រដ្ឋាភិបាលវៀតណាមបានប្រកាសដាក់ចេញនូវអនុក្រឹត្យដើម្បីរឹតបន្តឹងការគ្រប់គ្រងប្រព័ន្ធឌីជីថល ដោយកំណត់ប្រាក់ពិន័យយ៉ាងច្រើនរហូតដល់៥០លានដុង (ប្រមាណ១,៩០០ដុល្លារ) លើបុគ្គលដែលចែកចាយព័ត៌មានមិនពិត ឬព័ត៌មានក្លែងក្លា.យក្នុងបណ្តាញសង្គម ហើយវិធានការថ្មីនេះនឹងចាប់ផ្តើមអនុវត្តចាប់ពីថ្ងៃទី១ ខែកក្កដា ឆ្នាំ២០២៦ តទៅ ។ អាជ្ញាធរវៀតណាមមានសិទ្ធិបង្ខំឱ្យលុបចោលព័ត៌មានមិនពិតទាំងអស់ភ្លាមៗ និងបិទគណនីបណ្តាញសង្គម ដែលរដ្ឋាភិបាលវៀតណាមចាត់ទុកធ្វើសកម្មភាពល្មើស ។

តាមការចុះផ្សាយរបស់សារព័ត៌មាន VN Express កាលពីថ្ងៃទី២១ ខែឧសភា ឆ្នាំ២០២៦ អ្នកប្រើប្រាស់បណ្តាញសង្គមនឹងប្រឈមមុខជាមួយការពិន័យប្រាក់ ចាប់ពី២០លាន ទៅ៣០លានដុង (ប្រមាណ៧៦០ដុល្លារ ទៅ១,១៤០ដុល្លារ) បើប្រព្រឹត្តសកម្មភាពល្មើសច្បាប់ រួមមាន ៖ ចែកចាយព័ត៌មានមិនពិត ឬព័ត៌មានក្លែងក្លាយ, បំភ្លៃ និងបង្កាច់បង្ខូច នាំឱ្យប៉ះពាល់កេរ្តិ៍ឈ្មោះបុគ្គល ឬស្ថាប័ន, បង្ហោះរូបភាពអាសអាភា.ស អសីលធម៌ ដែលផ្ទុយនឹងទំនៀមទម្លាប់ប្រពៃណី, ចែកចាយរូបភាពហិង្សា, ការធ្វើឃា.ត ឬគ្រោះថ្នាក់រន្ធត់ និងបង្ហោះផែនទីប្រទេសវៀតណាមមិនត្រឹមត្រូវ ។

រដ្ឋាភិបាលវៀតណាម ក៏បានបង្កើនការពិន័យប្រាក់កាន់តែធ្ងន់ធ្ងរ ចាប់ពី៣០លាន ទៅ៥០លានដុង (ប្រមាណ១,១៤០ដុល្លារ ទៅ១,៩០០ដុល្លារ) សម្រាប់សកម្មភាព ដូចជា ៖ ចែកចាយព័ត៌មានបំភ្លៃប្រវត្តិសាស្ត្រ, បដិសេធសមិទ្ធផលរបស់រដ្ឋ, បំបែកបំបាក់សាមគ្គីផ្ទៃក្នុង, ទម្លាយអាថ៌កំបាំងរដ្ឋ ឬបុគ្គល, ផ្សព្វផ្សាយព័ត៌មានមិនពិតនាំឱ្យភ័យខ្លាចក្នុងសង្គម និងប៉ះពាល់សកម្មភាពសេដ្ឋកិច្ច ។

