បច្ចុប្បន្ន បណ្តាញសង្គមត្រូវបានប្រើប្រាស់យ៉ាងទូលំទូលាយនៅលើពិភពលោក ដោយសារអាចស្រាវជ្រាវចំណេះដឹងផ្សេងៗ ប្រើប្រាស់ជាប្រយោជន៍ក្នុងការសិក្សា ពេលខ្លះ អាចឱ្យវាធ្វើកិច្ចការសាលា ឬឆ្លើយតបសំណួរទៀតផង ។ ទន្ទឹមនឹងនេះ វាក៏ផ្តល់នូវផលប៉ះពាល់ជាច្រើនផងដែរ ប្រសិនបើយើងប្រើប្រាស់មិនត្រឹមត្រូវ ឬឆាប់ជឿតាមការអូសទាញពីជនខិលខូច ជឿជាក់ព័ត៌មានក្លែងក្លាយ ឬជឿព័ត៌មានខុសក្នុងបណ្តាញសង្គម ។

ខាងក្រោមនេះ គឺជាផលប៉ះពាល់ចម្បងៗពីការប្រើប្រាស់បណ្តាញសង្គម ៖

១-ប៉ះពាល់សុខភាពផ្លូវចិត្ត ៖ ការប្រើប្រាស់បណ្តាញសង្គមច្រើនពេកធ្វើឱ្យមានអារម្មណ៍តានតឹង ស្ត្រេស ឬធ្លាក់ទឹកចិត្ត ព្រមទាំងចូលចិត្តប្រៀបធៀបខ្លួនឯងជាមួយអ្នកដទៃ បណ្តាលឱ្យបាត់បង់ទំនុកចិត្តលើខ្លួនឯង ។ ក្រៅពីនេះ នាំទៅដល់ការញៀនបណ្តាញសង្គមកាន់តែខ្លាំង ។

២-ប៉ះពាល់ការសិក្សា និងការងារ ៖ បណ្តាញសង្គមនាំឱ្យខ្ជះខ្ជាយពេលវេលាច្រើន ខ្វះការផ្តោតអារម្មណ៍លើការសិក្សា និងការងារ ។ ជាលទ្ធផល បណ្តាលឱ្យលទ្ធផលការសិក្សា ឬប្រសិទ្ធភាពការងារធ្លាក់ចុះខុសពីគោលដៅរំពឹងទុក ។

៣-ប៉ះពាល់ទំនាក់ទំនងក្នុងសង្គម ៖ វាក៏ប៉ះពាល់ដល់ទំនាក់ទំនងក្នុងសង្គមផងដែរ រួមមាន ៖ កាត់បន្ថយការទំនាក់ទំនងជាមួយក្រុមគ្រួសារ មិត្តភក្តិ និងចូលរួមក្នុងសង្គម ព្រមទាំងបង្កជម្លោះ ឬមានការយល់ច្រឡំតាមរយៈការផ្ញើសារអនឡាញ ។

៤-ជឿជាក់ព័ត៌មានក្លែងក្លាយ ៖ បណ្តាញសង្គមពោរពេញទៅដោយព័ត៌មានក្លែងក្លាយ (Fake News) ជាច្រើន ដែលគួរតែប្រុងប្រយ័ត្នបំផុត ពីព្រោះអាចរងការបង្ខូចកេរ្តិ៍ឈ្មោះ រើសអើង និងរំលោភបំពានតាមអ៊ីនធើរណេត ។ លើសពីនេះ អាចនឹងមានគ្រោះថ្នាក់ដោយសារការចែកចាយទិន្នន័យផ្ទាល់ខ្លួនជាសាធារណៈ ។

៥-ប៉ះពាល់សុខភាពរាងកាយ ៖ សុខភាពរាងកាយក៏ប៉ះពាល់ដោយសារបណ្តាញសង្គមដូចគ្នា ដូចជា ៖ ឈឺភ្នែក ឈឺក្បាល ដោយសារចំណាយពេលមើលអេក្រង់យូរ, សម្រាន្តមិនលក់ ឬសម្រាន្តមិនគ្រប់គ្រាន់ ។ មនុស្សភាគច្រើនដែលញៀនបណ្តាញសង្គមបានបោះបង់ការហាត់ប្រាណជាទម្លាប់ប្រចាំថ្ងៃរបស់ខ្លួន ដែលនេះជាមូលហេតុធ្វើឱ្យសុខភាពចុះខ្សោយ ។

