ចូលរួមក្នុងកម្មវិធីសម្ភាសន៍មួយហើយប្រាប់ហ្វេនៗថានៅ Single គ្មានអ្នកញ៉ែមិនទាន់បានប៉ុន្មានផងស្រាប់តែតារាស្រី សុភ័ក្រ្ត កុសុម៉ា ជិតក្លាយជាកូនក្រមុំបាត់ទៅហើយ។ ពិធីការិនីនិងជាអ្នកចម្រៀងពូកែវោហាស័ព្ទរូបនេះបានបោកប្រាស់ទំនុកចិត្តហ្វេនៗទាំងការពិតជិតបានប្តីដេកឱបទ្រូង បោកហ្វេនៗចាស់ដៃតែម្តងសូម្បីតែមិត្តភក្តិមួយចំនួនក៏ចាញ់បោក សុភ័ក្ត្រ កុសុម៉ា ដែរ។

ពិតជារឿងដ៏គួរឱ្យរំភើបភ្ញាក់ផ្អើលអមដោយអារម្មណ៍សប្បាយរីករាយសម្រាប់ហ្វេនៗជាខ្លាំងបន្ទាប់ពីពិធីការិនី សុភ័ក្រ្ត កុសុម៉ា បានបង្ហោះវីដេអូនៅលើបណ្តាញសង្គមរបស់ខ្លួននៅល្ងាចថ្ងៃទី៣០ ខែសីហា ត្រូវបានគូស្នេហ៍សុំរៀបការយ៉ាងរ៉ូមែនទិកបន្លំខ្លួនធ្វើជាអ្នកលើកអាហារលួចបង្កប់ចិញ្ចៀននៅក្នុងចានអមដោយផ្កាកុលាបពណ៌ក្រហមដ៏ស្រស់ស្អាត។

ទទួលបានការ surprised ត្រូវបានមនុស្សជាទីស្រលាញ់សុំរៀបការបែបនេះ សុភ័ក្រ្ត កុសុម៉ា រំភើបចិត្តដល់ស្រក់ទឹកភ្នែក ខណៈនាងក៏យល់ព្រមទទួលយកសំណើរៀបការពីមិត្តប្រុសមានការចូលរួមពីមិត្តភក្តិក្នុងចង្កោមសិល្បៈដូចគ្នា។ បន្ទាប់ពីយល់ព្រមរៀបការ សុភ័ក្រ្ត កុសុម៉ា និងអនាគតស្វាមី រួមទាំងមិត្តភក្តិដែលទៅញុំាអាហារជាមួយគ្នាបានបន្តទៅកាន់កម្មវិធីមួយតង់ទៀត ខណៈតារាល្បីៗ Influencer មានទំនាក់ទំនងជិតស្និទ្ធជាមួយពិធីការិនីរូបនេះបាន surprised មួយតង់ទៀតធ្វើឱ្យ សុភ័ក្រ្ត កុសុម៉ា រំភើបចិត្តលុតជង្គង់ចុះអមដោយទឹកភ្នែកនៃការសប្បាយចិត្ត។

ក្នុងកម្មវិធីតង់ទី២នេះ មានតារាល្បីៗជាច្រើនរូបបានចូលរួមដូចជា ទេព បូព្រឹក្ស មាន សូនីតា, វី យ៉ារ៉ូ ដាវិដ ជីជី នភាល័យ ដាដាវ ចេននីនិងស្វាមី ពេជ្រ សិរីរ័ត្ន រួមទាំងក្រុមគ្រួសារគ្រួសារជាដើម។ លើសពីនេះទៅទៀត លោក ផល្លា គូស្នេហ៍ សុភ័ក្រ្ត កុសុម៉ា បានថតវីដេអូក្លិបមួយនិយាយពីទំហំចិត្តនៃក្តីស្រលាញ់ចំពោះតារាស្រីរូបនេះខណៈអ្នកទាំងពីរបានស្គាល់គ្នាតាំងពីឆ្នាំ២០១៧ និងបានបង្ហាញនៅលើបណ្តាញសង្គមថាបានភ្ជាប់ពាក្យនាថ្ងៃទី២៩ ខែធ្នូ ឆ្នាំ២០២២ ហើយនៅថ្ងៃទី២៩ ខែសីហា ឆ្នាំ២០២៤ ស្នើសុំការរៀបការ។

