នាថ្ងៃសៅរ៍ ទី៧ ខែធ្នូ ឆ្នាំ២០២៤នេះ នឹងមានការតាំងពិព័ណ៌«ផ្សារបារាំង» ដែលនឹងរៀបចំឡើងនៅក្នុងស្ថានទូតបារាំងប្រចាំកម្ពុជា។ ជាមួយគ្នានោះ បងប្អូនប្រជាពលរដ្ឋខ្មែរក៏ដូចជាភ្ញៀវទេសចរអន្តរជាតិ អាចធ្វើការអញ្ជើញចូលរួមទស្សនាបានដោយសេរី។
យោងតាមការដាក់បង្ហោះរបស់ស្ថានទូតបារាំងប្រចាំកម្ពុជាបានឲ្យដឹងថា «ផ្សារបារាំងឆ្នាំ២០២៤បានត្រឡប់មកភ្នំពេញសារជាថ្មី»។ កម្មវីធីនេះគឺរៀបចំឡើងដោយសភាពាណិជ្ជកម្ម និងឧស្សាហកម្មបារាំងកម្ពុជា ហើយនៅឆ្នាំនេះ ផ្សារបារាំងនឹងកាន់តែអស្ចារ្យជាងមុន ដោយមានការតំាងពិព័ណ៌ដោយស្តង់ប្រមាណជាង៧០។ ព្រឹត្តិការណ៍នេះគឺធ្វើឡើងក្នុងគោលបំណងដាក់តាំងបង្ហាញនូវផលិតផល ម្ហូបបអាហារ ក៏ដូចជាសេវាកម្មនានារបស់បារាំង សម្រាប់ផ្គាប់ចិត្តមនុស្សគ្រប់វ័យ។
ដូច្នេះហើយ អ្នកទាំងអស់គ្នាគឺអាចអញ្ជើញមកចូលរួមទស្សនាបានដោយសេរី ដែលមានទីតំាងស្ថិតនៅក្នុងបរិវេណស្ថានទូតបារាំងប្រចាំកម្ពុជា នាថ្ងៃទី ៧ ខែធ្នូនេះ ចាប់ពីវេលាម៉ោង ១០ ព្រឹក ដល់ម៉ោង ៦ល្ងាច។
ស្ថាតទូតបារាំងប្រចាំកម្ពុជាបានគូសបញ្ជាក់ទៀតថា ការបើកឲ្យចូលទស្សនាចុងក្រោយគឺនៅម៉ោង៥ និង ៣០នាទីល្ងាច។ ចំពោះការបូបនិងរបស់របរធំៗ គឺមិនត្រូវបានអនុញ្ញាតិឲ្យយកចូលនោះឡើយ។ 
គួរបញ្ជាក់ថា ស្ថាតទូតបារាំងប្រចាំកម្ពុជា គឺមានទីតំាងស្ថិតនៅតាមបណ្តោយមហាវិថីព្រះមុន្នីវង្ស សង្កាត់ស្រះចក ខណ្ឌដូនពេញ រាជធានីភ្នំពេញ៕
