សហរដ្ឋអាមេរិក ៖ សារព័ត៌មានបរទេសរាយការណ៍កាលពីថ្ងៃទី២៦ ខែតុលា ឆ្នាំ២០២៤ ថា ទីក្រុងញូវយ៉ក សហរដ្ឋអាមេរិក បានធ្វើសេចក្តីព្រាងច្បាប់ពាក់ព័ន្ធនឹងសុវត្ថិភាពការងារ និងការឈប់សម្រាកឈឺរបស់បុគ្គលិកក្រុមហ៊ុន ខណៈច្បាប់ចាស់បានអនុញ្ញាតឱ្យបុគ្គលិកអាចសុំច្បាប់ពេលឈឺ និងមើលថែសមាជិកគ្រួសារឈឺប៉ុណ្ណោះ ។ ប៉ុន្តែសេចក្តីព្រាងច្បាប់ថ្មីនេះនឹងអនុញ្ញាតឱ្យបុគ្គលិកអាចសុំច្បាប់មើលថែសត្វចិញ្ចឹមឈឺផងដែរ ។

មតិយល់ស្របនានាបានលើកឡើងក្នុងទស្សនាវដ្តី Newsweek ថា ពលរដ្ឋអាមេរិកនឹងមានឱកាសអនុវត្តច្បាប់ឈឺដើម្បីគាំទ្រការចិញ្ចឹមសត្វ ដែលមានប្រយោជន៍ដល់សុខភាពផ្លូវកាយ និងផ្លូវចិត្តរបស់បុគ្គលិកក្រុមហ៊ុន ។ ការថែទាំសត្វចិញ្ចឹមអាចជួយឱ្យមនុស្សមានសុខភាពផ្លូវកាយ និងផ្លូវចិត្តរឹងមាំ ហើយវាជាគោលបំណងសំខាន់នៃការសុំច្បាប់ឈឺតាំងពីដំបូង ។

តាមការស្រាវជ្រាវបង្ហាញថា ការចិញ្ចឹមសត្វអាចជួយកាត់បន្ថយការតានតឹងផ្លូវចិត្ត ហើយធ្វើឱ្យសុខភាពផ្លូវចិត្តបុគ្គលិកល្អ ។ ក្រៅពីនេះ នៅមានភស្តុតាងផ្សេងទៀតបញ្ជាក់ថា ការចិញ្ចឹមឆ្កែពិតជាអាចកាត់បន្ថយភាពតានតឹងផ្លូវចិត្ត ។

បើច្បាប់ថ្មីនេះត្រូវបានអនុម័ត វានឹងជួយឱ្យពលរដ្ឋនៅទីក្រុងញូវយ៉កចិញ្ចឹមសត្វច្រើន ហើយពួកគេនឹងមានសុខភាពផ្លូវចិត្តល្អជាងមុន ។ តាមទិន្នន័យរបស់សមាគមផលិតផលសត្វចិញ្ចឹមអាមេរិកបង្ហាញថា គ្រួសារអាមេរិកចំនួន២ ក្នុងចំណោម៣គ្រួសារ បានចិញ្ចឹមសត្វក្នុងផ្ទះ ។

បច្ចុប្បន្ន ក្រុមហ៊ុនមួយចំនួនបានអនុវត្តគោលការណ៍ស្រដៀងនេះរួចហើយ ដូចជា ៖ ក្រុមហ៊ុនទីផ្សារ Nina Hale ស្ថិតនៅទីក្រុង Minneapolis បានអនុញ្ញាតឱ្យបុគ្គលិកសុំច្បាប់សម្រាកពីការងារ ដើម្បីយកសត្វចិញ្ចឹមថ្មីមកចិញ្ចឹមបន្ថែមទៀត ។

