កម្ពស់របស់មនុស្សយើងនៅលើផែនដីនេះគឺមានភាពខុសៗគ្នា ដោយអ្នកខ្លះខ្ពស់ដូចត្នោត និងអ្នកខ្លះទៀតទាបខ្លាំង ជាហេតុបណ្តាលឱ្យមានសំនួរមួយចោទសួរថា តើកម្ពស់របស់មនុស្សយើងអាចប៉ះពាល់ដល់អាយុជីវិតដែរឬទេ? ហើយរវាងមនុស្សដែលមានកម្ពស់ខ្ពស់ និងទាបមួយណាមានអាយុវែងជាង? នេះបើយោងតាមការសិក្សាស្រាវជ្រាវឆ្នាំ ២០២៣ បានឱ្យដឹងថា មនុស្សដែលមានកម្ពស់ទាបទំនងមានអាយុវែងជាងមនុស្សដែលមានកម្ពស់ខ្ពស់។

យោងតាមការសិក្សាបានបង្ហាញថា ក្នុងអំឡុងឆ្នាំ ២០១៤ ក្រុមស្រាវជ្រាវបានធ្វើការសិក្សាទៅលើបុរសជនជាតិជប៉ុន និងអាមេរិកជាង ៨,០០៣ នាក់។ ហើយប៉ុន្មានឆ្នាំក្រោយមក សុខភាព និងរបៀបរស់នៅរបស់អ្នកចូលរួមក្នុងការសិក្សាត្រូវបានត្រួតពិនិត្យយ៉ាងយកចិត្តទុកដាក់។ ក្នុងចំណោមអ្នកចូលរួមនោះ មានបុគ្គលដែលមានកម្ពស់ទាបប្រមាណ ១.២០០ នាក់បានឈានដល់កម្រិតអាយុ ៩០ និង ១០០ឆ្នាំ។

ដូច្នេះការស្រាវជ្រាវបង្ហាញថាបុរសដែលមានកម្ពស់ទាបត្រូវបានការពារដោយហ្សែនមួយហៅថា FOXO3 ដែលរួមចំណែកដល់ការវិវត្តនៃរូបរាង ដោយពួកវាអាចមានសមត្ថភាពពន្យារអាយុជីវិត។ លើសពីនេះ បុគ្គលទាំងនេះច្រើនតែមានកម្រិតអាំងស៊ុយលីនក្នុងឈាមទាប និងមានហានិភ័យទាបនៃជំងឺមហារីក។ ជាពិសេស មនុស្សដែលមានកម្ពស់ក្រោម 1m57 មានទំនោររស់នៅបានយូរជាងមនុស្សដែលមានកម្ពស់លើសពី 1m62។ ដូច្នេះការរកឃើញទាំងនេះគឺជាការស្រាវជ្រាវដ៏គួរឱ្យចាប់អារម្មណ៍មួយ ដែលបញ្ជាក់ថាកត្តាហ្សែន និងសរីរវិទ្យាជាច្រើនអាចដើរតួយ៉ាងសំខាន់ក្នុងការកំណត់សុខភាព និងអាយុវែងរបស់មនុស្ស។

នេះបើតាមអ្នកជំនាញផ្នែកប្រជាសាស្រ្តលោក Jean-Marie Robine ក៏បានពន្យល់ដែលថា មូលហេតុដែលមនុស្សខ្ពស់ទំនងមានអាយុខ្លីជាងមនុស្សទាបគឺដោយសារមនុស្សខ្ពស់មានកោសិកាច្រើនជាងមនុស្សដែលមានកម្ពស់ទាប។ ជាលទ្ធផល រ៉ាឌីកាល់សេរីនិងសារធាតុបង្កមហារីក អាចមានឥទ្ធិពលខ្លាំងទៅលើកោសិកាទាំងនោះ ជាហេតុធ្វើឱ្យមនុស្សខ្ពស់ច្រើនតែប្រឈមមុខនឹងហានិភ័យនៃជំងឺមហារីក។

