ប្រទេសដាណឺម៉ាក ៖ រដ្ឋាភិបាលដាណឺម៉ាកបានបញ្ជាឱ្យបង្កើនថវិកាផ្នែកការពារជាតិយ៉ាងច្រើនសម្រាប់កោះហ្គ្រីនឡែន (Greenland) ក្រោយពីប្រធានាធិបតីអាមេរិកថ្មី លោក Donald Trump និយាយពីបំណងប្រាថ្នាចង់ទិញកោះនេះឱ្យក្លាយជាទឹកដីអាមេរិក ។ រដ្ឋាភិបាលដាណឺម៉ាកបញ្ជាក់ថា នឹងពុំលក់កោះនេះទៅឱ្យអាមេរិកឡើយ ។

រដ្ឋមន្ត្រីក្រសួងការពារជាតិដាណឺម៉ាក លោក Troels Lund Poulsen និយាយថា កញ្ចប់ថវិកាចំណាយផ្នែកការពារជាតិសម្រាប់កោះហ្គ្រីនឡែន នឹងកើនឡើងទ្វេដង គឺស្មើនឹង១,៥០០លានដុល្លារអាមេរិក ។ ការបង្កើនកញ្ចប់ថវិកានេះ គឺក្រោយពីលោក Trump បាននិយាយកាលពីថ្ងៃទី២៣ ខែធ្នូ ឆ្នាំ២០២៤ ថា ការក្លាយជាម្ចាស់ និងគ្រប់គ្រងកោះដ៏ធំនេះ ចាំបាច់យ៉ាងខ្លាំងសម្រាប់អាមេរិក ។

កោះហ្គ្រីនឡែនគ្រប់គ្រងដោយប្រទេសដាណឺម៉ាក គឺជាទីតាំងកងទ័ពអវកាសដ៏ធំ និងមានសារៈសំខាន់ផ្នែកយុទ្ធសាស្ត្រសម្រាប់អាមេរិក ដោយសារកោះនេះមានចម្ងាយជិតបំផុតពីអាមេរិកខាងជើងទៅអឺរ៉ុប និងមានធនធានធម្មជាតិរ៉ែ ។ ដាណឺម៉ាកនឹងទិញនាវាសង្កេតការណ៍ថ្មី២គ្រឿង និងដ្រូន២គ្រឿង ព្រមទាំងបង្កើនភ្នាក់ងារប្រចាំការនៅទីក្រុងនុក, កែលម្អអាកាសយានដ្ឋាន៣កន្លែងរបស់កោះហ្គ្រីនឡែន សម្រាប់ការចុះចតយន្តហោះចម្បាំង ។

រដ្ឋាភិបាលដាណឺម៉ាកបានបញ្ជាឱ្យបង្កើនថវិកាផ្នែកការពារជាតិ ក្រោយពីលោក Trump សរសេរក្នុងបណ្តាញសង្គមថា ដើម្បីសន្តិសុខជាតិ និងសេរីភាពទូទាំងពិភពលោក គឺលោកចង់ឱ្យអាមេរិកគ្រប់គ្រងកោះហ្គ្រីនឡែន ។ ប៉ុន្ដែមន្ត្រីដាណឺម៉ាកបញ្ជាក់ថា យើងពុំលក់កោះនេះទេ ហើយពលរដ្ឋរស់នៅលើកោះបានសហការពាណិជ្ជកម្មជាមួយប្រទេសជិតខាង ។

អ្នកវិភាគយល់ឃើញថា ដាណឺម៉ាកបង្កើនសមត្ថភាពកងទ័ពនៅលើកោះនេះយឺតយ៉ាវណាស់ ហើយបើដាណឺម៉ាកពុំអាចការពារដែនទឹកជុំវិញកោះពីការរំលោភរបស់ចិន និងរុស្ស៊ី ធ្វើឱ្យអាមេរិកកាន់តែចង់គ្រប់គ្រងកោះនេះ ពីព្រោះលោក Trump តែងតែនិយាយថា ចង់បានកោះរបស់ដាណឺម៉ាកម្តងហើយម្តងទៀត ។

