ឧកញ៉ា ខេមរៈ សិរីមន្ត ចេញបទថ្មីនេះអ្នកគាំទ្រលាន់មាត់ថា «អាយដលពីមុនត្រឡប់មកវិញ»

December 5, 2024

តារាចម្រៀងឧកញ៉ា ខេមរៈ សិរីមន្ត បានធ្វើឱ្យទស្សនិកជនជាអ្នកគាំទ្រលាន់មាត់ថា ខេមរៈ សិរីមន្ត ពីមុនត្រឡប់មកវិញហើយបន្ទាប់ពីចេញវីដេអូចម្រៀងថ្មីរៀបរាប់ពីជីវិតតស៊ូ។ ផ្ទុះការសរសើរបែបនេះដោយសារតែចុងក្រោយរូបលោកចេញបទចម្រៀងស្របតាមទីផ្សារចង្វាក់រ៉េប ប៉ុន្តែទស្សនិកជនហាក់មិនសូវជាពេញចិត្តប៉ុន្មាននោះទេ។

ប្រិយមិត្តតាមដានក្នុងវិស័យសិល្បៈជ្រាបមកហើយថាតារាចម្រៀងដែលមានងារជាឧកញ៉ា ខេមរៈ សិរីមន្ត រួមទាំងឧកញ៉ា ព្រាប សុវត្ថិ ទទួលរងនូវមតិរិះគន់ជាបន្តបន្ទាប់ពីអ្នកលេងបណ្តាញសង្គម តួយ៉ាងចុងក្រោយនេះគឺតារាចម្រៀង ឧកញ៉ា ព្រាប សុវត្ថិ តែម្តងដែលបានចេញបទចម្រៀង សែកមន្ត មានចាប៉ីដងវែងលាយតុក្កតា ឡាប៊ូៗ រហូតទស្សនិកជនចង់ឱ្យតារាចម្រៀងជើងចាស់មានឈ្មោះបោះសំឡេងទាំងពីររូបវិលទៅផលិតកម្មចាស់វិញ។

ទោះយ៉ាងណា បន្ទាប់ពីផ្ទុះនូវភាពចម្រូងចម្រាសលើការចេញបទចម្រៀងនេះ ឧកញ៉ា ខេមរៈ សិរីមន្ត បានធ្វើឱ្យអ្នកគាំទ្រចាប់អារម្មណ៍ឡើងវិញបន្ទាប់ពីលោកទម្លាក់វីដេអូខ្លីៗនៃបទចម្រៀងថ្មីរៀបរាប់ពីការតស៊ូនៅក្នុងជីវិត។ រសៀលថ្ងៃទី៤ ធ្នូ តារាចម្រៀងឧកញ៉ា ខេមរៈ សិរីមន្ត បានចេញវីដេអូចម្រៀងរយៈពេល១នាទីជាមួយនឹងអត្ថន័យថា «នេះហើយជាជីវិតស៊ូៗទាំងអស់គ្នាណាបាទ»។

វីដេអូខ្លីនេះឧកញ៉ា ខេមរៈ សិរីមន្ត សម្តែងជាអ្នកប្រមូលសំរាម ដោយអត្ថន័យនៃបទចម្រៀងបានរៀបរាប់ពីការតស៊ូលើអាជីពការងារពីមួយឆ្នាំទៅមួយឆ្នាំនៅតែបែបនេះទាំងអ្នកស្រករខ្លួនមានឡានមានផ្ទះខុសឆ្ងាយពីជីវភាពខ្លួនឯង។ ចម្រៀងថ្មីនេះបានធ្វើឱ្យទស្សនិកជនជាអ្នកគាំទ្ររបស់លោកពីមុនៗមានការចាប់អារម្មណ៍និងកោតសរសើរជាថ្មីទៅកាន់តារាចម្រៀងរូបនេះដោយលើកជាមតិស្រដៀងៗគ្នាថា «អាយដលពីមុនត្រឡប់មកវិញហើយ»៕

រី ស្រីនេត រៀបរាប់ទាំងទឹកភ្នែកហូររហាមស្ថិតក្នុងជីវភាពមានកម្រិតមិនមានសូម្បីតែខោអាវថ្មីស្លៀក

Lee Ek

December 5, 2024

រី ស្រីនេត ដែលសុខចិត្តលុបចោលលំដាប់រងទី១ Miss Grand Cambodia 2024 បន្ទាប់ពីមានបញ្ហាចម្រូងចម្រាសបានធ្វើឱ្យមហាជនរំជួលចិត្តពេញបណ្តាញសង្គមបន្ទាប់ពីរូបនាងនិយាយរៀបរាប់ទាំងទឹកភ្នែកហូររហាមពីស្ថានភាពគ្រួសារស្ថិតនៅក្នុងជីវភាពលំបាក។

នៅក្នុងកម្មវិធីមួយ រី ស្រីនេត និង ម៉ាច ដាវី មានកម្មវិធីជាមួយគ្នាដោយបានបកស្រាយបទចម្រៀងយ៉ាងពីរោះមិនចាញ់តារាចម្រៀងអាជីពប៉ុន្មាននោះទេ។ ជាមួយនឹងការចាប់អារម្មណ៍សំឡេងរបស់បវរកញ្ញាទាំងពីររូបទស្សនិកជនអ្នកប្រើប្រាស់បណ្តាញសង្គមក៏បានចាប់អារម្មណ៍ពីការរៀបរាប់របស់ រី ស្រីនេត ជាមួយនឹងទឹកភ្នែកជោគថ្ពាល់។

