នៅក្នុងប្រទេសជប៉ុន មានកោះមួយចម្លែកខុសគេ ឈ្មោះ Okinoshima មិនអនុញ្ញាតឱ្យមនុស្សស្រីចូលនោះទេ តាំងពីសតវត្សទី១៧។

កោះ Okinoshima មានទីតាំងស្ថិតនៅ ឆ្នេរសមុទ្រ Munakata ក្នុងទីក្រុង Fukuoka។ ឆ្នេរនេះ ជាទីសក្ការៈសាសនាបុរាណមួយ ដែលត្រូវបានដាក់បញ្ចូលក្នុងបញ្ជីតំបន់បេតិកភណ្ឌពិភពលោក។

ជារៀងរាល់ឆ្នាំ កោះនេះអនុញ្ញាតឱ្យភ្ញៀវទេសចរចូលកម្សាន្តតែ ២០០នាក់ប៉ុណ្ណោះ ដោយក្នុងនោះចូលបានតែប្រុសៗប៉ុណ្ណោះ។

មុននឹងឈានជើងឡើងលើកោះនេះ បុរសៗត្រូវតែស្រាតសម្លៀកបំពាក់ និងមុជទឹកសម្អាតកាយបែបសាសនាជាមុនសិន។

បន្ថែមពីនេះ ភ្ញៀវទេសចរបានចូលទៅកោះនោះ មិនអនុញ្ញាតឱ្យនិយាយពាក្យអ្វីដែលបានឃើញ ឬឮនៅកោះនេះ ទៅប្រាប់អ្នកផ្សេងបាននោះទេ។

ចំពោះការហាមឃាត់ស្ត្រីមកទស្សនានៅលើកោះនេះ ក៏ព្រោះតែប្រជាជនជប៉ុនពីបុរាណមានជំនឿលើព្រះ Shinto ដែលមានឈាមរដូវមិនបរិសុទ្ធ៕

ប្រទេសជប៉ុន៖ Kansai ដែលជាអាកាសយានដ្ឋានអន្តរជាតិដ៏ល្បីល្បាញមួយរបស់ពិភពលោក មានទីតាំងនៅលើកោះសិប្បនិមិត្តក្នុងទីក្រុង Osaka Bay ប្រទេសជប៉ុន ត្រូវបានអ្នកជំនាញព្យាករណ៍ថា អាចនឹងលិចចូលទៅក្នុងមហាសមុទ្រនៅឆ្នាំ ២០៦៧ ដោយសារមូលហេតុទាំងនេះ។

អាកាសយានដ្ឋាន Kansai គឺជាអាកាសយានដ្ឋានដំបូងគេរបស់ពិភពលោកដែលត្រូវបានសាងសង់ទាំងស្រុងនៅលើកោះសិប្បនិម្មិតក្នុងឆ្នាំ ១៩៩៤ និងជាអាកាសយានដ្ឋានធំជាងគេទីពីររបស់ជប៉ុន។

អាកាសយានដ្ឋាននេះបានក្លាយជាចំណុចសំខាន់នៃឧស្សាហកម្មវិស្វកម្មសំណង់ ដោយអាចដោះស្រាយបញ្ហានៃការផ្ទុកលើសទម្ងន់ និងការលើកកម្ពស់ពាណិជ្ជកម្មអន្តរជាតិសម្រាប់តំបន់ Kansai ។ អាកាសយានដ្ឋាន Kansai ក៏បានដើរតួនាទីយ៉ាងសំខាន់នៅក្នុងប្រព័ន្ធអាកាសចរណ៍របស់ជប៉ុន ដែលមានអ្នកដំណើរជាង ២០ លាននាក់ក្នុងមួយឆ្នាំ និងជាច្រកផ្លូវដ៏សំខាន់តភ្ជាប់ទីក្រុង Osaka ជាមួយពិភពលោកផងដែរ។

