ចូលដល់រដូវវស្សាហើយ ដែលជារដូវភ្លៀងធ្លាក់ញឹកញាប់ មនុស្សជាច្រើនតែងមានគម្រោងហោះហើរទៅក្រៅប្រទេសដោយសារក្នុងរដូវនេះគឺមានអាកាសធាតុត្រជាក់និងមានទេសភាពស្រស់បំព្រង។ ទោះជាយ៉ាងណាមនុស្សមួយចំនួននៅតែមានការភ័យខ្លាច និងមិនហ៊ានជិះយន្តហោះឡើយនៅពេលដែលមានភ្លៀង ឬព្រិលធ្លាក់ខ្លាំង។ ជាការពិតណាស់ការធ្វើដំណើរតាមជើងហោះហើរក្នុងរដូវនេះអាចមានគ្រោះថ្នាក់តិចតួចនៅពេលដែលមានព្រិលធ្លាក់ ប៉ុន្តែប្រសិនបើមានភ្លៀងធ្លាក់វិញគឺវាជារឿងធម្មតានោះទេ ព្រោះភ្លៀងមិនអាចបង្កហានិភ័យដល់យន្តហោះ ដូចព្រិលឡើយ។

នេះបើយោងតាម IFL Science បានឱ្យដឹងថា កាលពីមុនអាកាសធាតុមិនល្អអាចប៉ះពាល់ដល់ប្រតិបត្តិការអាកាសចរណ៍ ប៉ុន្តែមកដល់ពេលនេះបច្ចេកវិជ្ជាទំនើបបានធ្វើឱ្យយន្តហោះកាន់តែរឹងមាំ និងដំណើរការល្អជាងមុន សូម្បីតែក្នុងលក្ខខណ្ឌគ្រោះថ្នាក់ក៏ដោយ ក៏យន្តហោះនៅតែដំណើរការបានជាធម្មតា។ ដូច្នេះយន្តហោះដឹកអ្នកដំណើរ តែងតែហោះហើរឆ្លងកាត់ព្យុះផ្គររន្ទះដោយមិនមានបញ្ហាអ្វីឡើយ នេះក៏ដោយសារបច្ចេកវិទ្យានាសម័យថ្មីនេះគឺទំនើបខ្លាំង ហេតុនេះអ្នកមិនចាំបាច់ព្រួយបារម្ភក្នុងការហោះហើរនៅពេលមានភ្លៀងធ្លាក់ខ្លាំង ឬព្យុះផ្គររន្ទះនោះទេ។

ទោះជាយ៉ាងណាក៏ដោយ ការហោះហើរនៅពេលដែលមានព្រិលធ្លាក់វិញគឺអាចបង្កឱ្យមានគ្រោះថ្នាក់តិចតួចដល់លោកអ្នក ព្រោះព្រិលអាចធ្វើឱ្យទឹកកកឡើងនៅក្នុងម៉ាស៊ីន បន្ទាប់មកទឹកកកអាចបំបែក និងបុកជាមួយស្លាបកង្ហារ ធ្វើឱ្យខូចស្លាបកង្ហារ និងធ្វើឱ្យម៉ាស៊ីនបង្ហាប់ឈប់ដំណើរការ។ ចំពោះដំណោះស្រាយប្រសិនបើអ្នកចង់ហោះហើរនៅពេលមានព្រិលធ្លាក់ យល់ល្អគួរហោះហើរពេលថ្ងៃ ព្រោះកម្តៅអាចធ្វើឱ្យទឹកកកជុំវិញរលាយ។ នេះមានន័យថា ប្រសិនបើអ្នកជិះយន្តហោះនៅពេលមានអាកាសធាតុដូចជាភ្លៀងធ្លាក់ខ្លាំង ឬព្យុះផ្គររន្ទះគឺមិនជាបញ្ហានោះទេ ប៉ុន្តែបើអ្នកជិះយន្តហោះអំឡុងពេលធ្លាក់ព្រិលវិញនោះគឺជាបញ្ហា ព្រោះវាអាចបង្កគ្រោះថ្នាក់តិចតួចដល់លោកអ្នក។

