ប្រទេសចិន ៖ ការិយាល័យកណ្តាលគណបក្សកុម្មុយនិស្តចិនបានបង្ហាញពីវិធានការថ្មីដើម្បីកាត់បន្ថយកាកសំណល់អាហារដ៏ច្រើនលើសលប់ ព្រមទាំងកាត់បន្ថយការបាត់បង់គ្រាប់ធញ្ញជាតិរបស់ចិនឱ្យទាបជាងមធ្យមភាគសកល នៅត្រឹមចុងឆ្នាំ២០២៧ ។ ចិនបានកំណត់គោលដៅបង្កើនប្រសិទ្ធភាពគ្រាប់ធញ្ញជាតិនៅទូទាំងប្រទេស ចាប់តាំងពីការដាំដុះ, ប្រមូលផល, កែច្នៃ រហូតដល់ការបរិភោគ ។

វិធានការនេះផ្តោតលើការប្រើប្រាស់បច្ចេកវិទ្យា និងគ្រឿងម៉ាស៊ីនក្នុងវិស័យកសិកម្មឱ្យមានប្រសិទ្ធភាពខ្ពស់ ដើម្បីកាត់បន្ថយការបាត់បង់គ្រាប់ធញ្ញជាតិក្នុងពេលប្រមូលផល ។ កសិករនឹងទទួលបានប្រាក់ឧបត្ថម្ភពីរដ្ឋាភិបាល ព្រមទាំងចំណេះដឹងពាក់ព័ន្ធនឹងបច្ចេកទេសការប្រមូលផលប្រកបដោយប្រសិទ្ធភាព ។

រដ្ឋាភិបាលក៏បានវិនិយោគគម្រោងហេដ្ឋារចនាសម្ព័ន្ធដឹកជញ្ជូនទំនើបផងដែរ ដូចជា ៖ ផ្លូវរថភ្លើង និងស្ថានីយរថយន្តក្រុង ដើម្បីកាត់បន្ថយការបាត់បង់គ្រាប់ធញ្ញជាតិពេលដឹកជញ្ជូន ក៏ដូចជាជំរុញការកែច្នៃគ្រាប់ធញ្ញជាតិឱ្យទទួលបានប្រយោជន៍ខ្ពស់បំផុត ។ វិធានការនេះមានគោលដៅឱ្យពលរដ្ឋយល់ដឹង និងបរិភោគអាហារមានប្រយោជន៍ដល់សុខភាព ដោយពលរដ្ឋត្រូវកុម្ម៉ង់អាហារក្នុងបរិមាណសមល្មម ដើម្បីកាត់បន្ថយកាកសំណល់អាហារនៅទូទាំងប្រទេស ។

ភោជនីយដ្ឋាននានាគួរជំរុញឱ្យអតិថិជនកាត់បន្ថយការកុម្ម៉ង់អាហារ ឬពុំកុម្ម៉ង់អាហារច្រើនដើម្បីចៀសវាងការបរិភោគពុំអស់ និងក្លាយជាកាកសំណល់ ដោយណែនាំអតិថិជនឱ្យបរិច្ចាគអាហារទៅអង្គការសប្បុរសធម៌ ។ រីឯសាលាគួរអនុវត្តគោលការណ៍មួយចំនួន ដូចជា ៖ ថ្លឹងទម្ងន់អាហារដែលសិស្សបរិភោគ ដើម្បីកាត់បន្ថយកាកសំណល់អាហារ ខណៈស្ថាប័នរដ្ឋាភិបាលគួររៀបចំអាហារក្នុងបរិមាណសមល្មមតាមចំនួនមនុស្ស ។

វិធានការកាត់បន្ថយកាកសំណល់អាហារបានកើតឡើងក្រោយពីប្រធានាធិបតីចិន លោក ស៊ី ជិនពីង ថ្លែងសុន្ទរកថាក្នុងកិច្ចប្រជុំកំពូលក្រុមប្រទេស G20 នៅប្រេស៊ីល ថា ចិននឹងចូលរួមប្រឆាំងជាមួយភាពអត់ឃ្លាន និងភាពក្រីក្រ ហើយចិននឹងបន្តធ្វើជាម្ចាស់ផ្ទះសន្និសីទអន្តរជាតិ ស្តីពី «ការបាត់បង់ចំណីអាហារ និងកាកសំណល់» ។

