បើទោះបីជាទើបតែបើកដំណើរការមិនយូរប៉ុន្មានក្តី ផ្សារទំនើបអ៊ីអនម៉លមានជ័យ តែងបង្កើតនូវអនុស្សាវរីយ ក៏ដូចជាព្រឹត្តិការណ៍គួរជាទីចាប់អារម្មណ៍ជាច្រើន តួយ៉ាងដូចជាលើកយកនូវទស្សនីយភាពសិល្បៈបុរាណខ្មែរ មកសម្តែងជូនទស្សនិកជនទស្សនា សឹងតែជារៀងរាល់សប្តាហ៍នាពេលថ្មីៗនេះ។

យោងតាមការដាក់បង្ហោះនៅលើគេហទំព័រផ្លូវការរបស់ផ្សារទំនើបអ៊ីអនម៉លមានជ័យ បានគូសបញ្ជាក់ថា «នាថ្ងៃសៅរ៍ ទី ១៤ ខែកញ្ញានេះ សូមជូនទស្សនីយភាពមហោស្រពល្ខោនស្រមោលស្បែកតូច ដែលដឹកនាំសម្តែងដោយ ព្រឹទ្ធាចារ្យចម្មការភិរក្ស ជៀនសុផាន មត៌កមនុស្សរស់ ដែលនឹងដកស្រង់រឿង “ឳពុកក្មេករើសកូនប្រសារ”។ ការសម្តែងនឹងប្រព្រឹត្តទៅចំនួន ២ ដង គឺនៅម៉ោង ២ រសៀល និង ៥:៣០ល្ងាច។ ចំពោះទីតាំងសម្តែងនៅក្នុងផ្សារទំនើបអ៊ីអនមានជ័យផ្ទាល់តែម្តង ដែលស្ថិតនៅជាន់ទី ៣ កន្លែងបោះតង់»។

សូមជម្រាបថា កាលពេលកន្លងទៅថ្មីៗនេះ ផ្សារទំនើបអ៊ីអន ៣ បាននាំយកនូវទស្សនីយភាពល្ខោនជាច្រើនទម្រង់មកសម្តែងផងដែរ ហើយក៏ទទួលបានការគាំទ្រយ៉ាងច្រើនផុសផុលពីសំណាក់ទាំងជនជាតិខ្មែរនិងជនបរទេស ក្នុងនោះគឺរួមមានល្ខោនបាសាក់វង់ ភី សុគន្ធី និងល្ខោនខោលជាដើម។

ទិដ្ឋភាពប្រជាពលរដ្ឋខ្មែរយ៉ាងច្រើនកុះករបានមកចូលរួមលើកស្ទួយសិល្បៈវប្បធម៌ខ្មែរ ស្របពេលដែលប្រទេសជាតិកំពុងតែអភិវឌ្ឍឈានឡើងនាសម័យឌីជីថល ក៏បានលើករោងល្ខោនមកដាក់កណ្តាលក្នុងផ្សារទំនើបដ៏ធំ មានម៉ាស៊ីនត្រជាក់យ៉ាងត្រជាក់រហឹម។ ដោយសង្កេតឃើញថា ម្នាក់ៗក៏បានយកកន្ទេលមកក្រាលអង្គុយមើលល្ខោនបានយ៉ាងសុខស្រួល និងមានផាសុខភាពបំផុត។

គួរបញ្ជាក់ថា ផ្សារទំនើបអ៊ីអនម៉លមានជ័យ បានបើកដំណើរការសាកល្បងជាផ្លូវការអំឡុងខែធ្នូ ឆ្នាំ ២០២២ ដែលមានទីតាំងស្ថិតនៅតាមបណ្តោយមហាវិថីសម្ដេចតេជោ ហ៊ុន សែន (ផ្លូវ៦០ម៉ែត្រ) ស្ថិតក្នុងសង្កាត់ចាក់អង្រែក្រោម ខណ្ឌមានជ័យ ភាគខាងត្បូងនៃរាជធានីភ្នំពេញ៕

មនុស្សភាគច្រើនចូលចិត្តដាក់របស់របរនៅបរិវេណជុំវិញគ្រែសម្រាក ឬក្បាលដំណេក ប៉ុន្តែមានរបរមួយចំនួនពុំគួរដាក់លើក្បាលដំណេកទេ ពីព្រោះវានឹងប៉ះពាល់ដល់សុខភាពរាងកាយខ្លាំង និងមានគ្រោះថ្នា.ក់ ទៀតផង ។ តើរបស់ទាំងនេះមានអ្វីខ្លះ?

