ការសម្រេចចិត្តរបស់រដ្ឋាភិបាលថៃក្នុងការលុបចោលគោលនយោបាយស្នាក់នៅរយៈពេល ៦០ ថ្ងៃដោយមិនចាំបាច់មានទិដ្ឋាការ បានបង្កឱ្យមានការជជែកដេញដោលយ៉ាងក្តៅគគុកពីសំណាក់ភ្ញៀវទេសចរបរទេស។ ក្នុងនោះ ក្រុមភ្ញៀវទេសចរជនជាតិកាណាដាបានបង្ហាញការមិនពេញចិត្តយ៉ាងខ្លាំងកាលពីថ្ងៃទី២១ ខែឧសភា ឆ្នាំ២០២៦ ដោយលើកឡើងថា ពួកគេនឹងឈប់ធ្វើដំណើរមកប្រទេសថៃញឹកញាប់ដូចមុនទៀតហើយ ហើយនឹងផ្លាស់ប្តូរគោលដៅកម្សាន្តមកកាន់ប្រទេសកម្ពុជា និងវៀតណាមវិញ ប្រសិនបើមិនអាចស្នាក់នៅក្នុងប្រទេសថៃលើសពី ៣០ ថ្ងៃ។

ភ្ញៀវទេសចរបរទេសជាច្រើនបានសម្តែងការខកចិត្ត ដោយសារតែការរៀបចំគម្រោងធ្វើដំណើរជួបការលំបាក និងត្រូវចំណាយប្រាក់ច្រើនជាងមុនក្នុងការស្នើសុំទិដ្ឋាការ។ កត្តានេះបានរុញច្រានឱ្យពួកគេសម្រេចចិត្តប្តូរទិសដៅមកកម្សាន្តនៅកម្ពុជា និងវៀតណាមជំនួសវិញ ព្រោះប្រទេសទាំងពីរមានគោលនយោបាយទិដ្ឋាការអំណោយផល មានតម្លៃសមរម្យ និងបង្កលក្ខណៈងាយស្រួលដល់ការស្នាក់នៅកម្សាន្តរយៈពេលវែង។

ម្យ៉ាងទៀត ថ្លៃស្នាក់នៅ ម្ហូបអាហារ និងការធ្វើដំណើរប្រចាំថ្ងៃក្នុងប្រទេសទាំងពីរក៏មានកម្រិតទាប ដែលស័ក្តិសមបំផុតសម្រាប់ភ្ញៀវទេសចរដែលចង់សន្សំសំចៃថវិកា។
ភ្ញៀវទេសចរជនជាតិកាណាដាម្នាក់ ដែលធ្លាប់ធ្វើដំណើរមកប្រទេសថៃរហូតដល់ ២៥ ដងក្នុងមួយឆ្នាំ បានប្រាប់សារព័ត៌មាន BBC News ថៃ កាលពីថ្ងៃទី២១ ខែឧសភា ថា ខ្លួនពិតជាខកចិត្តចំពោះការលុបចោលគោលនយោបាយនេះ។ លោកបានបញ្ជាក់ថា បើទោះបីជាខ្លួនស្រឡាញ់ប្រទេសថៃយ៉ាងណាក៏ដោយ ប៉ុន្តែនឹងឈប់មកលេងញឹកញាប់ដូចមុនទៀតហើយ ព្រោះគោលនយោបាយថ្មីនេះមិនមែនប៉ះពាល់តែរូបលោកនោះទេ គឺប៉ះពាល់ដល់ភ្ញៀវទេសចរទាំងអស់។

