ព្យាយាមបញ្ចប់ដោយសន្តិវិធីលែងបន្តរៀបចំកម្មវិធី Miss Grand តទៀតក្រោមមូលហេតុចក្ខុវិស័យខុសគ្នាតែស្ថាប័ន MGI របស់លោក ណាវ៉ាត់ មិនព្រមបញ្ចប់ដោយចេញសេចក្តីប្រកាស៤ចំណុចអំពីការចែកផ្លូវគ្នា ND ឥណ្ឌា ចេញមកទម្លាយខ្ទេចគ្មានសល់អំពីកម្មវិធីប្រកួតសម្រស់នេះដែលតែងតែទារលុយមិនចេះចប់។

កាលពីថ្ងៃទី២១ វិច្ឆិកា ស្ថាប័ន Miss Grand International បានចេញសេចក្តីថ្លែងការណ៍របស់ខ្លួន៤ចំណុចបន្ទាប់ពីស្ថាប័ន Miss Grand India ដែលគ្រប់គ្រងដោយលោក Nikhil Anand បានប្រកាសអំពីការចែកផ្លូវគ្នារវាងក្រុមហ៊ុនលោកនិងស្ថាប័នរបស់លោក ណាវ៉ាត់ ដោយសារចក្ខុវិស័យរបស់ពួកគេខុសគ្នា។

MGI បានបញ្ជាក់មូលហេតុនៅពីក្រោយការសម្រេចចិត្តមិនបន្តកុងត្រាជាមួយម្ចាស់អាជ្ញាប័ណ្ណ Miss Grand India ដែលមានដូចជាទី១ ការពន្យារពេលម្តងហើយម្តងទៀតក្នុងការទូទាត់អាជ្ញាប័ណ្ណ ទី២ ការបំពានលើកិច្ចព្រមព្រៀងកិច្ចសន្យា ទី៣កង្វះនៃការគាំទ្រ និងការផ្សព្វផ្សាយមិនបានបំពេញតាមស្តង់ដារដែលរំពឹងទុកដោយ MGI ។ និងទី៤ ការផ្សព្វផ្សាយមិនគ្រប់គ្រាន់នៃម៉ាក MGI ហើយនឹងប្រកាសម្ចាស់អាជ្ញាប័ណ្ឌថ្មីរបស់ឥណ្ឌា។

ទោះយ៉ាងណា បន្ទាប់ពីស្ថាប័នរបស់លោក ណាវ៉ាត់ ឱ្យម្ចាស់មកុដ Live លក់ប្រហុក លើកឡើងបែបនេះ ND ឥណ្ឌា បានបង្ហោះStory នៅលើបណ្តាញសង្គមបន្ថែមទៀតទាំងលោកចង់បញ្ចប់ដោយសន្តិវិធីទៅហើយ។ លោក នីគីល បានបង្ហាញអំពីអ៊ីម៉ែលនៃអាជ្ញាប័ណ្ឌកម្មវិធី MGI ដោយបានសរសេរខេមសិន ថាមានរឿងជាច្រើនទៀតដែលលោកបង្ហាញខណៈលោកបញ្ជាក់អំពីការទូទាត់តាំងពីខែកុម្ភៈ និងថាភាពលោភលន់របស់ MGI មិនចេះចប់។ ND ឥណ្ឌា រូបនេះបាននិយាយថា MGI មិនឱ្យតម្លៃហើយពួកគេអាចជ្រើសរើសអ្នកផ្សេង និងបានសង្កត់ធ្ងន់ថា MGI គឺជាស្ថាប័នប្រកួតតែមួយគត់ដែលមិនមានតម្លៃ។

លោក Nikhil បានបកអាក្រាតទៀតថា មែនទែនទៅលោកចង់បញ្ចប់ដោយសន្តិវិធីដោយប្រកាសចែកផ្លូវជាមួយ MGI ដោយការគោរពយ៉ាងខ្លាំងប៉ុន្តែភាគីម្ខាងទៀតមិនចង់បានបែបនេះដោយជ្រើសវិធីដ្រាម៉ា។ ស្ថាប័ននេះគិតតែពីលុយការគោរពគ្នាទៅវិញទៅមក មិនដែលមានក្នុងវចនានុក្រមរបស់ពួកគេឡើយ មិនដែលធ្វើអ្វីដែលល្អសម្រាប់មនុស្សជាតិបើប្រៀបធៀបជាមួយនឹង Miss Universe គ្មានអ្វីល្អឡើយ។

