ពិធីការិនី ពេជ្រ សិរីរ័ត្ន ដែលវិលត្រឡប់មកវិញក្នុងអាជីពនិងទទួលបានការចាប់អារម្មណ៍តាមរយៈកម្មវិធីសខ្មៅ កំពុងក្លាយជាផ្ទាំងស៊ិបនៃការរិះគន់ពីអ្នកលេងបណ្តាញសង្គមបន្ទាប់ពីវីដេអូត្រូវបានបង្ហោះ។ អ្នកប្រើប្រាស់ហ្វេកប៊ុកបានរិះគន់មិនសំចៃមាត់ព្រោះតែការថតម៉ូតសម្អាងការនេះគឺដូចជាឈុតសៀមមិនមែនជាឈុតប្រពៃណីខ្មែរនោះទេ។ អ្នកមួយចំនួនសម្តែងការហួសចិត្តយ៉ាងខ្លាំង និងបានចោទសួរថា តើគួរបន្ទោសខាងសម្អាង ឬក៏បន្ទោសតួជាអ្នកស្លៀក។

កាលពីថ្ងៃទី២២ សីហា មានវីដេអូបង្ហោះចេញពីគណនីមួយដែលបង្ហាញពីពិធីការិនី ពេជ្រ សិរីរ័ត្ន និង លោក អេឡិច ចាន់ត្រា បានរួមការងារថតសម្អាងជាមួយគ្នា ខណៈការថតឈុតអាពាហ៍ពិពាហ៍របស់អ្នកទាំងពីរគឺទទួលបានការចាប់អារម្មណ៍ពីអ្នកគាំទ្រគួរឱ្យកត់សម្គាល់។ យ៉ាងណា ការស្លៀកឈុតប្រពៃណីមួយរបស់ ពេជ្រ សិរិរ័ត្ន កំពុងក្លាយជាប្រធានបទជជែកវែកញែកបែកខ្ទិះ ត្រូវមហាជនប្រើបណ្តាញសង្គមរិះគន់មិនសំចៃព្រោះតែឈុតនោះត្រូវបានគេនិយាយថាជាឈុតសៀម។

រូបភាពវីដេអូរបស់ពិធីការិនី ពេជ្រ សិរីរ័ត្ន បានធ្វើឱ្យលេចនូវមតិជាច្រើនដោយមានការលើឡើងថា «ហេតុអ្វីសិល្បករខ្មែរយើងមួយចំនួន គ្មានយល់ថាអ្វីគួរ ឬមិនគួរដូច្នេះ !? ទាក់ទងនឹងរឿងប្រពៃណី ឬ វប្បធម៌គួរណាស់ជៀសសៀមឱ្យបាន កុំឱ្យសាសន៍ហ្នឹងវាសើច ! ឈុតខ្មែរស្អាតច្រើនណាស់ ឬគាត់មិនដឹងថានេះជាឈុតសៀម ? ចុះខាងសម្អាងដឹងហើយថាជាឈុតសៀមម្ដេចនៅតែពាក់ឱ្យគាត់ទៀត ? ទាំងឈុត ទាំងភ្លេង សៀមទាំងដុល ស្លៀកឈុតសៀមមធ្យម ងំដាក់បទសៀមទៀត ។ ឥឡូវគួរបន្ទោសខាងសម្អាង ឬអ្នកស្លៀក ?

នាំសាសន៍វាមើលងាយថា វប្បធម៌ខ្មែរមានស្បៃជារបស់ថៃកាន់តែខ្លាំង»។

គណនីផ្សេងទៀតបានរិះគន់ ពេជ្រ សិរីរ័ត្ន ថា«រឿងអីមិនដឹង តែចង់ស្លៀក។មិនដែលឃើញតារាសៀម promote ឈុតខ្មែរទេ មានតែតារាខ្មែរ ,គេមិនមែនមិនដឹងទេតែមនុស្សដែលដឹងហើយនៅប្រព្រឹត្តហើយគេគិតថាវាជាសិទ្ធិរបស់ គេចង់ស្លៀកអីក៏បាន។ គេមិនខ្វល់ថាវាទៅជាយ៉ាងណានោះទេ, ឈុតសៀម ភ្លេងសៀម មោទនភាពបែបសៀម កុំភ្លេចដាក់Credit ឱ្យគេផងថានេះជាឈុតសម្លៀកបំពាក់សៀម, ហេតុអ្វីស្លៀកឈុតថៃ?ហើយស្អាតត្រង់ណា?សម្លៀកបំពាក់ខ្មែរស្អាតថ្លៃថ្នូរហេតុអ្វីគាត់មិនពាក់?មោទនភាពជាមួយ សៀមម្ល៉េះ តិចគេដៀលទៀត ឱ្យចេះខ្មាស ចេះអៀន គេផងលោក ពេលគេដៀលគេមិនមែនដៀល ២ ៣ នាក់ហ្នឹងទេ គេដៀលមួយប្រទេស»៕