យោងតាមសេវាអាកាសធាតុជាតិសហរដ្ឋអាមេរិក (NWS) ក៏បានឱ្យដឹងថា នៅពេលព្រិលធ្លាក់ខ្លាំង ក្រុមនាវិកអាចដកការកកកុញទឹកកកបានដោយដំណើរការម៉ាស៊ីននៅក្នុងការផ្ទុះជាបន្តបន្ទាប់។ ប្រសិនបើថាមពលត្រូវបានបាត់បង់ដោយសារតែទឹកកក ឬបរិមាណទឹកច្រើនចូលក្នុងបន្ទប់ចំហេះ អ្នកបើកបរអាចព្យាយាមបញ្ឆេះម៉ាស៊ីនឡើងវិញដោយសុវត្ថិភាព ឬប្រើប្រព័ន្ធបញ្ឆេះដោយស្វ័យប្រវត្តិ។ ព្រោះសព្វថ្ងៃនេះ ភាពជឿនលឿននៃបច្ចេកវិទ្យានៅក្នុងរ៉ាដាអាកាសធាតុរបស់យន្តហោះ អាចជួយក្រុមនាវិកជៀសវាងតំបន់ដែលមានអាកាសធាតុអាក្រក់។ ដូច្នេះជាចុងក្រោយការជិះយន្តហោះនៅអំឡុងរដូវវស្សាគឺមិនអាចបង្កគ្រោះថ្នាក់ដល់លោកអ្នកឡើយ៕

ព្រះនាងតូច “Charlotte Elizabeth Diana” ដែលជាបុត្រីរបស់ព្រះអង្គម្ចាស់ William និងព្រះនាង Kate ថ្មីៗនេះបានទទួលមរតកគ្រឿងអលង្ការដ៏មានតម្លៃជាច្រើនពីស្តេច Charles ដែលជាស្តេចនៃប្រទេសអង់គ្លេស។
ព្រះនាងមានព្រះជន្មទើបតែ ៩ ព្រះវស្សាប៉ុណ្ណោះ ប៉ុន្តែបានទទួលមរតកបាត់ទៅហើយ ដោយមរតកទាំងនោះ គឺជាគ្រឿងអលង្ការប្រវត្តិសាស្ត្រ ដែលបានបន្សល់ទុកពីមួយជំនាន់ទៅមួយជំនាន់។

អ្វីដែលពិសេសនិងគួរឱ្យចាប់អារម្មណ៍ទៀតនោះគឺថា ព្រះនាងតូច Charlotte នឹងក្លាយជាអ្នកស្នងមកុដ Spencer tiara ដែលធា្លប់ជាកម្មសិទ្ធរបស់ជីដូននាង Diana នាពេលអនាគត។ មកុដ Spencer tiara ដ៏អស្ចារ្យនេះគឺមានតម្លៃខ្ពស់ខ្លាំងណាស់ត្រូវបានពាក់ដោយម្ចាស់ក្សត្រី Diana នៅក្នុងពិធីមង្គលការរបស់នាងជាមួយព្រះអង្គម្ចាស់ Charles ក្នុងឆ្នាំ ១៩៨១។ មកុដនេះរចនាឡើងក្នុងរចនាប័ទ្មកម្រងផ្កា ដែលមានបេះដូងនៅចំកណ្តាល រាយបន្តបន្ទាប់ រួមជាមួយនឹងផ្កាយ៉ាងស្រស់ស្អាតបំផុត។

លើសពីនេះមកុដក៏ត្រូវបានតុបតែងដោយត្បូងពេជ្របង្កប់នៅលើផ្ទៃខាងក្រោយមាសផងដែរ។ ក្រៅពីមកុដដ៏អស្ចារ្យនេះព្រះនាងតូច Charlotte ក៏ទទួលបានចិញ្ចៀនភ្ជាប់ពាក្យត្បូងកណ្តៀងដ៏ល្បីល្បាញរបស់ជីដូននាង Diana ផងដែរ ដោយបច្ចុប្បន្នចិញ្ចៀននេះត្រូវបានពាក់ដោយព្រះនាង Kate ដែលជាព្រះមាតារបស់ Charlotte ។ បន្ថែមពីនេះព្រះនាងតូចក៏ទទួលបានមរតកគ្រឿងអលង្ការជាច្រើនទៀតផងដែររួមមាន៖ ក្រវិលពណ៌បៃតង, ចិញ្ចៀនសន្យា, ឈុតគ្រឿងអលង្ការកីឡាអូឡាំពិក Cartier នាឡិកា Ballon Bleu Cartier ក៏ដូចជាក្រវិលអាមេទីស ខ្សែកផ្កាកូលាប និងខ្សែកត្រីមាស ដែលទាំងអស់នេះសុទ្ធតែធ្វើពីមាស ពេជ្រ និងត្បូងមានតម្លៃជាច្រើន។

