ប្រទេសចិន ៖ ចិនជាប្រទេសមហាអំណាច និងជាគូប្រជែងជាមួយអាមេរិកផ្នែកពាណិជ្ជកម្មបានបង្ហាញក្តីសង្ឃឹមថា ចិននឹងនៅតែរក្សាទំនាក់ទំនងល្អ និងសុខសន្តិភាពជាមួយអាមេរិក ។ ចិនលើកឡើងបែបនេះ ក្រោយពីលោក Donald Trump ជាបេក្ខជនមកពីគណបក្ស Republican បានទទួលជ័យជម្នះក្នុងការបោះឆ្នោតឆ្នាំ២០២៤ ដែលមានសំឡេងឆ្នោតច្រើនជាងលោកស្រី Kamala Harris មកពីគណបក្ស Democrat ។

លោកស្រី Mao Ning មន្ត្រីនាំពាក្យក្រសួងការបរទេសចិនបានថ្លែង កាលពីថ្ងៃទី៦ ខែវិច្ឆិកា ឆ្នាំ២០២៤ ថា ប្រទេសចិននឹងរក្សាសម្ព័ន្ធភាពជាមួយអាមេរិក ហើយប្រទេសទាំងពីរនឹងគោរពគ្នាទៅវិញទៅមក ។ យើងនឹងរក្សាសុខសន្តិភាពរួមគ្នា និងសហការដើម្បីទទួលបានផលប្រយោជន៍ស្មើគ្នាបន្តទៀត ។

គោលនយោបាយចិនស្របជាមួយអាមេរិក ហើយការបោះឆ្នោតជ្រើសរើសប្រធានាធិបតីអាមេរិក គឺជាកិច្ចការផ្ទៃក្នុងរបស់អាមេរិក ហើយចិននឹងគោរពតាមការសម្រេចចិត្តរបស់ពលរដ្ឋអាមេរិក ។ ក្រោយការប្រកាសពីលទ្ធផលការបោះឆ្នោតនៅអាមេរិកជាផ្លូវការរួចហើយ ចិននឹងអនុវត្តការងារពាក់ព័ន្ធបន្តទៀតជាមួយអាមេរិក ។

ប្រទេសចិនបានតាមដានយ៉ាងខ្លាំងពីការបោះឆ្នោតនៅអាមេរិក ហើយក្នុងបណ្តាញសង្គមដ៏ពេញនិយមរបស់ចិនឈ្មោះ Weibo មានការជជែកគ្នាយ៉ាងច្រើនពីការជ្រើសរើសលោក Trump ជាប្រធានាធិបតី ។ អ្នកលេងបណ្តាញសង្គមចិននិយាយថា ពួកគេសូមចូលរួមរីករាយជាមួយលោក Trump បានទទួលជោគជ័យក្នុងការបោះឆ្នោត លោកនឹងអភិវឌ្ឍន៍ប្រទេសបន្តទៀត ហើយបញ្ឈប់ការជ្រៀតជ្រែកប្រទេសផ្សេង ។

មតិខ្លះបានលើកឡើងពាក់ព័ន្ធនឹងបញ្ហាពាណិជ្ជកម្មរវាងចិន និងអាមេរិកថា សង្គ្រាមពាណិជ្ជកម្មចាប់ផ្តើមហើយ ដោយសារអាមេរិកដំឡើងពន្ធទំនិញចិន ។ ហេតុនេះ ក្រុមហ៊ុនចិនរកស៊ីក្រៅស្រុកគួរតែពិចារណាផ្លាស់ប្តូរការងារឱ្យលឿនបំផុត ។