រៀបរាប់ពីបទពិសោធន៍ផ្ទាល់ខ្លួនចែករំលែកទៅដល់ហ្វេនៗ ស្រីនេត ថាមនុស្សម្នាក់ៗតែងតែមានផលលំបាករៀងៗខ្លួនហើយទន្ទឹមនឹងការលំបាកត្រូវតែចេះរកដំណោះស្រាយមួយអាចជួយខ្លួនឯងកាន់តែទៅមុខ កុំទុកខ្លួនឯងចោល។ ក្នុងនោះ រី ស្រីនេត បានលើកពីការស្លៀកពាក់របស់ខ្លួនដែលមិនសូវមានខោអាវស្លៀកពាក់ស្អាតដូចអ្នកដទៃ។ នាងបាននិយាយថា មិនមែនមិនចង់ទិញខោអាវស្អាតពាក់នោះទេ ប៉ុន្តែយើងនៅកម្រិតមួយទៀត មិនទាន់អាចឈានដល់កម្រិតដូចដែលគេនិយាយនោះទេ ហើយមនុស្សម្នាក់ៗតែងតែចង់ឱ្យខ្លួនឯងល្អ មានក្រេដីតល្អ។

តស៊ូលើអាជីពសិល្បៈរហូតដល់គ្រួសារហៅត្រឡប់ទៅផ្ទះវិញព្រោះតែឃើញសភាពស្គមស្គាំងរបស់ ស្រីនេត ប៉ុន្តែនាងមិនបោះបង់បន្តដំណើរទៅមុខទៀតចាប់យកក្តីស្រមៃរបស់ខ្លួនឱ្យបាន នឹងធ្វើឱ្យគ្រួសាររស់នៅដោយសុខសប្បាយ មិនខ្វះព្រឹក ខ្វះល្ងាច ជួយប្អូនៗហើយមកដល់ថ្ងៃនេះហើយនាងគិតថានាងនៅមិនទាន់ធ្វើបាននៅឡើយ។

គួរបញ្ជាក់ថា កាលពីកន្លងមកនេះ ពេជ្រ វត្តីសារ៉ាវឌ្ឍី បានទម្លាយពីភាពល្អរបស់ ស្រីនេត ជាមនុស្សដែលមានសណ្តានចិត្តល្អ តស៊ូ ជាអ្នកជួយបង្ហាត់ការសម្តែងដល់នាង។ ស្រីនេត ជាមនុស្សមានអត្តចរិតល្អ ជួយអ្នកដទៃដោយមិនគិតពីផលតបស្នង៕

ស្ពានអាកាសភ្លោះថ្មី ស្ថិតលើមហាវិថីសម្តេចតេជោ ហ៊ុន សែន នឹងលេចរូបរាងនៅពាក់កណ្តាលឆ្នាំ២០២៥

Lee Ek

December 5, 2024

គម្រោងស្ពានអាកាសភ្លោះ តាមបណ្តោយមហាវិថីសម្តេចតេជោ ហ៊ុន សែន តម្លៃជាង ១៦ លានដុល្លារ សម្រេចបានការសាងសង់ប្រមាណ ២៥ភាគរយ ដោយគ្រោងបញ្ចប់ស្ពានទី១ នៅមុនខែមេសា ឆ្នាំ២០២៥ និងគម្រោងទាំងមូលនឹងបញ្ចប់នៅខែមិថុនា។

ស្ពាននេះ ស្ថិតនៅផ្លូវប្រសព្វជាមួយនិងផ្លូវជាតិលេខ ២ ព្រំប្រទល់រវាងរាជធានីភ្នំពេញ និងខេត្តកណ្តាល ដោយស្ថិតក្រោមការសាងសង់របស់ក្រុមហ៊ុនOCIC។

ស្ពានអាកាសភ្លោះថ្មីនេះ ជាផ្លូវឯកទិស ដោយស្ពានទី១ មានទិសដៅ តាមបណ្តោយមហាវិថី សម្តេចតេជោ ហ៊ុន សែន ឆ្លងកាត់ផ្លូវជាតិលេខ ២ ឆ្ពោះទៅកាន់អាកាសយានដ្ឋាន អន្តរជាតិថ្មី និងស្ពានទី២ មានទិសដៅពីអាកាសយានដ្ឋានអន្តរជាតិថ្មី ឆ្លងកាត់ផ្លូវជាតិលេខ ២ ឆ្ពោះមកតាមបណ្តោយ មហាវិថី សម្តេចតេជោ ហ៊ុន សែន វិញ។

ស្ពាននីមួយៗ មានទទឹងទំហំ ៩,៥ ម៉ែត្រ បណ្តោយស្ពានប្រវែង ២៨១ម៉ែត្រ និងស្ថាបនាផ្លូវតភ្ជាប់ក្បាលស្ពានផ្នែកខាងជើងប្រវែង ១៨០ម៉ែត្រ និងផ្នែកខាងត្បូង ប្រវែង១៦១ម៉ែត្រ ហើយគន្លងផ្លូវរត់របស់តួស្ពាននីមួយៗ មានចំនួន៣គន្លងសម្រាប់ចរាចរ។

គួរបញ្ជាក់ថា ស្ពានអាកាសភ្លោះនេះ ត្រូវបានបានបើកការដា្ឋនកាលពីថ្ងៃទី១៧ ខែ មិថុនា ឆ្នាំ ២០២៤ ដោយប្រើរយៈពេល១២ខែ សម្រាប់ការសាងសង់៕

ក្រសួងមហាផ្ទៃ ត្រៀមចាត់វិធានការលើអ្នកផលិតមាតិកា ដែលផ្សព្វផ្សាយល្បែងអនឡាញតាមបណ្តាញសង្គម

