ប្រទេសថៃ ៖ សារព័ត៌មានថៃរាយការណ៍ថា លោកស្រី ផេថងថាន ស៊ីណាវ៉ាត់ នាយករដ្ឋមន្ត្រីថៃបានជំរុញឱ្យរៀបចំពិធីបុណ្យ «Thailand Winter Festivals» នៅថ្ងៃទី២៩ ខែតុលា ឆ្នាំ២០២៤ ដើម្បីទាក់ទាញភ្ញៀវទេសចរមកពីជុំវិញពិភពលោក មកកម្សាន្តប្រទេសថៃក្នុងរដូវរងា ។ ពិធីបុណ្យនេះនឹងរៀបចំពិធីបណ្តែតប្រទីប, បង្ហោះគោម, គ្រីស្តម៉ាស និងឆ្លងឆ្នាំ ។

លោកស្រី ផេថងថាន ស៊ីណាវ៉ាត់ សង្ឃឹមថា ការរៀបចំពិធីបុណ្យ «Thailand Winter Festivals» នឹងជួយជំរុញវិស័យទេសចរណ៍ថៃ និងលើកកម្ពស់ Soft Power ។ ដោយឡែក នៅល្ងាចថ្ងៃទី២៩ ខែតុលា លោកស្រីនឹងប្រកាសបើកពិធីបុណ្យ Diwali ដើម្បីពង្រឹងទំនាក់ទំនងរវាងថៃ និងឥណ្ឌា ។

លោក Jirayu Huangsap មន្ត្រីនាំពាក្យទីស្តីការនាយករដ្ឋមន្ត្រីនិយាយថា នៅថ្ងៃទី២៩ ខែតុលា លោកស្រី ផេថងថាន ស៊ីណាវ៉ាត់ នាយករដ្ឋមន្ត្រីថៃ នឹងធ្វើជាប្រធានបើកពិធីបុណ្យដើម្បីជំរុញដំណើរកម្សាន្តក្នុងប្រទេស និងជំរុញ Soft Power តាមរយៈការរៀបចំកម្មវិធីផ្សព្វផ្សាយទេសចរណ៍គ្រប់រូបភាព ។ ពិធីបុណ្យនេះមានគោលដៅជំរុញសេដ្ឋកិច្ច, ទទួលចំណូលពីផ្នែកទេសចរណ៍, ជំរុញថៃឱ្យក្លាយជាគោលដៅទេសចរណ៍ និងកន្លែងរៀបចំពិធីបុណ្យលំដាប់ពិភពលោក ។

ពិធីបុណ្យនេះជាការអនុវត្តគោលនយោបាយរបស់រដ្ឋាបាល ដើម្បីឱ្យភ្ញៀវទេសចរមកលេងថៃច្រើនបំផុត ហើយភ្ញៀវទេសចរនឹងសប្បាយរីករាយជាមួយកម្មវិធីជាច្រើន ដែលថៃនឹងរៀបចំនៅចុងឆ្នាំ២០២៤ និងដើមឆ្នាំ២០២៥ ។ ស្ថាប័នរដ្ឋ និងផ្នែកឯកជន នឹងសហការគ្នារៀបចំកម្មវិធីជាច្រើន ដូចជា ៖ ពិធីបណ្តែតប្រទីប, បង្ហោះគោម, គ្រិស្តម៉ាស, ឆ្លងឆ្នាំ, ប្រគំតន្ត្រី, កីឡា, ម្ហូបអាហារ និងការបង្ហាញវប្បធម៌ ។

វាជាពេលវេលាដ៏សំខាន់ដែលប្រទេសថៃអាចទាក់ទាញចំណាប់អារម្មណ៍ភ្ញៀវទេសចរមកពីជុំវិញពិភពលោក មកលេងប្រទេសថៃ ហើយរដ្ឋាភិបាលថៃសង្ឃឹមថា ពិធីបុណ្យ Thailand Winter Festivals នឹងជួយឱ្យក្រុមហ៊ុនទេសចរណ៍ថៃមានសកម្មភាពរស់រវើក ។