ដោយឡែក លោក Dmitry Peskov មន្ត្រីនាំពាក្យវិមានក្រឹមឡាំង (ឬវិមានប្រធានាធិបតីរុស្ស៊ី) បាននិយាយមកកាន់ប្រព័ន្ធផ្សព្វផ្សាយថា រុស្ស៊ីនឹងវាយតម្លៃលោក Trump ប្រធានាធិបតីថ្មីអាមេរិកតាមរយៈទង្វើ ។ លោកពុំដឹងថា តើប្រធានាធិបតីរុស្ស៊ី លោក វ៉្លាឌីមៀ ពូទីន នឹងចូលរួមអបអរជ័យជម្នះក្នុងការបោះឆ្នោតរបស់លោក Trump ដែរឬទេ ដោយសារអាមេរិកពុំមែនជាមិត្តរុស្ស៊ី ហើយទំនាក់ទំនងរវាងប្រទេសទាំងពីរស្ថិតនៅកម្រិតទាបបំផុតក្នុងប្រវត្តិសាស្ត្រ ។ ពេលវេលានឹងពិសោធន៍ឱ្យឃើញថា តើលោក Trump ចង់បញ្ឈប់សង្គ្រាមនៅអ៊ុយក្រែននឹងក្លាយជាការពិតឬទេ?

យើងបាននិយាយជាច្រើនលើកថា អាមេរិកអាចបញ្ចប់សង្គ្រាមបាន ប៉ុន្តែពុំអាចបញ្ចប់ក្នុងរយៈពេលខ្លីទេ ។ រីឯករណីអាមេរិកអាចផ្លាស់ប្តូរគោលនយោបាយការបរទេសឬយ៉ាងណានោះ រុស្ស៊ីនឹងរង់ចាំមើលក្រោយប្រធានាធិបតីថ្មីអាមេរិកឡើងកាន់តំណែង នៅខែមករា ឆ្នាំ២០២៥ ។ នេះបើតាមការលើកឡើងរបស់មន្ត្រីនាំពាក្យវិមានក្រឹមឡាំង ៕

សហរដ្ឋអាមេរិក៖ កាលពីថ្ងៃទី៦ ខែវិច្ឆិកា ឆ្នាំ២០២៤ សារព័ត៌មានបរទេសធំៗមួយចំនួនបានប្រកាសថា បេក្ខជនមកពីគណបក្សសាធារណរដ្ឋគឺលោក Donald Trump បានវ៉ាដាច់គូប្រជែងរបស់លោកហើយគឺលោកស្រី Kamala Harris ដើម្បីក្លាយជាប្រធានាធិបតីទី ៤៧ របស់សហរដ្ឋអាមេរិក។

លោកស្រី Kamala Harris បានចាប់ផ្តើមឈរឈ្មោះសម្រាប់តំណែងនេះនៅក្នុងខែសីហា បន្ទាប់ពីប្រធានាធិបតី Joe Biden បានប្រកាសដកខ្លួនចេញពីការប្រជែងតំណែងសម្រាប់សេតវិមាន។ ដំណើរយុទ្ធនាការទាំងមូលរបស់បេក្ខជនប្រជាធិបតេយ្យមានរយៈពេលជាង ១០០ ថ្ងៃ ដែលជារយៈពេលខ្លីបំផុតក្នុងប្រវត្តិសាស្ត្រនយោបាយអាមេរិកសម័យទំនើប។

នាងត្រូវបានគាំទ្រដោយស៊េរីអតីតប្រធានាធិបតី និងតារាកម្សាន្តដ៏មានឥទ្ធិពល។ ទោះជាយ៉ាងណា លទ្ធផលនៃការរាប់សន្លឹកឆ្នោតក្នុងរដ្ឋបន្ទាប់ពីថ្ងៃបោះឆ្នោតទី៥ ខែវិច្ឆិកា បានបង្ហាញថា ប្រជាប្រិយរបស់នាងគឺនៅចាញ់ Donald Trump នៅឡើយទេ។ បច្ចុប្បន្ន Trump ទទួលបានសម្លេងឆ្នោត ២៩៥ ខណៈលោកស្រី Harris ទទួលបានត្រឹមតែ ២២៧ សម្លេងប៉ុណ្ណោះ។

