ប្រកាសចង់ដើរចេញវិស័យសិល្បៈដោយសារតែភាពហត់នឿយនិងមានបំណងចង់រស់នៅក្នុងជីវិតសាមញ្ញពេលនេះ Ranngo ស្រាប់តែក្រឡាស់សម្តីរបស់ខ្លួនវិញថាគ្រប់យ៉ាងគ្រាន់តែជាលេងសើចប៉ុណ្ណោះនៅក្នុងទិវាភូតកុហក។ នេះបានជំរុញឱ្យមានមតិខ្លះរិះគន់ទៅកាន់តារារ៉េបរូបនេះខណៈលោកបានចូលទៅកែសម្រួលខ្លឹមសារការបង្ហោះពីដំបូង។
អ្នកនិយមលេងបណ្តាញសង្គមមួយចំនួនអាចនឹងប្រទះឃើញពីដំណឹងដែលមានការចុះផ្សាយយ៉ាងទូលំទូលាយពីតារារ៉េប Ranngo ដោយលោកបានប្រកាសចង់ចាកចេញពីវិស័យសិល្បៈ។ អមជាមួយនឹងរូបភាពសខ្មៅមួយសន្លឹកក្នុងទឹកមុខយ៉ាងមុតមាំ Ranngo បានប្រកាសថា «សូមទោសដែលត្រូវនិយាយពាក្យនេះ… អាជីពអ្នកសិល្បៈរបស់ខ្ញុំប្រហែលជាត្រូវបញ្ចប់ត្រឹមនេះហើយ។ បទដែលចេញមុននេះ គឺជាបទចុងក្រោយដែលបងប្អូនបានឃើញខ្ញុំ។ ខ្ញុំហត់នឿយ ហើយចង់ទៅរស់នៅជីវិតសាមញ្ញវិញ។ អរគុណសម្រាប់ការស្រលាញ់កន្លងមក លាហើយអ្នកទាំងអស់គ្នា… »។
ទោះជាយ៉ាងណាក៏ដោយ ដំណឹងនេះបានជំរុញឱ្យផ្ទុះល្បីពេញបណ្តាញសង្គមរួមជាមួយនឹងការបញ្ចេញមតិវែកញែកជាច្រើន។ នៅពេលរឿងនេះបានរីករាលដាលខ្លាំងពេក Ranngo ស្រាប់តែបានក្រលាស់ពាក្យសម្តីរបស់ខ្លួនវិញដោយនិយាយថាលោកពុំបានចាកចេញពីវិស័យសិល្បៈអ្វីនោះទេ គ្រាន់តែជាការលេងសើចក្នុងថ្ងៃទិវាបុណ្យកុហក(April Fools’ Day)។ មិនត្រឹមតែប៉ុណ្ណោះលោកថែមទាំងណែនាំឱ្យទស្សនិកជនស្តាប់បទថ្មីរបស់ខ្លួនវិញ។
ទង្វើរបស់ Ranngo កុហកទស្សនិកជនបណ្តាលឱ្យមានប្រតិម្មចម្រុះដោយអ្នកខ្លះស្មានដឹងតាំងពីដំបូងចំណែកឯអ្នកខ្លះទៀតត្រូវបានតារាចម្រៀងរូបនេះបោកប្រាស់ទំនុកចិត្តរបស់ខ្លួន។ ជាការកត់សម្គាល់ Ranngo បានកែសម្រួលខ្លឹមសារការបង្ហោះតាំងពីដំបូងរបស់លោកដែលប្រកាសចាកចេញនិងផ្លាស់ប្តូររូបភាពផងដែរ។
Ranngo មានឈ្មោះពិតថា រ៉ុម រតនៈ ជាអ្នកខេត្តបាត់ដំបង។ បទពិសោធន៍របស់ Ranngo គឺធ្លាប់ឆ្លងកាត់ការប្រកួតកម្មវិធី The Rapper Cambodia និង Rapper Fighter រដូវកាលទី១រហូតមានសមិទ្ធផលបានក្លាយជាជើងខ្លាំងមួយរូបនៅក្នុងការប្រកួត ៕
