ជំងឺមហារីកបានឆក់យកជីវិតមនុស្សជាច្រើននៅលើពិភពលោក ហើយជំងឺនេះអាចកើតលើមនុស្សគ្រប់ភេទ និងគ្រប់វ័យ ។ តាមទិន្នន័យបង្ហាញថា មានកត្តាជាច្រើនបណ្តាលឱ្យមនុស្សបច្ចុប្បន្នកើតជំងឺមហារីកកាន់តែច្រើន ដោយសារពួកគេមានទម្លាប់បរិភោគអាហារពុំល្អសម្រាប់សុខភាព ផឹកស្រា ជក់បារី និងលេងទូរស័ព្ទដៃគ្មានពេលហាត់ប្រាណ ។
.png)
មន្ទីរពេទ្យ Bach Mai នៅទីក្រុងហាណូយ ប្រទេសវៀតណាម បានបង្ហាញទិន្នន័យគួរឱ្យចាប់អារម្មណ៍ថា ជំងឺមហារីកបណ្តាលមកពីការផឹកភេសជ្ជៈមានស្ករច្រើន ព្រមទាំងទម្លាប់ការបរិភោគអាហារពុំល្អដល់សុខភាព អាហារសម្បូរខ្លាញ់ និងផ្ទុកសារធាតុរក្សាគុណភាពអាហារ ប៉ុន្តែវាពុំផ្តល់វីតាមីន និងសារធាតុរ៉ែគ្រប់គ្រាន់សម្រាប់រាងកាយទេ ។ បើបរិភោគអាហារទាំងនេះយូរឆ្នាំ នឹងកើតជំងឺមហារីកពោះវៀន, មហារីកក្រពះ, មហារីកថ្លើម និងមហារីកបំពង់អាហារ ។
ក្រៅពីនេះ បរិស្ថានពុំល្អ ជាពិសេស នៅទីក្រុងធំៗមានធូលីកខ្វក់ សារធាតុគីមី ថ្នាំកម្ចាត់សត្វល្អិត និងសារធាតុវិទ្យុសកម្ម គឺនឹងប៉ះពាល់សុខភាពយ៉ាងខ្លាំង ។ ការស្រាវជ្រាវបង្ហាញថា ការស្រូបយកធូលីកខ្វក់ ឬសារធាតុគីមីរយៈពេលយូរធ្វើឱ្យប្រឈមនឹងកើតជំងឺមហារីកសួត, មហារីកស្បែក និងមហារីកពោះវៀន ។
ការរស់នៅដោយគ្មានការហាត់ប្រាណ ឬលើសទម្ងន់ ក៏ជាមូលហេតុធ្វើឱ្យកើតជំងឺមហារីកដែរ ហើយការប្រើប្រាស់ទូរស័ព្ទដៃ និងកុំព្យូទ័រច្រើនធ្វើឱ្យមនុស្សភាគច្រើនគ្មានពេលហាត់ប្រាណ ។ វាមិនត្រឹមតែប៉ះពាល់សុខភាពទេ ប៉ុន្តែនឹងធ្វើឱ្យកោសិកាមហារីកលូតលាស់ ពីព្រោះខ្វះចលនារាងកាយ, ប្រព័ន្ធការពាររាងកាយចុះខ្សោយ ។ ដូចគ្នានេះ ការជក់បារីប្រឈមនឹងជំងឺមហារីកសួត, មហារីកបំពង់, មហារីកមាត់ និងមហារីកបំពង់អាហារ ខណៈការផឹកស្រាប្រឈមជំងឺមហារីកច្រើនប្រភេទ ជាពិសេស មហារីកថ្លើម មហារីកសុដន់ និងមហារីកពោះវៀន ។
ចុងក្រោយ ជំងឺមហារីកកើតឡើងដោយសារតំណរពូជ ជាពិសេស មហារីកសុដន់ មហារីកពោះវៀន មហារីកលំពែង និងមហារីកស្បូន ។ ចុងក្រោយ គ្រូពេទ្យបានណែនាំឱ្យផ្លាស់ប្តូរទម្លាប់រស់នៅប្រចាំថ្ងៃ បរិភោគអាហារផ្តល់ប្រយោជន៍ដល់សុខភាព ហាត់ប្រាណទៀងទាត់ និងត្រួតពិនិត្យសុខភាព ដើម្បីព្យាបាលជំងឺមហារីកទាន់ពេលវេលា ៕
