កុំភ្លេចចូលរួមទស្សនាទាំងអស់គ្នា នៅថ្ងៃទី២១ ខែមករា ឆ្នាំ២០២៥ ខាងមុខនេះ ភពទាំង ៧ នៃប្រព័ន្ធព្រះអាទិត្យរបស់យើងនឹងបង្ហាញខ្លួនឱ្យមនុស្សមើលឃើញយ៉ាងច្បាស់នៅលើមេឃ ដោយមិនត្រូវការពាក់វែនតាជំនួយឡើយ មានន័យថាយើងអាចមើលឃើញភពទាំង ៧ នេះតម្រៀបគ្នាជាជួរដោយភ្នែកទទេបាន។

ភពទាំង ៧ រួមមាន៖ ភពពុធ ភពសុក្រ ភពអង្គារ ភពព្រហស្បតិ៍ ភពសៅរ៍ ភពអ៊ុយរ៉ានុស និងភពណិបទូន នឹងបង្ហាញខ្លួនក្នុងពេលតែមួយនៅលើមេឃ ដែលមនុស្សជុំវិញពិភពលោកអាចមើលឃើញដោយភ្នែកទទេបាន ដែលនេះគឺជាព្រឹត្តិការណ៍តារាសាស្ត្រដ៏អស្ចារ្យបំផុតមួយមិនធ្លាប់មាន។ ព្រឹត្តិការណ៍នេះត្រូវាបានគេស្គាល់ថាជាបាតុភូតក្បួនដង្ហែរបស់ភព ដែលនឹងមានរយៈពេល ៣០ ថ្ងៃគឺចាប់ពីថ្ងៃទី២១ ខែមករា ដល់ថ្ងៃទី២១ ខែកុម្ភៈ ឆ្នាំ២០២៥។

យោងតាមការចុះផ្សាយរបស់សារព័ត៌មានបរទេស CNET បានឱ្យដឹងថា ដើម្បីអាចមើលឃើញភពទាំងនេះបានយើងត្រូវទៅកន្លែងដែលមានផ្ទៃមេឃធំទូលាយ និងស្រឡះនៅម៉ោងប្រហែល ៨:៣០ នាទីយប់ នោះភពទាំង ៧ នឹងលេចឡើងនៅលើមេឃដំណាលគ្នា។ ភពដែលភ្លឺបំផុតគឺភពសុក្រ ខណៈភពអង្គារមានពន្លឺពណ៌ក្រហមប្លែកហើយភពព្រហស្បតិ៍ នឹងលេចធ្លោខ្លាំងនៅលើមេឃពេលយប់ជ្រៅប្រហែលម៉ោង ១១ រួមទាំងភពពុធ និងភពសៅរ៍ ដោយយើងអាចមើលឃើញដោយភ្នែកទទេបាន។

ទោះជាយ៉ាងណាដើម្បីមើលឃើញភពអ៊ុយរ៉ានុស និងភពណិបទូន គឺតម្រូវឱ្យមានកែវយឺត ទើបអាចមើលឃើញ ដោយសារតែវាមានពន្លឺខ្សោយជាងគេ។ ព្រឹត្តិកាណ៍ដ៏អស្ចារ្យនេះគឺមានសារៈសំខាន់មិនត្រឹមតែសម្រាប់ភាពកម្ររបស់វាប៉ុណ្ណោះទេ ប៉ុន្តែវាបានផ្ដល់ឱកាស និងភាពងាយស្រួលចំពោះតារាវិទូ និងអ្នកមើលផ្កាយធម្មតាផងដែរ។ មិនដូចព្រឹត្តិការណ៍សេឡេស្ទាលជាច្រើនដែលតម្រូវឱ្យមានឧបករណ៍ឯកទេស ឬលក្ខខណ្ឌផ្សេងៗឡើយ ពោលគឺព្រឹត្តិការណ៍នេះគឺអាចមើលទិដ្ឋភាពដ៏អស្ចារ្យដោយភ្នែកទទេបានយ៉ាងងាយស្រួលបំផុត៕