យោងតាមការស្រាវជ្រាវពីវិទ្យាស្ថានជំងឺមហារីកជាតិអាមេរិកក៏បានឱ្យដឹងទៀតថា កម្ពស់ត្រូវបានផ្សារភ្ជាប់ជាវិជ្ជមានជាមួយនឹងហានិភ័យនៃជំងឺមហារីក។ នៅពេលដែលមនុស្សខ្ពស់កាន់តែចាស់ ស្ថានភាពសរសៃឈាមនឹងរឹង សាច់ដុំរួញ ហើយបន្ទុកលើបេះដូងកើនឡើង ធ្វើឱ្យការផ្គត់ផ្គង់ឈាមកាន់តែពិបាក។ ទោះជាយ៉ាងណាអ្នកជំនាញសង្កត់ធ្ងន់ថាកម្ពស់គ្រាន់តែជាកត្តាមួយក្នុងចំណោមកត្តាជាច្រើនដែលទាក់ទងនឹងអាយុវែងប៉ុណ្ណោះ។ កត្តាដែលសំខាន់បំផុតនៃសុខភាព និងអាយុវែងរួមមានបរិយាកាសរស់នៅ ទម្លាប់រស់នៅប្រចាំថ្ងៃ លក្ខខណ្ឌសេដ្ឋកិច្ច និងទិដ្ឋភាពជាច្រើនទៀតនៃជីវិត៕

អ្នកណាថាទ្វីបអាហ្វ្រិកសម្បូរទៅដោយប្រទេសក្រីក្រច្រឡំធំហើយ ស្ងាត់ៗប្រទេសមួយក្នុងទ្វីបនេះកំពុងមានការអភិវឌ្ឍខ្លាំងមិនគួរឱ្យជឿធ្វើឱ្យពិភពលោកកោតសរសើរយ៉ាងខ្លាំង នៅពេលដែលប្រទេសអេត្យូពីប្រកាសហាមប្រើរថយន្តសាំង ដោយប្តូរទៅប្រើប្រាស់រថយន្តអគ្គិសនីវិញ ដើម្បីរក្សាបរិស្ថាន និងដើរឱ្យទាន់សម័យកាល។
នេះបើយោងតាម CNN រថយន្តអគ្គិសនីល្បីៗជាច្រើនកំពុងមានវត្តមាននៅលើទឹកនៃប្រទេសអាហ្រ្វិកមួយនេះ ដោយបច្ចុប្បន្នអេត្យូពីមានរថយន្តអគ្គិសនីប្រមាណ ១០ ម៉ឺនគ្រឿងទូទាំងប្រទេស។

ដោយសារតែគោលនយោបាយដ៏អង់អាចរបស់ប្រទេសអេត្យូពីកាលពីដើមឆ្នាំ ២០២៤ ក្នុងការហាមឃាត់ការនាំចូលរថយន្តដឹកអ្នកដំណើរដែលប្រើសាំងទាំងអស់។ រដ្ឋាភិបាលអេត្យូពីបានប៉ាន់ប្រមាណថាចំនួនរថយន្តអគ្គិសនីនឹងកើនឡើងបួនដងនៅឆ្នាំ ២០៣២ ធ្វើឱ្យប្រទេសអេត្យូពីបានក្លាយជាប្រទេសដំបូងគេក្នុងពិភពលោកដែលបានហាមឃាត់ការនាំចូលរថយន្តសាំង។ ប្រទេសនៅអាហ្រ្វិកនេះក៏បានកែសម្រួលពន្ធគយលើរថយន្តនាំចូលផងដែរ ដោយពន្ធលើយានជំនិះដែលប្រើសាំងមានរហូតដល់ ២០០% មុនពេលការហាមឃាត់ ខណៈដែលពន្ធនាំចូលលើរថយន្តអគ្គិសនីដែលបានដំឡើងពេញលេញមានត្រឹមតែ ១៥% ប៉ុណ្ណោះ។

នេះគឺជាផ្នែកមួយនៃកិច្ចខិតខំប្រឹងប្រែងដែលដឹកនាំដោយរដ្ឋាភិបាលក្នុងការដាក់រថយន្តអគ្គិសនីបន្ថែមទៀតនៅតាមដងផ្លូវ។ អត្រាពន្ធទាបក៏ជំរុញការផលិតរថយន្តអគ្គិសនីក្នុងស្រុកផងដែរ។ រថយន្តរាប់រយគ្រឿងត្រូវបានប្រមូលផ្តុំដោយក្រុមហ៊ុន Belayneh Kindie Group ដែលមានមូលដ្ឋាននៅប្រទេសអេត្យូពី ដោយប្រើប្រាស់គ្រឿងបន្លាស់ដែលនាំចូលពីប្រទេសចិន។ នាយក Besufekad Shewaye បានប្រាប់ CNN ថាពន្ធនាំចូលគឺ “ស្ទើរតែសូន្យភាគរយ” លើគ្រឿងបន្លាស់រថយន្តអគ្គិសនីដែលបានដំឡើងនៅក្នុងប្រទេសអេត្យូពី។

