ប្រទេសថៃ ៖ វាបានធ្វើឱ្យមហាជន និងវិស័យសិល្បៈនៅប្រទេសថៃភ្ញាក់ផ្អើលយ៉ាងខ្លាំង ក្រោយពីទទួលដំណឹងថា តារាសម្តែងដ៏ល្បីឈ្មោះប្រចាំប្រទេសថៃ គឺលោក អមអាក់ខាផាន់ ណាក់ម៉ាត (Om Akkaphan Namart) បានទទួលមរណ.ភាព ក្នុងវ័យត្រឹមតែ៣៩ឆ្នាំ ក្រោយពីលោកកើតជំងឺមហារីកនៅបរិវេណសាច់ដុំបេះដូង និងរាលដាលដល់សួត ។.png)
កាលពីថ្ងៃទី២២ ខែកញ្ញា ឆ្នាំ២០២៤ ហ្វេសប៊ុកផេករបស់ស្ថានីយទូរទស្សន៍ប៉ុស្តិ៍លេខ៧ ប្រទេសថៃឈ្មោះ Ch7HD បានបង្ហោះព័ត៌មានដ៏សោកសៅពីការទទួលមរណភាពរបស់តារាសម្តែងដ៏ល្បីល្បាញ គឺលោក អម អាក់ខាផាន់ ក្នុងវ័យត្រឹម៣៩ឆ្នាំ ។ ស្ថានីយទូរទស្សន៍ប៉ុស្តិ៍លេខ៧ បញ្ជាក់ថា លោក អម អាក់ខាផាន់ គឺជាតារាសម្តែងដ៏មានទេពកោសល្យក្នុងវិស័យភាពយន្ត ហើយលោកបានបន្សល់ទុកនូវស្នាដៃគួរឱ្យចាប់អារម្មណ៍យ៉ាងច្រើន ។
លោក អមអាក់ខាផាន់ កើតនៅថ្ងៃទី២៨ ខែមករា ឆ្នាំ១៩៨៥ បានឈានជើងចូលក្នុងវិស័យសិល្បៈដំបូង តាមរយៈការថតផ្សព្វផ្សាយពាណិជ្ជកម្ម Music Video ។ បន្ទាប់មក លោកបានសម្តែងជាតួរងក្នុងរឿងដំបូងឱ្យស្ថានីយទូរទស្សន៍ប៉ុស្តិ៍លេខ៣ និងសម្តែងភាពយន្តឱ្យស្ថានីយទូរទស្សន៍ប៉ុស្តិ៍លេខ៧ រហូតទទួលបានពានរង្វាន់ទូរទស្សន៍មាស ផ្នែកតារាសម្តែងលេចធ្លោ ។
ក្រោយមក លោកបានសម្តែងជាតួឯកលើកដំបូងក្នុងរឿង «Sao Chai Hi-Tech» ជាមួយតួឯកស្រី អ្នកនាង វ៉ារ៉ាថាយ៉ា នីឃូហា ហើយលោកក៏ចាប់ផ្តើមមានឈ្មោះបោះសំឡេងកាន់តែខ្លាំង ក្រោយពីលោកបានសម្តែងរឿង «ភពពីរ» ។ ចាប់ពីឆ្នាំ២០១៧ រហូតមក លោកក៏បានសម្តែងភាពយន្តជាបន្តបន្ទាប់ ដូចជា ៖ រឿង «បេសកកម្មស្នេហា» និងរឿង «កងនាវាជើងទឹក» ជាដើម ។
ប៉ុន្តែនៅឆ្នាំ២០២២ លោក អមអាក់ខាផាន់ ក៏ចាប់ផ្តើមកើតជំងឺមហារីកនៅសាច់ដុំបេះដូង ហើយលោកក៏ផ្អាកពីការងារសិល្បៈ ដើម្បីព្យាបាលជំងឺមហារីកនេះដែលរាលដាលទៅដល់សួត ។ កាលពីខែមករា ឆ្នាំ២០២៣ លោកបានចូលវះកាត់នៅមន្ទីរពេទ្យ ហើយជំងឺរបស់លោកក៏ធូរស្បើយឡើងវិញ ប៉ុន្តែហ្វេសប៊ុករបស់ស្ថានីយទូរទស្សន៍ប៉ុស្តិ៍លេខ៧ បានបង្ហោះព័ត៌មានសោកសៅពីការស្លាប់របស់លោក នៅថ្ងៃទី២២ ខែកញ្ញា ឆ្នាំ២០២៤ ។
ការទទួលមរណភាពរបស់លោក អមអាក់ខាផាន់ បានធ្វើឱ្យមហាជន, មិត្តភក្តិក្នុងវិស័យសិល្បៈ និងអ្នកគាំទ្រភ្ញាក់ផ្អើលយ៉ាងខ្លាំង ពីព្រោះនាពេលមុននេះ ពួកគេទើបតែលោកថតភាពយន្តថ្មីមួយ ហើយលោកថែមទាំងបង្ហោះក្នុង Instagram ឱ្យទស្សនិកជនរង់ចាំទស្សនារឿងថ្មីរបស់លោកទៀតផង ។.jpg)
ក្រុមគ្រួសាររបស់លោក និយាយថា លោកបានព្យាបាលជំងឺមហារីកនៅសាច់ដុំបេះដូង អស់រយៈពេលជាង២ឆ្នាំហើយ ។ ប្អូនស្រីរបស់លោក និយាយថា ៖ «២ឆ្នាំមកនេះ បងប្រុសបានព្យាបាលជំងឺនៅមន្ទីរពេទ្យ តែគាត់អត់ធ្មត់ខ្លាំងណាស់ ។ បងប្រុសបានមើលថែក្រុមគ្រួសាររហូតដល់គាត់ស្លាប់ ប៉ុន្តែគាត់នៅតែរឹងមាំទាំងផ្លូវកាយ និងចិត្ត ដើម្បីកុំឱ្យគ្រប់គ្នាបារម្ភ» ។
រីឯម្តាយរបស់លោក និយាយថា ៖ «ខ្ញុំសូមអរគុណអ្នកទាំងអស់គ្នាដែលបានមកចូលរួមបុណ្យសពកូនខ្ញុំ ។ បើទោះជាកូនប្រុសកំពុងសម្រាកព្យាបាលជំងឺក្តី តែកូននិយាយជាមួយក្រុមគ្រួសារតាមធម្មតា ដោយសារមិនចង់ឱ្យគ្រប់គ្នាបារម្ភ ។ កូនប្រុសបានលះបង់គ្រប់យ៉ាងទាំងអស់ដើម្បីថែទាំគ្រួសាររហូតដល់ដង្ហើមចុងក្រោយ» ។
ក្នុងពិធីបុណ្យសព គេបានឃើញអ្នកស្រី ដារៀ ឆេសរ៉ុក ជាភរិយារបស់លោក អមអាក់ខាផាន់ ឈរទទួលភ្ញៀវមកចូលរួមបុណ្យសពជាមួយក្រុមគ្រួសារខាងស្វាមី ជាមួយទឹកមុខយ៉ាងក្រៀមក្រំបំផុត ៕