មូលហេតុដែលលោកស្រី Harris បរាជ័យក្នុងការប្រជែងតំណែងសេតវិមាន គឺដោយសារយុទ្ធនាការខ្លីពេក និងកង្វះសំណើជាក់លាក់ ខណៈពេលដែលអ្នកបោះឆ្នោតបង្ហាញសញ្ញានៃការមិនពេញចិត្តចំពោះរដ្ឋបាលដែលកំពុងកាន់អំណាច ត្រូវបានគេនិយាយថាជាមូលហេតុដែលលោកស្រី Harris មិនអាចក្លាយជាប្រធានាធិបតីស្ត្រីដំបូងរបស់សហរដ្ឋអាមេរិក។

លើសពីនេះគោលនយោបាយរបស់លោកស្រីគឺនៅស្ទើរ មានន័យថា សំណើដែលនាងផ្តល់ជូនប្រជាជនអាមេរិកខ្វះខ្លឹមសារ នរណាក៏អាចធ្វើបានដែរ។ ទន្ទឹមនឹងនេះ Harris ក៏ជៀសវាងប្រព័ន្ធផ្សព្វផ្សាយយ៉ាងសកម្មផងដែរ ហើយនៅពេលដែលនាងផ្តល់បទសម្ភាសន៍ម្តងៗ នាងបានចំណាយពេលភាគច្រើនរបស់នាងវាយប្រហារ Trump ប៉ុណ្ណោះ ជំនួសឱ្យការបញ្ជាក់ជាពិសេសនូវអ្វីដែលនាងអាចធ្វើបាន។ ដូច្នេះហើយនេះគឺជាហេតុផលដែលលោកស្រី Harris មិនអាចយកឈ្នះគូប្រជែងរបស់ខ្លួនបាន៕

ប្រទេសអង់គ្លេស ៖ ក្រុមហ៊ុនមួយនៅប្រទេសអង់គ្លេសបានប្រកាសលក់ដបទទេ គ្មានអ្វីសោះនៅផ្នែកខាងក្នុង ស្មើតម្លៃជាង៩០ដុល្លារអាមេរិក ប៉ុន្តែក្រុមហ៊ុននេះអះអាងថា ពួកគេបានច្រកខ្យល់អាកាសបរិសុទ្ធបំផុតនៅឆ្នេរសមុទ្រ និងតំបន់ស្ងប់ស្ងាត់ចូលក្នុងដប ។ នៅលើគំរបដបសរសេរថា «Coast Capture Air» រីឯតម្លៃវិញ គឺអាស្រ័យលើទំហំដប ។

ការប្រកាសលក់ខ្យល់បរិសុទ្ធច្រកដបនេះ ក្រោយពីមនុស្សជាច្រើនចាប់ផ្តើមបារម្ភពីបរិយាកាសកខ្វក់កើតឡើងនៅទូទាំងពិភពលោក ទើបក្រុមហ៊ុនអង់គ្លេសសម្រេចចិត្តច្រកខ្យល់បរិសុទ្ធនៅឆ្នេរសមុទ្រចូលដប ដើម្បីលក់ឱ្យអ្នកត្រូវការស្រូបខ្យល់អាកាសបរិសុទ្ធ ។ ដបកខ្យល់បរិសុទ្ធនៅឆ្នេរសមុទ្រ ទំហំតូចស្មើ៥០មីល្លីលីត្រ គឺក្រុមហ៊ុនលក់ក្នុងតម្លៃជាង៧ដុល្លារអាមេរិក ។

ដកខ្យល់បរិសុទ្ធម៉ាក Coast Capture Air ពុំមែនជាម៉ាកដំបូងគេទេ ពីព្រោះកន្លងមក ក៏មានក្រុមហ៊ុនផ្សេងទៀតលក់ខ្យល់បរិសុទ្ធដែរ ។ ប៉ុន្តែខ្យល់បរិសុទ្ធម៉ាក Coast Capture Air មានតម្លៃខ្ពស់ជាងម៉ាកផ្សេងៗ ដូចជា ៖ ដបខ្យល់បរិសុទ្ធពីឆ្នេរសមុទ្រ ទំហំ៥០០មីល្លីលីត្រ មានតម្លៃ៧៥ដុល្លារអាមេរិក រីឯដបទំហំ៧០០មីល្លីលីត្រ មានតម្លៃរហូតដល់ជាង៩០ដុល្លារអាមេរិក ។