Lee Ek

December 5, 2024

ក្រសួងមហាផ្ទៃ បានចេញសេចក្តីប្រកាសដោយទុកទុកពេលត្រឹមថ្ងៃទី១០ ខែធ្នូ ឆ្នាំ២០២៤ ដោយតម្រូវឱ្យពលរដ្ឋទាំងអស់ ជាពិសេសបុគ្គលមានប្រជាប្រិយភាព និងអ្នកផលិតមាតិកាសង្គម បញ្ឈប់ការផ្សព្វផ្សាយ ឬចែករំលែក(share) នៅលើបណ្តាញសង្គម ដែលជាហេតុ ធ្វើឱ្យប៉ះពាល់យ៉ាងធ្ងន់ធ្ងរដល់សន្តិសុខ។

ដើម្បីពង្រឹងការអនុវត្តច្បាប់ និងធានាដល់សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ក្រសួងមហាផ្ទៃ បានចេញសេចក្តីប្រកាស និងព្រមាន៣ចំណុចរួមមាន ៖

១. ត្រូវបញ្ឈប់ជាបន្ទាន់នូវរាល់ការផលិតរូបភាព វីដេអូ និងមាតិកា ដែលមានខ្លឹមសារពាក់ព័ន្ធនឹង ល្បែងស៊ីសងខុសច្បាប់គ្រប់ប្រភេទទោះល្បែងស៊ីសងលេងដោយផ្ទាល់ក្តី ឬតាមប្រព័ន្ធអនឡាញក្តី។
២. ត្រូវបញ្ឈប់ជាបន្ទាន់នូវរាល់ការបង្កើតគេហទំព័រ គណនី ឬទំព័រក្នុងបណ្តាញទំនាក់ទំនងសង្គម ដែលមានរូបភាព និងខ្លឹមសារពាក់ព័ន្ធល្បែងស៊ីសងខុសច្បាប់គ្រប់ប្រភេទទោះល្បែងស៊ីសងលេង ដោយផ្ទាល់ក្តី ឬតាមប្រព័ន្ធអនឡាញក្តី។
៣. ត្រូវបញ្ឈប់ជាបន្ទាន់នូវរាល់ការផ្សព្វផ្សាយ និង/ឬចែករំលែកបន្តអំពីរូបភាព និងខ្លឹមសារពាក់ព័ន្ធនឹង ល្បែងស៊ីសងខុសច្បាប់គ្រប់ប្រភេទ។

ពាក់ព័ន្ធនឹងករណីនេះ បើពលរដ្ឋ ឬបុគ្គលមានប្រជាប្រិយភាព និងអ្នកផលិតមាតិកាសង្គមនៅតែបន្តប្រព្រឹត្តសកម្មភាពខុសច្បាប់ ដូចបានណែនាំ ក្រសួងមហាផ្ទៃនឹងចាត់វិធានការតាមផ្លូវច្បាប់៕

iPhone 15 បានក្លាយជាស្មាតហ្វូនដែលលក់ដាច់ជាងគេបំផុតក្នុងពិភពលោក

Lee Ek

December 5, 2024

យោងតាមរបាយការណ៍ Counterpoint Research ដែលជាគេហទំព័បច្ចេកវិទ្យាល្បីល្បាញមួយរបស់ពិភពលោក បានឱ្យដឹងថា ក្នុងចំណោមម៉ូដែលស្មាតហ្វូនទាំងអស់ iPhone 15 គឺនាំមុខគេក្នុងបញ្ជីឈរនៅលេខរៀងទី ១ ជាស្មាតហ្វូនលក់ដាច់បំផុតក្នុងពិភពលោកនៅឆ្នាំ ២០២៤ នេះទោះបី iPhone 16 ចេញលក់ក៏ដោយ ក៏ iPhone 15 នៅតែមានប្រជាប្រិយភាពជាង។ បច្ចុប្បន្ន iPhone 15 មានចំណែកទីផ្សារ ៣% ទូទាំងពិភពលោក បន្ទាប់មកគឺ iPhone 15 Pro Max និង iPhone 15 Pro ។

ដូច្នេះខាងក្រោមនេះគឺជាបញ្ជីរាយឈ្មោះកំពូលស្មាតហ្វូនលក់ដាច់បំផុតទាំង ១០ នៅលើពិភពលោក៖

១.ទូរស័ព្ទ iPhone ១៥
២.iPhone 15 Pro Max
៣.ទូរស័ព្ទ iPhone 15 Pro
៤.Samsung Galaxy A15 5G
៥.Samsung Galaxy A15 4G
៦.ទូរស័ព្ទ iPhone 14
៧.Redmi 13C
៨.Samsung Galaxy A05
៩.Galaxy S24 Ultra
១០.ទូរស័ព្ទ Galaxy S24

របាយការណ៍បាននិយាយថា មូលហេតុដែល iPhone តែងតែនាំមុខគេលើទីផ្សារគឺដោយសារកាមេរ៉ាដ៏ល្អឥតខ្ចោះរបស់ពួកគេ និងអេក្រង់ដែលមានគុណភាពខ្ពស់។ ទោះបីជាក្រុមហ៊ុន Apple មានការធ្លាក់ចុះបន្តិចបើធៀបនឹងរយៈពេលដូចគ្នាកាលពីឆ្នាំមុនដោយសារតែការធ្វើឱ្យប្រសើរឡើងរបស់ Samsung ក៏ដោយក៏ iPhone នៅតែបញ្ជាក់ពីជំហរឈានមុខគេនៅក្នុងផ្នែកកម្រិតខ្ពស់ផងដែរ។ នៅក្នុងទីផ្សារពិភពលោក ការរួមបញ្ចូលគ្នានៃមុខងារលេចធ្លោ តម្លៃម៉ាក និងកម្មវិធីលើកទឹកចិត្តបានជួយ Apple បន្តរក្សាភាពទាក់ទាញយ៉ាងខ្លាំង៕

មកដឹងពីវិធីសាស្ត្រព្យាបាលបឋម នៅពេលសត្វល្អិតចូលក្នុងត្រចៀក!

