សហរដ្ឋអាមេរិក៖ នៅថ្ងៃទី៥ ខែវិច្ឆិកានេះ គឺជាថ្ងៃបោះឆ្នោតប្រធានាធិបតីអាមេរិកជាផ្លូវការហើយ តើរវាងអ្នកទាំងពីរគឺ Donald Trump និងលោកស្រី Kamala Harris ម្នាក់ណាជាអ្នកជាប់ឆ្នោតទៅ? ទោះជាយ៉ាងណាអ្នកទាំងពីរសុទ្ធតែប្តេជ្ញាជំរុញសេដ្ឋកិច្ចអាមេរិក ប៉ុន្តែគោលនយោបាយរបស់ Trump ហាក់មានហានិភ័យបន្តិចចំពោះសេដ្ឋកិច្ចពិភពលោក ផ្ទុយទៅវិញគោលនយោបាយរបស់លោកស្រី Harris ប្រសិនបើជាប់ឆ្នោតគឺលោកស្រីផ្តោតលើចំណុចផ្លាស់ប្តូរតូចៗប៉ុណ្ណោះដូចជា បង្កើនការផ្គត់ផ្គង់លំនៅដ្ឋាន និងកាត់បន្ថយតម្លៃម្ហូបអាហារ រួមទាំងធ្វើឱ្យបរិយាកាសធុរកិច្ចអាមេរិកកាន់តែមានភាពទាក់ទាញជាងមុន។

យោងតាមការសែត Time ប្រសិនបើលោកស្រី Harris ក្លាយជាប្រធានាធិបតីស្ត្រីដំបូងរបស់ប្រទេសអាមេរិក លោកស្រីនឹងអនុវត្តគោលនយោបាយដូចជា៖
១.សាងសង់ផ្ទះថ្មីៗជាច្រើន៖ ជាការពិតណាស់ អត្រាការប្រាក់ខ្ពស់កំពុងធ្វើឱ្យជនជាតិអាមេរិកស្ទាក់ស្ទើរក្នុងការទិញផ្ទះ។ លើសពីនេះការផ្គត់ផ្គង់ផ្ទះនៅក្នុងទីផ្សារបន្ទាប់បន្សំក៏ខ្វះខាតផងដែរ ដោយសារម្ចាស់មានការស្ទាក់ស្ទើរក្នុងការលក់។ ទោះជាយ៉ាងណា ប្រសិនជាប់ឆ្នោតលោកស្រី Harris នឹងស្នើផ្តល់ជំនួយការបង់ប្រាក់ចំនួន ២៥,០០០ ដុល្លារដល់អ្នកទិញផ្ទះ ដែលផែនការនេះនឹងជួយមនុស្សប្រហែល ១ លាននាក់ក្នុងមួយឆ្នាំ។

២.ថ្លៃព្យាបាលធ្លាក់ចុះ៖ រដ្ឋបាលរបស់ Harris អាចបន្តកិច្ចខិតខំប្រឹងប្រែងដើម្បីកាត់បន្ថយការចំណាយលើការថែទាំសុខភាពដែលត្រូវបានអនុវត្តដោយរដ្ឋបាល Biden ។ លើសពីនេះ លោកស្រីបានស្នើវិធានការបន្ថែមមួយចំនួន ដើម្បីជួយប្រជាជនអាមេរិកសន្សំលើថ្លៃព្យាបាល ដូចជាការពង្រីកសិទ្ធិរបស់រដ្ឋាភិបាលក្នុងការចរចាតម្លៃថ្នាំ បង្កើនការគាំទ្រផ្នែកពន្ធ ដើម្បីទូទាត់ថ្លៃធានារ៉ាប់រង និងពង្រីកអត្ថប្រយោជន៍ថែទាំសុខភាពដល់មនុស្សចាស់នៅផ្ទះ។

៣.តម្លៃអាហារមិនកើនឡើងទេ៖ ដើម្បីទប់ស្កាត់តម្លៃខ្ពស់ ហារីសបានស្នើឱ្យហាមឃាត់អ្នកផ្គត់ផ្គង់អាហារ និងគ្រឿងទេសមិនឱ្យដំឡើងថ្លៃហួសហេតុពេកទេ។ ដូច្នេះតម្លៃអាហារមិនកើនឡើង និងធ្លាក់ចុះ នឹងធ្វើឱ្យប្រជាជនសប្បាយរីករាយជាងមុន។

