ការស្រាវជ្រាវបង្ហាញថា ការប្រើប្រាស់ TikTok នៅលើពិភពលោក បានធ្វើឱ្យប៉ះពាល់បរិស្ថាន និងបញ្ចេញកាបូនច្រើនជាងការបញ្ចេញកាបូនរបស់ប្រទេសក្រិកទាំងមូល កាលពីឆ្នាំ២០២៣ ទៅទៀត ។ លើសពីនេះ វាបានបញ្ចេញកាបូនច្រើនជាងបណ្តាញសង្គមផ្សេងៗ ដូចជា ៖ Twitter/X និង Snapchat ។

Greenly គឺជាទីប្រឹក្សាផ្នែកកាបូនដែលមានស្នាក់ការធំនៅទីក្រុងប៉ារីស ប្រទេសបារាំង បញ្ជាក់ថា ការប្រើប្រាស់បណ្តាញសង្គមធ្វើឱ្យប៉ះពាល់ដល់បរិស្ថាន ដូចជា ៖ បរិមាណកាបូនរបស់ TikTok នៅឆ្នាំ២០២៣ សម្រាប់អ្នកប្រើប្រាស់នៅអាមេរិក អង់គ្លេស និងបារាំង គឺខ្ពស់ជាងបរិមាណកាបូនរបស់ Twitter/X និង Snapchat ។

បច្ចុប្បន្ន TikTok មានអ្នកប្រើប្រាស់រហូតដល់ជាង១ពាន់លាននាក់ លើពិភពលោក ហើយការរកឃើញរបស់ Greenly បង្ហាញថា បរិមាណការបញ្ចេញកាបូនរបស់ TikTok គឺខ្ពស់ជាង Instagram បន្តិច ដែលបណ្តាលមកពីការពេញនិយមប្រើប្រាស់ TikTok ។ បើប្រៀបធៀបគ្នា គឺអ្នកប្រើ Instagram បានចំណាយពេលជាមធ្យម ស្មើនឹង៣០នាទីក្នុង១ថ្ងៃ រីឯអ្នកប្រើ TikTok បានចំណាយពេលមើលវីដេអូខ្លីជាមធ្យម រហូតដល់៤៥នាទី ។

បើគិតពីការបញ្ចេញកាបូនសរុបរបស់ TikTok ដែលមានអ្នកប្រើប្រាស់នៅទូទាំងពិភពលោក គឺវាច្រើនជាងការបញ្ចេញកាបូនរបស់ប្រទេសក្រិកកាលពីឆ្នាំ២០២៣ ទៅទៀត ។ ក្រៅពីនេះ បើវាស់ការបញ្ចេញកាបូនក្នុងរយៈពេល១នាទី ឃើញថា Youtube បានបញ្ចេញកាបូនច្រើនជាងគេ បន្ទាប់មក គឺ TikTok និង Instagram ។

កន្លងមក TikTok ធ្លាប់ប្រកាសពីគោលដៅរបស់ខ្លួន គឺបញ្ចេញកាបូនស្មើសូន្យនៅឆ្នាំ២០៣០ តាមរយៈការអនុវត្តគម្រោង Project Clover ដែលចាប់ផ្តើមដំណើរការតាំងពីឆ្នាំ២០២៣ ។ ប៉ុន្តែគេពុំដឹងថា តើ TikTok នឹងអាចសម្រេចគោលដៅកាបូនស្មើសូន្យដែរឬអត់ ខណៈការប្រើប្រាស់ TikTok កាន់តែពេញនិយមខ្លាំងឡើង ៕

ប្រទេសអង់គ្លេស ៖ ប្រទេសអង់គ្លេសបានសាកល្បងប្រើប្រាស់កាមេរ៉ាបំពាក់បច្ចេកវិទ្យា AI ដំបូងគេនៅលើពិភពលោក ដើម្បីតាមដានអ្នកបើកបរយានជំនិះទាំងអស់ ជាពិសេស អ្នកផឹកស្រវឹងហើយបើកបរ ដែលតែងតែបង្កគ្រោះថ្នា.ក់ ដល់អ្នកដទៃ ។ កាមេរ៉ានេះនឹងរាយការណ៍ប្រាប់ប៉ូលិសចរាចរណ៍នៅក្បែរបំផុត ដើម្បីបញ្ឈប់យានជំនិះ ។

