ប្រទេសថៃ ៖ នៅថ្ងៃទី៨ ខែកុម្ភៈ ឆ្នាំ២០២៦ គឺជាថ្ងៃបោះឆ្នោតជ្រើសរើសសមាជិកសភាថៃដើម្បីឈានទៅបង្កើតរដ្ឋាភិបាលថ្មី ហើយគណបក្សនយោបាយនានាបានឃោសនាពីគោលនយោបាយរបស់ខ្លួនយ៉ាងសកម្ម ព្រមទាំងមានការផ្តល់ប្រាក់ឱ្យពលរដ្ឋដើម្បីទិញសន្លឹកឆ្នោតនៅទូទាំងប្រទេស ។ នៅថ្ងៃទី៥ ខែកុម្ភៈ នេះ សកម្មជននយោបាយថៃបានស្នើឱ្យគណៈកម្មាធិការរៀបចំការបោះឆ្នោតពន្យារពេលការបោះឆ្នោតទៅខែមីនា ឬខែមេសា ដើម្បីឱ្យការបោះឆ្នោតមានភាពយុត្តិធម៌ ។

នៅថ្ងៃទី៥ ខែកុម្ភៈ លោក ស៊ុនធិយ៉ា សាវ៉ាត់ឌី សកម្មជននយោបាយបានដាក់លិខិតទៅគណៈកម្មាធិការរៀបចំការបោះឆ្នោត ដើម្បីស្នើពន្យារពេលថ្ងៃបោះឆ្នោត ខណៈថៃនឹងបោះឆ្នោតទូទាំងប្រទេសនៅថ្ងៃទី៨ ខែកុម្ភៈ ដោយនិយាយថា គណបក្សនយោបាយនានាផ្តល់ប្រាក់ឱ្យពលរដ្ឋដើម្បីទិញសន្លឹកឆ្នោត ដែលធ្វើឱ្យប៉ះពាល់ដល់ការបោះឆ្នោតគ្មានភាពយុត្តិធម៌ ។

ក្រៅពីនេះ មានទិន្នន័យពីធនាគារស្តីពីគណបក្សនយោបាយមួយចំនួនដកប្រាក់ខុសប្រក្រតីរហូតដល់២លើក សរុបចំនួន៤៥០លានបាត (ស្មើជាង១៤លានដុល្លារ) ទើបលោកដាក់លិខិតទៅការិយាល័យប្រឆាំងការលាងលុយកខ្វក់ ដើម្បីឱ្យត្រួតពិនិត្យជាមួយធនាគារ ថាតើគណបក្សនយោបាយដកប្រាក់យកទៅធ្វើអ្វី និងពាក់ព័ន្ធជាមួយនយោបាយដែរឬទេ ។

លោក ស៊ុនធិយ៉ា សំណូមពរឱ្យគណៈកម្មាធិការរៀបចំការបោះឆ្នោតដោះស្រាយបញ្ហានេះ និងត្រួតពិនិត្យយ៉ាងលម្អិត ប្រសិនបើគណៈកម្មការរៀបចំការបោះឆ្នោតចាត់វិធានការ គឺគណបក្សនយោបាយផ្សេងទៀត រួមទាំងលោក នឹងប្តឹងទៅតុលាការធម្មនុញ្ញឱ្យចាត់ទុកការបោះឆ្នោតនេះជាមោឃៈ និងស្នើពន្យារពេលបោះឆ្នោត ។ លោកចង់ឃើញការបោះឆ្នោតមានភាពយុត្តិធម៌ ហើយគណៈកម្មាធិការអាចរៀបចំការបោះឆ្នោតនៅខែមីនា ឬខែមេសា ឆ្នាំ២០២៦ វិញ ។