ទោះជាយ៉ាងណា បន្ទាប់ពីប្រតិបត្តិការអស់រយៈពេល ៣ ទសវត្សរ៍ អាកាសយានដ្ឋាន Kansai កំពុងប្រឈមមុខនឹងបញ្ហាធ្ងន់ធ្ងរមួយ គឺវាបានលិចចូលទៅក្នុងសមុទ្របន្តិចម្តងៗលឿនជាងការរំពឹងទុកទៅទៀត។ ដោយសារអាកាសធាតុប្រែប្រួល រួមទាំងគ្រោះធម្មជាតិ បានធ្វើឱ្យបញ្ហាដីនៅកោះសិប្បនិមិត្តមួយនេះស្រុតយ៉ាងខ្លាំង។ ក្នុងឆ្នាំ ២០១៨ ព្យុះទីហ្វុង Jebi បានវាយប្រហារតំបន់ Kansai បណ្តាលឱ្យមានទឹកជំនន់យ៉ាងធ្ងន់ធ្ងរ និងបណ្តាលឱ្យអាកាសយានដ្ឋានត្រូវបិទជាបណ្តោះអាសន្ន ដែលរំខានដល់ការធ្វើដំណើររបស់អ្នកដំណើររាប់ពាន់នាក់។ បាតុភូតដូចជារញ្ជួយដី និងរលកយក្សស៊ូណាមិ ក៏ជាការគម្រាមកំហែងឥតឈប់ឈរ ដែលបង្ខំឱ្យអាកាសយានដ្ឋានស្រុតទៅក្នុងមហាសមុទ្រក្នុងរយៈពេលដ៏ខ្លី។

ដំបូងឡើយអ្នករចនាបានព្យាករណ៍ថា កោះសិប្បនិម្មិតនេះនឹងលិចប្រហែល ៥.៧ ម៉ែត្រប៉ុណ្ណោះក្នុងរយៈពេល ៥០ ឆ្នាំខាងមុខ។ ប៉ុន្តែបន្ទាប់ពីប្រតិបត្តិការបានត្រឹមតែ ៧ ឆ្នាំ កម្រិតបាក់ស្រុតបានលើសពីតួលេខនេះឡើងដល់ជាង ១១.៥ ម៉ែត្រ ដែលបង្ខំឱ្យរដ្ឋាភិបាលចំណាយប្រាក់រាប់ពាន់លានដុល្លារដើម្បីពង្រឹងផ្លូវបំបែក និងធ្វើឱ្យប្រសើរឡើងនូវគ្រឹះ។ ទោះបីជាយ៉ាងនេះក្តីបញ្ហាអាកាសធាតុនៅតែបន្តគម្រាមកំហែងឥតឈប់ឈរ ធ្វើឱ្យអ្នកជំនាញព្យាករណ៍ថា អាកាសយានដ្ឋានដ៏ល្បីល្បាញមួយនេះទំនងនឹងលិចចូលទៅក្នុងសមុទ្រនាពេលអនាគតដ៏ខ្លី៕

ប្រទេសកូរ៉េខាងត្បូង ៖ ប្រទេសកូរ៉េខាងត្បូងនឹងអនុវត្តច្បាប់ថ្មី ចាប់ពីខែមីនា ឆ្នាំ២០២៥ តទៅ ដោយពិន័យប្រាក់ពលរដ្ឋណាដែលអាជ្ញាធររកឃើញថា បាចចំណីឱ្យសត្វព្រាប និងសត្វស្លាបព្រៃនៅទីសាធារណៈ ឬនៅមាត់ទឹកហាន នៅទីក្រុងសេអ៊ូល ស្មើនឹង១លានវ៉ុន (ឬស្មើ៧០០ដុល្លារអាមេរិក) ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី៥ ខែមករា ឆ្នាំ២០២៥ ។

រដ្ឋសភាកូរ៉េខាងត្បូងបានអនុម័តច្បាប់ថ្មីនេះ កាលពីថ្ងៃទី២៦ ខែធ្នូ ឆ្នាំ២០២៤ ដោយហាមឃាត់ការផ្តល់ចំណីឱ្យសត្វស្លាប ដោយសារពួកវាធ្វើឱ្យខូចខាតដល់ប្រព័ន្ធអេកូឡូស៊ី និងតំបន់ដំណាំរបស់កសិករ ។ បម្រាមក្នុងច្បាប់ថ្មីនេះមានឈ្មោះថា «ហាមឱ្យចំណីសត្វព្រាប និងសត្វស្លាបព្រៃ ដោយសារពួកវាជាបញ្ហាក្នុងទីក្រុងសេអ៊ូល» ។

