស្នៀតរបស់កីឡាករប្រដាល់ល្បីឈ្មោះរូបនេះ។ បន្ទាប់មកអ្នកទាំងពីរបានឱបគ្នាដោយការគោរពមុននឹងចាកចេញរៀងៗខ្លួន។
អ្វីដែលសំខាន់កីឡាករប្រដាល់ ដាវ លីឌុច បាននិយាយនៅលើបណ្តាញសង្គមថា វណ្ណដា គឺជាគ្រូបង្វឹកថ្មីរបស់ខ្លួន។ លោកបានសរសេរថា «នេះគឺជាគ្រូបង្វឹកថ្មីរបស់ខ្ញុំ លោក វណ្ណដា កំពុងតែបង្វឹកបង្ហាត់ខ្ញុំក្បាច់គុនខ្មែរសម្រាប់ត្រៀមការប្រកួតបន្ទាប់»។
វីដេអូដែលកីឡាករ ដាវ លីឌុច បង្ហោះបានរីករាលដាលយ៉ាងឆាប់រហ័សមានអ្នកទស្សនារាប់លានជាមួយនឹងការបញ្ចេញមតិជាច្រើនជាពិសេសពួកគេបានខម្មិនលេងសើចកុំឱ្យកីឡាកររូបនេះបញ្ចេញក្បាច់គុនខ្លាំងពេកពីព្រោះខ្លាច វណ្ណដា ធ្លាក់ទឹក៕