ដំណឹងដែល សុភ័ក្ត្រ កុសុម៉ា ជិតក្លាយជាកូនក្រមុំមានប្តីនេះបានធ្វើឱ្យមានការភ្ញាក់ផ្អើលផ្ទុះយ៉ាងខ្លាំងពេញបណ្តាញសង្គមមានការចែករំលែករាប់ម៉ឺននាក់ និងមានការទស្សនារាប់លានដង។ ហ្វេនៗជាច្រើនបានចូលរួមសម្តែងក្តីអបអរចំពោះនាង និងបាននិយាយចំអន់ថាបោកហ្វេនៗបានសម្រេច ប្រាប់ថានៅ Single គ្មានអ្នកយក តែការពិតមានស្នេហា Private បានប្តីមុនហ្វេនៗបាត់។ អ្នកក្នុងអាជីពសិល្បៈជាច្រើនរូបទៀតក៏បានចូលរួមអបអរសាទរ ដំណឹងរៀបការរបស់ សុភ័ក្ត្រ កុសុម៉ា ផងដែរ៕

បើនិយាយពីសត្វគ្រោះថ្នា.ក់ នៅព្រៃអាម៉ាហ្សូន យើងគ្រប់គ្នានឹងនឹកឃើញដល់ពស់យក្សអាណាខុនដា, ត្រីពិរ៉ាន់យ៉ា និងក្រពើខេម៉េន ប៉ុន្តែសូមប្រាប់ថា នេះជាការគិតខុសទាំងអស់ ពីព្រោះនៅក្នុងព្រៃអាម៉ាហ្សូនមានសត្វគួរឱ្យខ្លា.ច ជាងនេះ ។

សត្វមានគ្រោះថ្នាក់ដែលធ្វើឱ្យអ្នកស្រុករស់នៅក្នុងតំបន់ភ័យខ្លាចបំផុត គឺត្រីមានខ្លួនតូចឈ្មោះ «Candiru» ។ ត្រីទាំងនេះបានរស់នៅក្នុងទន្លេអាម៉ាហ្សូន ហើយពេលពួកវាធំពេញវ័យនឹងមានទំហំខ្លួនវែងជាងម្រាមដៃមនុស្សបន្តិច, មានដងខ្លួនវែងដូចអន្ទង់ និងពណ៌ភ្លឺថ្លា ទើបធ្វើឱ្យយើងមើលមិនឃើញវាហែលក្នុងទឹក ។

ត្រី Candiru នឹងទម្លុះចូលក្នុងសាច់មនុស្ស រួចហើយ វាក៏ចាប់ផ្តើមស៊ីឈាមមនុស្ស ។ ក្រៅពីការស៊ីឈាម ត្រីប្រភេទនេះចូលចិត្តស៊ីទឹកនោមមនុស្សទៀតផង ។ ដូច្នេះ បើអ្នកណាម្នាក់ងូតទឹក និងនោមក្នុងទន្លេអាម៉ាហ្សូនដែលសម្បូរត្រីនេះរស់នៅ ពួកវានឹងតាមស៊ីទឹកនោមមិនខាន ។

កន្លងមក មនុស្សមួយចំនួនបានចុះងូតទឹកទន្លេអាម៉ាហ្សូន និងនោមក្នុងទឹក ស្រាប់តែត្រីទាំងនេះចូលក្នុងអវៈយវៈភេទរបស់ពួកគេ និងចូលទៅតម្រង់នោម ។ ករណីនេះមិនស្លាប់ទេ ប៉ុន្តែនឹងឈឺចាប់ធ្ងន់ធ្ងរ ទើបភ្ញៀវទេសចរសួរថា បើត្រីនេះចូលក្នុងតម្រង់នោមពួកគេ តើគួរដោះស្រាយបែបណា?