អាជ្ញាធរមូលដ្ឋាននឹងហាមឃាត់ការផ្តល់ចំណីឱ្យជ្រូកព្រៃ, សត្វព្រាប និងសត្វស្លាបព្រៃមួយចំនួនទៀត ព្រមទាំងពិន័យប្រាក់អ្នកល្មើសច្បាប់ ពីព្រោះសត្វព្រៃទាំងនេះបានបំផ្លាញដំណាំកសិកម្ម និងប៉ះពាល់បរិស្ថានក្នុងទីក្រុង ។ អ្នកផ្តល់ចំណីឱ្យសត្វព្រៃ ត្រូវបានចាត់ទុកថា បានរួមចំណែកបង្កើនចំនួនសត្វព្រៃឱ្យកាន់តែច្រើនដើម្បីបំផ្លាញដំណាំ ។

ចំនួនពាក្យបណ្តឹងរបស់ពលរដ្ឋពាក់ព័ន្ធនឹងសត្វព្រាប គឺបានកើនឡើងពី៦៦៧ករណី នៅឆ្នាំ២០២០ មកស្មើនឹង១,១៧៧ករណី នៅឆ្នាំ២០២១ ហើយពាក្យបណ្តឹងកើនឡើងដល់១,៣២៥ករណី នៅឆ្នាំ២០២២ និង១,៤៣២ករណី នៅឆ្នាំ២០២៣ ។ ការដាក់ពាក្យបណ្តឹង ដោយសារពលរដ្ឋពិបាកធ្វើដំណើរតាមផ្លូវ, លាមកសត្វលើដំបូលផ្ទះ, ខ្វះអនាម័យ ដូចជា ៖ លាមក និងរោមសត្វ ព្រមទាំងការបោះចោលខ្មោចព្រាប ។ នេះបើតាមទិន្នន័យរបស់រដ្ឋាភិបាល ។

អាជ្ញាធរមូលដ្ឋានមានតួនាទីត្រួតពិនិត្យ និងពិន័យប្រាក់ពលរដ្ឋដែលបាចចំណីឱ្យសត្វព្រាប និងសត្វស្លាបព្រៃនៅតំបន់ហាមឃាត់ ដូចជា ៖ ទីសាធារណៈ, ផ្លូវជាតិ, តំបន់បេតិកភណ្ឌវប្បធម៌ និងនៅមាត់ទន្លេហាន ។ ច្បាប់ថ្មីនឹងអនុវត្តចាប់ពីថ្ងៃទី២៤ ខែមករា ហើយចាប់ផ្តើមពិន័យអ្នកល្មើសច្បាប់ ចាប់ពីថ្ងៃទី១ ខែមីនា ឆ្នាំ២០២៥ ៕

ប្រទេសលុចសំបួរ ៖ បញ្ហាធំបំផុតរបស់ប្រទេសនានាដែលព្យាយាមលើកកម្ពស់យេនឌ័រ គឺភាពខុសគ្នារវាងប្រាក់ចំណូលរបស់បុរស និងស្ត្រី ហើយសូម្បីតែប្រទេសអភិវឌ្ឍន៍រីកចម្រើនជាច្រើនឆ្នាំ ក៏នៅតែជួបបញ្ហាប្រាក់ចំណូលខុសគ្នាដែរ ។ ប៉ុន្តែមានប្រទេសមួយនៅតំបន់អឺរ៉ុបបានដោះស្រាយបញ្ហានេះដោយជោគជ័យ ហើយបច្ចុប្បន្ន ប្រាក់ចំណូលរបស់ស្ត្រីក្នុងប្រទេសនេះ ខ្ពស់ជាងបុរស ។