ប្រព័ន្ធ Heads-Up ដ៏ទំនើបអាចតាមដានសកម្មភាពការបើកបររថយន្តតាមផ្លូវ និងការបើកបរក្នុងអំឡុងពេលស្រវឹងស្រា ឬប្រើប្រាស់ថ្នាំញៀន ។ បន្ទាប់មក វានឹងផ្តល់ដំណឹងទៅប៉ូលិសចរាចរណ៍នៅក្បែរដើម្បីបញ្ឈប់រថយន្ត និងជជែកជាមួយអ្នកបើកបរ ព្រមទាំងពិនិត្យភាពខុសប្រក្រតី ដូចជា ៖ ជាតិអាល់កុល និងថ្នាំញៀនខុសច្បាប់ ។

កាមេរ៉ានេះនឹងបង្ហាញរូបភាពការបើកបរទៅប៉ូលិសចរាចរណ៍ ហើយអ្នកបើកបរយានជំនិះពុំដឹងថា ប៉ូលិសចរាចរណ៍មើលឃើញការបើកបររបស់ខ្លួនទេ ។ ប៉ុន្តែពេលពួកគេបើកបរខុស ប៉ូលិសនឹងហៅរថយន្តឈប់នៅសងខាងផ្លូវ ។ គោលដៅនៃការប្រើប្រាស់កាមេរ៉ា AI គឺដើម្បីផ្តល់សុវត្ថិភាពដល់ពលរដ្ឋ, ឱ្យពលរដ្ឋប្រុងប្រយ័ត្នពេលបើកបរកាន់តែខ្លាំង និងកាត់បន្ថយគ្រោះថ្នាក់ចរាចរណ៍ ។

កន្លងមក ប្រទេសអង់គ្លេសបានប្រើប្រាស់កាមេរ៉ា AI ដើម្បីជួយឱ្យប៉ូលិសចរាចរណ៍ត្រួតពិនិត្យ និងចាប់ខ្លួនអ្នកចុចទូរស័ព្ទដៃពេលបើកបរ ឬពុំពាក់ខ្សែក្រវ៉ាត់ការពារ ។ អ្នកស្រវឹងហើយបើកបរបានបង្កគ្រោះថ្នាក់ចរាចរណ៍កើនឡើងរហូតដល់៦ដង ទើបប៉ូលិសសង្ឃឹមថា ប្រព័ន្ធ Heads-Up នឹងជួយការពារអាយុជីវិតពលរដ្ឋពេលធ្វើដំណើរ ។

នេះជាគំនិតល្អមួយក្នុងការយកបច្ចេកវិទ្យាថ្មីៗមកប្រើប្រាស់ ដូចជា ៖ កាមេរ៉ា AI មកជួយត្រួតពិនិត្យការធ្វើចរាចរ ដើម្បីកាត់បន្ថយចំនួនមនុស្សស្លាប់តាមផ្លូវ ។ ប្រទេសនានាបានហាមឃាត់ពលរដ្ឋកុំបើកបរយានជំនិះពេលស្រវឹង ដោយសារវាផ្តល់នូវផលប៉ះពាល់ជាច្រើន ដូចជា ៖ ធ្វើឱ្យមនុស្សស្លាប់ ឬរងរបួស និងខូចខាតទ្រព្យសម្បត្តិ ដែលអ្នកបើកបរទាំងអស់ពុំគួរមើលរំលង ។

ប្រទេសមួយចំនួនបានពិន័យជាប្រាក់ និងដាក់ពន្ធនាគារអ្នកបើកបរពេលស្រវឹង ឬព្យួរប័ណ្ណបើកបរ ឬដកប័ណ្ណបើកបរ ដើម្បីផ្តល់សុវត្ថិភាពដល់ពលរដ្ឋពេលធ្វើដំណើរតាមផ្លូវ ៕

