សហរដ្ឋអាមេរិក ៖ កាលពីថ្ងៃទី២៦ ខែធ្នូ ឆ្នាំ២០២៤ សារព័ត៌មានបរទេសរាយការណ៍ថា ប្រធានាធិបតីអាមេរិក លោក Joe Biden បានចុះហត្ថលេខាលើច្បាប់កំណត់ឥន្ទ្រីក្បាលពណ៌ស គឺជាសត្វតំណាងជាតិជាផ្លូវការ ក្រោយពីអាមេរិកបានប្រើប្រាស់សត្វឥន្ទ្រីជានិមិត្តសញ្ញារបស់ខ្លួនអស់រយៈពេលជិត២៥០ឆ្នាំ ។

អាមេរិកបានប្រើប្រាស់ត្រារូបសត្វឥន្ទ្រីក្បាលពណ៌ស ក្នុងឯកសារផ្សេងៗតាំងពីឆ្នាំ១៧៨២ ប៉ុន្តែអាមេរិកពុំទាន់ទទួលស្គាល់វាជាសត្វតំណាងជាតិរបស់ខ្លួនទេ ។ រហូតមកដល់សប្តាហ៍ទី៣ ខែធ្នូ ឆ្នាំ២០២៤ រដ្ឋសភាអាមេរិកបានអនុម័តច្បាប់ និងបញ្ជូនទៅឱ្យលោក Joe Biden ចុះហត្ថលេខានៅថ្ងៃទី២៤ ខែធ្នូ ។

មន្ត្រីមកពីមជ្ឈមណ្ឌលសត្វឥន្ទ្រីជាតិនិយាយថា អស់រយៈពេលជិត២៥០ឆ្នាំ ដែលយើងហៅសត្វឥន្ទ្រីក្បាលពណ៌ស ជាសត្វតំណាងជាតិ ការពិត អាមេរិកពុំទាន់ទទួលស្គាល់វាជាផ្លូវការទេ ។ ប៉ុន្តែបច្ចុប្បន្ន អាមេរិកប្រកាសទទួលស្គាល់វាជាផ្លូវការ ហើយគ្មានសត្វផ្សេងទៀតស័ក្តិសមជាងវាទេ ។

ផ្ទុយទៅវិញ មតិមួយចំនួនពុំឯកភាពឱ្យអាមេរិកយកឥន្ទ្រីធ្វើជាសត្វតំណាងជាតិទេ ដោយអះអាងថា វាជាសត្វគ្មានសីលធម៌ ។ រីឯប្រទេសនានាលើពិភពលោក មើលឃើញថា សត្វឥន្ទ្រី គឺតំណាងឱ្យភាពរឹងមាំ ក្លាហាន សេរីភាព និងអមតៈ ប៉ុន្តែឥន្ទ្រីក្បាលពណ៌ស រស់នៅតែអាមេរិកខាងជើងប៉ុណ្ណោះ ។

ច្បាប់កំណត់ឱ្យឥន្ទ្រីក្បាលពណ៌ស ក្លាយជាសត្វតំណាងជាតិ គឺត្រូវបានជំរុញដោយសមាជិករដ្ឋសភាមកពីរដ្ឋមីនីសូដា ដែលរដ្ឋនេះមានឥន្ទ្រីក្បាលពណ៌ស រស់នៅយ៉ាងច្រើន ។ លើសពីនេះ វាជាសត្វស្ថិតក្រោមការការពាររបស់ច្បាប់អាមេរិក ទើបការបរបាញ់ ឬលក់សាច់ឥន្ទ្រីត្រូវបានចាត់ទុកថា ជាទង្វើខុសច្បាប់ ដោយសារវាជិតផុតពូជ ហើយចំនួនឥន្ទ្រីចាប់ផ្តើមកើនឡើងវិញនៅឆ្នាំ២០០៩ ។

គួរបញ្ជាក់ថា ច្បាប់កំណត់ឱ្យឥន្ទ្រីជាសត្វតំណាងជាតិអាមេរិក គឺស្ថិតក្នុងចំណោមសេចក្តីព្រាងច្បាប់ចំនួន៥០ ដែលប្រធានាធិបតីអាមេរិក លោក Joe Biden បានចុះហត្ថលេខាឱ្យអនុវត្តចាប់ពីថ្ងៃបុណ្យគ្រិស្តម៉ាស ឆ្នាំ២០២៤ តទៅ ៕