លុចសំបួរ គឺជាប្រទេសតូចមួយដែលមានពលរដ្ឋរស់នៅត្រឹមតែ៦សែននាក់ប៉ុណ្ណោះ ហើយស្ត្រីក្នុងប្រទេសនេះពុំមែនទើបតែមានប្រាក់ចំណូលច្រើនជាងបុរសនៅឆ្នាំ២០២៤ ទេ ប៉ុន្តែពួកនាងមានប្រាក់ចំណូលច្រើនជាងបុរស តាំងពីឆ្នាំ២០២៣ មកម៉្លេះ ។

កាលពី២០ឆ្នាំមុន ស្ត្រីនៅប្រទេសលុចសំបួរ មានការងារធ្វើតិចជាងបុរសរហូតដល់ជិត២៥% ប៉ុន្តែបច្ចុប្បន្ន ស្ត្រីមានការងារធ្វើតិចជាងបុរសត្រឹមតែ៦% ប៉ុណ្ណោះ ។ វាជាភាគរយតិចបំផុត ហើយភាគរយនេះស្មើគ្នាជាមួយបារាំង ដែលជាប្រទេសមានសមភាពយេនឌ័ររវាងបុរស និងស្ត្រី ។

កត្តាមួយចំនួនដែលធ្វើឱ្យស្ត្រីនៅលុចសំបួរ ទទួលបានប្រាក់ខែច្រើនជាងបុរស គឺរដ្ឋាភិបាលបានជំរុញឱ្យស្ត្រីធ្វើការកាន់តែច្រើន ។ ការងារដែលពួកនាងធ្វើសុទ្ធតែទទួលបានប្រាក់ខែច្រើន ហើយពួកនាងពុំធ្វើការងារណាដែលទទួលបានប្រាក់ខែតិចទេ ។ ហេតុនេះ ទើបធ្វើឱ្យប្រាក់ខែជាមធ្យមរបស់ស្ត្រីខ្ពស់ជាងបុរស ។ រីឯកត្តាមួយទៀត គឺស្ត្រីលុចសំបួរបច្ចុប្បន្ន បានរៀនសូត្រមានចំណេះដឹងខ្ពង់ខ្ពស់ជាងបុរស ។

ហេតុនេះ លុចសំបួរ អាចក្លាយជាគំរូសម្រាប់ប្រទេសផ្សេងៗដែលចង់លើកកម្ពស់យេនឌ័រ និងកាត់បន្ថយគម្លាតប្រាក់ខែរវាងបុរស និងស្ត្រី ។ ទោះយ៉ាងណា មតិមួយចំនួនលើកឡើងថា បើទោះជាស្ត្រីលុចសំបួរទទួលបានប្រាក់ខែច្រើនជាងបុរសក្តី ប៉ុន្តែមានស្ត្រីតិចតួចណាស់ដែលធ្វើការក្នុងតួនាទីធំៗ ឬផ្នែកគ្រប់គ្រងក្រុមហ៊ុន បើធៀបជាមួយប្រទេសផ្សេងៗនៅអឺរ៉ុប ៕

ប្រទេសកូរ៉េខាងត្បូង ៖ ប្រធានាធិបតីស្តីទីកូរ៉េខាងត្បូង លោក Choi Sang-mok បានបញ្ជាឱ្យមន្ត្រីស្ថាប័នពាក់ព័ន្ធត្រួតពិនិត្យយន្តហោះ Boeing 737-800 ទាំងអស់ ដែលកំពុងផ្តល់សេវាកម្មហោះហើរក្នុងប្រទេស និងដោះស្រាយបញ្ហាជាបន្ទាន់ បើរកឃើញកំហុស ។ រីឯសមត្ថកិច្ចត្រូវស៊ើបអង្កេតរកមូលហេតុយន្តហោះក្រុមហ៊ុនអាកាសចរណ៍ Jeju Air ធ្លាក់ពី Runway នៅអាកាសយានដ្ឋានកាលពីថ្ងៃទី២៩ ខែធ្នូ ឆ្នាំ២០២៤ បណ្តាលឱ្យអ្នកដំណើរស្លា.ប់ យ៉ាងច្រើន ។