ប្រទេសថៃ ៖ កាលពីថ្ងៃទី២៤ ខែធ្នូ ឆ្នាំ២០២៤ សារព័ត៌មានថៃរាយការណ៍ថា អាជ្ញាធរទីក្រុងបាងកក បានជូនដំណឹងឱ្យពលរដ្ឋពាក់ម៉ាស់ការពារធូលីកខ្វក់ ដោយសារទីក្រុងបាងកក មានកម្រិតធូលីកខ្វក់លើបរិយាកាសលើសស្តង់ដារ និងចាប់ផ្តើមប៉ះពាល់ដល់សុខភាពពលរដ្ឋ ។ រីឯភ្ញៀវទេសចរបរទេស ដែលមានគម្រោងធ្វើដំណើរទៅទីក្រុងនេះ គួរតែត្រួតពិនិត្យគុណភាពអាកាសធាតុជាមុន ។

ប្រទេសថៃបានចូលដល់រដូវរងា និងមានសីតុណ្ហភាពធ្លាក់ចុះក្នុងតំបន់ជាច្រើន ប៉ុន្តែពលរដ្ឋរស់នៅទីក្រុងបាងកក បានប្រឈមនឹងធូលីកខ្វក់ក្នុងរដូវរងា ។ មជ្ឈមណ្ឌលគ្រប់គ្រងគុណភាពអាកាសធាតុទីក្រុងបាងកក រាយការណ៍ថា កម្រិតធូលីកខ្វក់កាលពីថ្ងៃទី២៤ ខែធ្នូ កន្លងមក គឺលើសស្តង់ដារ ហើយតំបន់រងផលប៉ះពាល់ដោយសារធូលីកខ្វក់ខ្លាំងជាងគេ រួមមាន ៖ តំបន់ណងខេម, ធុនបុរី និងឃ្លងសាមវ៉ា ។

ចាប់ពីថ្ងៃទី២៤ ខែធ្នូ ឆ្នាំ២០២៤ រហូតដល់ថ្ងៃទី១ ខែមករា ឆ្នាំ២០២៥ ទីក្រុងបាងកក នឹងមានអាកាសធាតុមិនល្អ និងកម្រិតធូលីកខ្វក់កើនឡើង ។ ធូលីតូចៗអាចជ្រាបចូលក្នុងប្រព័ន្ធផ្លូវដង្ហើមដោយផ្ទាល់ ហើយធ្វើឱ្យប៉ះពាល់សុខភាពពលរដ្ឋរយៈពេលវែង ដូចជា ៖ ជំងឺសួត និងបេះដូង ។ ហេតុនេះ មជ្ឈមណ្ឌលគ្រប់គ្រងគុណភាពអាកាសធាតុ សូមណែនាំទៅពលរដ្ឋនៅទីក្រុងបាងកក ពាក់ម៉ាស់ការពារពេលចេញពីលំនៅឋាន ចៀសវាងធ្វើអ្វីមួយក្រោមកំដៅថ្ងៃ និងតាមដានអាកាសធាតុយ៉ាងដិតដល់ ។

ចំណែកភ្ញៀវទេសចរបរទេស ដែលមានគម្រោងធ្វើដំណើរមកទីក្រុងបាងកកក្នុងអំឡុងពេលនេះ គួរតែត្រួតពិនិត្យគុណភាពអាកាសធាតុជាមុន និងត្រៀមម៉ាសសម្រាប់ប្រើប្រាស់ បើចាំបាច់ត្រូវធ្វើដំណើរនៅកណ្តាលថ្ងៃ ។ ក្រៅពីនេះ ត្រូវចៀសវាងទៅតំបន់មានធូលីកខ្វក់ខ្លាំង ព្រោះតែកម្រិតធូលីបានកើនឡើងជាបន្តបន្ទាប់ ដើម្បីឱ្យដំណើរកម្សាន្តរបស់ភ្ញៀវទេសចរមានសុវត្ថិភាព ។

ដោយឡែក ភ្នាក់ងារបរិស្ថានបានទំនាក់ទំនងទៅស្ថាប័នពាក់ព័ន្ធឱ្យបង្កើនវិធានការរឹតបន្តឹងស្របតាមផែនការដោះស្រាយបញ្ហាធូលី ដើម្បីកាត់បន្ថយផលប៉ះពាល់សុខភាពពលរដ្ឋ និងសូមឱ្យពលរដ្ឋចូលរួមចំណែកការពារបរិស្ថាន ដូចខាងក្រោម ៖