ប្រទេសប្រេស៊ីល ៖ កាលពីថ្ងៃទី២៥ ខែធ្នូ ឆ្នាំ២០២៤ សារព័ត៌មានបរទេសរាយការណ៍ថា ប្រេស៊ីលបានបញ្ជាឱ្យបិទការដ្ឋានសាងសង់រោងចក្ររបស់BYD ជាក្រុមហ៊ុនផលិតរថយន្តអគ្គិសនីចិនដ៏ល្បី ក្រោយពីរកឃើញថា មានកម្មករចិនជាង១៦០នាក់ រស់នៅយ៉ាងលំបាកវេទនា និងត្រូវបានក្រុមហ៊ុនសំណង់ដកហូតលិខិតឆ្លងដែន ។

ក្រុមហ៊ុនម៉ៅការសំណង់ Jinjiang Construction, Brazil បានជួលកម្មករសរុបជាង១៦០នាក់ ឱ្យធ្វើការនៅការដ្ឋានសាងសង់រោងចក្រចំនួន៤កន្លែងក្នុងទីក្រុងម៉ាសារី ខេត្តបាអៀ ភាគឦសានប្រទេសប្រេស៊ីល ។ ប៉ុន្តែកម្មករទាំងនេះត្រូវធ្វើការជាច្រើនម៉ោងលើសច្បាប់កំណត់ ហើយពេលខ្លះ ពួកគេធ្វើការច្រើនម៉ោងជាប់គ្នា៧ថ្ងៃ ។ លើសពីនេះ កម្មករស្នាក់នៅកន្លែងពុំសមរម្យ ហើយត្រូវក្រុមហ៊ុនដកហូតលិខិតឆ្លងដែន និងកាត់ប្រាក់ខែ ។

មន្ត្រីក្រសួងការងារប្រេស៊ីលដែលបានស៊ើបអង្កេតការដ្ឋានសាងសង់រោងចក្ររបស់ក្រុមហ៊ុនផលិតរថយន្តអគ្គិសនីចិន តាំងពីវិច្ឆិកា ឆ្នាំ២០២៤ និយាយថា កម្មករចំនួន១៦៣នាក់ បានធ្វើការដូចទាសករ ដោយសារក្រុមហ៊ុនពុំគោរពតាមលក្ខខណ្ឌសុវត្ថិភាពការងារ ។ មន្ត្រីក្រសួងការងារបានជួយអន្តរាគមន៍កម្មករទាំងនេះ ព្រោះពួកគេគ្មានកន្លែងសម្រាកត្រឹមត្រូវ ហើយកម្មករស្នាក់នៅ៨បន្ទប់បានប្រើបន្ទប់ទឹកចល័តរួមគ្នា ព្រមទាំងខ្វះទឹក និងក្រដាសអនាម័យ ។

លើសពីនេះ បរិវេណផ្ទះបាយតូចចង្អៀតធ្វើឱ្យចុងភៅយកអាហារមកទុកក្បែរបន្ទប់ទឹកគ្មានអនាម័យ ខណៈម្ហូបដែលចម្អិនឆ្អិនបានទុកលើឥដ្ឋ និងគ្មានការគ្របត្រឹមត្រូវ ។ កម្មករភាគច្រើនត្រូវបង្ខំឱ្យបរិភោគអាហារនៅលើគ្រែដេក រីឯក្នុងបន្ទប់ស្នាក់នៅមានសភាពកខ្វក់ខ្លាំង ។

ចំណែក BYD បញ្ជាក់ថា ក្រុមហ៊ុនបានគោរពច្បាប់ប្រេស៊ីល និងសេចក្តីថ្លៃថ្នូររបស់មនុស្ស ដោយបានបញ្ចប់កិច្ចសន្យាជាមួយក្រុមហ៊ុន Jinjiang សម្រាប់ការងារមួយចំនួនក្នុងរោងចក្រ និងបញ្ជូនកម្មករទាំងអស់ទៅស្នាក់នៅក្នុងសណ្ឋាគារ ។ ក្រៅពីនេះ ក្រុមហ៊ុននឹងស៊ើបអង្កេតលម្អិតពីការបំពេញការងាររបស់កម្មករ និងការស្នាក់នៅ ។