លោក Choi បានថ្លែងក្នុងកិច្ចប្រជុំ ស្តីពីការគ្រប់គ្រងគ្រោះមហន្តរាយ ថា ការបំលែងទិន្នន័យពីឧបករណ៍ថតសំឡេង (ប្រអប់ខ្មៅ) ក្នុងបន្ទប់អាកាសយាវនិករបស់យន្តហោះ Jeju Air 7C2216 គឺរួចរាល់នៅថ្ងៃទី៣ ខែមករា ឆ្នាំ២០២៤ ។ ទិន្នន័យនេះអាចជួយឱ្យយើងដឹងពីហេតុការណ៍សំខាន់នៅនាទីចុងក្រោយមុនពេលកើតហេតុ ។

គ្រោះថ្នាក់យន្តហោះបានកើតឡើងនៅអាកាសយានដ្ឋានមូអាន់ ប្រទេសកូរ៉េខាងត្បូង គឺយន្តហោះ Jeju Air បានចុះចតពុំទម្លាក់កង់ និងធ្វើឱ្យផ្នែកខាងក្រោមយន្តហោះប៉ះទង្គិចជាមួយស៊ីម៉ងត៍ រហូតដល់ឆេះ ។ វាធ្វើឱ្យអ្នកដំណើរ១៧៥នាក់ និងបុគ្គលិកអាកាសចរណ៍៤នាក់ស្លាប់ ហើយមានតែបុគ្គលិកអាកាសចរណ៍២នាក់ប៉ុណ្ណោះរួចផុតពីគ្រោះថ្នាក់ ដែលពួកគេស្ថិតនៅបរិវេណខាងក្រោយ ។

ពលរដ្ឋកូរ៉េខាងត្បូងបារម្ភយ៉ាងខ្លាំងពីការធ្វើដំណើរតាមយន្តហោះ Jeju Air ហេតុនេះ ក្រសួងគមនាគមន៍ និងស្ថាប័នពាក់ព័ន្ធត្រូវស៊ើបអង្កេតយ៉ាងលម្អិត ក៏ដូចជាត្រួតពិនិត្យការជួសជុលយន្តហោះ និងផ្តល់ចំណេះដឹងផ្នែកអាកាសចរណ៍ ។ នេះបើតាមការលើកឡើងរបស់លោក Choi ។

ចំណែកប្រអប់ខ្មៅបានខូចខាតផ្នែកខ្លះ ហើយកូរ៉េខាងត្បូងនឹងបញ្ជូនវាទៅសហរដ្ឋអាមេរិកដើម្បីវិភាគ ក្រោមការសហការជាមួយក្រុមប្រឹក្សាសុវត្ថិភាពដឹកជញ្ជូនសហរដ្ឋអាមេរិក ។ អ្នកជំនាញមកពីក្រុមប្រឹក្សាសុវត្ថិភាពដឹកជញ្ជូនសហរដ្ឋអាមេរិក, មន្ត្រីគ្រប់គ្រងអាកាសចរណ៍សហរដ្ឋអាមេរិក និងបុគ្គលិកក្រុមហ៊ុន Boeing ដែលផលិតយន្តហោះនេះ បានធ្វើដំណើរមកដល់កូរ៉េខាងត្បូងហើយ ដើម្បីរួមគ្នាស៊ើបអង្កេតរកមូលហេតុពិតប្រាកដ ។

ក្រៅពីនេះ លោក Choi ក៏បានស្នើឱ្យស្ថាប័នពាក់ព័ន្ធផ្តល់ជំនួយដល់ក្រុមគ្រួសារសាកសព និងបញ្ជាឱ្យសមត្ថកិច្ចចាត់វិធានការអ្នកចែកចាយសារស្អប់ខ្ពើម និងព័ត៌មានក្លែងក្លាយក្នុងបណ្តាញសង្គមពាក់ព័ន្ធនឹងហេតុការណ៍សោកនាដកម្មរបស់យន្តហោះ Jeju Air ៕

កាលពីថ្ងៃទី ២ ខែមករា ឆ្នាំ២០២៥នេះ ធនាគារជាតិកម្ពុជា បានជម្រាបជូនដំណឹងអំពីការចរាចរក្រដាសប្រាក់ដុល្លារអាមេរិកក្លែងក្លាយលើទីផ្សារប្រទេសកម្ពុជា ក៏ដូចជាសូមឲ្យបងប្អូនប្រជាពលរដ្ឋទាំងអស់បង្កើនការប្រុងប្រយ័ត្ន ដើម្បីជៀសវាងនូវការខាតបង់ផ្សេងៗពីការក្លែ.ងប.ន្លំរបស់ជនខិល.ខូច។