ទន្ទឹមនឹងនេះ ភ្ញៀវទេសចរបរទេសមកពីបណ្តាប្រទេសផ្សេងៗទៀត ក៏បានបង្ហាញការមិនពេញចិត្តចំពោះចំណាត់ការរបស់រដ្ឋាភិបាលថៃបច្ចុប្បន្នផងដែរ ដោយពួកគេមានអារម្មណ៍ថា ប្រទេសថៃលែងស្វាគមន៍ពួកគេដូចមុន។ ពួកគេយល់ថា វាអយុត្តិធម៌ណាស់ដែលរដ្ឋាភិបាលថៃអនុវត្តវិធានការនេះលើភ្ញៀវទេសចរគ្រប់ជាតិសាសន៍ តែដោយសារតែបញ្ហាបង្កឡើងដោយភ្ញៀវទេសចរមកពីប្រទេសមួយចំនួនតូចប៉ុណ្ណោះ។ លើសពីនេះ ភ្ញៀវទេសចរខ្លះបានសម្រេចចិត្តឈប់ស្នាក់នៅប្រទេសថៃ ដោយសារតែធ្លាប់រងការបោកប្រាស់ពីក្រុមហ៊ុនទេសចរណ៍ថៃរហូតដល់ ១១ ដង ជុំវិញរឿងរត់ការស្នើសុំទិដ្ឋាការ និងត្រូវខាតបង់ប្រាក់អស់រាប់សែនបាត។

គួរបញ្ជាក់ថា កាលពីថ្ងៃទី១៩ ខែឧសភា គណៈរដ្ឋមន្ត្រីថៃបានសម្រេចលុបចោលគោលនយោបាយស្នាក់នៅ ៦០ ថ្ងៃដោយគ្មានទិដ្ឋាការ សម្រាប់ទេសចរមកពី ៩៣ ប្រទេស ក្រោមហេតុផលពង្រឹងសន្តិសុខ ការពារកុំឱ្យជនបរទេសប្រព្រឹត្តទង្វើខុសច្បាប់ និងដើម្បីលើកកម្ពស់វិស័យទេសចរណ៍ឱ្យស្របតាមតម្រូវការជាក់ស្តែង។ តាមរយៈវិធានការថ្មីនេះ ភ្ញៀវទេសចរមកពី ៥០ ប្រទេស នឹងត្រូវកាត់បន្ថយរយៈពេលស្នាក់នៅត្រឹម ៣០ ថ្ងៃ ខណៈភ្ញៀវទេសចរមកពីប្រទេសផ្សេងទៀត អាចស្នាក់នៅបានត្រឹម ១៤ ថ្ងៃ ឬច្រើនជាងនេះ អាស្រ័យលើកិច្ចព្រមព្រៀងទ្វេភាគីរវាងរដ្ឋាភិបាលនៃប្រទេសទាំងនោះជាមួយរដ្ឋាភិបាលថៃ។

អាជ្ញាធរថៃបានសង្កត់ធ្ងន់ថា គោលនយោបាយនេះធ្វើឡើងក្នុងគោលបំណងទប់ស្កាត់បទល្មើសឆ្លងដែន និងការធ្វើអាជីវកម្មខុសច្បាប់ពីសំណាក់ជនបរទេស ដែលឆ្លៀតឱកាសប្រើប្រាស់ទិដ្ឋាការទេសចរណ៍ដើម្បីស្នាក់នៅរយៈពេលវែង ហើយបទបញ្ជាថ្មីនេះនឹងត្រូវចាប់ផ្តើមអនុវត្តក្នុងពេលឆាប់ៗខាងមុខនេះ៕

វប្បធម៌អនាធិបតេយ្យ និងចរឹតយូកូងទៅណាមិនច្រឡំគេកំពុងធ្វើឲ្យថៃល្បីឈ្មោះមិនល្អនៅលើឆាកអន្តរជាតិសារជាថ្មី! ដោយសហព័ន្ធកីឡាសីដក់ម៉ាឡេស៊ី កំពុងដាក់ពាក្យបណ្តឹងប្រទេសថៃ ករណីមន្ត្រីជាន់ខ្ពស់ជនជាតិថៃ ៣ នាក់បានចូលទៅរំខាន និងបង្កភាពរញ៉េរញ៉ៃក្នុងអំឡុងការប្រកួតកីឡាសីដក់របស់ក្រុមម៉ាឡេស៊ី ទល់នឹងក្រុមថៃ ក្នុងព្រឹត្តិការណ៍ «ពានរង្វាន់សីដក់ពិភពលោក ឆ្នាំ២០២៦»។ ម៉ាឡេស៊ីបានរិះគ.ន់ចំៗថានេះគឺជាទង្វើការខ្វះការគោរព និងគ្មានសីលធម៌ពីសំណាក់មន្រ្តីជាន់ខ្ពស់ថៃ។

