ប្រទេសជប៉ុន ៖ អភិបាលក្រុងតូក្យូមានគម្រោងស្នើទៅរដ្ឋសភា ដើម្បីឱ្យមន្ត្រីរាជការក្នុងទីក្រុងនេះធ្វើការត្រឹមតែ៤ថ្ងៃប៉ុណ្ណោះក្នុង១សប្តាហ៍ ដែលជាផ្នែកមួយនៃការព្យាយាមលើកទឹកចិត្តឱ្យពលរដ្ឋមានម៉ោងការងារបត់បែន និងបង្កើនអត្រាកំណើត ។ នេះបើតាមការផ្សព្វផ្សាយរបស់សារព័ត៌មានបរទេស កាលពីថ្ងៃទី៤ ខែធ្នូ ឆ្នាំ២០២៤ ។

ហេតុនេះ ដើម្បីឱ្យពលរដ្ឋមានតុល្យភាពរវាងការងារ និងជីវិតរស់នៅកាន់តែល្អប្រសើរ លោកស្រី Yuriko Koike អភិបាលក្រុងតូក្យូ នឹងស្នើទៅរដ្ឋសភាដើម្បីឱ្យមន្ត្រីរាជការក្នុងទីក្រុងនេះមានជម្រើសក្នុងការងារ ដោយគ្រោងកាត់បន្ថយពេលវេលាធ្វើការក្នុង១សប្តាហ៍ គិតចាប់ពីខែមេសា ឆ្នាំ២០២៥ តទៅ ។

មន្ត្រីទទួលខុសត្រូវផ្នែកបុគ្គលិកក្នុងទីក្រុងតូក្យូ ឱ្យដឹងថា មន្ត្រីរាជការគ្រប់រូប (លើកលែងតែបុគ្គលិកធ្វើការឆ្លាស់គ្នា) អាចឈប់សម្រាកចំនួន៣ថ្ងៃក្នុង១សប្តាហ៍ ប៉ុន្តែពួកគេត្រូវបំពេញការងារឱ្យបាន១៥៥ម៉ោងក្នុង១ខែ ។ រីឯអ្នកត្រូវថែទាំកូននៅផ្ទះ នឹងអាចធ្វើការងារតាមម៉ោងបត់បែនបាន ។

កន្លងមក ជប៉ុនពុំបានអនុវត្តគោលការណ៍ធ្វើការចំនួន៤ថ្ងៃក្នុង១សប្តាហ៍ទេ ប៉ុន្តែអាជ្ញាធរក្នុងតំបន់ក៏ចាប់ផ្តើមចាប់អារម្មណ៍នឹងការកាត់បន្ថយម៉ោងធ្វើការ ដើម្បីឱ្យអ្នកមានកូន មានពេលវេលាថែទាំកូនច្រើនជាងមុន ។ ប្រទេសអភិវឌ្ឍជាច្រើនក៏ប្រឈមនឹងបញ្ហាអត្រាកំណើតធ្លាក់ចុះដែរ ប៉ុន្តែជប៉ុនប្រឈមខ្លាំងជាងគេ គឺពលរដ្ឋជប៉ុនបានធ្លាក់ចុះអស់រយៈពេល១៥ឆ្នាំហើយ ។

នាយករដ្ឋមន្ត្រីជប៉ុន លោក Shigeru Ishiba ថ្លែងថា អត្រាកំណើតនៅជប៉ុនបានធ្លាក់ចុះជាបន្តបន្ទាប់ ហើយរដ្ឋាភិបាលត្រូវតែចាត់វិធានការបន្ទាន់ដើម្បីគាំទ្រឱ្យពលរដ្ឋមានម៉ោងធ្វើការកាន់តែបត់បែន និងបង្កើនអត្រាកំណើត ។ បច្ចុប្បន្ន បើទោះជាពលរដ្ឋមានការងារធ្វើក្តី ប៉ុន្តែពួកគេត្រូវទទួលបន្ទុកការងារផ្ទះផងដែរ ដូចជា ៖ ថែទាំកូន និងសាច់ញាតិ ដែលវាជាកត្តាធ្វើឱ្យពលរដ្ឋមានកូនតិចជាងមុន ។