៤.ពន្ធនាំចូលមិនកើនឡើងក្នុងទ្រង់ទ្រាយធំទេ៖ Harris នឹងបន្តគោលនយោបាយពន្ធតាមគោលដៅរបស់លោក Biden ដោយមិនដំឡើងពន្ធនាំចូលហួសហេតុពេកទេ។ គោលនយោបាយនេះគឺខុសពី Trump ប្រសិន Trump ជាប់ឆ្នោតនឹងដំឡើងពន្ធនាំចូលទ្រង់ទ្រាយធំ ដែលនឹងធ្វើឱ្យគ្រួសារវណ្ណៈកណ្តាលខាតបង់រាប់ពាន់ដុល្លារក្នុងមួយឆ្នាំៗ៕

ប្រទេសចិន ៖ ចិនមានមហិច្ឆតាក្លាយជាប្រទេសប្រើប្រាស់រថយន្តអគ្គិសនីច្រើនបំផុតលើពិភពលោក ដោយចំនួនស្ថានីយសាកថ្មរថយន្តអគ្គិសនីរបស់ចិនបានកើនឡើងរហូតដល់ជាង១១លានកន្លែង ។ វាបានឆ្លុះបញ្ចាំងពីការប្តេជ្ញាចិត្តកាត់បន្ថយការបំពុលបរិយាកាស និងការអភិវឌ្ឍឧស្សាហកម្មរបស់រដ្ឋាភិបាលចិន ។

ការពង្រីកស្ថានីយសាកថ្មរថយន្តអគ្គិសនីនៅប្រទេសចិនបញ្ជាក់ថា រដ្ឋាភិបាលចិនបានជំរុញឱ្យពលរដ្ឋប្រើប្រាស់រថយន្តអគ្គិសនីឱ្យបានច្រើន ដើម្បីកាត់បន្ថយការពឹងផ្អែកលើប្រេងឥន្ធនៈ, កាត់បន្ថយជាតិពុលលើអាកាស និងជំរុញការអភិវឌ្ឍឧស្សាហកម្មរថយន្តអគ្គិសនី ។

ទិន្នន័យរបស់ភ្នាក់ងារថាមពលជាតិបានបង្ហាញពីការរីកចម្រើនយ៉ាងឆាប់រហ័សរបស់ស្ថានីយសាកថ្ម គឺនៅចុងខែកញ្ញា ឆ្នាំ២០២៤ ចិនមានស្ថានីយសាកថ្មសរុបជាង១១លានកន្លែង កើនឡើងជិត៥០% បើធៀបនឹងឆ្នាំ២០២៣ ។ ស្ថានីយសាកថ្មបែងចែកជា២ប្រភេទ រួមមាន ៖

១-ស្ថានីយសាកថ្មសាធារណៈ ៖ ស្មើជាង៣លានកន្លែងនៅទូទាំងប្រទេសចិន ដូចជា ៖ ក្នុងផ្សារទំនើប, អគារការិយាល័យ, ស្ថានីយប្រេងឥន្ធនៈ និងនៅតាមផ្លូវសំខាន់ៗ ដើម្បីផ្តល់ភាពងាយស្រួលដល់ពលរដ្ឋប្រើប្រាស់រថយន្តអគ្គិសនីធ្វើដំណើរផ្លូវឆ្ងាយ ។

២-ស្ថានីយសាកថ្មឯកជន ៖ ស្មើជាង៨លានកន្លែង ដូចជា ៖ ក្នុងលំនៅឋាន, ខុនដូ និងអគារស្នាក់នៅ ដើម្បីឱ្យម្ចាស់រថយន្តអគ្គិសនីអាចសាកថ្មរថយន្តក្នុងលំនៅឋាន និងពុំខាតពេលវេលាធ្វើដំណើរទៅស្ថានីយសាកថ្មសាធារណៈ ។