ថ្មីៗនេះអ្នកប្រើប្រាស់បណ្តាញសង្គមទិកតុកមានការភ្ញាក់ផ្អើលយ៉ាងខ្លាំងបន្ទាប់ពីមានគណនីទិកតុកក្លែងក្លាយប្រើប្រាស់រូបប្រូហ្វាល់តារាចម្រៀង នាយ ចឺម បង្ហោះថា សេង សុខឃីម បានស្លាប់ហើយ។ ឃើញមានគេប្រមាថអាយុជីវិតរបស់ខ្លួនបែបនេះ សេង សុខឃីម បានចេញមកបញ្ជាក់ថានាងនៅរស់ធម្មតាទេកុំដើម្បីតែភាពល្បីរបស់ខ្លួនយកនាងទៅពាក់ព័ន្ធនឹងរឿងរញ៉េរញ៉ៃ ខណៈនាងចង់ធ្វើជាតារាម្នាក់ដែលថ្លៃថ្នូរ មិនចង់មានរឿងអាស្រូវនោះទេ។

នៅល្ងាចថ្ងៃទី២២ ខែសីហា សេង សុខឃីម ដែលទស្សនិកជនស្គាល់ថាជាអតីតសង្សារនាយ ចឺម បានចេញមកបញ្ជាក់ជាមួយនឹងវីដេអូខ្លីមួយអមដោយខ្លឹមសារចំណងជើងថា «ខ្ញុំនៅរស់ធម្មតាហើយ ខ្ញុំអត់ចង់និយាយច្រើនទេគ្រាន់តែចង់ប្រាប់ថាខ្ញុំគ្រាន់តែចង់បានជីវិតមួយទៅស្ងប់សុខ។ ជីវិតមួយដែលអត់ពាក់ព័ន្ធនឹងរឿងអ្នកណាខ្ញុំគ្រាន់តែចង់ធ្វើការងារសិល្បៈដែលខ្ញុំស្រលាញ់បំផុត។ ទំនេរពីការងារខ្ញុំនៅផ្ទះមើលកូន។ ទំនេរមកផ្ទះនៅខេត្តលេងដូចជាអត់មានចង់ដឹងរឿងណាគេទេ អ៊ីចឹងកុំដើម្បីតែភាពល្បីអ្នក យកខ្ញុំទៅពាក់ព័ន្ធនឹងរឿងរញ៉េរញ៉ៃខ្ញុំអត់ចង់ពាក់ព័ន្ធអីទេ ចង់បានតែប៉ុណ្ណឹងឯង»។

ការចេញមកបញ្ជាក់របស់ សេង សុខឃីម ថានាងនៅរស់ធម្មតានេះគឺគេបានឃើញគណនីទិកតុកមួយប្រើប្រាស់រូបភាពប្រូហ្វាល់នាយចឺម បានបង្ហោះជាច្រើនដងបញ្ជាក់ថា សេង សុខឃីម ស្លាប់ ។ ការបង្ហោះនេះបានធ្វើឱ្យអ្នកលេងបណ្តាញសង្គមទិកតុកផ្ទុះការចាប់អារម្មណ៍យ៉ាងខ្លាំងនិងបានចោទសួរថាជារឿងពិតឬមិនពិត ខណៈរឿងនេះបានដឹងដល់សាម៉ីខ្លួនទើប សេង សុខឃីម ចេញមកបញ្ជាក់ជូនទស្សនិកជន។

នៅក្នុងវីដេអូ សេង សុខឃីម ក៏បាននិយាយបន្ថែមដែរថា «ជីវិតមនុស្សម្នាក់ៗមានតម្លៃណាស់ កុំយកជីវីតគេទៅលេងសើច នាងចង់បានជីវិតមួយស្ងប់សុខ ស្រលាញ់សិល្បៈ ចង់ថត ពេលទំនេរនៅជាមួយកូននិងគ្រួសារ នាងចង់ធ្វើជាតារា អ្នកសិល្បៈម្នាក់មានតែការងារនិងគ្រួសារ មិនចង់មានរឿងផ្សេងៗចូលមកជីវិតនាងរញ៉េរញ៉ៃកុំនាំរឿងបែបនេះ ឬរឿងអាស្រូវអ្វីទៀត នាងសុំតែបែបនេះទេ នាងសុំធ្វើជាតារាថ្លៃថ្នូរម្នាក់»។