នៅទីក្រុងញូវយ៉ក បានកំណត់ឱ្យបុគ្គលិកធ្វើការក្នុងក្រុមហ៊ុនធំៗអាចសុំច្បាប់ឈឺ ឬសុំច្បាប់ដោយសារកើតគ្រោះថ្នាក់លើខ្លួនឯង និងសមាជិកគ្រួសារ មិនលើសពី៥៦ម៉ោង ។ ប៉ុន្តែច្បាប់ថ្មីនេះនឹងអនុញ្ញាតឱ្យពួកគេសុំច្បាប់មើលថែសត្វឈឺផងដែរ ដោយសារពលរដ្ឋអាមេរិកយល់ឃើញថា សត្វចិញ្ចឹម គឺជាសមាជិកគ្រួសាររបស់ខ្លួន ។

Bryan Driscoll ជាទីប្រឹក្សាផ្នែកធនធានមនុស្សនិយាយថា សត្វចិញ្ចឹមបានក្លាយជាសមាជិកគ្រួសាររបស់ពលរដ្ឋអាមេរិក ជាពិសេស អ្នករស់នៅកន្លែងស្ត្រេស ដូចជា ៖ ទីក្រុងញូវយ៉ក ។ សត្វចិញ្ចឹមបានធ្វើឱ្យពួកគេមានអារម្មណ៍ល្អ ហើយការអនុញ្ញាតឱ្យបុគ្គលិកមានសិទ្ធិឈប់សម្រាកមើលថែសត្វចិញ្ចឹម គឺជាការយល់ដឹងពីបញ្ហានេះ ហើយធ្វើឱ្យបុគ្គលិកដឹងថា ជីវិតក្រៅពីការងារ ក៏មានសារៈសំខាន់ដូចគ្នា ។

សាស្ត្រាចារ្យផ្នែកហិរញ្ញវត្ថុ ឈ្មោះ Alex Beene មកពីសាកលវិទ្យាល័យ Tennessee ប្រាប់ថា ការថែទាំសត្វចិញ្ចឹមសម័យនេះ បានចំណាយប្រាក់ច្រើនដូចការថែទាំកុមារដែរ មានន័យថា ការសុំច្បាប់ការងារទៅមើលថែសត្វឈឺ គឺអាចជួយសន្សំសំចៃប្រាក់បានច្រើនជាងការយកសត្វទៅឱ្យគ្លីនិកថែទាំ ។

គេរំពឹងថា ច្បាប់នេះនឹងទទួលបានការអនុម័ត និងអនុវត្តនាពេលឆាប់ៗ ពីព្រោះពលរដ្ឋញូវយ៉ករាប់លាននាក់បានចិញ្ចឹមសត្វក្នុងផ្ទះ ហើយពលរដ្ឋគ្រប់គ្នាសង្ឃឹមថា សភានឹងគាំទ្រសេចក្តីព្រាងច្បាប់នេះ ។ ដូច្នេះ បើនាយកក្រុមហ៊ុនអនុញ្ញាតឱ្យបុគ្គលិកទទួលខុសត្រូវព្យាបាលសត្វចិញ្ចឹមរបស់ខ្លួន នឹងធ្វើឱ្យបុគ្គលិកអាចបំពេញការងារកាន់តែមានប្រសិទ្ធភាព ។

គ្រួសារអាមេរិកជាច្រើនបានចាត់ទុកថា ឆ្កែ គឺជាសមាជិកគ្រួសារម្នាក់ ហើយបើឆ្កែពួកគេឈឺត្រូវការវះកាត់ជាបន្ទាន់ គឺធ្វើឱ្យពួកគេពិបាកចិត្តមិនខុសពីកូនចៅឈឺទេ ។ ហេតុនេះ បើបុគ្គលិកក្រុមហ៊ុនពិបាកចិត្ត ពួកគេនឹងបាត់បង់ការតាំងស្មារតី និងគ្មានអារម្មណ៍ធ្វើការ ៕

