ទីក្រុងប៉េកាំង ៖ កិច្ចសន្ទនាក្រៅផ្លូវការមួយរវាងចិន កម្ពុជា និងថៃ ត្រូវបានរៀបចំឡើងនៅទីក្រុងប៉េកាំងដើម្បីពង្រឹងបទឈប់បា.ញ់ និងស្តារទំនុកចិត្តគ្នាទៅវិញទៅមក ព្រមទាំងសម្របសម្រួលឲ្យមានកិច្ចសហប្រតិបត្តិការនឹងគ្នាឡើងវិញ។ នេះបើតាមរបាយការណ៍ដែលចេញផ្សាយដោយ វិទ្យុមិត្តភាពកម្ពុជាចិន ( CCFR )។

តាមប្រភពខាងលើ ថ្ងៃទី១០ ខែកុម្ភៈ កិច្ចសន្ទនាក្រៅផ្លូវការចិន-កម្ពុជា-ថៃបានបើកធ្វើនៅក្រុងប៉េកាំង។ អ្នកជំនាញផ្នែកបញ្ហាអន្តរជាតិ និងវិស័យយោធា ដែលមកពីប្រទេសចិន កម្ពុជា និងថៃបានធ្វើការពិគ្រោះពិភាក្សាយ៉ាងស៊ីជម្រៅអំពីបញ្ហាថា តើត្រូវធ្វើយ៉ាងដូចម្តេចដើម្បីអនុវត្តជាក់ស្តែងនូវគំនិតឯកភាពរួម Fuxian ក៏ដូចជាជំរុញសន្តិភាពនិងការកសាងទំនុកចិត្តគ្នាទៅវិញទៅមកបន្ថែមទៀត។

ភ្ញៀវកិត្តិយសបានផ្លាស់ប្តូរមតិយោបល់អំពីបញ្ហាថា តើត្រូវធ្វើយ៉ាងណាដើម្បីប្រែក្លាគំនិតឯកភាពរួមឱ្យទៅជាកិច្ចសហប្រតិបត្តិជាក់ស្តែង។ ជាមួយគ្នានេះដែរ ក៏បានលើកសំណើមានលក្ខណៈស្ថាបនាជាច្រើនបានសម្រាប់ការដោះស្រាយជម្លោះដោយសន្តិវិធី តាមច្បាប់អន្តរជាតិ និងការអនុវត្តជាក់ស្តែងផងដែរ។

តាមរយៈការបញ្ចេញមតិរបស់ភ្ញៀវកិត្តិយស គេអាចកត់សម្គាល់ថា ភាគីទាំងពីរកម្ពុជា-ថៃមានឆន្ទៈ និងគំនិតឯកភាពរួមក្នុងការដោះស្រាយជម្លោះដោយសន្តិវិធី និងបានទទួលស្គាល់កិច្ចខិតខំប្រឹងប្រែងរបស់ចិន ជាពិសេសគឺចិនបានបង្ហាញពីទំនួលខុសត្រូវរបស់ប្រទេសធំ ក្នុងការសម្របសម្រួលឱ្យមានដំណោះស្រាយការប៉ះទង្គិច៕

ក្រុមហ៊ុន BMW ប្រឈមនឹងការខាតបង់ប្រាក់រាប់រយលានដុល្លារ បន្ទាប់ពីក្រុមហ៊ុនរកឃើញកំហុសធ្ងន់ធ្ងរដែលបង្កគ្រោះថ្នា.ក់ដល់អាយុជីវិតអ្នកបើកបរ ដោយសារកំហុសបច្ចេកទេសធ្វើឱ្យរថយន្តអាចនឹងផ្ទុះឆេះពេលបើកបរ ។ សូមរំឭកថា ប្រភេទរថយន្តដែលក្រុមហ៊ុនប្រមូលមកវិញពីប្រទេសនានា គឺផលិតចាប់ពីខែកក្កដា ឆ្នាំ២០២០ ដល់ខែកក្កដា ឆ្នាំ២០២២ មានបញ្ហាសិចរិចរិលប្រព័ន្ធម៉ាញ៉េទិក រីឯកម្ពុជាមិនទាន់មានទិន្នន័យជាក់ស្តែងពីការប្រមូលបានរថយន្ត BMW នៅឡើយទេ ។