គួរបញ្ជាក់ដែរថា ព្រះនាងតូច Charlotte គឺជាបុត្រីបង្កើតរបស់ព្រះអង្គម្ចាស់ William និងព្រះនាង Kate និងជាចៅស្រីបង្កើតរបស់ស្តេចអង់គ្លេសនាពេលបច្ចុប្បន្ននេះផងដែរ។ ទោះបីជាព្រះនាងទើបតែមានព្រះជន្ម ៩ ព្រះវស្សាក៏ដោយ តែព្រះនាងបានក្លាយជារាជវង្សវ័យក្មេងដំបូងបង្អស់របស់អង់គ្លេសដែលមានសិទ្ធកាន់កាប់មរតកគ្រឿងអលង្ការដ៏មានតម្លៃជាច្រើនពីស្តេចអង់គ្លេសនាពេលអនាគត ខណៈព្រះមាតាទ្រង់គឺព្រះនាង Kate ក៏ទទួលគ្រឿងអលង្ការជាច្រើនពីខ្សែរាជវង្សនេះផងដែរ ដោយទ្រពសម្បត្តិទាំងនោះមានតម្លៃសរុបប្រហែល ១៦.៥ លានផោន (ប្រមាណជាង ២១ លានដុល្លារអាមេរិក)៕

ប្រទេសឡាវ ៖ កាលពីថ្ងៃទី២០ ខែសីហា ឆ្នាំ២០២៤ សារព័ត៌មានបរទេសរាយការណ៍ថា ចំនួនយានយន្តបានចុះបញ្ជីនៅទីក្រុងវៀងចន្ទន៍ គឺលើសចំនួនពលរដ្ឋក្នុងទីក្រុងទៅទៀត ។ ហេតុនេះ វាបណ្តាលឱ្យកកស្ទះចរាចរណ៍នៅតាមដងផ្លូវ, គ្រោះថ្នា.ក់ ចរាចរណ៍, ការបំពុលបរិយាកាសកើនឡើង និងប៉ះពាល់សុខភាពពលរដ្ឋក្នុងទីក្រុងយ៉ាងខ្លាំង ។

Amphaivanh Keopradith ជាអគ្គនាយករងក្រសួងសាធារណការ និងដឹកជញ្ជូនរបស់ឡាវបញ្ជាក់ថា ចំនួនយានយន្តសរុបនៅប្រទេសឡាវ គឺស្មើជាង២លានគ្រឿង (២.៧០៥.៥៣៨គ្រឿង) នៅឆ្នាំ២០២៣ ក្នុងនោះយានយន្ត៤៣% បានចុះបញ្ជីនៅទីក្រុងវៀងចន្ទន៍ ។ ពេលចាត់ចំណាត់ថ្នាក់ប្រភេទយានយន្តទាំងនេះឃើញថា ៦៧% ជាម៉ូតូ និង១៤% ជារថយន្តមួយបាំងកន្លះ ក្រៅពីនេះ ជាយានយន្តប្រភេទផ្សេង ។

បរិមាណយានយន្តកើនឡើងកាន់តែច្រើនបានធ្វើឱ្យតាមផ្លូវនានាស្ទះចរាចរណ៍យ៉ាងខ្លាំង ជាពិសេស ក្នុងអំឡុងពេលពលរដ្ឋឡាវប្រញាប់ចេញទៅធ្វើការងាររកស៊ី ខណៈការបំពុលបរិយាកាសបានប៉ះពាល់សុខភាពពលរដ្ឋខ្លាំង ។ ក្រៅពីនេះ យានយន្តកើនឡើងបណ្តាលឱ្យកើតគ្រោះថ្នាក់ចរាចរណ៍ញឹកញាប់ទៀតផង ហើយបើតាមរបាយការណ៍បង្ហាញថា គ្រោះថ្នាក់ចរាចរណ៍កើតឡើងនៅឡាវ ស្មើរហូតដល់៦.៨០៦ករណី កាលពីឆ្នាំ២០២៣ ។

ហេតុនេះ ដើម្បីទប់ស្កាត់បញ្ហាទាំងអស់ រដ្ឋាភិបាលឡាវសហការជាមួយក្រសួងសាធារណការ និងដឹកជញ្ជូន នឹងដំណើរការរថយន្តក្រុងពិសេសសម្រាប់អ្នកដឹកដំណើរ ដែលជាផ្នែកមួយរបស់គម្រោងដឹកជញ្ជូនប្រកបដោយនិរន្តរភាព ។ គម្រោងនេះនឹងជួយឱ្យហេដ្ឋារចនាសម្ព័ន្ធដឹកជញ្ជូននៅទីក្រុងវៀងចន្ទន៍ ស្របតាមស្តង់ដារអន្តរជាតិ និងចំណាយប្រាក់ចំនួន៩៩លានដុល្លារអាមេរិក ដែលទទួលបានពីធនាគារអភិវឌ្ឍន៍អាស៊ី (ADB), ធនាគារវិនិយោគអឺរ៉ុប (EIB), អង្គការប្រទេសនាំចេញប្រេង (OPEC) និងថវិការដ្ឋាភិបាល ។

