ប្រទេសអង់គ្លេស ៖ អ្នកជំនាញមកពីសាកលវិទ្យាល័យ Bristol ប្រទេសអង់គ្លេស និយាយថា ពួកគេបានផលិតថ្មពីគ្រាប់ពេជ្រលើកដំបូងលើពិភពលោក ដោយជោគជ័យ ។ បើចង់ឱ្យថ្មនេះនៅសល់ត្រឹម៥០% គឺត្រូវចំណាយពេលប្រើប្រាស់រហូតដល់ ៥,៧៣០ឆ្នាំ រីឯថ្មនៅសល់៥០% ទៀតអាចប្រើប្រាស់បានរាប់ពាន់ឆ្នាំ ។

អ្នកជំនាញអង់គ្លេសបញ្ជាក់ថា ថ្មថ្មីនេះមានអាយុប្រើប្រាស់បានរយៈពេលយូរបំផុត គឺរហូតដល់ជិត១ម៉ឺនឆ្នាំ ឯណោះ ។ វាជាថ្មប្រភេទកាបូន ដែលអាចប្រើប្រាស់ជាមួយឧបករណ៍អេឡិចត្រូនិកជាច្រើនប្រភេទ ជាពិសេស ឧបករណ៍វេជ្ជសាស្ត្រ និងឧបករណ៍ដាក់នៅទីកន្លែងដែលមនុស្សពិបាកចូលទៅដល់ ដូចជា ៖ ម៉ាស៊ីននៅបាតសមុទ្រ និងឧបករណ៍បច្ចេកវិទ្យាអវកាស ។

ការដំណើរការរបស់ថ្មប្រភេទនេះ គឺមានលក្ខណៈស្រដៀងគ្នានឹងបន្ទះសូឡាស្រូបពន្លឺព្រះអាទិត្យដែរ គ្រាន់តែថ្មនេះនឹងប្រើប្រាស់អេឡិចដ្រូនបម្លាស់ទីយ៉ាងឆាប់រហ័សក្នុងគ្រាប់ពេជ្រ ដើម្បីផលិតជាថាមពលថ្មជំនួសពន្លឺព្រះអាទិត្យ ។

កាបូន -១៤ គឺជាសាធារធាតុ Isotope ដែលមានចំនួននីត្រុងមិនស្មើគ្នា ប៉ុន្តែជាធាតុតែមួយរបស់កាបូន ។ វាមានគុណសម្បត្តិជាសារធាតុវិទ្យុសកម្មអាចបង្កើតថាមពលបាន ។ អ្នកស្រាវជ្រាវនៅសាកលវិទ្យាល័យ Bristol បានយកកាបូននេះមកដាក់នៅផ្នែកខាងក្នុងគ្រាប់ពេជ្រដើម្បីបង្កើតថ្មទំហំតូច ។

គោលបំណងនៃការផលិតថ្ម គឺអ្នកជំនាញអមានគោលបំណងយកវាទៅប្រើប្រាស់ជាមួយឧបករណ៍អេឡិចត្រូនិក នាថ្ងៃអនាគត ដែលពុំអាចផ្លាស់ប្តូរថ្មញឹកញាប់ ដោយសារប្រើប្រាស់នៅកន្លែងគ្រោះថ្នាក់ ដូចជា ៖ ម៉ាស៊ីនខួងប្រេងនៅបាតសមុទ្រជ្រៅ ឬឧបករណ៍ពេទ្យ (X-ray) ។ អ្នកជំនាញរំពឹងថា ថ្មនេះនឹងជំរុញឱ្យមានការផ្លាស់ប្តូរបច្ចេកវិទ្យាក្នុងឧស្សាហកម្មនានា និងការរស់នៅប្រចាំថ្ងៃ ៕

ថៃជាប្រទេសមួយក្នុងចំណោមប្រទេសដែលមានខ្យល់បំពុលខ្លាំងជាងគេនៅលើពិភពលោក ដោយសារការឆេះចំបើង ភ្លើងឆេះព្រៃក្នុងរដូវប្រាំង ការបំភាយឧស្ម័នពីយានជំនិះ និងសកម្មភាពឧស្សាហកម្ម ធ្វើឱ្យប្រទេសនេះមានការបំពុលបរិយាកាសខ្ពស់បំផុត។ ទោះជាយ៉ាងណាគុណភាពខ្យល់នៅក្នុងរាជធានីបាងកក និងឈៀងម៉ៃ នាពេលបច្ចុប្បន្ននេះកំពុងមានភាពប្រសើរឡើងជាលំដាប់ហើយ ដោយសារយុទ្ធនាការបង្កើតទឹកភ្លៀងសិប្បនិមិត្តដើម្បីសម្អាតខ្យល់។