ក្រៅពីនេះ ជប៉ុនបានជាប់ចំណាត់ថ្នាក់ទី២ ជាប្រទេសមានពលរដ្ឋអាយុច្រើនជាងគេលើពិភពលោក បន្ទាប់ពីប្រទេសម៉ូណាកូ ហើយដោយសារជប៉ុនមានច្បាប់អន្តោប្រវេសន៍តឹងរ៉ឹង ទើបធ្វើឱ្យជប៉ុនមានបញ្ហាខ្វះខាតកម្លាំងពលកម្មកាន់តែខ្លាំង ៕

អារ៉ាប៊ីសាអូឌីត៖ ប្រទេសអារ៉ាប៊ីសាអូឌីតមានបំណងប្រែក្លាយវាលខ្សាច់ទៅជាឧទ្យានអេកូឡូស៊ី ដោយដាំដើមឈើចំនួន ១០ ពាន់លានដើម និងកែលម្អផ្ទៃដីជាង ៧៤ លានហិកតា ដើម្បីកាត់បន្ថយការប្រែប្រួលអាកាសធាតុ។
ជាការពិតណាស់ អាកាសធាតុប្រែប្រួលខុសធម្មតា បានធ្វើឱ្យប្រទេសជាច្រើនធ្លាក់ក្នុងស្ថានភាពលំបាកកាន់តែខ្លាំងឡើងៗ ដូច្នេះហើយប្រទេសវាលខ្សាច់អារ៉ាប៊ីសាអូឌីតនឹងប្រែក្លាយគម្រោងដ៏មានមហិច្ឆតានេះទៅជាដំណោះស្រាយអាកាសធាតុ។

លោក Himanshu Mishra អ្នកជំនាញផ្នែកវិទ្យាសាស្ត្របរិស្ថាន និងវិស្វកម្មនៅសាកលវិទ្យាល័យ King Abdullah University of Science and Technology (KAUST) បាននិយាយថា ដើម្បីសម្រេចបាននូវគោលដៅប្រកបដោយមហិច្ឆិតានោះ ការគ្រប់គ្រងដីធ្លី និងធនធានទឹកប្រកបដោយប្រសិទ្ធភាពគឺចាំបាច់ណាស់។ បច្ចុប្បន្នក្រុមស្រាវជ្រាវរបស់លោកបានបង្កើតផលិតផលដែលអាចបំប្លែងវាលខ្សាច់របស់ប្រទេសទៅជាដីមានជីជាតិ។

ក្នុងនោះជីសរីរាង្គដែលសំបូរទៅដោយកាបូនដែលផលិតពីលាមកមាន់គឺមានច្រើននៅក្នុងប្រទេសអារ៉ាប៊ីសាអូឌីត ដែលវាមានប្រសិទ្ធភាពជាងជីធម្មតាឆ្ងាយណាស់ អាចជួយឱ្យប្រទេសនេះសម្រេចផែនការប្រែក្លាយវាលខ្សាច់ទៅជាឧទ្យានបៃតងដោយជោគជ័យ។ ដូច្នេះរដ្ឋាភិបាលសង្ឃឹមថា នៅថ្ងៃអនាគតគម្រោងដ៏មានមហិច្ឆតានេះ នឹងជួយកាត់បន្ថយការប្រែប្រួលអាកាសធាតុ ធ្វើឱ្យប្រទេសវាលខ្សាច់ក្លាយជាប្រទេសមួយដែលពោរពេញទៅដោយដើមឈើបៃតង។

គួររំលឹកដែរថា បច្ចុប្បន្ននេះអាកាសធាតុគឺមានការប្រែប្រួលឥតឈប់ឈរ បើកាលណាយើងមិនខិតខំដាំដុះរុក្ខជាតិទេ ពិភពលោកអាចនឹងជួបប្រទះនៅមហន្តរាយនៃគ្រោះធម្មជាតិផ្សេងៗដូចជា ខ្យល់ព្យុះ ទឹកជំនន់ រញ្ជួយដី ផ្ទុះភ្នំភ្នើង ឆេះព្រៃ និងគ្រោះរាំងស្ងួតជាដើម ដែលបណ្តាលឱ្យបរិស្ថានរងការខូចខាត និងសេដ្ឋកិច្ចក្នុងប្រទេសនានាប្រឈមនឹងវិបត្តិធ្ងន់ធ្ងរផងដែរ៕