Lee Ek

December 5, 2024

ត្រចៀក គឺជាអវយវៈដែលមានតួនាទីយ៉ាងច្រើនក្នុងពេលតែមួយ ទាំងការទទួលរលកសម្លេងដែលមកពីខាងក្រៅ និងបំប្លែងជាសញ្ញា បញ្ជូនបន្តទៅខួរក្បាល និងថែមទាំងជួយគ្រប់គ្រងការទប់លំនឹងខ្លួនខណៈរាងកាយធ្វើចលនាទៀតផង។ ដូច្នេះកាលណាដែលមានសត្វល្អិតឬវត្ថុតូចៗចូលទៅក្នុងត្រចៀកអាចបណ្តាលឱ្យមានអាការៈខុសប្រក្រតីដូចជា បាត់បង់លំនឹងខ្លួន ឬហឹងត្រចៀក ក៏ដូចជាប្រឈមនឹងការឈឺចាប់ រួមទាំងបង្កឱ្យមានមេរោគមួយចំនួនចូលទៅក្នុងត្រចៀកទៀតផង។

សត្វល្អិតដែលអាចចូលទៅក្នុងត្រចៀកបានមានច្រើនប្រភេទដូចជា ស្រមោច មមង់ ចៃឆ្កែ រុយ ឬកូនកន្លាតជាដើម ហេតុនេះហើយប្រសិនជាមានវត្ថុអ្វីចម្លែក ឬមានសត្វល្អិតចូលទៅក្នុងត្រចៀក តើយើងគួរធ្វើយ៉ាងណាដើម្បីយកវត្ថុឬសត្វល្អិតទាំងនោះចេញពីត្រចៀកដោយសុវត្ថិភាព? ដូច្នេះវិធីសង្គ្រោះបឋមរួមមាន៖

១.បើមានសត្វល្អិតចូលត្រចៀក គួរងើយឡើងទៅលើ ហើយយកប្រេងលាបខ្លួនរបស់ទារក ឬប្រេងបន្លែ ប្រេងអូលីវ ប្រេងល្ង ឬថ្នាំសម្រាប់បន្តក់ត្រចៀក បន្ដក់ចូលក្នុងត្រចៀកហើយទាញស្លាបត្រចៀកខាងក្រោយ ដើម្បីឱ្យរន្ធត្រចៀកបើកកាន់តែធំ ធ្វើឱ្យប្រេងហូរចូលបានត្រង់។ បន្ទាប់មកត្រូវផ្អៀងត្រចៀកចុះមកវិញ ដើម្បីឱ្យសត្វល្អិតដែលស្លាប់ ឬនៅរស់ក្នុងត្រចៀក ហូរចេញមកក្រៅ។

២.បើសិនជាមានសត្វល្អិតចូលត្រចៀកហើយមានអាការៈឈឺចាប់ក្នុងត្រចៀក មិនគួរបន្តក់ប្រេងអ្វីចូលក្នុងត្រចៀកទាំងអស់ ព្រោះអាចនឹងធ្វើឱ្យអាការៈកាន់តែធ្ងន់ធ្ងរឡើង និងថែមទាំងមិនត្រូវយកម្រាមដៃ ឬរបស់អ្វី ខ្វេះ ឬខ្វារត្រចៀកឡើយ ព្រោះអាចនឹងធ្វើឱ្យសត្វល្អិតនោះ កាន់តែធ្លាក់ចូលទៅជ្រៅជាងមុន និងអាចបណ្តាលឱ្យមានបញ្ហាដល់ក្រដាសត្រចៀកទៀតផង។ ដូច្នេះវិធីល្អ គួរតែបញ្ចាំងភ្លើងពិលចូលទៅក្នុងរន្ធត្រចៀកមួយស្របក់ ប៉ុន្តែវិធីនេះត្រូវស្ថិតនៅក្នុងទីកន្លែងដែលងងឹតគ្មានពន្លឺអ្វីទាំងអស់ទើបមានប្រសិទ្ធភាព។

៣.ប្រសិនបើអ្នកធ្វើគ្រប់វិធីខាងលើហើយ សត្វល្អិតនៅតែមិនចេញមកវិញទៀត ឬមានអាការៈផ្សេងទៀតជ្រៀតជ្រែកដូចជា ឈឺត្រចៀកធ្ងន់ធ្ងរ មានឈាម ឬទឹកហូរចេញមកពីក្នុងត្រចៀក និងហឹងរហូតស្តាប់អ្វីមិនឮនោះ គួរប្រញាប់ទៅជួបគ្រូពេទ្យជំនាញជាបន្ទាន់ កុំបណ្តែតបណ្តោយយូរ ព្រោះអាចកើតការឆ្លងមេរោគ រហូតបណ្តាលឱ្យមានអាការធ្ងន់ធ្ងរបាន៕

ប្រទេសសមាជិក EU ជំរុញឱ្យមានការអនុវត្តច្បាប់ហាមជក់បា.រី គ្រប់ប្រភេទនៅទីសាធារណៈ

Lee Ek

December 5, 2024

ក្រុមប្រទេសសមាជិកសហភាពអឺរ៉ុប (EU) បានជំរុញឱ្យអនុវត្តច្បាប់ប្រឆាំងនឹងការជក់បា.រី កាន់តែតឹងរ៉ឹងជាងមុន ដោយហាមឃាត់ការជក់បា.រី និងប្រើប្រាស់បា.រី អេឡិចត្រូនិកនៅទីសាធារណៈ ដូចជា ៖ សួនកុមារ, អាងហែលទឹក, ឆ្នេរសមុទ្រ, សួនសត្វ និងបរិវេណខាងក្រៅហាងកាហ្វេ ដើម្បីកាត់បន្ថយផលប៉ះពាល់សុខភាពពលរដ្ឋ ។

