សាធារណជនអ្នកក្នុងចង្កោមសិល្បៈជាច្រើនរូបបានប្រតិកម្មនិងរិះគន់ តាប៊ុយ ប្រើពាក្យសម្តីលេងសើចជ្រុលដល់ពិធីការិនី សុភ័ក្រ កុសុម៉ា និងគូដណ្តឹងដែលជិតចូលរោងជ័យនាពេលឆាប់ៗនេះ។ ការលេងសើចរបស់លោក សុភ័ក្រ កុសុម៉ា ក៏ប្រតិកម្មដូចគ្នាដែលហាក់ដូចជាមើលងាយមិនឱ្យតម្លៃនាងនិងអនាគតស្វាមី។ ភ្លើងកម្តៅកាន់តែក្តៅថែមទៀតបន្ទាប់ពី តាប៊ុយ ចេញវីដេអូសូមទោសដោយនិយាយថាខ្លួនជាមនុស្សនិយាយត្រង់អត់ចូលចិត្តនិយាយបញ្ឆិតបញ្ឆៀង។
.png)
រឿងរ៉ាវនេះបានកើតឡើងនៅពេលតារាចម្រៀងនិងជាពិធីការិនី សុភ័ក្រ កុសុម៉ា បញ្ចេញរូបភាព Pre wedding នៅក្រោមដំណក់ទឹកភ្លៀងយ៉ាងស៊ីអារម្មណ៍បន្ទាប់ពីបញ្ចេញរូបភាពបែបប្រពៃណីខ្មែរ។ រូបថតដែល កុសុម៉ា បានបង្ហោះត្រូវបាន តាប៊ុយ លើកឡើងថា «តាមពិតកូនកំលោះសន្សំលុយមិនទាន់គ្រប់ តែខាងកូនក្រមុំថែមលុយការប្តី»។
បន្ទាប់ពី តាប៊ុយ ប្រើភាសានេះ កុសុម៉ា បានតបទៅវិញថា «ឯងលេងយូរៗទៅដូចមិនឱ្យតម្លៃខ្ញុំទាំងពីរនាក់សោះ សំណេរនេះសរសេរមកគឺអ្នកមិនដឹងគេប្រាកដជាមើលងាយទៅគូដណ្តឹងខ្ញុំ ហើយមួយទៀតគេបន្ទាបតម្លៃខ្ញុំជាស្រ្តី»។ បន្ទាប់ពីរឿងនេះបានរីករាលដាលពេញបណ្តាញសង្គមហ្វេកប៊ុក តាប៊ុយ រងនូវពាក្យរិះគន់យ៉ាងចាស់ដៃពីមហាជនរួមទាំងអ្នកសិល្បៈមួយចំនួន។ ពាក្យសម្តីរបស់ តាប៊ុយ បានធ្វើឱ្យអ្នកលេងបណ្តាញសង្គមថាលេងសើចជ្រុលមិនចេះគិត ខណៈអ្នកខ្លះលើកឡើងថា តាប៊ុយ គឺនិយាយលេងសើចជ្រុលបែបនេះជាញឹកញាប់។
ស្ថានភាពកាន់តែក្តៅងំបន្ទាប់ពី តាប៊ុយ បានចេញវីដេអូសូមទោស សុភ័ក្រ កុសុម៉ា ប៉ុន្តែពាក្យសម្តី ថាខ្លួនលោកជាមនុស្សនិយាយត្រង់មិនចេះនិយាយបញ្ឆិតបញ្ឆៀងនេះកាន់តែធ្វើឱ្យមហាជនរិះគន់តាប៊ុយថែមទៀត ព្រោះសម្តីនេះអាចបញ្ជាក់ថាវាជារឿងពិត។ ចេញវីដេអូសូមទោសមិនអស់ចិត្ត តាប៊ុយ បានឆាតទៅ កុសុម៉ា បន្ថែមទៀត។ កុសុម៉ា បានបង្ហាញអារម្មណ៍ថាដំបូងនាងពិតជាខឹងតាប៊ុយមែន តែពេលនេះអន់ចិត្តខ្លាំងព្រោះពាក្យថានិយាយត្រង់ចឹងរឿងហ្នឹងជាការពិត វាកាន់តែខុស។
គួរបញ្ជាក់ថា សុភ័ក្រ កុសុម៉ា និងលោក ផល្លា ជាគូដណ្តឹង នឹងរៀបអាពាហ៍ពិពាហ៍នៅថ្ងៃទី៤ ខែវិច្ឆិកា ឆ្នាំ២០២៤។ អនាគតស្វាមីរបស់តារាស្រីរូបនេះត្រូវបានមនុស្សជាច្រើនសរសើរថាជាមនុស្សឧស្សាហ៍ព្យាយាម ពូកែសន្សំ ប្រាក់ខែក៏ខ្ពស់៕