Shewaye បាននិយាយថា “សព្វថ្ងៃនេះ ម្ចាស់រថយន្តភាគច្រើនចូលចិត្តរថយន្តអគ្គិសនី ជាពិសេសរថយន្តធុនស្រាល… ដោយតម្រូវការកំពុងកើនឡើងពីមួយថ្ងៃទៅមួយថ្ងៃ”។ បច្ចុប្បន្នការរីកចម្រើននៃរថយន្តអគ្គិសនីនៅទូទាំងទ្វីបអាហ្រ្វិកគឺកំពុងមានការកើតឡើងមិនគួរឱ្យជឿ ទោះបីជាគ្មានការហាមឃាត់ក៏ដោយ។ នៅទីក្រុងណៃរ៉ូប៊ី ប្រទេសកេនយ៉ា ម៉ូតូអគ្គិសនីកំពុងមានការរីកចម្រើនខ្លាំងមិនធ្លាប់មាន ហើយនៅបណ្តាប្រទេសផ្សេងទៀតក្នុងទ្វីបអាហ្វ្រិកកំពុងសម្លឹងមើលរថយន្តអគ្គិសនីបន្ថែមទៀត។ នេះសរបញ្ជាក់ឱ្យឃើញថាប្រទេសជាច្រើននៅទ្វីបអាហ្វ្រិកសព្វថ្ងៃកំពុងមានការអភិវឌ្ឍខ្លាំងមិនគួរឱ្យជឿ៕

ថ្មីៗនេះតុក្កតា Hello Kitty បានកំពុងផ្ទុះការចាប់អារម្មណ៍យ៉ាងខ្លាំងនៅលើទីផ្សារម៉ូដជុំវិញពិភពលោក ហើយត្រូវបានលក់ដាច់អស់ពីស្តុក មិនចាញ់តុក្កតា Labubu ឡើយ។ យោងតាមទស្សនាវដ្តី Vogue នាពេលបច្ចុប្បន្ននេះ Hello Kitty បានក្លាយជានិន្នាការដ៏ពេញនិយមមួយមិនថាកុមារឬមនុស្សវ័យកណ្តាលសុទ្ធតែចូលចិត្តតុក្កតាឆ្មាដ៏ល្បីល្បាញនេះ បន្ទាប់ពីក្រុមហ៊ុនផលិតតុក្កតាបានរៀបចំពិធីខួបកំណើតគម្រប់ ៥០ ឆ្នាំរបស់តួអង្គឆ្មា Hello Kitty។

កាលពីថ្ងៃទី ១៦ ខែសីហា ឆ្នាំ២០២៤ កន្លងទៅ សារព័ត៌មាន Hollywood Reporter បានឱ្យដឹងថា ផលិតផលម៉ូដដូចជាសម្លៀកបំពាក់មានរូប Kitty វ៉ែនតា Kitty ស្បែកជើង Kitty និងសម្ភារៈជាច្រើនទៀតរបស់ម៉ាកល្បីៗ Adidas, Champion, Crocs, Forever 21 និង OPI បានកំពុងលក់ដាច់អស់គ្មានសល់ ហើយទំនិញខ្លះក៏ត្រូវបានលក់ដាច់អស់ពីស្តុកតែម្តង។ លើសពីនេះតារាម៉ូឌែលល្បីៗជាច្រើនក៏បានស្លៀកឈុតតុក្កតា Kitty បង្ហាញម៉ូដលើឆាកអន្តរជាតិផងដែរ ដែលនេះនឹងធ្វើឱ្យឧស្សាហកម្មម៉ូដ Hello Kitty កាន់តែល្បីល្បាញខ្លាំងឡើង។