សរុបមក យើងត្រូវប្រើប្រាស់បណ្តាញសង្គមឱ្យមានប្រយោជន៍ ប្រើប្រាស់ដោយការយល់ដឹង កំណត់ពេលវេលាច្បាស់លាស់ និងជ្រើសរើសអានខ្លឹមសារមានអត្ថប្រយោជន៍ ពីព្រោះវាជាអាវុធមុខពីរផ្តល់ទាំងអត្ថប្រយោជន៍ និងផលប៉ះពាល់ ។ ប្រទេសជាច្រើននៅតំបន់អឺរ៉ុបបានកំណត់គោលការណ៍ការពារគ្រោះថ្នាក់ពីការប្រើប្រាស់បណ្តាញសង្គម ជាពិសេស យុវជន ដូចជា ៖ អូស្ត្រាលី បារាំង និងដាណឺម៉ាក ថាតើបណ្តាញសង្គមជំរុញឱ្យអ្នកប្រើប្រាស់ផ្សព្វផ្សាយខ្លឹមសារស្អប់ខ្ពើម និងការបែកបាក់ដែរឬទេ ។

បណ្តាញសង្គមផ្តល់ផលប៉ះពាល់ជាច្រើនសម្រាប់យុវជននៅទូទាំងពិភពលោក ប្រសិនបើឪពុក-ម្តាយមិនកាត់បន្ថយពេលវេលារបស់កូនៗក្នុងការប្រើប្រាស់ទូរស័ព្ទដៃ និងតាមដានពួកគេទេនោះ ។ គួរតែគិតពីផលប៉ះពាល់ទាំងនេះ និងឈប់បណ្តោយឱ្យពួកគេប្រើប្រាស់បណ្តាញសង្គម ពីព្រោះនឹងមានជំងឺផ្លូវចិត្តពេលពេញវ័យ ៕

វ៉ាស៊ីនតោន ៖ ស្ថានការណ៍នៅតំបន់មជ្ឈិមបូព៌ាកាន់តែឡើងកម្ដៅ ក្រោយសហរដ្ឋអាមេរិក បា.ញ់ទម្លាក់ដ្រូន Shahed របស់អ៊ីរ៉ង់ចំនួនមួយគ្រឿង ខណៈពេលដែលវាហោះចូលទៅកៀកនាវាចម្បាំង USS Abraham Lincoln របស់ខ្លួននៅលើផ្ទៃសមុទ្រ ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

កាលពីថ្ងៃទី៣ ខែកុម្ភៈ យោធាសហរដ្ឋអាមេរិកបាននិយាយថា ពួកគេបានបា.ញ់ទម្លាក់ដ្រូនពិឃា.តរបស់អ៊ីរ៉ង់មួយគ្រឿងដែលកំពុងហោះឆ្ពោះទៅកាន់នាវាផ្ទុកយន្តហោះរបស់សហរដ្ឋអាមេរិកនៅក្នុងសមុទ្រអារ៉ាប់ ដោយប្រើយន្តហោះចម្បាំង F-35 ដែលមានមូលដ្ឋានលើនាវានោះ។ យោធាបាននិយាយថា សកម្មភាពនេះត្រូវបានធ្វើឡើងដើម្បីការពារខ្លួន, ការពារនាវា និងក្រុមនាវិករបស់ពួកគេប៉ុណ្ណោះ។

មន្ត្រីសហរដ្ឋអាមេរិកបាននិយាយថា ដ្រូន Shahed របស់អ៊ីរ៉ង់ខាងលើនោះ គឺជាប្រភេទ Shahed-139 ដែលត្រូវបានបំផ្លា.ញក្នុងអំឡុងពេលវាកំពុងប្រតិបត្តិការនៅជិតនាវាផ្ទុកយន្តហោះលើផ្ទៃសមុទ្រ ហើយបានបញ្ជាក់ថា គ្មានបុគ្គលិកអាមេរិកណាម្នាក់រងរបួស និងគ្មានការខូចខាតណាមួយត្រូវបានបង្កឡើងនោះទេ។

