្រទេសជប៉ុន ៖ ជប៉ុន គឺជាប្រទេសមួយបានអភិវឌ្ឍន៍បច្ចេកវិទ្យាទំនើប និងមានវប្បធម៌ដ៏ល្អឯកលើពិភពលោក ប៉ុន្តែនៅពីក្រោយភាពជឿនលឿននេះ គឺបានលាក់ទុកនូវជំនឿបុរាណគួរឱ្យចាប់អារម្មណ៍យ៉ាងច្រើន ។ តើយើងធ្លាប់សង្ស័យទេថា ហេតុអ្វីជនជាតិជប៉ុនមានទំនៀមទម្លាប់ប្លែកៗ? តើមានជំនឿអ្វីខ្លះនៅពីក្រោយវប្បធម៌ជប៉ុន ដែលយើងបានឃើញនាពេលបច្ចុប្បន្ន?

ជនជាតិជប៉ុនពុំបានចាប់អារម្មណ៍លើការអភិវឌ្ឍបច្ចេកវិទ្យាជឿនលឿនតែម្យ៉ាងទេ ប៉ុន្តែពួកគេនៅតែប្រកាន់ខ្ជាប់នូវជំនឿបុរាណយ៉ាងច្រើនដែលបន្តពីមួយជំនាន់ទៅមួយជំនាន់ ។ តើមានជំនឿអ្វីខ្លះ ដែលជនជាតិជប៉ុននៅតែប្រកាន់ខ្ជាប់រហូតមកដល់ពេលបច្ចុប្បន្ន?

១-កុំកាត់ក្រចកពេលយប់ ៖ ជនជាតិជប៉ុនជឿថា វិញ្ញាណខ្មោចអាក្រក់នឹងចេញមករំខានមនុស្សនៅពេលយប់ ហើយការកាត់ក្រចកដៃ ក្រចកជើង នឹងអាចទាក់ទាញវិញ្ញាណទាំងនេះ ។ ហេតុនេះ គួរតែចៀសវាងការកាត់ក្រចកពេលយប់ ។

២-ប្រញាប់លាក់មេដៃ ពេលឃើញរថយន្តដឹកសាកសព ៖ ពេលឃើញរថយន្តដឹកសាកសព ជប៉ុននឹងលាក់មេដៃរបស់ខ្លួន ឬមិនបង្ហាញមេដៃចេញក្រៅ ដើម្បីការពារកុំឱ្យវិញ្ញាណខ្មោចចូលមកសន្ធិតក្នុងរាងកាយតាមរយៈមេដៃ ។

៣-កុំហួចពេលយប់ ៖ ជប៉ុនមានជំនឿថា ការហួចនៅពេលយប់នឹងហៅចោរឡើងមកលួចទ្រព្យសម្បត្តិក្នុងផ្ទះ ពីព្រោះពួកចោរសម័យមុនធ្លាប់ណាត់គ្នាចូលផ្ទះអ្នកណាម្នាក់ ដោយការលួច ។

៤-កុំទៅកន្លែងធ្វើពិធីដាក់បណ្តាសារ ៖ នៅប្រទេសជប៉ុន មានពិធីមួយឈ្មោះ «Ushi No Toki Mairi» ដែលពិធីនេះ គេបានយកតុក្កតាចំបើងមកដំដែកគោល ដើម្បីដាក់បណ្តាសាអ្នកណាម្នាក់ ។ ហេតុនេះ កុំទៅកន្លែងធ្វើពិធីនេះដាច់ខាត ពីព្រោះជប៉ុនជឿថា បើយើងបានឃើញការធ្វើពិធីនេះ គឺពាក្យបណ្តាសានឹងធ្លាក់មកលើខ្លួនយើង ។

៥-លេខនាំសំណាងអាក្រក់ ៖ លេខ៤ និងលេខ៩ គឺជាលេខមិនល្អនៅប្រទេសជប៉ុន ពីព្រោះវាមានន័យថា ការស្លាប់ ឬកើតទុក្ខ ឬមានគ្រោះអាក្រក់កើតឡើង ទើបជប៉ុនពុំយកលេខទាំងពីរនេះមកប្រើប្រាស់ទេ ។ ជប៉ុនជឿថា អ្នកដែលមានគ្រោះអាក្រក់ ត្រូវតែប្រញាប់ធ្វើពិធីរំដោះគ្រោះចេញ ដើម្បីឱ្យចៀសឆ្ងាយពីហេតុការណ៍ទាំងនេះ ។