អ្នកប្រើប្រាស់រថយន្តអាល្លឺម៉ង់ BMW កំពុងប្រឈមនឹងគ្រោះថ្នា.ក់បណ្តាលមកពីរថយន្តផ្ទុះឆេះ! ពេលនេះ ក្រុមហ៊ុនបានរកឃើញរថយន្តរហូតដល់ជិត៦០ម៉ឺនគ្រឿងមានបញ្ហាប្រព័ន្ធបញ្ឆេះម៉ាស៊ីនរថយន្ត ដែលអាចបណ្តាលផ្ទុះឆេះពេលបើកបរ និងប្រកាសប្រមូលរថយន្តពីអតិថិជននៅជុំវិញពិភពលោកជាបន្ទាន់ ។

ក្រុមហ៊ុនផលិតរថយន្តអាល្លឺម៉ង់ដ៏ល្បី BMW បានប្រកាសប្រមូលរថយន្តជិត៦០ម៉ឺនគ្រឿងពីអតិថិជននៅប្រទេសនានា បន្ទាប់ពីរកឃើញភាពខុសប្រក្រតីក្នុងប្រព័ន្ធម៉ាញ៉េទិកសម្រាប់បញ្ឆេះម៉ាស៊ីនរថយន្ត ដែលអាចបណ្តាលឱ្យអតិថិជនមានគ្រោះថ្នា.ក់ពេលបើកបរដោយសាររថយន្តផ្ទុះឆេះ ។ នេះបើតាមការផ្សព្វផ្សាយរបស់សារព័ត៌មានបរទេសនៅថ្ងៃទី១២ ខែកុម្ភៈ ឆ្នាំ២០២៦ ។

អ្នកនាំពាក្យក្រុមហ៊ុនផលិតរថយន្តអាល្លឺម៉ង់ BMW ប្រកាសកាលពីថ្ងៃទី១១ ខែកុម្ភៈ ថា ក្រុមហ៊ុនកំពុងតែប្រមូលរថយន្តពីអតិថិជនវិញរហូតដល់ជិត៦០ម៉ឺនគ្រឿង ដោយសារបារម្ភពីអ្នកបើកបរគ្មានសុវត្ថិភាពបណ្តាលពីរថយន្តផ្ទុះឆេះ ។ តាមការចុះផ្សាយរបស់សារព័ត៌មានអាល្លឺម៉ង់ kfz-betrieb គឺរថយន្តមានបញ្ហាប្រព័ន្ធបញ្ឆេះ ដែលក្រុមហ៊ុន BMW បានលក់ឱ្យអតិថិជនជុំវិញពិភពលោក ស្មើនឹង៥៧ម៉ឺន ៥ពាន់គ្រឿង (៥៧៥,០០០គ្រឿង) ។

អតិថិជនបានជូនដំណឹងមកកាន់ក្រុមហ៊ុនពីរថយន្ត BMW ចំនួន១៦ប្រភេទ ដែលបំពាក់ប្រព័ន្ធបញ្ឆេះរថយន្ត ផលិតចាប់ពីខែកក្កដា ឆ្នាំ២០២០ រហូតដល់ខែកក្កដា ឆ្នាំ២០២២ គឺមានបញ្ហាដោយសារប្រព័ន្ធម៉ាញេទិកសឹករិចរិល ។ ក្រុមហ៊ុនបានណែនាំឱ្យអតិថិជនយកចិត្តទុកដាក់ក្នុងការថែទាំរថយន្តក្រោយបើកបរផ្លូវឆ្ងាយ រីឯប្រព័ន្ធបញ្ឆេះម៉ាស៊ីនរថយន្តអាចខូចបណ្តាលឱ្យវាក្តៅខ្លាំងឈានទៅផ្ទុះឆេះពេលបើកបរ ហើយក្រុមហ៊ុននឹងផ្ញើលិខិតជូនដំណឹងទៅអតិថិជនពីការផ្លាស់ប្តូរប្រព័ន្ធបញ្ឆេះ ។