តារាសម្តែង Zhao Wei ឬទស្សនិកជនស្គាល់ថា ត្រចៀកកាំ បានបង្ហោះនៅលើបណ្តាញសង្គមចិន Weibo លើកដំបូងក្នុងរយៈពេល៣ឆ្នាំមកបន្ទាប់ពីជាប់ឈ្មោះក្នុងបញ្ជីខ្មៅ។ ហេតុផលដែលតារាស្រីរូបនេះកម្រើកនៅលើបណ្តាញសង្គមដោយសារតែអ្នកស្រី Chiung Yao អ្នកនិពន្ធប្រលោមលោកមនោសញ្ចេតនាចិនដ៏ល្បីល្បាញជាពិសេសសាច់រឿងដើម ព្រះនាងត្រចៀកកាំ ដែលនាងសម្តែងបានទទួលមរណភាពក្នុងជន្មាយុ៨៦ឆ្នាំកាលពីពេលថ្មីៗនេះ។

បន្ទាប់ពីអ្នកនិពន្ធ Chiung Yao បានទទួលមរណៈភាពកាលពីថ្ងៃទី៤ ខែធ្នូ Zhao Wei បានសរសេរនៅលើ Weibo ជាកំណាព្យចិនក្នុងរាជវង្ស Ming ហើយក៏មានប្រយោគទាក់ទងនឹងប្រលោមលោកដ៏ល្បីល្បាញរបស់របស់អ្នកនិពន្ធរូបនេះផ្ទាល់គឺ Romance of the Three Kingdoms ហើយប្រលោមលោកនេះធ្លាប់ត្រូវបានកែសម្រួលទៅជាខ្សែភាពយន្តមួយផងដែរ។ ការបង្ហោះរបស់ ត្រចៀកកាំ គឺក្នុងន័យសរសើរដល់អ្នកនិពន្ធ Chiung Yao។

សកម្មភាពរបស់ Zhao Wei ទទួលបានការចាប់អារម្មណ៍ពីទស្សនិកជន ក្រោយការបង្ហោះរយៈពេលមួយម៉ោងទទួលបានមតិយោបល់ជាង១ម៉ឺន។ តារារូបនេះបានអាប់ដេតបណ្តាញសង្គមខ្លួនរបស់នាងជាលើកដំបូងបន្ទាប់ពីលាក់ខ្លួននិងអសកម្មជាងបីឆ្នាំនៅលើ Weibo ។

យោងតាម Sina ថា Zhao Wei គឺជាតារាល្បីមួយរូបដែលលេចធ្លោរដោយសារការសម្របតាមខ្សែភាពយន្តនៃប្រលោមលោករបស់អ្នកស្រី Chiung Yao។ តារាស្រីរូបនេះធ្លាប់បាននិយាយថា នាងជាមនុស្សជំនាន់ថ្មីដែលទទួលបានឥទ្ធិពលខ្លាំងពីប្រលោមលោក និងភាពយន្តរបស់អ្នកនិពន្ធរូបនេះ នាងសប្បាយចិត្តដែលអាចដើរជាមួយតួស្រីតាមរយៈពេលវេលាដ៏រ៉ូមែនទិក និងអស្ចារ្យក្នុងជីវិតរបស់នាង។

អ្នកស្រី Chiung Yao គឺជាអ្នកនិពន្ធរឿងដ៏ល្បីល្បាញជាជនជាតិតៃវ៉ាន់ដែលត្រូវបានប្រារព្ធជា Queen នៃប្រលោមលោកមនោសញ្ចេតនាចិន ជាមួយនឹងសៀវភៅលក់ដាច់បំផុតជាច្រើន។ ស្នាដៃរបស់អ្នកស្រី ត្រូវបានកែសម្រួលទៅជាខ្សែភាពយន្ត រួមទាំងរឿងភាគទូរទស្សន៍ «My Fair Princess» ឬ ព្រះនាងច្រចៀកកាំ ដែលសម្តែងដោយ Zhao Wei និង Ruby Lin ដែលផ្អែកលើប្រលោមលោក «Princess Pearl» ។ អ្នកស្រីក៏បាននិពន្ធទំនុកច្រៀងជាច្រើនបទផងដែរ៕

