ប្រទេសចិន ៖ កាលពីថ្ងៃទី១៦ ខែសីហា ឆ្នាំ២០២៤ អាជ្ញាធរក្រុងប៉េកាំង ប្រទេសចិន បានដំណើរការ ការដឹកជញ្ជូនអាហារតាមដ្រូនជាលើកដំបូងទៅឱ្យភ្ញៀវទេសចរមកលេងមហាកំផែង ។ អាជ្ញាធរនិយាយថា ការដឹកជញ្ជូនអាហារតាមដ្រូននឹងជួយឱ្យភ្ញៀវទេសចរទទួលបានអាហារ, ភេសជ្ជៈ និងសម្ភារៈចាំបាច់មួយចំនួនយ៉ាងឆាប់រហ័សក្នុងអំឡុងពេលមេឃក្តៅ ។

កន្លងមក ភ្ញៀវទេសចរដែលមកដើរកម្សាន្ត និងស្រាវជ្រាវនៅមហាកំផែងរបស់ចិនចិន ពួកគេជួបការលំបាកយ៉ាងខ្លាំង ដូចជា ៖ ខ្វះខាតអាហារ និងខ្វះទឹកផឹក ពេលដើរផ្លូវឆ្ងាយ ។ ហេតុនេះ អាជ្ញាធរប្រចាំតំបន់ប៉ាតាំលីងរបស់មហាកំផែងបានសហការជាមួយភ្នាក់ងារដឹកជញ្ជូនអាហារអនឡាញ ដោយការប្រើប្រាស់ដ្រូនសម្រាប់បញ្ជូនអាហារ និងភេសជ្ជៈមកឱ្យភ្ញៀវទេសចរដល់កន្លែង ។

ភ្ញៀវទេសចរណាចង់ទិញអាហារ និងភេសជ្ជៈ ពួកគេអាចស្កេន QR Code តាមរយៈទូរស័ព្ទដៃដើម្បីកុម្ម៉ង់ទិញអាហារ បន្ទាប់មក ដ្រូននឹងបញ្ជូនអាហារមកឱ្យភ្ញៀវទេសចរក្នុងរយៈពេលត្រឹមតែ៥នាទី ។ ប៉ុន្តែបើភ្ញៀវទេសចរដើរទៅទិញអាហារដោយខ្លួនឯង ពួកគេនឹងចំណាយពេលរហូតដល់៥០នាទីឯណោះ ។

ភ្នាក់ងារបញ្ជូនអាហារតាមដ្រូនទៅឱ្យភ្ញៀវទេសចរ បញ្ជាក់ថា នៅពេលដ្រូនបញ្ជូនអាហារឱ្យភ្ញៀវទេសចររួចហើយ ដ្រូននឹងនាំយកសំរាមរបស់ភ្ញៀវទេសចរត្រឡប់មកវិញ ។ ហេតុនេះ វាបានជួយកាត់បន្ថយប្រាក់ឈ្នួលយ៉ាងច្រើនសម្រាប់អាជ្ញាធរជួលបុគ្គលិកថែទាំមហាកំផែង ។

ចំណុចមើលទេសភាពក្នុងតំបន់ប៉ាតាំលីងរបស់មហាកំផែងចិន គឺទទួលបានការពេញនិយមយ៉ាងខ្លាំង ដែលបានទទួលស្វាគមន៍ភ្ញៀវទេសចរលើកដំបូងនៅឆ្នាំ១៩៥៨ ។ នៅតំបន់នេះបានទទួលស្វាគមន៍ភ្ញៀវទេសចរចិន និងភ្ញៀវទេសចរបរទេស រហូតដល់ជាង២០០លាននាក់ឯណោះ ។

គួរបញ្ជាក់ថា មហាកំផែងរបស់ចិនមានប្រវែងសរុបជាង២ម៉ឺនគីឡូម៉ែត្រ ដែលគ្របដណ្តប់ខេត្ត-ក្រុង ចំនួន១៥ រួមមាន ៖ ក្រុងប៉េកាំង, ហឺប៉ី និងម៉ុងហ្គោលីខាងក្នុង ស្ថិតនៅភាគខាងជើងប្រទេសចិន រួមទាំងឆ្លងកាត់ខេត្តហ្គាន់ស៊ូ និងខេត្តស៊ីនជៀង ស្ថិតនៅភាគពាយ័ព្យប្រទេសចិន ។