ក្រុមហ៊ុនលក់ដបខ្យល់បរិសុទ្ធនិយាយថា ដបនីមួយៗបានបង្ហាញពីម៉ាករបស់ក្រុមហ៊ុន និងត្រូវបានច្រកខ្យល់បរិសុទ្ធបញ្ជូនពីឆ្នេរសមុទ្រដោយផ្ទាល់ ដែលស្ថិតនៅតំបន់ជនបទ គ្មានជាតិពុលពីគ្រឿងម៉ាស៊ីន ។ លើសពីនេះ សុទ្ធតែជាឆ្នេរសមុទ្រនៅឆ្ងាយៗ និងពិបាកធ្វើដំណើរទៅលេង ទើបធ្វើឱ្យខ្យល់ដែលក្រុមហ៊ុនលក់នេះពោរពេញទៅដោយគុណភាព និងមានតម្លៃខ្ពស់ ។

ក្រុមហ៊ុនបានធ្វើដំណើរទៅកាន់កោះ និងតំបន់ស្រស់ស្អាតតាមធម្មជាតិនានា ដើម្បីប្រមូលខ្យល់បរិសុទ្ធច្រកដប ហើយក្រុមហ៊ុនបានប្រើប្រាស់ឧបករណ៍វាស់ស្ទង់ខ្យល់ក្នុងដបដើម្បីឱ្យប្រាកដចិត្តថា ជាខ្យល់បរិសុទ្ធពិតប្រាកដ ។ ក្រុមហ៊ុនក៏បានណែនាំអតិថិជនពីវិធីប្រើប្រាស់ដបខ្យល់ ចំនួន១០ចំណុច រួមមាន ៖

១-រកកន្លែងស្ងប់ស្ងាត់បំផុត និងគ្មានការរំខាន
២-ញឺសសំបោរចេញពីច្រមុះ
៣-កាន់ដបខ្យល់បរិសុទ្ធដោយដៃទាំង២យ៉ាងផ្ចិតផ្ចង់ ដើម្បីឱ្យដឹងពីទម្ងន់ដប
៤-មុនបើកគំរបដប ត្រូវដកដង្ហើមចេញ-ចូលតាមធម្មតា
៥-ព្យាយាមដកដង្ហើមចេញឱ្យយូរដើម្បីជំរុញប្រព័ន្ធប្រសាទ
៦-បើកគំរបដប រួចហើយស្រូបខ្យល់បរិសុទ្ធយឺតៗ និងបិទភ្នែក
៧-ក្រោយការដកដង្ហើមចេញ-ចូល ត្រូវប្រញាប់បិទគំរបដបវិញ កុំឱ្យខ្យល់បរិសុទ្ធចេញក្រៅ
៨-ស្រូបយកខ្យល់បរិសុទ្ធឱ្យពេញសួតលើកចុងក្រោយ
៩-សង្កេតខ្លួនឯងថា មានអារម្មណ៍ស្ងប់កម្រិតណា
១០-អាចធ្វើបែបនេះឡើងវិញបាន បើចង់ស្រូបខ្យល់បរិសុទ្ធ ។

ក្រៅពីនេះ ក្រុមហ៊ុនក៏បានណែនាំឱ្យអតិថិជនបើកសំឡេងទឹករលកសមុទ្រផងដែរ ក្នុងពេលស្រូបខ្យល់បរិសុទ្ធពីក្នុងដប ដើម្បីឱ្យមានអារម្មណ៍ថា កំពុងតែស្ថិតនៅឆ្នេរសមុទ្រពិតៗ ៕