ដូច្នេះសម្រាប់ប្រទេសដែលមានការបរិយាកាសបំពុលខ្លាំង អាចអនុវត្តបច្ចេកវិទ្យាបង្កើតភ្លៀងសិប្បនិមិត្តបាន។ នេះបើយោងតាមនាយកដ្ឋានអាកាសចរណ៍ និងផលិតទឹកភ្លៀងនៃប្រទេសថៃ បាននិយាយថា ចាប់តាំងពីថ្ងៃទី ២-១៦ ខែធ្នូ ឆ្នាំ២០២៤ មកទិន្នន័យសន្ទស្សន៍ការបំពុលធូលីនៅក្នុងទីក្រុងបាងកក ឈៀងម៉ៃ និងខេត្តភាគខាងជើងគឺមានកម្រិតទាបជាងមុន បើធៀបនឹងរយៈពេលដូចគ្នាក្នុងឆ្នាំ ២០២៣ ។ ការព្យាករណ៍ក៏បង្ហាញដែរថានៅឆ្នាំ ២០២៥ បញ្ហានៃការបំពុលធូលីក្នុងប្រទេសថៃនឹងថយចុះបន្តិចម្តងៗ ដោយរដ្ឋាភិបាលជឿជាក់ថា ប្រទេសខ្លួននឹងលែងស្ថិតក្នុងចំណោមទីក្រុងដែលបំពុលខ្លាំងបំផុតក្នុងពិភពលោកដូចឆ្នាំមុនៗទៀតហើយ។

យោងតាមអនុរដ្ឋមន្ត្រីក្រសួងកសិកម្ម និងសហករណ៍ថៃ Itthi Sirilathayakorn បាននិយាយថា បច្ចុប្បន្នគុណភាពខ្យល់បានប្រសើរឡើងជាលំដាប់ ដែលបង្ហាញថាការខិតខំប្រឹងប្រែងរបស់រដ្ឋាភិបាល និងក្រសួងកំពុងនាំមកនូវលទ្ធផលវិជ្ជមាន។ ជាពិសេសចាប់តាំងពីខែកុម្ភៈ ឆ្នាំ២០២៤ មកនាយកដ្ឋានអាកាសចរណ៍កសិកម្ម និងផលិតទឹកភ្លៀង ក្រោមក្រសួងនេះបានសម្របសម្រួលជាមួយកងយោធពលខេមរភូមិន្ទ និងស្ថាប័នពាក់ព័ន្ធ ដើម្បីអនុវត្តកម្មវិធីភ្លៀងសិប្បនិម្មិត។ យន្តហោះចំនួន ៣០ គ្រឿងត្រូវបានចល័តដើម្បីបាញ់ទឹកភ្លៀងទៅលើអាកាស ជួយកាត់បន្ថយអ័ព្ទ និងធូលីតូចៗដែលកកកុញនៅលើអាកាស។

នៅឆ្នាំ ២០២៥ នាយកដ្ឋានអាកាសចរណ៍ និងផលិតទឹកភ្លៀងរបស់ថៃ នឹងបន្តបង្កើនសកម្មភាពបាញ់ថ្នាំទឹកភ្លៀងលើអាកាស ហើយគ្រោងអនុវត្តបច្ចេកទេសទំនើបបន្ថែមទៀត ដូចជាការសាបព្រួសអំបិល ឬទឹកកកស្ងួតទៅក្នុងពពក ដើម្បីបង្កើតពពកដែលបណ្តាលឱ្យមានភ្លៀងធ្លាក់ ជួយកាត់បន្ថយការរីករាលដាលនៃខ្យល់ ការបំពុល និងជួយកាត់បន្ថយគ្រោះរាំងស្ងួតក្នុងតំបន់លូតលាស់សំខាន់ៗផ្សេងទៀត៕

ប្រទេសសិង្ហបុរី ៖ ការប្រើប្រាស់បច្ចេកវិទ្យា AI បានរីកចម្រើនក្នុងផ្នែកឧស្សាហកម្មលើពិភពលោក ប៉ុន្តែសម្រាប់បុគ្គលិកវិញនៅតែមានភាពច្របូកច្របល់ថា តើបច្ចេកវិទ្យានេះស័ក្តិសមសម្រាប់ការងារដែរឬទេ? ជាពិសេស បុគ្គលិកនៅប្រទេសសិង្ហបុរីបានយកបច្ចេកវិទ្យា AI មកប្រើប្រាស់ក្នុងការងារយ៉ាងច្រើន ប៉ុន្តែពួកគេពុំហ៊ានបើកចំហជាសាធារណៈ ពីព្រោះខ្លាចគេវាយតម្លៃថា ខ្វះសមត្ថភាព ឬជាមនុស្សខ្ជិល ។