កន្លងមក អាជ្ញាធរក្រុងប៉េកាំងបានបន្ថែមសេវាកម្មថ្មីៗ ដើម្បីផ្តល់ភាពងាយស្រួលដល់ភ្ញៀវទេសចរ និងជំរុញសេដ្ឋកិច្ច ។ ក្រៅពីសេវាកម្មដឹកជញ្ជូនអាហារតាមដ្រូន ភ្ញៀវទេសចរអាចចូលរួមវគ្គបណ្តុះបណ្តាលសាកល្បងការអប់រំអាកាសយានិក ឬពួកគេអាចជិះឧទ្ធម្ភាគចក្រ ឬជិះយន្តហោះបើកបរដោយស្វ័យប្រវត្តិមើលទេសភាពដ៏ស្រស់ស្អាតនៅមហាកំផែង ៕

ប្រទេសកាណាដា ៖ កាលពីថ្ងៃទី២៧ ខែសីហា ឆ្នាំ២០២៤ សារព័ត៌មានបរទេសរាយការណ៍ថា រដ្ឋាភិបាលកាណាដាប្រកាសដំឡើងពន្ធលើរថយន្តអគ្គិសនីនាំចូលពីប្រទេសចិន រហូតដល់១០០% និងយកពន្ធដែក និងអាលុយមីញ៉ូមចិន ២៥% ។ ការដំឡើងពន្ធនេះ គឺអនុវត្តតាមគោលការណ៍របស់សហរដ្ឋអាមេរិក និងសហភាពអឺរ៉ុប ដែលបានប្រមូលពន្ធទំនិញចិនកន្លងមក ។

កាណាដានឹងប្រមូលពន្ធរថយន្តគ្រប់ប្រភេទដែលនាំចូលពីប្រទេសចិន ព្រមទាំងរថយន្ត Tesla ផងដែរ ។ បរិមាណការនាំចូលរថយន្តពីចិនមកកាន់ Vancouver ជាទីក្រុងធំបំផុតរបស់កាណាដា បានកើនឡើង៤៦០% បើប្រៀបធៀបប្រចាំឆ្នាំ មកស្មើនឹង៤៤.៣៥៦គ្រឿងនៅឆ្នាំ២០២៣ ក្រោយពី Tesla ចាប់ផ្តើមនាំចេញរថយន្តអគ្គិសនីផលិតនៅទីក្រុងសៀងហៃ មកកាណាដា ។

នាយករដ្ឋមន្ត្រីកាណាដា លោក Justin Trudeau បានថ្លែងក្នុងកិច្ចប្រជុំគណៈរដ្ឋមន្ត្រីថា ទីក្រុង Ottawa នឹងឆ្លើយតបទៅរដ្ឋាភិបាលចិន ដែលតាំងចិត្តអនុវត្តគោលនយោបាយផលិតទំនិញលើសលប់ (Over-Capacity) ហើយលោកជឿថា ចិនពុំបានអនុវត្តតាមច្បាប់ទេ ។ ចំណុចសំខាន់ វិធានការរបស់កាណាដាស្របគ្នានឹងការអនុវត្តរបស់ប្រទេសផ្សេងៗ ហើយអត្រាពន្ធថ្មីនឹងអនុវត្តចាប់ពីថ្ងៃទី១ ខែតុលា ឆ្នាំ២០២៤ តទៅ ។

ស្ថានទូតចិននៅកាណាដាបានរិះគន់ការប្រមូលពន្ធថ្មីនេះថា ជាវិធានការរារាំងពាណិជ្ជកម្ម ហើយពាក់ព័ន្ធនឹងរឿងនយោបាយ ។ ស្ថានទូតចិនបញ្ជាក់ថា កាណាដាក៏ពុំអើពើនឹងបទប្បញ្ញត្តិរបស់អង្គការពាណិជ្ជកម្មពិភពលោក (WTO) ផងដែរ ។