អ្នកស្រុកក្នុងតំបន់ប្រាប់ថា វិធីយកត្រីនេះចេញពីក្នុងខ្លួន គឺត្រូវងូតទឹកក្តៅ បន្ទាប់មក ត្រាំខ្លួនយើងក្នុងទឹកក្តៅលាយជាមួយផ្លែក្រូចសើច, ស្លឹកក្រូចសើច, ខ្ញី និងស្លឹកគ្រៃ ។ រីឯអ្នកជំនាញនិយាយថា បើភ្ញៀវទេសចរជួបបញ្ហានេះ ត្រូវតែឱ្យគ្រូពេទ្យវះកាត់យកត្រីចេញពីអវៈយវៈភេទ ។

យោងតាមឯកសារកត់ត្រានៅឆ្នាំ១៨២៩ របស់អ្នកស្រាវជ្រាវជនជាតិអាល្លឺម៉ង់ផ្នែកជីវវិទ្យាបញ្ជាក់ថា បើចង់ចុះក្នុងទឹកដែលមានត្រីនេះរស់នៅ អ្នកស្រុកបានយកស្រកីដូងមកបិទបាំងអវៈយវៈភេទរបស់ពួកគេ ដើម្បីការពារការវាយប្រហាររបស់ត្រី Candiru ។

ក្រោយមក នៅឆ្នាំ១៨៥៥ អ្នកស្រាវជ្រាវជនជាតិបារាំងផ្នែកធម្មជាតិនិយាយថា អ្នកស្រុកបានដាស់តឿនថា កុំនោមដាក់ទឹកដាច់ខាត ពីព្រោះអាចត្រូវត្រីនេះវាយប្រហារអវៈយវៈភេទ ។ រីឯឯកសារចុងក្រោយនៅឆ្នាំ១៩៩៧ បញ្ជាក់ថា ត្រីនេះបានវាយប្រហារមនុស្សក្នុងតំបន់ព្រៃអាម៉ាហ្សូន ប្រទេសប្រេស៊ីល ៕

តើលោកអ្នកធ្លាប់ឆ្ងល់ទេថា ហេតុអ្វីភោជនីយដ្ឋានប្រណីតប្រភេទ Fine Dining និយមដួសអាហារដាក់ចានឱ្យភ្ញៀវក្នុងបរិមាណតិចតួចរហូតដល់បរិភោគពុំឆ្អែត ប៉ុន្តែអាហារទាំងនេះបែរជាមានតម្លៃថ្លៃជាងអាហារទូទៅ ។ អាហារខ្លះទៀតមិនលើសពី១ស្លាបព្រាទេ ហើយដួសដាក់មាត់តែ១លើក អស់បាត់ទៅហើយ ។ ថ្ងៃនេះ សារព័ត៌មាន KBN នឹងបកស្រាយរឿងនេះឱ្យលោកអ្នកអស់ចម្ងល់ ។

ភោជនីយដ្ឋានប្រណីតៗនិយមដាក់អាហារតិចបំផុតក្នុងចានឱ្យភ្ញៀវបរិភោគ គឺដោយសារមូលហេតុដូចខាងក្រោមនេះ ៖

១-អាហារក្នុងចាននីមួយៗបានចម្អិនពីសាច់, បន្លែ និងគ្រឿងផ្សំមានតម្លៃថ្លៃ ដែលគ្រឿងផ្សំទាំងនេះត្រូវបានគេជ្រើសរើសមកយ៉ាងល្អ ថែមទាំងចំណាយប្រាក់ច្រើនទិញទៀតផង ។ ហេតុនេះ វាមិនចម្លែកទេ ដែលចុងភៅដួសអាហារដាក់ចានតិចជាងមុន ដើម្បីឱ្យសមនឹងប្រាក់ដែលពួកគេបានចំណាយ ។

២-អាហារកាន់តែតិច កាន់តែមានតម្លៃថ្លៃ ហើយការដាក់អាហារក្នុងចានតូចៗនឹងងាយស្រួលរៀបចំជាងមុន និងធ្វើឱ្យវាមានតម្លៃថ្លៃសម្រាប់ភ្ញៀវ ។ ហេតុនេះ ការរៀបចំ ឬតុបតែងអាហារនឹងធ្វើឱ្យភ្ញៀវចាប់អារម្មណ៍ទាំងពណ៌អាហារ និងរសជាតិ ។

៣-យើងអាចបរិភោគអាហារបានច្រើនមុខក្នុងភោជនីយដ្ឋានប្រណីត ដោយសារអាហារមានគុណភាពខ្ពស់ ។ ការកាត់បន្ថយបរិមាណអាហារនឹងធ្វើយើងអាចបរិភោគអាហារសមល្មម និងគ្រប់ចានទាំងអស់ ។