-ជូតសម្អាតធូលីតាមលំនៅឋានឱ្យបានស្អាតកុំឱ្យវាប៉ះពាល់សុខភាព
-ឈប់ដុតសំរាម
-ដាំដើមឈើជួយស្រូបជាតិពុល និងកំទេចធូលី
-ធ្វើដំណើរតាមមធ្យោបាយដឹកជញ្ជូនសាធារណៈ
-ពន្លត់ម៉ាស៊ីនយានជំនិះពេលចត និងពិនិត្យយានជំនិះកុំឱ្យមានផ្សែងខ្មៅលើសស្តង់ដារ ៕

ទស្សនាវដ្តី VOGUE Thailand បានចេញផ្សាយអំពីម៉ូតសំលៀកបំពាក់សម្រាប់ខែធ្នូ ឆ្នាំ២០២៤ ប៉ុន្តែអ្វីដែលគួរឱ្យចាប់អារម្មណ៍ម៉ូតរដូវកាលថ្មីគឺផ្តិតរូបភាពនៅតំបន់ប្រាសាទអង្គរវត្ត ដែលជាសម្បត្តិបេតិកភណ្ឌពិភពលោករបស់ប្រទេសកម្ពុជាឃើញហើយត្រជាក់ភ្នែកតែម្តង។

ចេញផ្សាយនៅថ្ងៃទី២៣ ធ្នូ VOGUE Thailand បានធ្វើឱ្យអ្នកលេងបណ្តាញសង្គមខ្មែរមានការចាប់អារម្មណ៍ជាមួយនឹងការផ្សព្វផ្សាយប្រាសាទខ្មែរផ្សាភ្ជាប់ជាមួយនឹងវិស័យម៉ូតសម័យថ្មីដែលជាផ្នែកមួយជួយជំរុញវិស័យទេសចរណ៍ក្នុងស្រុកយើងកាន់តែទូលំទូលាយថែមមួយកម្រិតទៀត។ នៅក្នុងការចេញផ្សាយរបស់ខ្លួន VOGUE Thailand បានពិពណ៌នាថា«ការបង្ហាញរូបម៉ូតសម្លៀកបំពាក់តាមតំបន់បុរាណ «អង្គរវត្ត» ពីប្រទេសកម្ពុជាក្នុងទស្សនាវដ្តី Vogue Thailand ចេញផ្សាយខែធ្នូ ឆ្នាំ២០២៤»។

រូបភាពដែលទស្សនាវដ្តីនេះបានផ្តិតយកបង្ហាញពីទេសភាពប្រាសាទអង្គរវត្ត ប្រាសាទបាយ័ន នៅក្នុងទីវត្តអារាម ទេសភាពនៅរីសត ចម្លាក់អប្សរា ទិដ្ឋភាពការលក់ដូរនៅផ្សារចាស់ខេត្តសៀមរាប ក្មេងលក់វត្ថុអនុស្សាវរីយ៍ ផ្ទះបុរាណ ជាដើម។ ឃើញការផ្សព្វផ្សាយបែបនេះអ្នកលេងបណ្តាញសង្គមក៏បានចូលទៅបង្ហាញការស្រលាញ់និងបានសរសើរពីទឹកដៃនៃការផ្តិតរូបភាពផងដែរ។

គួរបញ្ជាក់ផងដែរថា ទស្សនាវដ្តី VOGUE Thailand គឺជាទស្សនាវដ្តីផ្សព្វផ្សាយម៉ូតអន្តរជាតិល្បីៗជាច្រើនហើយក្នុងនោះមាន Lisa , Yaya , Kimberley , Mai davikah, Mark Prin រួមទាំងតារាល្បីៗជាច្រើនទៀតសុទ្ធតែបានថតឱ្យទស្សនាវដ្តីនេះ៕