ការពង្រីកស្ថានីយសាកថ្មនេះ ស្របគ្នានឹងចំនួនរថយន្តអគ្គិសនីថ្មីចុះបញ្ជីនៅចិនរហូតដល់ជាង២៨លានគ្រឿង មានន័យថា ចំនួនស្ថានីយសាកថ្មអាចបំពេញតម្រូវការសម្រាប់រថយន្តពលរដ្ឋ ។ ក្រៅពីនេះ រដ្ឋាភិបាលចិនបានជំរុញការអភិវឌ្ឍបច្ចេកវិទ្យាក្នុងស្ថានីយសាកថ្មឆាប់រហ័ស (Fast Charging) ដើម្បីកាត់បន្ថយពេលវេលាសាកថ្មផងដែរ ។

ប៉ុន្តែស្ថានីយសាកថ្មរថយន្តអគ្គិសនីរបស់ចិនពុំមានគ្រប់ទីកន្លែងទេ ជាពិសេស នៅតំបន់ជនបទ និងភាពមិនស្មើគ្នារវាងចំនួនស្ថានីយសាកថ្ម និងរថយន្ត ។ រដ្ឋាភិបាលចិនបានព្យាយាមដោះស្រាយបញ្ហានេះ ដើម្បីលើកទឹកចិត្តឱ្យពលរដ្ឋប្រើប្រាស់រថយន្តអគ្គិសនី និងកាត់បន្ថយការបំភាយឧស្ម័នផ្ទះកញ្ចក់ ។

បើទោះជាស្ថានីយសាកថ្មពុំគ្រប់គ្រាន់ក្តី ប៉ុន្តែចិនចង់ក្លាយជាប្រទេសប្រើប្រាស់រថយន្តអគ្គិសនីច្រើនបំផុតលើពិភពលោក ដោយពង្រីកស្ថានីយសាកថ្មឱ្យបានច្រើនកន្លែងដើម្បីជំរុញឱ្យពលរដ្ឋកាត់បន្ថយការប្រើប្រាស់រថយន្តប្រេងឥន្ធនៈ ។ ក្រៅពីនេះ ក៏មានការសហការរវាងស្ថាប័នរដ្ឋ និងក្រុមហ៊ុនឯកជនដើម្បីឈានទៅប្រើប្រាស់រថយន្តអគ្គិសនីទាំងស្រុង ។

ហេតុនេះ ការប្តេជ្ញាចិត្តរបស់រដ្ឋាភិបាលចិន ព្រមទាំងការគាំទ្រពីក្រុមហ៊ុនឯកជននឹងអាចធ្វើឱ្យប្រទេសចិនយកឈ្នះលើឧបសគ្គផ្សេងៗ ហើយពលរដ្ឋនឹងរស់នៅដោយគ្មានការបំពុលបរិស្ថាន ៕

ប្រទេសថៃ ៖ នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ បានថ្លែងថា កោះកុត គឺជារបស់ប្រទេសថៃ ថៃនឹងពុំព្រមបាត់បង់កោះនេះទៅឱ្យប្រទេសណាទេ ហើយលោកស្រីគិតពីផលប្រយោជន៍ជាតិជាធំ ។ លោកស្រីបានបញ្ជាក់ទៅកាន់ពលរដ្ឋបែបនេះ ក្រោយពីពលរដ្ឋបារម្ភខ្លា.ចបាត់បង់កោះកុតទៅឱ្យកម្ពុជា ។

កាលពីថ្ងៃទី៤ ខែវិច្ឆិកា ឆ្នាំ២០២៤ លោកស្រី ផេថងថាន នាយករដ្ឋមន្ត្រីថៃ និងជាប្រធានគណបក្សភឿថៃ បានដឹកនាំកិច្ចប្រជុំដើម្បីតាមដានការងារ និងបញ្ហាផ្សេងៗ ដែលមានមន្ត្រីរដ្ឋាភិបាលជាច្រើនរូបចូលរួម ។ កិច្ចប្រជុំក៏បានលើកឡើងពីការចុះ MOU 2544 ពាក់ព័ន្ធនឹងតំបន់ត្រួតស៊ីគ្នាក្នុងសមុទ្រជាមួយកម្ពុជា និងការធ្វើវិសោធនកម្មរដ្ឋធម្មនុញ្ញ ។