លោកមានឯកសារការទិញសន្លឹកឆ្នោតនៅខេត្តសមុទ្រសាខន ដោយគណបក្សនយោបាយបានដើរស្រង់ឈ្មោះពលរដ្ឋ ប៉ុន្តែមិនទាន់បានផ្តល់ប្រាក់ឱ្យទេ ដោយសារលោករាយការណ៍ប្រាប់គណៈកម្មាធិការរៀបចំការបោះឆ្នោតប្រចាំខេត្ត ។ លោកបារម្ភពីគណបក្សនយោបាយអាចនឹងផ្តល់ប្រាក់ឱ្យពលរដ្ឋមុនថ្ងៃបោះឆ្នោតមួយថ្ងៃ ឬផ្តល់ប្រាក់នៅព្រឹកថ្ងៃបោះឆ្នោត (ថ្ងៃទី៨ ខែកុម្ភៈ) ពេលនេះ មានគណបក្សចំនួន២ត្រៀមទិញសន្លឹកឆ្នោត ដោយចែកប្រាក់ឱ្យពលរដ្ឋក្នុងម្នាក់ ចាប់ពី២០០បាត ទៅ៥០០បាត ។

ចំណែកលោក ស្វែង ប៊ុនមី អគ្គលេខាធិការគណៈកម្មាធិការរៀបចំការបោះឆ្នោតបញ្ជាក់ថា គណបក្សនយោបាយនានាអាចដកប្រាក់ពីធនាគារដើម្បីត្រៀមខ្លួនបាន ប៉ុន្តែហាមយកប្រាក់ទៅទិញសន្លឹកឆ្នោត ពីព្រោះចាត់ទុកជាបទល្មើស និងខ្វះសីលធម៌ ។

គួរបញ្ជាក់ថា កន្លងមក ក៏លេចឮព័ត៌មានគណបក្សនយោបាយជាច្រើននៅប្រទេសថៃប្រជែងគ្នាទិញសន្លឹកឆ្នោតដែរ ដោយផ្តល់ប្រាក់ឱ្យពលរដ្ឋក្នុងម្នាក់រហូតដល់រាប់ពាន់បាត ជាពិសេស នៅទីក្រុងបាងកក ៕

ប្រទេសរុស្ស៊ី ៖ សង្គ្រា.មរវាងរុស្ស៊ី និងអ៊ុយក្រែនបានអូសបន្លាយជាច្រើនឆ្នាំ ដែលរហូតមកដល់ឆ្នាំ២០២៦នេះ គ្មានសញ្ញានឹងបញ្ចប់ពេលណាទេ បើទោះជាអន្តរជាតិ ជាពិសេស អាមេរិក ជួយសម្របសម្រួលឱ្យបញ្ចប់សង្គ្រា.មក្តី ។ បច្ចុប្បន្ន រុស្ស៊ីឈានទៅកាន់កាប់ទឹកដីអ៊ុយក្រែន ប៉ុន្តែរយៈពេលជាច្រើនឆ្នាំមកនេះ រុស្ស៊ីបានចំណាយប្រាក់យ៉ាងច្រើនដើម្បីវាយប្រ.ហារអ៊ុយក្រែន និងធ្វើឱ្យសេដ្ឋកិច្ចរុស្ស៊ីដួលរលំ ។

សារព័ត៌មាន AFP បានរាយការណ៍ពីទីក្រុងមូស្គូ ប្រទេសរុស្ស៊ី កាលពីថ្ងៃទី៤ ខែកុម្ភៈ ឆ្នាំ២០២៦ ថា រដ្ឋាភិបាលរុស្ស៊ីបានចំណាយប្រាក់យ៉ាងច្រើនសន្ធឹកសន្ធាប់ផ្នែកកងទ័ពដើម្បីធ្វើសង្គ្រា.មជាមួយអ៊ុយក្រែនកាលពីឆ្នាំ២០២២ គឺជាពេលបើកការវាយប្រហារលើកដំបូង និងធ្វើឱ្យរុស្ស៊ីឈ្នះសង្គ្រាម ប៉ុន្តែបែរជាធ្វើឱ្យសេដ្ឋកិច្ចរុស្ស៊ីដួលរលំ ។ ផលិតផលក្នុងស្រុកសរុប (GDP) របស់រុស្ស៊ីកើនឡើងត្រឹមតែ១% ប៉ុណ្ណោះកាលពីឆ្នាំ២០២៥ ដោយសារសង្គ្រា.មអូសបន្លាយ ។