សរុបមក នេះគ្រាន់តែជាជំនឿមួយចំនួនប៉ុណ្ណោះរបស់ជនជាតិជប៉ុន ហើយបើលោកអ្នកចង់ជ្រាបបន្ថែមពាក់ព័ន្ធនឹងជំនឿផ្សេងៗ ឬរឿងរ៉ាវអាថ៌កំបាំង លោកអ្នកអាចរង់ចាំតាមដានការចេញផ្សាយរបស់សារព័ត៌មាន KBN បន្តទៀត ៕

កាលពីថ្ងៃទី២៣ ខែកញ្ញា ឆ្នាំ២០២៤ សារព័ត៌មានបរទេសរាយការណ៍ថា ប្រទេសចំនួន២ នៅតំបន់អាស៊ីដែលធ្លាប់ដាំកាហ្វេយ៉ាងច្រើន និងនាំចេញទៅកាន់ទីផ្សារពិភពលោក កន្លងមក បែរជានាំចេញកាហ្វេធ្លាក់ចុះនាពេលបច្ចុប្បន្ន ។ ហេតុនេះ វាបានជំរុញឱ្យតម្លៃកាហ្វេ Robusta លើពិភពលោកកើនឡើងយ៉ាងខ្លាំង បើគិតចាប់ពីឆ្នាំ១៩៧០ មក ។

ការនាំចេញកាហ្វេរបស់ប្រទេសវៀតណាមធ្លាក់ចុះ គឺបណ្តាលមកពីបម្រែបម្រួលអាកាសធាតុ ខណៈការនាំចេញកាហ្វេរបស់ឥណ្ឌូណេស៊ីធ្លាក់ចុះ គឺបណ្តាលមកពីតម្រូវការក្នុងស្រុកកើនឡើងខ្ពស់ ។

ប្រទេសវៀតណាមបានផលិតកាហ្វេ Robusta ១ផ្នែកក្នុងចំណោម៣ផ្នែក នៃការផ្គត់ផ្គង់កាហ្វេលើពិភពលោក ។ ការនាំចេញកាហ្វេភាគច្រើនរបស់វៀតណាម គឺជាកាហ្វេកញ្ចប់ ប៉ុន្តែដោយសារភ្លៀងធ្លាក់ខ្លាំងជាច្រើនសប្តាហ៍ ទើបធ្វើឱ្យប៉ះពាល់យ៉ាងខ្លាំងដល់ការដាំដុះកាហ្វេរបស់វៀតណាម មុនការប្រមូលផលកាហ្វេនៅខែតុលា ឆ្នាំ២០២៤ ។

លោក Trinh Duc Minh នាយកសមាគមកាហ្វេ Buon Ma Thuot នៅខេត្ត Dak Lak ដែលជាខេត្តដាំកាហ្វេច្រើនបំផុតរបស់វៀតណាម បញ្ជាក់ថា អាកាសធាតុដ៏អាក្រក់ និងការកាត់បន្ថយការដាំកាហ្វេរបស់កសិករវៀតណាម នឹងធ្វើឱ្យការប្រមូលផលកាហ្វេវៀតណាមធ្លាក់ចុះចាប់ពី១០% ទៅ១៥% ក្នុងរដូវកាលនេះ ។

នាយកសមាគមកាហ្វេនិយាយថា ៖ «គ្រោះរាំងស្ងួតបានធ្វើឱ្យដើមកាហ្វេផ្តល់ផលតិចតួច ហើយគ្រាប់កាហ្វេមានទំហំតូចៗ ។ រីឯភ្លៀងធ្លាក់នឹងប៉ះពាល់ដល់ការប្រមូលផលកាហ្វេ និងការហាលថ្ងៃគ្រាប់កាហ្វេរបស់កសិករ ហើយវាក៏ប៉ះពាល់ដល់ការដឹកជញ្ជូនផងដែរ» ។

យោងតាមទិន្នន័យរបស់ក្រសួងកសិកម្មអាមេរិកបង្ហាញថា ទិន្នផលកាហ្វេវៀតណាមជាង៩៥% ក្នុងរដូវកាលនេះ គឺជាកាហ្វេ Robusta ។ រីឯសារព័ត៌មាន Bloomberg រាយការណ៍ថា បរិមាណកាហ្វេទទួលផលប៉ះពាល់ដោយសារអាកាសធាតុ វាបានធ្វើឱ្យតម្លៃកាហ្វេ Robusta កើនឡើងទ្វេដង កាលពីឆ្នាំ២០២៣ ។ បច្ចុប្បន្ន តម្លៃកាហ្វេ Robusta គឺជិតស្មើកាហ្វេ Arabica ។