លោកស្រី ផេថងថន បានថ្លែងក្រោយកិច្ចប្រជុំថា ៖ «កោះកុត ជារបស់ថៃតាំងពីយូរមកហើយ កម្ពុជាក៏បានដឹងដែរថា កោះកុតជារបស់ថៃតាមសន្ធិសញ្ញាបារាំង ។ រដ្ឋាភិបាលថៃនឹងពុំព្រមបាត់បង់កោះនេះទៅឱ្យប្រទេសណា យើងពុំធ្លាប់មានបញ្ហាជាមួយកម្ពុជាទេ ប៉ុន្តែពលរដ្ឋថៃយល់ខុសខ្លួនឯង ។ ការចុះ MOU 2544 រវាងថៃ និងកម្ពុជានៅតែដំណើរការ គ្មានការលុបចោលទេ ពីព្រោះការលុបចោលត្រូវមានការយល់ព្រមពីថៃ និងកម្ពុជា ហើយបើថៃលុបចោលនោះនឹងត្រូវកម្ពុជាប្តឹង» ។

ចំណែកកោះកុត ពុំពាក់ព័ន្ធនឹងការចរចា MOU ទេ ហើយសូមពលរដ្ឋថៃគ្រប់រូបសប្បាយចិត្ត និងឈប់បារម្ភទៀតទៅ ពីព្រោះថៃនឹងពុំបាត់បង់កោះនេះទេ ។ ប្រទេសថៃពុំអាចលុបចោល MOU ឡើយ បើគ្មានការយល់ព្រមរវាងថៃ និងកម្ពុជា បើទោះជាមតិមួយចំនួនស្នើឱ្យរដ្ឋាភិបាលថៃលុបចោល MOU ក្តី ដើម្បីកុំឱ្យមានទំនាស់ជាមួយប្រទេសជិតខាង ។ ការរក្សាភាពស្ងប់ស្ងាត់ គឺជារឿងសំខាន់ ហើយបើថៃលុបចោល MOU តើនឹងទទួលបានអ្វី? ករណីថៃលុបចោលជាឯកតោភាគីនឹងត្រូវកម្ពុជាប្តឹងមិនខាន ។

ពលរដ្ឋថៃគួរតែជ្រាបពីចំណុចខាងក្រោមនេះ ៖
១-MOU មិនពាក់ព័ន្ធនឹងកោះកុតទេ
២-MOU គឺជារឿងរវាងប្រទេសពីរ បើចង់លុបចោល ត្រូវតែមានការយល់ព្រមពីប្រទេសទាំងពីរ
៣-ថៃពុំចាញ់ប្រៀបពាក់ព័ន្ធនឹង MOU ទេ ។

ហេតុនេះ សូមពលរដ្ឋកុំយករឿងនយោបាយមកលាយឡំធ្វើឱ្យប៉ះពាល់ដល់ទំនាក់ទំនងរវាងថៃ និងកម្ពុជា ហើយយើងចង់ឱ្យពលរដ្ឋយល់ពីគ្នាទៅវិញទៅមក ។ រីឯបញ្ហាថាមពលក្រោមសមុទ្រ ថៃត្រូវតែសិក្សាលម្អិតពីការបែងចែកគ្នាជាមុនសិន ដើម្បីឱ្យប្រទេសទាំងពីរទទួលបានផលប្រយោជន៍យ៉ាងយុត្តិធម៌ ដោយថៃបានបញ្ជូនគណៈកម្មការទៅសិក្សាលម្អិតជាមួយកម្ពុជា ។ ខ្ញុំជាពលរដ្ឋថៃ១០០% ទើបខ្ញុំគិតពីប្រទេសថៃ និងពលរដ្ឋជាចម្បង រដ្ឋាភិបាលនឹងរក្សាទឹកដីមិនឱ្យបាត់បង់ និងធ្វើឱ្យពលរដ្ឋមានសេចក្តីសុខបំផុត ។ នេះបើតាមការលើកឡើងរបស់លោកស្រី ផេថងថាន ៕