រដ្ឋាភិបាលរុស្ស៊ីបានចំណាយប្រាក់យ៉ាងច្រើនដើម្បីឈ្នះសង្គ្រាម និងកាន់កាប់ទឹកដីអ៊ុយក្រែន ប៉ុន្តែបានជំរុញឱ្យមានអតិផរណានៅប្រទេសរុស្ស៊ី និងប៉ះពាល់ដល់កំណើនសេដ្ឋកិច្ចយ៉ាងខ្លាំង ខណៈអាជីវកម្មជាច្រើនរបស់រុស្ស៊ីចំណាយដើមទុនខ្ពស់ជាងមុន ។

តាមការអះអាងរបស់ប្រធានាធិបតីរុស្ស៊ី លោក Vladimir Putin ផលិតផលក្នុងស្រុកសរុប (GDP) របស់រុស្ស៊ីកើនឡើងត្រឹមតែ១% ប៉ុណ្ណោះកាលពីឆ្នាំ២០២៥ ដែលទាបជាងគោលដៅ ខណៈអត្រាកំណើន GDP នៅឆ្នាំ២០២៣ និងឆ្នាំ២០២៤ ស្មើ៤.១% និង ៤.៣% ដែលកំណើន GDP ទាបនេះបណ្តាលមកពីអតិផរណា ។ ពេលនេះ រុស្ស៊ីត្រូវតែស្តារកំណើនសេដ្ឋកិច្ចឡើងវិញ កែលម្អបរិយាកាសអាជីវកម្ម និងបង្កើនសកម្មភាពវិនិយោគ ដោយផ្តោតលើការបង្កើនកម្លាំងពលកម្ម ។

គួរបញ្ជាក់ថា កងទ័ពរុស្ស៊ី និងអ៊ុយក្រែនបានពលីជីវិតក្នុងសង្គ្រា.មអូសបន្លាយជាច្រើនឆ្នាំ កើនឡើងរហូតដល់ជិត២លាននាក់ ដែលរហូតមកដល់ឆ្នាំ២០២៦ គ្មានសញ្ញាថា សង្គ្រា.មនេះនឹងបញ្ចប់ពេលណា ទោះជាប្រធានាធិបតីអាមេរិក លោក Donald Trump បើកការចរចានៅទីក្រុង Abu Dhabi ប្រទេសអេមីរ៉ាតអារ៉ាប់រួម ដើម្បីជំរុញឱ្យរុស្ស៊ី-អ៊ុយក្រែនបង្កើតកិច្ចព្រមព្រៀងសន្តិភាព ប៉ុន្តែរុស្ស៊ីនៅតែទាមទារកាន់កាប់ទឹកដីអ៊ុយក្រែន ។

ចំនួនមនុស្សស្លាប់ក្នុងសង្គ្រាមរវាងប្រទេសទាំងពីរ គឺច្រើនជាងមនុស្សស្លាប់ក្នុងសង្គ្រាមរបស់សូវៀតនៅអាហ្វហ្គានីស្ថានកាលពីឆ្នាំ១៩៨០ រហូតដល់១៧ដង និងស្លាប់ច្រើនជាងសង្គ្រាមផ្សេងៗលើពិភពលោក ។ កងទ័ពរុស្ស៊ីបានស្លាប់ច្រើនជាងអ៊ុយក្រែន ប្រមាណជាង២ដង ខណៈអ៊ុយក្រែនមានពលរដ្ឋ និងកងទ័ពតិចជាងរុស្ស៊ី ប៉ុន្តែអាចទប់ទល់នឹងការវាយប្រហារពីរុស្ស៊ីរយៈពេលវែង ។ ភ្នាក់ងារសង្កេតការណ៍អ៊ុយក្រែន (DeepState) ឱ្យដឹងថា កងទ័ពរុស្ស៊ីបានដណ្តើមគ្រប់គ្រងទឹកដីអ៊ុយក្រែនបន្ថែមទៀត ចាប់ពីថ្ងៃទី១ ដល់ថ្ងៃទី២៥ ខែមករា ឆ្នាំ២០២៦ ។