លោក Jirayu បន្តថា នៅល្ងាចថ្ងៃទី២៩ ខែតុលា នាយករដ្ឋមន្ត្រីថៃនឹងប្រកាសបើកពិធីបុណ្យ «Amazing Thailand Diwali Festival Bangkok 2024» នៅទីក្រុងបាងកក ដើម្បីជំរុញវិស័យទេសចរណ៍ ក៏ដូចជារពង្រឹងទំនាក់ទំនងការទូត និងពាណិជ្ជកម្មរវាងថៃ និងឥណ្ឌា ។ ក្រៅពីនេះ ភ្ញៀវទេសចរអាចចូលរួមបរិភោគអាហារឥណ្ឌា, ទិញទំនិញឥណ្ឌា និងសម្ភារៈតុបតែងបង្ហាញពីសិល្បៈឥណ្ឌា ៕

ប្រទេសចិន៖ ក្រុមហ៊ុន Xpeng របស់ចិនបានបង្កើតរោងចក្រផលិតរថយន្តហោះ ឬឡានហោះទ្រង់ទ្រាយធំជាលើកដំបូង នៅទីក្រុងក្វាងចូវ ជាមួយនឹងសមត្ថភាពផលិតប្រចាំឆ្នាំ ១ ម៉ឺនគ្រឿង ដែលគ្រោងនឹងចេញលក់ជាផ្លូវការនៅឆ្នាំ ២០២៦។

កាលពីថ្ងៃទី២៧ ខែតុលា ឆ្នាំ២០២៤ ក្រុមហ៊ុន Xpeng របស់ចិនបានរៀបចំពិធីបើកការដ្ឋានសាងសង់រោងចក្រផលិតឡានហោះដំបូងគេបង្អស់របស់ពិភពលោក ដែលមានទីតាំងនៅទីក្រុងក្វាងចូវ ជាមួយនឹងសមត្ថភាពផលិតប្រចាំឆ្នាំ ១ ម៉ឺនគ្រឿងឯណោះ ខណៈកាលពីខែកញ្ញាឆ្នាំមុន ក្រុមហ៊ុននេះបានទទួលការបញ្ជាទិញច្រើនជាង ៣ ពាន់គ្រឿងសម្រាប់ឡានហោះនេះ មុនពេលបើកលក់ជាផ្លូវការ។

រោងចក្រថ្មីនេះមានឈ្មោះថា Xpeng AeroHT គ្របដណ្តប់លើផ្ទៃដីប្រហែល ១៨០,០០០ ម៉ែត្រការ៉េ ដោយរួមបញ្ចូលនូវសិក្ខាសាលាសំខាន់ៗចំនួនបួនគឺ សមាសធាតុរួម គំនូរ និងសភា រួម ជាមួយនឹងហេដ្ឋារចនាសម្ព័ន្ធគាំទ្របន្ថែម។ មូលដ្ឋានផលិតកម្មមានគោលបំណងបំពេញតាមស្តង់ដារភាពជាក់លាក់ខ្ពស់នៃឧស្សាហកម្មអាកាសចរណ៍ ក៏ដូចជាជួយកាត់បន្ថយការស្ទះចរាចរណ៍នៅតាមដងផ្លូវសារធារណៈជាដើម។

ឡានហោះគ្មានមនុស្សបើក មានសមត្ថភាពហោះឡើងចុះចតដោយស្វ័យប្រវត្តិ និងភ្ជាប់ជាមួយយានដឹកជញ្ជូន។ បន្ទាប់ពីការសាកថ្មពេញម្តងៗ ឡានហោះអាចហោះហើរបានពី ៥ ទៅ ៦ ដងឯណោះ ប៉ុន្តែមិនអាចហោះឆ្លងទ្វីបដូចយន្តហោះនោះទេ ពោលគឺឡានហោះអាចហោះបានតែនៅក្នុងប្រទេសប៉ុណ្ណោះ។

ការបង្កើតរោងចក្រផលិតឡានហោះនេះ ត្រូវបានគេរំពឹងថានឹងបង្កើនភាពស៊ីសង្វាក់គ្នានៃគុណភាព តម្លៃផលិតកម្មទាប និងកាត់បន្ថយពេលវេលាយ៉ាងច្រើន ក៏ដូចជាជំរុញឱ្យមានការរួមបញ្ចូលគ្នារវាងវិស័យរថយន្តថាមពលថ្មី (NEV) និងសេដ្ឋកិច្ចដែលមានកម្ពស់ទាបកំពុងរីកចម្រើន។ Xpeng AeroHT ជឿជាក់ថាឡានហោះរបស់ខ្លួននឹងមានការពេញនិយមខ្លាំងនៅពេលចេញលក់ជាផ្លូវការក្នុងឆ្នាំ ២០២៦ ក៏ដូចជាមានមហិច្ឆតាចង់ចែកចាយឡានហោះទាំងនេះទូទាំងពិភពលោកទៀតផង៕