ប្រទេសចិន៖ ស្មាតហ្វូនដ៏មានឥទ្ធិពលបំផុតក្នុងប្រវត្តិសាស្ត្ររបស់ក្រុមហ៊ុន Huawei នឹងបង្ហាញខ្លួននៅពាក់កណ្តាលខែវិច្ឆិកានេះហើយ ត្រូវបានគេដឹងថាជា Mate 70 ដែលជាការអាប់ដេតថ្មីពី Mate 60 ដ៏ពេញនិយមកាលពីឆ្នាំមុន។

នេះបើយោងតាមអ្នកតំណាងក្រុមហ៊ុន Huawei លោក Richard Yu បានសរសេរនៅលើ Weibo កាលពីថ្ងៃទី ៤ ខែវិច្ឆិកាថា “Mate ដ៏មានឥទ្ធិពលបំផុតក្នុងប្រវត្តិសាស្ត្រនឹងដាក់បង្ហាញនៅពាក់កណ្តាលខែវិច្ឆិកាខាងមុខនេះហើយ”។

ទោះជាយ៉ាងណា លោកមិនបានបង្ហាញព័ត៌មានលម្អិតអំពីឈ្មោះផលិតផល ឬពេលវេលាចេញលក់នោះទេ។ ទោះបីជាយ៉ាងនេះក្តី ម៉ូដែលថ្មីដែលនឹងដាក់បង្ហាញ ទំនងជា Mate 70 ដែលស្នងតំណែងពី Mate 60 ។ Mate 70 ត្រូវបានគេរំពឹងថានឹងបំពាក់ដោយបន្ទះឈីប Kirin 9100 ដែលផលិតនៅលើដំណើរការ 5 nm ដោយ SMIC ។ លើសពីនេះ ផលិតផលអាចត្រូវបានដំឡើងជាមួយ HarmonyOS 5.0 ដែលជាប្រព័ន្ធប្រតិបត្តិការទូរស័ព្ទបង្កើតឡើងដោយក្រុមហ៊ុន Huawei និងកាត់បន្ថយការពឹងផ្អែកលើប្រព័ន្ធប្រតិបត្តិការ Android ។

នេះបើតាម South China Morning Post ក៏បានបញ្ជាក់ដែរថា ក្រុមហ៊ុន Huawei កំណត់គោលដៅលក់ខ្ពស់ជាងជំនាន់មុន ដោយចំនួនគ្រឿងបន្លាស់ត្រូវបានកុម្ម៉ង់កើនឡើង ៥០% បើធៀបនឹង Mate 60 ហើយក្រុមហ៊ុនក៏ត្រូវបានគេនិយាយថាបានត្រៀម Mate 70 ស៊េរីថ្មីនេះច្រើនជាងមួយលានគ្រឿងសម្រាប់ចែកចាយផងដែរ។

គួរបញ្ជាក់ដែរថា កាលពីខែសីហា ឆ្នាំ ២០២៣ ក្រុមហ៊ុន Huawei បានធ្វើឱ្យពិភពលោកមានការភ្ញាក់ផ្អើលយ៉ាងខ្លាំងនូវការដាក់បង្ហាញស៊េរី Mate 60 ដែលជាស្មាតហ្វូនអាចប្រើ 5G ដំបូងបង្អស់របស់ខ្លួន។ យោងតាមអ្នកវិភាគ ការដាក់បង្ហាញស្មាតហ្វូនស៊េរីថ្មីរបស់ក្រុមហ៊ុននៅខែនេះ នឹងក្លាយជាកិច្ចខិតខំប្រឹងប្រែងបន្ទាប់របស់ Huawei ក្នុងការដណ្តើមយកចំណែកទីផ្សារនៅក្នុងផ្នែកស្មាតហ្វូនកម្រិតខ្ពស់ ហើយក្រុមហ៊ុនក៏នឹងបន្តប្រកួតប្រជែងជាមួយ Samsung និង Apple ក្នុងការលក់ស្មាតហ្វូនទូទាំងពិភពលោកផងដែរ៕