គួរបញ្ជាក់ថា BYD គឺមកពីពាក្យ Build Your Dreams ដែលនៅឆ្នាំ១៩៩៥ ក្រុមហ៊ុននេះបានផលិតថ្ម ប៉ុន្តែបច្ចុប្បន្ន BYD បានក្លាយជាក្រុមហ៊ុនផលិតរថយន្តអគ្គិសនីដ៏ធំបំផុតលើពិភពលោក ។ BYD បានសាងសង់រោងចក្រដំបូងនៅទីក្រុងសៅប៉ៅឡូ ប្រទេសប្រេស៊ីល ក្នុងឆ្នាំ២០១៥ ហើយកាលពីឆ្នាំ២០២៣ ក្រុមហ៊ុនក៏បានសាងសង់រោងចក្រផលិតរថយន្តអគ្គិសនីនៅប្រេស៊ីល ៕

ប្រទេសជប៉ុន៖ តាមច្បាប់ការងារមនុស្សចាស់ដែលមានអាយុ ៦០ ឆ្នាំឡើងទៅគឺគេឱ្យចូលនិវត្តន៍ហើយ ដោយឡែកប្រទេសជប៉ុនវិញនៅតែអនុញ្ញាតឱ្យមនុស្សអាយុ ៦០ ឆ្នាំឡើងទៅធ្វើការដដែល។ តើនេះដោយសារមូលហេតុអ្វី?

ជាការពិតណាស់នៅប្រទេសជប៉ុននាពេលបច្ចុប្បន្ននេះ មនុស្សចំណាស់ដែលមានអាយុលើសពី ៦០ ឡើងឈានដល់ ៨០ និង ៩០ ឆ្នាំនៅតែបន្តធ្វើការឥតឈប់ឈរដោយសារអត្រាកំណើតធ្លាក់ចុះ ខណៈមនុស្សចាស់បានកើនឡើងខ្លាំង ស្របពេលដែលប្រទេសនេះកំពុងប្រឈមមុខនឹងកង្វះកម្មករទៀត ទើបអនុញ្ញាតឱ្យមនុស្សចាស់នៅតែធ្វើការ។

យោងតាមរបាយការណ៍របស់ក្រសួងកិច្ចការផ្ទៃក្នុង និងទំនាក់ទំនងរបស់ប្រទេសជប៉ុន បានឱ្យដឹងថា បច្ចុប្បន្នប្រទេសនេះមានប្រជាជនដែលមានវ័យចំណាស់ច្រើនជាងគេលើពិភពលោក។ យោងតាមរបាយការណ៍មនុស្សដែលមានអាយុចាប់ពី ៦៥ ឆ្នាំឡើងទៅបានកើនឡើងរហូតដល់ ៣៦.២៥ លាននាក់ ស្មើនឹង ២៩% នៃចំនួនប្រជាជនសរុបទាំងអស់ ដែលនេះគឺជាអត្រាខ្ពស់បំផុតមិនធ្លាប់មាន បើធៀបនឹងប្រទេស ឬដែនដីដទៃទៀតនៅក្នុងពិភពលោក។

ទន្ទឹមនឹងនេះ មនុស្សវ័យក្មេងរាប់ពាន់នាក់មិនចាប់អារម្មណ៍ធ្វើការងារក្នុងវិស័យស៊ីវិល និងការងារបច្ចេកវិទ្យាផ្សេងៗទៀតទេ។ ដោយសារប្រាក់ឈ្នួលទាប ដូច្នេះយុវជនជាច្រើនក៏សម្រេចធ្វើការងារជា YouTubers ហើយអ្នកខ្លះទៀតជ្រើសរើសក្រុមហ៊ុនល្បីៗ ដែលឪពុកម្តាយពួកគេស្គាល់មួយចំនួនប៉ុណ្ណោះ ខណៈក្រុមហ៊ុនជាច្រើនទៀតមិនសូវមានអ្នកដាក់ពាក្យនោះទេ ទើបធ្វើឱ្យមានការខ្វះខាតកម្លាំងពលកម្ម ជាមូលហេតុដែលអនុញ្ញាតឱ្យមនុស្សចាស់នៅតែបន្តធ្វើការ។

