ប្រទេសជប៉ុន ៖ ជប៉ុន គឺជាប្រទេសមួយដែលមានពលរដុ្ឋអាយុវែងជាងគេលើពិភពលោក ប៉ុន្តែអ្វីគួរឱ្យចាប់អារម្មណ៍នោះ គឺនៅជប៉ុន មិនមែនមានតែពលរដ្ឋទេដែលអាយុវែង ប៉ុន្តែឆ្កែក៏អាយុវែងដែរ ។ ហេតុនេះ ជប៉ុនបានប្រមូលឆ្កែចាស់ៗមករស់នៅក្នុងមណ្ឌលថែទាំឆ្កែ ដើម្បីទទួលបានការថែទាំយ៉ាងល្អ ។

តាំងពីឆ្នាំ២០១០ ឆ្កែនៅជប៉ុនមានអាយុវែងជាងមុនប្រមាណជិត១ឆ្នាំ ប៉ុន្តែអាយុឆ្កែកើនឡើងនេះ មិនគួរឱ្យភ្ញាក់ផ្អើលដូចអាយុឆ្កែនាពេលបច្ចុប្បន្នទេ (គឺឆ្នាំ២០២៤) ។ បច្ចុប្បន្ន ឆ្កែនៅជប៉ុនមានអាយុរហូតដល់១៥ឆ្នាំ ខណៈឆ្កែនៅប្រទេសផ្សេងទៀតមានអាយុចាប់ពី១០ឆ្នាំ ទៅ១៣ឆ្នាំប៉ុណ្ណោះ ។

ឆ្កែ១ក្បាល ក្នុងចំណោម៣ក្បាលនៅប្រទេសជប៉ុន បានរស់នៅក្នុងជម្រកបណ្តោះអាសន្ន ដោយសារម្ចាស់របស់ពួកវាចាស់ជរា និងពុំអាចចិញ្ចឹមថែទាំបន្តទៀតបាន ហើយក៏បង្ខំចិត្តឱ្យឆ្កែរស់នៅក្នុងជម្រកបណ្តោះអាសន្ន ។ ហេតុនេះ ឆ្កែជាច្រើនក្បាលបានមករស់នៅជម្រកបណ្តោះអាសន្នរហូតដល់អស់ជីវិត ដោយសារពួកវាមានអាយុច្រើន និងគ្មានអ្នកណាចង់យកទៅចិញ្ចឹម ។

ប៉ុន្តែរយៈពេល១០ឆ្នាំកន្លងមក ជប៉ុនក៏ចាប់ផ្តើមដោះស្រាយបញ្ហានេះ ហើយនៅឆ្នាំ២០២៤ ជប៉ុនបានបង្កើតមណ្ឌលថែទាំឆ្កែចាស់ៗ ដែលស្រដៀងនឹងមណ្ឌលថែទាំមនុស្សចាស់ដែរ ។ រីឯថ្លៃថែទាំឆ្កែ គឺចាប់ពី១.២១២ដុល្លារ ទៅ១.៥១៥ដុល្លារអាមេរិកក្នុង១ខែ ប៉ុន្តែនេះជាតម្លៃថ្លៃសម្រាប់ម្ចាស់ឆ្កែមួយចំនួន ។

កាលពីឆ្នាំ២០១៩ ក៏មានការបង្កើតជម្រកបណ្តោះអាសន្នសម្រាប់ចិញ្ចឹមឆ្កែអាយុច្រើន និងទុកឱ្យពលរដ្ឋចាស់ៗនៅជប៉ុនយកឆ្កែចាស់ទៅចិញ្ចឹម ។ ករណីម្ចាស់ឆ្កែស្លាប់មុនឆ្កែ គឺឆ្កែទាំងនេះអាចត្រឡប់មករស់នៅក្នុងជម្រកបណ្តោះអាសន្នវិញ ។ ការបង្កើតជម្រកបណ្តោះអាសន្ន និងគម្រោងចិញ្ចឹមឆ្កែនេះ គឺជាការផ្តល់ឱកាសឱ្យឆ្កែចាស់អាយុច្រើនម្តងទៀត ដើម្បីឱ្យវាមានម្ចាស់ថ្មីដែលមានអាយុច្រើន ឬមនុស្សចាស់ឯកាចង់ចិញ្ចឹមឆ្កែ ។