ប្រទេសស៊ែប៊ី ៖ លោក Dragan និងភរិយាឈ្មោះ Slavica Markovic រស់នៅប្រទេសស៊ែប៊ី (Serbia ស្ថិតនៅតំបន់អឺរ៉ុប) បានបង្កើតគំនិតអាជីវកម្មមួយប្រកបដោយភាពច្នៃប្រឌិតខ្ពស់ គឺការយកក្រដាសកាសែតចាស់ៗមកផលិតជាខ្មៅដៃ ។ លោកបញ្ជាក់ថា ខ្មៅដៃនេះអាចជួយកាត់បន្ថយសំរាម និងជាខ្មៅដៃពុំប៉ះពាល់បរិស្ថាន ។

ចំណុចចាប់ផ្តើមរបស់អាជីវកម្មនេះ កើតឡើងដោយសារតម្រូវការប្រើប្រាស់ខ្មៅដៃកើនឡើង ប៉ុន្តែពេលមើលឃើញថា នៅប្រទេសស៊ែប៊ី គ្មានក្រុមហ៊ុនផលិតខ្មៅដៃ ទើបលោក Dragan និងភរិយាស្រាវជ្រាវរកទិន្នន័យ រហូតដល់រកឃើញវិធីផលិតខ្មៅដៃពីក្រដាសកាសែតចាស់ៗ ។ ហេតុនេះ លោកក៏បង្កើតក្រុមហ៊ុនមួយឈ្មោះ New Pen និងផលិតខ្មៅដៃពីវត្ថុធាតុដើមកែច្នៃពុំប៉ះពាល់បរិស្ថាន ក្នុងនោះមានកាសែតចាស់ជាវត្ថុធាតុដើមចម្បង ។

ការផលិតខ្មៅដៃរបស់ក្រុមហ៊ុន New Pen គឺបានប្រើប្រាស់កម្លាំងពលកម្មមនុស្សភាគច្រើន ដោយចាប់ផ្តើមពីការកាត់ក្រដាសកាសែត រួចហើយយកវាមករុំជុំវិញបណ្តូលខ្មៅដៃធ្វើពីសារធាតុ Graphite ។ បន្ទាប់មក ប្រើប្រាស់គ្រឿងម៉ាស៊ីនដែលក្រុមហ៊ុននេះបានសហការផលិតជាមួយវិស្វករក្នុងតំបន់ ដើម្បីជួយរុំក្រដាសកាសែតជុំវិញខ្មៅដៃ ។

ខ្មៅដៃនឹងត្រូវដាក់ឱ្យស្ងួតតាមធម្មជាតិ ដោយចំណាយពេលប្រមាណ២៤ម៉ោង ឬអាចយូរជាងនេះសម្រាប់រដូវរងា ។ បន្ទាប់មក ដាក់ខ្មៅដៃចូលក្នុងម៉ាស៊ីនកាត់ឱ្យមានប្រវែងស្មើគ្នា គឺ១៧.៥សង់ទីម៉ែត្រ ព្រមទាំងត្រួតពិនិត្យគុណភាព និងដាក់ខ្មៅដៃចូលប្រអប់ដោយបុគ្គលិកជំនាញ ។

បច្ចុប្បន្ន ក្រុមហ៊ុន New Pen បានលក់ខ្មៅដៃនៅប្រទេសស៊ែប៊ីតិចតួច ឬស្មើប្រមាណ៥% ប៉ុណ្ណោះ ។ រីឯខ្មៅដៃ៩៥%ទៀត ក្រុមហ៊ុនបានបញ្ជូនទៅលក់នៅប្រទេសអាល្លឺម៉ង់ ហើយពេលខ្លះ ក្រុមហ៊ុនក៏នាំចេញខ្មៅដៃទៅប្រទេសអូទ្រីស, បែលហ្សិល, ក្រិក, លុចសំបួរ, ហូឡង់ និងប្រទេសផ្សងទៀត ។