១-ដុំសាកថ្ម ៖ ដើម្បីឱ្យមានភាពងាយស្រួលក្នុងការប្រើប្រាស់ដុំសាកថ្ម យើងតែងតែទិញដុំសាកថ្មមកដាក់លើក្បាលគ្រែ ដើម្បីអាចសាកថ្មគ្រប់ឧបករណ៍អេឡិចត្រូនិក ដូចជា ៖ ទូរស័ព្ទដៃ, iPad និង Laptop ។ លើសពីនេះ អ្នកខ្លះចូលចិត្តសាកថ្មទូរស័ព្ទមុនពេលសម្រាក និងដកខ្សែចេញពីដុំសាកថ្មពេលព្រឹក ។

យើងពុំគួរសាកថ្មទូរស័ព្ទនៅក្បែរគ្រែទេ ពីព្រោះវាមានវិទ្យុសកម្មចេញពីទូរស័ព្ទ ហើយសូម្បតែការដាក់ដុំសាកថ្មក្បែរគ្រែ ក៏គ្មានសុវត្ថិភាពដែរ ។ វាអាចបង្កជាភ្លើងឆេះបាន ដោយសារផ្កាភ្លើងចេញពីដុំសាកថ្មខ្ទាតលើភួយ, ខ្នើយ និងកម្រាលពូក ។ បើទោះយើងអាចប្រើប្រាស់ដុំសាកថ្មជាមួយឧបករណ៍ជាច្រើន ប៉ុន្តែការដាក់វាលើក្បាលដំណេកនឹងមានគ្រោះថ្នាក់ខ្លាំង ។

២-ទៀនក្រអូប ៖ មនុស្សខ្លះនិយមយកទៀនក្រអូបមកដាក់ក្នុងបន្ទប់សម្រាក ពីព្រោះវាមានក្លិនក្រអូបតិចៗជួយឱ្យធូរស្រាលផ្លូវចិត្ត ។ ប៉ុន្តែកុំដាក់វាលើក្បាលដំណេក ឬក្បែរគ្រែឱ្យសោះ ពីព្រោះវានឹងបង្កជាភ្លើងឆាប់យ៉ាងឆាប់រហ័ស ពេលយើងសម្រាកលក់ក្នុងអំឡុងពេលទៀនកំពុងឆេះ ។

បើចង់ធ្វើឱ្យផ្លូវចិត្តធូរស្រាលដោយទៀនក្រអូប គួរដាក់វានៅឆ្ងាយពីគ្រែ និងសម្ភារៈផ្សេងៗ ។ ក្រៅពីនេះ ពុំគួរដុតទៀនក្រអូបក្នុងបន្ទប់បិទជិតឡើយ ហើយត្រូវពន្លត់ទៀនមុនពេលសម្រាកជានិច្ច ។

៣-តុក្កតា ៖ អ្នកខ្លះចូលចិត្តយកតុក្កតាមកដាក់លើគ្រែទុកមើល ឬយកវាធ្វើខ្នើយឱបពេលសម្រាក ។ ប៉ុន្តែគួរផ្លាស់ប្តូរទម្លាប់នេះ ដោយសារការដាក់តុក្កតាលើគ្រែ គឺដូចគ្នានឹងការបង្កើតជម្រកបាក់តេរី បើយើងពុំបានបោកគក់សម្អាតវាជាប្រចាំទេនោះ ។ បាក់តេរី និងភាពកខ្វក់ជាច្រើននឹងប្រមូលផ្តុំក្នុងតុក្កតា វានឹងធ្វើឱ្យយើងមានជំងឺផ្លូវដង្ហើម ។