តើលោកអ្នកធ្លាប់ជួបប្រទះនូវបញ្ហាអ៊ីនធឺណិតដើរយឺតដែរឬទេ? ជាការពិតណាស់ នៅពេលដែល 3G ឬ 4G របស់លោកអ្នកដើរយឺតខុសធម្មតា វានឹងធ្វើឱ្យលោកអ្នកមានអារម្មណ៍តានតឹងជាងមុន ដោយសារយើងមិនអាចប្រើប្រាស់កម្មវិធីផ្សេងៗ ឬក៏ដោនឡូតអ្វីៗបាននោះទេ។ លើសពីនេះវាក៏អាចធ្វើឱ្យការងាររបស់អ្នកយឺតយ៉ាវផងដែរ ដូច្នេះហើយតើមូលហេតុអ្វីបានជា អ៊ីធឺណិតចល័តរបស់យើងដើរយឺតខ្លាំងបែបនេះ?

សម្រាប់មូលហេតុគឺដោយសារចម្ងាយនៃអង់តែនអ៊ីនធឺណិតនៅតំបន់នោះឆ្ងាយពេក ធ្វើឱ្យរលកសញ្ញាចុះខ្សោយ ឬក៏មនុស្សនៅតំបន់នោះមិនសូវមានអ្នកប្រើប្រាស់ស៊ីមកាតដូចយើង។ លើសពីនេះវាក៏ទាក់ទងទៅនឹងកម្មវិធីទូរស័ព្ទរបស់អ្នកមានបញ្ហា ឬហួសសម័យផងដែរ ដែលនេះអាចបណ្តាលឱ្យការតភ្ជាប់អ៊ីនធឺណិតរបស់អ្នកយឺតជាងមុន។ ទន្ទឹមនឹងនេះឧបករណ៍ចាស់ៗអាចមានកម្រិតគាំទ្រទាបសម្រាប់បច្ចេកវិទ្យាបណ្តាញថ្មី ធ្វើឱ្យល្បឿននៃការតភ្ជាប់កាន់តែយឺត។

បន្ថែមពីលើបញ្ហាទាំងអស់នេះ ពេលខ្លះវាក៏អាចបណ្តាលមកពីអ្នកផ្តល់សេវារបស់យើងផ្ទាល់តែម្តងដូចជា អង់តែនសេវារបស់គេខូច ធ្វើឱ្យស្លូអ៊ីនធឺណិតដល់យើងជាដើម។ ដូច្នេះសម្រាប់វិធីដោះស្រាយ កុំឱ្យអ៊ីនធឺណិតចល័តរបស់យើងដើរយឺត៖
ទីមួយយើងត្រូវពិនិត្យសញ្ញា៖ ប្រសិនបើសញ្ញាខ្សោយ ព្យាយាមផ្លាស់ទីទៅទីតាំងដែលមានសញ្ញាខ្លាំងជាងមុន។
ទីពីរបិទថាមពលឡើងវិញ៖ ពេលខ្លះការចាប់ផ្ដើមឧបករណ៍ឡើងវិញអាចដោះស្រាយបញ្ហាល្អប្រសើរជាងមុន។

ទីបីបិទកម្មវិធីដែលមិនចាំបាច់៖ បិទកម្មវិធីណាមួយដែលអ្នកមិនប្រើប្រាស់ ដើម្បីឱ្យអ៊ីនធឺណិតរបស់យើងដើរលឿន។
ទីបួនទាក់ទងទៅអ្នកផ្តល់សេវារបស់អ្នក៖ ប្រសិនបើបញ្ហាមិនត្រូវបានដោះស្រាយនោះទេ ចូរអ្នកព្យាយាមទាក់ទងទៅក្រុមហ៊ុនស៊ីមកាតរបស់អ្នកដើម្បីទទួលបានជំនួយ។
ទោះជាយ៉ាងណាប្រសិនបើអ្នកឧស្សាហ៍ជួបប្រទះបញ្ហាជាមួយអ៊ីនធឺណិតចល័តយឺតញឹកញាប់ពេក លោកអ្នកប្រហែលជាត្រូវពិចារណាផ្លាស់ប្តូរសេវាកម្មថ្មី ឬប្តូរស៊ីមថ្មីដែលនេះគឺជាជម្រើសចុងក្រោយបំផុត៕