មន្ត្រីនាំពាក្យស្ថានទូតចិននិយាយថា ទង្វើរបស់កាណាដានឹងប៉ះពាល់ដល់កិច្ចសហការសេដ្ឋកិច្ច និងពាណិជ្ជកម្មរវាងប្រទេសទាំងពីរ ក៏ដូចជាអតិថិជន និងអាជីវកម្មកាណាដា ។ មន្ត្រីនាំពាក្យស្ថានទូតចិនបញ្ជាក់ក្នុងសេចក្តីថ្លែងការណ៍ កាលពីថ្ងៃទី២៦ ខែសីហា ថា រដ្ឋាភិបាលកាណាដាដំឡើងពន្ធរថយន្តអគ្គិសនីចិន ដោយពុំពិចារណាពីការតវ៉ារបស់ចិនជាច្រើនលើក ។

ហេតុនេះ ចិនសូមអំពាវនាវឱ្យកាណាដាទទួលស្គាល់ការពិត និងអនុវត្តតាមច្បាប់របស់ WTO ។ កាណាដាគួរតែដោះស្រាយសកម្មភាពខុសឆ្គង ព្រមទាំងឈប់យករឿងនយោបាយមកពាក់ព័ន្ធជាមួយសេដ្ឋកិច្ច និងពាណិជ្ជកម្ម ពីព្រោះចិនជាដៃគូពាណិជ្ជកម្មលំដាប់ទី២ របស់កាណាដា បន្ទាប់ពីអាមេរិក ។

ចំណែក Tesla ពុំបានបង្ហាញពីបរិមាណរថយន្តអគ្គិសនីនាំចេញពីចិនមកកាណាដាទេ ប៉ុន្តែតាមការពិនិត្យលេខកូដរថយន្ត (Vehicle Identification Codes) បង្ហាញថា មានការនាំចេញរថយន្តម៉ាក Model 3 និង Model Y ពីសៀងហៃ មកកាណាដា ។

មន្ត្រីរដ្ឋាភិបាលកាណាដាទទួលស្គាល់ថា កាណាដានឹងដំឡើងពន្ធ១០០% ពីរថយន្តអគ្គិសនីផលិតនៅចិន ។ បើក្រុមហ៊ុននានាដែលមានរោងចក្រនៅចិន ផ្លាស់ប្តូរទៅផលិតរថយន្តអគ្គិសនីនៅប្រទេសផ្សេង ពួកគេនឹងរួចផុតពីអត្រាពន្ធនេះ ។

លោក Seth Goldstein អ្នកយុទ្ធសាស្ត្រដើមទុនមកពី Morningstar បញ្ជាក់ថា ៖ «ការឆ្លើយតបនឹងវិធានការពន្ធទាំងនេះ ខ្ញុំគិតថា Tesla នឹងផ្លាស់ប្តូរទីតាំងផលិត ឬនាំចេញរថយន្តពីអាមេរិកមកកាណាដាជំនួស» ។

សហភាពអឺរ៉ុបបានបន្ធូរបន្ថយអត្រាពន្ធចំពោះ Tesla នៅខែសីហា ឆ្នាំ២០២៤ ដោយប្រមូលពន្ធរថយន្ត Tesla នាំចូលពីចិន ត្រឹមតែ៩% ប៉ុណ្ណោះ ។ រីឯក្រុមហ៊ុនរថយន្តខ្លះត្រូវបានសហភាពអឺរ៉ុបយកពន្ធរហូតដល់៣៦,៣% ៕

សហរដ្ឋអាមេរិក ៖ អ្នកស្រី Hetty Green គឺជាអ្នកជំនួញម្នាក់ត្រូវបានគេស្គាល់ឈ្មោះថា «ស្ត្រីមានទ្រព្យសម្បត្តិច្រើនបំផុតនៅអាមេរិក» ដោយសារការប្រកបមុខជំនួញរីកចម្រើន និងអាចរកប្រាក់ចំណូលបានច្រើនពុំគួរឱ្យជឿ ។ អ្នកស្រីបានកើតនៅថ្ងៃទី២១ ខែវិច្ឆិកា ឆ្នាំ១៨៣៤ និងស្លាប់នៅថ្ងៃទី៣ ខែកក្កដា ឆ្នាំ១៩១៦ ។