គួរបញ្ជាក់ថា ជុំវិញឧបត្តិហេតុខាងលើនេះ ខាងប្រទេសអ៊ីរ៉ង់ពុំបានធ្វើអត្ថាធិប្បាយភ្លាមៗអំពីមូលហេតុជាក់លាក់នៃការហោះចូលទៅជិតនាវាចម្បាំងរបស់អាមេរិកនោះទេ។ តែទោះជាយ៉ាងណា មន្ត្រីសហរដ្ឋអាមេរិកបាននិយាយថា កងកម្លាំងអាមេរិកនឹងបន្តធ្វើសកម្មភាពយ៉ាងម៉ឺងម៉ាត់ ដើម្បីការពារទ្រព្យសម្បត្តិ និងបុគ្គលិករបស់ពួកគេដែលកំពុងប្រតិបត្តិការនៅក្នុងដែនទឹកអន្តរជាតិ៕

តើពិភពលោកនាពេលបន្តិចទៀតនេះនឹងទៅជាយ៉ាងណា? ខណៈថ្មីៗនេះប្រទេសរុស្ស៊ីបានប្រកាសថា ខ្លួនត្រៀមខ្លួនរួចជាស្រេចដើម្បីធ្វើប្រតិបត្តិការនៅក្នុងពិភពលោកថ្មីដែលគ្មានដែនកំណត់លើអាវុធនុយក្លេអ៊ែរ នៅពេលដែលសន្ធិសញ្ញា New START ជាមួយសហរដ្ឋអាមេរិកបានផុតកំណត់។ នេះបើយោងតាមការចេញផ្សាយរបស់ Reuters។

អនុរដ្ឋមន្ត្រីការបរទេសរុស្ស៊ី លោក Sergei Ryabkov បាននិយាយថា ទីក្រុងមូស្គូបានត្រៀមខ្លួនរួចជាស្រេចសម្រាប់ «ការពិតថ្មី» ដោយគ្មានការរឹតបន្តឹងជាកាតព្វកិច្ចលើឃ្លាំងអាវុធនុយក្លេអ៊ែរជាយុទ្ធសាស្ត្រ ដោយស្តីបន្ទោសកង្វះការចូលរួមពីទីក្រុងវ៉ាស៊ីនតោនលើការពង្រីក ឬជំនួសសន្ធិសញ្ញា New START រវាងអាមេរិក និង រុស្ស៊ីឡើយ ខណៈដែលវានឹងផុតកំណត់ទៅហើយនៅថ្ងៃព្រហស្បតិ៍នេះ។

ក្នុងន័យនេះ ប្រសិនបើគ្មានកិច្ចព្រមព្រៀងថ្មីនៅនាទីចុងក្រោយទេ នោះមហាអំណាចទាំងពីរនឹងគ្មានការរឹតបន្តឹងលើឃ្លាំងអាវុធនុយក្លេអ៊ែររយៈចម្ងាយឆ្ងាយជាលើកដំបូងក្នុងរយៈពេលជាងកន្លះសតវត្សរ៍។

ថ្លែងនៅក្នុងទីក្រុងប៉េកាំង លោក Ryabkov បាននិយាយថា «នេះគឺជាពេលវេលាថ្មី ភាពជាក់ស្តែងថ្មី ហើយយើងបានត្រៀមខ្លួនសម្រាប់វា»។ លោកក៏បានគូសបញ្ជាក់ផងដែរថា ការដែលប្រធានាធិបតីអាមេរិក លោក ដូណាល់ ត្រាំ មិនបានឆ្លើយតបនឹងសំណើរបស់រុស្ស៊ីដើម្បីពន្យារពេលសន្ធិសញ្ញានេះរយៈពេលមួយឆ្នាំទៀត ដើម្បីទុកពេលចរចា គឺជាសញ្ញាប្រាប់ថាអាមេរិកចង់ឱ្យវាផុតកំណត់។ ហើយលោកបញ្ជាក់ថា «ការមិនមានចម្លើយនេះហើយ គឺជាចម្លើយរបស់ងាមេរិក»។

