សហរដ្ឋអាមេរិក ៖ បច្ចុប្បន្ន ថ្មបានក្លាយជាផ្នែកមួយនៃជីវិតរបស់យើង ដូចជា ៖ ថ្មទូរស័ព្ទ, ថ្មសម្ភារៈអេឡិចត្រូនិក និងថ្មរថយន្តអគ្គិសនី ប៉ុន្តែបញ្ហាធំរបស់ថ្មទាំងនេះ គឺសមត្ថភាពថ្មនឹងថយចុះនៅពេលប្រើប្រាស់វាកាន់តែយូរ ។ ហេតុនេះ យើងក៏បោះវាចោល និងទិញថ្មថ្មីទៀតមកប្រើប្រាស់ ។

យើងឃើញថា បើទោះជាយើងមានវិធីថែទាំថ្មទូរស័ព្ទរបស់ខ្លួន ដើម្បីឱ្យប្រើប្រាស់បានយូរ ដូចជា ៖ ការរក្សាកម្រិតថ្ម ចាប់ពី៣០% ទៅ៧០% ឬប្រើប្រាស់វិធីផ្សេងក្តី ប៉ុន្តែចុងក្រោយ ថ្មទូរស័ព្ទនៅតែខូចដដែល ហើយយើងក៏ត្រូវបោះវាចោលឱ្យក្លាយជាសំរាមយ៉ាងច្រើន ។

កាលពីថ្ងៃទី២៤ ខែតុលា ឆ្នាំ២០២៤ សារព័ត៌មានបរទេសរាយការណ៍ថា អ្នកស្រាវជ្រាវមកពីសាកលវិទ្យាល័យ Stanford សហរដ្ឋអាមេរិក បានរកឃើញវិធីជួយឱ្យថ្មស៊ីលីកូន ដំណើរការឡើងវិញ ដោយអ្នកស្រាវជ្រាវបានផ្សព្វផ្សាយលទ្ធផលស្រាវជ្រាវរបស់ខ្លួនក្នុងទស្សនាវដ្តី Science ។ អ្នកស្រាវជ្រាវអាមេរិកនិយាយថា មូលហេតុធ្វើឱ្យថ្មស៊ីលីកូន ខូចប្រើប្រាស់លែងកើត គឺដោយសារភាគល្អិតស៊ីលីកូន នៅផ្នែកខាងក្នុងថ្មបែក ហើយវាពុំអាចផ្ទុកចរន្តអគ្គិសនីបានបន្តទៀត ។

ប៉ុន្តែអ្នកស្រាវជ្រាវរកឃើញថា ការប្រើប្រាស់ចរន្តអគ្គិសនីបែប Pulse ក្នុងរយៈពេលសមស្របប្រមាណ៥នាទី នឹងអាចជួយឱ្យភាគល្អិតស៊ីលីកូន តភ្ជាប់គ្នាវិញបាន ។ តាមការសាកល្បងជំហានដំបូងឃើញថា វិធីនេះអាចជួយឱ្យថ្មទូរស័ព្ទខូចៗដំណើរការឡើងវិញរហូតដល់៣០% ។

គួរបញ្ជាក់ថា ការប្រើប្រាស់ចរន្តអគ្គិសនីបែប Pulse គឺជាការបញ្ជូនចរន្តអគ្គិសនីតាមការកំណត់ ដែលស្រដៀងគ្នានឹងចង្វាក់ជីពចរ ។ លក្ខណៈសំខាន់របស់វា គឺមានពេលវេលាបើក-បិទ, មានប្រេកង់ត្រឹមត្រូវ និងទំហំចរន្តអគ្គិសនី ហើយយើងអាចកំណត់លក្ខណៈទាំងនេះបាន លុះត្រាតែប្រើប្រាស់ឧបករណ៍ឯកទេស ។

នេះជាការចាប់ផ្តើមប្រមូលថ្មខូចគុណភាពយកមកប្រើប្រាស់ឡើងវិញ និងអាចជួយកាត់បន្ថយសំរាមអេឡិចត្រូនិកបានមួយចំនួន ។ ការរកឃើញរបស់អ្នកស្រាវជ្រាវអាមេរិកនេះ អាចជាគន្លឹះសំខាន់ក្នុងការអភិវឌ្ឍបច្ចេកវិទ្យាថ្មឱ្យកាន់តែមានគុណភាព និងពុំចាំបាច់ផ្លាស់ប្តូរថ្មសម្ភារៈអេឡិចត្រូនិកញឹកញាប់ នាថ្ងៃអនាគត ៕