យោងតាមសេចក្តីថ្លែងការណ៍ផ្លូវការនៅថ្ងៃទី២៥ ខែឧសភា ឆ្នាំ២០២៦ របស់លោក Datuk Abidullah Salleh អគ្គលេខាធិការសហព័ន្ធសីដក់ម៉ាឡេស៊ី មន្ត្រីជាន់ខ្ពស់ថៃទាំង ៣ រូប ដែលត្រូវបានបញ្ជាក់ឈ្មោះនៅក្នុងលិខិតបណ្ដឹង រួមមាន លោក Thana Chaiprasit ប្រធានសមាគមសីដក់នៃប្រទេសថៃ និងជាអនុប្រធានគណៈកម្មាធិការជាតិអូឡាំពិកថៃ រួមជាមួយ បណ្ឌិត Chalerm Chaivakit មន្ត្រីជាន់ខ្ពស់នៃសមាគមសីដក់ថៃ និងមន្ត្រីអមដំណើរជាន់ខ្ពស់ម្នាក់ទៀតរបស់ភាគីថៃ។ ភាគីម៉ាឡេស៊ីបានលាតត្រដាងថា មន្ត្រីទាំងនេះមិនមានឈ្មោះនៅក្នុងបញ្ជីចុះឈ្មោះផ្លូវការសម្រាប់ចូលទៅក្នុងទីលានឡើយ ប៉ុន្តែនៅពេលដែលការប្រកួតមានភាពតានតឹងរឿងអាជ្ញាកណ្ដាលកាត់សេចក្តី ពួកគេបែរជាដើរចូលទៅអន្តរាគមន៍ បង្កភាពរញ៉េរញ៉ៃ និងដាក់សម្ពាធមិនឱ្យកីឡាករប្រកួតបន្ត។

នៅក្នុងលិខិតបណ្ដឹងដដែលនោះ ម៉ាឡេស៊ីបានសង្កត់ធ្ងន់ថា ទង្វើគ្មានវិជ្ជាជីវៈរបស់ថ្នាក់ដឹកនាំកំពូលៗរបស់ថៃ បានធ្វើឱ្យប៉ះពាល់យ៉ាងធ្ងន់ធ្ងរដល់កេរ្តិ៍ឈ្មោះនៃកម្មវិធីប្រកួតលំដាប់ពិភពលោក ទំនុកចិត្តរបស់អ្នកឧបត្ថម្ភកម្មវិធី និងអារម្មណ៍របស់ទស្សនិកជនរាប់លាននាក់ដែលកំពុងទស្សនាការផ្សាយបន្តផ្ទាល់។ ជំនួសឱ្យការប្រើតួនាទីជាថ្នាក់ដឹកនាំដើម្បីសម្របសម្រួល បន្ធូរបន្ថយស្ថានការណ៍ ឬដាស់តឿនក្រុមកីឡាកររបស់ខ្លួនឱ្យគោរពតាមបទបញ្ជាការប្រកួត មន្ត្រីជាន់ខ្ពស់ថៃទាំងនេះបែរជាចូលរួមចំណែកធ្វើឱ្យព្រឹត្តិការណ៍នេះក្លាយជាឆាកល្ខោនស្រែកតវ៉ាខុសលក្ខណៈបច្ចេកទេសកីឡាទៅវិញ។

តាមរយៈពាក្យបណ្ដឹងនេះ សហព័ន្ធសីដក់ម៉ាឡេស៊ី (PSM) បានស្នើឱ្យគណៈកម្មាធិការវិន័យ និងអភិបាលកិច្ចរបស់សហព័ន្ធអន្តរជាតិ (ISTAF) ធ្វើការពិនិត្យរូបភាពវីដេអូភស្តុតាងទាំងអស់ ដើម្បីដាក់ទណ្ឌកម្មវិន័យយ៉ាងតឹងរ៉ឹងបំផុត និងហាមឃាត់មន្ត្រីទាំងនេះមិនឱ្យចូលរួមក្នុងកម្មវិធីអន្តរជាតិដទៃទៀត។ វិធានការផ្លូវច្បាប់កីឡានេះ ធ្វើឡើងក្នុងបំណងលុបបំបាត់វប្បធម៌មិនចេះចាញ់ និងការចូលចិត្តបង្កការរំខានរបស់ភាគីថៃ នៅពេលណាដែលលទ្ធផលនៃការប្រកួតមិនដើរស្របទៅតាមអ្វីដែលពួកគេចង់បាននៅលើឆាកអន្តរជាតិ។

