ប្រទេសដាណឺម៉ាក ៖ អ្នកស្រាវជ្រាវនៅអឺរ៉ុបបានស្រាវជ្រាវពីការបកប្រែភាសាជ្រូក ឬយល់ពីសំឡេងស្រែករបស់វា ដោយការប្រើប្រាស់បច្ចេកវិទ្យា AI ក្នុងគោលដៅបង្កើតឧបករណ៍មួយជួយឱ្យកសិករយល់ពីអត្ថន័យសំឡេងស្រែករបស់ជ្រូក ។ ហេតុនេះ កសិករនឹងអាចកែលម្អវិធីសាស្ត្រចិញ្ចឹម និងថែទាំជ្រូករបស់ខ្លួនឱ្យកាន់តែល្អប្រសើរឡើង ។

វាជាការរកឃើញរបស់ក្រុមអ្នកស្រាវជ្រាវមកពីសាកលវិទ្យាល័យ Copenhagen ប្រទេសដាណឺម៉ាក ដោយក្រុមអ្នកស្រាវជ្រាវបានប្រើប្រាស់ការថតសំឡេងស្រែករបស់ជ្រូក ស្មើជាង៧.០០០ក្បាល ដើម្បីចង់ដឹងថា តើសំឡេងស្រែកនីមួយៗមានន័យដូចម្តេច? ក្រុមអ្នកស្រាវជ្រាវបានបែងចែកសំឡេងជ្រូកនៅតាមទីកន្លែងផ្សេងៗ ដូចជា ៖ ពេលជ្រូកនៅជាមួយមេរបស់វា, សំឡេងកូនជ្រូកបៅដោះមេ, សំឡេងជ្រូកពេលខាំគ្នា និងពេលពួកវាត្រូវបានម្ចាស់លែងពីទ្រុង ជាដើម ។

បន្ទាប់មក ក្រុមអ្នកស្រាវជ្រាវក៏បានបកស្រាយសំឡេងជ្រូកនីមួយៗដោយប្រើប្រាស់បច្ចេកវិទ្យា AI ដោយបញ្ចូលសំឡេងជ្រូកជាមួយអារម្មណ៍, ស្ថានការណ៍នានា, ឥរិយាបថ និងអត្រាចង្វាក់បេះដូង ។ រីឯលទ្ធផលដែលទទួលបាន គឺក្រុមអ្នកស្រាវជ្រាវអាចបញ្ចូលសំឡេងទាំងនេះជាមួយអារម្មណ៍របស់ជ្រូកបាន ។

ជាក់ស្តែង បើជ្រូកស្រែកថ្ងូរខ្លីៗ មានន័យថា វាមានសេចក្តីសុខ ។ រីឯសំឡេងមានប្រេកង់ខ្ពស់ ដូចជា ៖ សំឡេងយំ មានន័យថា ជ្រូកកំពុងតានតឹងផ្លូវចិត្ត ពេលពួកវាមានអារម្មណ៍ថា ឈឺចាប់, ឈ្លោះគ្នា ឬត្រូវបានបំបែកចេញពីគ្នា ។

ក្រៅពីនេះ Algorithm របស់បច្ចេកវិទ្យា AI នឹងបង្ហាញថា សត្វជ្រូកដែលចិញ្ចឹមក្នុងកសិដ្ឋាន ឬជ្រូកចិញ្ចឹមក្រៅទ្រុង ឬជ្រូកចិញ្ចឹមក្នុងទីធ្លាស្រឡះល្អ ដែលជ្រូកទាំងនេះអាចដើរចុះឡើង ឬកាយដីបាន គឺពួកវានឹងមានភាពតានតឹងផ្លូវចិត្ត តិចជាងជ្រូកដែលចិញ្ចឹមយ៉ាងមានសុវត្ថិភាព ។

Elodie Mandel-Briefer គឺជាអ្នកស្រាវជ្រាវផ្នែកឥរិយាបថនៅសាកលវិទ្យាល័យ Copenhagen ប្រទេសដាណឺម៉ាក និងជាប្រធានក្រុមស្រាវជ្រាវបកប្រែភាសាជ្រូក និយាយថា គោលដៅរបស់ Algorithm នៃបច្ចេកវិទ្យា AI ដែលបង្កើតឡើងនេះ គឺដើម្បីជួយឱ្យកសិករដឹងថា ជ្រូករបស់ពួកគេកំពុងមានអារម្មណ៍បែបណា ។ វានឹងជួយឱ្យកសិករយល់ពីភាសា និងឥរិយាបថជ្រូក ដើម្បីដោះស្រាយបញ្ហាចំគោលដៅ ។