ប្រទេសចិន៖ មូសគឺជាសត្វដែលសម្លា.ប់មនុស្សច្រើនជាងគេបំផុតលើលោកក្នុងមួយឆ្នាំៗ ដោយប្រទេសដទៃតែងតែនាំគ្នាផលិតថ្នាំកម្ចាត់មូស ឬស្វែងរកវិធីផ្សេងៗដើម្បីកម្ចាត់សត្វល្អិតមួយនេះ ខណៈប្រទេសចិនស្រាប់តែបង្កើតរោងចក្រផលិតមូសទៅវិញ។
សារព័ត៌មានបរទេសរាយការណ៍ថា នៅស្រុក Huangbo ទីក្រុង Guangzhou ប្រទេសចិន មានរោងចក្រដ៏ធំមួយ ត្រូវបានគេស្គាល់ថាជារោងចក្រផលិតមូស ដែលមានតួនាទីផលិតមូសរាប់លានក្បាល ហើយបញ្ចេញពួកវាទៅក្រៅរៀងរាល់សប្តាហ៍។

ការសាងសង់រោងចក្រនេះមានគោលបំណងផលិតមូសឈ្មោល និងដោះលែងមូសឈ្មោលឱ្យទៅបន្តពូជជាមួយមូសញីក្នុងព្រៃ ដោយនៅក្នុងខ្លួនមូសឈ្មោលគឺមានផ្ទុកបាក់តេរីម្យ៉ាងឈ្មោះថា Wolbachia ដែលជាប៉ារ៉ាស៊ីតធ្វើឱ្យមូសញីមិនអាចមានពងបាន ឬគ្មានកូន ដើម្បីការពារពងមូសពីការវិវត្តទៅជាដង្កូវ កាត់បន្ថយបន្តិចម្តងៗនូវចំនួនមូសព្រៃនៅក្នុងធម្មជាតិ ដោយហេតុនេះកំណត់ហានិភ័យនៃការរីករាលដាលនៃជំងឺ។ ដូច្នេះមូសឈ្មោលដែលរោងចក្រផលិតគឺមិនមានគ្រោះថ្នាក់ដល់មនុស្សយើងនោះទេ។

វិធីសាស្រ្តនេះត្រូវបានបង្ហាញថាមានប្រសិទ្ធភាពខ្ពស់ក្នុងការកាត់បន្ថយចំនួនមូសនៅក្នុងតំបន់ដែលរងផលប៉ះពាល់។ យោងតាមមតិរបស់ប្រជាជនដែលរស់នៅក្បែរតំបន់បញ្ចេញមូសក្នុងទីក្រុងក្វាងចូវ ចំនួនមូសបានថយចុះគួរឱ្យកត់សម្គាល់នៅរដូវក្តៅ ហើយពួកគេមិនចាំបាច់ប្រើមុង ឬថ្នាំបាញ់មូសទៀតទេ។ ភាពជោគជ័យនៃរោងចក្រផលិតសត្វមូសក្នុងប្រទេសចិនបានទាក់ទាញការចាប់អារម្មណ៍យ៉ាងខ្លាំងពីប្រទេសជាច្រើន។ បច្ចុប្បន្នប្រទេសមួយចំនួនទៀតដូចជាសហរដ្ឋអាមេរិក ប្រេស៊ីល បានកំពុងដាក់ពង្រាយបច្ចេកវិទ្យានេះក្នុងមូលដ្ឋាន ដើម្បីជួយការពារសុខភាពសាធារណៈឱ្យកាន់តែមានសុវត្ថិភាព និងប្រសិទ្ធភាព។