សហរដ្ឋអាមេរិក ៖ សារព័ត៌មានបរទេសរាយការណ៍កាលពីថ្ងៃទី២៦ ខែតុលា ឆ្នាំ២០២៤ ថា ទីក្រុងញូវយ៉ក សហរដ្ឋអាមេរិក បានធ្វើសេចក្តីព្រាងច្បាប់ពាក់ព័ន្ធនឹងសុវត្ថិភាពការងារ និងការឈប់សម្រាកឈឺរបស់បុគ្គលិកក្រុមហ៊ុន ខណៈច្បាប់ចាស់បានអនុញ្ញាតឱ្យបុគ្គលិកអាចសុំច្បាប់ពេលឈឺ និងមើលថែសមាជិកគ្រួសារឈឺប៉ុណ្ណោះ ។ ប៉ុន្តែសេចក្តីព្រាងច្បាប់ថ្មីនេះនឹងអនុញ្ញាតឱ្យបុគ្គលិកអាចសុំច្បាប់មើលថែសត្វចិញ្ចឹមឈឺផងដែរ ។

មតិយល់ស្របនានាបានលើកឡើងក្នុងទស្សនាវដ្តី Newsweek ថា ពលរដ្ឋអាមេរិកនឹងមានឱកាសអនុវត្តច្បាប់ឈឺដើម្បីគាំទ្រការចិញ្ចឹមសត្វ ដែលមានប្រយោជន៍ដល់សុខភាពផ្លូវកាយ និងផ្លូវចិត្តរបស់បុគ្គលិកក្រុមហ៊ុន ។ ការថែទាំសត្វចិញ្ចឹមអាចជួយឱ្យមនុស្សមានសុខភាពផ្លូវកាយ និងផ្លូវចិត្តរឹងមាំ ហើយវាជាគោលបំណងសំខាន់នៃការសុំច្បាប់ឈឺតាំងពីដំបូង ។

តាមការស្រាវជ្រាវបង្ហាញថា ការចិញ្ចឹមសត្វអាចជួយកាត់បន្ថយការតានតឹងផ្លូវចិត្ត ហើយធ្វើឱ្យសុខភាពផ្លូវចិត្តបុគ្គលិកល្អ ។ ក្រៅពីនេះ នៅមានភស្តុតាងផ្សេងទៀតបញ្ជាក់ថា ការចិញ្ចឹមឆ្កែពិតជាអាចកាត់បន្ថយភាពតានតឹងផ្លូវចិត្ត ។

បើច្បាប់ថ្មីនេះត្រូវបានអនុម័ត វានឹងជួយឱ្យពលរដ្ឋនៅទីក្រុងញូវយ៉កចិញ្ចឹមសត្វច្រើន ហើយពួកគេនឹងមានសុខភាពផ្លូវចិត្តល្អជាងមុន ។ តាមទិន្នន័យរបស់សមាគមផលិតផលសត្វចិញ្ចឹមអាមេរិកបង្ហាញថា គ្រួសារអាមេរិកចំនួន២ ក្នុងចំណោម៣គ្រួសារ បានចិញ្ចឹមសត្វក្នុងផ្ទះ ។

បច្ចុប្បន្ន ក្រុមហ៊ុនមួយចំនួនបានអនុវត្តគោលការណ៍ស្រដៀងនេះរួចហើយ ដូចជា ៖ ក្រុមហ៊ុនទីផ្សារ Nina Hale ស្ថិតនៅទីក្រុង Minneapolis បានអនុញ្ញាតឱ្យបុគ្គលិកសុំច្បាប់សម្រាកពីការងារ ដើម្បីយកសត្វចិញ្ចឹមថ្មីមកចិញ្ចឹមបន្ថែមទៀត ។

នៅទីក្រុងញូវយ៉ក បានកំណត់ឱ្យបុគ្គលិកធ្វើការក្នុងក្រុមហ៊ុនធំៗអាចសុំច្បាប់ឈឺ ឬសុំច្បាប់ដោយសារកើតគ្រោះថ្នាក់លើខ្លួនឯង និងសមាជិកគ្រួសារ មិនលើសពី៥៦ម៉ោង ។ ប៉ុន្តែច្បាប់ថ្មីនេះនឹងអនុញ្ញាតឱ្យពួកគេសុំច្បាប់មើលថែសត្វឈឺផងដែរ ដោយសារពលរដ្ឋអាមេរិកយល់ឃើញថា សត្វចិញ្ចឹម គឺជាសមាជិកគ្រួសាររបស់ខ្លួន ។