សារព័ត៌មាន AFP បានរាយការណ៍ កាលពីថ្ងៃទី៤ ខែធ្នូ ឆ្នាំ២០២៤ ថា រដ្ឋមន្ត្រីក្រសួងសុខាភិបាលរបស់ប្រទេស ចំនួន២៧ ដែលជាសមាជិកសហភាពអឺរ៉ុប បានចូលរួមកិច្ចប្រជុំនៅទីក្រុងព្រុចស៊ែល ប្រទេសបែលហ្ស៊ិក ហើយឯកភាពគ្នាឱ្យប្រទេសជាសមាជិកទាំងអស់ចូលរួមពន្លត់ផ្សែងបារី ។

លោក Oliver Varhelyi គឺជាគណៈកម្មការផ្នែកសុខភាពបស់សហភាពអឺរ៉ុបលើកឡើងថា ៖ «ការឯកភាពគ្នាក្នុងកិច្ចប្រជុំនេះ គឺជាការបោះជំហានដ៏សំខាន់ដើម្បីសម្រេចបានគោលដៅរបស់ពួកយើង គឺបញ្ឈប់ការជក់បារីរបស់កុមារ និងយុវជននៅអឺរ៉ុប ។ ពួកគេត្រូវតែចៀសឆ្ងាយពីគ្រោះថ្នាក់ដោយសារផ្សែងបារី» ។

ការជំរុញឱ្យអនុវត្តច្បាប់ហាមជក់បា.រី និងប្រើប្រាស់បា.រីអេឡិចត្រូនិកនៅទីសាធារណៈនេះ ក្នុងគោលបំណងឱ្យរដ្ឋាភិបាលរបស់ប្រទេសជាសមាជិក EU មើលឃើញពីផលប៉ះពាល់សុខភាពពលរដ្ឋ នាថ្ងៃអនាគត ដូចជា ៖ ជំងឺពាក់ព័ន្ធនឹងផ្សែងបារី ដោយប្រទេសនានាគួរតែរឹតបន្តឹងការជក់បារីនៅតាមទីសាធារណៈដើម្បីកាត់បន្ថយអត្រាបាត់បង់ជីវិត ។

កិច្ចប្រជុំនៅទីក្រុងព្រុចស៊ែល បានអនុម័តឯកសារអំពាវនាវឱ្យបណ្តាប្រទេសសមាជិក EU ចាត់វិធានការលើឧបករណ៍ជក់បារីទំនើបៗ និងបារីអេឡិចត្រូនិក ដែលទទួលបានការពេញនិយមកាន់តែខ្លាំងពីក្រុមយុវវ័យ ។ រដ្ឋាភិបាលប្រទេសនានាគួរចាត់វិធានការការពារយ៉ាងមានប្រសិទ្ធភាពចំពោះផ្សែងបារីនៅកន្លែងធ្វើការ និងអគារសាធារណៈ ។

លើសពីនេះ គួរហាមឃាត់ការជក់បារីគ្រប់ប្រភេទនៅទីសាធារណៈផ្សេងទៀត ដូចជា ៖ អាងហែលទឹក, ឆ្នេរសមុទ្រ, សួនសត្វ, ក្លិបលើដំបូលអគារ និងបរិវេណភោជនីយដ្ឋាន ៕

តើការបន្ថែមមុខវិជ្ជា Love Education ទៅក្នុងកម្មវិធីសិក្សាសាកលវិទ្យាល័យចិន ពិតជាអាចជួយជំរុញឱ្យយុវវ័យរៀបការមែនឬ?

Lee Ek

December 5, 2024

ប្រទេសចិន ៖ រដ្ឋាភិបាលចិនបានអំពាវនាវឱ្យសាកលវិទ្យាល័យ និងស្ថាប័នអប់រំនៅទូទាំងប្រទេសបន្ថែមមុខវិជ្ជាការស្រឡាញ់ (Love Education) បណ្តុះគំនិតឱ្យយុវជនសម័យថ្មីគិតវិជ្ជមានចំពោះការរៀបអាពាហ៍ពិពាហ៍ ការស្រឡាញ់ រស់នៅជាក្រុមគ្រួសារ និងមានកូន ដើម្បីដោះស្រាយបញ្ហាចំនួនពលរដ្ឋធ្លាក់ចុះជាបន្តបន្ទាប់ ។

កាលពីថ្ងៃទី៤ ខែធ្នូ ឆ្នាំ២០២៤ សារព័ត៌មាន Reuters រាយការណ៍ថា រដ្ឋាភិបាលទីក្រុងប៉េកាំងបានកំណត់វិធានការផ្សេងៗដើម្បីលើកទឹកចិត្តឱ្យគូស្វាមី-ភរិយាទាំងអស់មានកូនបន្ថែមទៀត ក្រោយពីទិន្នន័យបង្ហាញថា ចំនួនពលរដ្ឋចិនបានធ្លាក់ចុះខ្លាំងអស់រយៈពេល២ឆ្នាំជាប់ៗគ្នា ចាប់ពីឆ្នាំ២០២២ ដល់ឆ្នាំ២០២៣ ។