ដូច្នេះហើយ នៅថ្ងៃនេះ សារព័ត៌មាន KBN News សូមជម្រាបជូនលោកអ្នកនូវវីធីសាស្រ្ត ៤ យ៉ាង ក្នុងការសង្កេតមើលលើក្រដាសប្រាក់ ១០០ ដុល្លារពិតប្រាកដ៖
១ យកដៃស្ទាបលើស្មាតាដុល្លារ៖ សូមយកដៃស្ទាបឬអង្អែលលើស្មារបស់តាដុល្លារ បើយើងមានអារម្មណ៍ថា នៅកន្លែងនោះមានសភាពគ្រើមៗ គឺបញ្ជាក់ថាជាប្រាក់ដុល្លារពិតប្រាកដហើយ។

២ ពិនិត្យមើលលើរូបជួង និងលេខ ១០០ នៅខាងក្រោម ៖ បើយើងដាក់ក្រដាសប្រាក់ដុល្លារត្រង់ធម្មតា ជាទូទៅនៅត្រង់រូបជួងនិងលេខ ១០០នៅខាងក្រោមនោះ គឺមានពណ៌ទង់ដែង។ ដូច្នេះហើយ ដើម្បីត្រួតពិនិត្យ សូមលោកអ្នកធ្វើការផ្អៀងក្រដាសប្រាក់ទៅម្ខាង នោះរូបជួងក៏ដូចជាលេខ ១០០ នឹងប្រែពីពណ៌ទង់ដែងទៅជាពណ៌បៃតង (ដែលនេះគឺបញ្ជាក់ថាជាលុយពិត)។

៣ ពិនិត្យលើខ្សែបន្ទាត់ពណ៌ខៀវ ដែលស្ថិតនៅកណ្តាល៖ ខ្សែបន្ទាត់ខៀវនេះ ជាទូទៅគឺមិនមែនបោះពុម្ពជាប់នឹងក្រដាសប្រាក់នោះទេ គឺវារំលេចនៅលើក្រដាស ដែលយើងអាចយកវត្ថុតូចស្តើងមកហូតឆ្កឹះចុះឡើងបាន ដោយគ្មានការដាច់រហែកឡើយ។ ម៉្យាងវិញទៀត នៅលើខ្សែបន្ទាត់ខៀវនេះ គឺយើងនឹងឃើញលេខ ១០០ និងរូបជួងតូចៗជាច្រើន ហើយបើយើងធ្វើចលនា វានឹងមានចលនា រំកិលចុះឡើងតាមយើងដូចគ្នាដែរ។

៤ មើលលើស្រមោលតាដុល្លារនៅផ្នែកខាងស្តាំ៖ បើយើងក្រឡេកទៅផ្នែកខាងស្តាំនៃក្រដាសប្រាក់ នឹងឃើញមានចន្លោះទំនេរមួយ។ ដូច្នេះ ដើម្បីពិនិត្យគឺយើងត្រូវលើកក្រដាសប្រាក់នោះឡើង ដាក់ឲ្យចំពន្លឺ, នោះនៅចន្លោះដែលទំនេរ យើងនឹងឃើញស្រមោលតាដុល្លារ ផុសចេញមកយ៉ាងច្បាស់ជាក់ជាមិនខាន៕

ប្រទេសថៃ ៖ ក្រោយពីលោក ឆាត់ជាតិ សិទ្ធីផាន់ អភិបាលក្រុងបាងកក ចុះត្រួតពិនិត្យសណ្តាប់ធ្នាប់នៅតាមផ្លូវសុខុមវីត កាលពីថ្ងៃទី២ ខែមករា ឆ្នាំ២០២៥ លោកបានស្នើឱ្យស្ថាប័នពាក់ព័ន្ធសហការជាមួយសមត្ថកិច្ចចាត់វិធានការអ្នកសុំទាន ជាពិសេស ក្មេ.ងសុំទាន ហើយលោកបានសំណូមពរពលរដ្ឋថៃកុំផ្តល់ប្រាក់ឱ្យអ្នកសុំទានដាច់ខាត ។