៤-អំពូលភ្លើង ៖ គ្រែជាកន្លែងសម្រាក ទើបពុំគួរយកអំពូលភ្លើងមានពន្លឺខ្លាំងមកដាក់លើក្បាលដំណេក ឬក្បែរគ្រែទេ ពីព្រោះវាធ្វើឱ្យយើងឈឺភ្នែក, នឿយហត់ និងប៉ះពាល់ការសម្រាក ។ បើចាំបាច់ប្រើប្រាស់អំពូលភ្លើង គួរជ្រើសរើសអំពូលមានពន្លឺខ្សោយ ដូចជា ៖ ពណ៌លឿង ឬពណ៌ក្រហមលាយទឹកក្រូច ដើម្បីកាត់បន្ថយផលប៉ះពាល់ខួរក្បាល ។ រីឯអំពូលភ្លើងពណ៌ស និងពណ៌ខៀវ គួរដាក់នៅឱ្យឆ្ងាយពីគ្រែ ៕

តើលោកអ្នកជ្រាបទេថា ក្រៅពីសាប៊ូលាងចាន យើងក៏អាចប្រើប្រាស់អំបិលលាងចានផងដែរ ដោយសារអំបិលអាចលាងជម្រះជាតិខ្លាញ់ ឬភាពកខ្វក់នៅជាប់ចានបានយ៉ាងល្អ ។ វាធ្វើឱ្យយើងអាចសន្សំសំចៃប្រាក់ទិញសាប៊ូលាងចានញឹកញាប់ ក៏ដូចជាសន្សំសំចៃពេលវេលាផងដែរ ។ តើយើងនឹងយកអំបិលមកលាងចានតែម្តងដោយពុំប្រើប្រាស់សាប៊ូលាងចាន ឬយ៉ាងណា?

ការលាងចាន ឬប្រអប់ផ្លាស្ទិកដាក់អាហារម្តងៗធ្វើឱ្យមនុស្សគ្រប់គ្នានឿយហត់យ៉ាងខ្លាំង ដោយសារតែភាពកខ្វក់ និងជាតិខ្លាញ់ច្រើនជាប់នៅលើនោះ ។ ស្ត្រីមេផ្ទះភាគច្រើននិយាយថា ពេលពួកគេប្រើប្រាស់ប្រអប់ជ័រដាក់អាហារបរិភោគញឹកញាប់ គឺពួកគេហត់នឿយខ្លាំងនឹងការលាងសម្អាតប្រអប់ផ្លាស្ទិកទាំងនេះ គឺហត់ខ្លាំងជាងការធ្វើម្ហូបអាហារទៅទៀត ។ ជាពិសេស នៅតាមជ្រុងរបស់ប្រអប់ផ្លាស្ទិកពិបាកលាងសម្អាតជាងគេ ហើយចំណាយពេលវេលាយូរទៀតផង ។

សារព័ត៌មាន KBN នឹងបង្ហាញលោកអ្នកអំពីរបៀបលាងចានងាយៗ និងចំណេញពេលវេលា គឺការប្រើប្រាស់អំបិលដែលមានក្នុងផ្ទះបាយរបស់យើង ។ ការប្រើប្រាស់អំបិលផ្សំជាមួយសាប៊ូលាងចាន គឺអាចលាងជម្រះជាតិខ្លាញ់លើចាន ឬប្រអប់ផ្លាស្ទិកបានយ៉ាងឆាប់រហ័ស និងសន្សំសំចៃពេលវេលាបានច្រើន បើប្រៀបធៀបជាមួយការប្រើប្រាស់សាប៊ូលាងចានតែមួយមុខ ពីព្រោះយើងត្រូវលាងជាច្រើនលើកច្រើនសារ ទើបអស់ជាតិខ្លាញ់ ។

