ថ្មីៗកន្លងមកនេះមានវីដេអូចែករំលែកនៅលើបណ្តាញសង្គមពីការថតកុននៅលើទឹកដីខេត្តសៀមរាបមានការស្លៀកពាក់ក្បិននិងពាក់ដួនដែលធ្វើឱ្យមានការរិះគន់ពីសាធារណជន។ ទោះយ៉ាងណានាយកដ្ឋានសិល្បៈភាពយន្តបានចេញសេចក្តីបញ្ជាក់អះអាងថាការថតនេះជាសាច់រឿងភាគច្រើនកើតឡើងក្នុងប្រទេសមីយ៉ាន់ម៉ានិទានពីបុរសចិនម្នាក់ចេញមកអាស៊ីអាគ្នេយ៍ ហើយក៏មិនផ្តល់ផលប៉ះពាល់ដល់ប្រពៃណីជាតិខ្មែរនោះទេ។

នៅថ្ងៃទី១២ ធ្នូ អគ្គនាយកដ្ឋានបច្ចេកទេសវប្បធម៌ នាយកដ្ឋានសិល្បៈភាពយន្តនិងផ្សព្វផ្សាយវប្បធម៌ បានចេញសេចក្តីបញ្ជាក់អំពីហេតុការណ៍សកម្មភាពថតកុនលើទឹកដីកម្ពុជានៅចំណុចតំបន់កំពង់ភ្លុក ស្រុក ប្រាសាទបាគង ខេត្តសៀមរាប ដែលនាំឱ្យមានមតិរិះគន់នេះ នាយកដ្ឋានសិល្បៈភាពយន្តបានបង្ហាញថាផលិតកម្ម Palm Film Production របស់កម្ពុជា និង Benchmark Production របស់ប្រទេសចិន ទទួលបានសិទ្ធិផលិតភាពយន្តរឿង “និទាននៃព្រៃស្មសាន” ដែលជាភាពយន្តបែបប្រឌិដ្ឋបរិយាយពីបុរស ជនជាតិចិនម្នាក់ធ្វើដំណើរចាកចេញពីប្រទេសចិន មកកាន់ប្រទេសមួយចំនួនក្នុងតំបន់អាស៊ីអាគ្នេយ៍ ដែលភាគច្រើននៃសាច់រឿងគឺកើតឡើងក្នុងប្រទេសមីយ៉ាន់ម៉ា។

រូបភាពនៃសកម្មភាពថតភាពយន្ត ដែលរងការរិះគន់ គឺជាឈុតមួយដែលរៀបរាប់អំពីដំណើររបស់ជនជាតិចិននៅតំបន់មួយក្នុងប្រទេសមីយ៉ាន់ម៉ា ដែលនៅក្នុង តំបន់នោះប្រជាជនមីយ៉ាន់ម៉ាស្លៀកពាក់តាមទម្រង់ដែលផលិតករកំពុងរៀបចំថត ហើយផលិតករពុំបាន កែច្នៃសម្លៀកបំពាក់ប្រពៃណីខ្មែរជាមួយសម្ភារៈបរទេសនោះទេ។ ជារួមនៅពេលដែលភាពយន្តនេះកាត់ត ដំឡើងរូបភាពសម្រេច នោះទស្សនិកជននឹងមើលឃើញច្បាស់ថាមិនមែនជាសាច់រឿងកើតនៅកម្ពុជាទេ ហើយក៏មិនផ្តល់ផលប៉ះពាល់ដល់ប្រពៃណីជាតិយើងដែរ។ លិខិតដដែលបានបញ្ជាក់ថា ក្រសួងវប្បធម៌និងវិចិត្រសិល្បៈ តែងតែពិនិត្យលម្អិតទៅលើសាច់រឿងមុននឹងផ្តល់ជូនផលិតករនូវលិខិត អនុញ្ញាតថត ដើម្បីជៀសវាងផលប៉ះពាល់ដល់សិល្បៈវប្បធម៌ប្រពៃណីដ៏ថ្លៃថ្លារបស់ជាតិ៕