ប្រទេសតួកគី ៖ កាលពីថ្ងៃទី២៤ ខែធ្នូ ឆ្នាំ២០២៤ សារព័ត៌មានបរទេសរាយការណ៍ថា ភ្នាក់ងារអាកាសយានដ្ឋាន Istanbul Airport នៅប្រទេសតួកគី បានសហការ​ជា​មួយ​សមត្ថកិច្ច ចាប់កូនហ្គោរីឡា (Gorilla) ជាសត្វជិតផុតពូជ ពីក្នុងឡាំងឈើតូចមួយដែលក្រុមឈ្មួញលួ.ច នាំចេញពីប្រទេសនីហ្សេរីយ៉ា ទៅកាន់ទីក្រុងបាងកក ប្រទេសថៃ ។

មន្ត្រីក្រសួងពាណិជ្ជកម្មតួកគី បាននិយាយកាលពីថ្ងៃទី២១ ខែធ្នូ កន្លងមកថា មន្ត្រីគយបានតាមដានសកម្មភាពក្រុមឈ្មួញ និងប្រទះឃើញកូនសត្វហ្គោរីឡាក្នុងឡាំងឈើ ដែលក្រុមឈ្មួញលួចដឹកតាមយន្តហោះពីប្រទេសនីហ្សេរីយ៉ា ទៅទីក្រុងបាងកក ។ វាជាពូជហ្គោរីឡានៅប្រទេសលោកខាងលិច និងត្រូវបានចុះបញ្ជីជាសត្វជិតផុតពូជ ហើយគួរតែគ្រប់គ្រងឱ្យបានល្អ ដើម្បីកុំឱ្យយកវាទៅប្រើប្រាស់ជាប្រយោជន៍។

យោងតាមអនុញ្ញាស្តីពីពាណិជ្ជកម្មអន្តរជាតិបញ្ជាក់ថា ហ្គោរីឡា គឺជាសត្វព្រៃជិតផុតពូជ ហើយការជួញដូរសត្វព្រៃប្រភេទនេះ លុះត្រាតែទទួលបានការអនុញ្ញាតសម្រាប់ករណីពិសេសប៉ុណ្ណោះ ដូចជា ៖ ការស្រាវជ្រាវផ្នែកវិទ្យាសាស្ត្រ ។

ក្រោយពីភ្នាក់ងារអាកាសយានដ្ឋានតួកគីចាប់កូនហ្គោរីឡាពីក្រុមឈ្មួញ ពួកគេក៏បញ្ជូនវាទៅឱ្យក្រសួងកសិកម្ម និងព្រៃឈើតួកគី និងស្ថិតក្រោមការថែទាំរបស់មន្ត្រីកសិកម្ម ។ ការចាប់សត្វព្រៃលើកនេះ ធ្វើឡើងដោយមន្ត្រីគយមកពីក្រសួងពាណិជ្ជកម្មសហការជាមួយសមត្ថកិច្ច ហើយគេចាត់ទុកថា គឺជាការព្យាយាមការពារសត្វព្រៃដើម្បីឱ្យវារស់នៅតាមធម្មជាតិ ។ នេះបើតាមការចុះផ្សាយរបស់សារព័ត៌មាន Daily Sabah ។

ប៉ុន្តែគ្មានព័ត៌មានលម្អិតពីក្រុមឈ្មួញលួចឆ្លងដែនកូនហ្គោរីឡានេះ ថាជាអ្នកណាទេ ហើយក៏ពុំដឹងថា តើពួកគេយកសត្វនេះទៅប្រទេសថៃធ្វើអ្វី ។ ដូច្នេះ សមត្ថកិច្ចតួកគីនឹងស៊ើបអង្កេតករណីនេះបន្តទៀត ។