គួរជម្រាបថា នេះមិនមែនជាលើកទីមួយទេ ដែលអន្តរជាតិបានសម្ដែងហួសចិត្តចំពោះអត្តចរិតក្អេងក្អាង និងទម្លាប់បង្កការរំខានមិនចេះចប់របស់ភាគីថៃ នៅក្នុងព្រឹត្តិការណ៍ធំៗ។ ទម្លាប់មិនទទួលស្គាល់បរាជ័យ មិនព្រមចាញ់ និងវប្បធម៌បង្កភាពរញ៉េរញ៉ៃរបស់ថៃលើឆាកអន្តរជាតិ ដែលធ្លាប់បានកើតឡើងតាមរយៈការដើរចេញពីទីលានក្នុង AFF Suzuki Cup ឆ្នាំ២០០៦ ការតវ៉ានៅអូឡាំពិកឆ្នាំ២០១២ និង Asian Games ឆ្នាំ២០១៤ រួមទាំងការប្រកាសពហិការមិនប្រកួត «គុនខ្មែរ» នៅ SEA Games ឆ្នាំ២០២៣ នៅកម្ពុជាផងដែរ។ សកម្មភាពទាំងនេះបង្ហាញឱ្យឃើញពីទម្លាប់មិនគោរពច្បាប់ និងការប្រើប្រាស់ឥរិយាបថក្អេងក្អាង នៅពេលលទ្ធផលមិនសមតាមបំណង៕

យោធាថៃកំពុងបង្កើតលេសចោទប្រកាន់ចម្លែក ៗ ដោយប្រឌិតរឿងថាទាហានខ្មែរបានទៅបន្ទោរបង់ក្បែររបងលួសបន្លារបស់ខ្លួន មកធ្វើជាសំអាងដោះសារជុំវិញការបើកការបាញ់ប្រហារយ៉ាងអនាធិបតេយ្យរបស់ខ្លួន នៅក្នុងតំបន់អូរស្មាច់។ នេះមិនមែនជាលើកទីមួយទេ ដែលថៃប្រើលេសមិនសមទំនងបែបនេះចោទប្រកាន់កម្ពុជា។ ការណ៍នេះបានជំរុញឲ្យមានការចោទសួរថា តើសង្រ្គាមជុំទី៣រវាងខ្មែរ-ថៃអាចនឹងកើតមានដោយសាររឿងលា.ម.កមែនទេ?

តាមរបាយការណ៍ពីសារព័ត៌មានថៃ នៅថ្ងៃទី២៥ ខែឧសភា ឆ្នាំ២០២៦ បានចុះផ្សាយដោយដកស្រង់ពាក្យសម្ដីរបស់ លោក វិនថៃ សុវារី អ្នកនាំពាក្យកងទ័ពភូមិន្ទថៃ ដែលបានថ្លែងទៅកាន់អ្នកសារព័ត៌មានថា «ពាក់ព័ន្ធនឹងករណីទាហានថៃ បាញ់បោះអនាធិបតេយ្យតាមព្រំដែនកម្ពុជាឋិតក្នុងតំបន់ច្រកអន្តរជាតិអូរស្មាច់ ខេត្តឧត្តរមានជ័យ នាពេលកន្លងទៅ គឺដោយសារតែមានរបាយការណ៍ (ក្រៅផ្លូវការ) រាយការណ៍មកថា៖ មានទាហានកម្ពុជា ទៅបន្ទោបង់លាមក (បត់ជើងធំ) នៅម្តុំរបងបន្លាលួសថៃ ក្នុងតំបន់ច្រកអូរស្មាច់»។

លោកសង្កត់ធ្ងន់ថា៖ «លោកកំពុងតែបើកការស៊ើបអង្កេតជាបន្ទាន់ទៅលើករណីរឿងបន្ទោបង់លាមក (បត់ជើងធំ) មួយនេះ ដើម្បីកងទ័ពថៃអាចមានភស្តុតាងគ្រប់គ្រាន់ ក្នុងការបកស្រាយពន្យល់ប្រាប់ទៅកាន់សហគមន៍អន្តរជាតិ»។