គម្រោងដឹកជញ្ជូនអ្នកដំណើរតាមរថយន្តពិសេសនេះ រួមទាំងការចាប់ផ្តើមប្រើប្រាស់រថយន្តក្រុងអគ្គិសនី ដែលពលរដ្ឋឡាវនឹងងាយស្រួលធ្វើដំណើរ, ស្អាត និងមានសុវត្ថិភាព ។ ក្រៅពីនេះ រដ្ឋាភិបាលឡាវក៏មានគម្រោងកែលម្អផ្លូវតូចៗសម្រាប់សុវត្ថិភាពអ្នកថ្មើរជើង, កែលម្អផ្លូវជិះកង់ និងចំណតរថយន្តតាមដងផ្លូវ ។ គម្រោងទាំងអស់មានគោលបំណងកាត់បន្ថយការកកស្ទះចរាចរណ៍, កាត់បន្ថយការបំពុលបរិយាកាស និងបង្កើនប្រសិទ្ធភាពការដឹកជញ្ជូនក្នុងទីក្រុងវៀងចន្ទន៍ ៕

សីតុណ្ហភាពលើពិភពលោកកើនឡើងបានធ្វើឱ្យផ្ទាំងទឹកកកធំៗនៅតំបន់ប៉ូលរលាយយ៉ាងឆាប់រហ័ស ហើយពេលផ្ទាំងទឹកកករលាយ កម្រិតទឹកសមុទ្រកាន់តែកើនឡើងខ្ពស់ ។ ហេតុនេះ វានឹងធ្វើឱ្យតំបន់ចំនួន៥ បាត់បង់ពីពិភពលោកជារៀងរហូត ដោយសារអាកាសធាតុក្តៅខ្លាំង ។ តើតំបន់ទាំងនេះស្ថិតនៅប្រទេសណាខ្លះ?

១-ប្រទេស Maldives ៖ ភ្ញៀវទេសចរគួរតែប្រញាប់មកកម្សាន្តនៅទីនេះ ដោយសារ Maldives មានទីតាំងនៅកណ្តាលមហាសមុទ្រ ។ អ្នកវិទ្យាសាស្ត្រមកពីអង្គការ NASA និងអ្នកជំនាញធរណីវិទ្យារបស់អាមេរិកបានដាស់តឿនជាច្រើនឆ្នាំថា នៅឆ្នាំ២០៥០ ផ្ទៃដីប្រមាណជិត៨០% របស់ប្រទេស Maldives នឹងបាត់បង់ ។

បច្ចុប្បន្ន ពលរដ្ឋប្រទេសនេះកំពុងប្រឈមនឹងទឹកជំនន់កាន់តែញឹកញាប់ ។ កាលពីមុន មានទឹកជំនន់ចាប់ពី២លើក ទៅ៣លើកក្នុង១ឆ្នាំ ប៉ុន្តែបច្ចុប្បន្ន មានទឹកជំនន់ចំនួន២លើកក្នុង១ខែ ។

២-ទីក្រុង Venice ប្រទេសអ៊ីតាលី ៖ Venice គឺជាទីក្រុងដ៏ស្រស់ស្អាតមួយរបស់ប្រទេសអ៊ីតាលី ប៉ុន្តែអ្នកជំនាញនិយាយថា រយៈពេល៧០ឆ្នាំទៀត ទីក្រុងនេះនឹងលិចក្នុងទឹកសមុទ្រ ។ បច្ចុប្បន្ន អគារ និងលំនៅឋានផ្សេងៗរងផលប៉ះពាល់យ៉ាងខ្លាំង ដោយសារការចូលចតរបស់នាវាបណ្តាលឱ្យមានទឹករលកប៉ះពាល់អគារ ។

៣-បឹង Dead Sea ៖ សារព័ត៌មានអាមេរិករាយការណ៍ថា អាកាសធាតុក្តៅខ្លាំងបានធ្វើឱ្យបរិមាណទឹកបឹង Dead Sea ស្រកចុះចំនួន១,២ម៉ែត្រក្នុង១ឆ្នាំ ។ រីឯក្រុមហ៊ុនជាច្រើនបានបូមទឹកបឹងនេះ ដែលសម្បូរដោយវីតាមីនយកទៅធ្វើអាជីវកម្ម ។ ហេតុនេះ វាកាន់តែធ្វើឱ្យបរិមាណទឹកបឹងធ្លាក់ចុះខ្លាំង ។

៤-ប្រជុំកោះ Galápagos ប្រទេសអេក្វាឌ័រ ៖ ប្រជុំកោះនេះស្ថិតនៅកណ្តាលមហាសមុទ្រប៉ាស៊ីហ្វិក ប្រទេសអេក្វាឌ័រ ដែលវាជាតំបន់ធម្មជាតិ និងដែនដីរបស់សត្វជិតផុតពូជជាច្រើនប្រភេទ ។ ប៉ុន្តែអ្នកវិទ្យាសាស្ត្របារម្ភពីកម្រិតទឹកសមុទ្រកើនឡើងដោយសារទឹកកករលាយ នឹងធ្វើឱ្យប៉ះពាល់ដល់ប្រជុំកោះ ។