Bryan Driscoll ជាទីប្រឹក្សាផ្នែកធនធានមនុស្សនិយាយថា សត្វចិញ្ចឹមបានក្លាយជាសមាជិកគ្រួសាររបស់ពលរដ្ឋអាមេរិក ជាពិសេស អ្នករស់នៅកន្លែងស្ត្រេស ដូចជា ៖ ទីក្រុងញូវយ៉ក ។ សត្វចិញ្ចឹមបានធ្វើឱ្យពួកគេមានអារម្មណ៍ល្អ ហើយការអនុញ្ញាតឱ្យបុគ្គលិកមានសិទ្ធិឈប់សម្រាកមើលថែសត្វចិញ្ចឹម គឺជាការយល់ដឹងពីបញ្ហានេះ ហើយធ្វើឱ្យបុគ្គលិកដឹងថា ជីវិតក្រៅពីការងារ ក៏មានសារៈសំខាន់ដូចគ្នា ។

សាស្ត្រាចារ្យផ្នែកហិរញ្ញវត្ថុ ឈ្មោះ Alex Beene មកពីសាកលវិទ្យាល័យ Tennessee ប្រាប់ថា ការថែទាំសត្វចិញ្ចឹមសម័យនេះ បានចំណាយប្រាក់ច្រើនដូចការថែទាំកុមារដែរ មានន័យថា ការសុំច្បាប់ការងារទៅមើលថែសត្វឈឺ គឺអាចជួយសន្សំសំចៃប្រាក់បានច្រើនជាងការយកសត្វទៅឱ្យគ្លីនិកថែទាំ ។

គេរំពឹងថា ច្បាប់នេះនឹងទទួលបានការអនុម័ត និងអនុវត្តនាពេលឆាប់ៗ ពីព្រោះពលរដ្ឋញូវយ៉ករាប់លាននាក់បានចិញ្ចឹមសត្វក្នុងផ្ទះ ហើយពលរដ្ឋគ្រប់គ្នាសង្ឃឹមថា សភានឹងគាំទ្រសេចក្តីព្រាងច្បាប់នេះ ។ ដូច្នេះ បើនាយកក្រុមហ៊ុនអនុញ្ញាតឱ្យបុគ្គលិកទទួលខុសត្រូវព្យាបាលសត្វចិញ្ចឹមរបស់ខ្លួន នឹងធ្វើឱ្យបុគ្គលិកអាចបំពេញការងារកាន់តែមានប្រសិទ្ធភាព ។

គ្រួសារអាមេរិកជាច្រើនបានចាត់ទុកថា ឆ្កែ គឺជាសមាជិកគ្រួសារម្នាក់ ហើយបើឆ្កែពួកគេឈឺត្រូវការវះកាត់ជាបន្ទាន់ គឺធ្វើឱ្យពួកគេពិបាកចិត្តមិនខុសពីកូនចៅឈឺទេ ។ ហេតុនេះ បើបុគ្គលិកក្រុមហ៊ុនពិបាកចិត្ត ពួកគេនឹងបាត់បង់ការតាំងស្មារតី និងគ្មានអារម្មណ៍ធ្វើការ ៕

ប្រទេសស៊ែប៊ី ៖ លោក Dragan និងភរិយាឈ្មោះ Slavica Markovic រស់នៅប្រទេសស៊ែប៊ី (Serbia ស្ថិតនៅតំបន់អឺរ៉ុប) បានបង្កើតគំនិតអាជីវកម្មមួយប្រកបដោយភាពច្នៃប្រឌិតខ្ពស់ គឺការយកក្រដាសកាសែតចាស់ៗមកផលិតជាខ្មៅដៃ ។ លោកបញ្ជាក់ថា ខ្មៅដៃនេះអាចជួយកាត់បន្ថយសំរាម និងជាខ្មៅដៃពុំប៉ះពាល់បរិស្ថាន ។