ចំណែកគោលដៅនាថ្ងៃអនាគត ក្រុមហ៊ុនដែលមានបុគ្គលិកត្រឹមតែ៨នាក់ នឹងពង្រីកអាជីវកម្មរបស់ខ្លួនបន្ថែមទៀត ក្រោយពីទទួលបានការគាំទ្រផ្នែកហិរញ្ញវត្ថុពីគម្រោងរបស់សហភាពអឺរ៉ុប ដែលតែងតែគាំទ្រការផ្លាស់ប្តូរបរិស្ថាននៅប្រទេសស៊ែប៊ី ។

ក្រុមហ៊ុន New Pen មិនត្រឹមតែផ្តោតលើការផលិតខ្មៅដៃពុំប៉ះពាល់បរិស្ថានប៉ុណ្ណោះទេ ប៉ុន្តែក្រុមហ៊ុនក៏បានអប់រំយុវជនផងដែរ ។ ក្រុមហ៊ុនបានសរសេរសារនៅក្រោយប្រអប់ខ្មៅដៃរៀបរាប់ពីការកែច្នៃខ្មៅដៃ ដែលអាចជួយកាត់បន្ថយការកាត់ដើមឈើ, សន្សំសំចៃថាមពល និងមានសុវត្ថិភាពសម្រាប់អ្នកប្រើប្រាស់ ៕

យុវជនម្នាក់បានប្រទះឃើញជណ្តើរអាថ៌កំបាំងនៅកណ្តាលព្រៃ ក៏សម្រេចចិត្តដើរតាមជណ្តើរនេះ ហើយមានអារម្មណ៍ថា ផ្លូវចុះជណ្តើរគួរឱ្យព្រឺសម្បុរយ៉ាងខ្លាំង ។ ក្រោយមក យុវជននេះក៏បានឃើញផ្លូវរូងក្រោមដីពោរពេញទៅដោយបន្ទប់អាថ៌កំបាំង និងឮសំឡេងប្លែកៗរហូតដល់ទ្រាំលែងបាន និងប្រញាប់រត់ចេញក្រៅវិញ ។

កាលពីថ្ងៃទី២៣ ខែតុលា ឆ្នាំ២០២៤ គេហទំព័រ Ladbible រាយការណ៍ថា អ្នកលេងបណ្តាញសង្គម TikTok ម្នាក់ឈ្មោះ @joshtheintern បានបង្ហោះវីដេអូមួយគួរឱ្យព្រឺសម្បុរ ដោយយុវជនក្លាហាននេះឈ្មោះ Josh បានសម្រេចចិត្តស្វែងរកការពិតក្នុងជណ្តើរអាថ៌កំបាំងមួយនៅកណ្តាលព្រៃ ។ វីដេអូនេះល្បីល្បាញយ៉ាងខ្លាំង រហូតចំនួនចូលទស្សនាស្មើរហូតដល់១៨លានលើក ។

យុវជនឈ្មោះ Josh គឺជាអ្នកបង្កើតមាតិកាស្រាវជ្រាវពីទីកន្លែងប្លែកៗនៅជុំវិញពិភពលោក ហើយយុវជននេះតែងតែធ្វើអ្វីដែលអ្នកដទៃពុំហ៊ានធ្វើ ។ ការធ្វើមាតិកាផ្សេងៗ គឺលោក Josh បានប្រើប្រាស់ Google Earth ដើម្បីស្វែងរកទីកន្លែងព្រឺសម្បុរ រួចហើយក៏ចេញទៅស្រាវជ្រាវនៅកន្លែងជាក់ស្តែង ប៉ុន្តែវីដេអូនេះបានធ្វើឱ្យលោកព្រឺសម្បុរយ៉ាងខ្លាំង ។