គួរជម្រាបថា ការចុះហត្ថលេខារវាងរុស្ស៊ី និងសហរដ្ឋអាមេរិកលើសន្ធិសញ្ញា New START ត្រូវបានធ្វើឡើងកាលពីឆ្នាំ ២០១០ ដោយបានកំណត់ការដាក់ពង្រាយក្បាលគ្រាប់នុយក្លេអ៊ែរ និងរួមបញ្ចូលវិធានការផ្ទៀងផ្ទាត់រវាងប្រទេសទាំងពីរ។

ជាមួយនឹងការផុតកំណត់នៅពេលបន្តិចទៀតនេះ វានឹងធ្វើឱ្យមហាអំណាចនុយក្លេអ៊ែរធំជាងគេទាំងពីររបស់ពិភពលោកគ្មានដែនកំណត់ជាផ្លូវការលើកងកម្លាំងយុទ្ធសាស្ត្ររបស់ពួកគេតទៅទៀតហើយ ដែលបង្កើនការព្រួយបារម្ភក្នុងចំណោមអ្នកជំនាញគ្រប់គ្រងអាវុធអំពីអស្ថិរភាពកើនឡើង៕

បន្ទាប់ពីអង្គការសប្រជាជាតិបានចេញមុខប្រកាសជាផ្លូវការថាខ្លួនប្រឈមនឹងការដួលរលំផ្នែកហិរញ្ញវត្ថុក្នុងពេលដ៏ខ្លី ប្រធានាធិបតីអាមេរិក លោក Donald Trump បានអះអាងថា អាមេរិកអាចជួយដោះស្រាយបញ្ហាបញ្ហានេះបានយ៉ាងងាយ ប្រសិនបើលោក Antonio Guterres ប្រធានអង្គការនេះហាមាត់សុំជំនួយពីលោកត្រង់ៗ។

ថ្លែងប្រាប់ទីភ្នាក់ងារ Politico នាថ្ងៃអាទិត្យ ទី១ កុម្ភៈនេះលោក Trump បាននិយាយថា លោកមិនបានដឹងអំពីបំណុលរបស់សហរដ្ឋអាមេរិកចំពោះអង្គការសហប្រជាជាតិទេ ប៉ុន្តែលោកជឿជាក់ថា លោកអាច “ដោះស្រាយបញ្ហាហិរញ្ញវត្ថុបានយ៉ាងងាយងាយ” និងធានាថាប្រទេសដទៃទៀតក៏នឹងបង់ប្រាក់ឲ្យស្ថាប័ននេះផងដែរ។

ដោយឡែកបើតាមមន្ត្រីអង្គការសហប្រជាជាតិដែលមិនបញ្ចេញឈ្មោះម្នាក់ បានរាយការណ៍ប្រាប់ ABC News កាលពីថ្ងៃសុក្រថា ទីក្រុងវ៉ាស៊ីនតោនបច្ចុប្បន្នជំពាក់ថវិការបស់អង្គការនេះចំនួន 2.2 ពាន់លានដុល្លារ និងថវិកាបន្ថែមចំនួន 1.8 ពាន់លានដុល្លារទៀតសម្រាប់ប្រតិបត្តិការរក្សាសន្តិភាព ខុសពីប្រទេសរុស្ស៊ីដែលបានបង់វិភាគទានពេញលេញដល់អង្គការសហប្រជាជាតិសម្រាប់ឆ្នាំ 2026 រួចរាល់កាលពីខែធ្នូ។

ស្ថានភាពហិរញ្ញវត្ថុគឺអាក្រក់ខ្លាំងណាស់ ដែល UN អាចបញ្ចប់ការបោះបង់ចោលទីស្នាក់ការកណ្តាលរបស់ខ្លួននៅទីក្រុងញូវយ៉ក នេះបើយោងតាមរបាយការណ៍របស់កាសែត New York Times ដោយដកស្រង់សម្តីប្រភពជាន់ខ្ពស់នៅក្នុងស្ថាប័ន។ ប៉ុន្តែត្រាំបែរជាច្រានចោលការវិវត្តបែបនេះ ដោយលើកឡើងថា «អង្គការសហប្រជាជាតិមិនចាកចេញពីទីក្រុងញូវយ៉កទេ ហើយក៏មិនចាកចេញពីទឹកដីអាមេរិកដែរ ព្រោះ UN មានសក្តានុពលយ៉ាងខ្លាំង»។

