ទឹកធ្លាក់ព្រះនិមិត្ត គឺជាគោលដៅទេសចរណ៍ដ៏ស្រស់ស្អាតមួយរបស់ប្រទេសកម្ពុជា ដែលមានទីតាំងស្ថិតនៅក្នុងភូមិសាស្រ្ដស្រុកឆែប ខេត្តព្រះវិហារ ជាប់ព្រំដែនជាមួយប្រទេសឡាវ និងជាតំបន់អេកូទេសចរណ៍ធំបំផុតនៃដងទន្លេមេគង្គ។ ទឹកធ្លាក់ព្រះនិមិត្ត ឬទឹកជ្រោះសុភមិត្តជាកន្លែងដែលទឹកទន្លេមេគង្គហូរធ្លាក់យ៉ាងគំហុកមានកម្ពស់រហូតដល់ទៅ ២៦ ម៉ែត្រ។ បច្ចុប្បន្នរមណីយដ្ឋាននេះកំពុងមានប្រជាប្រិយភាពល្បីល្បាញយ៉ាងខ្លាំង ដោយមានភ្ញៀវទេសចរជាច្រើនតែងតែនាំគ្នាទៅទស្សនាកម្សាន្តឥតឈប់ឈរ និងគយគន់មើលផ្ទាំងទស្សនីយភាពទឹកជ្រោះព្រះនិមិត្តមិនដែលខានឡើយ។

នៅរដូវវស្សាពេលទឹកទន្លេឡើងខ្ពស់ដល់ចំណុចអតិបរមា ល្បឿនទឹកហូរមានកម្លាំងខ្លាំងបំផុត ដោយបង្កើតបានជាផ្ទាំងទស្សនីយភាពជាផ្សែងអ័ព្ទយ៉ាងស្រស់ស្អាតគួរជាទីចាប់អារម្មណ៍។ ដូច្នេះដើម្បីធ្វើដំណើរទៅកាន់រមណីយដ្ឋាននេះ ភ្ញៀវទេសចរត្រូវឆ្លងកាត់ផ្លូវជាតិលេខ ៦៤ និងផ្លូវលំចម្ងាយប្រមាណ ១៧០ គីឡូម៉ែត្រ។ នៅពេលទៅដល់លោកអ្នកនឹងឃើញទឹកហូរប្រដេញគ្នាធ្លាក់ពីដំណាក់ថ្មមួយទៅដំណាក់ថ្មមួយទៀត បង្កើតបានជាទីកន្លែងទឹកធ្លាក់ដ៏ទាក់ទាញបំផុតគួរឱ្យចង់គយគន់។

ហេតុនេះភ្ញៀវទេសចរអាចទៅកម្សាន្តនៅទីនេះបានគ្រប់រដូវកាល ជាមួយនឹងសម្រស់ទឹកហូរជ្រៀតក្រហែងថ្ម បែកផ្កាត្រែង ឮសូរសំឡេងឈូឆរមិនចេះជិនណាយ។ បច្ចុប្បន្នទឹកធ្លាក់ព្រះនិមិត្ត មានធម្មជាតិស្រស់ត្រកាល ទាក់ទាញភ្ញៀវទេសចរជាតិ និងអន្តរជាតិ ឱ្យចង់ទៅកម្សាន្តផ្នែកអេកូទេសចរណ៍ ដូចជាគយគន់សម្រស់ព្រៃឈើបៃតងខៀវខ្ចី ជាមួយភ្នំខ្ពស់ៗ និងងូតទឹកលេងសប្បាយយ៉ាងសប្បាយរីករាយផងដែរ។ ទឹកធ្លាក់ព្រះនិម្មិត គឺជាគោលដៅទេសចរណ៍ដ៏ស្រស់ស្អាតប្រៀបប្រដូចទៅនឹងទីឋានសួគ៌ នៃតំបន់ភាគឦសានរបស់ប្រទេសកម្ពុជា ដែលកំពុងស្វាគមន៍ភ្ញៀវទេសចរគ្រប់ពេលវេលាឥតនឿយណាយសោះឡើយ។