ទោះយ៉ាងណា ពលរដ្ឋវៀតណាមបានបញ្ចេញមតិគាំទ្រ និងមិនគាំទ្រ ក្នុងនោះមតិគាំទ្រលើកឡើងថា វាអាចការពារសណ្តាប់ធ្នាប់សង្គម ដោយសារបច្ចុប្បន្ន មានការចែកចាយព័ត៌មានក្លែងក្លាយច្រើននាំឱ្យជ្រួលច្របល់, កាត់បន្ថយការបង្ខូចកេរ្តិ៍ឈ្មោះ ឬវាយប្រហារគ្នាក្នុងបណ្តាញសង្គម និងជំរុញឱ្យពលរដ្ឋត្រួតពិនិត្យប្រភពឱ្យច្បាស់លាស់ថា តើជាព័ត៌មានពិតឬអត់ មុនពេលចែកចាយ (Share) អ្វីមួយ ។

ចំណែកមតិមិនគាំទ្រថា នេះជាការរឹតបន្តឹងសិទ្ធិសេរីភាពពលរដ្ឋ ឬបំបិទសិទ្ធិបញ្ចេញមតិផ្ទាល់ខ្លួន ហើយការពិន័យប្រាក់រហូតដល់១,៩០០ដុល្លារ គឺច្រើនណាស់ បើធៀបនឹងប្រាក់ចំណូលរបស់ពួកគេ ។ វាធ្វើឱ្យអ្នកប្រើប្រាស់ហ្វេសប៊ុក និង TikTok លែងហ៊ានចែកចាយព័ត៌មានដូចមុន ពីព្រោះបារម្ភខ្លាចខុសច្បាប់ ពួកគេចង់បញ្ចេញមតិរិះគន់បែបស្ថាបនា ហើយមិនរងការផាកពិន័យ ៕

ក្នុងសេចក្តីថ្លែងការណ៍កាលពីថ្ងៃទី២២ ខែឧសភា ឆ្នាំ២០២៦ លោក Natthaphong Ruengpanyawut មេដឹកនាំគណបក្សប្រជាជនថៃ ដែលជាគណបក្សប្រឆាំងដ៏ធំ បានអំពាវនាវឱ្យពលរដ្ឋរួមគ្នាបញ្ចប់របបដឹកនាំដោយគណបក្សភូមិចៃថៃ របស់លោកនាយករដ្ឋមន្ត្រី Anutin Charnvirakul ដោយសារគណបក្សនេះបន្តវេនពីរបបធ្វើរដ្ឋប្រ.ហារ និងរារាំងការអភិវឌ្ឍប្រទេសជាតិ ឬបង្កការជាប់គាំង ។

មេដឹកនាំគណបក្សប្រជាជនរិះគន់ថា ថ្ងៃទី២២ ខែឧសភា គឺរយៈពេល១២ឆ្នាំហើយដែលមានរដ្ឋប្រហារកើតឡើងនៅប្រទេសថៃ (ដោយលោក Prayut Chan-o-cha) បើទោះជាបច្ចុប្បន្ន គ្មានរថក្រោះនៅលើដងផ្លូវដូចសម័យរដ្ឋប្រហារពីមុនក៏ដោយ ប៉ុន្តែអ្នកមានអំណាចបានផ្លាស់ប្តូរទម្រង់មកគ្រប់គ្រងប្រទេសតាមរយៈរបបខៀវ (ពណ៌ខៀវ គឺជានិមិត្តរូប និងពណ៌សម្គាល់របស់គណបក្សភូមិចៃថៃ) ។ របបនេះបានពង្រឹងអំណាចដោយការតែងតែងមនុស្សរបស់ខ្លួនក្នុងព្រឹទ្ធសភា ស្ថាប័នឯករាជ្យ តុលាការធម្មនុញ្ញ កងទ័ព និងសមត្ថកិច្ច ។