Volcafe គឺជាក្រុមហ៊ុនលក់កាហ្វេដ៏ធំសន្និដ្ឋានថា ពិភពលោកនឹងខ្វះខាតកាហ្វេ Robusta ចាប់ពីខែតុលា ឆ្នាំ២០២៤ ដល់ឆ្នាំ២០២៥ ដែលជាការខ្វះខាតកាហ្វេអស់រយៈពេល៤ឆ្នាំជាប់ៗគ្នា ។ ក្រៅពីនេះ កសិករវៀតណាមបានកាត់បន្ថយការដាំកាហ្វេ ដោយសារពួកគេប្តូរទៅដាំដំណាំទុរេន និងប័រ ក្នុងប៉ុន្មានឆ្នាំចុងក្រោយ ។

ដោយឡែក ឥណ្ឌូណេស៊ី គឺជាប្រទេសនាំចេញកាហ្វេ Robusta ក្នុងចំណោមប្រទេសនាំចេញកាហ្វេធំៗលើពិភពលោក បែរជាមានតម្រូវការកាហ្វេក្នុងស្រុកកើនឡើងខ្លាំង ទើបឥណ្ឌូណេស៊ីកាត់បន្ថយការនាំចេញកាហ្វេទៅកាន់ទីផ្សារពិភពលោក ។ ហេតុនេះ ការនាំចេញកាហ្វេធ្លាក់ចុះរបស់ឥណ្ឌូណេស៊ី ពុំពាក់ព័ន្ធនឹងកត្តាអាកាសធាតុទេ ។

លោក Moelyono Susilo នាយកសមាគមនាំចេញ និងឧស្សាហកម្មកាហ្វេឥណ្ឌូណេស៊ីនិយាយថា ទិន្នផលកាហ្វេនៅឆ្នាំ២០២៤ អាចកើនឡើងដល់១០លានថង់ (១ថង់ ស្មើ៦០គីឡូក្រាម) ហើយវានឹងខ្ពស់ជាងឆ្នាំ២០២៣ ប្រមាណ១៤% ។ បើទោះជាការផលិតកាហ្វេកើនឡើងក្តី ប៉ុន្តែឥណ្ឌូណេស៊ីនឹងនាំចេញកាហ្វេត្រឹមតែ២៥ម៉ឺនតោនប៉ុណ្ណោះ ដោយសារតម្រូវការក្នុងស្រុកកើនឡើង ៕

ប្រទេសអេស្ប៉ាញ ៖ កាលពីថ្ងៃទី២០ ខែកញ្ញា ឆ្នាំ២០២៤ សារព័ត៌មានបរទេសរាយការណ៍ថា បុរសអេស្ប៉ាញម្នាក់បានបង្ហោះពីមុខរបរប្លែកបំផុតក្នុងបណ្តាញសង្គម ដែលទទួលបានចំណូលយ៉ាងច្រើន ហើយថែមទាំងមានអតិថិជនកក់មុនព្រោងព្រាត ។ មុខរបរនេះ គឺទទួលអុ.កឡុក ពិធីរៀបអាពាហ៍ពិពាហ៍សម្រាប់យុវជន ឬយុវតីណាចង់ប្តូរចិត្ត ឬពុំចង់រៀបអាពាហ៍ពិពាហ៍ ប៉ុន្តែពុំហ៊ានប្រាប់គូដណ្តឹង ឬឪពុក-ម្តាយរបស់ខ្លួន ។

បុរសអេស្ប៉ាញរូបនេះនិយាយថា លោកទទួលអុកឡុកពិធីរៀបអាពាហ៍ពិពាហ៍សម្រាប់អ្នកណាប្តូរចិត្តពុំរៀបអាពាហ៍ពិពាហ៍ជាមួយគូដណ្តឹងរបស់ខ្លួន ដោយលោកយកថ្លៃសេវាកម្មចំនួន៥០០អឺរ៉ូ (ឬស្មើ៥៥០ដុល្លារអាមេរិក) ។ មុខរបរនេះធ្វើឱ្យលោកអាចរកប្រាក់ចំណូលយ៉ាងច្រើនក្នុងរយៈពេលខ្លី ហើយមានអតិថិជនកក់សេវាកម្មមុនយ៉ាងច្រើន ប៉ុន្តែលោកត្រូវប្រឈមនឹងគេវាយ ឬដាល់បែកមុខ ។

