បន្ទាប់ពីផ្ទុះភាពចម្រូងចម្រាស ថៃ អតិជាតិបុត្រ ស្រាប់តែបានបង្ហាញថាលោកសម្ងំលាក់ពិសតែប៉ុណ្ណោះខណៈលោកបង្ហាញដំរួយចេញបទចម្រៀងហ៊ីបហបវិញម្តង។ កាលពីមុនតារាចម្រៀងរូបនេះបានសាងប្រជាប្រិយភាពតាមរយៈបទមនោសញ្ចេតនា។ ការវិលត្រឡប់មកវិស័យតន្រ្តីហើយប្តូររសជាតិចម្រៀងរបស់ខ្លួន តើ បុត្រ អាចស្តាប្រជាប្រិយភាពកាលពីមុនមកវិញបានទេ?។
ផ្ទុះរឿងអាស្រូវលើកនេះ ថៃ អតិជាតិបុត្រ បានបង្ហោះនៅលើបណ្តាញសង្គមថ្ងៃទី២៦ ធ្នូ ថា ពេលនេះបានយល់ពាក្យថាសង្គមបច្ចុបន្ន។ ជាមួយសំណេរខ្លីមួយនេះ បុត្រ បង្ហាញបន្តទៀតជាមួយនឹងដំរួយលើវិស័យតន្រ្តីនិងថាពេលខ្លះរូបគេសម្ងំយកពិសតែប៉ុណ្ណោះ។ ការប្រកាសនេះបានក្លាយជាចំណុចចាប់អារម្មណ៍មួយរបស់ទស្សនិកជនដែលជាអ្នកគាំទ្រម្ចាស់បទ «គ្រាស្នេហ៍» ព្រោះតារាចម្រៀងរូបនេះខកខានចេញបទចម្រៀងជាយូរមកហើយ។
ជាមួយការបង្ហើបដំណឹងនេះ ថៃ អតិជាតិបុត្រ បានប្រកាសថាការចេញមកអង្រួនវិស័យតន្រ្តីលើកនេះគឺជារសជាតិថ្មីសម្រាប់រូបគេពីចង្វាក់ហ៊ីបហបរ៉េប ដោយបានចំណងជើងថា ប្រេនខ្ចីគេ។ លើសពីនេះទៅទៀត បុត្រ បានបញ្ជាក់ជូនទស្សនិកជនថាគឺជាស្នាដៃតែងនិពន្ធរបស់លោកផ្ទាល់។ ការប្រកាសនេះដែរបានធ្វើឱ្យអ្នកគាំទ្រតារាចម្រៀងរូបបានបង្ហាញការចង់ស្តាប់បទថ្មី និងមានអ្នកខ្លះជូនពរឱ្យ បុត្រ ទទួលបានភាពជោគជ័យក្នុងវិលត្រឡប់មកវិញទេ។ 
ថៃ អតិជាតិបុត្រ បានសាងប្រជាប្រិយភាពតាមរយៈបទមនោសញ្ចេតនាស្នេហា តើនៅមានប្តូររសជាតិថ្មីមកកាន់វិស័យហ៊ីបហបតើអាចស្តារប្រជាប្រិយភាពរបស់ខ្លួនដែលបាត់បង់ត្រឡប់មកវិញបានដែរឬទេ?។ ទោះយ៉ាងណា បើក្រឡេកទៅកាន់តារាចម្រៀង វណ្ណដា រួមទាំង ទេព ពិសិដ្ឋ ជាដើមសុទ្ធតែបានសាងអាជីពជាមួយនឹងបទមនោសញ្ចេតនាស្នេហា ប៉ុន្តែនៅពេលផ្លាស់ប្តូររសជាតិមកកាន់វិស័យហ៊ីបហបគឺកាន់តែមានភាពល្បីល្បាញ។
គួរបញ្ជាក់ផងដែរថាប្រធានបទ ថៃ អតិជាតិបុត្រ បានផុសឡើងបន្ទាប់ពីមានជម្លោះជាមួយសន្តិសុខផ្អើលអស់ប្រព័ន្ធផ្សព្វផ្សាយនិងមហាជន។ ក្នុងភាពចម្រូងចម្រាសនេះ បានធ្វើឱ្យសាធារណជនចាប់ផ្តើមវែកញែកទៅលើរូបរាងរបស់តារាចម្រៀងរូបនេះដែលធ្លាប់តែស្រស់សង្ហាប៉ុន្តែរូបភាពពេលនេះធ្វើឱ្យអ្នកមួយចំនួនមើលសឹងតែមិនចង់ស្គាល់៕