កាលពីខែវិច្ឆិកា ឆ្នាំ២០២៤ ភ្នាក់ងារអាកាសយានដ្ឋានអន្តរជាតិ Jorge Chavez នៅទីក្រុងលិម៉ា ប្រទេសប៉េរូ បានចាប់ខ្លួនបុរសម្នាក់អាយុ២៨ឆ្នាំ (ពុំដឹងឈ្មោះ) ក្រោយពីសង្កេតឃើញថា មានពោះធំខុសធម្មតា ។ ភ្នាក់ងារអាកាសយានដ្ឋានបានរកឃើញបុរសនេះលាក់ទុកពីងពាងពូជ Tarantula ចំនួន៣០០ក្បាល, ក្អែប ១០០ក្បាល និងស្រមោចមានពិស៩ក្បាល ក្នុងថង់ផ្លាស្ទិកតូចដាក់ក្រោមអាវ ៕

សហរដ្ឋអាមេរិក ៖ កាលពីថ្ងៃទី២១ ខែធ្នូ ឆ្នាំ២០២៤ ភ្នាក់ងារគ្រប់គ្រងសុវត្ថិភាពផ្លូវជាតិអាមេរិកបានជូនដំណឹងទៅកាន់ម្ចាស់រថយន្ត Tesla ជិត៧សែនគ្រឿង ឱ្យជ្រាបពីបញ្ហាភ្លើងសញ្ញាព្រមានប្រព័ន្ធត្រួតពិនិត្យសម្ពាធសំបកកង់រថយន្ត ។ ការជូនដំណឹងនេះ គឺសម្រាប់រថយន្តអគ្គិសនី Cybertruck ឆ្នាំ២០២៤, Model 3 ឆ្នាំ២០១៧ ដល់ឆ្នាំ២០២៥ និង Model Y ឆ្នាំ២០២០ ដល់ឆ្នាំ២០២៥ ។

ភ្នាក់ងារគ្រប់គ្រងសុវត្ថិភាពផ្លូវជាតិអាមេរិកបញ្ជាក់ថា ភ្លើងសញ្ញាព្រមានប្រព័ន្ធត្រួតពិនិត្យសម្ពាធសំបកកង់រថយន្តទាំងនេះ គឺពុំសូវភ្លឺច្បាស់ក្នុងអំឡុងពេលបើកបរ ។ រីឯក្រុមហ៊ុន Tesla ​របស់​លោក Elon Musk លើកឡើងថា ក្រុមហ៊ុននឹងអាបឌេតព័ត៌មានពីរថយន្តអគ្គិសនីមានបញ្ហាភ្លើងសញ្ញាទៅកាន់ម្ចាស់រថយន្ត នៅថ្ងៃទី១៥ ខែកុម្ភៈ ឆ្នាំ២០២៥ ។

ការប្រមូលរថយន្តអគ្គិសនីពីអតិថិជនវិញ គឺជាការផ្តល់សុវត្ថិភាពដល់អ្នកប្រើប្រាស់រថយន្ត ហើយក្រុមហ៊ុន Tesla បានប្រមូលរថយន្តពីអតិថិជននៅអាមេរិកជាញឹកញាប់ ។ កាលពីឆ្នាំ២០២៣ ភ្នាក់ងារគ្រប់គ្រងសុវត្ថិភាពផ្លូវជាតិអាមេរិកកត់ត្រាថា Tesla បានប្រមូលរថយន្តអគ្គិសនីមកវិញ ចំនួន៧លើក ដូចជា ៖ រថយន្ត Cybertruck ដើម្បីដោះស្រាយបញ្ហាកាមេរ៉ាផ្នែកខាងក្រោយ, ផ្លិតទឹកខូច និងរលុងនៅផ្នែកខាងក្រោយរថយន្ត ។