ជុំវិញការចេញមកបញ្ជាក់នេះ សាធារណជន និងអ្នកវិភាគយោធាបានមើលឃើញថា នេះគឺជាយុទ្ធសាស្ត្របំភាន់ និងជា «លេសចោទប្រកាន់ថ្មីមួយទៀត» របស់ភាគីថៃ ដែលមានទម្រង់ស្រដៀងគ្នាយ៉ាងខ្លាំងទៅនឹងព្រឹត្តិការណ៍មុនៗ។ កន្លងមក ថៃតែងតែប្រើប្រាស់ការចោទប្រកាន់មិនច្បាស់លាស់ ដូចជាការចោទថា កម្ពុជាបង្កប់មីនថ្មី ដើម្បីធ្វើជាលេសដោះសារក្នុងការបើកការវាយប្រហារ ឬការផ្ទុះអាវុធដាក់ភាគីកម្ពុជា។

កាលពីពេលមុនៗ រាល់ពេលដែលមានការផ្ទុះអាវុធ ឬយោធាថៃរងរបួសដោយសារជាន់មីនចាស់ៗដែលសេសសល់ពីសម័យសង្រ្គាមស៊ីវិល ភាគីថៃតែងតែចោទប្រកាន់ភ្លាមៗថា កម្ពុជាជាអ្នកលួចបង្កប់មីនថ្មី។ ការចោទប្រកាន់ដោយគ្មានមូលដ្ឋាននេះ ត្រូវបានថៃយកធ្វើជាសំអាងដើម្បីបើកការបាញ់ប្រហារទ្រង់ទ្រាយធំ និងឆ្លើយតបដោយអាវុធធុនធ្ងន់មកលើទឹកដីកម្ពុជា។ ជាក់ស្ដែង នៅក្នុងព្រឹត្តិការណ៍ផ្ទុះអាវុធកន្លងមក ភាគីថៃមិនដែលទទួលស្គាល់កំហុស ឬការបំពានច្បាប់អន្តរជាតិរបស់ខ្លួនឡើយ ទោះបីជាមានភស្តុតាងបង្ហាញថា យោធាថៃខ្លួនឯងជាអ្នកវង្វេងផ្លូវល្បាតចូលមកក្នុងដីខ្មែរ និងជាន់មីនចាស់ៗដែលសេសសល់ពីសម័យសង្គ្រាមស៊ីវិលក៏ដោយ។

ស្របពេលជាមួយគ្នានេះដែរ បើទោះបីជាមានការចោទប្រកាន់ក្នុងរូបភាពប្លែកៗពីភាគីថៃយ៉ាងណាក៏ដោយ ក៏ភាគីកម្ពុជាតែងតែបង្ហាញជំហរអត់ធ្មត់ និងគោរពតាមកិច្ចព្រមព្រៀងព្រំដែន ដោយបដិសេធដាច់ខាតចំពោះការចោទប្រកាន់ទាំងឡាយណាដែលគ្មានភស្តុតាងវិទ្យាសាស្ត្រច្បាស់លាស់ និងដែលធ្វើឡើងក្នុងបំណងបង្កសង្រ្គាមជាថ្មី៕

​ពូកែខាងដើរលាបពណ៌ប្រទេសគេ ចុងក្រោយប្រជាជនខ្លួនឯងសោះគឺជាជនបោ.កប្រាស់! ជនជាតិថៃប្រុសស្រីចំនួន ៣០៧ នាក់ ត្រូវបានអាជ្ញាធរអន្តោប្រវេសន៍ឡាវ ចាប់បញ្ជូនត្រឡប់ទៅប្រទេសថៃវិញជាបន្ទាន់យ៉ាងទីណាត់ទីណែង កាលពីថ្ងៃទី២១ ខែឧសភា ក្រោយពេលទីតាំងលាក់ខ្លួនដំណើរការល្បែងស៊ីសងអនឡាញខុសច្បាប់របស់ពួកគេនៅក្នុងទីក្រុងវៀងចន្ទន៍ ត្រូវបានឡោមព័ទ្ធនិងបង្ក្រាប។
 