ប្រទេសចិនមានពលរដ្ឋប្រមាណ១,៤០០លាននាក់ ស្ថិតក្នុងលំដាប់ទី២ លើពិភពលោក កំពុងក្លាយជាប្រទេសសម្បូរពលរដ្ឋអាយុច្រើនយ៉ាងឆាប់រហ័ស ។ ហេតុនេះ រដ្ឋាភិបាលចិននឹងបង្កើនការចំណាយផ្នែកសុខុមាលភាពពលរដ្ឋ នាថ្ងៃអនាគត និងប៉ះពាល់ដោយផ្ទាល់ចំពោះការរីកចម្រើនសេដ្ឋកិច្ច ។

និស្សិតសិក្សានៅសាកលវិទ្យាល័យ គឺជាក្រុមពលរដ្ឋសំខាន់ដែលអាចជំរុញឱ្យអត្រាកំណើតកើនឡើងខ្ពស់ ប៉ុន្តែពួកគេមានទស្សនៈចំពោះការស្រឡាញ់ និងរៀបអាពាហ៍ពិពាហ៍ខុសគ្នាពីពលរដ្ឋសម័យមុន ។ នេះបើតាមរបាយការណ៍របស់ China Population News ជាប្រព័ន្ធផ្សព្វផ្សាយរដ្ឋ ដែលត្រូវបានផ្សព្វផ្សាយដោយកាសែត Jiangsu Xinhua ។

របាយការណ៍នេះបញ្ជាក់ថា វិទ្យាល័យ និងសាកលវិទ្យាល័យនានាគួរតែមានមុខវិជ្ជាបង្រៀនសិស្ស-និស្សិតឱ្យយល់ដឹងអំពីការរៀបអាពាហ៍ពិពាហ៍ និងការស្រឡាញ់ ពីព្រោះវាជាវិធានការជួយឱ្យនិស្សិតមានទស្សនៈវិជ្ជមានចំពោះការបង្កើតក្រុមគ្រួសារ ។

ក្រុមប្រឹក្សារដ្ឋចិនបានបញ្ជាទៅកាន់អាជ្ញាធរក្នុងតំបន់ឱ្យប្រមូលធនធានដើម្បីដោះស្រាយបញ្ហាចំនួនពលរដ្ឋធ្លាក់ចុះ និងលើកទឹកចិត្តពលរដ្ឋរៀបអាពាហ៍ពិពាហ៍ពេលគ្រប់អាយុ ។ ប៉ុន្តែអ្នកជំនាញផ្នែកប្រជាសាស្ត្រនិយាយថា វិធានការទាំងនេះមិនសូវលើកទឹកចិត្តយុវជនប៉ុន្មានទេ ។

China Population News បានស្ទង់មតិការយល់ឃើញរបស់និស្សិតសាកលវិទ្យាល័យនៅចិនបង្ហាញថា និស្សិត៥៧% ពុំចង់មានស្នេហាទេ ពីព្រោះពុំអាចបែងចែកពេលវេលារវាងស្នេហា និងការរៀនសូត្រ ។ បច្ចុប្បន្ន យុវជនខ្វះខាតចំណេះដឹងពីការស្រឡាញ់ និងទំនាក់ទំនងផ្លូវអារម្មណ៍ ហើយសាកលវិទ្យាល័យគួរបង្រៀនពួកគេឱ្យយល់ដឹងពីប្រជាសាស្ត្រ ៕

ប្រាសាទបាភួន ប្រាសាទភ្នំដែលមានវ័យចំណាស់ជាងគេក្នុងសម័យអង្គរ

Lee Ek

December 5, 2024

ប្រាសាទបាភួន គឺជាមហាសំណង់ប្រាសាទភ្នំ ដែលមានរាងពីរ៉ាមីដ ៣ ថ្នាក់អមដោយក្បាច់ចម្លាក់រចនាដ៏ល្អវិចិត្រ គួរឱ្យស្ងើចសរសើរអំពីស្នាដៃ និងទេពកោសល្យរបស់ដូនតាខ្មែរ ដែលបានសាងសង់នូវមហាស្ថាបត្យកម្មដ៏ល្អឥតខ្ចោះនេះ។ ប្រាសាទបាភួនកសាងឡើងនៅសតវត្សរ៍ទី១១ រវាងឆ្នាំ១០៦០ ដោយព្រះបាទឧទយទិត្យវម៌្មទី២ តំណាងឱ្យភ្នំសុមេរុដែលជាទីស្ថានរបស់អាទិទេព ដើម្បីឧទ្ទិសថ្វាយដល់ព្រហ្មញ្ញសាសនា។ ប្រាសាទដ៏ល្អឯកនេះស្ថិតនៅភូមិអង្គរក្រៅ ឃុំគោកចក ក្រុងសៀមរាប ខេត្តសៀមរាប បានកំពុងឆក់យកបេះដូងភ្ញៀវទេសចរជាតិ និងអន្តរជាតិ។

បច្ចុប្បន្នប្រាសាទនេះគឺមានភាពទាក់ទាញណាស់ ដោយសារសម្រស់ល្អអស្ចារ្យស្រស់ស្អាតមិនចាញ់ប្រាសាទអង្គរវត្តឡើយ។ ប្រាសាទបានភួនមានទម្រង់ជាប្រាសាទភ្នំ ដែលត្រូវបានកសាងឡើងអំពីថ្មភក់ បែរមុខទៅទិសខាងកើត និងមានគ្រឹះធ្វើអំពីថ្មបាយក្រៀម និងឈើមានគោបុរៈ នៅទាំងបួនទិស ព្រមទាំងមានរូបចម្លាក់ក្បាច់រចនា ល្អឆើតទាក់ទងទៅនឹងរឿងរាមកេរ្តិ៍ខ្មែរ និងមានក្បាច់ចម្លាក់ផ្សេងៗទៀត ទាក់ទងទៅនឹងល្បែងកីឡា និងរូបព្រះពុទ្ធចូលព្រះនិពា្វនដែលគេទើបកសាងនាសម័យលង្វែក។