តាមរបាយការណ៍ផ្សព្វផ្សាយដោយស្ថាប័នវិទ្យាសាស្ត្រជាតិកសិកម្មចិន កាលពីខែធ្នូ ឆ្នាំ២០២៣ បញ្ជាក់ថា បរិមាណកាកសំណល់អាហារសរុបនៅឆ្នាំ២០២២ របស់ចិន រួមមាន ៖ គ្រាប់ធញ្ញជាតិ, បន្លែ, ផ្លែឈើ, សាច់សត្វ និងស៊ុត ស្មើរហូតដល់៤៦០លានតោន ។ កាកសំណល់អាហារដ៏ច្រើនលើសលប់នេះធ្វើឱ្យខាតបង់សេដ្ឋកិច្ច ស្មើទឹកប្រាក់២៥៩,៥៣៤លានដុល្លារអាមេរិក ។

ចិនបានបាត់បង់គ្រាប់ធញ្ញជាតិ ស្មើជាង៣៥លានតោនក្នុង១ឆ្នាំ ក្នុងពេលប្រមូលផល, ដឹកជញ្ជូន និងកែច្នៃ ។ ទោះយ៉ាងណា ទិន្នន័យពីកាកសំណល់អាហារចិននៅតែពុំច្បាស់លាស់ ពីព្រោះក្រោយពិធីជប់លៀង, ពិធីរៀបការ, បុណ្យសព និងពិធីផ្សេងៗ បានបន្សល់នូវកាកសំណល់អាហារយ៉ាងច្រើន ។ ដោយឡែក គម្រោងបរិស្ថានរបស់អង្គការសហប្រជាជាតិបញ្ជាក់ថា កាលពីឆ្នាំ២០២២ កាកសំណល់អាហារសរុបនៅទូទាំងពិភពលោក ស្មើនឹង១,០៥០លានតោន ឬអាហារដែលពិភពលោកផលិតចំនួន៥ផ្នែក បានក្លាយជាកាកសំណល់១ផ្នែក ៕

ហុងកុង ៖ កាលពីថ្ងៃទី២ ខែធ្នូ ឆ្នាំ២០២៤ សារព័ត៌មានបរទេសរាយការណ៍ថា អាកាសយានដ្ឋាននៅទីក្រុងហុងកុង បានបង្ហាញរូបសំណាកខ្លាឃ្មុំ ជាង២,០០០ក្បាលតំណាងឱ្យខ្លាឃ្មុំយក្ស ដើម្បីទាក់ទាញចំណាប់អារម្មណ៍ភ្ញៀវទេសចរជាតិ និងអន្តរជាតិ ព្រមទាំងជំរុញឱ្យហុងកុងក្លាយជាតំបន់ទេសចរណ៍ដ៏ពេញនិយមនៅតំបន់អាស៊ីម្តងទៀត ។

រូបសំណាកខ្លាឃ្មុំរាប់ពាន់ក្បាលដែលលោកអ្នកបានឃើញនេះ គឺជាការរៀបចំកម្មវិធី «Panda Go! Fest Hong Kong» ដោយការបង្ហាញរូបសំណាកខ្លាឃ្មុំ រហូតដល់២,៥០០ក្បាល នៅអាកាសយានដ្ឋានក្នុងទីក្រុងហុងកុង ។ ក្រៅពីនេះ នឹងមានការបង្ហាញរូបសំណាកខ្លាឃ្មុំឱ្យមហាជនទូទៅទស្សនានៅបរិវេណផ្លូវ Avenue of Stars ក្នុងតំបន់លក់ទំនិញ Tsim Sha Tsui និងទីតាំងល្បីៗ ៣កន្លែងទៀត នាខែធ្នូ ឆ្នាំ២០២៤ ។

ក្នុងចំណោមទីតាំងបង្ហាញរូបសំណាកខ្លាឃ្មុំទាំងនេះ គឺនឹងបង្ហាញនៅឧទ្យានជាតិ Ocean ផងដែរ ដែលជាកន្លែងរស់នៅរបស់កូនខ្លាឃ្មុំយក្ស, មេបារបស់វា ព្រមទាំងខ្លាឃ្មុំ២ក្បាលទៀត ដែលចិនប្រគល់ឱ្យហុងកុង សម្រាប់ជាកាដូ ឆ្នាំ២០២៤ ។