កាលពីចុងសប្តាហ៍ទី៣ ខែមករា កន្លងមក សហរដ្ឋអាមេរិក រុស្ស៊ី និងអ៊ុយក្រែន បានបើកការចរចាស្វែងរកសន្តិភាពរវាងរុស្ស៊ី និងអ៊ុយក្រែន នៅទីក្រុង Abu Dhabi ប្រទេសអេមីរ៉ាតអារ៉ាប់រួម ដែលនេះជាការចរចាលើកដំបូងតាំងពីរុស្ស៊ីធ្វើសង្គ្រាមឈ្លានពានអ៊ុយក្រែន ប៉ុន្តែមិនឈានទៅធ្វើកិច្ចព្រមព្រៀងណាមួយឡើយ ដោយសាររុស្ស៊ីនៅតែទាមទារកាន់កាប់ទឹកដីអ៊ុយក្រែន ៕

បងប្អូននៅចាំបានទេ? កាលពីប៉ុន្មានខែមុនទើបចេញមុខប្រគល់ជំនួយឲ្យកងទ័ពថៃដើម្បីវា.យឈ្លានពានកម្ពុជា ឥឡូវនេះ តូនីចា ឬតួសម្ដែងកែងឆេះជង្គង់ហោះ ដែលបំភ្លេចដើមកំណើតថាខ្លួនជាប់សាច់ឈា.មជាខ្មែរនោះត្រូវបានព័ត៌មានថៃចុះផ្សាយថា កំពុងធ្លាក់ខ្លួនឈឺធ្ងន់ដោយសារជំងឺមហារីកថង់ទឹកប្រមាត់ដំណាក់កាលទី៣។

យោងតាមការចុះផ្សាយរបស់កាសែត Khaosod នៅថ្ងៃទី៥ ខែកុម្ភៈ ឆ្នាំ២០២៦ បានឲ្យដឹងថា លោក តូនីចា មានសភាពស្គមស្គាំងខ្លាំង ខណៈការធ្វើរោគវិនិច្ឆ័យបានបង្ហាញថា តារាប្រុសវ័យ ៤៩ឆ្នាំរូបនេះ មានជំងឺមហារីកថង់ទឹកប្រមាត់ដំណាក់កាលទីបី ដែលជិតដល់ដំណាក់កាលទីបួនកាលពីជិតពីរឆ្នាំមុន។

យោងតាមប្រភពព័ត៌មាន តូនីចា បានស្វែងរកការព្យាបាលដំបូងបន្ទាប់ពីមានការអក្ការៈចុកពោះធ្ងន់ធ្ងរ រួមជាមួយនឹងជំងឺខាន់លឿងដែលប៉ះពាល់ដល់ស្បែក និងភ្នែករបស់គាត់។ ក្រោយមកគ្រូពេទ្យបានបញ្ជាក់ពីជំងឺមហារីកថង់ទឹកប្រមាត់ ហើយចាប់តាំងពីពេលនោះមក គាត់បានធ្វើការវះកាត់ដើម្បីយកសាច់កាចនោះចេញ និងបច្ចុប្បន្នកំពុងទទួលការព្យាបាលតាមរយៈគីមីជាបន្តបន្ទាប់។