នាថ្ងៃអនាគត បច្ចេកវិទ្យានេះនឹងត្រូវបានអភិវឌ្ឍន៍ជាកម្មវិធីក្នុងអ៊ីនធើរណេត សម្រាប់ឱ្យកសិករកាន់តែងាយស្រួលប្រើប្រាស់ ។ ក្រៅពីនេះ បើទទួលបានទិន្នន័យគ្រប់គ្រាន់ ក្រុមអ្នកស្រាវជ្រាវនៅប្រទេសដាណឺម៉ាកនឹងយកបច្ចេកវិទ្យានេះទៅបកប្រែភាសាសត្វផ្សេងទៀត ដែលចិញ្ចឹមកូនដោយទឹកដោះ ៕

ប្រទេសថៃ ៖ កាលពីថ្ងៃទី២៤ ខែតុលា ឆ្នាំ២០២៤ សារព័ត៌មានថៃរាយការណ៍ថា វាពិតជាធ្វើឱ្យពលរដ្ឋថៃភ្ញាក់ផ្អើលយ៉ាងខ្លាំង ក្រោយពីមន្ត្រីជំនាញបានចុះត្រួតពិនិត្យគុណភាពបន្លែ ផ្លែឈើនៅទីក្រុងបាងកក និងតំបន់ជុំវិញ ហើយរកឃើញធាតុពុលរហូតដល់៥០ប្រភេទក្នុងផ្លែទំពាំងបាយជូរ Shine Muscat ។

មន្ត្រីជំនាញបញ្ជាក់ថា បានយកផ្លែទំពាំងបាយជូរ Shine Muscat ទៅត្រួតពិនិត្យឃើញថា ផ្លែទំពាំងបាយជូរស្ទើរទាំងអស់មានផ្ទុកសារធាតុពុលលើសកម្រិតស្តង់ដារ ។ បច្ចុប្បន្ន មន្ត្រីជំនាញបានបង្កើនការប្រុងប្រយ័ត្ន និងបន្តត្រួតពិនិត្យបន្លែ ផ្លែឈើ ដើម្បីផ្តល់សុវត្ថិភាពដល់អ្នកបរិភោគ ។

ខាងមូលនិធិសម្រាប់អ្នកបរិភោគ បានសហការជាមួយបណ្តាញដាស់តឿនសារធាតុគីមីក្នុងថ្នាំកម្ចាត់សត្វល្អិត, ទស្សនាវដ្តីទិញដោយការវ័យឆ្លាត និងស្ថាប័នពាក់ព័ន្ធ ដោយប្រមូលផ្លែទំពាំងបាយជូរប្រភេទនេះដែលដាក់លក់ក្នុងទីក្រុងបាងកក និងតំបន់ជុំវិញទៅត្រួតពិនិត្យឃើញថា វាផ្ទុកសារធាតុពុល ។

និពន្ធនាយកទស្សនាវដ្តីទិញដោយការវ័យឆ្លាត និយាយថា ខាងមូលនិធិសម្រាប់អ្នកបរិភោគ និងទស្សនាវដ្តីទិញដោយការវ័យឆ្លាត បានសហការគ្នាត្រួតពិនិត្យគុណភាពផលិតផល និងសេវាកម្មជាយូរមកហើយ ។ អតិថិជនរាយការណ៍ថា ទំពាំងបាយជូរ Shine Muscat ដែលដាក់លក់ពេញទីក្រុងបាងកក មានកម្មវិធីពិសេសទាក់ទាញអតិថិជន ដូចជា ៖ ការបញ្ចុះតម្លៃ និងទិញ១ប្រអប់ ថែមជូន១ប្រអប់ ។

លើសពីនេះ ទំពាំងបាយជូរ Shine Muscat ត្រូវបានដាក់លក់គ្រប់ទីកន្លែង ដូចជា ៖ ហាងតូចតាច, ផ្សារទំនើបធំៗ, ហាងលក់ទំនិញ, រទេះរុញតាមផ្លូវ និងលក់តាមអនឡាញ ។ អតិថិជនមួយចំនួនបារម្ភថា តើទំពាំងបាយជូរនេះបានផ្ទុកសារធាតុពុលដែរឬទេ? ហេតុនេះ ទស្សនាវដ្តីទិញដោយការវ័យឆ្លាត បានស្នើទៅបណ្តាញដាស់តឿនសារធាតុគីមីក្នុងថ្នាំកម្ចាត់សត្វល្អិត រួមគ្នាត្រួតពិនិត្យសារធាតុពុលក្នុងទំពាំងបាយជូរ ។