នៅក្នុងអំឡុងថ្ងៃទី៨ ដល់ថ្ងៃទី១៣ ខែធ្នូ ឆ្នាំ២០២៤នេះ ត្រីសម្រាប់ធ្វើប្រហុក ផ្អក ត្រីឆ្អើរ បានចាប់ផ្ដើមត្រូវប៉ាន់ ស្របពេលទិន្នផលត្រីប្រហុកមានការកើនឡើងជាងឆ្នាំរាល់ដង។
ត្រីឆ្នាំនេះ មានតម្លៃធូរថ្លៃសមរម្យ ដោយមានចាប់ពី៨០០រៀល ដល់១២០០រៀលតាមទំហំត្រី។ ជាមួយនឹងតម្លៃនេះ ប្រជាពលរដ្ឋបាននាំគ្នាសម្រុកទិញធ្វើប្រហុក ផ្អក ត្រីឆ្អើរ សម្រាប់ទុកបរិភោគជាលក្ខណៈគ្រួសារ និងសម្រាប់លក់ដូរជាដើម។
ចំពោះតម្លៃធូរថ្លៃនេះ ប្រជានេសាទមួយចំនួន បានហាក់សម្តែងការសោកស្តាយ ដោយឆ្នាំកន្លងទៅត្រីប្រហុកអាចលក់បានជិតដល់២០០០រៀលក្នុងមួយគីឡូក្រោមឯណោះ។
ក្នុងឆ្នាំ២០២៤នេះ ត្រីចាប់ផ្ដើមបន្លាស់ទីចេញពីបឹងទន្លេសាប ចូលទន្លេមេគង្គ និងទន្លេបាសាក់ ដែលអំណោយផល ដល់ការធ្វើនេសាទបានត្រីច្រើន នៅក្នុងភូមិសាស្ត្រខេត្តកណ្តាល និងរាជធានីភ្នំពេញ។
គួរបញ្ជាក់ថា ប្រហុក ផ្អក ត្រូវបានប្រជាពលរដ្ឋខ្មែរនាំគ្នាធ្វើទុកនៅផ្ទះមិនឱ្យដាច់ឡើយ ព្រោះជាម្ហូបប្រចាំគ្រួសារខ្មែរតាំងពីជំនាន់ដូនតាមក៕

នៅដើមឆ្នាំ២០២៥ខាងមុខនេះ ខេត្តពោធិ៍សាត់ នឹងទទួលបានគម្រោងអភិវឌ្ឍន៍លើប្រព័ន្ធធារាសាស្ត្រកសិកម្មចំនួន៣គម្រោងធំៗ ដែលមានទំហំទឹកប្រាក់ជិត៤០០លានដុល្លារ។

គម្រោងស្ថាបនាប្រព័ន្ធធារាសាស្ត្រធំៗទាំង៣នោះមាន៖

ទី១.គម្រោងស្ថាបនាក្បាលហុង នៅក្នុងឃុំវាល ស្រុកកណ្តៀង និងស្តារស្ទឹងស្វាយអាត់ ឋិតក្នុងក្រុងពោធិ៍សាត់ ទំហំទឹកប្រាក់ជាង១០២លានដុល្លារ
ទី២.គម្រោងស្ថាបនាប្រព័ន្ធធារាសាស្ត្រអូរតាប៉ោង-តាណៃ នៅក្នុងឃុំអូរតាប៉ោង ស្រុកបាកាន ទំហំទឹកប្រាក់ជាង១៥៦លានដុល្លារ
ទី៣.គម្រោងស្ថាបនាទំនប់ស្ទឹងពោធិ៍សាត់២ នៅក្នុងស្រុកភ្នំក្រវ៉ាញ ទំហំទឹកប្រាក់ជិត១០០លានដុល្លារ

គម្រោងទាំង៣នេះ នឹងត្រូវចាប់ផ្តើមនៅដើមឆ្នាំ២០២៥ខាងមុខនេះ និងត្រូវបញ្ចប់ក្នុងរយៈពេល៥ឆ្នាំក្រោមកម្ចីឥន្ទទាន ពីធនាគារវិនិយោគហេដ្ឋារចនាសម្ព័ន្ធអាស៊ី និងធនាគារអភិវឌ្ឍន៍អាស៊ី។

ក្រោយគម្រោងនេះសាងសង់រួច ពលរដ្ឋនៅខេត្តពោធិ៍សាត់អាចធ្វើស្រូវបានគ្រប់ពេល ដោយមិនបារម្ភពីការខ្វះទឹកស្រោចស្រោបនោះទេ៕