បុរសអេស្ប៉ាញរៀបរាប់ថា លោកបានចាប់ផ្តើមប្រកបមុខរបរដ៏ប្លែកនេះ ក្រោយពីលោកបានបង្ហោះវីដេអូផ្សាយពាណិជ្ជកម្មតាមអនឡាញបែបចំអក និងកំប្លែង ហើយក៏មានអតិថិជនទាក់ទងមកប្រើប្រាស់សេវាកម្មយ៉ាងច្រើន ។ លោកគិតថា វាជាវិធីថ្មីមួយអាចរកចំណូលបន្ថែមទៀត ហើយលោកក៏ចាប់ផ្តើមធ្វើវាតែម្តង ។

ការងារនេះមិនពិបាកទេសម្រាប់លោក ដោយលោកគ្រាន់តែធ្វើគ្រប់វិធីសាស្ត្រ ដើម្បីឈានទៅលុបចោលពិធីរៀបអាពាហ៍ពិពាហ៍ ករណីអ្នកណាម្នាក់ពុំចង់រៀបអាពាហ៍ពិពាហ៍ ប៉ុន្តែមិនហ៊ានបដិសេធជាមួយគូដណ្តឹង ។ លោកនឹងរង់ចាំជួយមនុស្សទាំងនេះជានិច្ច ហើយលោកគ្រាន់តែសុំឱ្យអតិថិជនប្រាប់កាលបរិច្ឆេទ, ទីកន្លែង និងថ្ងៃរៀបចំពិធីឱ្យលោកបានដឹងយ៉ាងលម្អិតប៉ុណ្ណោះ គឺលោកនឹងចាត់ការឱ្យអតិថិជនសម្រេចតាមបំណង ។

លោកនឹងគិតថ្លៃសេវាកម្មដំបូងពីអតិថិជនសម្រាប់ការអុកឡុក ឬការលុបចោលពិធីរៀបអាពាហ៍ពិពាហ៍ ដោយពុំទាន់រួមបញ្ចូលទាំងថ្លៃធ្វើដំណើរ ហើយពេលការងារចប់សព្វគ្រប់ លោកនឹងយកប្រាក់គ្រប់ចំនួន ។ ក្រៅពីនេះ ករណីលោកត្រូវគេធ្វើបាបរាងកាយ ដូចជា ៖ ដាល់មុខ ឬវាយតប់ លោកនឹងគិតប្រាក់ពីអតិថិជនបន្ថែមទៀត គឺស្នាមរបួសមួយកន្លែង លោកនឹងយកប្រាក់ចំនួន៥០អឺរ៉ូ (ឬស្មើ៥៥ដុល្លារអាមេរិក) ។

បច្ចុប្បន្ន មានអតិថិជនច្រើនណាស់ទាក់ទងមកលោកជាមុន ដើម្បីឱ្យលោកធ្វើយ៉ាងណាដើម្បីឈានទៅលុបចោលពិធីអាពាហ៍ពិពាហ៍របស់ពួកគេ ។ វាធ្វើឱ្យលោករវល់យ៉ាងខ្លាំងសម្រាប់ការងារនេះ ហើយអតិថិជនបានកក់ពេញរហូតដល់ខែធ្នូ ឆ្នាំ២០២៤ ឯណោះ ៕

ប្រទេសចិន ៖ សមុទ្រខ្សាច់ Gobi ត្រូវបានគេមើលឃើញថា គឺជាតំបន់មួយដែលពុំសូវមានរុក្ខជាតិដុះ ប៉ុន្តែបើបានឃើញសមុទ្រខ្សាច់នេះដោយផ្ទាល់ភ្នែក យើងនឹងឃើញថា នៅទីនេះ មិនត្រឹមតែមានអណ្តូងប្រេង និងវាលខ្សាច់ប៉ុណ្ណោះទេ ប៉ុន្តែវាសម្បូរទៅដោយធនធានធម្មជាតិ ព្រមទាំងជាប្រភពរ៉ែថ្មដ៏ធំបំផុតនៅប្រទេសចិន ។

សមុទ្រខ្សាច់ Gobi ស្ថិតនៅតំបន់ព្រំដែនភាគពាយ័ព្យប្រទេសចិន និងជាផ្លូវទៅកាន់ភាគខាងលិចខេត្តឈីងហៃ ។ បើធ្វើដំណើរចេញពីទីក្រុងម៉ាងយ៉ា ទៅកាន់ភាគអាគ្នេយ៍ ក្នុងចម្ងាយផ្លូវ២៧គីឡូម៉ែត្រ យើងនឹងបានឃើញសមុទ្រខ្សាច់មួយមានភាពហួតហែងយ៉ាងខ្លាំង និងគ្មានស្មៅដុះទេ ។ មូលហេតុធ្វើឱ្យវាលខ្សាច់នេះមានសភាពហួតហែង ដោយសារមានអណ្តូងទឹកក្តៅចម្លែកមួយនៅបរិវេណនេះឈ្មោះ «អណ្តូងអាយខិន» ឬ «អណ្តូងគ្រាប់ភ្នែកបីសាច» ។