៤-អាហារក្នុងចាននីមួយៗ គឺជាសិល្បៈរបស់ចុងភៅ ដូចជា ៖ អាហាររបស់បារាំងឈ្មោះ «Gargouillou» មានបន្លែផ្សំចូលគ្នាយ៉ាងហោចណាស់១៦មុខ ក្នុងចានតែមួយ ។ ចុងភៅមានតួនាទីធ្វើឱ្យអាហារស្រស់ស្អាតដើម្បីទាក់ទាញចំណាប់អារម្មណ៍ភ្ញៀវ ហើយអាហារបែបសិល្បៈនេះតែងតែមានតម្លៃថ្លៃជានិច្ច ។

៥-គ្រប់រសជាតិអាហារដែលបានបរិភោគនឹងធ្វើឱ្យយើងចងចាំ និងមិនធុញទ្រាន់ ។ ពេលយើងដួសអាហារដាក់ចូលមាត់លើកដំបូង វានឹងក្លាយជាអាហារមានរសជាតិឆ្ងាញ់បំផុតសម្រាប់យើង ប៉ុន្តែបើយើងបរិភោគវាកាន់តែច្រើន យើងនឹងគិតថា រសជាតិរបស់វាមិនសូវឆ្ងាញ់ ។ ហេតុនេះ ការដាក់អាហារតិចក្នុងចាននឹងធ្វើឱ្យយើងចូលចិត្តរសជាតិអាហារច្រើនជាង ។

៦-បរិមាណអាហារតិចជាងមុននឹងធ្វើឱ្យអ្នកបរិភោគមានអារម្មណ៍ថា វាជាអាហារដ៏ពិសេស ឬដូចគ្នានឹងវត្ថុពិសេសមានកំណត់ មានន័យថា វាត្រូវតែមានបរិមាណតិចជាងធម្មតា ។ ម្យ៉ាងទៀត វត្ថុមានតម្លៃត្រូវបានគេខ្ចប់ក្នុងប្រអប់តូចៗជានិច្ច ។

៧-វាជារឿងខុសធម្មតា និងធ្វើឱ្យអ្នកបរិភោគរំពឹងទុកខ្លាំង ពីព្រោះពេលយើងឃើញអាហារតិចក្នុងចាន យើងនឹងឆ្ងល់ថា ហេតុអ្វីទើបចុងភៅដាក់អាហារតិចបែបនេះ? ដូច្នេះ វាខុសគ្នាពីអាហារទូទៅ ហើយការបរិភោគអាហារតិចៗ ប៉ុន្តែច្រើនមុខ នឹងធ្វើឱ្យយើងចង់ដឹងថា តើចានបន្ទាប់ ជាអាហារអ្វី?

ហេតុនេះ អាហារមានបរិមាណកាន់តែតិច នឹងកាន់តែមានតម្លៃថ្លៃជាងអាហារធម្មតា ដោយសារចុងភៅបានសម្រិតសម្រាំងគ្រឿងផ្សំ និងសាច់ល្អៗមានគុណភាពសម្រាប់អ្នកបរិភោគ ។ ការបរិភោគអាហារតិច និងរៀបចំបែបសិល្បៈ នឹងធ្វើឱ្យយើងចងចាំ និងពុំអាចបំភ្លេចបាននូវរសជាតិរបស់វា ៕

មនុស្សភាគច្រើនចូលចិត្តទៅកម្សាន្តនៅមាត់សមុទ្រច្រើនជាងកន្លែងផ្សេងទៀត ប៉ុន្តែយើងធ្លាប់ឆ្ងល់ទេថា តើការទៅលេងមាត់សមុទ្រផ្តល់ផលល្អបែបណាខ្លះ? អ្នកជំនាញមកពីសាកលវិទ្យាល័យមីឈីហ្គេន បានស្រាវជ្រាវដោយការប្រៀបធៀបផ្លូវចិត្តរបស់ពលរដ្ឋរស់នៅទីក្រុងវេលីនតាន់ អាចមើលឃើញសមុទ្រដ៏ស្រស់ស្អាត និងពលរដ្ឋរស់នៅទីក្រុងគ្មានសមុទ្រ ហើយវាយតម្លៃពីស្ថានភាពហិរញ្ញវត្ថុ, អាយុ និងឥទ្ធិពលបរិស្ថាន ។