សេចក្តីថ្លែងការណ៍នេះផ្ទុយនឹងការរិះគន់ពីមុនរបស់ប្រធានាធិបតីចំពោះ UN ដែលលោកបានចោទប្រកាន់ថាគ្មានប្រសិទ្ធភាព។ កាលណោះ លោកត្រាំបានចោទថា តើគោលបំណងរបស់អង្គការសហប្រជាជាតិជាអ្វី? អ្វីដែលពួកគេធ្វើគឺសរសេរលិខិតដែលមានពាក្យពេចន៍ខ្លាំងៗ ហើយបន្ទាប់មកមិនដែលធ្វើតាមលិខិតនោះឡើយ។ វាជាពាក្យទទេ ហើយពាក្យទទេមិនអាចដោះស្រាយសង្គ្រាមបានទេ។

គួរជម្រាបថា ចាប់តាំងពីលោក Trump បានវិលត្រឡប់មកកាន់តំណែងជាប្រធានាធិបតីវិញកាលពីជិតមួយឆ្នាំមុន សហរដ្ឋអាមេរិកបានដកខ្លួនចេញពីកម្មវិធី និងអង្គការជាច្រើនរបស់អង្គការសហប្រជាជាតិ ដែលក្នុងនោះរួមមានទាំងអង្គការសុខភាពពិភពលោក និងទីភ្នាក់ងារវប្បធម៌ UNESCO ផងដែរ៕

ប្រទេសថៃ ៖ ប្រយោគមួយគឺ «បិទព្រំដែនជាមួយកម្ពុជា» ត្រូវបាននាយករដ្ឋមន្ត្រីថៃចាំផ្ទះ លោក Anutin Charnvirakul លើកយកមកនិយាយដដែលៗក្នុងពេលឃោសនារកសំឡេងឆ្នោត ដើម្បីឱ្យពលរដ្ឋដែលមានគំនិតជ្រុលនិយមគាំទ្រលោកឡើងកាន់តំណែងបន្តទៀត ។ លោកហាមពលរដ្ឋកុំបោះឆ្នោតឱ្យគណបក្សផ្សេងក្រៅពីគណបក្សភូមិចៃថៃ ពីព្រោះគណបក្សផ្សេងអាចនឹងបើកព្រំដែនជាមួយកម្ពុជាឡើងវិញ ។

លោក Anutin នាយករដ្ឋមន្ត្រីថៃចាំផ្ទះ និងជាប្រធានគណបក្សភូមិចៃថៃ បានដឹកនាំសមាជិកបក្សដើរឃោសនារកសំឡេងឆ្នោតនៅទូទាំងប្រទេស ដោយសុំឱ្យពលរដ្ឋបោះឆ្នោតគាំទ្រគណបក្សខ្លួនដឹកនាំរដ្ឋាភិបាលបន្ត ហើយគោលនយោបាយធំ គឺគ្មានអ្វីក្រៅពីការបន្តបិទព្រំដែនជាមួយកម្ពុជា ។ ការធ្វើសង្គ្រា.មឈ្លានពានកម្ពុជាកាលពីខែធ្នូ ឆ្នាំ២០២៥ និងមិនបើកព្រំដែន ធ្វើឱ្យនាយករដ្ឋមន្ត្រីចាំផ្ទះរូបនេះទទួលបានការគាំទ្រច្រើន បន្ទាប់ពីប្រជាប្រិយភាពធ្លាក់ចុះខ្លាំង ព្រោះអសមត្ថភាពដឹកនាំប្រទេស បណ្តោយឱ្យពលរដ្ឋភាគខាងត្បូងស្លា.ប់ជាង១ពាន់នាក់ដោយសារទឹកជំនន់ និងបទល្មើសឆបោកអនឡាញ ជួញដូរគ្រឿងញៀនរីកដុះដាលពេញប្រទេស ។

លោក Anutin គ្មានជម្រើសអ្វីក្រៅពីបិទព្រំដែនកម្ពុជា-ថៃបន្តទៀតដើម្បីឱ្យពលរដ្ឋបោះឆ្នោតគាំទ្រគណបក្សភូមិចៃថៃ និងខ្លួនលោកអាចកាន់តំណែងជានាយករដ្ឋមន្ត្រីបន្ត ខណៈកងទ័ពវិញក៏គាំទ្រគោលនយោបាយបិទព្រំដែនដែរ ។ ពេលឃោសនារកសំឡេងឆ្នោតម្តងៗ លោកនិយាយដដែលៗថា មិនបើកព្រំដែនកម្ពុជា-ថៃដាច់ខាត ប្រសិនបើគណបក្សខ្លួនឈ្នះឆ្នោតដឹកនាំរដ្ឋាភិបាល ទោះជាសហគមន៍អន្តរជាតិ និងជប៉ុនអំពាវនាវឱ្យបើកព្រំដែនឡើងវិញក៏ដោយ ។