ចំណុចចាប់ផ្តើមរបស់អាជីវកម្មនេះ កើតឡើងដោយសារតម្រូវការប្រើប្រាស់ខ្មៅដៃកើនឡើង ប៉ុន្តែពេលមើលឃើញថា នៅប្រទេសស៊ែប៊ី គ្មានក្រុមហ៊ុនផលិតខ្មៅដៃ ទើបលោក Dragan និងភរិយាស្រាវជ្រាវរកទិន្នន័យ រហូតដល់រកឃើញវិធីផលិតខ្មៅដៃពីក្រដាសកាសែតចាស់ៗ ។ ហេតុនេះ លោកក៏បង្កើតក្រុមហ៊ុនមួយឈ្មោះ New Pen និងផលិតខ្មៅដៃពីវត្ថុធាតុដើមកែច្នៃពុំប៉ះពាល់បរិស្ថាន ក្នុងនោះមានកាសែតចាស់ជាវត្ថុធាតុដើមចម្បង ។

ការផលិតខ្មៅដៃរបស់ក្រុមហ៊ុន New Pen គឺបានប្រើប្រាស់កម្លាំងពលកម្មមនុស្សភាគច្រើន ដោយចាប់ផ្តើមពីការកាត់ក្រដាសកាសែត រួចហើយយកវាមករុំជុំវិញបណ្តូលខ្មៅដៃធ្វើពីសារធាតុ Graphite ។ បន្ទាប់មក ប្រើប្រាស់គ្រឿងម៉ាស៊ីនដែលក្រុមហ៊ុននេះបានសហការផលិតជាមួយវិស្វករក្នុងតំបន់ ដើម្បីជួយរុំក្រដាសកាសែតជុំវិញខ្មៅដៃ ។

ខ្មៅដៃនឹងត្រូវដាក់ឱ្យស្ងួតតាមធម្មជាតិ ដោយចំណាយពេលប្រមាណ២៤ម៉ោង ឬអាចយូរជាងនេះសម្រាប់រដូវរងា ។ បន្ទាប់មក ដាក់ខ្មៅដៃចូលក្នុងម៉ាស៊ីនកាត់ឱ្យមានប្រវែងស្មើគ្នា គឺ១៧.៥សង់ទីម៉ែត្រ ព្រមទាំងត្រួតពិនិត្យគុណភាព និងដាក់ខ្មៅដៃចូលប្រអប់ដោយបុគ្គលិកជំនាញ ។

បច្ចុប្បន្ន ក្រុមហ៊ុន New Pen បានលក់ខ្មៅដៃនៅប្រទេសស៊ែប៊ីតិចតួច ឬស្មើប្រមាណ៥% ប៉ុណ្ណោះ ។ រីឯខ្មៅដៃ៩៥%ទៀត ក្រុមហ៊ុនបានបញ្ជូនទៅលក់នៅប្រទេសអាល្លឺម៉ង់ ហើយពេលខ្លះ ក្រុមហ៊ុនក៏នាំចេញខ្មៅដៃទៅប្រទេសអូទ្រីស, បែលហ្សិល, ក្រិក, លុចសំបួរ, ហូឡង់ និងប្រទេសផ្សងទៀត ។

ចំណែកគោលដៅនាថ្ងៃអនាគត ក្រុមហ៊ុនដែលមានបុគ្គលិកត្រឹមតែ៨នាក់ នឹងពង្រីកអាជីវកម្មរបស់ខ្លួនបន្ថែមទៀត ក្រោយពីទទួលបានការគាំទ្រផ្នែកហិរញ្ញវត្ថុពីគម្រោងរបស់សហភាពអឺរ៉ុប ដែលតែងតែគាំទ្រការផ្លាស់ប្តូរបរិស្ថាននៅប្រទេសស៊ែប៊ី ។

ក្រុមហ៊ុន New Pen មិនត្រឹមតែផ្តោតលើការផលិតខ្មៅដៃពុំប៉ះពាល់បរិស្ថានប៉ុណ្ណោះទេ ប៉ុន្តែក្រុមហ៊ុនក៏បានអប់រំយុវជនផងដែរ ។ ក្រុមហ៊ុនបានសរសេរសារនៅក្រោយប្រអប់ខ្មៅដៃរៀបរាប់ពីការកែច្នៃខ្មៅដៃ ដែលអាចជួយកាត់បន្ថយការកាត់ដើមឈើ, សន្សំសំចៃថាមពល និងមានសុវត្ថិភាពសម្រាប់អ្នកប្រើប្រាស់ ៕