លទ្ធផលការស្រាវជ្រាវនេះបញ្ជាក់ថា ការសម្លឹងមើលផ្ទៃសមុទ្រដ៏ធំល្វឹងល្វើយបានធ្វើឱ្យសុខភាពផ្លូវចិត្តរបស់យើងល្អប្រសើរឡើង ហើយអ្នកស្រាវជ្រាវហៅថា គឺជាការមើលឃើញតំបន់ពណ៌ខៀវ ។ វាជាការពិសោធន៍ថា ការសម្លឹងមើលផ្ទៃសមុទ្រពណ៌ខៀវនឹងធ្វើឱ្យយើងមានអារម្មណ៍ល្អជាងមុន ។

លោកស្រី ម៉េលិសា វ៉ៃបឺក មកពីស្ថាប័នចិត្តវិទ្យានៅសាកលវិទ្យាល័យឌីគីត គឺជាអ្នកជំនាញម្នាក់ទៀតដែលបានស្រាវជ្រាវពីរឿងនេះ ។ លោកស្រីនិយាយថា ការសម្រាកនៅមាត់សមុទ្រនឹងជួយកាត់បន្ថយភាពតានតឹងផ្លូវចិត្ត ហើយបើតាមវិទ្យាសាស្ត្រលើកឡើងថា មនុស្សមានសេចក្តីសុខបំផុតស្មើនឹង៨០% ប៉ុន្តែដោយសារកត្តាបរិយាកាសនឹងធ្វើឱ្យភាគរយនេះកើនឡើង ឬធ្លាក់ចុះ ប៉ុន្តែវាគ្រាន់តែបណ្តោះអាសន្នប៉ុណ្ណោះ ។

លោកស្រីបន្តថា បើទោះជាការទៅលេងសមុទ្របានប៉ះពាល់ដល់អារម្មណ៍បណ្តោះអាសន្នក្តី ប៉ុន្តែវាអាចធ្វើឱ្យអ្វីម្យ៉ាងកើតឡើង ដូចជា ៖ ការមើលពិភពលោកក្នុងផ្លូវវិជ្ជមាន ហើយវានឹងជួយបង្កើនសេចក្តីសុខ ។ យើងអាចសាកល្បងគិតពីតំបន់ទេសចរណ៍ណាមួយដែលខ្លួនចូលចិត្ត គឺឆ្នេរសមុទ្រ ដែលយើងអាចសម្លឹងមើលបានឆ្ងាយបំផុតរហូតដល់ជើងមេឃ គឺវានឹងធ្វើឱ្យខួរក្បាលយើងដំណើរការបានល្អ និងជួយឱ្យយើងមានគំនិតច្នៃប្រឌិតទៀតផង ។

សរុបមក ការអង្គុយមើលផ្ទៃសមុទ្រស្រូបខ្យល់អាកាសបរិសុទ្ធនឹងជួយកាត់បន្ថយភាពតានតឹនផ្លូវចិត្ត និងផ្លាស់ប្តូរការគិតរបស់យើង ។ ប៉ុន្តែបើយើងទៅដើរលេងក្នុងព្រៃ ដែលពោរពេញទៅដោយពណ៌បៃតង តើវានឹងផ្តល់ផលល្អដែរឬទេ? ចម្លើយ គឺការទៅលេងព្រៃក៏ផ្តល់ផលល្អដល់ខួរក្បាលដែរ ប៉ុន្តែពុំស្មើការទៅលេងសមុទ្រទេ បើទោះព្រៃមានពណ៌បៃតងក្តី ។

ទោះយ៉ាងណា វាអាស្រ័យលើមនុស្សម្នាក់ៗថា តើពួកគេចូលចិត្តទៅលេងសមុទ្រ, ព្រៃ, ទឹកជ្រោះ ឬតំបន់ភ្នំ? ពីព្រោះមានតែយើងទេដែលដឹងថា តើការទៅលេងកន្លែងណាមួយល្អជាងគេ និងអាចជួយដល់ខួរក្បាលខ្លាំងបំផុត ៕

ប្រទេសថៃ ៖ កាលពីថ្ងៃទី២៩ ខែសីហា ឆ្នាំ២០២៤ សារព័ត៌មានថៃរាយការណ៍ថា ផ្ទុះការរិះគ.ន់ យ៉ាងខ្លាំងក្លាពីសំណាក់មហាជនលើយុវជនឥណ្ឌាម្នាក់ ក្រោយពីបង្ហោះវីដេអូបង្ហាញការខ្ពើ.ម អាហារថៃក្នុងបណ្តាញសង្គម ។ អ្នកប្រើប្រាស់បណ្តាញសង្គមថៃភាគច្រើននិយាយថា អាហារឥណ្ឌាគ្មានអនាម័យបំផុត ហេតុអ្វីមករិះគ.ន់ អាហារថៃទៅវិញ?