ការដឹកនាំប្រទេសដោយគណបក្សភូមិចៃថៃ កំពុងរារាំងការអភិវឌ្ឍប្រទេសជាតិ ឬបង្កការជាប់គាំង ពីព្រោះអសមត្ថភាពដោះស្រាយបញ្ហារបស់ពលរដ្ឋ, បង្កើនភាពអយុត្តិធម៌ក្នុងសង្គម និងបណ្តោយឱ្យមានអំពើពុករលួយ ។ គណបក្សប្រជាជនចង់ឱ្យពលរដ្ឋយកអំណាចរបស់ខ្លួនមកវិញ ព្រោះគ្មានរបបណាអាចគ្រប់គ្រងជោគវាសនារបស់ពលរដ្ឋជារៀងរហូតឡើយ ពលរដ្ឋប្រាថ្នាចង់បានអនាគតដ៏ល្អប្រសើរ និងរួមគ្នាកសាងអំណាចរដើម្បីរុញច្រានប្រទេសថៃឱ្យឆ្លងផុតពីឥទ្ធិពលនៃរបបដឹកនាំអំណាចបច្ចុប្បន្ន ។

ជំហ៊ានដំបូង គឺជំរុញការព្រាងរដ្ឋធម្មនុញ្ញថ្មីមួយស្របតាមលទ្ធិប្រជាធិបតេយ្យពិតប្រាកដ និងមានការរផ្សារភ្ជាប់ផ្ទាល់ជាមួយពលរដ្ឋ ព្រមទាំងចង់ឱ្យប្រទេសថៃជារបស់ពលរដ្ឋ មនុស្សគ្រប់រូបមានសិទ្ធិស្មើគ្នាដើម្បីអនាគតកូនចៅទៅថ្ងៃអនាគត ។ សេចក្តីថ្លែងការណ៍នេះធ្វើឱ្យនយោបាយថៃកាន់តែឡើងកំដៅខ្លាំងឡើង ដោយសារគណបក្សប្រជាជនដើរតួនាទីជាគណបក្សប្រឆាំងដ៏រឹងមាំក្នុងរដ្ឋសភា ។

គួរបញ្ជាក់ថា បន្ទាប់ពីការបោះឆ្នោតកន្លងមក គណបក្សភូមិចៃថៃរបស់លោក Anutin ទទួលបានបានជ័យជម្នះ និងដឹកនាំរដ្ឋាភិបាលចម្រុះ ដែលធ្វើឱ្យគណបក្សនេះមានឥទ្ធិពលយ៉ាងខ្លាំងលើប្រព័ន្ធគ្រប់គ្រងរដ្ឋាភិបាល និងសេដ្ឋកិច្ចនាពេលបច្ចុប្បន្ន ។ ការវាយប្រហារចំៗទៅលើគណបក្សកាន់អំណាច គឺជាយុទ្ធសាស្ត្រនយោបាយថ្មីមួយរបស់គណបក្សប្រឆាំង ដើម្បីប្រមូលសំឡេងគាំទ្រពីពលរដ្ឋសម្រាប់ត្រៀមខ្លួនចូលរួមប្រកួតប្រជែងក្នុងការបោះឆ្នោតខាងមុខ ៕

ភ្នំពេញ៖ ភាគីចិនបានចេញមុខប្រកាសគាំទ្រយ៉ាងមុតមាំ និងសាទរចំពោះវិធានការដាច់ណាត់របស់រាជរដ្ឋាភិបាលកម្ពុជា ក្នុងការបើកយុទ្ធនាការទ្រង់ទ្រាយធំបោសសម្អាតបណ្តាញឧក្រិដ្ឋកម្មឆបោ.កតាមប្រព័ន្ធអ៊ីនធឺណិត (Online Scam)។ ការបង្ហាញជំហរការទូតដ៏មានទម្ងន់នេះ ធ្វើឡើងស្របពេលដែលអាជ្ញាធរកម្ពុជាកំពុងអនុវត្តវិធានការក្តៅ ក្នុងការបង្ក្រាបបណ្តាញឧក្រិដ្ឋជន និងមន្ត្រីខិលខូចដែលពាក់ព័ន្ធនៅគ្រប់ខេត្ត-ក្រុងទូទាំងប្រទេស ដោយគ្មានការលើកលែងឡើយ។
 