នេះបើយោងតាមរបាយការណ៍ មនុស្សចាស់ជាច្រើននៅតែត្រូវធ្វើការ ដោយក្នុងរយៈពេល ២០ ឆ្នាំជាប់ៗគ្នា ចំនួនកម្មករវ័យចំណាស់បានកើនឡើង ដែលឈានដល់កម្រិតកំណត់ត្រា ៩.១៤ លាននាក់។ ទោះបីជាក្រុមហ៊ុនជប៉ុនជាច្រើនបានកំណត់អាយុចូលនិវត្តន៍ជាកាតព្វកិច្ចសម្រាប់អាយុ ៦០ ឆ្នាំក៏ដោយក៏រដ្ឋាភិបាលលើកទឹកចិត្តពួកគេឱ្យរក្សាបុគ្គលិកចាស់ៗដែលចង់បន្តការងារ។ ភាពបត់បែននេះជួយបិទគម្លាតរហូតដល់ទទួលបានប្រាក់សោធននិវត្តន៍នៅអាយុ ៦៥ ឆ្នាំ។ ប្រាក់បៀវត្សរ៍ និងលក្ខខណ្ឌការងារក៏ត្រូវបានកែសម្រួលផងដែរ ដើម្បីសម្រួលដល់កម្មករដែលមានវ័យចំណាស់។

លើសពីនេះហេតុផលសំខាន់ៗដែលមនុស្សវ័យចំណាស់ទាំងនេះនៅតែបន្តធ្វើការបន្ទាប់ពីការចូលនិវត្តន៍របស់ពួកគេក៏ដោយសារ ការចំណាយលើការរស់នៅខ្ពស់ ខណៈពួកគាត់ក៏មានពេលទំនេរច្រើនផងដែរ ហើយអ្នកផ្សេងទៀតក៏បាននិយាយថាពួកគាត់ចង់ចូលរួមក្នុងសង្គមជាជាងនៅផ្ទះ ដូច្នេះទើបពួកគាត់នៅតែបន្តធ្វើការទោះបីមានអាយុ ៨០ ឬ ៩០ ឆ្នាំក៏ដោយ៕

ការស្រាវជ្រាវបង្ហាញថា ការប្រើប្រាស់ TikTok នៅលើពិភពលោក បានធ្វើឱ្យប៉ះពាល់បរិស្ថាន និងបញ្ចេញកាបូនច្រើនជាងការបញ្ចេញកាបូនរបស់ប្រទេសក្រិកទាំងមូល កាលពីឆ្នាំ២០២៣ ទៅទៀត ។ លើសពីនេះ វាបានបញ្ចេញកាបូនច្រើនជាងបណ្តាញសង្គមផ្សេងៗ ដូចជា ៖ Twitter/X និង Snapchat ។

Greenly គឺជាទីប្រឹក្សាផ្នែកកាបូនដែលមានស្នាក់ការធំនៅទីក្រុងប៉ារីស ប្រទេសបារាំង បញ្ជាក់ថា ការប្រើប្រាស់បណ្តាញសង្គមធ្វើឱ្យប៉ះពាល់ដល់បរិស្ថាន ដូចជា ៖ បរិមាណកាបូនរបស់ TikTok នៅឆ្នាំ២០២៣ សម្រាប់អ្នកប្រើប្រាស់នៅអាមេរិក អង់គ្លេស និងបារាំង គឺខ្ពស់ជាងបរិមាណកាបូនរបស់ Twitter/X និង Snapchat ។

បច្ចុប្បន្ន TikTok មានអ្នកប្រើប្រាស់រហូតដល់ជាង១ពាន់លាននាក់ លើពិភពលោក ហើយការរកឃើញរបស់ Greenly បង្ហាញថា បរិមាណការបញ្ចេញកាបូនរបស់ TikTok គឺខ្ពស់ជាង Instagram បន្តិច ដែលបណ្តាលមកពីការពេញនិយមប្រើប្រាស់ TikTok ។ បើប្រៀបធៀបគ្នា គឺអ្នកប្រើ Instagram បានចំណាយពេលជាមធ្យម ស្មើនឹង៣០នាទីក្នុង១ថ្ងៃ រីឯអ្នកប្រើ TikTok បានចំណាយពេលមើលវីដេអូខ្លីជាមធ្យម រហូតដល់៤៥នាទី ។

បើគិតពីការបញ្ចេញកាបូនសរុបរបស់ TikTok ដែលមានអ្នកប្រើប្រាស់នៅទូទាំងពិភពលោក គឺវាច្រើនជាងការបញ្ចេញកាបូនរបស់ប្រទេសក្រិកកាលពីឆ្នាំ២០២៣ ទៅទៀត ។ ក្រៅពីនេះ បើវាស់ការបញ្ចេញកាបូនក្នុងរយៈពេល១នាទី ឃើញថា Youtube បានបញ្ចេញកាបូនច្រើនជាងគេ បន្ទាប់មក គឺ TikTok និង Instagram ។