គោលបំណងនៃការបង្ហាញរូបសំណាកខ្លាឃ្មុំ គឺដើម្បីជួយជំរុញសេដ្ឋកិច្ចទីក្រុងហុងកុងឱ្យកាន់តែល្អប្រសើរឡើង និងជួយឱ្យហុងកុងក្លាយជាតំបន់ទេសចរណ៍ដ៏ពេញនិយមជាងគេនៅអាស៊ីឡើងវិញ ។

អ្នករៀបចំកម្មវិធីរូបសំណាកខ្លាឃ្មុំ ក៏បានអញ្ជើញតារាល្បីៗជាច្រើនរូបមកចូលរួមកម្មវិធីផងដែរ ដូចជា ៖ តារាចម្រៀងរបស់អាមេរិក ។ រីឯប្រាក់ចំណូលបានពីកម្មវិធីនេះ គឺសម្រាប់ជួយឧបត្ថម្ភដល់កម្មវិធីផ្សេងៗពាក់ព័ន្ធនឹងខ្លាឃ្មុំយក្ស ។

គួរបញ្ជាក់ថា ការបង្ហាញរូបសំណាកខ្លាឃ្មុំយក្សដល់ភ្ញៀវទេសចរ គឺក្នុងគោលបំណងអបអរសាទរដល់កូនខ្លាឃ្មុំភ្លោះដែលបានកើតនៅឧទ្យានជាតិ Ocean (Ocean Park Hong Kong) ។ ដោយឡែក ការប្រគល់ខ្លាឃ្មុំយក្សដល់សួនសត្វនៅក្រៅប្រទេស គឺបង្ហាញពីទំនាក់ទំនងការទូត និង Soft Power របស់ទីក្រុងប៉េកាំង ៕

ប្រទេសចិន៖ ក្រុមហ៊ុនផលិតរថយន្តចិន BYD បានលក់រថយន្តច្រើនជាងក្រុមហ៊ុនផលិតរថយន្តអាមេរិក Ford នៅក្នុងត្រីមាសទី ៣ នៃឆ្នាំ ២០២៤ នេះហើយទំនងនឹងវ៉ាដាច់គូប្រជែងរបស់ខ្លួនពេញមួយឆ្នាំតែម្តង។
យោងតាមសារព័ត៌មានបរទេសបានចុះផ្សាយថា នៅក្នុងត្រីមាសទីបី BYD លក់រថយន្តបាន ១.១៣ លានគ្រឿង កើនឡើង ៣៨% ធៀបនឹងរយៈពេលដូចគ្នាក្នុងឆ្នាំ ២០២៣ ដែលវ៉ាដាច់ក្រុមហ៊ុន Ford ជាលើកដំបូង ក្លាយជាក្រុមហ៊ុនផលិតរថយន្តធំជាងគេទី ៦ នៅលើពិភពលោក។

ខណៈក្រុមហ៊ុន Ford បានលក់រថយន្តតិចជាង ៤០,០០០ គ្រឿងក្នុងអំឡុងពេលដូចគ្នា ដោយបានធ្លាក់មកចំណាត់ថ្នាក់ទី ៧ ក្នុងរយៈពេល ៩ ខែដំបូងនៃឆ្នាំនេះ។ ប្រសិនបើសន្ទុះកំណើនត្រូវបានរក្សា BYD នឹងវ៉ាដាច់ក្រុមហ៊ុន Ford ក្នុងឆ្នាំ ២០២៤ និងឈានដល់ដំណាក់កាលសំខាន់នៃការលក់រថយន្តជាង ៤ លានគ្រឿង។ មិនត្រឹមតែ BYD ប៉ុណ្ណោះទេ ក្រុមហ៊ុនផលិតរថយន្តចិនផ្សេងទៀតក៏កំពុងដាក់សម្ពាធលើក្រុមហ៊ុនផលិតរថយន្តប្រពៃណីផងដែរ។