៥-ទ្វីប Antarctica ស្ថិតនៅប៉ូលខាងត្បូង ៖ Antarctica គឺជាទ្វីបធំលំដាប់ទី៥ លើពិភពលោក កំពុងតែប្រឈមនឹងបញ្ហាទឹកកករលាយយ៉ាងឆាប់រហ័ស និងបណ្តាលឱ្យកម្រិតទឹកសមុទ្រពិភពលោកកើនឡើងខ្ពស់ផងដែរ ។

របាយការណ៍ជាច្រើនលើកឡើងដូចៗគ្នាថា ទឹកកកនៅទ្វីបនេះរលាយ គឺជាបញ្ហាធំរបស់ពិភពលោក និងពិបាកដោះស្រាយ ដោយសារសីតុណ្ហភាពពិភពលោកកើនឡើង ។ វានឹងធ្វើឱ្យសត្វផ្សេងៗរស់នៅតំបន់ត្រជាក់ផុតពូជនាពេលឆាប់ៗ ហើយអ្នកជំនាញបានអំពាវនាវឱ្យប្រទេសនានាជួយគ្នាថែរក្សាបរិស្ថាន ៕

ប្រទេសឥណ្ឌា ៖ ស្របពេលតម្លៃខ្ទឹមស បានកើនឡើងយ៉ាងខ្លាំងនៅប្រទេសឥណ្ឌានាពេលបច្ចុប្បន្ន ក្រុមអាជីវករនៅតាមផ្សារនានាបានយកខ្ទឹមសក្លែងក្លាយ ដែលផលិតពីស៊ីម៉ងត៍មកដាក់លក់ឱ្យអតិថិជន ។ វាធ្វើឱ្យសមត្ថកិច្ចឥណ្ឌាឈឺក្បាលយ៉ាងខ្លាំង ដោយសារត្រូវដើរត្រួតពិនិត្យនៅតាមផ្សារ និងចាប់យកខ្ទឹមសក្លែងក្លាយ ។

កាលពីថ្ងៃទី២០ ខែសីហា ឆ្នាំ២០២៤ អ្នកប្រើប្រាស់បណ្តាញសង្គមឥណ្ឌាបានចែកចាយវីដេអូមួយ គឺអ្នកស្រី ផាទីល ជាភរិយារបស់អតីតមន្ត្រីសមត្ថកិច្ច បានទៅទិញខ្ទឹមសនៅតូបតាមផ្លូវមួយកន្លែង ប៉ុន្តែពេលអ្នកស្រីត្រឡប់មកផ្ទះវិញ ហើយរៀបចំបកសំបកខ្ទឹមស ឃើញថា សំបករបស់វារឹងខ្លាំងរហូតដល់បកពុំចេញ ។ រីឯក្បាលខ្ទឹមសវិញ ធ្ងន់យ៉ាងខ្លាំង ហើយអ្នកស្រីក៏ពិនិត្យមើលឱ្យបានច្បាស់ ទើបដឹងថា វាជាខ្ទឹមសក្លែងក្លាយធ្វើពីស៊ីម៉ងត៍ ។

អ្នកស្រី ផាទីល រៀបរាប់ថា អ្នកស្រីបានពិនិត្យមើលថង់ខ្ទឹមស ដែលទិញមកឃើញថា មានខ្ទឹមសផលិតពីស៊ីម៉ងត៍លាយឡំជាមួយខ្ទឹមសពិតប្រាកដ រហូតដល់អ្នកស្រីពុំដឹងថា តើមួយណាក្លែងក្លាយ មួយណាពិត ប្រសិនបើមិនបកសំបកទេនោះ ពីព្រោះនៅពេលទិញ អ្នកស្រីពុំបានចាប់វាមើលទេ ។

គេហទំព័រ NDTV របស់ឥណ្ឌារាយការណ៍ថា ហេតុការណ៍លក់ខ្ទឹមសក្លែងក្លាយនេះបានកើតឡើងនៅទីក្រុង Akola រដ្ឋ Maharashtra ក្រោយពីតម្លៃខ្ទឹមសបានកើនឡើងខ្ពស់ កាលពីពាក់កណ្តាលខែសីហា ឆ្នាំ២០២៤ ។ តម្លៃខ្ទឹមស បានកើនឡើងចាប់ពី៨០រូពី (ឬស្មើជាង៣ពាន់រៀល) ក្នុង១គីឡូក្រាម មកស្មើនឹង២៤០រូពី (ឬជិត១ម៉ឺនរៀល) ក្នុង១គីឡូក្រាម ។