កន្លងមក TikTok ធ្លាប់ប្រកាសពីគោលដៅរបស់ខ្លួន គឺបញ្ចេញកាបូនស្មើសូន្យនៅឆ្នាំ២០៣០ តាមរយៈការអនុវត្តគម្រោង Project Clover ដែលចាប់ផ្តើមដំណើរការតាំងពីឆ្នាំ២០២៣ ។ ប៉ុន្តែគេពុំដឹងថា តើ TikTok នឹងអាចសម្រេចគោលដៅកាបូនស្មើសូន្យដែរឬអត់ ខណៈការប្រើប្រាស់ TikTok កាន់តែពេញនិយមខ្លាំងឡើង ៕

ប្រទេសអង់គ្លេស ៖ ប្រទេសអង់គ្លេសបានសាកល្បងប្រើប្រាស់កាមេរ៉ាបំពាក់បច្ចេកវិទ្យា AI ដំបូងគេនៅលើពិភពលោក ដើម្បីតាមដានអ្នកបើកបរយានជំនិះទាំងអស់ ជាពិសេស អ្នកផឹកស្រវឹងហើយបើកបរ ដែលតែងតែបង្កគ្រោះថ្នា.ក់ ដល់អ្នកដទៃ ។ កាមេរ៉ានេះនឹងរាយការណ៍ប្រាប់ប៉ូលិសចរាចរណ៍នៅក្បែរបំផុត ដើម្បីបញ្ឈប់យានជំនិះ ។

ប្រព័ន្ធ Heads-Up ដ៏ទំនើបអាចតាមដានសកម្មភាពការបើកបររថយន្តតាមផ្លូវ និងការបើកបរក្នុងអំឡុងពេលស្រវឹងស្រា ឬប្រើប្រាស់ថ្នាំញៀន ។ បន្ទាប់មក វានឹងផ្តល់ដំណឹងទៅប៉ូលិសចរាចរណ៍នៅក្បែរដើម្បីបញ្ឈប់រថយន្ត និងជជែកជាមួយអ្នកបើកបរ ព្រមទាំងពិនិត្យភាពខុសប្រក្រតី ដូចជា ៖ ជាតិអាល់កុល និងថ្នាំញៀនខុសច្បាប់ ។

កាមេរ៉ានេះនឹងបង្ហាញរូបភាពការបើកបរទៅប៉ូលិសចរាចរណ៍ ហើយអ្នកបើកបរយានជំនិះពុំដឹងថា ប៉ូលិសចរាចរណ៍មើលឃើញការបើកបររបស់ខ្លួនទេ ។ ប៉ុន្តែពេលពួកគេបើកបរខុស ប៉ូលិសនឹងហៅរថយន្តឈប់នៅសងខាងផ្លូវ ។ គោលដៅនៃការប្រើប្រាស់កាមេរ៉ា AI គឺដើម្បីផ្តល់សុវត្ថិភាពដល់ពលរដ្ឋ, ឱ្យពលរដ្ឋប្រុងប្រយ័ត្នពេលបើកបរកាន់តែខ្លាំង និងកាត់បន្ថយគ្រោះថ្នាក់ចរាចរណ៍ ។

កន្លងមក ប្រទេសអង់គ្លេសបានប្រើប្រាស់កាមេរ៉ា AI ដើម្បីជួយឱ្យប៉ូលិសចរាចរណ៍ត្រួតពិនិត្យ និងចាប់ខ្លួនអ្នកចុចទូរស័ព្ទដៃពេលបើកបរ ឬពុំពាក់ខ្សែក្រវ៉ាត់ការពារ ។ អ្នកស្រវឹងហើយបើកបរបានបង្កគ្រោះថ្នាក់ចរាចរណ៍កើនឡើងរហូតដល់៦ដង ទើបប៉ូលិសសង្ឃឹមថា ប្រព័ន្ធ Heads-Up នឹងជួយការពារអាយុជីវិតពលរដ្ឋពេលធ្វើដំណើរ ។