ក្នុងវីដេអូ លោក Josh រៀបរាប់ថា ៖ «ខ្ញុំពុំបានតាំងចិត្តពីមុនថា រកឃើញទីកន្លែងនេះ» ។ លោកនិយាយថា លោកបានឃើញផ្លូវចុះជណ្តើរដែលត្រូវគេបោះបង់ចោលនៅក្នុងព្រៃ ហើយលោកក៏បានដើរតាមជណ្តើរនេះចុះទៅក្រោម ស្រាប់តែឃើញផ្លូវរូងក្រោមដីយ៉ាងវែង និងមានបន្ទប់សម្ងាត់ ។ វាជាកន្លែងគ្មានមនុស្សរស់នៅ និងគួរឱ្យព្រឺសម្បុរបំផុត បើធៀបនឹងកន្លែងដែលលោកធ្លាប់ស្រាវជ្រាវ ។

ការចុះតាមកាំជណ្តើរទៅផ្នែកខាងក្រោម គឺលោកត្រូវឆ្លងកាត់ឧបសគ្គ ដូចជា ៖ មែកឈើ និងដើមឈើ ដែលគ្របដណ្តប់ពេញផ្លូវដើរ ហើយបើគ្មានពិល គឺលោកពុំអាចដឹងថា នៅផ្នែកខាងក្រោមមានអ្វីខ្លះទេ ។ ពេលលោកចុះតាមជណ្តើរមកដល់ផ្នែកក្រោមបំផុតឃើញថា វាងងឹតយ៉ាងខ្លាំង ហើយលោកក៏បញ្ចាំងពិល និងចុះទៅក្រោមដីកាន់តែជ្រៅ ស្រាប់តែឃើញទ្វារដែកបើកចំហមានជណ្តើរ១ជាន់ទៀត ហើយអាចឱ្យលោកចុះក្នុងដីកាន់តែជ្រៅ ។

ពេលលោកចុះមកដល់ផ្នែកក្រោមបំផុត លោកបានឃើញស្នាមជើងជាច្រើននៅលើជញ្ជាំងផ្លូវរូងក្រោមដី ហើយពេលលោកដើរមើលបន្ថែមទៀតឃើញថា ផ្លូវរូងក្រោមដីនេះមានសភាពទ្រុឌទ្រោម និងតភ្ជាប់ទៅបន្ទប់ទទេជាច្រើន ។ លោកពុំដឹងថា តើវាជាកន្លែងអ្វីទេ ហើយលោកក៏សម្រេចចិត្តដើរទៅមុខទៀតដើម្បីស្វែងរកតម្រុយបន្ថែម ។

ពេលដើរទៅមុខបានមួយសន្ទុះ លោកបានឃើញទ្វារពណ៌បៃតង ហើយពេលបើកទ្វារបន្ទប់ ស្រាប់តែឃើញក្នុងបន្ទប់ទឹកលិច ។ ក្រៅពីនេះ មានសម្ភារៈចាស់ៗច្រែះ និងពុំដឹងថា វាជាអ្វី ។ ហេតុនេះ លោកក៏បន្តដំណើរទៅមុខទៀត ហើយក៏ឃើញបន្ទប់មួយក្រាលការ៉ូពណ៌ស លោកសន្និដ្ឋានថា វាជាបន្ទប់ទឹក ។

ពេលលោកដើរជិតដល់ចុងផ្លូវរូងក្រោមដី លោកក៏លែងចង់ដើរបន្តទៀត ហើយចង់ត្រឡប់មកផ្នែកខាងលើវិញ ដោយសារលោកទុកកាបូបនៅមាត់ផ្លូវចូល (លើដី) ។ ភ្លាមនោះ លោកមានអារម្មណ៍ភ្ញាក់ផ្អើលបន្តិច ពេលបានឮសំឡេងអាថ៌កំបាំងនៅទីនោះ ។