នាយកប្រតិបត្តិក្រុមហ៊ុន Forever 21 Winnie Park បានប្រាប់ទស្សនាវដ្តី Vogue ថាមុនថ្ងៃបើកសម្ពោធក្នុងខែកក្កដា អ្នកគាំទ្របានតម្រង់ជួរនៅមុខហាងដើម្បីទិញផលិតផលម៉ូដរបស់យើង។ ហើយម៉ាកយីហោម៉ូដតាមដងផ្លូវផ្សេងទៀតក៏បានដាក់បង្ហាញផលិតផលម៉ូដ Hello Kitty ផងដែរ។ តុក្កតា Hello Kitty គឺជាតួអង្គប្រឌិតដែលរចនាដោយ Yuko Shimizu នៃក្រុមហ៊ុនជប៉ុន Sanrio បានចាប់ផ្តើមនៅឆ្នាំ ១៩៧៤ និងបង្ហាញខ្លួនដំបូងនៅសហរដ្ឋអាមេរិកក្នុងឆ្នាំ ១៩៧៦។ ឆ្មាដ៏ល្បីល្បាញនេះមានរូបរាងស្អាត និងគួរឱ្យស្រឡាញ់ គឺជាផលិតផលនៃវប្បធម៌ kawaii (cute)។

គួរបញ្ជាក់ដែរថា អស់ជាច្រើនទស្សវត្សមកហើយ Hello Kitty នៅតែមានឥទ្ធិពលយ៉ាងខ្លាំងលើវិស័យជាច្រើន រួមទាំងម៉ូដ និងសម្រស់ផងដែរ។ តុក្កតានេះត្រូវបានគេជឿថានឹងជំនួសតំណែងតុក្កតា Labubu នាពេលខាងមុខ។ ដោយតារាពិភពលោកមួយរូបគឺ Jennie Blackpink កាលពីពេលថ្មីៗនេះក៏បានស្លៀកខោជើងធំដែលមានលំនាំតុក្កតា Kitty ដែរ ហើយ Jisoo Blackpink ក៏ជាអ្នកគាំទ្រដ៏កំពូលម្នាក់របស់ Hello Kitty ផងដែរ មិនថាខ្សែដៃ ខ្សែក ស្រោមទូរស័ព្ទ បន្តោងសោរ សុទ្ធតែមានរូបតុក្កតា Kitty ទាំងអស់៕

ប្រទេសអាហ្សង់ទីន ៖ វាបានធ្វើឱ្យអ្នកវិទ្យាសាស្ត្រ និងអ្នកស្រាវជ្រាវជាច្រើននាក់ឆ្ងល់ជាខ្លាំង ពេលឃើញកោះអាថ៌កំបាំងមួយមានរាងជារង្វង់មូល និងអាចផ្លាស់ទីដោយខ្លួនឯង ។ អ្នកបានឃើញកោះនេះសួរថា តើវាកើតឡើងដោយសារធម្មជាតិ ឬជាទីតាំងរបស់មនុស្សក្រៅភព?

ប៉ារ៉ាណា គឺជាទន្លេវែងបំផុតនៅទ្វីបអាមេរិក ដែលមានប្រវែងរហូតដល់៤.៨៨០គីឡូម៉ែត្រ និងហូរឆ្លងកាត់ប្រទេសចំនួន៣ ដូចជា ៖ ប្រេស៊ីល, ប៉ារ៉ាហ្គាយ និងអាហ្សង់ទីន ។ ប៉ុន្តែទន្លេនេះមានរឿងរ៉ាវប្លែកៗ ហើយក្នុងចំណោមនោះមានរឿងរ៉ាវមួយធ្វើឱ្យបណ្តាអ្នកស្រាវជ្រាវឆ្ងល់ជាខ្លាំង គឺកោះនៅបរិវេណតំបន់ដីសណ្តឈ្មោះថា «The Eye» ឬឈ្មោះ «EL Ojo» ដែលភាសាអេស្ប៉ាញ មានន័យថា «កែវភ្នែក» ។

កោះ The Eye មានរាងជារង្វង់មូលស្ថិតនៅតំបន់ឌែលតាប៉ារ៉ាណា និងនៅជិតទីក្រុងបួណូស អៃរេស ។ កោះនេះមានអង្កត់ផ្ចិតប្រមាណ១២០ម៉ែត្រ ហើយវាអាចបម្លាស់ទីដោយខ្លួនឯង ស្រដៀងនឹងកែវភ្នែកមនុស្សកំពុងសម្លឹងមើលបរិវេណជុំវិញ ។