Cristiano Ronaldo គឺជាកីឡាករបាល់ទាត់ឆ្នើមដែលរកចំណូលបានច្រើនជាងគេក្នុងពិភពលោក។ វាមិនចម្លែកទេដែលកីឡាករល្បីល្បាញរូបនេះបានចំណាយលុយរាប់លានដុល្លារដើម្បីទិញរបស់ប្រណីត។ ចាប់ពីវិមានធំស្កឹមស្កៃ រថយន្តទំនើប ទូកកប៉ាល់ឯកជន ឥឡូវនេះខ្សែប្រយុទ្ធព័រទុយហ្គាល់ត្រូវបានគេដឹងថា បានចំណាយលុយប្រមាណ ៧៣ លានដុល្លារអាមេរិកដើម្បីទិញ Gulfstream G650 ដែលជាយន្តហោះឯកជនដ៏ប្រណីតមួយ។ យន្តហោះនេះស្ថិតក្នុងចំណោមយន្តហោះដែលមានល្បឿនលឿនបំផុតក្នុងពិភពលោក ដោយអាចរត់បានចម្ងាយ ១៣,៨៩០ គីឡូម៉ែត្រ។

ជាមួយកាប៊ីនធំទូលាយប្រកបដោយផាសុកភាព មានការរចនាដាច់ដោយឡែកពីគ្នា និងអាចផ្ទុកអ្នកដំណើរបានរហូតដល់ ១៩ នាក់។ យន្តហោះ Gulfstream G650 ក៏ជានិមិត្តសញ្ញាចុងក្រោយរបស់ Cristiano Ronaldo ផងដែរ។ គួររំលឹកដែរថា កាលពីឆ្នាំ ២០១៥ លោកក៏មានយន្តហោះប្រណីតមួយផងដែរគឺ Gulfstream G200 ប៉ុន្តែក៏សម្រេចចិត្តលក់ ដូច្នេះបច្ចុប្បន្នលោកមានយន្តហោះផ្ទាល់ខ្លួនតែមួយប៉ុណ្ណោះគឺ Gulfstream G650 ដែលទើបតែទិញថ្មីនេះឯង។

Ronaldo គឺជាកំពូលកីឡាករបាល់ទាត់ពិភពលោក ដែលមានអ្នកតាមដានគណនី Instagram ចំនួន ៦៤៥ លាននាក់ ដោយការបង្ហោះមួយរូប ខ្សែប្រយុទ្ធព័រទុយហ្គាល់រូបនេះរកចំណូលបានរហូតដល់ ៣.២៣ លានដុល្លារអាមេរិកឯណោះ។ ក្រៅពីរកលុយបានតាមបណ្តាញសង្គម លោកក៏ជាខ្សែប្រយុទ្ធរបស់ក្លិប Al Nassr ដោយរកចំណូលបាន ២៧៥ លានដុល្លារអាមេរិកផងដែរ។ លើសពីនេះ Ronaldo ក៏រកចំណូលបាន ៦០ លានដុល្លារពីកិច្ចសន្យាផ្សាយពាណិជ្ជកម្មជាមួយម៉ាកល្បីជាច្រើនដូចជា Nike, Herbalife, Armani, Tag Heuer, DAZN ឬ PokerStars ទៀតផង។

ទន្ទឹមនឹងនេះលោកក៏ទទួលបានជោគជ័យជាមួយនឹងម៉ាកផ្ទាល់ខ្លួនរបស់លោក CR7 ផងដែរ។ ហេតុនេះវាមិនចម្លែកទេដែលលោកមានលុយច្រើនទិញរបស់របរប្រណីតៗដូចជា វិមាន រថយន្តទំនើប ទូកកប៉ាល់ឯកជន និងយន្តហោះឯកជន Gulfstream G650។ បច្ចុប្បន្ន Cristiano Ronaldo មានទ្រពសម្បត្តិសរុបប្រមាណ ៨០០ លានដុល្លារអាមេរិក នេះបើយោងតាមគេហទំព័របរទេស Sports Illustrated៕

ប្រទេសដាណឺម៉ាក ៖ រដ្ឋាភិបាលដាណឺម៉ាកបានបញ្ជាឱ្យបង្កើនថវិកាផ្នែកការពារជាតិយ៉ាងច្រើនសម្រាប់កោះហ្គ្រីនឡែន (Greenland) ក្រោយពីប្រធានាធិបតីអាមេរិកថ្មី លោក Donald Trump និយាយពីបំណងប្រាថ្នាចង់ទិញកោះនេះឱ្យក្លាយជាទឹកដីអាមេរិក ។ រដ្ឋាភិបាលដាណឺម៉ាកបញ្ជាក់ថា នឹងពុំលក់កោះនេះទៅឱ្យអាមេរិកឡើយ ។