ចំណែកពាក្យថា «អាយខិន» ជាភាសាម៉ុងហ្គោល មានន័យថា «គួរឱ្យខ្លាច» ហើយទឹកក្តៅដែលផុសចេញពីអណ្តូងនេះមានពណ៌ក្រហមខាប់ ។ អណ្តូងមានរូបរាងស្រដៀងគ្នានឹងរូបភាពស្កេនកែវភ្នែក និងមានអង្កត់ផ្ចត់ប្រមាណ១០ម៉ែត្រ ។

បើទោះជាអណ្តូងស្ថិតនៅកណ្តាលវាលខ្សាច់ ប៉ុន្តែវាទឹកក្តៅគ្រប់ពេលវេលា ហើយគេពុំអាចវាស់ជម្រៅអណ្តូងបានទេ ។ រីឯនៅជុំវិញអណ្តូងគ្មានសត្វស្លាប ឬសត្វព្រៃនៅក្បែរទេ ហើយក៏គ្មានរុក្ខជាតិដុះលូតលាស់ដែរ ដោយសារក្នុងអណ្តូងសម្បូរដោយសារធាតុរ៉ែ ។ បើទោះជាទឹកក្នុងអណ្តូងស្អាតក្តី ប៉ុន្តែដោយសារវាមានសារធាតុរ៉ែច្រើនធ្វើឱ្យវាអាចបំផ្លាញថ្មបាន ។

រីឯសត្វពុំដឹងពីគ្រោះថ្នាក់ និងផឹកទឹកអណ្តូងនេះ វានឹងងាប់ដោយសារជាតិពុល ទើបគេតែងតែប្រទះឃើញខ្មោចសត្វនៅក្បែរអណ្តូង ។ ក្រៅពីនេះ ដីខ្សាច់ពណ៌ត្នោតលាយក្រហមនៅជុំវិញអណ្តូង ដែលមើលទៅមានភាពរឹងខ្លាំង ប៉ុន្តែការ វាមានសភាពទន់ជ្រាយនៅផ្នែកខាងក្រោម ។ បើយើងដើរពុំប្រុងប្រយ័ត្នទេនោះ នឹងធ្លាក់ទៅក្រោមបាន ។

ក្រោយពីបានស្រាវជ្រាវអណ្តូងទឹកក្តៅរួច នាយកស្រាវជ្រាវផ្នែកធរណីវិទ្យាប្រចាំខេត្តជីលីនសន្និដ្ឋានថា ដើមកំណើតរបស់អណ្តូងអាចពាក់ព័ន្ធជាមួយការផ្អៀងរបស់ស្រទាប់នៅផ្នែកខាងក្រោម ។ ប៉ុន្តែបច្ចុប្បន្ន នៅខ្វះខាតឯកសារច្បាស់លាស់ ហើយត្រូវមានការស្រាវជ្រាវ និងវិភាគបន្ថែមទៀតពីដើមកំណើតរបស់អណ្តូង, ចរន្តទឹក និងធាតុផ្សំរបស់សារធាតុគីមី ។

បើសម្លឹងពីទីខ្ពស់ អណ្តូងនេះស្រដៀងនឹងគ្រាប់ភ្នែកមនុស្ស ដែលមើលឃើញសរសៃភ្នែកយ៉ាងច្បាស់ដូចមានជីវិត ។ ហេតុនេះ ទើបអណ្តូងនៅខេត្តឈីងហៃ បានក្លាយជាតំបន់ពេញនិយមរបស់ភ្ញៀវទេសចរបរទេសយ៉ាងច្រើន ។ ប៉ុន្តែមន្ត្រីទេសចរណ៍ចិនដាស់តឿនថា ផ្លូវទៅកាន់អណ្តូងជាដីខ្សាច់ជ្រាបទឹក និងមានសត្វព្រៃរស់នៅ បើភ្ញៀវទេសចរចង់មកទីនេះ គួរធ្វើដំណើរតាមរថយន្ត ហើយពេលមកដល់ ហាមលេងទឹក ឬផឹកទឹកនេះដាច់ខាត ។