អ្នកស្រី Hetty Green បានចាប់ផ្តើមលេងភាគហ៊ុនផ្តោតទៅលើតម្លៃ (Value Investing) ។ ជារៀងរាល់ថ្ងៃ អ្នកស្រីតែងតែស្លៀកពាក់ខោអាវពណ៌ខ្មៅជានិច្ច និងធុំក្លិនខ្លួនយ៉ាងខ្លាំង រហូតដល់គេដាក់ឈ្មោះថា «មេធ្មប់ Wall Street» ប៉ុន្តែវាពុំមែនជាឈ្មោះដែលធ្វើឱ្យមនុស្សម្នាស្គាល់អ្នកស្រីច្រើនបំផុតទេ ។

ប៉ុន្តែអ្វីដែលធ្វើឱ្យអ្នកស្រីល្បីល្បាញខ្លាំងក្នុងសង្គម គឺដោយសារមនុស្សទូទៅបានដាក់ឈ្មោះអ្នកស្រីថា «បុគ្គលកំណាញ់បំផុតលើពិភពលោក» ហើយឈ្មោះនេះក៏បានកត់ត្រាក្នុង Guinness World Records ទៀតផង ។

បើទោះជាអ្នកស្រីមានទ្រព្យសម្បត្តិច្រើនមហាសាលយ៉ាងណាក្តី ប៉ុន្តែការរស់នៅប្រចាំថ្ងៃរបស់អ្នកស្រី គឺពុំខុសគ្នានឹងមនុស្សគ្មានផ្ទះសម្បែងឡើយ ។ អ្នកស្រីបានរើសនំខេកដែលគេបោះបង់ចោលយកមកបរិភោគ និងទិញនំ Biscuit តូចៗមានតម្លៃថោកពីហាងលក់គ្រឿងទេស ។

អ្នកស្រីពុំប្រើប្រាស់ម៉ាស៊ីនកំដៅ ឬបង់ថ្លៃទឹកក្តៅក្នុងផ្ទះទេ ហើយអ្នកស្រីក៏ពុំព្រមទៅព្យាបាលជំងឺនៅមន្ទីរពេទ្យដែរ ។ ប៉ុន្តែអ្នកស្រីបានយកឈើមកសង្កត់ស្នាមហើមលើរាងកាយជំនួសវិញ ។ លើសពីនេះ អ្នកស្រីពុំបានចំណាយប្រាក់ទិញខោអាវថ្មីៗទេ គឺអ្នកស្រីស្លៀកតែខោអាវពណ៌ខ្មៅ១កំប្លេប៉ុណ្ណោះ អស់រយៈពេល៦៥ឆ្នាំ ។ អ្នកស្រីស្លៀកពាក់ខោអាវដដែលនេះរៀងរាល់ថ្ងៃ រហូតដល់វាផុយដាច់រហែក ។

អ្នកស្រីប្រាប់ទៅអ្នកបោកខោអាវរបស់ខ្លួនថា ឱ្យសម្អាតនៅត្រង់ចំណុចណាដែលប្រឡាក់ ឬកខ្វក់ប៉ុណ្ណោះ ដើម្បីសន្សំសំចៃថ្លៃសាប៊ូ ។ គេនិយាយថា អ្នកស្រីស្លៀកខោតែ១ប៉ុណ្ណោះ តាំងពីអាយុ១៦ឆ្នាំ រហូតដល់ពេលអ្នកស្រីស្លាប់អាយុ៨១ឆ្នាំ គឺអ្នកស្រីពុំបានស្លៀកខោផ្សេងឡើយ ។