លោក សេសជិអូ ណេអុសប៊ីល័រ ជាអ្នកដឹកនាំថតភាពយន្តជនជាតិអាហ្សង់ទីន បានឃើញកោះនេះដោយចៃដន្យ ក្នុងអំឡុងពេលលោកស្វែងរកទីតាំងថតភាពយន្តរឿងមនុស្សក្រៅភព និងរឿងរ៉ាវអាថ៌កំបាំង ។ ពីដំបូង លោកមានគម្រោងថតភាពយន្តនៅលើកោះនេះ ប៉ុន្តែពេលលោកត្រឡប់មកកោះម្តងទៀត ស្រាប់តែឃើញថា វាបានប្តូរទីតាំង ។

ភស្តុតាងអាចពិសោធន៍ថា កោះនេះបម្លាស់ទីបាន គឺដោយសាររូបភាពថតពីលើអាកាសរបស់ Google Earth ។ ពេលគេយករូបភាពកោះដែលថតខុសពេលវេលា ឬថតខុសថ្ងៃគ្នាមកប្រៀបធៀប គេនឹងឃើញយ៉ាងច្បាស់ថា កោះបានបម្លាស់ទីនៅបរិវេណជិតៗ ។ រហូតមកដល់ពេលនេះ ពុំទាន់មានការបកស្រាយច្បាស់លាស់ថា ហេតុអ្វីទើបវាអាចបម្លាស់ទីបែបនេះ?

អ្នកវិទ្យាសាស្ត្រជឿថា កោះ The Eye បានកើតឡើងនៅឆ្នាំ២០០៣ ហើយបើទោះជាមតិផ្សេងៗលើកឡើងពីកោះខុសៗគ្នា ប៉ុន្តែគ្មានការបញ្ជាក់តាមវិទ្យាសាស្ត្រពីកំណើតរបស់កោះទេ ។ ការលើកឡើងមួយតាមវិទ្យាសាស្ត្រដែលបកស្រាយពីរាងមូលរបស់កោះ គឺកើតឡើងដោយសារទឹកត្រជាក់ធ្វើឱ្យវាបម្លាស់ទី ។ អ្នកវិទ្យាសាស្ត្រខ្លះទៀតជឿថា អាចមានទឹកត្រជាក់នៅក្រោមកោះ ដែលមានសីតុណ្ហភាព និងពណ៌ខុសគ្នាពីទឹកនៅបរិវេណជុំវិញ ។

ប៉ុន្តែនេះគ្រាន់តែជាការសន្និដ្ឋានប៉ុណ្ណោះ ពីព្រោះបច្ចុប្បន្ន គ្មានភស្តុតាងផ្នែកវិទ្យាសាស្ត្រច្បាស់លាស់ពាក់ព័ន្ធនឹងកំណើតរបស់កោះឡើយ ។ ក្រុមអ្នកស្រាវជ្រាវ និងអ្នកវិទ្យាសាស្ត្រប្រាប់ថា កោះរង្វង់មូលអាចបម្លាស់ទីនេះមានលក្ខណៈដូចគ្នានឹងតំបន់ផ្សេងៗលើពិភពលោក ដូចជា ៖ ប្រទេសហ្វាំងឡង់, តួកគី, អ៊ីតាលី, ស៊ែប៊ី, រូម៉ានី និងឥណ្ឌា ព្រមទាំងកោះសិប្បនិម្មិតដែលមនុស្សបង្កើតឡើងសម្រាប់រស់នៅ គឺកោះនៅប្រទេសប៉េរូ ។

កោះអណ្តែតទឹកទាំងនេះភាគច្រើនកើតឡើងពីរុក្ខជាតិប្រមូលផ្តុំគ្នា រហូតដល់របូតពីច្រាំងអណ្តែតទៅកណ្តាលទឹក ។ ពេលយូរបន្តិច រុក្ខជាតិទាំងនេះក៏ធំលូតលាស់ និងដុះពាសពេញធ្វើឱ្យឫសវាអណ្តែតទៅឆ្ងាយ ។ ហេតុនេះ ឫសរុក្ខជាតិពុំអាចដុះដល់បាតទឹកទេ វានឹងប្រើប្រាស់អុកស៊ីសែនស្រូបពីឫសជួយឱ្យដើមវាដុះនៅកណ្តាលទឹក ទើបវាក្លាយជាកោះអណ្តែតទឹក ។