នេះជាគំនិតល្អមួយក្នុងការយកបច្ចេកវិទ្យាថ្មីៗមកប្រើប្រាស់ ដូចជា ៖ កាមេរ៉ា AI មកជួយត្រួតពិនិត្យការធ្វើចរាចរ ដើម្បីកាត់បន្ថយចំនួនមនុស្សស្លាប់តាមផ្លូវ ។ ប្រទេសនានាបានហាមឃាត់ពលរដ្ឋកុំបើកបរយានជំនិះពេលស្រវឹង ដោយសារវាផ្តល់នូវផលប៉ះពាល់ជាច្រើន ដូចជា ៖ ធ្វើឱ្យមនុស្សស្លាប់ ឬរងរបួស និងខូចខាតទ្រព្យសម្បត្តិ ដែលអ្នកបើកបរទាំងអស់ពុំគួរមើលរំលង ។

ប្រទេសមួយចំនួនបានពិន័យជាប្រាក់ និងដាក់ពន្ធនាគារអ្នកបើកបរពេលស្រវឹង ឬព្យួរប័ណ្ណបើកបរ ឬដកប័ណ្ណបើកបរ ដើម្បីផ្តល់សុវត្ថិភាពដល់ពលរដ្ឋពេលធ្វើដំណើរតាមផ្លូវ ៕

ប្រទេសថៃ ៖ កាលពីថ្ងៃទី២៤ ខែធ្នូ ឆ្នាំ២០២៤ សារព័ត៌មានថៃរាយការណ៍ថា អាជ្ញាធរទីក្រុងបាងកក បានជូនដំណឹងឱ្យពលរដ្ឋពាក់ម៉ាស់ការពារធូលីកខ្វក់ ដោយសារទីក្រុងបាងកក មានកម្រិតធូលីកខ្វក់លើបរិយាកាសលើសស្តង់ដារ និងចាប់ផ្តើមប៉ះពាល់ដល់សុខភាពពលរដ្ឋ ។ រីឯភ្ញៀវទេសចរបរទេស ដែលមានគម្រោងធ្វើដំណើរទៅទីក្រុងនេះ គួរតែត្រួតពិនិត្យគុណភាពអាកាសធាតុជាមុន ។

ប្រទេសថៃបានចូលដល់រដូវរងា និងមានសីតុណ្ហភាពធ្លាក់ចុះក្នុងតំបន់ជាច្រើន ប៉ុន្តែពលរដ្ឋរស់នៅទីក្រុងបាងកក បានប្រឈមនឹងធូលីកខ្វក់ក្នុងរដូវរងា ។ មជ្ឈមណ្ឌលគ្រប់គ្រងគុណភាពអាកាសធាតុទីក្រុងបាងកក រាយការណ៍ថា កម្រិតធូលីកខ្វក់កាលពីថ្ងៃទី២៤ ខែធ្នូ កន្លងមក គឺលើសស្តង់ដារ ហើយតំបន់រងផលប៉ះពាល់ដោយសារធូលីកខ្វក់ខ្លាំងជាងគេ រួមមាន ៖ តំបន់ណងខេម, ធុនបុរី និងឃ្លងសាមវ៉ា ។

ចាប់ពីថ្ងៃទី២៤ ខែធ្នូ ឆ្នាំ២០២៤ រហូតដល់ថ្ងៃទី១ ខែមករា ឆ្នាំ២០២៥ ទីក្រុងបាងកក នឹងមានអាកាសធាតុមិនល្អ និងកម្រិតធូលីកខ្វក់កើនឡើង ។ ធូលីតូចៗអាចជ្រាបចូលក្នុងប្រព័ន្ធផ្លូវដង្ហើមដោយផ្ទាល់ ហើយធ្វើឱ្យប៉ះពាល់សុខភាពពលរដ្ឋរយៈពេលវែង ដូចជា ៖ ជំងឺសួត និងបេះដូង ។ ហេតុនេះ មជ្ឈមណ្ឌលគ្រប់គ្រងគុណភាពអាកាសធាតុ សូមណែនាំទៅពលរដ្ឋនៅទីក្រុងបាងកក ពាក់ម៉ាស់ការពារពេលចេញពីលំនៅឋាន ចៀសវាងធ្វើអ្វីមួយក្រោមកំដៅថ្ងៃ និងតាមដានអាកាសធាតុយ៉ាងដិតដល់ ។