ប្រទេសអាល្លឺម៉ង់ ៖ យើងឃើញថា បច្ចុប្បន្ន បច្ចេកវិទ្យាបានរីកចម្រើនយ៉ាងឆាប់រហ័ស មិនថាបច្ចេកវិទ្យាមនុស្សយន្ត, សម្ភារៈអេឡិចត្រូនិក និងការទំនាក់ទំនង ហើយវាធ្វើឱ្យមនុស្សកាន់តែមានភាពងាយស្រួលខ្លាំងឡើង ។ ជាក់ស្តែង ក្រុមហ៊ុនអាល្លឺម៉ង់ឈ្មោះ GoodBytz បានផលិតចង្ក្រានបាយស្វ័យប្រវត្តិអាចចម្អិនអាហាររហូតដល់ជាង១០០មុខ តាមរយៈការបញ្ជាលើអេក្រង់ ។

មន្ទីរពេទ្យ Tuebingen នៅប្រទេសអាល្លឺម៉ង់ ក៏បានទិញចង្ក្រានបាយនេះមកប្រើប្រាស់ផងដែរ ព្រោះចង់ឱ្យគ្រូពេទ្យបានបរិភោគអាហារទើបចម្អិនថ្មីៗគ្រប់ពេលវេលា ដោយសារគ្រូពេទ្យបានបំពេញការងារនឿយហត់ និងពុំទៀងទាត់ពេលវេលា ។

ចង្ក្រានបាយស្វ័យប្រវត្តិនេះមានដៃម៉ាស៊ីនសម្រាប់ចម្អិនអាហារចំនួន១២០មុខ និងចំណាយរយៈពេលខ្លី ដោយការប្រើប្រាស់គ្រឿងផ្សំដែលមនុស្សត្រៀមទុក ។ គេអាចប្រើប្រាស់ចង្ក្រានបាយស្វ័យប្រវត្តិឱ្យចម្អិនអាហារ២៤ម៉ោងលើ២៤ម៉ោង ដោយការបញ្ជាកម្មវិធីក្នុងអេក្រង់ ហើយពេលអាហារឆ្អិន វានឹងបញ្ជូនឱ្យមនុស្ស ។

ក្រុមហ៊ុន GoodBytz បានផលិតចង្ក្រានបាយស្វ័យប្រវត្តិមានទំហំធំ ដែលផ្នែកខាងក្រោយរបស់ចង្ក្រាននេះ គឺជាទូរទឹកកកអាចបែងចែកបន្លែ និងគ្រឿងផ្សំតាមប្រភេទ ។ បន្ទាប់មក វានឹងយកគ្រឿងផ្សំទាំងនេះដាក់ចូលក្នុងឆ្នាំងដើម្បីចម្អិន ក្រោយការចុចបញ្ជាតាមកញ្ចក់អេក្រង់នៅផ្នែកខាងមុខ ។

អាហារចម្អិនដោយចង្ក្រានបាយស្វ័យប្រវត្តិ មានដូចជា ៖ អាហារអាល្លឺម៉ង់ និងអាហារនៅអាស៊ីជាច្រើនមុខ ។ ក្រុមហ៊ុនបញ្ជាក់ថា ការផលិតចង្ក្រានបាយស្វ័យប្រវត្តិ មិនមែនសម្រាប់ជំនួសចុងភៅទេ ប៉ុន្តែវាជាជម្រើសមួយទៀតសម្រាប់អ្នកបរិភោគ ដូចជា ៖ វេជ្ជបណ្ឌិត និងគ្រូពេទ្យ ដែលពួកគេបំពេញការងារពុំទៀងទាត់ពេលវេលា និងគ្មានពេលចម្អិនអាហារ ។