កាលពីឆ្នាំ២០២៤ ក្រុមហ៊ុន BMW បានកាត់បន្ថយការផលិតរថយន្តរបស់ខ្លួន ដោយសារក្រុមហ៊ុនប្រមូលរថយន្តខូចហ្វ្រាំងពីអតិថិជនវិញ រហូតដល់១លាន ៥សែនគ្រឿង បណ្តាលឱ្យក្រុមហ៊ុនខាតបង់ប្រាក់រាប់រយលានដុល្លារនាពេលនោះ ។ រីឯការប្រមូលរថយន្តពីអតិថិជនលើកនេះ ​ក្រុមហ៊ុនប្រឈមនឹង​ការខាតបង់ប្រាក់រាប់រយលានដុល្លារដូចគ្នា ៕

ការផ្ទុះមីនលើទឹកដីថៃបានកើតឡើងម្តងហើយម្តងទៀត ជាពិសេស ពេលស្ថានការណ៍ព្រំដែនកម្ពុជា-ថៃស្ងប់ស្ងាត់ ឬទើបបញ្ចប់កិច្ចប្រជុំចរចាពីព្រំដែនកម្ពុជា-ថៃ ស្រាប់តែភាគីថៃផ្សាយបំភ្លៃថា កងទ័ពខ្លួនជាន់មីនដើម្បីទម្លាក់កំហុសលើកម្ពុជា និងធ្វើឱ្យស្ថានការណ៍តានតឹង ។ ការផ្ទុះមីនលើកនេះក៏ដូចរាល់ដងដែរ ពេលពលរដ្ឋថៃធ្វើបាតុកម្មប្រឆាំងលទ្ធផលបោះឆ្នោតស្ទើរពេញប្រទេស ក៏មានកងទ័ពថៃជាន់មីន តើអ្វីនៅខាងក្រោយវាំងននខ្មៅនេះ?

កងទ័ពថៃបានដើរជាន់មីនរងរបួសធ្ងន់ម្នាក់ និងស្រាល២នាក់ នៅព្រំដែនស្រុកកាន់ថាឡាក់ ខេត្តស៊ីសាកេត កាលពីថ្ងៃទី១១ ខែកុម្ភៈ ឆ្នាំ២០២៦ ដែលហេតុការណ៍នេះកើតឡើងបន្ទាប់ពីស្ងប់ស្ងាប់មួយរយៈក្នុងពេលប្រទេសថៃរៀបចំការបោះឆ្នោត ។ ពេលនេះ ការបោះឆ្នោតរួចរាល់ ហើយលទ្ធផលបោះឆ្នោតបង្ហាញថា គណបក្សភូមិចៃថៃរបស់លោក Anutin Charnvirakul ឈ្នះឆ្នោតដោយការបន្លំសន្លឹកឆ្នោត គ្មានតម្លាភាព ធ្វើឱ្យពលរដ្ឋតាមបណ្តាខេត្តធ្វើបាតុកម្មប្រឆាំងលទ្ធផលបោះឆ្នោត ក៏មានហេតុការណ៍ផ្ទុះមីនឡើងវិញ ។

កងទ័ពថៃភូមិភាគទី២ បានជូនដំណឹងពីកងទ័ពថៃ ចំនួន៣នាក់ ជាន់មីននៅព្រំដែនស្រុកកាន់ថាឡាក់ ខេត្តស៊ីសាកេត កាលពីថ្ងៃទី១១ ខែកុម្ភៈ នាវេលាម៉ោងខុសគ្នា ក្នុងនោះរងរបួសធ្ងន់ម្នាក់ និងស្រាល២នាក់ ហើយកងទ័ពថៃភូមិភាគទី២ ចោទប្រកាន់ថា គ្រាប់មីននេះបន្សល់ពីសង្គ្រាមកម្ពុជា-ថៃ កន្លងមក ។