ប្រទេសចិនបានអនុញ្ញាតឱ្យភ្ញៀវទេសចរចូលមកទីនេះដោយពុំគិតថ្លៃតាមពេលវេលាកំណត់ ហើយដើម្បីសុវត្ថិភាព ចិនពុំទាន់មានគម្រោងឱ្យភ្ញៀវទេសចរមកលេងទីនេះពេលយប់ទេ ៕

iPhone 16 Pro Max ត្រូវបានគេចាត់ទុកថាមិនមានកាមេរ៉ាល្អដូច Huawei Pura 70 Ultra ឡើយដោយសារហេតុផលទាំងនេះ។
យោងតាម DxOMark ដែលជាគេហទំព័រកាមេរ៉ាដ៏ល្បីមួយមានជំនាញក្នុងការសាកល្បងទូរស័ព្ទម៉ូដែលថ្មី បានវាយតម្លៃថា សមត្ថភាពនៃការថតរូបរបស់ iPhone 16 Pro Max បន្ទាប់ពីបង្ហាញខ្លួននៅលើទីផ្សារ ឃើញថាទទួលបានមតិអវិជ្ជមានជាច្រើន។ ដោយសារគុណវិបត្តិគឺព័ត៌មានលម្អិតមិនស៊ីសង្វាក់គ្នានៅពេលពង្រីក កង្វះគុណភាពរូបភាពនៅទូទាំងជួរ tele zoom ជាមួយនឹងការធ្លាក់ចុះគួរឱ្យកត់សម្គាល់នៅក្នុងការកំណត់ tele ចន្លោះពី 2x និង 5x។ លើសពីនេះជម្រៅតូចចង្អៀតដែលនាំឱ្យបាត់បង់ការផ្តោតអារម្មណ៍នៅពេលថតរូបជាក្រុម ក៏ដូចជាករណីមួយចំនួនទៀតដូចជា ភ្លើងចាំងពេក ឬគែមខ្មៅនៅពេលថតក្នុងពន្លឺទាប។

ផ្ទុយទៅវិញបើធៀបនឹង Huawei Pura 70 Ultra គឺមានកាមេរ៉ាល្អជាងដោយសារសមត្ថភាពនៃការថតរូបនីមួយៗបង្កើតបានជារូបថតដ៏ស្រស់ស្អាតបំផុត ចាប់ពីពន្លឺទាបនៅពេលយប់រហូតដល់ពន្លឺខាងក្រោយ ពន្លឺក្នុង ឬខាងក្រៅ។ រីឯគុណភាពរូបថតគឺ “ដំណើរការល្អជាងស្មាតហ្វូនភាគច្រើនជាមួយនឹងភាពជាប់លាប់ ការបង្ហាញត្រឹមត្រូវ ភាពស្មោះត្រង់នៃពណ៌ ភាពច្បាស់ និងកម្រិតពណ៌ខ្ពស់”។ លើសពីនេះ ស្មាតហ្វូនរបស់ក្រុមហ៊ុន Huawei ក៏ផលិតរូបភាពបញ្ឈរដ៏ល្អ បែបផែនព្រិលផ្ទៃខាងក្រោយធម្មជាតិ និងសោភ័ណភាព សមត្ថភាពក្នុងការបំបែកវត្ថុពីផ្ទៃខាងក្រោយយ៉ាងចុះសម្រុងគ្នា ខណៈពេលដែលវានៅតែរក្សាភាពច្បាស់។

ទោះបីជា iPhone 16 Pro Max មានការថតរូបមិនល្អក៏ដោយ ក៏ឧបករណ៍នេះត្រូវបានគេវាយតម្លៃខ្ពស់ចំពោះសមត្ថភាពនៃការថតវីដេអូ ដោយសារភាពស្មោះត្រង់នៃពណ៌ វាយនភាព ព័ត៌មានលម្អិត សមត្ថភាពក្នុងការលុបផ្ទៃខាងក្រោយ ជាមួយនឹងការផ្តោតដោយស្វ័យប្រវត្តិលឿន និងត្រឹមត្រូវបំផុត ត្រូវបានគេចាត់ទុកថាជា”ទូរស័ព្ទថតវីដេអូល្អបំផុតនាពេលបច្ចុប្បន្ននេះ”។ ទាក់ទងនឹងសមត្ថភាពថតរូប iPhone 16 Pro Max ទទួលបាន ១៥៧ ពិន្ទុ ទាបជាងស្មាតហ្វូននាំមុខគេ Huawei Pura 70 Ultra ដែលមាន ១៦៣ ពិន្ទុ។ ដូច្នេះសរុបមក iPhone 16 Pro Max គឺល្អសម្រាប់ការថតវីដេអូ ប៉ុន្តែមិនល្អសម្រាប់ការថតរូប ដោយបច្ចុប្បន្នស្មាតហ្វូននេះឈរនៅលេខរៀងទី ៤ តាមពីក្រោយ Huawei Pura 70 Ultra, Google Pixel 9 Pro XL និង Honor Magic6 Pro៕