គួរជម្រាបថា ខេត្តព្រះវិហារ គឺជាខេត្តសម្បូរទៅដោយប្រាង្គប្រាសាទបុរាណនាសម័យអង្គរ បន្ទាប់ពីខេត្តសៀមរាប និងជាខេត្តដែលសេសសល់ព្រៃឈើមានលក្ខណៈធម្មជាតិ ដែលកំពុងត្រូវបានអភិរក្សការពារពីគ្រប់ភាគីពាក់ព័ន្ធ។ ដូច្នេះបើលោកអ្នកបានទៅដល់ខេត្តព្រះវិហារហើយ សូមកុំភ្លេចទៅទស្សនាទឹកធ្លាក់ព្រះនិមិត្ត និងប្រាសាទបុរាណផ្សេងៗនៃខេត្តព្រះវិហារផង ដើម្បីលើកស្ទួយទេសចរក្នុងស្រុក៕

ប្រទេសជប៉ុន ៖ Dassai គឺជាក្រុមហ៊ុនជប៉ុនដ៏ល្បីល្បាញមានគម្រោងផលិតស្រា សាកេ នៅកន្លែងខ្ពស់បំផុតពីផែនដី គឺលើអវកាស ហើយក្រុមហ៊ុននឹងដាក់លក់ក្នុងតម្លៃ១០០លានយ៉េន (ឬស្មើជាង៦៣ម៉ឺនដុល្លារអាមេរិក) សម្រាប់ស្រាសាកេ ច្រកដបក្នុងចំណុះ១០០មីល្លីលីត្រ ។

សាកេ ត្រូវបានគេចាត់ទុកថា ជាផ្នែកមួយនៃវប្បធម៌ជប៉ុន ដែលផលិតឡើងពីគ្រឿងផ្សំសំខាន់ៗ ដូចជា ៖ ទឹក អង្ករ និងផ្សិត ប៉ុន្តែសាកេដែលផលិតមកនេះ នឹងមានរសជាតិខុសៗគ្នាអាស្រ័យលើបរិស្ថានជុំវិញកន្លែងផលិត ។ បើកន្លែងផលិតមានសំណើម និងសីតុណ្ហភាពខុសគ្នាតែបន្តិច គឺធ្វើឱ្យរសជាតិរបស់សាកេ ខុសៗគ្នាដែរ ។

បច្ចុប្បន្ន ក្រុមហ៊ុន Dassai ផលិតស្រាសាកេដ៏ល្បីមានគម្រោងផលិតសាកេនៅលើអវកាស និងលក់ឱ្យអតិថិជន ។ កន្លងមក ក្រុមហ៊ុនធ្លាប់បានបញ្ជូនគ្រឿងផ្សំសម្រាប់ផលិតស្រាឡើងទៅលើអវកាស ហើយបានយកចុះមកផែនដីវិញ ប៉ុន្តែលើកនេះ ក្រុមហ៊ុននឹងផលិតស្រាសាកេ នៅក្រៅផែនដីយ៉ាងពិតប្រាកដ ហើយគេចាត់ទុកថា គឺជាការផលិតក្រៅផែនដីលើកដំបូងគេ ។

ក្រុមហ៊ុននឹងផ្សំអង្ករម៉ូណូរិ ចំនួន៥២០ក្រាមនៅលើអវកាស និងក្លាសេវាសម្រាប់បញ្ជូនមកផែនដី ។ បន្ទាប់មក ក្រុមហ៊ុននឹងយកអង្ករម៉ូណូរិ មកផលិតជាស្រាសាកេ ហើយសាកេដែលផលិតបានភាគច្រើន គឺនឹងយកទៅវិភាគ លើកលែងតែស្រាសាកេ ចំនួន១០០មីល្លីលីត្រ គឺក្រុមហ៊ុននឹងច្រកដបលក់ក្នុងតម្លៃ១០០លានយ៉េន ។ សាកេនេះ មានឈ្មោះថា «Dassai Moon Uchu Jozo» ឬ «Dassai Moon Space Brewing» ហើយប្រាក់បានពីការលក់ស្រា ក្រុមហ៊ុននឹងផ្តល់ទៅឱ្យគម្រោងអវកាសជប៉ុន ។

ចំណែកគម្រោងនាថ្ងៃអនាគត គឺក្រុមហ៊ុន Dassai នឹងផលិតស្រាសាកេនៅលើឋានព្រះច័ន្ទ ហើយនឹងប្រើប្រាស់ទឹកដែលទើបរកឃើញលើឋានព្រះច័ន្ទ ។ គម្រោងថ្ងៃអនាគតរបស់ក្រុមហ៊ុនជប៉ុនបានធ្វើឱ្យមហាជនភ្ញាក់ផ្អើលមិនតិចទេ ប៉ុន្តែវាជាចំណុចចាប់ផ្តើមក្នុងការផលិតស្រាប្លែកពីគេលើពិភពលោក ៕