លោក ឆាត់ជាតិ និយាយថា ចិញ្ចើមផ្លូវសុខុមវីដ មានភ្ញៀវទេសេចរបរទេសដើរទៅមក រហូតដល់ស្មើ៩៥% និងស្ទើរតែគ្មានពលរដ្ឋថៃដើរតាមចិញ្ចើមផ្លូវនេះទេ ពីព្រោះវាជាតំបន់ទេសចរណ៍ ។ ប៉ុន្តែបញ្ហាធំបំផុតនៅតាមចិញ្ចើមផ្លូវសុខុមវីត គឺសម្បូរអ្នកសុំទាន ជាពិសេស ក្មេងៗ ដែលលោកពុំអាចទទួលយកបាន ហើយនៅមានបញ្ហាផ្សេងទៀត គឺអ្នកគ្មានផ្ទះសម្បែង និងការលក់ទំនិញខុសច្បាប់ ដូចជា ៖ បារីអេឡិចត្រូនិក និងឧបករណ៍ដាស់អារម្មណ៍ ។

ការលក់របស់របរតាមចិញ្ចើមផ្លូវនៅតំបន់ទេសចរណ៍ គឺអាចលក់បានសម្រាប់ពលរដ្ឋថៃ ប៉ុន្តែបើជនបរទេសលក់ខុសច្បាប់ គឺសមត្ថកិច្ចត្រូវតែចាត់វិធានការតាមច្បាប់ ។ ក្រៅពីនេះ សមត្ថកិច្ចត្រូវរៀបចំសណ្តាប់ធ្នាប់តាមចិញ្ចើមផ្លូវផងដែរ និងហាមឃាត់រថយន្តចតលើផ្លូវផ្តេសផ្តាស ។

ពលរដ្ឋរាយការណ៍ថា ពេលឃើញសមត្ថកិច្ច អ្នកសុំទាននាំគ្នារត់បាត់អស់ ប៉ុន្តែពេលសមត្ថកិច្ចទៅបាត់ ពួកគេក៏ត្រឡប់មកកន្លែងដើមវិញ ក្នុងនោះក៏មានក្មេងសុំទានដែរ ។ ពលរដ្ឋថៃតែងតែអាណិតអាសូរក្មេងទាំងនេះ ហើយពុំដឹងថា គេយកក្មេងៗមកពីណាទេ ។

ហេតុនេះ សូមគ្រប់គ្នាកុំផ្តល់ប្រាក់ឱ្យអ្នកសុំទាន ហើយស្ថាប័នពាក់ព័ន្ធ ដូចជា ៖ ក្រសួងអភិវឌ្ឍន៍សង្គម និងសន្តិសុខ ត្រូវសហការជាមួយសមត្ថកិច្ចជួយគ្នាចាត់វិធានការអ្នកសុំទាននៅទីក្រុងបាងកក ដោយយើងអនុវត្តតាមច្បាប់ និងគោលការណ៍មនុស្សធម៌ ។ នេះបើតាមការលើកឡើងរបស់លោក ឆាត់ជាតិ ។

លោក ឆាត់ជាតិ បាននិយាយ Live ផ្ទាល់ក្នុងហ្វេសប៊ុករបស់លោក ក្នុងពេលចុះត្រួតពិនិត្យសណ្តាប់ធ្នាប់នៅតាមផ្លូវសុខុមវីត ថា ក្មេងតូចៗអាយុពី៤ឆ្នាំ ទៅ៥ឆ្នាំ បានមកដេកសុំទានតាមផ្លូវ ហើយភ្ញៀវទេសចរបរទេសអាណិតផ្តល់ប្រាក់ឱ្យរហូតដល់៥០០បាត ។ ដូច្នេះ បើពលរដ្ឋឃើញក្មេងសុំទាន សូមផ្តល់ដំណឹងមកសមត្ថកិច្ច ឬរាយការណ៍ទៅមន្ត្រីពាក់ព័ន្ធ ៕