កាលពីវេលាម៉ោង១១ព្រឹក ថ្ងៃទី៤ ខែកុម្ភៈ ឆ្នាំ២០២៦ លោក Anutin បានទៅឃោសនារកសំឡេងឆ្នោតនៅកីឡដ្ឋានខេត្តស៊ីសាកេត និងនិយាយដូចមុនថា បើគណបក្សភូមិចៃថៃឈ្នះឆ្នោតនឹងមិនបើកព្រំដែនជាមួយកម្ពុជាដាច់ខាត ពីព្រោះពលរដ្ឋថៃប្រឆាំងការបើកព្រំដែន ។ សូមពលរដ្ឋជួយបោះឆ្នោតគាំទ្រ និងកុំបោះឆ្នោតឱ្យគណបក្សផ្សេង ពីព្រោះបើគណបក្សផ្សេងឈ្នះឆ្នោត មុខជាបើកព្រំដែនជាមួយកម្ពុជាឡើងវិញ ។

លោកបានលើកឡើងពីគុណសម្បត្តិរបស់ខ្លួន ពេលកងទ័ពថៃបើកការវាយប្រហារឈ្លានពានកម្ពុជា លោកបារម្ភ និងយកចិត្តទុកដាក់ពីជីវភាពពលរដ្ឋខេត្តស៊ីសាកេត ហើយពលរដ្ឋនៅទូទាំងប្រទេសហាមបើកព្រំដែនកម្ពុជា-ថៃឡើងវិញ លោកនឹងធ្វើតាមការសំណូមពររបស់ពលរដ្ឋ ពីព្រោះពលរដ្ឋខ្លាចពេលបើកព្រំដែននឹងធ្វើឱ្យដំណាំកសិកម្មធ្លាក់ថ្លៃ ។ លោកថា ពលរដ្ឋត្រូវចូលរួមបោះឆ្នោតគាំទ្រគណបក្សភូមិចៃថៃ នៅថ្ងៃទី៨ ខែកុម្ភៈ ខាងមុខ ពីព្រោះមានតែគណបក្សនេះមួយគត់ដែលមានគោលនយោបាយមិនបើកព្រំដែន ។

លោកសន្យាថា បើបានឡើងកាន់តំណែងជានាយករដ្ឋមន្ត្រីបន្ត ក្រៅពីមិនបើកព្រំដែនឡើងវិញ រដ្ឋាភិបាលនឹងចែកប្រាក់ឱ្យពលរដ្ឋសម្រាប់ទុកចាយវាយទិញទំនិញប្រើប្រាស់ប្រចាំថ្ងៃ ព្រមទាំងគិតគូរពីជីវភាពកងទ័ពប្រចាំការនៅព្រំដែនផងដែរ ។

គួរបញ្ជាក់ថា រដ្ឋាភិបាល និងកងទ័ពថៃ បានបិទព្រំដែនជាមួយកម្ពុជាជាឯកតោភាគីតាំងពីខែមិថុនា ឆ្នាំ២០២៥ ក្រោមហេតុផលការពារអធិបតេយ្យ និងចោទប្រកាន់កម្ពុជាជាទីតាំងឆបោកអនឡាញ ។ ការបិទព្រំដែនធ្វើឱ្យថៃខាតបង់ចំណូលសេដ្ឋកិច្ចយ៉ាងច្រើនសន្ធឹកសន្ធាប់ ព្រមទាំងបាត់បង់ភ្ញៀវទេសចរ អាជីវកម្មសណ្ឋាគារ ផ្ទះសំណាក់ ភោជនីយដ្ឋាន ហាងលក់ទំនិញតូច-ធំនៅក្បែរព្រំដែនកម្ពុជា ដួលរលំបិទទ្វារជាបន្តបន្ទាប់ ៕