វាបានក្លាយជាប្រធានក្តៅគគុករវាងអ្នកប្រើប្រាស់បណ្តាញសង្គមនៅប្រទេសថៃ និងយុវជនឥណ្ឌា ក្រោយពីយុវជនរូបនេះបង្ហោះវីដេអូខ្លីមានរយៈពេលប្រមាណជាង១នាទី កាលពីថ្ងៃទី១០ ខែសីហា កន្លងមក ។ ក្នុងវីដេអូនេះ យុវជនឥណ្ឌាបានបង្ហោះអាហារថៃ និងចិន ប៉ុន្តែបែរជាបង្ហាញអាកប្បកិរិយាខ្ពើម និងចង់ក្អួត ក្រោយពីមើលអាហារថៃរួច ។

យុវជនឥណ្ឌាជាម្ចាស់ហ្វេសប៊ុកផេកឈ្មោះថា «Paku Zone» ដែលមានចំនួនអ្នកតាមដានត្រឹមតែជាង២ម៉ឺននាក់ប៉ុណ្ណោះ ។ ក្រោយពីវីដេអូខាងលើបានផ្សព្វផ្សាយក្នុងបណ្តាញសង្គមធ្វើឱ្យអ្នកប្រើប្រាស់បណ្តាញសង្គមថៃយ៉ាងច្រើនចូលទៅបញ្ចេញមតិរិះគន់យុវជននេះ ។ ការបញ្ចេញមតិភាគច្រើនបានលើកឡើងពីអាហារឥណ្ឌាគ្មានអនាម័យបំផុត និងគ្មានប្រទេសណាកខ្វក់ដូចឥណ្ឌាទេ ។

អ្នកប្រើប្រាស់បណ្តាញសង្គមថៃម្នាក់និយាយថា ៖ «ហ៊ានធ្វើវីដេអូរិះគន់អាហារប្រទេសគេផង ហេតុអ្វីមិនមើលអាហារប្រទេសខ្លួនឯង» ។ ដូចគ្នានេះ ជនជាតិថៃម្នាក់ទៀតនិយាយថា ៖ «អាហាររបស់ឥណ្ឌាយ៉ាប់ជាងនេះទៅទៀត» ។

ជនជាតិថៃផ្សេងទៀតនិយាយថា ៖ «អាហារឥណ្ឌាគួរឱ្យចង់បរិភោគចង់ស្លាប់ ហើយវិធីចម្អិនវិញក៏ស្មោគគ្រោក និងមានក្លិនខ្លាំង ។ មុននឹងមើលងាយអាហារអ្នកដទៃ តើអាហាររបស់ខ្លួនឆ្ងាញ់កម្រិតណាទៅ…» ។

ជនជាតិថៃម្នាក់ទៀតថា ៖ «អាហារឥណ្ឌាកខ្វក់បំផុតនៅលើពិភពលោក» ។ រីឯជនជាតិថៃម្នាក់ទៀតថា ៖ «អ្នកគ្មានសិទ្ធិមើលងាយអាហារអ្នកដទៃទេ ខណៈអាហាររបស់ខ្លួនគ្មានអនាម័យបំផុត ។ តើធ្លាប់មើលវីដេអូធ្វើម្ហូបឥណ្ឌាក្នុងបណ្តាញសង្គមដែរឬទេ?» ។

គួរបញ្ជាក់ថា កន្លងមក ក៏មានជនជាតិឥណ្ឌាធ្លាប់រិះគន់អាហារថៃដែរ គឺបុរសឥណ្ឌាម្នាក់បានបង្ហោះវីដេអូក្នុងបណ្តាញសង្គមរិះគន់ស៊ុតចៀនថៃថា ពុំគួរឱ្យបរិភោគ និងមានខ្លាញ់ច្រើនពេក ។ បុរសឥណ្ឌារូបនេះថែមទាំងបានយកដៃច្របាច់ស៊ុតចៀនថៃ ដូចច្របាច់ខ្ទះដូងទៀតផង ហើយធ្វើឱ្យមហាជនថៃមិនពេញចិត្តម្តងហើយ ៕