ប្រាសាទនេះ មានស្ពានចូលពីខាងមុខប្រាសាទ ជិតព្រះលានជល់ដំរី ដែលស្ពាន ចូលប្រាសាទបាភួននេះ គឺជាកន្លែងពេញនិយមសម្រាប់ភ្ញៀវទេសចរថតរូប ជាពិសេសសម្រាប់អ្នកថតរូបអាហ៍ពិពាហ៍។ ប្រាសាទបាភួនមានឈ្មោះដើមហៅថា ត្រីភូវនចូនាមណី ដែលក្រោយមកឈ្មោះនេះនៅសល់តែ “ភូវន” តែប៉ុណ្ណោះ ហើយពាក្យថា ភូវន ក្លាយជា “ភួន” វិញ។ ពាក្យ ត្រីភូវន មានន័យថា អ្នកដែលគ្រប់គ្រងលើភពទាំងបី ចំណែកពាក្យដែលក្លាយទៅជា ភួន គឺមានន័យថាលាក់បំបាំងកាយ។

សូមបញ្ជាក់ដែរថាប្រាសាទបាភួននេះ ធ្លាប់បានជួសជុលយ៉ាងតិចចំនួន ៣ ដងរួចមកហើយគឺ៖ លើកទី១ នៅស.វទី១៦, លើកទី២ នៅទសវត្សរ៍ឆ្នាំ ១៩៦០ និងលើកទី៣ នៅឆ្នាំ ១៩៩៥។ ប្រាសាទបាភួន គឺជាប្រាសាទខ្មែរដ៏ល្បីល្បាញមួយសម្រាប់ទេសចរណ៍គ្រប់ជាតិសាសន៍ ដែលចូលមកទស្សនាតំបន់រមណីយដ្ឋានអង្គរ ដោយសារតែសម្រស់ដ៏ស្រស់ស្អាត និងរចនាបទដ៏អស្ចារ្យ ជាពិសេសនោះគឺថ្មប្រាសាទដែលរុំព័ទ្ធដោយព្រៃឈើពណ៌បៃតងយ៉ាងក្រាស់ក្រែល បានធ្វើឱ្យលេចបរិវេណប្រាសាទទាំងមូលនៅចំកណ្តាល ប្រៀបបានដូចនឹងឋានសួគ៌ក្រោមមេឃអ៊ីចឹង៕

រូបភាពដោយ៖ Piak Lim

ក្រុមហ៊ុនហួវៃ ដាក់សម្ពោធជាផ្លូវការនូវ HUAWEI WATCH GT 5 Series នាឡិកាដៃឆ្លាតវៃ តួផលិតពី Titanium កញ្ចក់ Sapphire Glass រចនារូបរាងបែប Fashion & Luxury ប្រើ Offline Maps, ថ្មកាន់2សប្តាហ៍ ភ្ជាប់បានគ្រប់ស្មាតហ្វូន IOS & Android !