ក្រោយមក គេក៏បានប៉ាន់ស្មានពីទ្រព្យសម្បត្តិទាំងអស់របស់អ្នកស្រី គឺស្មើពី១០០លានដុល្លារ ទៅ២០០លានដុល្លារអាមេរិកឯណោះ ។ បើប្រៀបធៀបចំនួនប្រាក់នេះជាមួយពេលបច្ចុប្បន្ន គឺស្មើពី២.៧០០លានដុល្លារ ទៅ៥.៤០០លានដុល្លារអាមេរិក ហើយគេកំណត់ថា អ្នកស្រីជាបុគ្គលមានទ្រព្យសម្បត្តិច្រើនបំផុតលើពិភពលោក នាសម័យនោះ ៕

ថ្មីៗនេះ មហាជនជាច្រើនហាក់មានការចាប់អារម្មណ៍យ៉ាងខ្លាំងចំពោះវត្តមាន Miss Universe និង Mister Universe ឡាវឆ្នាំ២០២៤ ចំនួន២រូប ដែលបានបង្ហាញខ្លួននៅមុខព្រះបរមរាជរាំងខ្មែរ ក្នុងឈុតសម្លៀកបំពាក់ប្រពៃណីខ្មែរយ៉ាងស្រស់ស្អាត។

កាលពីថ្ងៃទី ២៩ ខែសីហា យោងតាមការបង្ហោះនៅលើគេទំព័រ Miss Universe Lao បានបង្ហាញវត្តមានបវរកញ្ញាចក្រឡាវប្រចាំឆ្នាំ ២០២៤ ដែលនាងមានឈ្មោះថា Phiranya Thipphomvong នៅក្នុងឈុតប្រពៃណីខ្មែរ ដោយគ្រងស្បៃធំពណ៌មាស ស្លៀកសំពត់ចំបាប់ ព្រមជាមួយនឹងគ្រឿងលង្ការការមាស។ តាមរយៈវីដេអូ នាងគឺស្ថិតនៅមុខព្រះបរមរាជវាំងខ្មែរ ព្រមជាមួយនឹងហ្វូងសត្វព្រាបទីនោះ បានធ្វើការដើរបោះជំហានទៅមុខដោយទឹកមុខញញឹមប្រិមប្រិយ។

ជាមួយនេះ គេហទំព័រ Mister Universe Lao ក៏បានដាក់បង្ហោះកំឡោះរូបសង្ហារឡាវមួយរូបទៀត ដែលនឹងចូលរួមប្រកួត Mister Universe លើឆាកអន្តរជាតិនាពេលខាងមុខ ក៏បានស្ថិតនៅមុខព្រះបរមរាជវំាងខ្មែរ ក្នុងឈុតសម្លៀកបំពាក់ខ្មែរដូចគ្នាដែរ។ គាត់គឺមានឈ្មោះថា Kevin Chamonty បានគ្រងអាវប្រពៃណី និងស្លៀកសំពត់ចងក្បិន ដើរបោះជំហានទៅមុខ ដោយទឹកមុខមាំ អង់អាច និងស្រស់សង្ហារ។

គួរបញ្ជាក់ថា វត្តមានរបស់អ្នកទាំង២ មកកាន់ទឹកដីនៃប្រទេសកម្ពុជា ដោយពួកគេបានអញ្ជើញឲ្យចូលរួមធ្វើជាភ្ញៀវកិត្តិយសនៅក្នុងកម្មវិធី Miss Universe Cambodia 2024 ដែលប្រព្រឹត្តិទៅនារាត្រីវគ្គផ្តាច់ព្រ័តថ្ងៃទី ២៩ ខែសីហានេះផងដែរ៕

ប្រទេសកេនយ៉ា ៖ ភោជនីយដ្ឋានបើកថ្មីមួយកន្លែងនៅទីក្រុងណៃរ៉ូប៊ី ប្រទេសកេនយ៉ា ពុំបានប្រើប្រាស់បុគ្គលិកលើកអាហារឱ្យភ្ញៀវទេ ប៉ុន្តែពួកគេជ្រើសរើសមនុស្សយន្តមកលើកអាហារឱ្យភ្ញៀវជំនួសវិញ ។ បន្ទាប់ពីមានមនុស្សយន្ត អតិថិជនជាច្រើននាំគ្នាមកភោជនីយដ្ឋាន ហើយបុគ្គលិកភោជនីយដ្ឋានបាននិយាយពីការងារបែបនេះក្រោយការប្រើប្រាស់មនុស្សយន្ត ។