សិង្ហបុរី៖ សម្រាប់ស្រ្តីដែលស្រឡាញ់កុមារ ប៉ុន្តែមិនចង់មានកូន តុក្កតាសិប្បនិម្មិតដែលមើលទៅដូចទារកពិតៗគឺមានលក់នៅក្នុងទីផ្សារហើយ។
យោងតាម South China Morning Post ស្ត្រីអាយុ ៥០ ឆ្នាំដែលមានកូន ៤ នាក់នៅក្នុងប្រទេសសិង្ហបុរីបានទាក់ទាញចំណាប់អារម្មណ៍ទូទាំងពិភពលោកដោយការបង្កើតទារកសិប្បនិម្មិតដែលមើលទៅដូចទារកពិតៗ លក់ក្នុងតម្លៃ ៦,០០០ ដុល្លារអាមេរិកក្នុងមួយតុក្កតា កំពុងផ្ទុះការចាប់អារម្មណ៍យ៉ាងខ្លាំងពេញបណ្តាញសង្គម។

ស្ត្រីសិង្ហបុរីវ័យ ៥០ ឆ្នាំរូបនេះមានឈ្មោះថា Andrea Lee គឺជាវិចិត្រករម្នាក់ដែលចូលចិត្តគូគំនូរក្មេងៗ។ នៅពេលទំនេរបន្ទាប់ពីបំពេញភារកិច្ចជាម្តាយដ៏ល្អរបស់កូនៗរួច Andrea Lee តែងតែងចែករំលែកជំនាញបង្កើតទារកសិប្បនិម្មិតរបស់នាងតាមអ៊ីនធឺណិត ដោយទទួលបានការសាកសួរយ៉ាងច្រើនសម្រាប់ការទិញតុក្កតាមួយនេះ។ ដូច្នេះឆ្លៀតឱកាសដ៏ល្អនេះនាងក៏បានបង្កើតគេហទំព័រមួយដើម្បីលក់ទារកសិប្បនិម្មិតក្នុងតម្លៃ ៦០០០ ដុល្លារអាមេរិកក្នុងមួយតុក្កតា ដោយមួយឆ្នាំៗនាងលក់បានប្រហែល ២៦ តុក្កតា ដោយមានអ្នកទិញទូទាំងពិភពលោក។

ទារកសិប្បនិម្មិតត្រូវបានផលិតឡើងពីស៊ីលីកូន ឬវីនីល ហើយត្រូវបានបង្កើតយ៉ាងល្អិតល្អន់ ដើម្បីត្រាប់តាមរូបរាង និងវាយនភាពរបស់ទារកពិតៗ។ Andrea បាននិយាយថា ការបង្កើតតុក្កតានេះគឺមានការលំបាកជាច្រើន ក៏ដូចជាចំណាយពេលយូរផងដែរ ដើម្បីឱ្យមើលទៅឃើញតុក្កតាមួយនេះដូចមានជីវិត និងមានភាពល្អឥតខ្ចោះ។ ហេតុនេះសម្រាប់តម្លៃរៀងខ្ពស់បន្តិចដោយសារវាត្រូវការចំណាយច្រើនទាំងពេលវេលា និងកម្លាំង។

ទោះបីជាមានការលំបាកបន្តិចមែន Andrea ពិតជារីករាយណាស់ក្នុងការបង្កើតតុក្កតានេះ។ គួរបញ្ជាក់ដែរថា ទារកស៊ីលីកូននេះគឺមានរូបរាង និងសាច់ទន់ល្មើយដូចទៅនឹងទារកពិតៗតែម្តង ទោះជាយ៉ាងណាដើម្បីបានតុក្កតាដ៏គួរឱ្យស្រឡាញ់មួយនេះ លោកអ្នកត្រូវតែកក់ចំនួន ១,៩០០ ដុល្លារអាមេរិកជាមុនសិននៅលើគេហទំព័ររបស់ Andrea Lee៕