Lee Ek

December 5, 2024

ផ្ទុះកក្រើកទៀតហើយ ! កាលពីរាត្រីថ្ងៃទី ៥ធ្នូ ឆ្នាំ២០២៤ ថ្មីៗនេះ ក្រុមហ៊ុនហួវៃ បានដាក់សម្ពោធជាផ្លូវការនូវ HUAWEI WATCH GT 5 Series នាឡិកាដៃឆ្លាតវៃ តួផលិតពី Titanium កញ្ចក់ Sapphire Glass រចនារូបរាងបែប Fashion & Luxury ប្រើ Offline Maps, មុខងារ សុភាពសុក្រិត និង មុខងារកីឡាបែបអាជីព ថ្មកាន់2សប្តាហ៍ តបសារដោយប្រើ Keyboard ភ្ជាប់បានជាមួយគ្រប់ស្មាតហ្វូន ទាំង iOS និង Android ។ លើកនេះកាន់តែពិសេស នាឡិកាឆ្លាតវៃ HUAWEI WATCH GT 5 Series បានធ្វើអោយផ្ទុះកក្រើកទីផ្សារ Smartwatch ក្នុងប្រទេសកម្ពុជាជាថ្មី។ កម្មវិធីសម្ពោធនេះចូលរួមពី តារាកក្តិយស តារា influencer លោក ហេង វិសាល និង ស្រីនា, Tech Review លោក Jerry ថៃ ហៅ ប្រាប់ចំៗ, លោក ស័ក្កសេរីវុធ ហៅដុំហ្វីល លោក ហ្វុង សៀនស្ទើរ ផ្តល់នូវបទពិសោធន៍ល្អៗក្នុងការប្រើប្រាស់ ។HUAWEI WATCH GT 5 Series មានចំណុចពិសេសដូចជា៖
ចំនុចពិសេសទី ១ : ជានាឡិកាឆ្លាតវៃទំនើបទទាន់សម័យឈានមុខគេ រចនារូបរាង បែប Fashion និង Luxury ផ្តល់នូវប្រណីតភាព លិចធ្លោរ និង ថ្លៃថ្នូរ ដែលមាន វត្ថុធាតុដើមផលិតដូចទៅនឹងនាឡិកាតម្លៃខ្ទង់មឺនសែនដុល្លាដូចជាតួនាឡិកាផលិតពីTitanium និងកញ្ចក់ Sapphire Glass មានភាពធន់ខ្លាំងនឹងការសឹកឆ្កូត 200% ធន់សំណឹកជាតិប្រៃ 100% នឹង ការពារជម្រាបទឹកជម្រៅ 50ម៉ែត។លោក ហេង វិសាល និង ស្រីនា បានភ្ចាក់ផ្អើលទៅលើការរចនារូបរាងបែប Fashion ពាក់ទៅស្អាតទាន់សម័យ ស្អាតប្រណីត ផលិតចេញពីវត្ថុធាតុដើមគុណភាពខ្ពស់គឺ តួនាឡិកាផលិតពី Titanium និង កញ្ចក់ Sapphire Glass អាចដោនឡូដនឹងប្តូរមុខនាឡិការហូតជាង 3មឺនមុខ ផ្លាស់ប្តូរមុខស្តាយបានគ្រប់កល:ទេស:ចូលរួមបានគ្រប់កម្មវិធីនានា។ចំនុចពិសេសទី 2: ផ្តល់ភាពងាយស្រួលក្នុងការប្រើប្រាស់ប្រាចាំថ្ងៃដូចជាថ្មសាកម្តងប្រើបានរហូតដល់ 14ថ្ងៃ ឬ មួយខែសាកថ្មតែ2ដង ភ្ជាប់បានទំាង iOS & Android អាចធ្វើការ Reply Message ឬ និយាយជាសំឡេងចេញជាអក្សរ) ដោយប្រើ Full Keyboard នៅលើនាឡិកាផ្ទាល់ ជពិសេសបំពាក់មុខងារ Bluetooth Call តាម App ល្បីៗដូចជា Telegram , Messenger ជាដើម ។លោក Jerry លោក ស័ក សេរីវុធ នឹង ហ្វុងសៀងស្ទើរ ជាអ្នកប្រើប្រាស់ផ្ទាល់បានចែករំលែកបទពិសោធន៍ ច្បាស់ៗថា នេះជានាឡិកាឆ្លាតវៃដែលមានថ្មកាន់បានយូរមួយខែសាកតែ២ដង សាកថ្មតាម Wireless Charge ក៏លឿន ងាយស្រួលក្នុងការប្រើប្រាស់ប្រចំថ្ងៃ ជាពិសេសអាចភ្ជាប់បានគ្រប់ប្រភេទទូរស័ព្ទ Android & IOS ។
ចំនុចពិសេសទី 3: ជានាឡិកាឆ្លាតវៃដែលអាចប្រើ Offline Maps អាចដោនឡូដ Maps ក្នុងប្រទេសកម្ពុជា ឬ Global Maps មិនបាច់ Internet ដោយមិនខ្លាចវង្វេងផ្លូវ មុខងារ Offline Maps អាចអោយយើង Touch បញ្ជាលើអេក្រង់ផ្ទាល់ យើងអាចបង្វិលប៉ូតុងដើម្បី ហ្ស៊ូមមើលទីតាំងដែលយើងកំពង់ឈរ ចាប់បានទីតាំងបានយ៉ាងសុក្រិតជាមួយប្រព័ន្ធ GPS ជាមួយបច្ចេកវិទ្យា Huawei Sunflower Positioning System ចាប់ទីតាំងលឿន នឹង ច្បាស់បំផុត សម្រាប់អ្នកដំណើរកំសាន្តមិនខ្លាចវង្វេងផ្លូវ ។ចំនុចពិសេសទី 4: មុខងារ សុខភាពផ្លូវចិត្ត Emotional Wellbeing ដំបូងគេ ដែលអាចតាមដានសុខភាពផ្លូវចិត្តដឹងពីស្ថានភាពអរម្មណ៍សប្បាយចិត្តឬមិនសប្បាយចិត្ត ជាពិសេសផ្តល់ជូន Exclusive Pet Penda ដែលធ្វើការផ្លាស់ប្តូរសកម្មភាពកាយវិការទឹកមុខទៅតាមអរម្មណ៍របស់យើង ។លោក វិសាល និង ស្រីនា ក៍បានបង្ហាញចំណាប់អារម្មណ៍ទៅលើមុខងារសុខភាពថ្មីនេះផងដែរ មុខងារគឺជាមុខងារសុខភាពផ្លូវចិត្តដំបូងគេបំពាក់នៅលើនាឡិកាឆ្លាតវៃ អាចតាមដាននៅ ស្ថាភាពអារម្មណ៍សប្បាយចិត្ត ឬ មិនសប្បាយចិត្ត ស្ថានភាពស្ត្រេស គឺយើងអាចតាមដានជាប្រចាំថ្ងៃ ។ចំនុចពិសេសទី 5: ផ្តល់នូវមុខងារកីឡា Professional ជាង 100ប្រភេទ និង មុខងារសុខភាពជាច្រើដូចជា មុខងារ ECG , វាស់ចង្វាក់បេះដូងលម្អិត PPG តាមដានដំណេក តាមដានការសស្រមុក ឬ តាមដានការដកដង្ហើម មុខងារវាស់ភាពស្ត្រេស Stress មុខងារវាស់អ៊ុកសីសែនក្នុងឈាម Spo2 មុខងារវាស់កម្តៅជាដើម.. ។HUAWEI WATCH GT 5 Series មានតម្លៃលក់ជាផ្លូវការចាប់ពី $219 ជាតម្លៃដាក់លក់ផ្លូវការក្នុងប្រទេសកម្ពុជា ទទួលបានការដូរ ខ្សែរនាឡិកា និង ស្រ្គីនការពារ។ អតិថិជនទាំងអស់អាចរកជាវបាននៅតាមបណ្តា Huawei Showroom និង ហាងលក់ទូរស័ព្ទដៃទូរទាំងប្រទេសកម្ពុជាចាប់ពីថ្ងៃនេះតទៅ ។