កាលពីពាក់កណ្តាលខែសីហា ឆ្នាំ២០២៤ តុលាការកំពូលឥណ្ឌាបានប្រកាសថា ខ្ទឹមស គឺជាបន្លែ និងអនុញ្ញាតឱ្យអាជីវករអាចលក់ខ្ទឹមសក្នុងផ្សារបន្លែ និងគ្រឿងទេស ក្រោយពីមានការជជែកគ្នាអស់ជាច្រើនឆ្នាំថា តើខ្ទឹមស គឺជាបន្លែ ឬគ្រឿងទេស? ការប្រកាសរបស់តុលាការកំពូលនឹងក្លាយជាប្រយោជន៍សម្រាប់កសិករ និងអាជីវករលក់ដូរ ។ តម្រូវការបរិភោគខ្ទឹមសយ៉ាងច្រើននៅឥណ្ឌា បានធ្វើឱ្យតម្លៃកើនឡើងជាបន្តបន្ទាប់អាស្រ័យលើទិន្នផលផលិតតាមរដូវកាល ។

ទីប្រឹក្សាវេជ្ជសាស្ត្រជាន់ខ្ពស់ម្នាក់បានណែនាំឱ្យពលរដ្ឋចេះពិនិត្យមើលខ្ទឹមសពិតប្រាកដ គឺចំណិតរបស់វាពុំស្មើគ្នា និងមានសំបកស្តើងស្រដៀងសន្លឹកក្រដាសងាយស្រួលបក ។ ប៉ុន្តែចំណិតខ្ទឹមសក្លែងក្លាយមានប្រវែងស្មើគ្នាទាំងអស់ និងមានសំបកក្រាស់ពិបាកបក ។ ម្យ៉ាងទៀត ខ្ទឹមសពិត គឺមានសាច់ហាប់ណែន ហើយពេលយកវាទៅត្រាំទឹក វានឹងលិចក្នុងទឹក ខណៈខ្ទឹមសក្លែងក្លាយនឹងអណ្តែតទឹក ដោយសារមានសារធាតុគីមី ៕

ប្រទេសសិង្ហបុរី ៖ កាលពីថ្ងៃទី១៩ ខែសីហា ឆ្នាំ២០២៤ សារព័ត៌មាន AFP រាយការណ៍ថា សន្ទស្សន៍សកម្មភាពបរិស្ថាន (EPI) ប្រចាំឆ្នាំ២០១៤ របស់សាកលវិទ្យាល័យ Yale បានចាត់ចំណាត់ថ្នាក់ស្តង់ដារអនាម័យ និងទឹកនៅប្រទេសផ្សេងៗ ដោយពិចារណាពីផលប៉ះពាល់សុខភាព និងទឹកផឹកគ្មានសុវត្ថិភាព ជាពិសេស ហានិភ័.យនៃការឆ្លងបាក់តេរីបណ្តាលឱ្យរាគរូស ។

របាយការណ៍ការចាត់ចំណាត់ថ្នាក់បញ្ជាក់ថា សិង្ហបុរីបានជាប់ចំណាត់ថ្នាក់ទី១ ជាប្រទេសមានទឹកស្អាត និងសុវត្ថិភាពបំផុតលើពិភពលោក ក្នុងចំណោមការចាត់ចំណាត់ថ្នាក់ប្រទេសចំនួន១៨០ ដោយសារសិង្ហបុរីមានអនាម័យខ្ពស់ និងជាប្រទេសនាំមុខគេលើពិភពលោក ក្នុងការកម្ចាត់ និងយកទឹកស្អុយមកប្រើប្រាស់ឡើងវិញ ។ វាជាការរួមចំណែកអភិវឌ្ឍសេដ្ឋកិច្ច និងសង្គម និងការប្រើប្រាស់ទឹកដោយមានសុវត្ថិភាព ។

ការចាត់ចំណាត់ថ្នាក់ហានិភ័យសុខភាពដែលពាក់ព័ន្ធនឹងទឹក និងអនាម័យរបស់ប្រទេសនីមួយៗ គឺនឹងទទួលបានពិន្ទុផ្អែកតាមផលប៉ះពាល់សុខភាពក្នុងរយៈពេល១ឆ្នាំ ឬអង្គការសុខភាពពិភពលោក (WHO) ហៅថា «ការប៉ះពាល់សុខភាពប្រចាំឆ្នាំ» ។ ពិន្ទុខ្ពស់បំផុតស្មើនឹង១០០ពិន្ទុ មានន័យថា ជាការប៉ះពាល់សុខភាពតិចបំផុតលើពិភពលោក ខណៈសូន្យពិន្ទុ មានន័យថា ការប៉ះពាល់សុខភាពខ្លាំងបំផុតលើពិភពលោក ។