ចំណែកលទ្ធផលត្រួតពិនិត្យរកឃើញថា ផ្លែទំពាំងបាយជូរ ដែលក្រុមការងារយកទៅត្រួតពិនិត្យ៩៥,៨% គឺមានផ្ទុកសារធាតុពុលលើសកម្រិតស្តង់ដាររហូតដល់៥០ប្រភេទ ហើយការកម្ចាត់សារធាតុពុលទាំងនេះចេញពីផ្លែទំពាំងបាយជូរ គឺពុំមែនជារឿងងាយស្រួលឡើយ ។

ក្រុមមន្ត្រីជំនាញបានសំណូមពរទៅកាន់ហាងលក់ទំនិញ និងផ្សារទំនើបនានានៅទីក្រុងបាងកក ដែលបានលក់ផ្លែទំពាំងបាយជូរប្រភេទនេះ ត្រូវតែទទួលខុសត្រូវ ដូចជា ៖ ប្រមូលទំពាំងបាយជូរចេញពីធ្នើរលក់អីវ៉ាន់ និងលុបចោលការនាំចូលទំពាំងបាយជូរពីផ្នែកផ្គត់ផ្គង់ និងទីតាំងផលិតទំពាំងបាយជូរ ។

ក្រៅពីនេះ ហាងលក់ទំនិញ, ផ្សារទំនើប និងអាជីវករលក់ផ្លែទំពាំងបាយជូរទាំងអស់ ត្រូវតែបញ្ជាក់ពីប្រភពរបស់វាឱ្យបានច្បាស់លាស់ ឬបញ្ជាក់ថា នាំចូលពីប្រទេសណា ដើម្បីអាចត្រួតពិនិត្យរកសារធាតុពុលនាពេលក្រោយ ។

គួរបញ្ជាក់ថា ទំពាំងបាយជូរ Shine Muscat មានផ្លែពណ៌បៃតង គ្មានគ្រាប់ ហើយអតិថិជនចូលចិត្តបរិភោគ ដោយសារវាមានរសជាតិផ្អែម និងក្លិនក្រអូបខុសពីទំពាំងបាយជូរផ្សេងៗ ។ ប៉ុន្តែក្រោយការរកឃើញសារធាតុពុលរហូតដល់៥០ប្រភេទក្នុងទំពាំងបាយជូរ ដែលដាក់លក់នៅទីក្រុងបាងកក និងតំបន់ជុំវិញ បានធ្វើឱ្យមហាជនចាប់អារម្មណ៍យ៉ាងខ្លាំង ៕

ប្រទេសកូរ៉េខាងជើង ៖ ស្ថានភាពរស់នៅរបស់ពលរដ្ឋកូរ៉េខាងជើង គឺជាការចាប់អារម្មណ៍របស់ពលរដ្ឋនៅលើពិភពលោករហូតមក ហើយមតិមួយចំនួននិយាយថា ពលរដ្ឋកូរ៉េខាងជើងរស់នៅមានសេចក្តីសុខ ដោយសាររដ្ឋាភិបាលបានចាត់ចែងអ្វីៗគ្រប់យ៉ាង ប៉ុន្តែមតិខ្លះទៀតយល់ឃើញផ្សេងពីនេះ ។ តើយើងធ្លាប់ឆ្ងល់ទេថា តើស្ថានភាពរស់នៅរបស់ពលរដ្ឋកូរ៉េខាងជើងមានសភាពដូចម្តេច?