លោកបន្តថា នៅចុងផ្លូវរូងក្រោមដីមានបន្ទប់មួយចំនួន ហើយមើលទៅទ្វារបន្ទប់ មានស្លាកស្លាមដូចជាត្រូវគ្រាប់បែកផ្ទុះ ខណៈក្នុងបន្ទប់វិញ មានតែធ្នើរដាក់សៀវភៅ ។ បន្ទាប់មក លោកបានឃើញជណ្តើរ១ទៀតសម្រាប់ឡើងទៅផ្នែកខាងលើ ហើយលោកប្រាប់ថា ៖ «ខ្ញុំមិនដឹងថា ទីនេះ ធ្លាប់ជាកន្លែងអ្វីទេ ប៉ុន្តែមិនថាវាជាកន្លែងអ្វី ឡឺវាត្រូវការរក្សាភាពសម្ងាត់» ។

ក្រោយពីវីដេអូនេះត្រូវបានផ្សព្វផ្សាយក្នុងបណ្តាញសង្គមឃើញថា មានមនុស្សជាច្រើនចាប់អារម្មណ៍ និងចូលបញ្ចេញមតិ ។ មតិខ្លះបារម្ភពីខ្យល់នៅផ្នែកខាងក្រោម ខណៈមតិខ្លះទៀតពុំគាំទ្រឱ្យទៅកន្លែងនេះតែម្នាក់ឯងទេ ពីព្រោះវាគ្រោះថ្នាក់ខ្លាំង ហើយគ្មានអ្នកណាម្នាក់ដឹងថា ត្រូវជួបរឿងអ្វីខ្លះ ៕

ប្រទេសឥណ្ឌា ៖ North Sentinel Island គឺជាកោះមួយក្នុងចំណោមប្រជុំកោះ Andaman នៅឈូងសមុទ្របេងហ្គាល់ភាគខាងជើងមហាសមុទ្រឥណ្ឌា និងស្ថិតក្រោមការគ្រប់គ្រងរបស់ប្រទេសឥណ្ឌា ។ កោះនេះមានឆ្នេរខ្សាច់ពណ៌ស និងហ៊ុព័ទ្ធដោយទឹកសមុទ្រពណ៌ខៀវថ្លា ដែលនៅបាតសមុទ្រមានផ្កាថ្ម និងសត្វសមុទ្រជាច្រើនប្រភេទ ។

ទេសភាពនៅជុំវិញកោះស្រស់ស្អាតយ៉ាងខ្លាំង និងប្រៀបដូចជាតំបន់ទេសចរណ៍ដ៏ពេញនិយមសម្រាប់គូស្វាមី-ភរិយាទើបតែរៀបការថ្មីៗមក Honeymoon ។ ប៉ុន្តែកោះនេះបានក្លាយជាតំបន់គ្រោះថ្នាក់សម្រាប់ភ្ញៀវទេសចរ រហូតដល់មានបម្រាមហាមភ្ញៀវទេសចរចូលក្បែរកោះទៀតផង ដោយសារកោះនេះជាកន្លែងរស់នៅរបស់ជនជាតិ Sentinel ហើយគេបានដាក់ឈ្មោះជនជាតិនេះថា «ក្រុមកុលសម្ព័ន្ធគ្រោះថ្នាក់បំផុតលើពិភពលោក» ។

ក្រុមកុលសម្ព័ន្ធ Sentinel ស្ថិតក្នុងចំនួនក្រុមកុលសម្ព័ន្ធតិចតួចប៉ុណ្ណោះលើពិភពលោក ដែលគ្មានទំនាក់ទំនងជាមួយពិភពខាងក្រៅ ។ ពួកគេរស់នៅដោយឯកោបំផុត, បដិសេធទទួលយកការរីកចម្រើនពីពិភពខាងក្រៅ និងជាក្រុមកុលសម្ព័ន្ធមានគ្រោះថ្នាក់បំផុត ។ ពួកគេនិយាយភាសារបស់ខ្លួន ដែលមនុស្សផ្សេងស្តាប់មិនយល់ ទើបធ្វើឱ្យការស្រាវជ្រាវពាក់ព័ន្ធនឹងក្រុមកុលសម្ព័ន្ធនេះមានតែបន្តិចបន្តួចប៉ុណ្ណោះ ហើយគ្មានឯកសារបញ្ជាក់ថា តើក្រុមកុលសម្ព័ន្ធមានចំនួនប៉ុន្មាននាក់រស់នៅលើកោះ? តើពួកគេហៅខ្លួនឯងថាអ្វី?