នៅក្នុងបញ្ជី focus 2 move ដែលជាគេហទំព័រកត់ត្រាទិន្នន័យនៃការលក់របស់ក្រុមហ៊ុនរថយន្តទូទាំងពិភពលោកបានឱ្យដឹងថា Toyota របស់ជប៉ុននៅតែរក្សាតំណែងលេខ ១ ជាក្រុមហ៊ុនផលិតរថយន្តធំជាងគេនៅលើពិភពលោក។ ទោះជាយ៉ាងណាក៏ដោយយោងតាម Nikkei Asia ម៉ាកយីហោជាច្រើនមកពីប្រទេសជប៉ុន អឺរ៉ុប និងសហរដ្ឋអាមេរិក នៅក្នុងត្រីមាសចុងក្រោយនេះហាក់មានការធ្លាក់ចុះគួរឱ្យកត់សម្គាល់ ដោយ Toyota បានថយចុះ ៤% មកនៅ ២.៧៣ លានគ្រឿង ប៉ុន្តែនៅតែនាំមុខក្រុមហ៊ុនជាច្រើនទៀតដូចជា Volkswagen, Hyundai, Honda និង BYD។

ទោះបីក្រុមហ៊ុនចិន BYD ឈរនៅលេខរៀងទី ៦ នៅលើពិភពលោកក៏ដោយ ក៏ក្រុមហ៊ុននេះនៅតែនាំមុខក្រុមហ៊ុន Ford និង Tesla ជាមួយនឹងចំណែកទីផ្សារ ២៦%។ កំណើនដ៏រឹងមាំរបស់ BYD បានជួយកែលម្អហិរញ្ញវត្ថុរបស់ខ្លួន ដោយនៅក្នុងត្រីមាសទីបី BYD ទទួលបានប្រាក់ចំណូលរហូតដល់ ២០១ ពាន់លានយន់ (ប្រមាណ ២៧.៦ ពាន់លានដុល្លារអាមេរិក) ខ្ពស់ជាង Tesla ដែលមានត្រឹមតែ ២៥.២ ពាន់លានដុល្លារប៉ុណ្ណោះ៕

ប្រទេសកូរ៉េខាងត្បូង ៖ កាលពីថ្ងៃទី៤ ខែធ្នូ ឆ្នាំ២០២៤ សារព័ត៌មាន AFP រាយការណ៍ថា ប្រធានាធិបតីកូរ៉េខាងត្បូង លោក Yoon Suk Yeol បានយល់ព្រមដកច្បាប់អាជ្ញាសឹក ដែលលោកទើបតែប្រកាសឱ្យប្រើច្បាប់នេះរយៈពេលប៉ុន្មានម៉ោងមុន ដើម្បីបង្ក្រា.ប កងកម្លាំងប្រឆាំងរដ្ឋាភិបាល និងទប់ស្កាត់ការគំរា.មកំហែ.ងពីកូរ៉េខាងជើង ។

ប្រធានាធិបតីកូរ៉េខាងត្បូង លោក Yoon បានប្រកាសប្រើច្បាប់អាជ្ញាសឹកជាបន្ទាន់ ដោយសារលោកបារម្ភពីបញ្ហាអសន្តិសុខពីការគំរាមកំហែងរបស់កូរ៉េខាងជើង និងមានមន្ត្រីគណបក្សប្រឆាំងក្នុងរដ្ឋសភាបង្កើតកងកម្លាំងប្រឆាំងរដ្ឋាភិបាល ។ បន្ទាប់មក មេបញ្ជាការកងទ័ពជើងគោកបានបំពេញតួនាទីជាមេបញ្ជាការច្បាប់អាជ្ញាសឹកនៅអគាររដ្ឋសភា ។

ក្រោយមកមិនយូរប៉ុន្មាន កងទ័ព និងសមត្ថកិច្ចនៅក្រោមច្បាប់អាជ្ញាសឹកដែលគ្រប់គ្រងរដ្ឋសភា ក៏បានដកកម្លាំងចេញទាំងអស់ និងទុកផ្លូវឱ្យសមាជិករដ្ឋសភាចូលប្រជុំភ្លាមៗ ដើម្បីរារាំងការអនុវត្តអំណាចរបស់ប្រធានាធិបតីកូរ៉េខាងត្បូង ។ សមាជិកសភាចំនួន១៩០នាក់ (ក្នុងចំណោមសមាជិកសភាសរុប៣០០នាក់) បានចូលរួមប្រជុំបោះឆ្នោតរារាំងការប្រើច្បាប់អាជ្ញាសឹក និងអំពាវនាវឱ្យប្រធានាធិបតីកូរ៉េខាងត្បូងដកវាចេញជាបន្ទាន់ ។