ចំណែកភ្ញៀវទេសចរបរទេស ដែលមានគម្រោងធ្វើដំណើរមកទីក្រុងបាងកកក្នុងអំឡុងពេលនេះ គួរតែត្រួតពិនិត្យគុណភាពអាកាសធាតុជាមុន និងត្រៀមម៉ាសសម្រាប់ប្រើប្រាស់ បើចាំបាច់ត្រូវធ្វើដំណើរនៅកណ្តាលថ្ងៃ ។ ក្រៅពីនេះ ត្រូវចៀសវាងទៅតំបន់មានធូលីកខ្វក់ខ្លាំង ព្រោះតែកម្រិតធូលីបានកើនឡើងជាបន្តបន្ទាប់ ដើម្បីឱ្យដំណើរកម្សាន្តរបស់ភ្ញៀវទេសចរមានសុវត្ថិភាព ។

ដោយឡែក ភ្នាក់ងារបរិស្ថានបានទំនាក់ទំនងទៅស្ថាប័នពាក់ព័ន្ធឱ្យបង្កើនវិធានការរឹតបន្តឹងស្របតាមផែនការដោះស្រាយបញ្ហាធូលី ដើម្បីកាត់បន្ថយផលប៉ះពាល់សុខភាពពលរដ្ឋ និងសូមឱ្យពលរដ្ឋចូលរួមចំណែកការពារបរិស្ថាន ដូចខាងក្រោម ៖

-ជូតសម្អាតធូលីតាមលំនៅឋានឱ្យបានស្អាតកុំឱ្យវាប៉ះពាល់សុខភាព
-ឈប់ដុតសំរាម
-ដាំដើមឈើជួយស្រូបជាតិពុល និងកំទេចធូលី
-ធ្វើដំណើរតាមមធ្យោបាយដឹកជញ្ជូនសាធារណៈ
-ពន្លត់ម៉ាស៊ីនយានជំនិះពេលចត និងពិនិត្យយានជំនិះកុំឱ្យមានផ្សែងខ្មៅលើសស្តង់ដារ ៕

ទស្សនាវដ្តី VOGUE Thailand បានចេញផ្សាយអំពីម៉ូតសំលៀកបំពាក់សម្រាប់ខែធ្នូ ឆ្នាំ២០២៤ ប៉ុន្តែអ្វីដែលគួរឱ្យចាប់អារម្មណ៍ម៉ូតរដូវកាលថ្មីគឺផ្តិតរូបភាពនៅតំបន់ប្រាសាទអង្គរវត្ត ដែលជាសម្បត្តិបេតិកភណ្ឌពិភពលោករបស់ប្រទេសកម្ពុជាឃើញហើយត្រជាក់ភ្នែកតែម្តង។

ចេញផ្សាយនៅថ្ងៃទី២៣ ធ្នូ VOGUE Thailand បានធ្វើឱ្យអ្នកលេងបណ្តាញសង្គមខ្មែរមានការចាប់អារម្មណ៍ជាមួយនឹងការផ្សព្វផ្សាយប្រាសាទខ្មែរផ្សាភ្ជាប់ជាមួយនឹងវិស័យម៉ូតសម័យថ្មីដែលជាផ្នែកមួយជួយជំរុញវិស័យទេសចរណ៍ក្នុងស្រុកយើងកាន់តែទូលំទូលាយថែមមួយកម្រិតទៀត។ នៅក្នុងការចេញផ្សាយរបស់ខ្លួន VOGUE Thailand បានពិពណ៌នាថា«ការបង្ហាញរូបម៉ូតសម្លៀកបំពាក់តាមតំបន់បុរាណ «អង្គរវត្ត» ពីប្រទេសកម្ពុជាក្នុងទស្សនាវដ្តី Vogue Thailand ចេញផ្សាយខែធ្នូ ឆ្នាំ២០២៤»។

រូបភាពដែលទស្សនាវដ្តីនេះបានផ្តិតយកបង្ហាញពីទេសភាពប្រាសាទអង្គរវត្ត ប្រាសាទបាយ័ន នៅក្នុងទីវត្តអារាម ទេសភាពនៅរីសត ចម្លាក់អប្សរា ទិដ្ឋភាពការលក់ដូរនៅផ្សារចាស់ខេត្តសៀមរាប ក្មេងលក់វត្ថុអនុស្សាវរីយ៍ ផ្ទះបុរាណ ជាដើម។ ឃើញការផ្សព្វផ្សាយបែបនេះអ្នកលេងបណ្តាញសង្គមក៏បានចូលទៅបង្ហាញការស្រលាញ់និងបានសរសើរពីទឹកដៃនៃការផ្តិតរូបភាពផងដែរ។