វាហាក់ដូចជារឿងល្អសម្រាប់មនុស្សចាស់ និងឆ្កែចាស់នៅជប៉ុននាពេលបច្ចុប្បន្ន ហើយអាចធ្វើឱ្យមនុស្សចាស់នៅជប៉ុនមានសុខភាពល្អ និងរស់នៅបានយូរ ពីព្រោះបើតាមការស្រាវជ្រាវនៅជប៉ុនកាលពីឆ្នាំ២០២២ បង្ហាញថា អ្នកចិញ្ចឹមឆ្កែ ពួកគេនឹងមានសុខភាពល្អ និងអាយុវែងជាងអ្នកមិនចិញ្ចឹមឆ្កែ ។

ហេតុនេះ ឆ្កែក៏ទទួលបានប្រយោជន៍ ហើយចំនួនឆ្កែត្រូវគេធ្វើបាបក៏បានធ្លាក់ចុះប្រមាណ២សែនក្បាលក្នុង១ឆ្នាំ កាលពីឆ្នាំ២០០៨ ។ បច្ចុប្បន្ន ឆ្កែត្រូវគេធ្វើបាបនៅសល់មិនដល់៤ម៉ឺនក្បាលក្នុង១ឆ្នាំ ៕

ប្រទេសជប៉ុន ៖ ពលរដ្ឋក្នុងបណ្តាប្រទេសអាស៊ានមួយចំនួននិយមប្រើប្រាស់សម្ភារៈជជុះនាំចូលពីជប៉ុន ហើយពួកគេពុំបានជ្រាបពីប្រភពរបស់វាទេ ។ ប្រព័ន្ធផ្សព្វផ្សាយដ៏ល្បីរបស់ជប៉ុនបានបង្ហាញឱ្យឃើញថា តើជប៉ុនប្រមូលសម្ភារៈជជុះទាំងនេះមកពីណាសម្រាប់នាំចេញទៅក្រៅប្រទេស ដូចជា ៖ ថៃ និងកម្ពុជា ។ ពេលបានជ្រាបពីប្រភពរបស់វាហើយ ធ្វើឱ្យអ្នកប្រើប្រាស់សម្ភារៈជជុះជប៉ុនព្រឺសម្បុរមិនតិចនាក់ទេ ។

ប្រព័ន្ធផ្សព្វផ្សាយជប៉ុនឈ្មោះ ANN News បានថតផ្ទះឈើចាស់មួយកន្លែងស្ថិតនៅទីក្រុងសាប់បូរ៉ូ របស់ហុកកៃដូ ដែលកោះដ៏ធំបំផុតទី២ របស់ជប៉ុន និងបង្ហាញពីប្រភពសម្ភារៈជជុះជប៉ុន ដែលបញ្ជូនទៅលក់នៅក្រៅប្រទេស ។

លោក Minato Gendo អាយុ៤៨ឆ្នាំ ជាម្ចាស់ក្រុមហ៊ុនកែច្នៃសម្ភារៈចាស់ៗនៅហុកកៃដូ និយាយថា ការងាររបស់លោក គឺសម្អាតផ្ទះដែលម្ចាស់ផ្លាស់ប្តូរទីលំនៅ ។ ក្នុងផ្ទះចាស់នីមួយៗតែងតែមានសម្ភារៈមានតម្លៃជាច្រើនអាចលក់ទៅក្រៅប្រទេសបាន ។ រីឯប្រទេសដែលជប៉ុនបញ្ជូនសម្ភារៈជជុះទៅច្រើនជាងគេ គឺថៃ ដោយសារថៃចូលចិត្តប្រើប្រាស់សម្ភារៈជប៉ុន ។