Sohu គឺជាគេហទំព័ររបស់ចិនរាយការណ៍ថា ប្រាក់ចំណូលប្រចាំឆ្នាំជាមធ្យមរបស់ពលរដ្ឋកូរ៉េខាងជើង គឺស្មើប្រមាណ ១.២១៨ដុល្លារអាមេរិក ហើយក្នុងសង្គមកូរ៉េខាងជើង គឺពលរដ្ឋទទួលបានចំណូលស្មើៗគ្នា មានន័យថា ចំណូលរបស់អ្នកមាន និងចំណូលអ្នកក្រ គឺពុំសូវខុសគ្នាច្រើនទេ ។ ប្រាក់ចំណូលភាគច្រើនរបស់ពលរដ្ឋកូរ៉េខាងជើង គឺស្មើចាប់ពី ៧១៥ដុល្លារ ទៅ ១.៤៣៣ដុល្លារអាមេរិកក្នុងឆ្នាំ ។

ប្រទេសកូរ៉េខាងជើងបានអនុវត្តប្រព័ន្ធបែងចែកលំនៅឋាន ហើយពលរដ្ឋទូទៅពុំចាំបាច់ស្វែងរកផ្ទះ ឬរកប្រាក់ដើម្បីទិញផ្ទះ ដូចពលរដ្ឋរស់នៅប្រទេសផ្សេងទេ ដោយសាររដ្ឋាភិបាលកូរ៉េខាងជើងនឹងស្វែងរកផ្ទះឱ្យពលរដ្ឋរស់នៅតាមតួនាទីការងារ និងស្ថានភាពគ្រួសារនីមួយៗ ។ បើទោះជាផ្ទះទាំងនេះមិនធំទូលាយ ឬមិនប្រណីតក្តី ប៉ុន្តែវាគ្រប់គ្រាន់សម្រាប់បំពេញតម្រូវការពលរដ្ឋ ហើយពួកគេពុំប្រឈមនឹងសម្ពាធបង់ឈ្នួលផ្ទះទេ ។

ចំណែកការអប់រំវិញ គឺកូរ៉េខាងជើងមានប្រព័ន្ធអប់រំឥតគិតថ្លៃ ហើយកុមារគ្រប់រូបស្ថិតក្នុងវ័យសិក្សាអាចចុះឈ្មោះចូលរៀនបាន ។ នៅកូរ៉េខាងជើងគ្មានបញ្ហារឿងកុមារបោះបង់ការសិក្សាដោយសារគ្រួសារមានជីវភាពខ្វះខាតទេ ហើយកម្រិតការសិក្សានៅតាមតំបន់នីមួយៗ គឺដូចៗគ្នាទាំងអស់ ។

រីឯការធ្វើការរបស់ពលរដ្ឋនៅកូរ៉េខាងជើង គឺរដ្ឋាភិបាលនឹងស្វែងរកការងារឱ្យពួកគេតាមតម្រូវការសង្គម និងការស្ទាត់ជំនាញរបស់បុគ្គលម្នាក់ៗ ដូចជា ៖ កម្មករត្រូវតែធ្វើការក្នុងរោងចក្រ រីឯកសិករត្រូវតែធ្វើស្រែចម្ការនៅជនបទ ។ ការអនុវត្តបែបនេះបានធ្វើឱ្យអត្រាគ្មានការងារធ្វើនៅកូរ៉េខាងជើងទាបខ្លាំង ហើយពលរដ្ឋពុំចាំបាច់បារម្ភពីការស្វែងរកការងារធ្វើ ។

មតិមួយចំនួនលើកឡើងថា ការដឹកនាំប្រទេសនៅកូរ៉េខាងជើងបានធ្វើឱ្យពលរដ្ឋពុំបារម្ភពីការទិញផ្ទះ, ការសិក្សា និងរកការងារធ្វើ ហើយពួកគេអាចរស់នៅ និងធ្វើការយ៉ាងរីករាយ ។ ប៉ុន្តែមតិផ្សេងទៀតយល់ឃើញថា ការអនុវត្តរបស់រដ្ឋាភិបាលកូរ៉េខាងជើង គឺជាការបិទឱកាសកុំឱ្យពលរដ្ឋរបស់ខ្លួនអភិវឌ្ឍន៍សមត្ថភាព ឬជំនាញ ព្រមទាំងខ្វះការលើកទឹកចិត្តក្នុងការប្រកួតប្រជែង និងច្នៃប្រឌិត ៕