លោក Trump ជាមនុស្សឆ្លាត ដែលអាចធ្វើឱ្យរដ្ឋាភិបាលដាណឺម៉ាកផ្តល់ភាពសំខាន់លើការការពារជាតិ ។ កាលពីឆ្នាំ២០១៩ លោក Trump ធ្លាប់ណែនាំឱ្យអាមេរិកទិញកោះហ្គ្រីនឡែន ដែលមានទំហំធំបំផុតលើពិភពលោក ប៉ុន្តែនាយករដ្ឋមន្ត្រីដាណាម៉ាកសម័យនោះប្រាប់ថា វាគ្មានប្រយោជន៍ ហើយធ្វើឱ្យលោក Trump លុបចោលការធ្វើដំណើរទៅដាណឺម៉ាក ។

គួរបញ្ជាក់ថា កន្លងមក លោក Trump ចង់បានប្រទេសកាណាដាធ្វើជារដ្ឋទី៥១ របស់អាមេរិក ហើយលោកពុំមែនជាប្រធានាធិបតីអាមេរិកដំបូងគេដែលចង់ទិញកោះហ្គ្រីនឡែនរបស់ដាណឺម៉ាកទេ គឺអាមេរិកចង់បានកោះនេះដំបូងនៅឆ្នាំ១៨៦០ ពេលស្ថិតក្រោមការដឹកនាំរបស់ប្រធានាធិបតី លោក Andrew Johnson ៕

ប្រទេសហូឡង់ ៖ កាលពីសប្តាហ៍ទី៣ ខែធ្នូ ឆ្នាំ២០២៤ ក្រុមអ្នកបុរាណវិទ្យាហូឡង់ភ្ញាក់ផ្អើលយ៉ាងខ្លាំង ក្រោយពីប្រទះឃើញឆ្អឹងសត្វតម្រៀបគ្នានៅក្រោមកម្រាលឥដ្ឋរបស់អគារចំណាស់មួយកន្លែងមានអាយុជាង៥០០ឆ្នាំ ស្ថិតនៅតំបន់ខូមដែង ប្រទេសហូឡង់ ។

ក្រុមអ្នកបុរាណវិទ្យាមកពី Heritage Alkmaar និយាយថា វាជាសំណង់ពិសេសមួយនៅក្នុងតំបន់ខូមឌែង ទីក្រុងអាល់ម៉ា ភាគខាងជើងប្រទេសហូឡង់ ។ នៅក្រោមកម្រាលឥដ្ឋផ្នែកក្រោមបំផុតរបស់អគារដែលសាងសង់នៅសតវត្សទី១៦ ពួកគេបានប្រទះឃើញឆ្អឹងគោតម្រៀបគ្នាយ៉ាងច្រើន ។

ពួកគេពុំធ្លាប់ឃើញការយកឆ្អឹងគោមកតម្រៀបគ្នានៅក្រោមកម្រាលឥដ្ឋបែបនេះទេ នៅបណ្តាប្រទេសប៉ែកអឺរ៉ុប ។ ពួកគេគិតថា ក្រុមជាងសំណង់បានយកឆ្អឹងគោមកប្រើប្រាស់ដើម្បីងាយស្រួលជួសជុលពេលវាខូចខាត ។ នេះជាគំនិតដ៏ឆ្លាតវៃរបស់ក្រុមជាងសាងសង់អគារសម័យមុន ។

អគារចាស់នេះពុំសូវល្បីល្បាញប៉ុន្មានទេ ប៉ុន្តែអ្វីគួរឱ្យភ្ញាក់ផ្អើលបំផុតនោះ គឺកម្រាលឥដ្ឋមួយចំនួនបានបាត់ ហើយត្រូវជំនួសវិញដោយឆ្អឹងសត្វ ។ ការក្រាលឆ្អឹងសត្វបែបនេះគ្មាននៅកន្លែងផ្សេងទេ គឺមានតែភាគខាងជើងប្រទេសហូឡង់ ប៉ុណ្ណោះ ។ នេះបើតាមការផ្សព្វផ្សាយក្នុងបណ្តាញសង្គមរបស់ក្រុមអ្នកបុរាណវិទ្យា ។

អ្វីអស្ចារ្យជាងនេះ គឺឆ្អឹងគោទាំងអស់មានទំហំប៉ុនៗគ្នា ហើយត្រូវបានតម្រៀបយ៉ាងមានរបៀប ដើម្បីអាចដាក់ឆ្អឹងគោបានច្រើនបំផុត ។ ហេតុនេះ ពួកគេសន្និដ្ឋានថា ការប្រើប្រាស់ឆ្អឹងគោ គឺដោយសារក្រុមជាងសំណង់សម័យនោះចង់ឱ្យការសាងសង់មានភាពរឹងមាំ និងយូរអង្វែង ៕