លទ្ធផលការស្ទង់មតិបុគ្គលិកក្រុមហ៊ុន ជាង១៧,០០០នាក់ នៅប្រទេសចំនួន១៥ កាលពីខែសីហា ឆ្នាំ២០២៤ រួមទាំងបុគ្គលិកសិង្ហបុរី ១,០០៨នាក់ របស់ក្រុមហ៊ុន Slack Workforce Index បង្ហាញថា បុគ្គលិកសិង្ហបុរី ស្មើ៥២% បានប្រើប្រាស់ AI ក្នុងការងាររបស់ខ្លួន ហើយតម្រូវការបុគ្គលិកផ្នែក AI នៅសិង្ហបុរី ក៏បានកើនឡើងដែរ ។ ប៉ុន្តែបុគ្គលិក៤៥% បែរជាមានអារម្មណ៍មិនសប្បាយចិត្ត ពេលប្រាប់អ្នកគ្រប់គ្រងថា ប្រើប្រាស់ AI ក្នុងការងារ និងខ្លាចត្រូវវាយតម្លៃថា គ្មានសមត្ថភាព ឬខ្ជិលច្រអូស ។

Christina Janzer ជាអនុប្រធានជាន់ខ្ពស់ផ្នែកស្រាវជ្រាវ និងវិភាគនៅក្រុមហ៊ុន Slack Workforce Index និយាយថា បុគ្គលិកភាគច្រើនចេះប្រើ AI ប៉ុន្តែពួកគេមិនប្រាកដចិត្តថា នឹងប្រើវាក្នុងការងារដូចម្តេច? ភាពច្របូកច្របល់នេះបានក្លាយជាឧបសគ្គក្នុងការប្រើ AI យ៉ាងទូលំទូលាយនៅកន្លែងការងារ ។ ហេតុនេះ អ្នកគ្រប់គ្រងមិនត្រឹមតែអប់រំបុគ្គលិកឱ្យចេះប្រើ AI ប៉ុណ្ណោះទេ ប៉ុន្តែត្រូវគាំទ្រពួកគេសាកល្បងប្រើ AI យ៉ាងបើកចំហ ។ ក្រុមហ៊ុនផ្សេងៗគួរបែងចែកពេលវេលាប្រើប្រាស់ AI ក្នុងការងារ និងគាំទ្របុគ្គលិកបែងចែកចំណេះដឹងជាមួយមិត្តរួមការងារ ។

ក្រៅពីនេះ នាយកក្រុមហ៊ុនគួរណែនាំពីបច្ចេកវិទ្យា AI និងកំណត់យ៉ាងច្បាស់លាស់ទៅកាន់បុគ្គលិកថា តើបច្ចេកវិទ្យានេះអាចប្រើក្នុងការងារណាខ្លះ និងការងារណាខ្លះពុំអនុញ្ញាតឱ្យប្រើ AI ។ បើក្រុមហ៊ុនពុំកំណត់ច្បាស់លាស់ទេ បុគ្គលិកនឹងឆ្ងល់ថា តើពេលណាទើបក្រុមហ៊ុនទទួលស្គាល់ការប្រើ AI នៅកន្លែងការងារ ។

រីឯការស្ទង់មតិរបស់ Hiring Lab ក៏បានបង្ហាញលទ្ធផលស្រដៀងគ្នាថា តម្រូវការបុគ្គលិកផ្នែក AI នៅសិង្ហបុរី បានកើនឡើងខ្ពស់ ។ តួនាទីការងារពាក់ព័ន្ធនឹង AI បានកើនឡើងដល់ជាង៤ដង បើប្រៀបធៀបរវាងខែកញ្ញា ឆ្នាំ២០២៣ ជាមួយខែកញ្ញា ឆ្នាំ២០២៤ ។ ទោះជាតម្រូវការបុគ្គលិក AI នៅសិង្ហបុរីកើនឡើង ប៉ុន្តែបុគ្គលិក៤៥% មិនសប្បាយចិត្តពេលនិយាយថា ខ្លួនប្រើ AI ព្រោះខ្លាចថា មិនចេះធ្វើការ ។

បច្ចុប្បន្ន បុគ្គលិកសិង្ហបុរី៨៨% បានព្យាយាមអភិវឌ្ឍន៍ជំនាញផ្នែក AI ខណៈបុគ្គលិក៦៣% ទៀតប្រាប់ថា រៀនប្រើប្រាស់ AI មិនដល់៥ម៉ោងទេ ពួកគេក៏ចេះប្រើវា ៕