មិនត្រឹមតែប៉ុណ្ណោះ ND ឥណ្ឌារូបនេះថា ស្ថាប័នធំៗចំនួន៤ផ្សេងទៀតដូចជា ប៉េរ៉ូ វៀតណាម ហ្វីលីពីន និងឥណ្ឌូនេស៊ី នៅថ្ងៃណាមួយនៅពេលដែលពួកគេមានអារម្មណ៍ថាលើសលប់ពេកច្បាស់ថានឹងមានភាពចម្រូងចម្រាសមិនខាន៕

តារាសម្តែងហុងកុង Elena Kong ដែលមានអាយុ ៥៣ ឆ្នាំថ្មីៗនេះបានចែករំលែកថាអ្នកនាងបានងាកទៅរកកម្មវិធីណាត់ជួបដើម្បីស្វែងរក «ការចាប់ផ្តើមថ្មី» ជាពិសេសមានបំណងភ្ជាប់ទំនាក់ទំនងជាមួយបុរសវ័យក្មេងក្នុងវ័យ ៣០ ឆ្នាំ។

ក្នុងអំឡុងពេលផ្សាយផ្ទាល់តាមយូធូបជាមួយតារាសម្តែង Carlo Ng អ្នកនាង Elena Kong បាននិយាយថា ការចង់ដឹងចង់ឃើញរបស់ខ្លួនអំពីការណាត់ជួបតាមអ៊ីនធឺណិតត្រូវបានផ្ទុះឡើងបន្ទាប់ពីបានឮអំពីមិត្តម្នាក់ដែលបានរកឃើញ «ស្នេហាពិត»នៅលើកម្មវិធីណាត់ជួប។ អ្នកនាងបាននិយាយថា៖ «ខ្ញុំឆ្ងល់ថា ‘តើអ្នកពិតជាអាចរកឃើញអ្នកនៅលើAppនេះមែនទេ?’។

Elena បានសាកល្បងជាមួយកម្មវិធីជាច្រើនអស់រយៈពេលពីរសប្តាហ៍ ប៉ុន្តែបានសម្រេចចិត្តមិនបន្តស្នេហា ដោយជ្រើសរើសយកការបើកចំហរសម្រាប់ការជួបធម្មតាជំនួសវិញ។ ដោយនិយាយលេងអំពីវិធីសាស្រ្តរបស់ខ្លួន តារាសម្តែងរូបនេះបានប្រាប់អ្នកគាំទ្រថា «តើអ្នកគិតថាខ្ញុំកំពុងស្វែងរកស្នេហាពិតទេ? ខ្ញុំបានកំណត់អាយុពី ៣៥ ទៅ ៤០ ឆ្នាំ» ។

ពេលនិយាយអំពីចំណង់ចំណូលចិត្តរបស់ខ្លួនរួមទាំងការទាក់ទាញរបស់នាងចំពោះបុរសសាច់ដុំ Elena បានឆ្លើយតបយ៉ាងក្លៀវក្លាថា៖ “ពិតណាស់ ខ្ញុំត្រូវការអ្នកដែលអាចផ្តល់កម្លាំងចិត្ត នាំមកនូវថាមពលថ្មីឱ្យខ្ញុំ និងការចាប់ផ្តើមថ្មី”។ ក្នុងអំឡុងពេលបទពិសោធន៍របស់ Elena បានជួបប្រទះនៅពេលដែលរូបរាងពិតរបស់បុរសម្នាក់មិនត្រូវគ្នានឹងរូបថតប្រវត្តិរូបរបស់ខ្លួនក្នុងអំឡុងពេលcall ជាវីដេអូ។ អ្នកនាងបានសារភាពថាបានប្រើប្រាស់រូបភាពចំហៀង និងឈ្មោះក្លែងក្លាយដើម្បីរក្សាភាពឯកជន និងជៀសវាងគេស្គាល់។

បន្ទាប់ពីដំណឹងនៃកម្មវិធីណាត់ជួបរបស់តារាស្រីវ័យ៥៣ឆ្នាំរូបនេះបានលេចធ្លាយមក Elena បានទទួលសារប្រចាំថ្ងៃជាច្រើន ដែលភាគច្រើនគឺឆ្ពោះទៅមុខយ៉ាងខ្លាំង។ ដោយចែករំលែកឧទាហរណ៍មួយ នាងបាននិយាយថា បុរសម្នាក់បានសរសេរថា «ខ្ញុំអាយុ ៤០ ឆ្នាំ សមណាស់! ខ្ញុំនឹងផ្តល់ឱ្យអ្នកនូវរាត្រីដែលមិនអាចបំភ្លេចបាន»។