មនុស្សយន្តអាចបម្លាស់ទីលើកថាសអាហារទៅដល់តុរបស់ភ្ញៀវ ហើយគេហៅភោជនីយដ្ឋាននេះថា «Robot Cafe» ។ ម្ចាស់ភោជនីយដ្ឋាននិយាយថា ការប្រើប្រាស់មនុស្សយន្តលើកអាហារឱ្យភ្ញៀវ គឺក្រោយពីដំណើរកម្សាន្តទៅបណ្តាប្រទេសនៅតំបន់អាស៊ី ហើយឃើញភោជនីយដ្ឋានជាច្រើនយកមនុស្សយន្តមកលើកអាហារ ទើបម្ចាស់ភោជនីយដ្ឋានយកមនុស្សយន្តមកប្រើប្រាស់ដែរ ។

សារព័ត៌មាន Reuters រាយការណ៍ថា វាបានក្លាយជារឿងថ្មី និងប្លែកយ៉ាងខ្លាំងសម្រាប់ប្រទេសកេនយ៉ា ព្រមទាំងទាក់ទាញអតិថិជនយ៉ាងច្រើនចូលបរិភោគអាហារក្នុងភោជនីយដ្ឋាន ដែលមានមនុស្សយន្តជាបុគ្គលិកលើកអាហារជូនភ្ញៀវ ។

កញ្ញា ខាឡូរ៉ា ជេឌីដា ជានិស្សិតបានមកបរិភោគអាហារនៅទីនេះប្រាប់ថា វាជាការទទួលយកនួវបទពិសោធន៍ថ្មីមួយ គឺនាងទទួលអាហារពីមនុស្សយន្តដោយផ្ទាល់ ។ មនុស្សយន្តនេះត្រូវបានផលិតឡើងឱ្យមានរូបរាងស្រដៀងមនុស្ស និងមានដៃសម្រាប់កាន់ថាស តាមរយៈការប្រើប្រាស់កម្មវិធីបញ្ជា ។

បុគ្គលិកភោជនីយដ្ឋាននិយាយថា ការប្រើប្រាស់មនុស្សយន្តពុំបានប៉ះពាល់ដល់ការងាររបស់ពួកគេឡើយ ពីព្រោះនៅមានការងារផ្សេងទៀតដែលត្រូវការកម្លាំងមនុស្ស ដូចជា ៖ បុគ្គលិកទទួលការកុម្ម៉ង់អាហារ, ផ្នែកចុងភៅ និងផ្នែកសម្អាត ។ ប៉ុន្តែការយកមនុស្សយន្តមកជួយធ្វើការ វានឹងទាក់ទាញចំណាប់អារម្មណ៍អតិថិជន និងធ្វើឱ្យភោជនីយដ្ឋានមានឈ្មោះល្បីល្បាញ ។

រីឯម្ចាស់ភោជនីយដ្ឋាន លោក ម៉ូហាម៉េត អាបាស់ និយាយថា ៖ «ក្រោយពីខ្ញុំឃើញភោជនីយដ្ឋាននានានៅតំបន់អាស៊ីប្រើប្រាស់មនុស្សយន្ត ខ្ញុំក៏យកមនុស្សយន្តមកលើកអាហារឱ្យភ្ញៀវនៅទីនេះ ដើម្បីឱ្យពលរដ្ឋកេនយ៉ាទទួលបានបទពិសោធន៍ដោយផ្ទាល់» ។

បន្ទាប់ពីការប្រើប្រាស់មនុស្សយន្តលើកអាហារជូនភ្ញៀវ វាបានធ្វើឱ្យភោជនីយដ្ឋាននេះក្លាយជាតំបន់ទេសចរណ៍ក្នុងទីក្រុងណៃរ៉ូប៊ី ដោយសារមនុស្សម្នាយ៉ាងច្រើនមកទីនេះ ។ បើទោះជាប៉ុន្មានឆ្នាំចុងក្រោយ គេឃើញមនុស្សយន្តលើកអាហារនៅតាមភោជនីយដ្ឋានជាច្រើននៅអាស៊ីក្តី ប៉ុន្តែសម្រាប់ប្រទេសកេនយ៉ា គឺជារឿងថ្មីប្លែក ៕