ចង្ក្រាននេះអាចដំណើរការបានគ្រប់ពេលវេលា មិនថាពេលព្រឹក ឬពេលល្ងាច ហើយការចម្អិនអាហារ គឺចាប់ផ្តើមពីការយកសាច់ និងបន្លែមកឆា, ចៀន រួចហើយដាក់គ្រឿងផ្សំ ដែលប្រើប្រាស់ឆ្នាំង ចំនួន៨ ។ ក្រុមហ៊ុនបានលក់ចង្ក្រាននេះតាំងពីខែឧសភា ឆ្នាំ២០២៤ មកម៉្លេះ ៕

ប្រទេសឡាវ៖ ប្រទេសឡាវបច្ចុប្បន្នបានកំពុងសាងសង់ស្ថានីយ៍ថែទាំ; ផ្លូវឡានក្រុង; ប្រព័ន្ធប្រតិបត្តិការ; ការដំឡើងបណ្តាញទំនាក់ទំនងរថយន្តក្រុង BRT តាមរយៈខ្សែកាបអុបទិក និងការដាក់កាមេរ៉ា CCTV នៅតាមដងផ្លូវទាំងអស់ ដោយគម្រោងនេះនឹងបើកដំណើរការជាផ្លូវការនៅឆ្នាំ ២០២៦។

យោងតាមសារព័ត៌មានបរទេស Laotian Times ក្រសួងសាធារណការ និងដឹកជញ្ជូនក្នុងប្រទេសឡាវ កំពុងពិចារណាដាក់ចេញនូវផែនការថ្មីនេះ ដើម្បីបង្កើនហេដ្ឋារចនាសម្ព័ន្ធរបស់ខ្លួនក្នុងរយៈពេល ៥ ឆ្នាំខាងមុខ ដោយមានគោលបំណងផ្លាស់ប្តូរប្រទេសពីក្រីក្រ ទៅកម្រិតមធ្យម។

កាលពីថ្ងៃទី២៩ ខែតុលា ឆ្នាំ២០២៤ មន្ត្រីមកពីក្រសួង រួមជាមួយនឹងតំណាងស្ថានទូតជប៉ុន ធនាគារពិភពលោក និងធនាគារអភិវឌ្ឍន៍អាស៊ី បានកោះប្រជុំសម្រាប់កិច្ចប្រជុំក្រុមការងារវិស័យហេដ្ឋារចនាសម្ព័ន្ធ (ISWG) លើកទី ១៦។ ការផ្តោតសំខាន់នៃការប្រមូលផ្តុំនេះគឺដើម្បីបង្កើតផែនការរយៈពេលប្រាំឆ្នាំដ៏ទូលំទូលាយសម្រាប់ការងារសាធារណៈ និងការដឹកជញ្ជូន។ ផ្នែកសំខាន់ៗនៃការសង្កត់ធ្ងន់រួមមានហេដ្ឋារចនាសម្ព័ន្ធបៃតង ការធានាហិរញ្ញវត្ថុ ការអនុវត្តការផ្លាស់ប្តូរបទប្បញ្ញត្តិ និងការកែលម្អប្រសិទ្ធភាពប្រតិបត្តិការ។

ហេតុនេះក្នុងអំឡុងពេលប្រមូលផ្តុំអ្នកចូលរួមមានគោលបំណងបញ្ជាក់ពីផែនការរបស់រដ្ឋាភិបាលសម្រាប់ការងារសាធារណៈ និងការដឹកជញ្ជូន និងបង្កើតអាទិភាពក្នុងចំណោមដៃគូ។ គោលបំណងសំខាន់ៗរួមមានការឈានដល់ការឯកភាពគ្នាលើសកម្មភាពជាក់លាក់សម្រាប់ឆ្នាំ ២០២៥។ ដូច្នេះយុទ្ធសាស្ត្ររបស់រដ្ឋាភិបាលទាំងមូលសម្រាប់ឆ្នាំក្រោយ ពាក់ព័ន្ធនឹងការលើកកម្ពស់ធនធានមនុស្ស ការកែលម្អអភិបាលកិច្ច និងរដ្ឋបាលសាធារណៈ ក៏ដូចជាការពង្រឹងការការពារជាតិ សន្តិសុខសាធារណៈ និងគោលនយោបាយការបរទេស៕