គួរបញ្ជាក់ផងដែរថា ទស្សនាវដ្តី VOGUE Thailand គឺជាទស្សនាវដ្តីផ្សព្វផ្សាយម៉ូតអន្តរជាតិល្បីៗជាច្រើនហើយក្នុងនោះមាន Lisa , Yaya , Kimberley , Mai davikah, Mark Prin រួមទាំងតារាល្បីៗជាច្រើនទៀតសុទ្ធតែបានថតឱ្យទស្សនាវដ្តីនេះ៕

Cristiano Ronaldo គឺជាកីឡាករបាល់ទាត់ឆ្នើមដែលរកចំណូលបានច្រើនជាងគេក្នុងពិភពលោក។ វាមិនចម្លែកទេដែលកីឡាករល្បីល្បាញរូបនេះបានចំណាយលុយរាប់លានដុល្លារដើម្បីទិញរបស់ប្រណីត។ ចាប់ពីវិមានធំស្កឹមស្កៃ រថយន្តទំនើប ទូកកប៉ាល់ឯកជន ឥឡូវនេះខ្សែប្រយុទ្ធព័រទុយហ្គាល់ត្រូវបានគេដឹងថា បានចំណាយលុយប្រមាណ ៧៣ លានដុល្លារអាមេរិកដើម្បីទិញ Gulfstream G650 ដែលជាយន្តហោះឯកជនដ៏ប្រណីតមួយ។ យន្តហោះនេះស្ថិតក្នុងចំណោមយន្តហោះដែលមានល្បឿនលឿនបំផុតក្នុងពិភពលោក ដោយអាចរត់បានចម្ងាយ ១៣,៨៩០ គីឡូម៉ែត្រ។

ជាមួយកាប៊ីនធំទូលាយប្រកបដោយផាសុកភាព មានការរចនាដាច់ដោយឡែកពីគ្នា និងអាចផ្ទុកអ្នកដំណើរបានរហូតដល់ ១៩ នាក់។ យន្តហោះ Gulfstream G650 ក៏ជានិមិត្តសញ្ញាចុងក្រោយរបស់ Cristiano Ronaldo ផងដែរ។ គួររំលឹកដែរថា កាលពីឆ្នាំ ២០១៥ លោកក៏មានយន្តហោះប្រណីតមួយផងដែរគឺ Gulfstream G200 ប៉ុន្តែក៏សម្រេចចិត្តលក់ ដូច្នេះបច្ចុប្បន្នលោកមានយន្តហោះផ្ទាល់ខ្លួនតែមួយប៉ុណ្ណោះគឺ Gulfstream G650 ដែលទើបតែទិញថ្មីនេះឯង។

Ronaldo គឺជាកំពូលកីឡាករបាល់ទាត់ពិភពលោក ដែលមានអ្នកតាមដានគណនី Instagram ចំនួន ៦៤៥ លាននាក់ ដោយការបង្ហោះមួយរូប ខ្សែប្រយុទ្ធព័រទុយហ្គាល់រូបនេះរកចំណូលបានរហូតដល់ ៣.២៣ លានដុល្លារអាមេរិកឯណោះ។ ក្រៅពីរកលុយបានតាមបណ្តាញសង្គម លោកក៏ជាខ្សែប្រយុទ្ធរបស់ក្លិប Al Nassr ដោយរកចំណូលបាន ២៧៥ លានដុល្លារអាមេរិកផងដែរ។ លើសពីនេះ Ronaldo ក៏រកចំណូលបាន ៦០ លានដុល្លារពីកិច្ចសន្យាផ្សាយពាណិជ្ជកម្មជាមួយម៉ាកល្បីជាច្រើនដូចជា Nike, Herbalife, Armani, Tag Heuer, DAZN ឬ PokerStars ទៀតផង។

ទន្ទឹមនឹងនេះលោកក៏ទទួលបានជោគជ័យជាមួយនឹងម៉ាកផ្ទាល់ខ្លួនរបស់លោក CR7 ផងដែរ។ ហេតុនេះវាមិនចម្លែកទេដែលលោកមានលុយច្រើនទិញរបស់របរប្រណីតៗដូចជា វិមាន រថយន្តទំនើប ទូកកប៉ាល់ឯកជន និងយន្តហោះឯកជន Gulfstream G650។ បច្ចុប្បន្ន Cristiano Ronaldo មានទ្រពសម្បត្តិសរុបប្រមាណ ៨០០ លានដុល្លារអាមេរិក នេះបើយោងតាមគេហទំព័របរទេស Sports Illustrated៕