គួរបញ្ជាក់ផងដែរថា កាលពីកន្លងមកនេះ តារាចម្រៀង នាយ ចឺម ធ្លាប់បានចេញមកបញ្ជាក់ពីគណនីក្លែងក្លាយផ្សេងៗជាច្រើនដោយប្រកាសមិនទទួលខុសត្រូវនោះទេ គណនីទិកតុកលោកមានតែមួយគត់ដែលមានអ្នកតាមដានជិត៣លាននាក់៕

កាលពីកន្លងមកនេះពិធីការិនីដ៏មានឈ្មោះបោះសំឡេង ខៀវ សានសាណា បានធ្វើឱ្យទស្សនិកជនមានការចាប់អារម្មណ៍ភ្លូកទឹកភ្លូកដីបន្ទាប់ពីអាចធ្វើឱ្យ ជី ដេវីត និង វណ្ណដា បានចាប់ដៃគ្នាផ្អើលពេញប្រទេស។ នាពេលថ្មីៗនេះ ពិធីការិនីឆ្នើមរូបនេះបានធ្វើឱ្យមហាជនសរសើរម្តងទៀតបន្ទាប់ពីឈរបកប្រែភាសាបរទេសដោយផ្ទាល់និងភ្លាមៗតែម្តងដោយមិនកាន់ស្គ្រីបឡើយ។

តាមរយៈវីដេអូមួយដែលបានចែករំលែកនៅលើបណ្តាញសង្គមទិកតុកមានឈ្មោះថា «Mrr Phing» កាលពីពេលថ្មីៗនេះបានបង្ហាញពីសកម្មភាពរបស់ពិធីការិនី ខៀវ សានសាណា ឈរបកប្រែប្រកបដោយទំនុកចិត្តនិងមានភាពច្បាស់លាស់នៅក្នុងកម្មវិធីមួយដែលនិយាយពីយន្តហោះ។ ការបកប្រែភាសាអង់គ្លេសពីជនបរទេសមកជាខេមរៈភាសារបស់ អ្នកនាង សាណា បានធ្វើឱ្យមានការចាប់អារម្មណ៍យ៉ាងខ្លាំងពីអ្នកគាំទ្រ ព្រោះតែការបកប្រែនោះគឺផ្ទាល់ៗនិងភ្លាមៗគ្មានការកាន់ស្គ្រីបមើលនោះទេ។

ពិធីការិនីដ៏ឆ្នើមរូបនេះបានធ្វើឱ្យមានការសរសើរជាថ្មីបន្ទាប់ពីអ្នកនាងបានរួមចំណែកជួយឱ្យ ជី ដេវីត និង វណ្ណដា បានចាប់ដៃគ្នាក្នុងពិធីមង្គលការ ហេង វិសាល និង ជា ស្រីនា កាលពីខែមីនា ឆ្នាំ២០២៤ ដែលជារឿងដ៏កម្រមួយស្ទើរតែមិនជឿថាអាចកើតឡើងបាន។ ព្រឹត្តិការណ៍ដ៏កម្ររវាង ជី ដេវីត និង វណ្ណដា បានជួបមុខគ្នាតទល់និងចាប់ដៃគ្នាកាលពីកន្លងមកនេះ អ្នកនាង សាណា ក៏បាននិយាយថាគ្មានអ្វីប្រសើរជាងក្តីស្រលាញ់ដោយគ្មានការខឹងតបតអ្វីទាំងអស់ ហើយទស្សនិកជនកោតសរសើរអ្នកនាងយ៉ាងខ្លាំងទៅលើរឿងនេះ។

គួរបញ្ជាក់ថាអ្នកនាង ខៀវ សានសាណា ត្រូវបានគេចាត់ទុកថាជាពិធីការិនីលេខធ្លោមួយរូបក្នុងប្រទេសដែលបានកាន់កម្មវិធីថា្នក់ជាតិ អន្តរជាតិជាបន្តបន្ទាប់ទោះបីជាប្រឡូកអាជីពនេះ២៤ឆ្នាំហើយក្តី។ អ្នកនាងធ្លាប់បានទម្លាយឈរលើអាជីពនេះជាង២០ឆ្នាំនៅតែមានទីផ្សារគឺការគោរពពេលវេលា គោរពមនុស្សជុំវិញ ហើយយើងធ្វើអ្វីគឺធ្វើឱ្យច្បាស់លាស់ ខណៈ ជីវិតឯកជនមិនភាពរញ៉េរញៃពេក កេរ្តិ៍ឈ្មោះរឿងអាស្រូវល្អ៕