កាលពីខែមិថុនា ឆ្នាំ២០២៤ ក្រុមហ៊ុន Tesla បានជូនដំណឹងពីកំហុសបច្ចេកទេសទៅកាន់ម្ចាស់រថយន្ត ចំនួន១លាន៨សែនគ្រឿង រួមមាន ៖ រថយន្ត Tesla Model 3, S និង X ឆ្នាំ២០២១ ដល់ឆ្នាំ២០២៤ រួមទាំងរថយន្តប្រភេទ Y ឆ្នាំ២០២០ ដល់ឆ្នាំ២០២៤ ដើម្បីជួសជុលផ្ទាំងមុខរបស់រថយន្ត ដែលអាចនឹងរបូតធ្លាក់ពេលបើកបរ បើបិទពុំត្រឹមត្រូវ ។

គួរបញ្ជាក់ថា ការប្រមូលរថយន្តពីអតិថិជនវិញរបស់ក្រុមហ៊ុន Tesla គឺស្មើនឹង២១% នៃការប្រមូលរថយន្តសរុបនៅអាមេរិក ក្នុងរយៈពេល៣ត្រីមាសដំបូង ឆ្នាំ២០២៤ ។ នៅខែកញ្ញា ឆ្នាំ២០២៤ Tesla បានប្រមូលរថយន្តច្រើនបំផុត គឺរហូតដល់ជាង១លានគ្រឿង (១,៨៥៨,៧៧៤គ្រឿង) ដោយសារបញ្ហាបច្ចេកទេស ៕

សហរដ្ឋអាមេរិក ៖ ប្រធានាធិបតីអាមេរិកថ្មី លោក Donald Trump អាចនឹងអនុញ្ញាតឱ្យ TikTok ដំណើរការនៅអាមេរិកបន្តទៀត ក្រោយពីលោកបានចូលរួមកម្មវិធីរៀបចំដោយអង្គការ Turning Point USA នៅទីក្រុងហ្វីនិច រដ្ឋអារីហ្សូណា កាលពីថ្ងៃទី២២ ខែធ្នូ ឆ្នាំ២០២៤ ។ កន្លងមក លោក ចូ បៃឌិន គ្រោងហាមឃាត់ការប្រើប្រាស់ ដោយសារបារម្ភពីសន្តិសុខជាតិ ។

ពេលរកសំឡេងឆ្នោត លោក Trump ថ្លែងថា នឹងហាមឃាត់ការប្រើប្រាស់ ប៉ុន្តែក្រោយមក លោកថា ចូលចិត្ត TikTok ហើយនឹងចាត់ការបញ្ហាដែលអាមេរិកហាមឃាត់បណ្តាញសង្គមនេះ នៅខែមករា ឆ្នាំ២០២៥ ក្រោយពីតុលាការឧទ្ធរណ៍សម្រេចឱ្យ TikTok លក់អាជីវកម្មនៅអាមេរិក ។ បើមិនដូច្នោះទេ អាមេរិកនឹងហាមឃាត់ការប្រើប្រាស់ ចាប់ពីថ្ងៃទី១៩ ខែមករា ឆ្នាំ២០២៥ ។

លោក Trump ថ្លែងថា TikTok ជាបណ្តាញសង្គមចែករំលែកវីដេអូដ៏ពេញនិយម ហើយជួយឱ្យលោកយល់ពីពលរដ្ឋមួយចំនួនដែលមានសិទ្ធិបោះឆ្នោតជ្រើសរើសប្រធានាធិបតី ។ លោកអាចនឹងអនុញ្ញាតឱ្យបណ្តាញសង្គមនេះដំណើរការមួយរយៈនៅអាមេរិក ក្រោយពេលលោកបានទស្សនាវីដេអូរកសំឡេងឆ្នោតក្នុង TikTok ។