ជាក់ស្តែង កង្ហារជជុះជប៉ុន គឺជាផលិតផលមួយក្នុងចំណោមផលិតផលដែលលក់ដាច់បំផុតនៅប្រទេសថៃ គឺមានតម្លៃចាប់ពី៣ពាន់យ៉េន ទៅ៤ម៉ឺនយ៉េន ។ បើទោះជាកង្ហារខ្លះពុំទទួលបានការពេញនិយមនៅជប៉ុនក្តី ប៉ុន្តែមានអ្នកត្រូវការវាយ៉ាងច្រើននៅថៃ ។

ក្រៅពីនេះ លោក Minato ក៏មានតួនាទីចាត់ចែងរឿងកេរ្តិ៍មរតករបស់ពលរដ្ឋជប៉ុនដែលស្លាប់ផងដែរ ពីព្រោះជាទូទៅ កូនចៅអ្នកស្លាប់ តែងតែផ្លាស់ប្តូរទីលំនៅ និងលក់សម្ភារៈចាស់ៗនៅសេសសល់ ។ លោកនិយាយថា ៖ «សម្ភារៈប្រមាណ៧៥% អាចបញ្ជូនទៅលក់នៅថៃ ដូចជា តុអាហារ, កៅអី, តុក្កតា, សាឡុង, នាឡិកា និងគ្រឿងសង្ហារិមផ្សេងៗ» ។

លោកបញ្ជាក់ថា សម្ភារៈជជុះដែលជប៉ុនបញ្ជូនទៅលក់នៅថៃ និងប្រទេសផ្សេងទៀត គឺភាគច្រើនជាសម្ភារៈរបស់ពលរដ្ឋជប៉ុនដែលស្លាប់ ឬជារបស់គ្រួសារជប៉ុន ដោយសារពួកគេឈប់ប្រើប្រាស់ ។ ជប៉ុនបានបញ្ជូនសម្ភារៈជជុះមកប្រទេសថៃ តាមរយៈកុងទឺន័រដឹកតាមសមុទ្រមានចម្ងាយជាង ៥.០០០គីឡូម៉ែត្រ ។

ទោះយ៉ាងណា មិនមែនគ្រប់សម្ភារៈជជុះជប៉ុន សុទ្ធតែជារបស់ពលរដ្ឋជប៉ុនដែលស្លាប់ទេ ប៉ុន្តែសម្ភារៈមួយចំនួនទៀត គឺជារបស់ពលរដ្ឋជប៉ុនដែលមានបញ្ហាជំពាក់បំណុល ហើយពួកគេក៏ប្រកាសលក់សម្ភារៈរបស់ខ្លួនយកប្រាក់សំណងបំណុល ។

ចុះលោកអ្នកវិញ ធ្លាប់ទិញសម្ភារៈជជុះនាំចូលពីប្រទេសជប៉ុនដែរឬទេ? បើធ្លាប់ទិញ តើសម្ភារៈជជុះជប៉ុនមានគុណភាពល្អដែរអត់? ហើយតម្លៃវិញថោក ឬថ្លៃ?

ប្រទេសបូលីវី ៖ ពន្ធនា.គារសាន់ប៉េដ្រូ (San Pedro Prison) ស្ថិតនៅប្រទេសបូលីវី ក្រៅពីមានទំហំធំបំផុតក្នុងប្រទេសហើយ គឺត្រូវបានគេចាត់ទុកថា ជាពន្ធនា.គារ ដ៏ប្លែកបំផុតនៅលើពិភពលោក ។ អ្នកទោ.សនៅទីនេះ បានរស់នៅជាសង្គម ហើយពួកគេគ្រប់គ្រង និងចាត់ការអ្វីៗដោយខ្លួនឯងទាំងអស់ ។

ចំណែកឆ្មាំពន្ធនាគារមានតួនាទីត្រឹមតែការពារនៅបរិវេណខាងក្រៅមិនឱ្យអ្នកទោសរួចគេចខ្លួនប៉ុណ្ណោះ ហើយឆ្មាំពន្ធនាគារនឹងពុំចូលមកក្នុងបរិវេណពន្ធនាគារទេ ។