គួរជម្រាបថា តូនីចា ឬ ចាបភ្នំយ៉ារ៉ាំ ដែលបងប្អូនខ្មែរតែងនាំគ្នាគាំទ្រភ្លុកទឹកភ្លុកដីចំពោះការសម្ដែងនៅក្នុងខ្សែភាពយន្តក្បាច់គុនកែងឆេះរបស់ថៃក្នុងពេលកន្លងមក បានចាកចោលលែងទទួលស្គាល់ឈា.មជ័រជាខ្មែរទាំងស្រុង ក្រោយពេលបានក្លាយជាតារាហូលីវូដ ដើម្បីផ្គាប់ភ្គន់ចិត្តប្រជាជនថៃជាធំ។

នៅមុនពេលទទួលបានភាពល្បីល្បាញ តូនីចា ធ្លាប់អះអាងថាខ្លួនមានដើមកំណើតជាខ្មែរសុរិន្ទ និងតែងអំពាវនាវឲ្យប្រជាជនខ្មែរគាំទ្រការសម្ដែងរបស់ខ្លួនផង ព្រោះមានលើកបង្ហាញពីក្បាច់គុនបុរាណខ្មែរ ។ ប៉ុន្តែក្រោយពីទទួលជោគជ័យនៅក្នុងជីវិត តារាប្រុសរូបនេះបែរជាក្រឡាសសម្ដីថា ក្បាច់គុនបុរាណនៅក្នុងខ្សែភាពដ៏ល្បីល្បាញរបស់ខ្លួននៅក្នុងពេលកន្លងមក គឺជាកម្មសិទ្ធិរបស់ថៃ និងលែងទទួលស្គាល់ថាខ្លួនគឺជាកូនខ្មែរតទៅទៀត។

មិនតែប៉ុណ្ណោះ នៅក្នុងអំឡុងពេលដែលយោធាថៃបើកការឈ្លានពានលើប្រទេសកម្ពុជាកាលពីថ្មីៗនេះ តូនីចា ថែមទាំងបានបង្ហាញការគាំទ្រ និងឧបត្ថម្ភប្រាក់ដល់យោធាថៃយ៉ាងច្រើនសន្ធឹកសន្ធាប់ផងដែរ។ ការណ៍នេះបានធ្វើឲ្យប្រជាជនខ្មែរដែលធ្លាប់ស្រលាញ់គាំទ្រតារាប្រុសភ្លេចកំណើតរូបនេះស្រង៉ាកចិត្ត និងខឹ.ងសម្បារជាខ្លាំង៕

សហរដ្ឋអាមេរិក ៖ តុលាការអាមេរិកបានកាត់ក្តីបុរសឈ្មោះ Ryan Routh អាយុ៥៩ឆ្នាំ ឱ្យជាប់ពន្ធនាគារមួយជីវិត ករណីប៉ុនប៉ងធ្វើឃា.តប្រធានាធិបតីអាមេរិក លោក Donald Trump នៅរដ្ឋផ្លរីដា កាលពីខែកញ្ញា ឆ្នាំ២០២៤ ដែលពេលនោះ ជនល្មើសព្យាយាមធ្វើឃា.តប្រធានាធិបតីអាមេរិកដោយលាក់ខ្លួនក្នុងគុម្ពោតព្រៃ ប៉ុន្តែត្រូវបានអាជ្ញាធរឃើញទាន់ ។ នេះបើតាមការចុះផ្សាយរបស់សារព័ត៌មានបរទេសកាលពីថ្ងៃទី៤ ខែកុម្ភៈ ឆ្នាំ២០២៦ ។

កាលពីឆ្នាំ២០២៤ ជនល្មើសត្រូវបានតុលាការរកឃើញថា មានទោសកំហុសដោយសារព្យាយាមធ្វើឃាតប្រធានាធិបតីអាមេរិក ដែលពេលនោះ លោក Trump គឺជាបេក្ខជនឈរឈ្មោះប្រធានាធិបតី បានធ្វើដំណើរមកកាន់ទីលាន Trump International Golf Club នៅទីក្រុង West Palm Beach រដ្ឋផ្លរីដា ។