ចំណែកវិធីប្រើប្រាស់វិញ គឺត្រូវយកអំបិលប្រមាណពី១ ទៅ២ស្លាបព្រាបាយ មកផ្សំជាមួយសាប៊ូលាងចានបន្តិច និងដាក់ទឹកធម្មតាចូល ។ បន្ទាប់មក យើងត្រូវបិទគំរបវា និងយកអេប៉ុងលាងចានមកជ្រលក់ក្នុងទឹកនេះស្រាលៗដើម្បីលាងសម្អាតចានឆ្នាំង ។ រីឯលទ្ធផលឃើញថា ជាតិខ្លាញ់នៅលើចានបាត់ទាំងអស់ ថែមទាំងបាត់ក្លិនអាហារជាប់ចានផងដែរ ។

យើងអាចប្រើប្រាស់អំបិលក្នុងផ្ទះបាយរបស់យើងបានគ្រប់ប្រភេទ ពុំចាំបាច់ជ្រើសរើសប្រភេទអំបិលទេ ។ ហេតុនេះ លោកអ្នកគួរតែសាកល្បងអនុវត្តតាមវិធីខាងលើនេះ ពីព្រោះអំបិលជាគ្រឿងផ្សំក្នុងផ្ទះបាយដែលងាយស្រួលរក ៕

គេចាត់ទុកថា ការបាញ់ទឹកអប់ជាមន្តស្នេហ៍ដ៏ទាក់ទាញមួយ ប៉ុន្តែការប្រើប្រាស់ទឹកអប់បានត្រឹមត្រូវជារឿងសំខាន់ណាស់ ដើម្បីបង្ការផលប៉ះពាល់ផ្សេងៗ ឬពុំស្រួលខ្លួន ។ តើយើងជ្រាបទេថា ពុំគួរបាញ់ទឹកអប់នៅចំណុចណាខ្លះលើរាងកាយ? ហេតុអ្វីទើបពុំគួរបាញ់ទឹកអប់នៅត្រង់ចំណុចទាំងនេះ?

ខាងក្រោមនេះ គឺជា៥ចំណុចលើរាងកាយដែលពុំគួរបាញ់ទឹកអប់ រួមមាន ៖

១-ភ្នែក ៖ ការបាញ់ទឹកអប់ត្រូវភ្នែកនឹងបណ្តាលឱ្យកើតគ្រោះថ្នាក់បាន ជាពិសេស នៅពេលប្រញាប់ មនុស្សខ្លះបានបាញ់ទឹកអប់នៅក្បែរភ្នែក ។ វានឹងបណ្តាលឱ្យមានបញ្ហារលាកធ្ងន់ធ្ងរ, ភ្នែកក្រហម និងអាចមើលពុំឃើញបណ្តោះអាសន្ន ដោយសារទឹកអប់មានជាតិអាល់កុល និងសារធាតុគីមី ។ ហេតុនេះ គួរបាញ់ទឹកអប់ឱ្យឆ្ងាយពីផ្ទៃមុខជានិច្ច ដើម្បីការពារមិនឱ្យទឹកអប់ចូលភ្នែក ។

២-សក់ ៖ បើទោះជាមនុស្សភាគច្រើនចូលចិត្តក្លិនក្រអូបនៅលើសក់ ប៉ុន្តែការបាញ់ទឹកអប់លើសក់ វានឹងបំផ្លាញសរសៃសក់ ។ ជាតិអាល់កុលក្នុងទឹកអប់នឹងធ្វើឱ្យសរសៃសក់ស្ងួត និងបែកចុង ។ បើចង់ឱ្យសក់ក្រអូបនោះ គួរតែប្រើប្រាស់ Spray សម្រាប់បាញ់សក់ ឬផលិតផលថែរក្សាសក់ ដោយសារវាផ្សំពីអាល់កុលតិចជាង និងក្រអូបជាងទឹកអប់ ។