Elena Kong ជាបុគ្គលលេចធ្លោម្នាក់ក្នុងឧស្សាហកម្មកម្សាន្តរបស់ហុងកុង ដែលគេស្គាល់ថាជាតារាសម្តែង ឌីជេ វិទ្យុ និងពិធីការិនីទូរទស្សន៍។ អ្នកនាងបានចាប់ផ្តើមអាជីពជាតារាបង្ហាញម៉ូត មុនពេលចូលបម្រើការងារនៅ ATV ក្នុងឆ្នាំ ១៩៩៧ ហើយក្រោយមកបានប្តូរទៅ TVB ក្នុងឆ្នាំ ២០០៩ ដែលបានបញ្ចេញស្នាដៃសំខាន់ៗជាច្រើនរឿង។

ពីមុន Elena Kong បានរៀបការជាមួយ Ng Kwan Cheung ដែលជាប្អូនប្រុសរបស់តារាសម្តែង Sandra Ng ក្នុងឆ្នាំ ២០០៦ ។ ប្តីប្រពន្ធនេះបានលែងលះគ្នានៅឆ្នាំ ២០១៨ ហើយ Elena នៅតែបន្តភាពនៅលីវមិនទាន់មានដៃគូជីវិតថ្មីចាប់តាំងពីពេលនោះមក៕

Katy Louise ភរិយារបស់តារាសម្តែងកូរ៉េល្បីឈ្មោះ Song Joong Ki បានសម្រាកលកូនស្រីទីពីររបស់នាងនៅក្នុងប្រទេសអ៊ីតាលីមួយឆ្នាំបន្ទាប់ពីស្វាគមន៍កូនប្រុសដំបូងរបស់ពួកគេ។

យោងតាម News1 នៅថ្ងៃទី២០ ខែវិច្ឆិកា Song Joong Ki ផ្អឹបការងារមួយឡែកដើម្បីទៅទីក្រុងរ៉ូមដើម្បីមើលថែប្រពន្ធរបស់ខ្លួន។ តារាសម្តែងបាននិយាយថា «បច្ចុប្បន្នខ្ញុំនៅទីក្រុងរ៉ូម ហើយវាទើបតែជាងមួយឆ្នាំប៉ុណ្ណោះចាប់តាំងពីខ្ញុំបានស្វាគមកូនដំបូងរបស់ខ្ញុំនៅទីនេះ។ ខ្ញុំពិតជារីករាយក្នុងការប្រកាសថា ពួកយើងបានទទួលពរជ័យជាមួយទារកដ៏ស្រស់ស្អាតម្នាក់ទៀតហើយ។ ព្រះនាងដ៏គួរឱ្យស្រឡាញ់របស់ពួកយើងបានប្រសូតមកមានសុខភាពល្អ ហើយទាំងភរិយា និងកូនស្រីរបស់ពួកយើងសុខសប្បាយមានសុវត្ថិភាព»។

ទីក្រុងរ៉ូម គឺជាស្រុកកំណើតរបស់ Katy ។ ចាប់តាំងពីរៀបការមក នាងបានធ្វើដំណើរជាញឹកញាប់រវាងប្រទេសអ៊ីតាលី និងកូរ៉េ។ ម្តងម្កាល គេឃើញគូស្នេហ៍មួយគូនេះ រុញរទេះរុញកូនទៅដើរលេង។ នៅពេលដែលអ្នកគាំទ្រសុំថតរូប Song Joong Ki បានត្រឹមតែយល់ព្រមឱ្យអ្នកគាំទ្រថតរូបជាមួយលោក ដោយមិនអនុញ្ញាតឱ្យពួកគេថតរូបប្រពន្ធកូនរបស់លោកឡើយ។

Song Joong Ki និង Katy បានប្រកាសរៀបការនៅដើមឆ្នាំ ២០២៣។ តារាសម្តែងល្បីឈ្មោះរូបនេះបាននិយាយថាការកសាងគ្រួសារនិងការចិញ្ចឹមកូនគឺជាគោលដៅដ៏ធំបំផុតក្នុងជីវិត។ លោករីករាយក្នុងការស្វែងរកដៃគូ។ ពួកគេទាំងពីរនាក់រស់នៅចុះសម្រុងគ្នាហើយលោកសង្ឃឹមថានឹងក្លាយជាឪពុកល្អដូចជាឪពុករបស់លោកដែរ។