TikTok បញ្ជាក់ថា អាមេរិកហាមឃាត់ពលរដ្ឋប្រើប្រាស់ គឺជាការបិទបណ្តាញសង្គមដ៏ពេញនិយមបំផុត ដែលអ្នកប្រើប្រាស់មានសេរីភាពអាចបញ្ចេញយោបល់ ។ វាជាការបិទសិទ្ធិការនិយាយស្តីរបស់ពលរដ្ឋអាមេរិកជាច្រើន ដែលប្រើប្រាស់ TikTok និយាយពីបញ្ហានយោបាយ ពាណិជ្ជកម្ម និងសិល្បៈ ។

កាលពីខែមេសា ឆ្នាំ២០២៤ ប្រធានាធិបតីអាមេរិក លោក ចូ បៃឌិន បានទុករយៈពេលត្រឹម២៧០ថ្ងៃ សម្រាប់ឱ្យ TikTok ដំណើរការនៅអាមេរិក ដោយអះអាងថា វានឹងប៉ះពាល់សន្តិសុខជាតិ ។ បើ ByteDance ពុំធ្វើតាមទេ ក្រុមហ៊ុន Apple និង Google ត្រូវតែលុប TikTok ចេញពីកម្មវិធី ។

នៅខែឧសភា ឆ្នាំ២០២៤ TikTok បានដាក់ពាក្យបណ្តឹងរដ្ឋាភិបាលអាមេរិក ដើម្បីផ្អាកការហាមឃាត់ការប្រើប្រាស់ ។ នៅខែធ្នូ ឆ្នាំ២០២៤ តុលាការឧទ្ធរណ៍នៅទីក្រុងវ៉ាស៊ីនតោន បានច្រានចោលការអះអាងរបស់ TikTok ដែលថា ការហាមឃាត់របស់អាមេរិកពុំស្របតាមរដ្ឋធម្មនុញ្ញ ។

ចុងក្រោយ TikTok ក៏បានស្នើឱ្យលោក Trump ជាអ្នកសម្រេចចិត្តរឿងនេះ ។ កន្លងមក CEO របស់ TikTok បានជួបលោក Trump នៅរីសតម៉ាអាឡាកូ រដ្ឋផ្លរីដា ហើយគេសន្និដ្ឋានថា ការជួបគ្នានេះ គឺ TikTok សុំឱ្យលោក Trump ឈប់ហាមឃាត់ការប្រើប្រាស់ ៕

មនុស្សរស់នៅក្នុងភូមិមួយនេះ ៩៩% គឺផឹកកូកាជំនួសទឹកតាំងពីកើតមករហូតដល់ធំដឹងក្តី ដែលបណ្តាលឱ្យពួកគេប្រឈមនឹងជំងឺគ្រោះ.ថ្នាក់ជាច្រើន។ យើងដឹងហើយថាកូកាគឺជាភេសជ្ជៈដែលសម្បូរទៅដោយជាតិស្ករបើផឹកច្រើនដងក្នុងមួយថ្ងៃ ច្បាស់ណាស់វានឹងបណ្តាលឱ្យខូចសុខភាព ឬកើតជំងឺទឹកនោមផ្អែមជាដើម។ ទោះបីជាយ៉ាងនេះក្តីមនុស្សក្នុងភូមិមួយនេះនៅតែបន្តផឹកកូកាកូឡាឥតឈប់ឈរ មិនថាញ៉ាំអ្វី ធ្វើអ្វី ឬទៅណាមកណានោះទេ ពួកគេតែងតែផឹកកូកាជំនួសទឹកជានិច្ច ត្រូវបានគេចាត់ទុកថា ជាភូមិដ៏ចម្លែកបំផុតមួយក្នុងលោក។