យោងតាមរបាយការណ៍ចុះផ្សាយរបស់សារព័ត៌មាន The Laotian Times ការបណ្តេញចេញជាដុំកំភួននេះ ធ្វើឡើងបន្ទាប់ពីមានកិច្ចសហប្រតិបត្តិការយ៉ាងជិតស្និទ្ធរវាងនាយកដ្ឋានអន្តោប្រវេសន៍នៃក្រសួងសន្តិសុខសាធារណៈឡាវ និងអាជ្ញាធរពាក់ព័ន្ធរបស់ថៃ ដើម្បីកាត់ផ្តាច់ឫសគល់នៃឧក្រិដ្ឋកម្មបច្ចេកវិទ្យាឆ្លងដែន។
 
យោងតាមប្រភពព័ត៌មានដដែល ជនជាតិថៃទាំង ៣០៧ នាក់នោះ រួមមានស្ត្រីចំនួន ១៣៦ នាក់ ត្រូវបានអាជ្ញាធរឡាវឃាត់ខ្លួន នៅក្នុងប្រតិបត្តិការចុះឆែកឆេរទីតាំងសង្ស័យមួយចំនួន ដែលលួចលាក់ដំណើរការអាជីវកម្មល្បែងស៊ីសងតាមប្រព័ន្ធអ៊ីនធឺណិត និងបណ្តាញឆបោកអនឡាញខុសច្បាប់ នៅក្នុងទឹកដីនៃរដ្ឋធានីវៀងចន្ទន៍។ បន្ទាប់ពីបានធ្វើការស៊ើបអង្កេត និងបំពេញនីតិវិធីច្បាប់រួចរាល់ ភាគីឡាវបានរៀបចំពិធីប្រគល់ និងទទួលជនសង្ស័យទាំងនោះជាផ្លូវការ នៅបរិវេណប៉ុស្តិ៍ត្រួតពិនិត្យព្រំដែនអន្តរជាតិស្ពានមិត្តភាពឡាវ-ថៃទី១ ដោយមានការចូលរួមដឹងឮពីមន្ត្រីការទូត និងមន្ត្រីអន្តោប្រវេសន៍នៃប្រទេសទាំងពីរ ដើម្បីបញ្ជូនពួកគេទៅកាត់ទោសបន្តតាមច្បាប់របស់ប្រទេសថៃ។
 
អ្នកវិភាគភូមិសាស្ត្រនយោបាយបានកត់សម្គាល់ថា ចំណាត់ការដ៏ក្តៅគគុករបស់ប្រទេសឡាវនាពេលនេះ គឺដើរទន្ទឹមគ្នាយ៉ាងស៊ីចង្វាក់គ្នា ទៅនឹងយុទ្ធនាការបង្ក្រាបបណ្តាញ Online Scam និងល្បែងអនឡាញខុសច្បាប់យ៉ាងចាស់ដៃរបស់ប្រទេសកម្ពុជា។ នេះសបញ្ជាក់ឱ្យឃើញថា បណ្តាប្រទេសនៅក្នុងតំបន់អាស៊ីអាគ្នេយ៍ លែងបណ្តោយឱ្យក្រុមឧក្រិដ្ឋជនឆ្លងដែន មកប្រើប្រាស់ទឹកដីរបស់ខ្លួនធ្វើជាជម្រកសុវត្ថិភាពដើម្បីបង្កការខូចខាតដល់សន្តិសុខ និងសេដ្ឋកិច្ចតំបន់ទៀតហើយ។
 
ម្យ៉ាងវិញទៀត ការវិលត្រឡប់ទៅវិញនៃពលរដ្ឋថៃរាប់រយនាក់ដែលពាក់ព័ន្ធនឹងបទល្មើសទាំងនេះ ក៏ត្រូវបានគេមើលឃើញថា នឹងបង្កើតជាសម្ពាធបន្ថែមទៀតដល់រដ្ឋាភិបាលថៃ ទាំងផ្នែកការអនុវត្តច្បាប់ក្នុងស្រុក និងការដោះស្រាយបញ្ហាទីផ្សារការងារ ដែលកំពុងតែរងគ្រោះស្រាប់ដោយសារវិបត្តិបិទរោងចក្រឧស្សាហកម្ម៕