ទស្សនាវដ្ដី National Geographic ដ៏ល្បីល្បាញមួយរបស់អាមេរិក បានដាក់ឈ្មោះទីក្រុងបាងកកប្រទេសថៃក្នុងបញ្ជីគោលដៅទេសចរណ៍ល្អបំផុតដែលអ្នកគួរទៅលេងនៅឆ្នាំ ២០២៥។ គេហទំព័រនេះបានពិពណ៌នាថា ទីក្រុងបាងកក ប្រទេសថៃគឺមានការរួមបញ្ចូលគ្នាដ៏អស្ចារ្យនៃបុរាណ និងសម័យ។ ជាមួយអគារខ្ពស់កប់ពពក មានទីតាំងនៅជិតមជ្ឈមណ្ឌលផ្សារទំនើប និងសណ្ឋាគារលំដាប់ខ្ពស់។ ទីក្រុងបាងកកក៏ល្បីល្បាញសម្រាប់ការតាំងពិពណ៌សិល្បៈបុរាណ និងការរចនា ហើយក៏ជាគោលដៅកំពូលសម្រាប់អ្នកទេសចរជុំវិញពិភពលោក ដែលចង់ស្វែងយល់ពីបេតិកភណ្ឌវប្បធម៌ដ៏សម្បូរបែបរបស់ប្រទេសថៃផងដែរ។

ប្រសិនបើធ្វើដំណើរទៅកាន់ទីក្រុងបាងកកនាពេលខាងមុខនេះ អ្នកជំនាញបានណែនាំឱ្យអ្នកទេសចរស្វែងយល់ពីវត្ត Chaiwatthanaram ដែលជាប្រាសាទពុទ្ធសាសនាត្រូវបានសាងសង់ក្នុងសតវត្សទី ១៧ និងអគារដែលរងការខូចខាតយ៉ាងខ្លាំងក្រោយទឹកជំនន់ឆ្នាំ ២០១១ កំពុងស្ថិតក្នុងការជួសជុលឡើងវិញ រួមទាំងការស្កែន 3D នៃរចនាសម្ព័ន្ធទាំងមូល និងការសាងសង់ជញ្ជាំងទឹកជំនន់ដើម្បីថែរក្សាប្រាសាទផងដែរ។ ក្រៅពីទីក្រុងបាងកកប្រទេសថៃ តំបន់ Raja Ampat ប្រទេសឥណ្ឌូណេស៊ីក៏ជាកន្លែងដ៏ល្អបំផុតសម្រាប់ភ្ញៀវទេសចរក្នុងការរុករកប្រព័ន្ធអេកូឡូស៊ីសមុទ្រដែលកំពុងរីកចម្រើនផងដែរ។

អ្នកជំនាញនៅ National Geographic បានប្រដូចតំបន់ Raja Ampat ទៅនឹងអច្ឆរិយៈក្រោមទឹក ដែលមានផ្កាថ្មប្រហែល ៥០០ ប្រភេទ ត្រីថ្មប៉ប្រះទឹកជាង ១,០០០ ប្រភេទ និងសត្វផ្សេងៗទៀតដូចជា manta rays និងត្រីឆ្លាមសេះបង្កង់ជាដើម។ ទន្ទឹមនឹងនេះ ទីក្រុង Antigua ក្នុងប្រទេស Guatemala នៃទ្វីបអាមេរិកកណ្តាល ក៏មានភាពល្បីល្បាញដោយសារភ្នំភ្លើងសកម្ម Volcan de Fuego ទៀតផង។ លើសពីនេះ ហ្គ្រីនលែន ដែលជាទឹកដីស្វយ័តរបស់ដាណឺម៉ាក ក៏ជាគោលដៅទាក់ទាញបំផុតផងដែរនៅឆ្នាំ ២០២៥ ខាងមុខនេះ។

ទោះបីជាកន្លែងនេះពិបាកទៅដល់ ព្រោះវាព័ទ្ធជុំវិញដោយទឹកកកអាកទិកក៏ដោយ អ្នកជំនាញនៅ National Geographic បានណែនាំថា អាកាសយានដ្ឋានអន្តរជាតិថ្មីក្នុងរដ្ឋធានី Nuuk ដែលត្រូវបានកែលម្អ ក៏ដូចជាបានបើកដំណើរការតាំងពីឆ្នាំ ២០២១ អាចជួយភ្ញៀវទេសចរទៅកាន់កោះដ៏ធំបំផុតរបស់ពិភពលោកបានយ៉ាងមានសុវត្ថិភាព ដោយអ្នកទស្សនាអាចឃើញផ្ទាំងទឹកកកយក្សនៅទីនោះ ឬស្វែងយល់អំពីវប្បធម៌ Inuit នៃជនជាតិដើមភាគតិច៕