ទោះបីជាច្បាប់អាជ្ញាសឹកត្រូវបានដកចេញកាលពីថ្ងៃទី៤ ខែធ្នូក៏ដោយ ក៏បណ្តាប្រទេសជាច្រើនដូចជាកាណាដា អង់គ្លេស អាមេរិក ប៊ុលហ្គារី ឡាតវី និងអៀរឡង់នៅតែបន្តជូនដំណឹងដល់ពលរដ្ឋរបស់ពួកគេឱ្យមានការប្រុងប្រយ័ត្នពេលធ្វើដំណើរទៅកូរ៉េខាងត្បូង ដោយសារបច្ចុប្បន្នប្រទេសនេះនៅមិនទាន់មានសុវត្ថិភាពនោះទេ។

ប្រទេសកាណាដាបានធ្វើបច្ចុប្បន្នភាពការប្រឹក្សាការធ្វើដំណើររបស់ខ្លួនសម្រាប់ពលរដ្ឋថា ប្រសិនបើពួកគេមកប្រទេសកូរ៉េ ពួកគេត្រូវមានការប្រុងប្រយ័ត្នឱ្យខ្ពស់ ដោយជៀសវាងការតវ៉ា និងការប្រមូលផ្តុំធំ ក៏ដូចជាតាមដានប្រព័ន្ធផ្សព្វផ្សាយឱ្យបានដិតដល់ ធ្វើបច្ចុប្បន្នភាពព័ត៌មាន និងអនុវត្តតាមការណែនាំរបស់រដ្ឋាភិបាលក្នុងតំបន់។

ខណៈបច្ចុប្បន្នភ្ញៀវទេសចរណ៍ដែលស្នាក់នៅក្នុងទីក្រុងសេអ៊ូលនៅមិនទាន់ស្ងប់ស្ងាត់នៅឡើយទេ មានន័យថា ពួកគេកំពុងជួបប្រទះការរអាក់រអួលក្នុងការដឹកជញ្ជូន ក៏ដូចជាបញ្ហាដូចជាការហូបចុក និងការទស្សនា ជាពិសេសនៅក្នុងតំបន់ជុំវិញការិយាល័យប្រធានាធិបតី និងរដ្ឋសភា។

រីឯរដ្ឋាភិបាលចក្រភពអង់គ្លេស និងសហរដ្ឋអាមេរិកវិញក៏បានដាស់តឿនដល់ពលរដ្ឋដែលស្ថិតក្នុងប្រទេសកូរ៉េ ឬមានបំណងធ្វើដំណើរមកទីនេះត្រូវប្រុងប្រយ័ត្ន។ អនុសាសន៍គឺស្រដៀងគ្នាទៅនឹងប្រទេសកាណាដាដែរ ដូច្នេះអ្នកទស្សនាត្រូវបានលើកទឹកចិត្តឱ្យទិញធានារ៉ាប់រងការធ្វើដំណើរ ប្រសិនបើពួកគេនៅតែសម្រេចចិត្តមកប្រទេសកូរ៉េក្នុងអំឡុងពេលនេះ។ ក្រសួងការបរទេសអាមេរិក បានសរសេរក្នុងសារបង្ហោះនៅលើទំព័រ X ថា “ស្ថានភាពនៅកូរ៉េខាងត្បូងមិនស្ថិតស្ថេរនោះទេ ប្រជាជនអាមេរិកគួរតែប្រមើលមើលហានិភ័យដែលអាចកើតមាន”។

ចំណែកប្រទេសចំនួនបីនៅអឺរ៉ុបដូចជា ប៊ុលហ្គារី ឡាតវី និងអៀរឡង់ ក៏បានផ្តល់ការណែនាំស្រដៀងគ្នាសម្រាប់អ្នកធ្វើដំណើរផងដែរ។ នៅក្នុងសេចក្តីប្រកាស ឡាតវីបានសង្កត់ធ្ងន់ថា អ្នកធ្វើដំណើរទៅកូរ៉េណាដែលមិនគោរពតាមការណែនាំរបស់រដ្ឋាភិបាលក្នុងអំឡុងពេលនេះ អាចនឹងត្រូវចាប់ខ្លួន ឆែកឆេរ ឬផាកពិន័យ។