ទេព ពិសិដ្ឋ បានស្ងប់ស្ងាត់មួយរយៈដោយបានលួងចិត្តអ្នកគាំទ្រតាមរយៈការទម្លាក់អាល់ប៊ុមទី៣របស់ខ្លួន ខណៈបទ « taste love» កំពុងទទួលបានការគាំទ្រពីហ្វេនៗសូម្បីតែស្រីស្អាត ឡូរីន សង្សាររបស់ វណ្ណដា ក៏ពេញចិត្តបទនេះលេងនៅលើបណ្តាញសង្គមទិកតុកផងដែរ ហើយចំនួននៃការយកបទនេះលេងមានជិត៥០ម៉ឺនវីដេអូហើយ។

ដូចមហាជនជ្រាបមកហើយថាតារាចម្រៀង ទេព ពិសិដ្ឋ ទទួលបានការចាប់អារម្មណ៍យ៉ាងខ្លាំងពីសំណាក់មហាជន រួមទាំងអ្នកក្នុងចង្កោមសិល្បៈបន្ទាប់ពីទម្លាក់បទ «20 OUT NOW» កាលពីខែសីហា ឆ្នាំ២០២៣។ បទនេះ ទេព ពិសិដ្ឋ ទទួលបានផ្លែផ្កាយ៉ាងខ្លាំងមិនថានៅលើបណ្តាញសង្គមហ្វេកប៊ុក ឬទិកតុក ភាគច្រើនគឺឮសូរតែបទនេះ ជាពិសេសការងារសិល្បៈរបស់ម្ចាស់ពាន The Voice Kid Cambodia រដូវកាលទី២ រូបនេះកាន់តែហូរចូលមិនលោះថ្ងៃទាំងបណ្តាខេត្តនិងនៅរាជធានីភ្នំពេញ។ រូបលោកទទួលបានប្រជាប្រិយភាពកាន់តែខ្លាំងលើអាជីពសិល្បៈបន្ទាប់ពីបានផ្លាស់ប្តូរច្រៀងបទមនោសញ្ចេតនាមកច្រៀងរ៉េប។

បន្ទាប់ពីបានសាងភាពល្បីល្បាញតាមរយៈបទ « 20 Out Now » ទេព ពិសិដ្ឋ បានស្ងប់ស្ងាត់អស់រយៈពេលជាច្រើនខែមិនសូវបង្ហាញសកម្មភាពតាមបណ្តាញសង្គម ខណៈក៏បានបង្ហាញតាមគណនីរបស់ខ្លួនដែរថា ផេករបស់លោកត្រូវបានគេហែក។ ទោះយ៉ាងណាភាពស្ងប់ស្ងាត់នេះ ទេព ពិសិដ្ឋ បានលួងចិត្តរបស់អ្នកគាំទ្រដោយបានទម្លាក់អាល់ប៊ុមទី៣របស់ខ្លួនកាលពីខែកក្កដា នេះ។ បទមួយក្នុងចំណោមបទទាំង៧ នៅក្នុងអាល់ប៊ុមទី៣ មានចំណងជើងថា « taste love » ឬ រសជាតិស្នេហា កំពុងតែទទួលបានការគាំទ្រពីទស្សនិកជន។ ត្រង់ឃ្លា «ស្នេហាមានរសជាតិយ៉ាងមិចទៅ តើអាចប្រាប់បងបានទេណាពាលពៅ..» បានក្លាយជានិន្នាការដ៏ល្បីរបស់ ទេព ពិសិដ្ឋ បន្ទាប់ពីបទ 20 OUT Now ។

មិនត្រឹមតែអ្នកគាំទ្រ ទេព ពិសិដ្ឋ ប៉ុណ្ណោះទេដែលពេញចិត្តបទចម្រៀងនេះ សូម្បីតែស្រីស្អាត ឡូរីន គូស្នេហ៍របស់ វណ្ណដា ក៏បានយកបទនេះមកលេងនៅលើបណ្តាញសង្គមរបស់នាងផងដែរ។ បទថ្មីរបស់ ទេព ពិសិដ្ឋ គឺមានការចូលលេងជិត៥០ម៉ឺនវីដេអូ ខណៈមានការស្តាប់ជាង២លានដងនៅលើបណ្តាញសង្គមយូធូបដែលជាបទទទួលបានការចាប់អារម្មណ៍ជាងគេនៅក្នុងអាល់ប៊ុមទី៣របស់លោក៕