ក្រុមហ៊ុន Tesla បានរចនារថយន្តម៉ាក Model Y ឱ្យក្លាយជាម៉ាក Tesla Model Y Juniper ដែលមានលក្ខណៈលេចធ្លោ និងបច្ចេកវិទ្យាទំនើប ដើម្បីមានប្រៀបក្នុងការប្រកួតប្រជែងលើទីផ្សាររថយន្តពិភពលោក និងអាចប្រកួតជាមួយក្រុមហ៊ុនផលិតរថយន្តអគ្គិសនីចិន ។

ក្រុមហ៊ុនបានបំពាក់អំពូល LED ពេញទាំងផ្នែកខាងមុខ និងខាងក្រោយរថយន្ត Tesla Model Y Juniper ។ ការរចនារថយន្តបែបនេះបានធ្វើឱ្យអតិថិជននឹកឃើញដល់រថយន្តចិនម៉ាក Xpeng ហើយគិតថា Tesla រចនារថយន្តរបស់ខ្លួនឱ្យស្រដៀងរថយន្តចិន ដើម្បីទាក់ទាញអតិថិជនចិន ។

Tesla មានគម្រោងផលិតរថយន្ត Model Y Juniper នៅចុងខែវិច្ឆិកា ឆ្នាំ២០២៤ ក្នុងរោងចក្រ Giga Shanghai របស់ Tesla ។ ក្រុមហ៊ុនរំពឹងថា នឹងលក់រថយន្ត៥កៅអី នៅត្រីមាសទី១ ឆ្នាំ២០២៥ និងរថយន្ត៧កៅអី នៅត្រីមាសទី៤ ឆ្នាំ២០២៥ ។

ការបង្ហាញរថយន្តម៉ាក Model Y Juniper នេះ បានបង្ហាញពីយុទ្ធសាស្ត្ររបស់ Tesla ដើម្បីរក្សាចំណែកទីផ្សាររថយន្តអគ្គិសនីនៅប្រទេសចិន ដែលកំពុងកើនឡើងយ៉ាងឆាប់រហ័ស ។ កន្លងមក Tesla បានប្រឈមនឹងសម្ពាធពីក្រុមហ៊ុនផលិតរថយន្តអគ្គិសនីថ្មីៗ ដូចជា ៖ Onvo, Xpeng និង Zeekr ដែលក្រុមហ៊ុនទាំងនេះបានផលិតរថយន្តជាច្រើនសម្រាប់ប្រជែងក្នុងទីផ្សារ ។

រថយន្ត Model Y Juniper បានបង្ហាញពីយុទ្ធសាស្ត្រទីផ្សាររបស់រថយន្តអគ្គិសនីម៉ាក SUV ដ៏ពេញនិយមរបស់ Tesla ហើយរថយន្ត Model Y Juniper ត្រូវបានរចនាឡើងសម្រាប់លក់នៅចិន និងតម្រូវចិត្តអតិថិជនចិន ។ Tesla នៅតែនាំមុខក្នុងទីផ្សាររថយន្តអគ្គិសនីលើពិភពលោក និងមានសក្តានុពលកំណើនខ្ពស់ ជាពិសេស នៅចិន ដោយសាររដ្ឋាភិបាលចិនគាំទ្រការលក់រថយន្ត Model Y Juniper និងរថយន្តថ្មីៗ ដើម្បីផ្តល់ទំនុកចិត្តដល់វិនិយោគិន នាថ្ងៃអនាគត ។

ក្រុមហ៊ុន Tesla មានឈ្មោះល្បីល្បាញផ្នែកពូកែច្នៃប្រឌិត ដូចជា ៖ បច្ចេកវិទ្យាថ្ម, ប្រព័ន្ធបើកបរស្វ័យប្រវត្តិ និង Software ហើយធ្វើឱ្យក្រុមហ៊ុននេះមានប្រៀប និងអាចទាក់ទាញវិនិយោគិន ដែលកំពុងស្វែងរកក្រុមហ៊ុនមានសក្តានុពលខ្លាំងរយៈពេលវែង ។

លើសពីនេះ Tesla បានពង្រីកទីផ្សាររថយន្តរបស់ខ្លួនពាសពេញពិភពលោក ព្រមទាំងក្នុងតំបន់អាស៊ានផងដែរ ហើយរថយន្តរបស់ Tesla ទទួលបានការចាប់អារម្មណ៍យ៉ាងខ្លាំងពីអតិថិជន ៕