ពួកកុលសម្ព័ន្ធទាំងនេះប្រុងប្រយ័ត្នខ្លួនជានិច្ចពេលឃើញភ្ញៀវទេសចរមកលេងកោះ ដោយសារពួកគេគ្មានទំនាក់ទំនងជាមួយពិភពខាងក្រៅសោះ ។ ភ្ញៀវទេសចរភាគច្រើនដឹងថា ពួកកុលសម្ព័ន្ធមិនចង់រាប់អាន ឬស្វាគមន៍មនុស្សប្លែកមុខទេ ពីព្រោះកន្លងមក ភ្ញៀវទេសចរ ឬអ្នករស់នៅក្រៅកោះបានព្យាយាមទំនាក់ទំនងជាមួយពួកគេជាច្រើនលើក ប៉ុន្តែទទួលឆ្លើយតបវិញគួរឱ្យភ័យខ្លាច ។

ហេតុនេះ ការមកកម្សាន្តនៅ North Sentinel ត្រូវបានចាត់ទុកថា ខុសច្បាប់ ហើយរដ្ឋាភិបាលឥណ្ឌាបានហាមឃាត់ភ្ញៀវទេសចរ ឬអ្នកស្រាវជ្រាវធ្វើដំណើរមកជុំវិញកោះនេះប្រមាណ៩គីឡូម៉ែត្រ ដោយសារខ្លាចមានគ្រោះថ្នាក់ ។ រដ្ឋាភិបាលឥណ្ឌាបានព្យាយាមទាក់ទងចងសម្ព័ន្ធភាពជាមួយពួកគេតាំងពីឆ្នាំ១៩៦០ មកម៉្លេះ ប៉ុន្តែគ្មានការឆ្លើយតបឡើយ ទើបរដ្ឋាភិបាលឥណ្ឌាបញ្ជូនផ្លែដូង, តុក្កតា និងភួយដណ្តប់ទៅឱ្យពួកគេ ដោយដាក់នៅលើឆ្នេរខ្សាច់ ។

គួរបញ្ជាក់ថា ក្រុមកុលសម្ព័ន្ធរស់នៅលើកោះ North Sentinel បានធ្វើដំណើរមកពីទ្វីបអាហ្វ្រិក និងនាំគ្នាមករស់នៅកោះនេះអស់រយៈពេលជាង៦ម៉ឺនឆ្នាំ ។ រីឯចំនួនក្រុមកុលសម្ព័ន្ធគ្មានឯកសារបញ្ជាក់ច្បាស់លាស់ទេ ប៉ុន្តែគេសន្និដ្ឋានថា អាចមានចាប់ពី៣០០នាក់ ទៅ៥០០នាក់ ៕

សហរដ្ឋអាមេរិក ៖ យើងបានជ្រាបហើយថា ឧស្ម័នផ្ទះកញ្ចក់ ជាពិសេស ឧស្ម័នកាបូននឹងធ្វើឱ្យសីតុណ្ហភាពលើពិភពលោកកើនឡើងខ្ពស់ ។ អង្គការសហប្រជាជាតិ (UN) ទើបតែប្រកាសថា បើប្រទេសនានានៅតែពុំដោះស្រាយបញ្ហាពិភពលោកក្តៅទេនោះ វានឹងធ្វើឱ្យសីតុណ្ហភាពជាមធ្យមលើពិភពលោក កើនឡើងរហូតដល់៣,១អង្សារសេ និងកើនឡើងលើសកម្រិតការរីកចម្រើនក្នុងវិស័យឧស្សាហកម្ម ។

