វណ្ណថាន បង្ហាញខ្លួនជាសាធារណៈលើកដំបូងបន្ទាប់ពីមានរឿងអា.ស្រូវ

តារាចម្រៀង វណ្ណថាន បានបង្ហាញខ្លួនជាលើកដំបូងសម្រាប់ការសមឆាកសម្តែងត្រៀមសម្រាប់កម្មវិធីដ៏អស្ចារ្យ សាទរកម្ពុជា ជាមួយនឹងតារាចម្រៀង វណ្ណដា ក្រោមការទស្សនារបស់ប្រជាពលរដ្ឋជាច្រើន។ ការបង្ហាញខ្លួនលើកនេះចាប់តាំងពីផ្ទុះភាពចម្រូងចម្រាស ចំណែកឯហ្វេនៗតារាចម្រៀងរូបនេះបានពោលថាសង្ឃឹមថាអ្វីៗនឹងល្អប្រសើរ។

នារាត្រីថ្ងៃទី២៩ ខែធ្នូ ឆ្នាំ២០២៤ មានវីដេអូជាច្រើនបានចែករំលែកនៅលើបណ្តាញសង្គមអំពីតារាចម្រៀង វណ្ណដា និង វណ្ណថាន រួមទាំងសិល្បករផ្សេងទៀតសម្រាប់ការមកហាត់សមឆាកការសម្តែងដែលត្រៀមនឹងបង្ហាញជូនបងប្អូនជនរួមជាតិក្នុងមហាព្រឹត្តិការណ៍ «សាទរកម្ពុជា»នាថ្ងៃទី៣១ ខែធ្នូ។ នេះគឺជាលើកដំបូងហើយសម្រាប់តារាចម្រៀង វណ្ណថាន បានបង្ហាញខ្លួនជាសាធារណៈចាប់តាំងពីមានរឿងអាស្រូវសម្ព័ន្ធភាពជាមួយនឹងនារីម្នាក់ដែលផ្អើលអស់ពេញប្រទេស និងឈានដល់ការចាត់ចែងផ្លូវច្បាប់។

ក្នុងការសមឆាកនេះ វណ្ណដា និង វណ្ណថាន បានសមសម្រាប់បទ «មិនអាចវិលវិញ» និង កំលោះស្រុកខ្មែរ ហើយអ្នកទាំងពីរបានកៀកកគ្នាហើយទស្សនិកជនដែលចូលរួមទស្សនាផ្ទាល់ទទួលបានការសប្បាយរីករាយទោះមិនទាន់បានសម្តែងជាផ្លូវការក្តី។ អ្នកគាំទ្ររបស់តារាចម្រៀងរូបនេះបានបង្ហាញអារម្មណ៍រំភើបចិត្តដែលឃើញ វណ្ណថាន បង្ហាញការសម្តែងរបស់ខ្លួន និងបានលើកឡើងថាសង្ឃឹមថាអ្វីៗនឹងល្អប្រសើរ។

គួរឱ្យដឹងថា មុននឹងបង្ហាញខ្លួនជាសាធារណៈលើកនេះ តារាចម្រៀង វណ្ណថាន ត្រូវបានខកខានចូលរួមការសម្តែងក្នុងកម្មវិធីដ៏ធំមួយនៅខេត្តព្រះសីហនុ ក្រោយពីរងផលប៉ះពាល់រឿងអាស្រូវកាលពីយប់ថ្ងៃទី១០ ខែធ្នូ ខណៈថ្ងៃទី១៩ លោកបានចេញលិខិតបំភ្លឺជាសាធារណៈ៕