កាលពីវេលាម៉ោង៤ និង៤០នាទីល្ងាច ថ្ងៃទី១១ ខែកុម្ភៈ កងទ័ពថៃម្នាក់មកពីកងពលថ្មើរជើង លេខ១៣២ បានដើរជាន់មីនបណ្តាលឱ្យរងរបួសធ្ងន់ដាច់ជើងឆ្វេង ក្នុងពេលកំពុងត្រួតពិនិត្យតំបន់ភូមិសាស្ត្រ ។ បន្ទាប់មក នាវេលាម៉ោង៥ និង៣០នាទី (ថ្ងៃដដែល) កងទ័ពថៃ២នាក់ទៀតបានដើរជាន់មីនដែរ ប៉ុន្តែរងរបួសស្រាល ដែលកងទ័ពទាំង២នាក់នេះមកពីកងវរសេនាតូចថ្មើជើង លេខ១៣ ។

ក្រោយកើតហេតុ កងទ័ពទាំង៣នាក់បានទទួលការជួយសង្គ្រោះបឋម និងបញ្ជូនទៅសង្គ្រោះមន្ទីរពេទ្យភ្លាមៗ ។ កងទ័ពភូមិភាគទី២ បានស្នើសុំឱ្យមន្ត្រីស្ថាប័នពាក់ព័ន្ធចុះមកត្រួតពិនិត្យយ៉ាងលម្អិតនៅកន្លែងកើតហេតុដើម្បីកុំឱ្យកងទ័ពដើរជាន់មីនទៀត ព្រមទាំងទំនាក់ទំនងទៅក្រុមដោះមីនមកបោសសម្អាតមីននៅជុំវិញកន្លែងកើតហេតុ ។

គួរបញ្ជាក់ថា កងទ័ពថៃដើរជាន់មីនផ្ទុះរងរបួសធ្ងន់-ស្រាល ស្របពេលពលរដ្ឋថៃនៅខេត្តឈុនបុរី មហាសារ៉ាខាម ប៉ាធុមថានី សុផាន់បុរី និងស្រះបុរី បានធ្វើបាតុកម្មប្រឆាំងលទ្ធផលបោះឆ្នោត ដោយសារគ្មានភាពសេរី ត្រឹមត្រូវ និងយុត្តិធម៌ រួមមាន ៖ ការកេងបន្លំសន្លឹកឆ្នោត, រាប់សន្លឹកឆ្នោតគ្មានតម្លាភាព, ហិបឆ្នោតបិទមិនជិត, សន្លឹកឆ្នោតក្នុងហិបច្រើនជាងចំនួនពលរដ្ឋពិតប្រាកដ និងមន្ត្រីមណ្ឌលមិនអនុញ្ញាតឱ្យពលរដ្ឋចូលក្បែរហិបឆ្នោត ដែលភាពមិនប្រក្រតីទាំងនេះធ្វើឱ្យគណបក្សភូមិចៃថៃរបស់លោក Anutin ទទួលបានផលប្រយោជន៍ ។

រហូតមកដល់ថ្ងៃទី១១ ខែកុម្ភៈ ការធ្វើបាតុកម្មប្រឆាំងលទ្ធផលបោះឆ្នោតកាន់តែខ្លាំងក្លាឡើងនៅតាមបណ្តាខេត្តទាំងនេះ ខណៈគណៈកម្មាធិការរៀបចំការបោះឆ្នោតមិនព្រមរាប់សន្លឹកឆ្នោតឡើងវិញក្រោមហេតុផលខុសច្បាប់ ថែមទាំងប្តឹងអ្នកមកចូលរួមតវ៉ាទៀតផង ។ រីឯលោក Anutin ដែលត្រៀមបន្តអំណាចនិយាយថា ការរាប់សន្លឹកឆ្នោតជាថ្មី គឺជាសិទ្ធិរបស់គណៈកម្មាធិការរៀបចំការបោះឆ្នោត លោកនឹងរង់ចាំការប្រកាសលទ្ធផលបោះឆ្នោតជាផ្លូវការ ទើបបង្កើតរដ្ឋាភិបាលថ្មី ៕