ប្រទេសអ៊ីតាលី៖ ប្រភពទឹក Trevi ក្នុងទីក្រុងរ៉ូម ប្រទេសអ៊ីតាលីគឺជាកន្លែងទេសចរណ៍ដ៏ល្បីល្បាញបំផុតមួយរបស់ពិភពលោក ត្រូវបានអ្នកទស្សនារិះ.គន់ថា អាក្រ.ក់ និងគ្មានសោភ័ណភាព។

ទីក្រុងរ៉ូមគឺជាទីក្រុងមួយក្នុងចំណោមទីក្រុងដែលមានអ្នកទស្សនាច្រើនបំផុតនៅលើពិភពលោកដែលមានអ្នកទស្សនាជាមធ្យម ២១ លាននាក់ជារៀងរាល់ឆ្នាំ។ អ្នកមកលេងទីក្រុងរ៉ូមច្រើនតែសម្រុកទៅប្រភពទឹក Trevi ដើម្បីបន់ស្រន់ និងបោះកាក់ចូលទៅក្នុងទឹកនោះ។

ទោះជាយ៉ាងណា ខណៈពេលដែលប្រភពទឹក Trevi កំពុងត្រូវបានជួសជុល អាជ្ញាធរក៏បានយកធុងទឹកតូចមួយទៅជំនួសប្រភពទឹកនោះ ដែលធ្វើឱ្យភ្ញៀវទេសចរមានការមិនពេញចិត្ត និងបានរិះ.គន់ថា អាក្រ.ក់ គ្មានសោភ័ណភាព។ ធុងបណ្ដោះអាសន្ននេះមានរាងចតុកោណ មិនមានការតុបតែង មិនស្អាត ដូចជាធុងទឹកកូនក្មេង ធ្វើឱ្យភ្ញៀវជាច្រើនហាក់មានការមិនពេញចិត្តយ៉ាងខ្លាំង។ អ្នកទេសចរម្នាក់ឈ្មោះ Jack បានពណ៌នាអំពីធុងទឹកតូចមួយនេះថា “មើលទៅគួរឱ្យអស់សំណើច”។ អ្នកខ្លះទៀតនិយាយថា ធុងទឹកនេះសម្រាប់ឱ្យក្មេងៗបោះកាក់ចូលតែប៉ុណ្ណោះ។

យោងទៅតាមរឿងព្រេង ការបោះកាក់ចូលទៅក្នុងប្រភពទឹកនឹងផ្តល់ឱកាសឱ្យអ្នកទស្សនាត្រលប់មកទីនេះម្តងទៀត ក៏ដូចជាមានសំណាងល្អជាដើម។ ហេតុនេះរៀងរាល់ពីរបីថ្ងៃម្តង កាក់ត្រូវបានប្រមូល និងផ្តល់ទៅឱ្យអង្គការសប្បុរសធម៌កាតូលិកសកល សាខាការីតាស អស់រយៈពេល ១៥ ឆ្នាំមកហើយ។ ប្រពៃណីនេះបានជួយឱ្យការីតាសប្រមូលប្រាក់ប្រមាណ ១,៥ លានអឺរ៉ូក្នុងមួយឆ្នាំៗ។

ទោះបីជាប្រភពទឹកនេះកំពុងរងការរិះគន់យ៉ាងណាក៏ដោយ ក៏ភ្ញៀវទេសចររាប់ពាន់នាក់នៅតែមកទីនេះ ដើម្បីបន់ស្រន់ និងបោះកាក់ចូលដដែល។ ដើម្បីគ្រប់គ្រងការកើនឡើងនៃចំនួនអ្នកទស្សនាទៅកាន់ប្រភពទឹក អាជ្ញាធរគ្រោងនឹងបិទតំបន់ជុំវិញ Trevi ។ បន្ទាប់មកអ្នកទស្សនានឹងត្រូវធ្វើការកក់តាមអ៊ីនធឺណិត បង់ថ្លៃ ២ អឺរ៉ូ ដើម្បីចូលទៅខាងក្នុង និងដើររយៈពេល ៣០ នាទីនៅក្នុងតំបន់៕