ប្រទេសសិង្ហបុរីបានទទួលចំណាត់ថ្នាក់ទី១ ក្នុងរបាយការណ៍សន្ទស្សន៍សកម្មភាពបរិស្ថាន ប្រចាំឆ្នាំ២០២៤ ដោយសិង្ហបុរីទទួលបានពិន្ទុខ្ពស់រហូតដល់៩៩,៩ពិន្ទុ និងវ៉ាដាច់អ៊ីតាលី និងអង់គ្លេស ដែលប្រទេសទាំងពីរទទួលបានពិន្ទុត្រឹមតែ៩៨,២ពិន្ទុប៉ុណ្ណោះ ។ បន្ទាប់មក គឺប្រទេសស្វីស និងអាល្លឺម៉ង់ ទទួលបាន៩៨ពិន្ទុ និង៩៧,៩ពិន្ទុ តាមលំដាប់ ។

ចំណែកប្រទេសជាប់ចំណាត់ថ្នាក់ចុងក្រោយបង្អស់ក្នុងរបាយការណ៍សន្ទស្សន៍សកម្មភាពបរិស្ថាន គឺភាគច្រើនស្ថិតនៅទ្វីបអាហ្វ្រិក ដូចជា ៖
-ម៉ាដាហ្គាស្ការ ១២,៩ពិន្ទុ
-នីហ្សេរីយ៉ា ១២,២ពិន្ទុ
-ឡេសូតូ ៩,៤ពិន្ទុ
-សាធារណរដ្ឋអាហ្វ្រិកកណ្តាល (Central African Republic) ៨,៩ពិន្ទុ និង
-ឆាដ ៤,៣ពិន្ទុ ។

រីឯចំណាត់ថ្នាក់ទឹកស្អាតរបស់ប្រទេសក្នុងតំបន់អាស៊ាន រួមមាន ៖
-ព្រុយណេ ទី២៧
-ម៉ាឡេស៊ី ទី៩០
-វៀតណាម ទី៩៤
-ថៃ ទី១០០
-ហ្វីលីពីន ទី១១១
-កម្ពុជា ទី១១៤
-មីយ៉ាន់ម៉ា ទី១២២
-ឥណ្ឌូណេស៊ី ទី១២៨ និង
-ឡាវ ទី១៣១ ។

របាយការណ៍នេះបញ្ជាក់ថា ការចាត់ចំណាត់ថ្នាក់ទឹកស្អាត មានន័យថា ពលរដ្ឋគ្រប់រូបអាចប្រើប្រាស់ទឹកស្អាត, ការត្រៀមទុកទឹកស្អាត និងគុណភាពទឹកដែលគ្រួសារនីមួយៗប្រើប្រាស់សម្រាប់សុខភាព ព្រមទាំងតម្រូវការទឹកស្អាតរបស់គ្រួសារក្នុង១ថ្ងៃ ។ ហេតុនេះ ពលរដ្ឋនឹងអាចប្រើប្រាស់ទឹកស្អាតយ៉ាងងាយស្រួល និងគ្មានការចម្លងមេរោគ ជាពិសេស ការបំពុលពីទឹកស្អុយ ៕

សហរដ្ឋអាមេរិក ៖ សារព័ត៌មានបរទេសរាយការណ៍កាលពីថ្ងៃទី២១ ខែសីហា ឆ្នាំ២០២៤ ថា បណ្តាក្រុមហ៊ុនផលិតបន្ទះសូឡាអាមេរិកបានអំពាវនាវឱ្យក្រសួងពាណិជ្ជកម្មដំឡើងពន្ធបន្ទះសូឡាថៃ និងវៀតណាម គិតចាប់ពីខែកក្កដា ឆ្នាំ២០២៤ ក្រោយពីប្រទេសទាំងពីរបាននាំចូលបន្ទះសូឡាមកអាមេរិកកើនឡើង ។ ​ថៃ និងវៀតណាមកំពុងប្រឈមនឹងការស៊ើបអង្កេតជុំវិញការចោទប្រកាន់ថា បានធ្វើពាណិជ្ជកម្មអយុត្តិធម៌ដែលមានតម្លៃរាប់ពាន់លានដុល្លារអាមេរិក ។