គួរបញ្ជាក់ដែរថា កាលពីយប់ថ្ងៃទី ៣ ខែធ្នូ លោកប្រធានាធិបតីកូរ៉េខាងត្បូង Yoon Suk-yeol បានធ្វើឱ្យគ្រប់គ្នាភ្ញាក់ផ្អើលដោយការប្រកាសច្បាប់អាជ្ញាសឹក។ មូលហេតុដែលលោក ប្រកាសចេញច្បាប់អាជ្ញាសឹកភ្លាមៗបែបនេះគឺដោយសារ ប្រធានាធិបតីរូបនេះបានរិះគន់មន្ត្រីរបស់គណបក្សប្រឆាំងថា បានគាំទ្រកូរ៉េខាងជើង ហើយក៏ចេញច្បាប់អាជ្ញាសឹក បណ្តាលឱ្យទាហាននិងប៉ូលិសកូរ៉េខាងត្បូងរាប់ពាន់នាក់បិទច្រកចូលអគារសភា បង្កឱ្យមានភាពចលាចលពេញប្រទេស។

បន្ទាប់មកបាតុកររាប់រយនាក់បានប្រមូលផ្តុំគ្នានៅខាងក្រៅ ដើម្បីប្រឈមមុខនឹងកងកម្លាំងសន្តិសុខទោះបីជាមានអាកាសធាតុត្រជាក់ខ្លាំងក៏ដោយ។ ទោះជាយ៉ាងណានៅព្រឹកថ្ងៃទី ៤ ខែធ្នូ សមាជិកសភាចំនួន ១៩០ នាក់បានចូលទៅក្នុងអគារសភាកូរ៉េបោះឆ្នោតអនុម័តសេចក្តីសម្រេចមួយដោយស្នើឱ្យលោក Yoon Suk-yeol លុបចោលច្បាប់អាជ្ញាសឹក។ មិនយូរប៉ុន្មានប្រធានាធិបតីរូបនេះក៏ប្រកាសលុបចោលច្បាប់អាជ្ញាសឹក ទោះបីជាយ៉ាងនេះក្តីប្រទេសជាច្រើននៅតែដាស់តឿនពលរដ្ឋឱ្យមានការប្រុងប្រយ័ត្នពេលធ្វើដំណើរទៅកូរ៉េខាងត្បូង៕

ប្រទេសថៃ ៖ កាលពីថ្ងៃទី៤ ខែធ្នូ ឆ្នាំ២០២៤ សារព័ត៌មានថៃរាយការណ៍ថា អង្គការយូណេស្កូបានចុះបញ្ជីសម្លៀកបំពាក់ថៃភាគខាងត្បូង (ឈុត Kebaya) រួមគ្នាជាមួយប្រទេសព្រុយណេ, ឥណ្ឌូណេស៊ី, ម៉ាឡេស៊ី និងសិង្ហបុរី ជាបេតិកភណ្ឌវប្បធម៌អរូបីនៃមនុស្សជាតិ ។ វាជាដំណឹងដ៏រីករាយមួយសម្រាប់ពលរដ្ឋថៃ ក្រោយពីអង្គការនេះទើបតែចុះបញ្ជីសម្លតុមយ៉ាំ ជាបេតិកភណ្ឌវប្បធម៌អរូបីរបស់ថៃ ។

ក្នុងកិច្ចប្រជុំគណៈកម្មការអន្តររដ្ឋាភិបាលសម្រាប់ការអភិរក្សបេតិកភណ្ឌវប្បធម៌អរូបី លើកទី១៩ របស់អង្គការយូណេស្កូ (UNESCO) នៅប្រទេសប៉ារ៉ាហ្គាយ បានសម្រេចចុះបញ្ជីឈុត Kebaya ចំនួន៥ប្រទេសរួមគ្នា មានដូចជា ៖ ព្រុយណេ, ឥណ្ឌូណេស៊ី, ម៉ាឡេស៊ី, សិង្ហបុរី និងថៃ ជាបេតិកភណ្ឌវប្បធម៌អរូបីនៃមនុស្សជាតិ ។