នេះជាការបកស្រាយសម្រាប់ការអណ្តែតរបស់កោះ ប៉ុន្តែពុំអាចបកស្រាយពីការបម្លាស់ទីទៅបរិវេណក្បែរៗកោះបានទេ ទើបធ្វើឱ្យអ្នកជឿលើអប៉ីជំនឿ និងជឿរឿងមនុស្សក្រៅភព ជឿថា កោះនេះពុំបានកើតឡើងតាមធម្មជាតិទេ វាជាកោះសិប្បនិម្មិតបង្កើតឡើងដោយមនុស្សក្រៅភព ។ ប៉ុន្តែរូបភាពកោះដែលបានថតទុកអស់រយៈពេលជិត២០ឆ្នាំ គឺចាប់ពីឆ្នាំ២០០៣ ជាភស្តុតាងបង្ហាញថា កោះមានដើមកំណើតតាំងពីពេលមុននេះ ។

លោក សេសជិអូ ណេអុសប៊ីល័រ ចូលចិត្តកោះ The Eye យ៉ាងខ្លាំង ហើយលោកព្យាយាមរកវិធីស្រាវជ្រាវកោះជាមួយក្រុមវិស្វករដើម្បីពិសោធន៍ថា តើវាកើតឡើងតាមធម្មជាតិ ឬយ៉ាងណា? នៅឆ្នាំ២០១៦ លោកបានរៃអង្គាសប្រាក់ចំនួន៥ម៉ឺនដុល្លារអាមេរិកដើម្បីស្រាវជ្រាវកោះ ប៉ុន្តែលោកបរាជ័យ ។ បច្ចុប្បន្ន កោះអាថ៌កំបាំងអាចបម្លាស់ទីដោយខ្លួនឯង នៅតែជាចម្ងល់របស់អ្នកស្រាវជ្រាវបន្តទៀត ៕

ប្រទេសចិន ៖ ស្របពេលសីតុណ្ហភាពកើនឡើងខ្ពស់នៅប្រទេសចិន វាមិនត្រឹមតែធ្វើឱ្យមនុស្សក្តៅប៉ុណ្ណោះទេ ប៉ុន្តែរថយន្តក៏ក្តៅដូចគ្នាដែរ ។ គេឃើញរថយន្តជាច្រើនគ្រឿងនៅចិនមានសភាពហើមប៉ោង មិនថាផ្នែកមុខ, ផ្នែកក្រោយ និងចំហៀង ហើយអ្នកប្រើប្រាស់បណ្តាញសង្គមហៅថា «រថយន្តមានផ្ទៃពោះ» ។

អ្នកប្រើប្រាស់បណ្តាញសង្គមចិន ជាពិសេស បណ្តាញសង្គម X (ឬ Twitter) បានជជែកគ្នាយ៉ាងច្រើនពាក់ព័ន្ធនឹងវីដេអូមួយ ដែលបង្ហាញពីរថយន្តជាច្រើនគ្រឿងមានសភាពប៉ោងនៅផ្នែកខាងក្រៅ ស្រដៀងនឹងមនុស្សមានផ្ទៃពោះ ។ ម្ចាស់រថយន្តជាច្រើនបារម្ភពីបញ្ហានេះ ហើយពួកគេបានសាកសួរពីមូលហេតុពិតប្រាកដ ដែលធ្វើឱ្យរថយន្តប៉ោងជាបន្តបន្ទាប់ ។

Jennifer Cheng ជាអ្នកសារព័ត៌មានដែលមានលំនៅឋាននៅសហរដ្ឋអាមេរិក ប៉ុន្តែបច្ចុប្បន្ន មករស់នៅប្រទេសចិន បានចែកចាយវីដេអូមួយក្នុងបណ្តាញសង្គម X ព្រមទាំងសរសេរថា ៖ «វាមិនមែនជារឿងកំប្លែងទេ! រថយន្តផលិតនៅចិនមានផ្ទៃពោះ ដោយសារអាកាសធាតុក្តៅខ្លាំង» ។