នាវាចម្បាំងកងទ័ពជើងទឹកសហរដ្ឋអាមេរិក នឹងធ្វើការចូលចតនៅកំពង់ផែក្រុងព្រះសីហនុរយៈពេល៥ ចាប់ពីថ្ងៃទី១៦ ដល់ថ្ងៃទី២០ ខែធ្នូ ឆ្នាំ២០២៤។
នាវាចម្បាំងនោះមានឈ្មោះថា USS SAVANNAH (LCS 28) ដែលមាននាវិកសរុបចំនួន១០៣ និងបំពាក់ដោយប្រព័ន្ធមីសុីល SM-6។
នាវានេះ មានប្រវែង១២៧ម៉ែត្រ ទទឹង២៨ម៉ែត្រ ដែលផ្ទុកបានឧទ្ធម្ភាគចក្រ MH-60R/S Seahawks ២គ្រឿង អមជាមួយនឹងកាំភ្លើងយន្តចំនួន៤បន្ថែមទៀត។
សម្រាប់ការចូលសុំចតនាវានេះ នៅក្នុងគោលបំណងពង្រឹង និងពង្រីកចំណងមិត្តភាព លើកកម្ពស់នៃកិច្ចសហប្រតិបត្តិការទ្វេភាគីរវាងព្រះរាជាណាចក្រកម្ពុជា និងសហរដ្ឋអាមេរិក។
គួរបញ្ជាក់ថានេះជាលើកទី១ហើយ ក្នុងរយពេល៨ឆ្នាំចុងក្រោយនេះ ដែលនាវាចម្បាំងអាមេរិកបង្ហាញខ្លួនក្នុងដែនទឹកកម្ពុជា៕

យោងតាមការចុះផ្សាយរបស់ក្រសួងធនធានទឹកនឹងឧតុនិយមបានគូសបញ្ជាក់ថា ចាប់ពីថ្ងៃទី១៣ ដល់ថ្ងៃទី១៥ ខែធ្នូ ឆ្នាំ២០២៤នេះ សម្ពាធទាបកើតមាននៅលើសមុទ្រចិនខាងត្បូង បានធ្វើឱ្យខ្យល់មូសុងឦសាន ដែលគ្របដណ្តប់លើភាគខាងក្រោមនៃអាងទន្លេមេគង្គព្រះរាជាណាចក្រកម្ពុជា និងឈូងសមុទ្រថៃ មានឥទ្ធិពលខ្លាំង ។

ស្ថានភាពបែបនេះនឹងធ្វើឱ្យ៖
១-តំបន់វាលទំនាប៖ សីតុណ្ហភាពមធ្យមអប្បបរមា២០°C និងសីតុណ្ហភាពមធ្យមអតិបរមា៣២°C។ ខ្យល់បក់ មកពីទិសឦសាន និងអាគ្នេយ៍មានល្បឿនមធ្យម៤,៥ម៉ែត្រ វិនាទី។ ខេត្តបាត់ដំបង ពោធិ៍សាត់ កំពង់ឆ្នាំង កំពង់ធំ កំពង់ចាម ត្បូងឃ្មុំ ព្រៃវែង ស្វាយរៀង កណ្តាល តាកែវ និងភ្នំពេញ អាច មានភ្លៀងធ្លាក់គ្របដណ្តប់លើផ្ទៃដី១៥%។

២-តំបន់ខ្ពង់រាប៖ សីតុណ្ហភាពមធ្យមអប្បបរមា២០°C និងសីតុណ្ហភាពមធ្យមអតិបរមា៣១°C។ ខ្យល់បក់ មកពីទិសឦសាន និងបូពីមានល្បឿនមធ្យម ៥ម៉ែត្រ/វិនាទី។ ខេត្តកំពង់ស្ពឺ ស្ទឹងត្រែង ក្រចេះ រតនគិរី មណ្ឌលគិរី តំបន់ជួរភ្នំក្រវាញ និងជួរភ្នំដងរែក អាចមានភ្លៀងធ្លាក់គ្របដណ្តប់លើ ផ្ទៃដី១០%។

៣-តំបន់មាត់សមុទ្រ៖ សីតុណ្ហភាពមធ្យមអប្បបរមា២០°C និងសីតុណ្ហភាពមធ្យមអតិបរមា៣១°C។ ខ្យល់បក់ មកពីទិសឦសាន និងអាគ្នេយ៍ មានល្បឿនមធ្យម ៣,៥ម៉ែត្រ វិនាទី។ ខេត្តកោះកុង ព្រះសីហនុ កំពត កែប និងជួរភ្នំបូកគោ អាចមានភ្លៀងធ្លាក់គ្របដណ្តប់លើផ្ទៃដី១០%។ រលកសមុទ្រមានកម្ពស់មធ្យមអប្បបរមា ០,៥០ម៉ែត្រនិងកម្ពស់មធ្យមអតិបរមា១,២៥ម៉ែត្រ៕