នៅថ្ងៃទី២៨ ខែធ្នូ ឆ្នាំ២០២៤ រាជរដ្ឋាភិបាលកម្ពុជា បានសេចក្ដីណែនាំដល់ក្រសួងស្ថាប័នពាក់ព័ន្ធ ក្នុងការផ្តល់ទិដ្ឋាការតាមប្រព័ន្ធ e-Visa និង ប្រព័ន្ធ e-Arrival ឱ្យមកនៅក្នុង Ecosystem តែមួយរបស់រាជរដ្ឋាភិបាល ។

បន្ថែមពីនេះ រាជរដ្ឋាភិបាល ក៏សម្រេចបញ្ចុះតម្លៃទិដ្ឋាការ អេឡិចត្រូនិក(e-Visa) ប្រភេទទេសចរ(T) និងប្រភេទធម្មតា(E) ឱ្យបានសមស្រប។

តម្លៃទិដ្ឋាការអេឡិចត្រូនិក ត្រូវបានបញ្ចុះតម្លៃដូចខាងក្រោម៖

• Visa T បញ្ចុះតម្លៃពី ៣៦ (សាមសិបប្រាំមួយ) ដុល្លារអាម៉េរិក មកនៅត្រឹម ៣០(សាមសិប) ដុល្លារអាមេរិក
• e-Visa E បញ្ចុះតម្លៃពី ៤២ (សែសិបពីរ) ដុល្លារអាម៉េរិក មកនៅត្រឹម ៣៥ (សាមសិបប្រាំ) ដុល្លារអាមេរិក៕

តំបន់វិស្សមកាលទេសចរណ៍អន្តរជាតិឆ្នេរមាសឆ្នេរប្រាក់ បានក្លាយជាតំបន់ទេសចរណ៍ដ៏លេចធ្លោរមួយនៅខេត្តព្រះសីហនុ ក្រោយពីចំណាយអស់៦០០លានដុល្លារ ក្នុងរយៈពេលជាងជិត១០ឆ្នាំ។

ឆ្នេរមាសឆ្នេរប្រាក់មានទីតាំងស្ថិតនៅសង្កាត់រាម ក្រុងកំពង់សោម ខេត្តព្រះសីហនុ ដែលភ្ញៀវទេសចរអាចធ្វើដំណើរចេញពីចំណុចរង្វង់មូលនាគ បត់ចូលតាមផ្លូវទៅកាន់ឆករាមប្រមាណតែ២០០ម៉ែត្រ នឹងឃើញមានផ្លូវបែកទៅខាងឆ្វេងដែលមានខ្លោងទ្វារសរសេរថា តំបន់វិស្សមកាលទេសចរណ៍អន្តរជាតិឆ្នេរមាសឆ្នេរប្រាក់ ហើយបន្តដំណើរតាមផ្លូវក្រាលកៅស៊ូនេះប្រមាណជា១០នាទី នឹងបានទៅដល់តំបន់នោះ។

តំបន់​វិស្សមកាល​ទេសចរណ៍​ឆ្នេរ​មាស​ឆ្នេរ​ប្រាក់ លាតសន្ធឹងលើផ្ទៃក្រឡា ៣ ៣០០ ហិកតា  ដែលចាប់ផ្ដើម​ដំណើរការ​គម្រោង​អភិវឌ្ឍ​តាំងពី​ឆ្នាំ ២០១៦ ដោយមានទន់បម្រុងវិនិយោគ៥០០០ពាន់លានដុល្លារ របស់ក្រុមហ៊ុន យិះ ចៀ។

នៅ​លើ​ផ្ទៃដី​ដ៏ធំសម្បើមនេះ ​ ក្រុមហ៊ុន​បាន​សាងសង់​សណ្ឋាគារ​ជា​ច្រើន​កន្លែង រៀបចំ​តំបន់​ទេសចរ​នៅ​កោះ​សំពោច (កោះ​រាជបុត្រ)។

ការសាងសង់និងអភិវឌ្ឍនៅតំបន់ឆ្នេរមាសឆ្នេរប្រាក់នេះ នឹងចូលរួមបង្កើនឱកាសការងារសម្រាប់ប្រជាជនមូលដ្ឋាន និងបង្កើនចំណូលពន្ធសម្រាប់រដ្ឋាភិបាលផងដែរ៕