កាលពីថ្ងៃទី២៨ ខែសីហា ឆ្នាំ២០២៤ សារព័ត៌មានបរទេសរាយការណ៍ថា មុនពេលចាប់ខ្លួន លោក Pavel Durov មហាសេដ្ឋីវ័យក្មេងអាយុ៣៩ឆ្នាំ និងជាស្ថាបនិក Telegram កម្មវិធីផ្ញើសារដ៏ពេញនិយមនិយាយថា លោកបានធ្វើជាឪពុករបស់ក្មេងនៅទូទាំងពិភពលោក រហូតដល់ជាង១០០នាក់ ។

លោក Pavel Durov បានល្បីល្បាញពាសពេញពិភពលោក ក្រោយពីត្រូវបានចាប់ខ្លួននៅប្រទេសបារាំង កាលពីថ្ងៃទី២៤ ខែសីហា កន្លងមក ពាក់ព័ន្ធនឹងករណីឆបោក និងបណ្តោយឱ្យក្រុមឧក្រិដ្ឋជនយក Telegram ប្រើប្រាស់ជាប្រយោជន៍ ។

មុនការចាប់ខ្លួន លោក Pavel Durov បានសរសេរនៅក្នុង Telegram ថា លោកជាឪពុករបស់ក្មេងជាង១០០នាក់ ដែលរស់នៅប្រទេសចំនួន១២ លើពិភពលោក ។ រយៈពេលជាង១៥ឆ្នាំកន្លងមកនេះ លោកពុំធ្លាប់រៀបការជាមួយនារីណាម្នាក់ឡើយ ហើយលោកចូលចិត្តរស់នៅម្នាក់ឯង ។

លោកបន្តថា ដំណើរជីវិតរបស់លោកក្លាយជាឪពុកក្មេងដ៏ច្រើនបែបនេះ គឺចាប់ផ្តើមកាលពី១៥ឆ្នាំមុន ។ មិត្តភក្តិជិតស្និទ្ធរបស់លោកពិបាកមានកូន និងសូមឱ្យលោកជួយបរិច្ចាគមេជីវិតឱ្យនាង ពេលនោះ គ្រូពេទ្យនៅគ្លីនិកមួយកន្លែងប្រាប់ថា អ្នកបរិច្ចាគមេជីវិតឈ្មោលដែលអាចផ្តល់កំណើតដល់ទារកកំពុងតែខ្វះខាត ។ ហេតុនេះ ទើបលោកសម្រេចចិត្តជួយមិត្តភក្តិ ហើយការបរិច្ចាគរបស់លោកអាចជួយប្តី-ប្រពន្ធ ដែលពិបាកមានកូននៅទូទាំងពិភពលោក ។

លោកនិយាយទាំងអស់សំណើចថា ស្តាប់មើលទៅ ដូចជាឆ្កួតបំផុត ប៉ុន្តែខ្ញុំបានចុះឈ្មោះផ្តល់ជំនួយមេជីវិតឈ្មោលរហូតដល់បច្ចុប្បន្ន ។ គេផ្តល់ដំណឹងមកខ្ញុំថា ការបរិច្ចាគរបស់ខ្ញុំបានជួយប្តី-ប្រពន្ធរហូតដល់១០០គូឯណោះនៅប្រទេសចំនួន១២ ។ ក្រៅពីនេះ គ្លីនិកផ្នែកចិញ្ចឹមទារកក្នុងកែវ និយាយថា កំពុងក្លាសេមេជីវិតរបស់លោក ដើម្បីផ្តល់ឱ្យគ្រួសារណាពិបាកមានកូន ។

បច្ចុប្បន្ន លោកមានគម្រោងបង្ហាញព័ត៌មាន DNA របស់ខ្លួនជាសាធារណៈ ដើម្បីជួយឱ្យកូនៗជាប់សាច់ឈាមលោកងាយស្រួលស្វែងរកគ្នា ពីព្រោះតាមធម្មតា ព័ត៌មានផ្ទាល់ខ្លួនរបស់អ្នកបរិច្ចាគមេជីវិត និងអ្នកទទួល គឺពុំបង្ហាញជាសាធារណៈទេ ។ លោកដឹងថា ការបរិច្ចាគបែបនេះប្រថុយប្រថាន ប៉ុន្តែលោកមិនសោកស្តាយចំពោះការបរិច្ចាគកន្លងមកទេ ។