យោងតាមរដ្ឋធម្មនុញ្ញកូរ៉េខាងត្បូងបញ្ជាក់ថា ច្បាប់អាជ្ញាសឹកនឹងលុបចោល នៅពេលសំឡេងភាគច្រើនក្នុងរដ្ឋសភាពុំយល់ស្រប ហើយការប្រើអំណាចកងទ័ព និងសមត្ថកិច្ចតាមច្បាប់អាជ្ញាសឹក គឺជាទង្វើខុសច្បាប់ ។ ហេតុនេះ លោក Yoon ត្រូវតែយល់ព្រមដកច្បាប់អាជ្ញាសឹក និងត្រៀមលុបចោលច្បាប់ដែលបានប្រកាសដោយគ្មានការគ្រោងទុក ។

មុននេះ កងទ័ពបានចូលក្នុងរដ្ឋសភា ខណៈអ្នកតវ៉ាជាច្រើននាក់ប្រមូលផ្តុំគ្នានៅបរិវេណខាងក្រៅអគារ និងប្រឈមមុខជាមួយកងកម្លាំងសន្តិសុខ ។ គណៈរដ្ឋមន្ត្រីរបស់លោក Yoon បានអនុម័តលុបចោលច្បាប់អាជ្ញាសឹករួចហើយ និងនៅសល់តែសេចក្តីប្រកាសរបស់ប្រធានាធិបតីប៉ុណ្ណោះ ។

អ្នកតវ៉ាជាច្រើនបានលើកស្លាកសញ្ញា និងទង់ជាតិកូរ៉េខាងត្បូង ហើយស្រែកខ្លាំងៗថា «ចូរចាប់ខ្លួនលោក Yoon» ដែលសកម្មភាពនេះបង្ហាញថា ពលរដ្ឋមិនគាំទ្រការប្រើច្បាប់អាជ្ញាសឹករបស់ប្រធានាធិបតីទេ ។ លោក Yoon បានហៅក្រុមមន្ត្រីមកពីបក្សប្រឆាំងដែលមានសំឡេងច្រើនក្នុងរដ្ឋសភាថា គឺជាកងកម្លាំងប្រឆាំងរដ្ឋាភិបាល ។

លោកបានប្រកាសប្រើច្បាប់អាជ្ញាសឹកជាលើកដំបូងក្នុងរយៈពេល៤៤ឆ្នាំ និងនិយាយថា មន្ត្រីបក្សប្រឆាំងមានបំណងផ្តួលរំលំរដ្ឋាភិបាល និងគាំទ្រកូរ៉េខាងជើង ។ រីឯមន្ត្រីបក្សប្រឆាំងបញ្ជាក់ថា វាជាការប្រឆាំងនឹងរដ្ឋធម្មនុញ្ញកូរ៉េខាងត្បូង ។ កាលពីថ្ងៃទី៣ ខែធ្នូ កន្លងមក លោក Yoon បានថ្លែងក្នុងទូរទស្សន៍ជាតិដោយគ្មានការគ្រោងទុកពីការប្រើច្បាប់អាជ្ញាសឹក ដើម្បីកម្ចាត់កងកម្លាំងគាំទ្រកូរ៉េខាងជើង និងការពារសេរីភាពនៅកូរ៉េខាងត្បូង ។

គួរបញ្ជាក់ថា ច្បាប់អាជ្ញាសឹកនឹងប្រកាសឱ្យប្រើប្រាស់ក្នុងរយៈពេលបណ្តោះអាសន្ន នៅពេលប្រទេសជាតិមានអាសន្ន និងផ្តល់អំណាចដឹកនាំទៅឱ្យក្រុមកងទ័ពដើម្បីស្តារសណ្តាប់ធ្នាប់សាធារណៈ និងសន្តិសុខ ។ ច្បាប់នេះអាចរឹតបន្តឹងសិទ្ធិសេរីភាពរបស់ប្រព័ន្ធផ្សព្វផ្សាយ និងពលរដ្ឋទូទៅ ៕