៣-ដៃ ៖ មនុស្សខ្លះពុំបានគិតអ្វីច្រើនទេ ចំពោះការបាញ់ទឹកអប់លើដៃ ប៉ុន្តែយើងគួរចៀសវាង ពីព្រោះស្បែកនៅបរិវេណដៃមានសភាពស្តើង និងបណ្តាលឱ្យរលាកស្បែកបាន ។ ក្រៅពីនេះ យើងតែងយកដៃទៅប៉ះលើផ្ទៃមុខ និងភ្នែកញឹកញាប់ ហើយនឹងធ្វើឱ្យទឹកអប់រំទៅប៉ះបរិវេណទាំងនេះបណ្តាលឱ្យរលាក ។ ម្យ៉ាងទៀត ការលាងដៃញឹកញាប់នឹងធ្វើឱ្យទឹកអប់បាត់បង់ក្លិនយ៉ាងឆាប់រហ័ស ហើយវាធ្វើឱ្យការបាញ់ទឹកអប់លើដៃគ្មានប្រយោជន៍ ។

៤-ក្លៀក ៖ ការបាញ់ទឹកអប់ដាក់ក្លៀកអាចជាវិធីល្អដើម្បីបំបាត់ក្លិនស្អុយលើរាងកាយ ប៉ុន្តែពុំគួរបាញ់ទឹកអប់ដាក់ក្លៀកទេ ពីព្រោះស្បែកនៅបរិវេណនេះស្តើងខ្លាំង ។ ការបាញ់ទឹកអប់ដាក់ក្លៀកនឹងបណ្តាលឱ្យរមាស់ ជាពិសេស ក្រោយដក ឬកោររោមក្លៀករួច ។ គួរប្រើប្រាស់ផលិតផលបំបាត់ក្លិន ឬផលិតផលការពារញើសសម្រាប់ក្លៀកវិញ ពីព្រោះផលិតផលទាំងនេះត្រូវបានផលិតមកដើម្បីបំបាត់ក្លិនក្លៀក និងពុំរមាស់ ។

៥-អវៈយវៈភេទ ៖ បរិវណអវៈយវៈភេទមានសភាពស្តើងយ៉ាងខ្លាំង ហើយការប្រើប្រាស់ទឹកអប់រំនៅបរិវេណនេះនឹងបង្កជាគ្រោះថ្នាក់បាន ។

*មូលហេតុពុំគួរបាញ់ទឹកអប់នៅបរិវេណអវៈយវៈភេទ ៖
-ស្បែកនៅបរិវេណនេះស្តើង ៖ ដោយសារស្បែកនៅបរិវេណអវៈយវៈភេទស្តើង ទើបវាឆាប់រលាកជាងបរិវេណផ្សេងៗរបស់រាងកាយ ។ ហេតុនេះ ការប្រើប្រាស់ទឹកអប់នឹងបណ្តាលឱ្យកើតរមាស់, ចេញក្រហម និងហើម ។
-ប្រឈមឆ្លងមេរោគ ៖ ការប្រើទឹកអប់នៅបរិវេណអវៈយវៈភេទអាចរំខានតុល្យភាពនៃបាក់តេរីល្អតាមធម្មជាតិនៅបរិវេណនេះ ហើយវានឹងងាយឆ្លងមេរោគ ។
-ពុំចាំបាច់ប្រើទឹកអប់ទេ ៖ គួរប្រើផលិតផលសម្អាតអវៈយវៈភេទតាមធម្មជាតិជំនួសទឹកអប់រំ ដោយសារវាអាចសម្អាតយ៉ាងមានប្រសិទ្ធភាព ៕

ជីងចក់បានធ្លាក់ពីទីខ្ពស់មកទាប ដោយសាររោមតូចៗលើដៃផ្នែកខាងមុខរបស់វាផ្លាស់ប្តូរ ហើយធ្វើឱ្យវាពុំអាចតោងនៅលើដំបូល ឬជញ្ជាំងបានដូចមុន ។ ក្រៅពីនេះ វាអាចបណ្តាលមកពីថ្នាំលើដំបូល ឬជញ្ជាំងរបកធ្លាក់ ឬជីងចក់ដេញចាប់សត្វល្អិតស៊ី ទើបបណ្តាលឱ្យវាធ្លាក់ ។ ប៉ុន្តែចាស់បុរាណមានជំនឿពាក់ព័ន្ធនឹងជីងចក់ធ្លាក់លើក្បាលមនុស្ស និងជីងចក់យំ ។