អាងស្តុកទឹកនេះនៅពេលថតពីលើអាកាសឃើញថាមានរូបរាងស្រស់ស្អាតខ្លាំងណាស់ ដោយសារវាមានរាងត្រីកោណ ជាមួយទឹកពណ៌បៃតង អមដោយការតុបតែងធម្មជាតិ មើលទៅដូចជាដើមឈើណូអែល។
បឹង Dukan មើលទៅដូចជាដើមឈើណូអែលនៅពេលថតពីស្ថានីយ៍អវកាសអន្តរជាតិ ISS គឺជាអាងស្តុកទឹកសិប្បនិម្មិតមួយដែលត្រូវបានបង្កើតឡើងក្នុងឆ្នាំ ១៩៥៩ ស្ថិតនៅជិតទីក្រុង Ranya នៃតំបន់ Kurdistan ប្រទេសអ៊ីរ៉ាក់។

បឹងរាងត្រីកោណនេះមានប្រវែងរហូតដល់ ១០ គីឡូម៉ែត្រពីមូលដ្ឋានដល់កំពូល។ បឹង Dukan មានមែកតូច ជាកន្លែងដែលទំនប់នេះហូរចូលទៅក្នុងទន្លេ Little Zab។ បច្ចុប្បន្នរូបរាងដើមឈើណូអែលរបស់បឹង Dukan បានកំពុងទាក់ទាញការចាប់អារម្មណ៍យ៉ាងខ្លាំងពេញបណ្តាញសង្គម ចំពេលថ្ងៃនេះក៏ជាថ្ងៃបុណ្យណូអែលផងដែរ។ បឹង Dukan បានក្លាយជាគោលដៅទេសចរណ៍ដ៏ពេញនិយមមួយក្នុងប៉ុន្មានទសវត្សរ៍ថ្មីៗនេះ ដោយសារឆ្នេរសិប្បនិម្មិត និងការនេសាទរបស់វា។

ទោះជាយ៉ាងណាក៏ដោយ អ្នកជំនាញខ្លះបារម្ភថា សកម្មភាពទាំងនេះកំពុងគំរាមកំហែងដល់ប្រព័ន្ធអេកូឡូស៊ីចម្រុះដែលបានអភិវឌ្ឍចាប់តាំងពីការបង្កើតបឹង។ នៅក្នុងបឹង Dukan មានសត្វប្រហែល ១៨០ ប្រភេទរស់នៅរួមមានសត្វស្លាប និងត្រី។ នេះបើយោងតាមអង្គការ BirdLife International (BLI) បឹង Dukan ក៏មានប្រភេទសត្វកម្រមួយចំនួនរស់នៅផងដែរដូចជា សត្វកណ្ដុរអឺរ៉ាស៊ី (Lutra lutra) និងកូនខ្លាឆ្នូត (Hyaena hyaena) ដែលទាំងពីរប្រភេទនេះជាប្រភេទសត្វជិតផុតពូជ។

នៅជុំវិញបឹង Dukan ក៏មានកន្លែងបុរាណវិទ្យាសំខាន់ៗមួយចំនួនផងដែរ រួមទាំងល្អាង Paleolithic Hazar Merd ដែលមានអាយុកាលប្រហែល ៥០,០០០ ឆ្នាំ។ វាក៏មានបន្ទាយមួយចំនួន និងរូបចម្លាក់អាយុ ៤,០០០ ឆ្នាំជាបន្តបន្ទាប់ ដែលហៅថា ចង្កោមចម្លាក់ច្រកសមុទ្រ Ga’war ដែលមានទីតាំងនៅភ្នំ Zagros ក្បែរនោះ៕