អ្នកទោសជាប់ក្នុងពន្ធនាគារនេះបានរស់នៅជាសង្គមមួយ ហើយអ្នកទោសបរិភោគអាហារដែលក្រុមគ្រួសារពួកគេបញ្ជូនមកពីខាងក្រៅ ។ រដ្ឋាភិបាលបូលីវីនឹងពុំផ្តល់អ្វីឱ្យពួកគេទេ ហើយសូម្បីតែបន្ទប់ឃុំឃាំងក៏គ្មានសម្រាប់អ្នកទោសដែរ គឺអ្នកទោសត្រូវចំណាយប្រាក់ទិញបន្ទប់ឃុំឃាំងដោយខ្លួនឯង ។

ក្នុងពន្ធនាគារនេះមានក្លិបរាត្រី, ភោជនីយដ្ឋាន, ហាងលក់ទំនិញ និងហាងកាត់សក់ ហើយអ្នកទោសអាចប្រកបមុខរបរផ្សេងៗបាន ដូចជា ៖ ធ្វើជាបុគ្គលិករត់តុ, Bartender, ចុងភៅ, ឈ្មួញកណ្តាលទិញ-លក់អចលនទ្រព្យ និងធ្វើសមត្ថកិច្ចទទួលខុសត្រូវក្នុងពន្ធនាគារ ។

អ្នកទោសគ្រប់រូបមានសេរីភាពអាចធ្វើអ្វីៗបានទាំងអស់ ដូចជា ៖ ប្រកបមុខរបរ និងលេងកីឡា ។ ហេតុនេះ វាធ្វើឱ្យអ្នកទោសមួយចំនួនទទួលបានប្រាក់ចំណូលច្រើន និងមានឥទ្ធិពលយ៉ាងខ្លាំងក្នុងពន្ធនាគារ ។

កត្តាទាំងនេះបានធ្វើឱ្យមានការបែងចែកឋានៈក្នុងពន្ធនាគារ ក្នុងនោះអ្នកទោសដែលមានប្រាក់ចំណូលច្រើននឹងអាចបរិភោគអាហារឆ្ងាញ់ៗ និងរស់នៅស្រួល ហើយពួកគេអាចចំណាយប្រាក់ទិញបន្ទប់ឃុំឃាំងទំនើប ដែលពោរពេញទៅដោយសម្ភារៈប្រើប្រាស់គ្រប់យ៉ាង ។ ផ្ទុយទៅវិញ អ្នកទោសមានឋានៈក្រីក្រត្រូវថែទាំខ្លួនឯងក្នុងពន្ធនាគារ ។

ចំណុចគួរឱ្យចាប់អារម្មណ៍ជាងនេះ គឺពន្ធនាគារសាន់ប៉េដ្រូ បានអនុញ្ញាតឱ្យអ្នកទោសនាំក្រុមគ្រួសាររបស់ខ្លួនមករស់នៅជាមួយដែរ ។ អ្នកទោសជាច្រើនបានរស់នៅជាមួយភរិយា និងកូនៗក្នុងពន្ធនាគារ រហូតធ្វើឱ្យពន្ធនាគារនេះក្លាយជាមជ្ឈមណ្ឌលអប់រំកុមារ ឬកុមារអាចចេញពីពន្ធនាគារទៅសាលារៀនជារៀងរាល់ថ្ងៃ ។

ក្រៅពីនេះ ដោយសារពន្ធនាគារសាន់ប៉េដ្រូ ប្លែកបំផុតនៅលើពិភពលោក ទើបធ្វើឱ្យទីនេះ ទទួលស្វាគមន៍ភ្ញៀវទេសចរអាចចូលទស្សនាពន្ធនាគារ ដែលមានមគ្គុទ្ទេសក៍ទេសចរនាំផ្លូវ ហើយមគ្គុទ្ទេសក៍ទេសចរ គឺជាអ្នកទោសក្នុងពន្ធនាគារ ៕