វៀតណាម៖ មិនមែនជាប្រទេសកំពុងអភិវឌ្ឍដូចមុនទៀតទេ វៀតណាមឥឡូវនេះគឺបានក្លាយជាប្រទេសមួយត្រូវបានគេស្គាល់ថា មានបច្ចេកវិទ្យាទំនើបៗច្រើនជាងគេនៅអាស៊ីអាគ្នេយ៍ ដោយបច្ចុប្បន្នប្រទេសនេះគ្រោងសាងសាងតាក់ស៊ីហោះ ក្នុងគោលបំណងកាត់បន្ថយការកកស្ទះ។

យោងតាម Cafef.vn ថ្មីៗនេះបានឱ្យដឹងថា ក្រសួងដឹកជញ្ជូនវៀតណាមកំពុងពិចារណាសាងសង់គម្រោងតាក់ស៊ីហោះហើរសាកល្បងនៅក្នុងខេត្ត។ គម្រោងនោះមានឈ្មោះថា Flying Taxi គឺជាមធ្យោបាយនៃការដឹកជញ្ជូនដោយប្រើប្រាស់យន្តហោះអគ្គិសនីខ្នាតតូច ហោះឡើង និងចុះចតបញ្ឈរ ប្រើសម្រាប់ដឹកជញ្ជូនមនុស្សប្រហែល ៤-៥ នាក់។

មានន័យថាលោកអ្នកអាច Boking យន្តហោះខ្នាតតូចនេះធ្វើដំណើរលើអាកាសទៅវិញ ទៅមកក្នុងប្រទេសបានដោយសេរី នៅពេលដែលលោកអ្នកប្រញាប់ ស្របពេលដែលផ្លូវកំពុងស្ទះចរាចរណ៍។ ក្រៅពីជួយកាត់បន្ថយការកកស្ទះ គម្រោងសាងសង់តាក់ស៊ីហោះនេះក៏ត្រូវបានគេចាត់ទុកថាជាមធ្យោបាយធ្វើដំណើរដ៏ល្អមួយសម្រាប់ភ្ញៀវទេសចរដើម្បីមើលទេសភាពដ៏ស្រស់ស្អាតពីលើផងដែរ។

លើសពីនេះ ដោយសារពួកគេប្រើប្រាស់ថាមពលអគ្គិសនី តាក់ស៊ីហោះក៏មានពណ៌បៃតង ជាយានជំនិះទំនើបដែលមិនបញ្ចេញសារធាតុគ្រោះថ្នាក់ បើប្រៀបធៀបទៅនឹងរថយន្តផ្លូវ និងផ្លូវដែកធម្មតា ហើយមានភាពសាមញ្ញក្នុងការធ្វើដំណើរ ក៏ដូចជាចំណេញពេលវេលាច្រើនទៀតផង។ គួរបញ្ជាក់ដែរថា តាក់ស៊ីហោះ គឺជាទម្រង់មួយដែលត្រូវបានស្រាវជ្រាវ និងសាកល្បងដោយប្រទេសជាច្រើនដូចជា ចិន អាមេរិក អាល្លឺម៉ង់ អង់គ្លេស សិង្ហបុរី កូរ៉េ និងឥណ្ឌូនេស៊ី…។

ហេតុនេះមិនមែនមានតែប្រទេសវៀតណាមទេ ដែលមានគម្រោងផលិតតាក់ស៊ីហោះ ប្រទេសឥណ្ឌូនេស៊ីក៏មានគម្រោងផលិតតាក់ស៊ីហោះដែរ។ កាលពីខែកក្កដាកន្លងទៅ ប្រទេសឥណ្ឌូនេស៊ីបានសាកល្បងតាក់ស៊ីហោះក្នុងរដ្ឋធានី Nusantara ដោយម៉ូដែលតាក់ស៊ីហោះនេះមានសមត្ថភាពផ្ទុកមនុស្សបាន ៥ នាក់។ ហើយកាលពីឆ្នាំមុន ប្រទេសចិនក៏បានសាកល្បងតាក់ស៊ីហោះ ដែលអាចផ្ទុកមនុស្សបានតែ ២ ផងដែរ៕