តាមរយៈសំណេរផ្លូវការនៅលើបណ្តាញសង្គមហ្វេសប៊ុក នៅយប់ថ្ងៃទី២៤ ខែឧសភា ឆ្នាំ២០២៦ ឯកឧត្តម វ៉ាង វិនពីន (Wang Wenbin) ឯកអគ្គរដ្ឋទូតចិនប្រចាំនៅកម្ពុជា បានថ្លែងកោតសរសើរចំៗថា៖ «យើងសូមសរសើរ និងគាំទ្រយ៉ាងមុតមាំចំពោះវិធានការដ៏ម៉ឺងម៉ាត់ដែលរដ្ឋាភិបាលកម្ពុជាបានអនុវត្ត ដើម្បីលុបបំបាត់បទល្មើសបោកប្រាស់តាមប្រព័ន្ធអនឡាញ»។
 
ការចេញមុខមកគាំទ្រភ្លាមៗពីសំណាក់ប្រមុខទូតចិននាពេលនេះ ធ្វើឡើងបន្ទាប់ពីរាជរដ្ឋាភិបាលកម្ពុជា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បាននិងកំពុងអនុវត្តច្បាប់យ៉ាងតឹងរ៉ឹងបំផុត ដោយចុះឆែកឆេរនិងបង្ក្រាបទីតាំងសង្ស័យរាប់សិបកន្លែងទូទាំងប្រទេស ព្រមទាំងចាប់ខ្លួនឧក្រិដ្ឋជនឆ្លងដែនបានរាប់ពាន់នាក់។
 
អ្វីដែលជាចំណុចគន្លឹះ និងកក្រើកបំផុតនោះគឺ ថ្នាក់ដឹកនាំកំពូលរបស់កម្ពុជាបានដាក់បទបញ្ជាដាច់ណាត់ មិនត្រឹមតែបង្ក្រាបក្រុមសភាវៈអាក្រក់សញ្ជាតិបរទេសនោះទេ ប៉ុន្តែត្រូវមានវិធានការច្បាប់ និងដាក់ទោសទណ្ឌធ្ងន់ធ្ងរបំផុតចំពោះ «មន្ត្រីខិលខូចទាំងឡាយណា» មិនថាមានបុណ្យស័ក្តិខ្ពស់ប៉ុនណា ដែលហ៊ានក្បត់សមត្ថកិច្ចខ្លួនឯង ទៅនៅពីក្រោយខ្នង ឃុបឃិត ឬផ្តល់ជម្រកការពារដល់ក្រុមឧក្រិដ្ឋជនអនឡាញទាំងនេះ។
អ្នកវិភាគមើលឃើញថា សារការទូតរបស់ឯកឧត្តម វ៉ាង វិនពីន គឺជាការបញ្ជាក់ទៅកាន់ពិភពលោកថា ទីក្រុងប៉េកាំងមិនបណ្តោយឱ្យក្រុមឧក្រិដ្ឋជនចិន ឬបរទេស មកប្រើប្រាស់ទឹកដីកម្ពុជាធ្វើជាមូលដ្ឋានបំផ្លាញសន្តិសុខសង្គមឡើយ។​
 
សូមជម្រាបថា យុទ្ធនាការវះកាត់និងបោសសម្អាតទាំងបណ្តាញឧក្រិដ្ឋជន និងមន្ត្រីពុករលួយខិលខូចរបស់កម្ពុជានាពេលនេះ រួមផ្សំនឹងការគាំទ្រពេញទំហឹងពីប្រទេសចិន សបញ្ជាក់ឱ្យឃើញពីរបត់ថ្មីមួយនៃការប្តេជ្ញាចិត្តខ្ពស់បំផុតរបស់កម្ពុជា ដើម្បីការពារមុខមាត់ជាតិលើឆាកអន្តរជាតិ និងធានាឱ្យបានថា កម្ពុជានឹងមិនមែនជាជម្រកសុវត្ថិភាពរបស់ឧក្រិដ្ឋជនឆ្លងដែនឡើយ៕