រូបភាពវីដេអូខាងលើត្រូវបានគេយកមកជជែកគ្នាយ៉ាងច្រើន និង Share យ៉ាងឆាប់រហ័សក្នុងបណ្តាញសង្គម ហើយមានចំនួនអ្នកទស្សនាយ៉ាងហោចណាស់ ស្មើនឹង៧៥ម៉ឺន៧ពាន់លើក ។ គេឃើញរថយន្តទំនើបជាច្រើនគ្រឿង ដែលចតនៅតាមទីសាធារណៈមានសភាពប៉ោងដូចៗគ្នា ។

សារព័ត៌មានចិនរាយការណ៍ថា ស្របពេលសីតុណ្ហភាពកើនឡើងខ្ពស់បំផុតនៅចិន ទើបថ្នាំការពារផ្នែកខាងក្រៅរថយន្តហើមបែបនេះ ។ រីឯអ្នកប្រើប្រាស់បណ្តាញសង្គមជាច្រើនឃើញហើយអស់សំណើច ខណៈអ្នកខ្លះទៀតបារម្ភ និងសន្និដ្ឋានខុសៗគ្នា ។

ទោះយ៉ាងណា មនុស្សមួយចំនួនបានធូរចិត្តបន្តិចពាក់ព័ន្ធនឹងរថយន្តប៉ោង ដោយសារវាមិនពាក់ព័ន្ធនឹងបច្ចេកទេសផលិតរថយន្តទេ ។ ប៉ុន្តែវាពាក់ព័ន្ធនឹងសីតុណ្ហភាពកើនឡើងខ្ពស់ ដែលពុំធ្លាប់កើតឡើងនៅប្រទេសចិន ។ បើទោះជារថយន្តទាំងនេះបានបិទស្រទាប់ Film សម្រាប់ការពារកំដៅថ្ងៃក្តី ប៉ុន្តែពេលសីតុណ្ហភាពកើនឡើងខ្ពស់ វានឹងធ្វើឱ្យស្រទាប់ការពារនេះពុំអាចទប់ទល់បាន ។

ហេតុនេះ ដើម្បីកាត់បន្ថយផលប៉ះពាល់ដោយសារអាកាសធាតុក្តៅខ្លាំង អ្នកជំនាញបានណែនាំឱ្យម្ចាស់រថយន្តប្រើប្រាស់ស្រទាប់ Film (ដែលមានរាងជាសន្លឹកស្តើងៗសម្រាប់បិទរថយន្តការពារកំដៅថ្ងៃ) និងប្រើប្រាស់កាវមានគុណភាពល្អ ។ ក្រៅពីនេះ គួរតែចៀសវាងចតរថយន្តហាលថ្ងៃនៅពេលមេឃក្តៅខ្លាំង ៕

ប្រទេសថៃ ៖ កាលពីថ្ងៃទី២៣ ខែសីហា ឆ្នាំ២០២៤ សារព័ត៌មានថៃរាយការណ៍ថា មហាជនផ្ទុះការរិះគ.ន់ ថា តើសមត្ថកិច្ចបាត់ទៅណាអស់ ទើបបណ្តោយឱ្យយុវតីម្នាក់យកវ៉ាលិសអគ្គិសនីប្រើក្នុងអាកាសយានដ្ឋានមកជិះលើផ្លូវ «វីផាវ៉ាឌី រាំងស៊ីត» ក្នុងទីក្រុងបាងកក និងឱនមុខចុចទូរស័ព្ទ ពុំខ្វល់ពីយានជំនិះផ្សេងទៀត ។ ការរិះគ.ន់ ពីសំណាក់មហាជន គឺក្រោយមានការចែកចាយវីដេអូយុវតីនេះយ៉ាងច្រើនក្នុងបណ្តាញសង្គម ។

នៅក្នុងវីដេអូ គេបានឃើញយុវតីខាងលើពុំពាក់មួកសុវត្ថិភាព ជិះវ៉ាលិសធ្វើដំណើរអគ្គិសនីនៅតាមផ្លូវជាមួយរថយន្តតូច-ធំជាច្រើនគ្រឿងទៀត ហើយធ្វើឱ្យអ្នកប្រើប្រាស់បណ្តាញសង្គមឃើញរូបភាពនេះរិះគន់ថា វាជាទង្វើពុំសមរម្យទាល់តែសោះ និងខុសច្បាប់ ។