នៅសល់ពេលមិនច្រើនទៀតទេ! បើយោងតាមកំណត់ត្រាមួយដែលជាការព្យាករណ៍របស់បិតារូបវិទ្យាសម័យទំនើប លោក អ៊ីសាក់ ញូវតុន បានបង្ហាញថា ទីបញ្ចប់នៃពិភពលោកដែលមនុស្សកំពុងរស់នៅសព្វថ្ងៃនេះ នឹងមកដល់នៅឆ្នាំ 2060 ខាងមុខ។ នេះបើតាមការចេញផ្សាយដោយគេហទំព័រ Hashem Al-Ghaili នាពេលថ្មីៗនេះ។

ផ្អែកទៅលើខ្លឹមសារដែលបានដកស្រង់ចេញពីសៀវភៅកំណត់ត្រាឯកជនមួយរបស់លោក អ៊ីសាក់ ញូវតុន ដែលបានព្យាករទុកតាំងពីឆ្នាំ 1704 បានឲ្យដឹងថា ដោយអនុវត្តតក្កវិជ្ជាដ៏ម៉ត់ចត់ ដែលគាត់បានប្រើសម្រាប់សិក្សាពីទំនាញផែនដី និងការគណនា លោក ញូវតុន ទាញបានការគណនាមួយដែលចង្អុលបង្ហាញថា ឆ្នាំ 2060 គឺជាចំណុចរបត់ដ៏ធំសម្រាប់មនុស្សជាតិ។

តាមរយៈការសន្និដ្ឋានរបស់អ្នកប្រាជ្ញរូបនេះ 1,260 ឆ្នាំបន្ទាប់ពីការកើនឡើងនៃចក្រភពរ៉ូមដ៏បរិសុទ្ធនៅឆ្នាំ 800 នៃគ.ស. សណ្តាប់ធ្នាប់ពិភពលោកបច្ចុប្បន្ននឹងឈានដល់ទីបញ្ចប់ ដោយនាំមកនូវយុគសម័យថ្មីមានការញាំញីទៅដោយជម្លោះឥតឈប់ឈរ និងគ្រោះមហន្តរាយធម្មជាតិ ដែលសុទ្ធតែបង្កឡើងដោយស្នាដៃមនុស្សខ្លួនឯង ។

នៅឆ្នាំ 2026 ពោលគឺនៅពេលដែលឆ្នាំ 2060 ខិតជិតមកដល់ ការគណនារបស់ អ៊ីសាក់ ញូវតុន មិនមែនត្រឹមតែជាការព្យាករណ៍បែបវិទ្យាសាស្ត្រប៉ុណ្ណោះទេ ប៉ុន្តែជាការមើលឃើញដ៏គួរឱ្យចាប់អារម្មណ៍មួយចូលទៅក្នុងចិត្តរបស់អ្នកប្រាជ្ញដ៏មានទេពកោសល្យម្នាក់ ដែលព្យាយាមភ្ជាប់គម្លាតរវាងភាពប្រាកដប្រជាខាងគណិតវិទ្យា ទៅនឹងការវិវត្តន៍នៃយុគសម័យរបស់មនុស្សលោក ។

ទោះបីជាយ៉ាងណាក៏ដោយ នេះគ្រាន់តែជាការព្យាកររបស់លោក ញូវតុន ប៉ុណ្ណោះ ហើយចំពោះភាពពិតជាក់ស្ដែងយ៉ាងណាយើងមានតែរង់ចាំមើលទាំងអស់គ្នា។ តួយ៉ាងដូចជាទំនាយរបស់គ្រូទាយពិករភ្នែកដ៏ល្បី លោកយាយ Baba Vanga ដែលទំនាយរបស់គាត់ខ្លះ បានក្លាយជាការពិតមែន ប៉ុន្តែមិនមែនគ្រប់គ្នាត្រូវតែជឿនោះទេ ព្រោះអ្វីៗសុទ្ធតែមើលមិនឃើញ ហើយវាអាស្រ័យលើហេតុនិងផល៕