ប្រទេសបារាំង ៖ ហ្វេសប៊ុកទទួលបានការពេញនិយមពីមនុស្សគ្រប់វ័យនៅលើពិភពលោក ដោយសារវាផ្តល់នូវចំណេះដឹងសម្បូរបែប, អាចចែករំលែកព័ត៌មាន រូបភាព និងវីដេអូយ៉ាងឆាប់រហ័សទាំងក្នុងប្រទេស និងក្រៅប្រទេស ។ លើសពីនេះ ហ្វេសប៊ុកបានក្លាយជាបណ្តាញសង្គមសម្រាប់ទំនាក់ទំនងគ្នាយ៉ាងទូលំទូលាយផងដែរ មិនថាអ្នកប្រើប្រាស់រស់នៅកន្លែងណាទេ ។

ប៉ុន្តែក្រុមអ្នកស្រាវជ្រាវមកពីមជ្ឈមណ្ឌលស្រាវជ្រាវនយោបាយ នៃវិទ្យាស្ថានសិក្សានយោបាយនៅទីក្រុងប៉ារីស ប្រទេសបារាំង លើកឡើងថា ការឈប់លេងហ្វេសប៊ុក នឹងធ្វើឱ្យមានសេចក្តីសុខជាងមុន ។ ប៉ុន្តែនឹងធ្វើឱ្យចំណេះដឹងផ្នែកនយោបាយធ្លាក់ចុះ ឬពុំដឹងព័ត៌មាននយោបាយស្រុកទេស ។

ទោះយ៉ាងណា ការឈប់លេងហ្វេសប៊ុក ពុំបានធ្វើឱ្យប៉ះពាល់ដល់ការប្រកាន់និន្នាការនយោបាយរបស់បុគ្គលម្នាក់ៗទេ ។ ការស្រាវជ្រាវនេះបានសាកសួរសំណួរទៅកាន់មនុស្សជាង ២.២០០នាក់ ក្នុងអំឡុងពេលបោះឆ្នោតជ្រើសរើសប្រធានាធិបតីបារាំង កាលពីឆ្នាំ២០២២ ។ អ្នកចូលរួមការស្ទង់មតិនេះស្មើពាក់កណ្តាលបានផ្អាកលេងហ្វេសប៊ុករបស់ខ្លួនរយៈពេល១ខែ ក្នុងអំឡុងពេលបោះឆ្នោតជ្រើសរើសប្រធានាធិបតីបារាំង ។

នៅពេលបញ្ចប់ការស្ទង់មតិ ក្រុមអ្នកឈប់លេងហ្វេសប៊ុកនិយាយថា ពួកគេមានសេចក្តីសុខ, ទទួលបានជោគជ័យ ព្រមទាំងពេញចិត្តនឹងជីវិតរបស់ខ្លួន ខ្លាំងជាងក្រុមអ្នកលេងហ្វេសប៊ុក ។ ប៉ុន្តែក្រុមអ្នកឈប់លេងហ្វេសប៊ុក បែរជាទទួលបានចំណេះពីផ្នែកនយោបាយតិចជាងមុន ។

ចំណុចគួរឱ្យចាប់អារម្មណ៍ ការតម្រូវឱ្យអ្នកចូលរួមស្ទង់មតិឈប់លេងហ្វេសប៊ុក គឺពុំប៉ះពាល់ដល់ចំណេះដឹងពាក់ព័ន្ធនឹងកីឡា និងការកម្សាន្តទេ ។ ការរកឃើញនេះស្របនឹងគំនិតថា បណ្តាញសង្គម ជាពិសេស ហ្វេសប៊ុក បានផ្តល់ព័ត៌មានផ្នែកនយោបាយដោយពុំចាំបាច់ស្វែងរក ។

ក្រៅពីនេះ ក្រុមអ្នកស្រាវជ្រាវរកឃើញទៀតថា ការឈប់លេងហ្វេសប៊ុក គឺពុំប៉ះពាល់ដល់ការប្រកាន់និន្នាការនយោបាយ, មនោគមវិជ្ជា និងការបែងចែកក្នុងសង្គមទេ ៕