រដ្ឋមន្ត្រីក្រសួងការពារជាតិដាណឺម៉ាក លោក Troels Lund Poulsen និយាយថា កញ្ចប់ថវិកាចំណាយផ្នែកការពារជាតិសម្រាប់កោះហ្គ្រីនឡែន នឹងកើនឡើងទ្វេដង គឺស្មើនឹង១,៥០០លានដុល្លារអាមេរិក ។ ការបង្កើនកញ្ចប់ថវិកានេះ គឺក្រោយពីលោក Trump បាននិយាយកាលពីថ្ងៃទី២៣ ខែធ្នូ ឆ្នាំ២០២៤ ថា ការក្លាយជាម្ចាស់ និងគ្រប់គ្រងកោះដ៏ធំនេះ ចាំបាច់យ៉ាងខ្លាំងសម្រាប់អាមេរិក ។

កោះហ្គ្រីនឡែនគ្រប់គ្រងដោយប្រទេសដាណឺម៉ាក គឺជាទីតាំងកងទ័ពអវកាសដ៏ធំ និងមានសារៈសំខាន់ផ្នែកយុទ្ធសាស្ត្រសម្រាប់អាមេរិក ដោយសារកោះនេះមានចម្ងាយជិតបំផុតពីអាមេរិកខាងជើងទៅអឺរ៉ុប និងមានធនធានធម្មជាតិរ៉ែ ។ ដាណឺម៉ាកនឹងទិញនាវាសង្កេតការណ៍ថ្មី២គ្រឿង និងដ្រូន២គ្រឿង ព្រមទាំងបង្កើនភ្នាក់ងារប្រចាំការនៅទីក្រុងនុក, កែលម្អអាកាសយានដ្ឋាន៣កន្លែងរបស់កោះហ្គ្រីនឡែន សម្រាប់ការចុះចតយន្តហោះចម្បាំង ។

រដ្ឋាភិបាលដាណឺម៉ាកបានបញ្ជាឱ្យបង្កើនថវិកាផ្នែកការពារជាតិ ក្រោយពីលោក Trump សរសេរក្នុងបណ្តាញសង្គមថា ដើម្បីសន្តិសុខជាតិ និងសេរីភាពទូទាំងពិភពលោក គឺលោកចង់ឱ្យអាមេរិកគ្រប់គ្រងកោះហ្គ្រីនឡែន ។ ប៉ុន្ដែមន្ត្រីដាណឺម៉ាកបញ្ជាក់ថា យើងពុំលក់កោះនេះទេ ហើយពលរដ្ឋរស់នៅលើកោះបានសហការពាណិជ្ជកម្មជាមួយប្រទេសជិតខាង ។

អ្នកវិភាគយល់ឃើញថា ដាណឺម៉ាកបង្កើនសមត្ថភាពកងទ័ពនៅលើកោះនេះយឺតយ៉ាវណាស់ ហើយបើដាណឺម៉ាកពុំអាចការពារដែនទឹកជុំវិញកោះពីការរំលោភរបស់ចិន និងរុស្ស៊ី ធ្វើឱ្យអាមេរិកកាន់តែចង់គ្រប់គ្រងកោះនេះ ពីព្រោះលោក Trump តែងតែនិយាយថា ចង់បានកោះរបស់ដាណឺម៉ាកម្តងហើយម្តងទៀត ។

លោក Trump ជាមនុស្សឆ្លាត ដែលអាចធ្វើឱ្យរដ្ឋាភិបាលដាណឺម៉ាកផ្តល់ភាពសំខាន់លើការការពារជាតិ ។ កាលពីឆ្នាំ២០១៩ លោក Trump ធ្លាប់ណែនាំឱ្យអាមេរិកទិញកោះហ្គ្រីនឡែន ដែលមានទំហំធំបំផុតលើពិភពលោក ប៉ុន្តែនាយករដ្ឋមន្ត្រីដាណាម៉ាកសម័យនោះប្រាប់ថា វាគ្មានប្រយោជន៍ ហើយធ្វើឱ្យលោក Trump លុបចោលការធ្វើដំណើរទៅដាណឺម៉ាក ។