មុនពេលកសាងគ្រួសារជាមួយ Katy តារាសម្តែង Song Joong Ki បានឆ្លងកាត់អាពាហ៍ពិពាហ៍ជាមួយ Song Hye Kyo ហើយពួកគេបានលែងលះគ្នានៅឆ្នាំ២០១៩ ។ តារាសម្តែងរូបនេះបានប្រឡូកក្នុងអាជីពសិល្បៈអស់រយៈពេល ១៥ ឆ្នាំ ដែលសាងភាពល្បីល្បាញសម្រាប់រឿងជាច្រើនជាពិសេសរឿងសម្តែងជាមួយអតីតភរិយា៕

នៅថ្ងៃទី២១ ខែវិច្ឆិកា មហោស្រពតន្ត្រីដ៏ធំរបស់ពិភពលោក Coachella បានបង្ហាញវត្តមានរបស់ខ្លួនសម្រាប់ឆ្នាំក្រោយនៅលើគេហទំព័រផ្លូវការរបស់ខ្លួន ដែលបង្កឱ្យមានការរំភើបចិត្តក្នុងចំណោមអ្នកគាំទ្រតន្ត្រីទូទាំងពិភពលោក។

Lisa និង Jennie សមាជិកក្រុម BLACKPINK នឹងចូលរួមក្នុងព្រឹត្តិការណ៍នេះក្នុងនាមជាតារាចម្រៀងទោល មិនមែនជាផ្នែកមួយនៃក្រុម BLACKPINK នោះទេ។ Lisa គ្រោងនឹងសម្តែងនៅថ្ងៃទី ១១ និង ១៨ខែមេសា ខណៈដែល Jennie នឹងឡើងឆាកនៅថ្ងៃទី ១៣ និង២០ ខែមេសា។ នេះជាការបង្ហាញខ្លួនទោលលើកដំបូងរបស់ពួកគេនៅ Coachella ។

ចាប់តាំងពីការសម្តែង Coachella លើកដំបូងរបស់ពួកគេក្នុងឆ្នាំ ២០១៩ BLACKPINK បានឈានជើងចូលទៅក្នុងពិភពលោកបន្តិចម្តងៗ ដោយយកឈ្នះគ្រប់ជំហានថ្មីក្នុងអាជីពរបស់ពួកគេ។ កាលពីឆ្នាំ២០២៣ ក្រុម BLACKPINK បានវិលត្រឡប់មកវិញក្នុងនាមជាតារា K-Pop ដំបូងដែលបានសម្ដែងជាសិល្បករគោលនៅ Coachella។

ក្រៅពី Lisa និង Jennie ក្រុមចម្រៀង ENHYPEN ក៏នឹងសម្តែងនៅ Coachella ដែលក្លាយជាក្រុមចម្រៀងបុរស K-pop ទីពីរដែលបានឡើងឆាកបន្ទាប់ពី ATEEZ ។ ពួកគេត្រូវបានគ្រោងសម្រាប់ការសម្តែងនៅថ្ងៃទី ១២ និង១៩ ខែមេសា។ Coachella ឆ្នាំ២០២៥ ក៏រួមបញ្ចូលផងដែរនូវក្រុមសិល្បករដែលមានតារាល្បីៗ ដោយមានរូបតំណាងប៉ុបដូចជា Lady Gaga, Post Malone និងក្រុមតន្ត្រីអាម៉េរិក Green Day ដែលជាសិល្បករគោលក្នុងព្រឹត្តិការណ៍នេះ។

Coachella ដែលជាមហោស្រពតន្ត្រីដ៏ល្បីល្បាញបំផុតមួយនៅអាម៉េរិកខាងជើងបានចាប់ផ្តើមក្នុងឆ្នាំ ១៩៩៩ ហើយបានបន្តអស់រយៈពេលជាង ២ ទសវត្សរ៍ ដោយពង្រឹងកេរ្តិ៍ឈ្មោះរបស់ខ្លួនជាឆាកដ៏សំខាន់សម្រាប់សកម្មភាពតន្ត្រីទូទាំងពិភពលោក៕