យើងដឹងហើយថាការផឹកទឹកឱ្យបានទៀងទាត់គឺពិតជាល្អខ្លាំងណាស់សម្រាប់សុខភាពរាងកាយ ជាពិសេសក្នុងរដូវរងារនេះតែម្តង ប្រសិនបើអ្នកផឹកទឹកក្តៅឧណ្ឌៗទៀត គឺរឹតតែជួយផ្តល់ថាមពលដ៏ខ្លាំងក្លាដល់សុខភាពរាងកាយយ៉ាងពេញលេញតែម្តង។ ទោះជាយ៉ាងណាការផឹកទឹកក្តៅក៏មានគុណសម្បត្តិ និងគុណវិបត្តិផងដែរ ដោយគុណវិបត្តិនោះគឺថា លោកអ្នកអាចនឹងរលាកមាត់ប្រសិនបើផឹកមិនបានប្រយ័ត្ន ឬមិនបានផ្លុំ។ លើសពីនេះប្រសិនបើអ្នកដាក់ទឹកក្តៅក្នុងដបបិទជិត ក៏អាចបណ្តាលឱ្យកំពប់ជាដើម។
រីឯគុណសម្បត្តិនៃការផឹកទឹកក្តៅក្នុងរដូវរងារវិញគឺមានច្រើនដូចជា៖
១.ជួយសម្រកទម្ងន់៖ ការស្រាវជ្រាវបង្ហាញថាការផឹកទឹកក្តៅឧណ្ឌៗជួយបង្កើនអារម្មណ៍ឆ្អែត និងជួយឱ្យរាងកាយស្រូបយកសារធាតុចិញ្ចឹម បណ្តេញកាកសំណល់ចេញពីរាងកាយ ធ្វើឱ្យរាងកាយមានសុខភាពល្អ និងឆាប់ស្រកគីឡូ។
២.កាត់បន្ថយភាពតានតឹង៖ ការផឹកទឹកក្តៅមួយកែវអាចជួយអ្នកដោះស្រាយភាពតានតឹង និងការថប់បារម្ភយ៉ាងមានប្រសិទ្ធភាព។ ការសិក្សាកន្លងមកក៏បានរកឃើញដែរថា ការទទួលទានទឹកក្តៅដូចជាតែ និងកាហ្វេក៏អាចកាត់បន្ថយភាពតានតឹង និងកាត់បន្ថយអារម្មណ៍ថប់បារម្ភផងដែរ។

៣.បន្សាបជាតិពុលចេញពីរាងកាយ៖ ទឹកក្តៅអាចជួយឱ្យរាងកាយបញ្ចេញជាតិពុល និងធ្វើឱ្យរាងកាយបញ្ចេញញើស ជាហេតុអាចបន្សាបជាតិពុលចេញពីរាងកាយ។
៤.ជួយដល់ការរំលាយអាហារ៖ នៅពេលដែលរាងកាយខ្វះជាតិទឹក ពោះវៀនតូចស្រូបយកទឹកភាគច្រើនដែលវាទទួលបានពីអាហារ និងភេសជ្ជៈ នេះបណ្តាលឱ្យខ្សោះជាតិទឹក និងធ្វើឱ្យចលនាពោះវៀនកាន់តែពិបាក។ ដូច្នេះការផឹកទឹកក្តៅអាចជួយរំលាយអាហារលឿនជាងការផឹកទឹកត្រជាក់ ក៏ដូចជាជួយកាត់បន្ថយហានិភ័យនៃការទល់លាមក និងជំរុញចលនាពោះវៀនឱ្យបានទៀងទាត់ផងដែរ។

៥.ធ្វើឱ្យចរន្តឈាមដើរបានស្រួល៖ ការផឹកទឹកក្តៅអាចជួយឱ្យឈាមរត់បានស្រួល ទាំងប្រព័ន្ធសរសៃឈាមអាក់ទែ និងសរសៃឈាមវ៉ែន ពង្រីកលំហូរឈាម ទៅចិញ្ចឹមគ្រប់សាពាង្គកាយ។ បន្ថែមពីលើនេះ ផឹកទឹកក្តៅ ការងូតទឹកក្តៅនៅពេលយប់ក៏អាចជួយឱ្យយើងមានអារម្មណ៍ល្អ និងគេងលក់ស្រួលផងដែរ៕