គួរបញ្ជាក់ថា កន្លងមក លោក Trump ចង់បានប្រទេសកាណាដាធ្វើជារដ្ឋទី៥១ របស់អាមេរិក ហើយលោកពុំមែនជាប្រធានាធិបតីអាមេរិកដំបូងគេដែលចង់ទិញកោះហ្គ្រីនឡែនរបស់ដាណឺម៉ាកទេ គឺអាមេរិកចង់បានកោះនេះដំបូងនៅឆ្នាំ១៨៦០ ពេលស្ថិតក្រោមការដឹកនាំរបស់ប្រធានាធិបតី លោក Andrew Johnson ៕

ប្រទេសហូឡង់ ៖ កាលពីសប្តាហ៍ទី៣ ខែធ្នូ ឆ្នាំ២០២៤ ក្រុមអ្នកបុរាណវិទ្យាហូឡង់ភ្ញាក់ផ្អើលយ៉ាងខ្លាំង ក្រោយពីប្រទះឃើញឆ្អឹងសត្វតម្រៀបគ្នានៅក្រោមកម្រាលឥដ្ឋរបស់អគារចំណាស់មួយកន្លែងមានអាយុជាង៥០០ឆ្នាំ ស្ថិតនៅតំបន់ខូមដែង ប្រទេសហូឡង់ ។

ក្រុមអ្នកបុរាណវិទ្យាមកពី Heritage Alkmaar និយាយថា វាជាសំណង់ពិសេសមួយនៅក្នុងតំបន់ខូមឌែង ទីក្រុងអាល់ម៉ា ភាគខាងជើងប្រទេសហូឡង់ ។ នៅក្រោមកម្រាលឥដ្ឋផ្នែកក្រោមបំផុតរបស់អគារដែលសាងសង់នៅសតវត្សទី១៦ ពួកគេបានប្រទះឃើញឆ្អឹងគោតម្រៀបគ្នាយ៉ាងច្រើន ។

ពួកគេពុំធ្លាប់ឃើញការយកឆ្អឹងគោមកតម្រៀបគ្នានៅក្រោមកម្រាលឥដ្ឋបែបនេះទេ នៅបណ្តាប្រទេសប៉ែកអឺរ៉ុប ។ ពួកគេគិតថា ក្រុមជាងសំណង់បានយកឆ្អឹងគោមកប្រើប្រាស់ដើម្បីងាយស្រួលជួសជុលពេលវាខូចខាត ។ នេះជាគំនិតដ៏ឆ្លាតវៃរបស់ក្រុមជាងសាងសង់អគារសម័យមុន ។

អគារចាស់នេះពុំសូវល្បីល្បាញប៉ុន្មានទេ ប៉ុន្តែអ្វីគួរឱ្យភ្ញាក់ផ្អើលបំផុតនោះ គឺកម្រាលឥដ្ឋមួយចំនួនបានបាត់ ហើយត្រូវជំនួសវិញដោយឆ្អឹងសត្វ ។ ការក្រាលឆ្អឹងសត្វបែបនេះគ្មាននៅកន្លែងផ្សេងទេ គឺមានតែភាគខាងជើងប្រទេសហូឡង់ ប៉ុណ្ណោះ ។ នេះបើតាមការផ្សព្វផ្សាយក្នុងបណ្តាញសង្គមរបស់ក្រុមអ្នកបុរាណវិទ្យា ។

អ្វីអស្ចារ្យជាងនេះ គឺឆ្អឹងគោទាំងអស់មានទំហំប៉ុនៗគ្នា ហើយត្រូវបានតម្រៀបយ៉ាងមានរបៀប ដើម្បីអាចដាក់ឆ្អឹងគោបានច្រើនបំផុត ។ ហេតុនេះ ពួកគេសន្និដ្ឋានថា ការប្រើប្រាស់ឆ្អឹងគោ គឺដោយសារក្រុមជាងសំណង់សម័យនោះចង់ឱ្យការសាងសង់មានភាពរឹងមាំ និងយូរអង្វែង ៕