ជំនឿពាក់ព័ន្ធនឹងសត្វជីងចក់ធ្លាក់លើក្បាលមនុស្ស ឬជីងចក់យំ គឺជាជំនឿមួយរបស់ចាស់ៗតាំងពីសម័យបុរាណមកម៉្លេះ ។ មនុស្សភាគច្រើននិយាយថា ជីងចក់នឹងផ្តល់នូវលាភសំណាងដល់មនុស្ស ពីព្រោះវាជាសត្វនាំមកនូវសំណាងល្អ និងចិត្តល្អ ។ តើជីងចក់ធ្លាក់លើក្បាលប្រាប់ពីហេតុការណ៍ល្អ ឬអាក្រក់បែបណាខ្លះ?

ចាស់ៗបុរាណនិយាយថា បើជីងចក់ធ្លាក់លើក្បាលរបស់យើង វាជាប្រផ្នូលប្រាប់ឱ្យយើងដឹងមុនពីហេតុការណ៍ផ្សេងៗមានទាំងល្អ និងអាក្រក់ ។ មនុស្សខ្លះថា វានឹងនាំមកនូវសំណាងល្អក្នុងការផ្សងសំណាង ប៉ុន្តែមនុស្សខ្លះទៀតថា ពុំគួរចេញពីផ្ទះទេ ពីព្រោះវាជាប្រផ្នូលប្រាប់ឱ្យយើងដឹងមុនថា នឹងមានហេតុការណ៍អាក្រក់កើតឡើង និងហាមធ្វើដំណើរដាច់ខាត ។ ប៉ុន្តែគ្មានអ្វីបញ្ជាក់ថា ការលើកឡើងបែបនេះជាការពិត ឬមិនពិតទេ ។

ខាងក្រោមនេះ គឺជាជំនឿចាស់បុរាណពាក់ព័ន្ធនឹងជីងចក់ធ្លាក់លើក្បាល ៖

-ជីងចក់ធ្លាក់លើក្បាល មុនពេលចេញពីផ្ទះ ៖ នឹងមានសំណាងល្អក្នុងការផ្សេងសំណាង
-ជីងចក់ធ្លាក់លើក្បាល ពេលចូលផ្ទះ ៖ នឹងធ្វើដំណើរញឹកញាប់ ឬប្រាប់ឱ្យយើងត្រៀមខ្លួនផ្លាស់ប្តូរទីលំនៅ
-ជីងចក់មិនធ្លាក់លើក្បាល ប៉ុន្តែវាយំមុនពេលចេញពីផ្ទះ ៖ នឹងមានហេតុការណ៍អាក្រក់កើតឡើង
-ជីងចក់ជុះអាចម៍លើក្បាល ៖ ត្រូវប្រុងប្រយ័ត្នរឿងការឈឺថ្កាត់ និងថែទាំសុខភាពឱ្យបានល្អ
-ជីងចក់លោតមកប៉ះខ្លួនប្រាណ ៖ ឱ្យយកចិត្តទុកដាក់ជាមួយអ្នកនៅក្បែរខ្លួនឱ្យច្រើន ដូចជា ៖ ម្តាយ, បងស្រី ឬសមាជិកគ្រួសារ ពីព្រោះអាចមានហេតុការណ៍ផ្សេងៗកើតឡើងលើមនុស្សនៅក្បែរខ្លួន ។

បើជីងចក់យំធម្មតា គឺត្រូវដឹងថា តើវាយំនៅផ្នែកខាងណារបស់ខ្លួនយើង ដូចជា ៖

-ជីងចក់យំនៅក្រោយខ្នង ៖ ជាសំណាងអាក្រក់ ហាមធ្វើដំណើរ
-ជីងចក់យំនៅខាងស្តាំ ៖ ជាសំណាងអាក្រក់ ហាមធ្វើដំណើរ
-ជីងចក់យំនៅខាងឆ្វេង ៖ នឹងមានសំណាងល្អ ការធ្វើដំណើរមានសុវត្ថិភាព ៕