នៅពេលសីតុណ្ហភាពលើពិភពលោកកើនឡើងខ្ពស់នឹងធ្វើឱ្យប្រទេសនានារងគ្រោះដោយសារគ្រោះធម្មជាតិ ដូចជា ៖ ភ្លៀងធ្លាក់ខ្លាំងជាបន្តបន្ទាប់បណ្តាលឱ្យមានទឹកជំនន់ធ្ងន់ធ្ងរ និងប៉ះពាល់ដល់ការបង្កបង្កើនផលដំណាំនៅគ្រប់តំបន់ ។

កាលពីថ្ងៃទី២៤ ខែតុលា ឆ្នាំ២០២៤ សារព័ត៌មាន CBS News រាយការណ៍ថា និស្សិតមកពី University of California, Berkeley នៅសហរដ្ឋអាមេរិក បានបង្កើតម្សៅពណ៌លឿងពិសេស ដែលអាចស្រូបយកឧស្ម័នកាបូនចេញពីខ្យល់បាន ។ អ្នកស្រាវជ្រាវបញ្ជាក់ថា វាអាចក្លាយជាកូនសោរដ៏សំខាន់ដែលធ្វើឱ្យមនុស្សអាចតស៊ូជាមួយបញ្ហាពិភពលោកក្តៅ ។

លោក ជីវវ៉ូ ចូ (Zihou Zhou) ជានិស្សិតសិក្សាថ្នាក់បរិញ្ញាបត្រ ឆ្នាំទី៤ ផ្នែកគីមីនៅ University of California, Berkeley សហរដ្ឋអាមេរិក បានបោះពុម្ពលទ្ធផលការស្រាវជ្រាវពីការកាត់បន្ថយកំដៅផែនដី ក្នុងទស្សនាវដ្តី Nature ដែលមានខ្លឹមសារថា ពេលខ្យល់ផ្ទុកឧស្ម័នកាបូនឆ្លងកាត់តម្រងមានម្សៅពណ៌លឿងនេះ នឹងធ្វើឱ្យកម្រិតឧស្ម័នកាបូនធ្លាក់ចុះមកស្មើសូន្យភ្លាមៗ ។

សារធាតុនៅក្នុងម្សៅពណ៌លឿងនេះ គឺជាសមាសធាតុគីមីមានឈ្មោះថា (Covalent Organic Framework / COF) ។ រីឯវិធីសាកល្បង គឺលោក ជីវវ៉ូ ចូ បានស្រូបយកឧស្ម័នផ្សេងៗចូលក្នុងតម្រង ដូចជា ៖ នីដ្រូជែន, អុកស៊ីសែន និងកាបូនឌីអុកស៊ីត បន្ទាប់មក ខ្យល់ដែលឆ្លងកាត់តម្រង វានឹងលេចឡើងនៅខាងក្រៅបន្ទប់ពិសោធន៍ ។ ខ្យល់ដែលភាយចេញទៅក្រៅនេះ ត្រូវបានស្រូបយកឧស្ម័នកាបូនរួចអស់ហើយ ។

ម្សៅពិសេសនេះអាចប្រើប្រាស់បានរាប់រយដងឯណោះ ហើយអ្នកស្រាវជ្រាវ ព្រមទាំងសាស្ត្រាចារ្យមានតួនាទីជាទីប្រឹក្សាមកពី University of California, Berkeley មានគម្រោងយកម្សៅពិសេសទៅប្រើប្រាស់ក្នុងផ្នែកឧស្សាហកម្ម ដូចជា ៖ រោងចក្រផ្សេងៗ ។ ពួកគេចាត់ទុកថា នេះជាគន្លឹះថ្មីមួយជួយឱ្យពិភពលោក អាចដោះស្រាយបញ្ហាការឡើងកំដៅដោយសន្សឹមៗ ៕