ប្រទេសថៃ៖ កោះ “Koh Kham” ដែលជាកោះឯកជនមានទេសភាពស្រស់ស្អាតបំផុត ស្ថិតក្នុងខេត្តត្រាតប្រទេសថៃ ស្រាប់តែប្រកាសដាក់លក់ភ្លាមៗក្នុងប្រព័ន្ធផ្សព្វផ្សាយសង្គម ជាមួយតម្លៃមិននឹកស្មានដល់។
យោងតាមគេហទំព័របរទេស Khaosod English ការប្រកាសដាក់លក់ភ្លាមៗនេះបានបង្កឱ្យមានការភ្ញាក់ផ្អើលយ៉ាងខ្លាំង និងបង្កជាចម្ងល់ថា តើកោះនេះដាក់លក់ពិតមែនឬយ៉ាងណា? បើតាមមន្ត្រីមូលដ្ឋានបញ្ជាក់ថា កោះនេះគឺជាការលក់ពិតប្រាកដ ក្នុងតម្លៃ ១,៨ ពាន់លានបាត (ប្រមាណ ៥៣,២ លានដុល្លារអាមេរិក)។

ស្របពេលដែលប្រទេសជាច្រើនកំពុងប្រឈមបញ្ហាវិបត្តិសេដ្ឋកិច្ចក្នុងវិស័យអចលនទ្រព្យ កោះដ៏តូចមួយនេះស្រាប់តែប្រកាសដាក់លក់ក្នុងតម្លៃខ្ពស់មិនគួរឱ្យជឿ។ ទោះជាយ៉ាងណាតម្លៃខាងលើនេះគឺបានរួមបញ្ជូនទាំងរមណីយដ្ឋានដែលកំពុងស្ថិតនៅក្នុងដំណាក់ការសាងសង់មួយកន្លែងផងដែរ។ លក្ខណៈពិសេសលេចធ្លោរបស់ Ko Kham ក្រៅពីភាពស្រស់ស្អាតធម្មជាតិរបស់វា គឺឆ្នេរពណ៌សដ៏បរិសុទ្ធរបស់វាលាតសន្ធឹងជាង ៣០០ ម៉ែត្រ។

វាជាកោះមួយក្នុងចំណោមកោះផ្កាយរណបចំនួនប្រាំបួននៃ Ko Mak ដែលជារឿយៗត្រូវបានភ្ញៀវទេសចរហៅថា “Emerald of the Trat Sea” ដោយសារតែទឹកពណ៌បៃតងត្បូងមរកត។ កោះនេះមានច្រាំងសមុទ្រប្រវែង ៣០០ ម៉ែត្រនៅភាគខាងកើត និងខាងត្បូង ដោយមានភ្នំ និងច្រាំងថ្មចោទនៅសងខាង។ ជាមួយនឹងឆ្នេរខ្សាច់សស្អាត សមុទ្រទឹកថ្លា និងថ្មភ្នំភ្លើង រៀបចំដូចរូបចម្លាក់ធម្មជាតិ ដែលមានផ្ទៃដីសរុបចំនួន ១,៦ ហិចតា រុំព័ទ្ធដោយព្រៃឈើយ៉ាងក្រាស់ កោះប្រណីតមួយនេះមានម្ចាស់តែម្នាក់គត់កំពុងគ្រប់គ្រង។

គួរបញ្ជាក់ដែរថា កោះខាំ គឺជាកោះមួយក្នុងចំណោមកោះដ៏ស្រស់ស្អាតបំផុតទាំង ១០ របស់ប្រទេសថៃ ដែលត្រូវបានត្រួតពិនិត្យជាញឹកញាប់ដោយអ្នកមានឥទ្ធិពល។ កោះនេះស្ថិតនៅចម្ងាយប្រហែល ៣៥ គីឡូម៉ែត្រពីឆ្នេរសមុទ្រ ឡាមង៉ប ក្នុងខេត្តត្រាត ជិតកោះម៉ាក់ ចម្ងាយត្រឹមតែ ១ គីឡូម៉ែត្រ អាចចូលបានដោយទូកល្បឿនលឿនក្នុងរយៈពេល ៣០-៤០ នាទី៕