វាជាដំណឹងគួរឱ្យរីករាយយ៉ាងខ្លាំង ដែលឈុត Kebaya គឺជាសម្លៀកបំពាក់របស់ពលរដ្ឋថៃភាគខាងត្បូង ត្រូវបានអង្គការយូណេស្កូចុះបញ្ជីជាបេតិកភណ្ឌវប្បធម៌អរូបីរបស់ថៃក្នុងឆ្នាំតែមួយ (ឆ្នាំ២០២៤) ជាមួយសម្លតុមយ៉ាំ ។ ហេតុនេះ ឈុត Kebaya គឺជាបេតិកភណ្ឌវប្បធម៌អរូបី ទី៦ របស់ថៃ បន្ទាប់ពីល្ខោនខោល, ម៉ាស្សា, របាំមនោរ៉ា, បុណ្យសង្ក្រាន្ត និងសម្លតុមយ៉ាំ ។

រដ្ឋមន្ត្រីក្រសួងវប្បធម៌ លោកស្រី ស៊ុដាវ៉ាន់ វ៉ាំងស៊ុផាកិច្ចកូស៊ុន ថ្លែងថា ការចុះបញ្ជីឈុត Kebaya ជាមរតកវប្បធម៌រួមគ្នា៥ប្រទេសក្នុងតំបន់អាស៊ាន គឺនៅក្រោមគំនិតរបស់ម៉ាឡេស៊ី ។ កាលពីដើមឆ្នាំ២០២២ ម៉ាឡេស៊ីបានស្នើឱ្យព្រុយណេ, ឥណ្ឌូណេស៊ី, សិង្ហបុរី និងថៃ ចូលរួមរៀបចំឯកសារស្នើសុំចុះបញ្ជីឈុតនេះជាមួយអង្គការយូណេស្កូ ។

លោកស្រី ស៊ុដាវ៉ាន់ បន្តថា នារីគ្រប់រូបអាចស្លៀកពាក់ឈុត Kebaya ក្នុងការរស់នៅប្រចាំថ្ងៃ និងចូលរួមកម្មវិធីផ្សេងៗ ដែលឈុតនេះបង្ហាញពីចំណេះដឹង, ជំនាញ, ប្រពៃណី និងការអនុវត្ត ។ ឈុតនេះត្រូវបាននិយមស្លៀកពាក់នៅតំបន់អាស៊ីអាគ្នេយ៍ ជាពិសេស នៅព្រុយណេ, ម៉ាឡេស៊ី, ឥណ្ឌូណេស៊ី, សិង្ហបុរី និងខេត្តភាគខាងត្បូងរបស់ថៃ ។

ឈុត Kebaya បង្ហាញពីប្រវត្តិសាស្ត្រ, ប្រពៃណីរួមគ្នាក្នុងតំបន់, ភាពចម្រុះនៃវប្បធម៌ និងគាំទ្រការសម្រេចគោលដៅការអភិវឌ្ឍប្រកបដោយចីរភាព ដូចជា ៖ ការសិក្សាមានគុណភាព, ភាពស្មើភាពគ្នារវាងបុរស និងស្ត្រី, ការអភិវឌ្ឍសេដ្ឋកិច្ចគ្រប់ផ្នែក, សន្តិភាព និងគោរពគ្នាទៅវិញទៅមក ។ ដូច្នេះ ដើម្បីចូលរួមអបអរភាពជោគជ័យក្នុងប្រវត្តិសាស្ត្រ ប្រទេសទាំង៥ បានរួមគ្នារៀបចំកម្មវិធីបង្ហាញឈុត Kebaya ក្នុងកិច្ចប្រជុំគណៈកម្មការអន្តររដ្ឋាភិបាលសម្រាប់ការអភិរក្សបេតិកភណ្ឌវប្បធម៌អរូបី លើកទី១៩ នៅទីក្រុង Asuncion ប្រទេសប៉ារ៉ាហ្គាយ ។

កម្មវិធីនេះនឹងជួយលើកកម្ពស់ការយល់ដឹងអំពីបេតិកភណ្ឌរួម និងភាពពាក់ព័ន្ធក្នុងសង្គមរួមគ្នាដល់ពលរដ្ឋទូទៅ ។ វាក៏ផ្តល់ឱកាសឱ្យអ្នកចូលរួមអាចសន្ទនា ចែករំលែកវប្បធម៌ និងព្យាយាមរួមគ្នាថែរក្សា បន្តមរតកឈុតនេះទៅដល់ក្មេងជំនាន់ក្រោយ ៕