ការចាប់ខ្លួនលោក Pavel Durov គឺបណ្តាលមកពី Telegram ដែលលោកជាអ្នកបង្កើតឡើង ដោយលោកទទួលការចោទប្រកាន់ថា ពាក់ព័ន្ធនឹងករណីទាក់ទាញក្រុមឧក្រិដ្ឋជនមកប្រើប្រាស់ Telegram រហូតមានការរិះគន់ពេញពិភពលោក ។ ក្រៅពីនេះ គេចោទប្រកាន់ថា លោកបង្កើត Telegram សម្រាប់ជាកន្លែងលាក់ខ្លួនរបស់ពួកឧក្រិដ្ឋជន, ជួញដូរថ្នាំញៀន, ជួញដូរមនុស្ស និងផ្សព្វផ្សាយព័ត៌មានពុំសមរម្យប៉ះពាល់កុមារ ៕

ប្រទេសប្រេស៊ីល ៖ ប្រទេសប្រេស៊ីលចាប់ផ្តើមបិទការប្រើប្រាស់បណ្តាញសង្គម X របស់ពលរដ្ឋ ក្រោយពីលោក Elon Musk ពុំព្រមបិទបញ្ជីអ្នកប្រើប្រាស់ដែលផ្សព្វផ្សាយព័ត៌មានមិនពិត តាមដីការបស់តុលាការប្រេស៊ីល រហូតដល់មានបញ្ហាជាមួយចៅក្រមតុលាការកំពូល ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី៣១ ខែសីហា ឆ្នាំ២០២៤ ។

រដ្ឋាភិបាលប្រេស៊ីលនឹងបិទការប្រើប្រាស់បណ្តាញសង្គម X (ឬ Twitter) របស់ពលរដ្ឋជាង២០០លាននាក់នៅទូទាំងប្រទេស ក្រោយពីម្ចាស់បណ្តាញសង្គមនេះ គឺលោក Elon Musk ពុំអនុវត្តតាមដីការបស់តុលាការប្រេស៊ីល ។ តុលាការបានចេញដីកាឱ្យលោកបិទបញ្ជីអ្នកប្រើប្រាស់មួយចំនួន ដោយសារពួកគេផ្សព្វផ្សាយខ្លឹមសារខុសច្បាប់ប្រេស៊ីល ។

កាលពីថ្ងៃទី៣០ ខែសីហា លោក Alexandre de Moraes តុលាការកំពូលប្រេស៊ីលបានចេញដីកាឱ្យក្រុមហ៊ុនផ្តល់សេវាអ៊ីនធើរណេតទាំងអស់បិទការប្រើប្រាស់បណ្តាញសង្គម X នៅទូទាំងប្រទេស ដោយសារលោក Elon Musk គ្មានភ្នាក់ងារតំណាងស្របច្បាប់នៅប្រេស៊ីលតាមពេលកំណត់ ។

ប៉ុន្តែលោក Elon Musk យល់ឃើញថា ដីការបស់តុលាការខុសច្បាប់ ហើយលោកក៏ព្រងើយកន្តើយរហូតមក ។ វាធ្វើឱ្យលោកតុលាការគំរាមចាប់ខ្លួនលោក Elon Musk ពីករណីមិនគោរពដីកាតុលាការ រហូតដល់លោក Elon Musk បិទការិយាល័យបណ្តាញសង្គម X នៅប្រេស៊ីល ។

លោកបានសរសេរក្នុងបណ្តាញសង្គម X កាលពីថ្ងៃទី៣០ ខែសីហា ថា សេរីភាពនៃការបញ្ចេញមតិ គឺជាមូលដ្ឋាននៃលទ្ធិប្រជាធិបតេយ្យ ប៉ុន្តែចៅក្រមប្រេស៊ីលកំពុងព្យាយាមបំផ្លាញវា ដើម្បីគោលដៅនយោបាយ ។

នេះជាការសាកល្បងដ៏ធំបំផុតរបស់លោក Elon Musk ដែលតម្រូវឱ្យផ្លាស់ប្តូរបណ្តាញសង្គម X ឱ្យមានសុវត្ថិភាពសម្រាប់អ្នកប្រើប្រាស់ ។ កាលពីដើមខែសីហា ឆ្នាំ២០២៤ លោក Elon Musk ទើបតែមានបញ្ហាជាមួយសហភាពអឺរ៉ុប ករណីការគ្រប់គ្រងបណ្តាញសង្គមនេះ ៕