ខ្យល់ព្យុះមិនទាន់ស្ងាត់នៅឡើយទេ ថ្មីៗនេះភ្លៀងធ្លាក់ខ្លាំងដោយសារឥទ្ធិពលព្យុះ Pulasan ក្នុងរយៈពេល ២៤ ម៉ោងកាលពីព្រឹកថ្ងៃទី២១ ដល់ព្រឹកថ្ងៃទី២២ ខែកញ្ញា បានធ្វើឱ្យប្រទេសកូរ៉េខាងត្បូង និងជប៉ុនបាក់ដីយ៉ាងធ្ងន់ធ្ងរបំផុត ក៏ដូចជាលិចផ្លូវ និងលិចអគារជាច្រើន។
យោងតាមសារព័ត៌មាន Kyodo News បានឱ្យដឹងថា បច្ចុប្បន្នប្រទេសអាស៊ីទាំងពីរនេះកំពុងប្រឈមនឹងឥទ្ធិពលព្យុះ Pulasan យ៉ាងខ្លាំងក្លាបំផុតមិនធ្លាប់មាន បណ្តាលឱ្យតំបន់មួយចំនួនលិចលង់ដោយគ្រោះធម្មជាតិ។

ទីភ្នាក់ងារឧតុនិយមជប៉ុន (JMA) បាននិយាយថា សម្ពាធត្រូពិចពីព្យុះ Pulasan បានផ្លាស់ទីទៅភាគឦសាន បណ្តាលឱ្យមានភ្លៀងធ្លាក់ខ្លាំងឥតឈប់ឈរដល់តំបន់ដីគោកមួយចំនួន ជាពិសេសគឺតំបន់ Honshu។ ទន្ទឹមនឹងនេះទីក្រុងទាំងពីរនៃ Wajima និង Suzu នៅលើឧបទ្វីប Noto ក្នុងខេត្ត Ishikawa ក៏បានកត់ត្រាបរិមាណទឹកភ្លៀងខ្ពស់បំផុត ដែលនេះនាំឱ្យមានទឹកជំនន់ទន្លេ ការបាក់ដី កាត់ផ្តាច់ផ្លូវ នៃតំបន់ដាច់ស្រយាលជាច្រើនទៀត។ បច្ចុប្បន្នទីភ្នាក់ងារឧតុនិយមជប៉ុន បានអំពាវនាវឱ្យប្រជាជននៅក្នុងតំបន់ Hokuriku រួមទាំងឧបទ្វីប Noto ឱ្យមានការប្រុងប្រយ័ត្នខ្ពស់បំផុតចំពោះបាតុភូតធម្មជាតិនេះ។

អាជ្ញាធរមូលដ្ឋានបាននិយាយថា ក្នុងរយៈពេល ២៤ ម៉ោងនេះភ្លៀងបានបណ្តាលឱ្យមនុស្សម្នាក់ស្លាប់ និង ១០ នាក់ផ្សេងទៀតបាត់ខ្លួន ហើយមិនទាន់រកឃើញនោះទេ។ រីឯនៅប្រទេសកូរ៉េខាងត្បូងវិញ ឥទ្ធិពលព្យុះក៏បានធ្វើឱ្យប្រទេសនេះបាក់ដី និងទឹកជំនន់ធ្ងន់ធ្ងរកាលពីថ្ងៃទី ២១ ខែកញ្ញាកន្លងទៅ ដោយបង្ខំមនុស្សជាង ៩០០ នាក់មកពី ៥៨១ គ្រួសារនៅតំបន់ភាគខាងត្បូងត្រូវជម្លៀសចេញ។ ទោះជាយ៉ាងណាមន្ត្រីបាននិយាយថាបច្ចុប្បន្នមិនមានរបាយការណ៍នៃអ្នកស្លាប់និងរបួសនោះទេ។

យោងតាមសារព័ត៌មានកូរ៉េ Yonhap News ក៏បានឱ្យដឹងទៀតថា ផ្លូវរថភ្លើងជាច្រើនខ្សែ រួមទាំងខ្សែ Gyeongbu ដែលតភ្ជាប់ទីក្រុងសេអ៊ូល និងទីក្រុងប៊ូសាន ត្រូវបានលុបចោល បិទ ឬផ្អាកបណ្តោះអាសន្ន ហើយរថយន្តដឹងដីធំៗពីរបានក្រឡាប់ ដោយសារឥទ្ធិពលព្យុះទីហ្វុង Pulasan បណ្តាលឱ្យជន់លិចផ្លូវ និងយានជំនិះរាប់សិបគ្រឿង។ ដូច្នេះនាយករដ្ឋមន្ត្រី Han Duck-soo បានណែនាំជាបន្ទាន់ដល់មន្ត្រីឱ្យប្រើប្រាស់ធនធានដែលមានទាំងអស់ ដើម្បីកាត់បន្ថយការខូចខាត និងត្រៀមសម្រាប់ភ្លៀងធ្លាក់ខ្លាំង នៅពេលដែលព្យុះទីហ្វុង Pulasan បោកបក់មកឆ្នេរសមុទ្រភាគខាងត្បូងរបស់ប្រទេស៕