តារាចម្រៀង នាង គន្ធា រងនូវមតិប្រតិកម្មចម្រុះក្រោយពីបង្ហោះរូបចាស់ជាមួយនឹង ប៊ុត សីហា ។ អ្វីដែលធ្វើឱ្យ នាង គន្ធា ចេញមុខប្រតិកម្មគឺទាក់ទងនឹងបុរសម្នាក់ដែលខម្មិនពាក្យមិនសមរម្យដោយចោ.ទសួរនាងថា «ជក់ដែរមែន?»។ 
នៅល្ងាចថ្ងៃទី២៤ ខែឧសភា ឆ្នាំ២០២៦ តារាចម្រៀង នាង គន្ធា សិល្បការិនីក្នុងទ្រនំសាន់ដេ ដែលទស្សនិកជនស្គាល់ថាជាម្ចាស់បទ«បេះដូងចេះស្រវឹង»និងបទ «រាប់ថយក្រោយ» បានបង្ហោះវីដេអូនិងបង្ហាញរូបភាពបុរសម្នាក់ដោយការហួសចិត្តយ៉ាងខ្លាំងបន្ទាប់ពីខម្មិនពាក្យមិនសមទំនងដាក់នាង។ ដើមហេតុដំបូងគឺថាកាលពីថ្ងៃទី២៣ ឧសភា នាង គន្ធា បានបង្ហោះរូបមួយសន្លឹកជាមួយនឹង ប៊ុត សីហា ដោយភ្ជាប់មកជាមួយនឹងចំណងជើងថា «យូរឆ្នាំហើយ ជាមួយបងសីហា»។
រូបមួយសន្លឹកដែល នាង គន្ធា បង្ហោះជាមួយនឹង ប៊ុត សីហា បានទាក់ទាញមតិប្រតិកម្មចម្រុះពីសាធារណជនជាច្រើនមានទាំងវិជ្ជមាននិងអវិជ្ជមានចំពោះរូបនាង។ អ្នកខ្លះក៏សរសើរនាងដែលហ៊ានបង្ហោះរូបជាមួយនឹង ប៊ុត សីហា ទោះបីអ្នកចម្រៀងរូបនេះប្រឈមនឹងរឿងចម្រូងចម្រាសយ៉ាងណាក្តី។ មតិខ្លះទៀតលើកឡើងទៀតថា នាង គន្ធា មិនគួរបង្ហោះរូបនិងសេពគប់ជាមួយនឹង ប៊ុត សីហា នោះទេ។ លើសពីនេះ នាង គន្ធា ត្រូវរងនូវការបញ្ចេញមតិខ្លាំងក្លាថា «ជក់ដែរមែន?» រីឯមតិផ្សេងទៀតថែមទាំងនិយាយឱ្យ នាង គន្ធា ថា «ថតបាន តែហាមទៅជក់ថ្នាំមួយណា»។
បន្ទាប់មក នាង គន្ធា បានចេញវីដេអូឆ្លើយតបទៅកាន់បុរសម្នាក់ដែលខម្មិនមិនសមរម្យដាក់នាងថា «ជក់ដែរមែន?» ខណៈគ្រាន់តែនាងបង្ហោះរូបមួយសន្លឹកសោះ។ តារាចម្រៀងរូបនេះបានបកស្រាយទៀតថា កាលពីមុននាងនិង ប៊ុត សីហា បានធ្វើការអង្គការជាមួយគ្នានិងទៅចូលរួមកម្មវិធីសប្បុរធម៌ជាមួយគ្នានៅឯក្រុងកំពង់សោម និងខេត្តផ្សេងទៀត។ 
តារាចម្រៀងរូបនេះបានចោទសួរទៅវិញថា តើមានកំហុសអីគ្រាន់តែមនុស្សដែលធ្លាប់ធ្វើការជាមួយគ្នា ហើយបង្ហោះរូបសោះបែរជាមានការដៀមដាមដល់ថ្នាក់នេះ។ នាង គន្ធា ថានាងនិងប៊ុត សីហា ធ្លាប់ស្គាល់រាប់អានគ្នាមិនប្រកាន់នោះទេ ចំណែកឯរឿងផ្សេងទៀតគឺជារឿងផ្ទាល់ខ្លួនរបស់ ប៊ុត សីហា ប៉ុណ្ណោះ។
គួរបញ្ជាក់ផងដែរថា នេះមិនមែនជាលើកទី១នោះទេដែល នាង គន្ធា ចេញមកតបតនឹងអ្នករិះគន់កន្លងមកឱ្យតែអ្នកលេងបណ្តាញសង្គមណាបញ្ចេញមតិមិនសមរម្យដាក់នាង នាងបានបង្ហោះគណនីនោះវិញ៕