បច្ចុប្បន្ន វ៉ាលិសធ្វើដំណើរអគ្គិសនីទទួលបានការពេញនិយមខ្លាំងក្នុងបណ្តាញសង្គម ពីព្រោះការផលិតវ៉ាលិសនេះឡើង គឺដើម្បីបង្កលក្ខណៈងាយស្រួលដល់អ្នកដំណើរប្រើប្រាស់ក្នុងអាកាសយានដ្ឋានតែប៉ុណ្ណោះ ។ វ៉ាលិសនេះអាចទ្រទ្រង់ទម្ងន់ខ្លួនមនុស្សបាន ប៉ុន្តែយុវតីខាងលើបែរជាយកវ៉ាលិសមកជិះពេញផ្លូវធ្វើឱ្យមហាជនឃើញហើយបារម្ភពីសុវត្ថិភាពការធ្វើដំណើរ ។

វីដេអូយុវតីជិះវ៉ាលិសអគ្គិសនីតាមដងផ្លូវត្រូវបានមហាជនរិះគន់យ៉ាងខ្លាំង ដោយសារនាងពុំពាក់មួកសុវត្ថិភាព និងគ្មានឧបករណ៍សម្រាប់ការពារខ្លួនអ្វីទាំងអស់ ។ លើសពីនេះ នាងថែមទាំងអង្គុយលើវ៉ាលិសរបស់ខ្លួននៅពីក្រោយគូទរថយន្តក្រុង ក្នុងទីក្រុងបាងកកទៀតផង ។

មហាជនសួរថា តើទង្វើនេះសមរម្យ និងស្របច្បាប់ប្រទេសថៃដែរឬទេ? ហើយវ៉ាលិសអគ្គិសនីសម្រាប់ប្រើប្រាស់ក្នុងអាកាសយានដ្ឋាន ពិតជាអាចជិះតាមផ្លូវបែបនេះ មែនទេ? យុវតីនេះមិនខ្វល់នឹងយានជំនិះផ្សេងទៀត ដោយសារនាងរវល់ឱនមុខចុចទូរស័ព្ទដៃគ្រប់ពេលវេលា ។ ហេតុនេះ មហាជនសំណូមពរឱ្យស្ថាប័នពាក់ព័ន្ធត្រួតពិនិត្យករណីនេះជាបន្ទាន់ ដើម្បីសុវត្ថិភាពតាមផ្លូវ ។

អ្នកប្រើប្រាស់បណ្តាញសង្គមម្នាក់និយាយថា ៖ «យុវតីនេះអាចជាជនជាតិចិន និងមិនខ្លាចស្លាប់» ។ បន្ទាប់មក ជនជាតិថៃម្នាក់ក៏ឆ្លើយតបទៅមតិនេះថា ៖ «នាងធ្លាប់ជិះវ៉ាលិសអគ្គិសនីនៅចិន ប៉ុន្តែនាងពុំអាចជិះនៅថៃបានទេ» ។ រីឯជនជាតិថៃផ្សេងទៀតថា ៖ «នាងចុចទូរស័ព្ទបណ្តើរ ជិះវ៉ាលិសបណ្តើរ ដោយសារនាងរវល់ឆែកមើលផែនទីផ្លូវ» ។

គួរបញ្ជាក់ថា វ៉ាលិសអគ្គិសនីអាចរត់បានក្នុងចម្ងាយលឿនបំផុតស្មើនឹង១៣គីឡូម៉ែត្រក្នុង១ម៉ោង និងរត់លើផ្លូវរហូតដល់១០គីឡូម៉ែត្រឯណោះ ហើយវ៉ាលិសប្រភេទនេះមានឧបករណ៍ដំឡើង និងបន្ថយល្បឿនគ្រប់បែបយ៉ាង ។ ប្រទេសនានាពុំអនុញ្ញាតឱ្យពលរដ្ឋជិះវ៉ាលិសនេះនៅតាមផ្លូវទេ ដូចជា ៖ ជប៉ុនបានហាមជិះវ៉ាលិសនេះដាច់ខាត បើគ្មានលិខិតអនុញ្ញាត ថែមទាំងពិន័យប្រាក់ទៀតផង ខណៈចិនក៏មានច្បាប់ហាមជិះវ៉ាលិសនេះនៅតាមផ្លូវដែរ ៕