ភូមិ San Cristóbal de las Casas ដែលស្ថិតនៅភាគខាងត្បូងប្រទេសម៉ិកស៊ិកមានប្រជាជនប្រមាណ ១៨៦,០០០ នាក់សុទ្ធតែផឹកកូកាជាង ២ លីត្រក្នុងមួយថ្ងៃ ឬប្រហែល ៨០០ លីត្រក្នុងមួយឆ្នាំ ដែលនេះខ្ពស់ជាងចំនួនមធ្យមជាតិ ១៥០ លីត្រក្នុងម្នាក់ក្នុងមួយឆ្នាំ ៥ ដងទៅទៀត។ ហេតុដូច្នេះមនុស្សជាច្រើននៅទីនេះសុទ្ធតែប្រឈមនឹងជំងឺធាត់ ជំងឺបេះដូង រួមជាមួយជំងឺទឹកនោមផ្អែមគ្រប់ៗគ្នា ដែលធ្វើឱ្យអត្រានៃការស្លាប់របស់ប្រជាជនភូមិនេះកើនឡើងខ្ពស់ជាងភូមិដទៃ។

មូលហេតុចម្បងនៃបញ្ហានេះគឺដោយសារទស្សនៈរបស់អ្នករស់នៅភូមិ las Casas ជឿថាការផឹកកូកាជួយឱ្យពួកគេមានសុខភាពល្អ និងចម្រុងចម្រើន ដែលទស្សនៈនេះគឺខុសពីហេតុផលវិទ្យាសាស្ត្រ និងវេជ្ជសាស្ត្រ ដោយសារជំនឿសាសនាដ៏ងប់ងល់របស់ពួកគេ។ Maria Lopez ដែលជាអ្នកជឿសាសនាចម្លែកនេះបាននិយាយថា “ជំងឺទឹកនោមផ្អែមគឺបណ្តាលមកពីកំហឹង និងបញ្ហាក្នុងគ្រួសារ។ ពេលយើងជេរគ្នាទៅវិញទៅមក ពេលដែលយើងស្រែកដាក់គ្នា វានឹងក្លាយទៅជាជំងឺទឹកនោមផ្អែម”។

សម្រាប់ហេតុផលទីពីរគឺថា ភូមិ San Cristóbal de las Casas ជាភូមិក្រីក្រមិនសូវមានទឹកស្អាតប្រើប្រាស់គ្រប់គ្រាន់នោះទេ។ ជាមួយនឹងការកើនឡើងចំនួនប្រជាជន ទឹកស្អាតដែលមានសុវត្ថិភាពកាន់តែខ្វះខាតនៅក្នុងទីក្រុង ដែលមានសង្កាត់មួយចំនួនមានទឹកប្រើប្រាស់តែពីរបីដងក្នុងមួយសប្តាហ៍ប៉ុណ្ណោះ។ ដូច្នេះអ្នកស្រុកជាច្រើនក៏ផឹកកូកាកូឡាជំនួសទឹកតែម្តង ដែលភេសជ្ជៈទាំងនេះផលិតដោយរោងចក្រក្នុងស្រុកត្រូវបានគ្រប់គ្រងដោយ Femsa ដែលជាក្រុមហ៊ុនអាហារ និងភេសជ្ជៈដែលជាម្ចាស់កម្មសិទ្ធិក្នុងការលក់កូកា-កូឡា នៅទូទាំងអាមេរិកឡាទីន។

ភេសជ្ជៈអាចរកបានងាយស្រួលជាងទឹកបរិសុទ្ធ ហើយតម្លៃក៏ថោកជាងផងដែរ។ ដូច្នេះមកដល់បច្ចុប្បន្នប្រជាជនក្នុងភូមិមួយនេះមិនថាកុមារ ឬមនុស្សចាស់នោះទេ នៅតែបន្តផឹកភេសជ្ជៈកូកាកូឡាដដែល ទោះបីជាអ្នកវិទ្យាសាស្ត្រ និងវេជ្ជសាស្ត្រព្យាយាមដាស់តឿន និងនិយាយពីផលប៉ះពាល់ដល់សុខភាពក៏ដោយ ក៏ពួកគេនៅតែបន្តផឹកភេសជ្ជៈជាតិស្ករហូតមកដល់ពេលនេះ៕