សមត្ថកិច្ចក្នុងតំបន់បានសង្កេតឃើញកាំភ្លើងចេញពីគុម្ពោតព្រៃ ក៏បាញ់សំដៅទៅគុម្ពោតព្រៃធ្វើឱ្យជនល្មើសប្រញាប់រត់ចេញ ប៉ុន្តែត្រូវសមត្ថកិច្ចចាប់ខ្លួនបាននៅក្បែរនោះ ។ បើតាមមន្ត្រីតុលាការ គឺទោសកំហុសរបស់ជនល្មើសស័ក្តិសមនឹងទទួលការកាត់ទោសឱ្យជាប់ពន្ធនាគារមួយជីវិតមិនអាចបដិសេធបាន ពីព្រោះបានរៀបចំផែនការជាច្រើនខែដើម្បីធ្វើឃាតលោក Trump ដែលនេះបង្ហាញថា មានគម្រោងធ្វើឃាតដោយចេតនា ។ តាំងពីពេលនោះ ជនល្មើសមិនបានបង្ហាញការសោកស្តាយ ឬទទួលស្គាល់កំហុសរបស់ខ្លួនឡើយ ។

មេធាវីរបស់ជនល្មើសបានដាក់ពាក្យប្តឹងទៅតុលាការឧទ្ធរណ៍ក្នុងសំណុំរឿងនេះ ខណៈជនល្មើសបដិសេធរាល់ការចោទប្រកាន់ទាំងអស់ ។ ជនល្មើសមានស្រុកកំណើតនៅរដ្ឋ North Carolina និងបានមករស់នៅរដ្ឋ Hawaii មុនពេលសមត្ថកិច្ចចាប់ខ្លួន ដោយបង្ហាញអាកប្បកិរិយាមិនគួរឱ្យសង្ស័យអ្វីឡើយពេលសមត្ថកិច្ចស៊ើបអង្កេត ដូចជា ៖ ស្វាគមន៍លោកប្រធានាធិបតី Trump ពេលប្រកួតវាយកូនហ្គោល ។

សមត្ថកិច្ចរកឃើញថា ជនល្មើសបានសរសេរឈ្មោះទីកន្លែងផ្សេងៗដែលលោកប្រធានាធិបតី Trump មានគម្រោងធ្វើដំណើរទៅទីនោះ ប៉ុន្តែនៅថ្ងៃដែលលោក Trump ធ្វើដំណើរទៅកាន់ទីលាន Trump International Golf Club នៅទីក្រុង West Palm Beach រដ្ឋផ្លរីដា ជនល្មើសគ្មានកន្លែងលាក់ខ្លួនដើម្បីបាញ់ឱ្យចំគោលដៅទេ ។

នៅតុលាការ ជនល្មើសមិនទទួលស្គាល់ទោសកំហុស និងថាមិនពាក់ព័ន្ធអ្វីទាំងអស់នឹងការចោទប្រកាន់នេះ ហើយបាននិយាយហូរហែចាកប្រធានបទ ដូចជា ៖ និយាយពីប្រវត្តិសាស្ត្រអាមេរិក សង្គ្រាមរុស្ស៊ី-អ៊ុយក្រែន និងនិយាយពីការតាំងចិត្តទិញនាវា ទើបធ្វើឱ្យតុលាការឈប់ឱ្យជនល្មើសនិយាយបន្តទៀត និងបញ្ជាសន្តិសុខនាំជនល្មើសចេញពីបន្ទប់សវនាការ ។

តុលាការមានភស្តុតាងយ៉ាងច្រើនដែលបង្ហាញថា ជនល្មើសពិតជាប៉ុនប៉ងធ្វើឃាតលោកប្រធានាធិបតី Trump ហើយធ្វើសកម្មភាពនៅទីលាន Trump International Golf Club ប៉ុន្តែត្រូវបានអាជ្ញាធរឃើញហេតុការណ៍មុន ៕