ជាមួយនឹងសមត្ថភាពក្នុងការផ្លាស់ប្តូរជម្រកមូសដោយការទប់ស្កាត់ពួកវាពីការបន្តពូជ បច្ចេកវិទ្យា Wolbachia ក៏ផ្តល់នូវក្តីសង្ឃឹមសម្រាប់ការគ្រប់គ្រងជំងឺប្រកបដោយនិរន្តរភាពផងដែរ។ សរុបមក រោងចក្រផលិតសត្វមូស និងបច្ចេកវិទ្យា Wolbachia នៅទីក្រុងក្វាងចូវ មិនត្រឹមតែជាការពិសោធន៍ប៉ុណ្ណោះទេ ថែមទាំងជាបដិវត្តន៍វិទ្យាសាស្ត្រក្នុងការប្រយុទ្ធប្រឆាំងនឹងជំងឺគ្រោះថ្នាក់ដែលបង្កឡើងដោយសត្វមូសផងដែរ។ ការអភិវឌ្ឍន៍ និងពង្រីកបច្ចេកវិទ្យានេះទៅកាន់ប្រទេសជាច្រើនទៀតអាចជាគន្លឹះនៃអនាគតដែលគ្មានជំងឺ។ ដូច្នេះប្រសិនបើបច្ចេកវិទ្យានេះត្រូវបានអនុវត្តទូទាំងពិភពលោក យើងនឹងអាចឃើញពីការថយចុះនៃអ្នកស្លាប់ដោយសារសត្វមូសហើយ៕

សហរដ្ឋអាមេរិក៖ Neymar Jr ដែលជាតារាបាល់ទាត់ឆ្នើមម្នាក់របស់ប្រេស៊ីល បានចំណាយលុយ ២៦ លានដុល្លារដើម្បីទិញដីក្បែរមាត់ទន្លេនៅទីក្រុង Miami រដ្ឋផ្លរីដា ក្នុងគោលបំណងសាងសង់វិមានដ៏ធំស្កឹមស្កៃមួយនៅទីនេះ។

យោងតាមកាសែតបរទេស Wall Street Journal បានឱ្យដឹងថា ដីនេះមានទំហំតិចជាងមួយហិចតា ស្ថិតនៅ Bal Harbour ដែលជាតំបន់សម្បូរទ្រព្យធន។ ការទិញដីផ្ទះក្បែរមាត់ទន្លេនៅទីក្រុង Miami ក្នុងរដ្ឋផ្លរីដា ត្រូវបានគេជឿថា អាចជាតម្រុយមួយដែលថា Neymar ទំនងនឹងផ្លាស់មកលេងនៅក្លឹប Miami វិញនៅឆ្នាំក្រោយ។

នេះគឺស្រដៀងនឹង Messi កាលពីឆ្នាំមុនដែរ មុនលោកផ្លាស់ទៅលេងនៅក្លឹប Miami ខ្សែប្រយុទ្ធអាហ្សង់ទីរូបនេះក៏បានទិញវីឡាមួយតម្លៃ ១០.៨ លានដុល្លារនៅទីក្រុង Miami ផងដែរ។ ដូច្នេះតើវាអាចទៅរួចទេ ដែលថា Neymar នឹងប្តូរទៅកាន់ក្លឹប Miami ជាមួយ Messi? យោងតាមប្រភពដដែល គម្រោងសាងសង់ផ្ទះដ៏ប្រណីតរបស់តារាបាល់ទាត់ឆ្នើមប្រេស៊ីល គឺមានទំហំ ១៣,០០០ ម៉ែត្រការ៉េ ដែលរចនាដោយក្រុមហ៊ុន Elicyon។

ទោះជាយ៉ាងណាសម្រាប់ព័ត៌មានលម្អិតអំពីការផ្លាស់ប្តូរក្លឹបបាល់ទាត់របស់ Neymar នៅមិនទាន់ច្បាស់នៅឡើយទេ។ គួរបញ្ជាក់ដែរថា កំពូលលតារាបាល់ទាត់ប្រេស៊ីល Neymar Jr គ្រោងនឹងចាកចេញពីក្លឹប Al-Hilal នៅឆ្នាំ ២០២៥ ដោយអ្នកគាំទ្រជាច្រើនជឿថា ខ្សែប្រយុទ្ធរូបនេះទំនងនឹងមកលេងនៅក្លឹប Miami វិញនៅឆ្នាំក្រោយ ជាមួយ Messi៕