ពស់អាណាខុនដាបៃតងដែលគេស្គាល់ថាជាពស់ថ្លាន់អាម៉ាហ្សូនគឺជាពស់រស់ធំជាងគេបំផុតក្នុងពិភពលោក។ ពួកវារស់នៅជាចម្បងក្នុងទន្លេអាម៉ាហ្សូននៅអាមេរិកខាងត្បូង ជាមួយនឹងរាងកាយដ៏ធំ និងកម្លាំងខ្លាំងមិនធម្មតារបស់វា បានធ្វើឱ្យមនុស្សជាច្រើនមានការភ័យខ្លាច។ ជាការពិតណាស់ទំហំរបស់ Green Anaconda តែងតែជាប្រធានបទដ៏គួរឱ្យភ្ញាក់ផ្អើល ដោយសារពស់ពេញវ័យអាចមានប្រវែងលើសពី ១០ ម៉ែត្រដែលស្មើនឹងកម្ពស់នៃអគារបីជាន់ រីឯទម្ងន់របស់ពួកគេវិញមានដល់ទៅ ២២៥ គីឡូក្រាម ដែលស្មើនឹងមនុស្ស ២០ នាក់រួមគ្នា។

ជាមួយនឹងរាងកាយដ៏ធំមហិមារ Green Anaconda ក៏មានចរិតលក្ខណៈកាចសាហាវផងដែរ។ ពួកគេមានសមត្ថភាពលេបដ៏គួរឱ្យចាប់អារម្មណ៍ ជាមួយនឹងជំនាញរុំ ដោយប្រើកម្លាំងបង្វិលដើម្បីកំទេចឆ្អឹងរបស់សត្វផ្សេងទៀតបានយ៉ាងងាយ ហើយថ្គាមរបស់ Anaconda អាចបើកបានដល់ទៅ ១៨០ ដឺក្រេ អមដោយធ្មេញមុតស្រួចចំនួន ៤ ជួរដែលដុះនៅខាងក្នុងធ្វើឱ្យពួកគេប្រមាញ់ចំណីដោយជោគជ័យត្រឹមតែប៉ុន្មានវិនាទីប៉ុណ្ណោះ។ លើសពីនេះស្បែករបស់វា ក៏ជួយអាណាខុនដាមិនត្រឹមតែផ្លាស់ទីបានយ៉ាងងាយស្រួលប៉ុណ្ណោះទេ ថែមទាំងការពារការរងរបួសអំឡុងពេលប្រឈមមុខជាមួយសត្វព្រៃ ឬសត្រូវផងដែរ។

អាណាខុនដាពណ៌បៃតងគឺជាសត្វមួយក្នុងចំណោមសត្វដែលគ្រប់គ្រងខ្សែសង្វាក់អាហារនៅក្នុងព្រៃអាម៉ាហ្សូន។ ពួកគេស៊ីសត្វជាច្រើនប្រភេទ ចាប់ពីសត្វស្លាប និងអណ្តើក រហូតដល់ថនិកសត្វធំៗ។ អាណាខុនដាពណ៌បៃតងបង្កប់នូវទេវកថានៃព្រៃអាម៉ាហ្សូន ទាំងអាថ៌កំបាំង និងគួរឱ្យខ្លាច។ ជាមួយនឹងទំហំដ៏ធំរបស់ពួកគេ ជំនាញបរបាញ់ដ៏ល្អឥតខ្ចោះ និងសមត្ថភាពក្នុងការរស់រានមានជីវិតនៅក្នុងបរិយាកាសដ៏អាក្រក់ ពួកគេបានទទួលងារជា “ស្តេចនៃព្រៃទឹកភ្លៀង”។ នៅក្នុងក្រសែភ្នែករបស់មនុស្សជាច្រើន Anaconda មិនត្រឹមតែជាសត្វកាចសាហាវប៉ុណ្ណោះទេ ប៉ុន្តែក៏ជានិមិត្តរូបនៃគ្រោះថ្នាក់ និងអំណាចនៃធម្មជាតិព្រៃផងដែរ។

ទោះជាយ៉ាងណាក៏ដោយ Green Anaconda មិនអាចយកឈ្នះគូប្រជែងដ៏គួរឱ្យខ្លាចបំផុតមួយរបស់ពួកគេបានឡើយគឺ Black Caiman ដែលជាប្រភេទសត្វក្រពើដ៏ធំបំផុតនៅអាមេរិកខាងត្បូង។ ក្រពើនេះមានប្រវែងជាង ២ ម៉ែត្រ និងទម្ងន់ជាង ៤៥០ គីឡូក្រាម មានកម្លាំងខាំខ្លាំង និងសមត្ថភាពប្រម៉ាញ់ដ៏អស្ចារ្យមិនគួរឱ្យជឿ ដោយវាអាចសម្លាប់អាណាខុនដាពណ៌បៃតងឱ្យស្លាប់ក្នុងរយៈពេលខ្លីបំផុត៕