ប្រទេសចិន ៖ តើលោកអ្នកធ្លាប់ឃើញគេដាំស្រូវនៅលើទឹកដែរឬទេ? និស្សិតសិក្សាផ្នែកកសិកម្ម ព្រមទាំងកសិករនៅប្រទេសចិនបានសហការគ្នាសាកល្បងដាំស្រូវបណ្តែតទឹក ក្រោយពីសង្កេតឃើញថា ត្រីដែលពួកគេចិញ្ចឹមក្នុងស្រះបានងា.ប់ ជាបន្តបន្ទាប់ ដោយសារខ្វះខាតអុកស៊ីសែន ។

ហេតុនេះ ក្រុមនិស្សិតបានសហការជាមួយកសិករដាំស្រូវនៅលើបន្ទះផ្លាស្ទិកអណ្តែតទឹកលើស្រះចិញ្ចឹមត្រី ។ បន្ទាប់មក ពួកគេក៏ទទួលបានទិន្នផលគួរឱ្យពេញចិត្ត គឺលាមកត្រីបានក្លាយជាជីសម្រាប់ស្រូវ និងធ្វើឱ្យទិន្នផលស្រូវផលិតកើនឡើងរហូតដល់៤៥% ។ ពួកគេទទួលបានស្រូវប្រមាណជាង៧៥០គីឡូក្រាមសម្រាប់ផ្ទៃដី១ហិកតា ។

ដើមស្រូវបានជួយស្រូបយកកាកសំណល់ និងលាមកត្រី ហើយធ្វើឱ្យគុណភាពទឹកល្អប្រសើរឡើងយ៉ាងខ្លាំង ។ ក្រៅពីនេះ កម្រិតអុកស៊ីសែនក្នុងទឹកបានកើនឡើងខ្ពស់ ពីព្រោះបរិមាណសារធាតុសរីរាង្គរលាយនៅក្នុងទឹកធ្លាក់ចុះ ហើយធ្វើឱ្យត្រីធំធាត់ល្អ ។

ម្យ៉ាងទៀត កសិករពុំចាំបាច់ចំណាយប្រាក់ទិញជីគីមីកសិកម្មទេ ពីព្រោះការប្រើប្រាស់ជីគីមីធ្វើឱ្យប៉ះពាល់ដល់គុណភាពដី ។ ការសាកល្បងលើកនេះទទួលបានជោគជ័យយ៉ាងខ្លាំង ដោយសារកសិករនឹងមានប្រាក់ចំណូលកើនឡើង តាមរយៈការដាំស្រូវលើទឹក និងត្រីចិញ្ចឹមក្នុងស្រះ ។ កសិករបានចំណាយដើមទុនតិចជាងមុន ហើយការដាំស្រូវលើស្រះចិញ្ចឹមត្រីបែបនេះ ពុំប៉ះពាល់បរិស្ថានទេ ។

សរុបមក ការដាំស្រូវបណ្តែតទឹក គឺកសិករពុំចាំបាច់ព្រួយបារម្ភពីការខ្វះខាតទឹកភ្លៀងស្រោចស្រព ឬមានសត្វល្អិតបំផ្លាញដំណាំ ប៉ុន្តែពួកគេនឹងទទួលបានទិន្នផលផលិតយ៉ាងល្អ ។ វាដល់ពេលហើយ ដែលយើងទាំងអស់គ្នាគួរតែរៀនសម្របខ្លួនតាមធម្មជាតិផ្លាស់ប្តូរគ្រប់ពេលវេលា ដូចជា ៖ អាកាសធាតុប្រែប្រួល និងទឹកជំនន់នាពេលបច្ចុប្បន្ន ហើយវានឹងប៉ះពាល់ដល់ប្រាក់ចំណូលកសិករដោយផ្ទាល់ ៕