កាលពីខែឧសភា ឆ្នាំ២០២៤ ក្រសួងពាណិជ្ជកម្មអាមេរិកបានចាប់ផ្តើមត្រួតពិនិត្យបន្ទះសូឡាផលិតពីស៊ីលីកុននៅប្រទេសវៀតណាម, ថៃ, ម៉ាឡេស៊ី និងកម្ពុជា ក្រោយពីក្រុមហ៊ុនផលិតបន្ទះសូឡាអាមេរិកមួយចំនួននិយាយថា បន្ទះសូឡានាំចូលមកលក់នៅអាមេរិកមានតម្លៃទាប និងទទួលបានការគាំទ្រថវិកាពីចិន ។ ពួកគេលំបាកប្រកួតប្រជែងជាមួយទំនិញនាំចូលមានតម្លៃថោកជាងអាមេរិក ។

គណៈកម្មការក្រុមហ៊ុនផលិតបន្ទះសូឡាអាមេរិកបានដាក់លិខិតទៅក្រសួងពាណិជ្ជកម្មឱ្យត្រួតពិនិត្យការធ្វើពាណិជ្ជកម្មបន្ទះសូឡា ដោយបញ្ជាក់ថា ការនាំចេញបន្ទះសូឡាពីថៃ និងវៀតណាម បានកើនឡើងយ៉ាងខ្លាំង ។ គេរំពឹងថា ការស៊ើបអង្កេតផ្នែកពាណិជ្ជកម្មនឹងធ្វើឡើងនៅឆ្នាំ២០២៤ ហើយគណៈកម្មការនេះនឹងតំណាងឱ្យក្រុមហ៊ុនអាមេរិក ព្រមទាំង Hanwha Qcells និង First Solar ផងដែរ ។

ការត្រួតពិនិត្យនេះនឹងឈានដល់ការប្រមូលពន្ធខ្ពស់ចាប់ពីខែកក្កដា ឆ្នាំ២០២៤ តទៅ ប្រសិនបើអាជ្ញាធរអាមេរិកបញ្ជាក់ថា ការធ្វើពាណិជ្ជកម្មបន្ទះសូឡាមិនយុត្តិធម៌ក្នុងការស៊ើបអង្កេតបឋមនៅដើមខែតុលា ឆ្នាំ២០២៤ ។ បន្ទាប់មក នឹងឈានដល់ការប្រមូលពន្ធថយក្រោយ ចំនួន៩០ថ្ងៃ ក្រោយពីចេញសេចក្តីសម្រេច ។ ប៉ុន្តែក្រសួងពាណិជ្ជកម្មថៃ និងវៀតណាមពុំទាន់ឆ្លើយតបពាក់ព័ន្ធនឹងការប្រមូលពន្ធទេ ។

អត្រាពន្ធថ្មីរបស់អាមេរិកនឹងធ្វើឱ្យប៉ះពាល់ដល់វៀតណាមខ្លាំងជាងគេ ពីព្រោះត្រូវប្រឈមនឹងការប្រមូលពន្ធខ្ពស់ ។ អាមេរិកប៉ាន់ស្មានថា ភាពខុសគ្នារវាងតម្លៃបន្ទះសូឡាលក់នៅវៀតណាម និងតម្លៃនាំចេញ ឬហៅថា «វិសមភាពតម្លៃទីផ្សារ» គឺស្មើជាង២៧០% ហើយតម្លៃបន្ទះសូឡាវៀតណាមខ្ពស់ជាងថៃរ ហូតដល់៣ដង ។

លិខិតរបស់បណ្តាក្រុមហ៊ុនផលិតបន្ទះសូឡាអាមេរិកបញ្ជាក់ថា ប្រទេសទាំងពីរបាននាំចេញបន្ទះសូឡាមកអាមេរិកកើនឡើង ។ ជាក់ស្តែង កាលពីត្រីមាសទី២ ឆ្នាំ២០២៤ ការនាំចូលបន្ទះសូឡាពីវៀតណាម និងថៃ បានកើនឡើង៣៩% និង១៧% តាមលំដាប់ បើធៀបនឹងត្រីមាសទី១ ឆ្នាំ២០២៤ ។ វាធ្វើឱ្យបន្ទះសូឡាអាមេរិកមានបញ្ហា ហើយក្រសួងពាណិជ្ជកម្ម និងគណៈកម្មការពាណិជ្ជកម្មអន្តរជាតិគួរតែប្រមូលពន្ធថយក្រោយ ។

អ្នកជំនាញផ្នែកពាណិជ្ជកម្មនិយាយថា វិធានការប្រមូលពន្ធថ្មីនេះនឹងធ្វើឱ្យប៉ះពាល់យ៉ាងខ្លាំងដល់ប្រទេសវៀតណាមដែលត្រូវបង់ពន្ធខ្ពស់ជាងមុន ដោយសារអាមេរិកចាត់ទុកថា ប្រព័ន្ធសេដ្ឋកិច្ចវៀតណាមមិនផ្អែកលើយន្តការទីផ្សារ (Non-Market Economy) ៕