សហរដ្ឋអាមេរិក ៖ បណ្ណាល័យ Libraries Without Borders បានអនុវត្តគម្រោងឈ្មោះ «Wash and Learn» គឺជាការបង្កើតបណ្ណាល័យ និងផ្តល់សម្ភារៈសិក្សាក្នុងហាងបោកគក់សម្លៀកបំពាក់នានានៅសហរដ្ឋអាមេរិក ។ គម្រោងនេះមានគោលបំណងជួយឱ្យគ្រួសារទទួលបានប្រាក់ចំណូលតិចមានឱកាសរៀនសូត្រពីការប្រើប្រាស់បច្ចេកវិទ្យា ។

នាយកគ្រប់គ្រងបណ្ណាល័យ Libraries Without Borders និយាយថា ៖ «គ្រួសារជាច្រើនពុំអាចទៅអានសៀវភៅក្នុងបណ្ណាល័យបានទេ ទើបយើងបង្កើតគម្រោង Wash and Learn ដើម្បីឱ្យពួកគេមានឱកាសអានសៀវភៅ ។ យើងបានយកសៀវភៅទៅដាក់ក្នុងបណ្ណាល័យរៀងរាល់សប្តាហ៍ ឬហៅថា បាញ់ព្រួញ១ បានសត្វ២ក្បាល គឺពេលយកសម្លៀកបំពាក់ទៅហាងបោកគក់ ពួកគេនឹងបានចូលរួមគម្រោងអភិវឌ្ឍន៍អាជីព ហើយកូនៗពួកគេក៏បានរៀនអាន និងសរសេរផងដែរ» ។

ពលរដ្ឋមានប្រាក់ចំណូលតិចនៅអាមេរិកតែងតែយកសម្លៀកបំពាក់ទៅបោកគក់ក្នុងហាងជារៀងរាល់សប្តាហ៍ ហើយពួកគេបានចំណាយពេលប្រមាណជាង១ម៉ោង ដើម្បីបោក និងសម្ងួតសម្លៀកបំពាក់ ។ នេះជាឱកាសមួយដែលពួកគេអាចយកពេលវេលានេះរៀនសូត្រអភិវឌ្ឍជំនាញរបស់ខ្លួន ។

គម្រោង «Wash and Learn» គឺជាការសហការគ្នារវាងបណ្ណាល័យសាធារណៈ, ហាងបោកគក់សម្លៀកបំពាក់ និងអង្គការមិនស្វែងរកប្រាក់ចំណេញ ដើម្បីផ្លាស់ប្តូរហាងបោកសម្លៀកបំពាក់ឱ្យក្លាយជាកន្លែងរៀនសូត្រ តាមរយៈការអានសៀវភៅ, ប្រើប្រាស់កុំព្យូទ័រ និងសម្ភារៈផ្សេងៗ ។

ក្រៅពីនេះ ក៏មានការបណ្តុះបណ្តាលបុគ្គលិកហាងបោកគក់ឱ្យរង់ចាំជួយពលរដ្ឋ ដែលមកអានសៀវភៅផងដែរ ។ ម្ចាស់ហាងបោកគក់សម្លៀកបំពាក់មួយកន្លែងឈ្មោះ «Giant Wash» និយាយថា ៖ «វាអស្ចារ្យខ្លាំងណាស់ ដែលពលរដ្ឋអាមេរិកអាចរៀនសូត្រនូវចំណេះដឹងផ្សេងៗ ហើយវាជាគម្រោងល្អមួយដើម្បីឱ្យយើងបានរួមចំណែកផ្តល់ចំណេះដឹងដល់ពលរដ្ឋ» ។

ហាងបោកគក់សម្លៀកបំពាក់ គឺជាកន្លែងដ៏សមរម្យបំផុតសម្រាប់ពលរដ្ឋអាមេរិកមានចំណូលតិចអាចរៀនសូត្ររួមគ្នា ហើយការបោកសម្លៀកបំពាក់ក្នុងហាង គឺតម្រូវឱ្យពួកគេទម្លាក់កាក់ ។ បណ្ណាល័យ Libraries Without Borders សង្ឃឹមថា នឹងអាចពង្រីកគម្រោង «Wash and Learn» ក្នុងហាងបោកគក់ចំនួន៣ម៉ឺនកន្លែងនៅទូទាំងសហរដ្ឋអាមេរិក ៕