មួយរយៈក្រោយមកនេះ សន្ទុះនៃការគាំទ្រសួនសត្វភ្នំតាម៉ៅ គឺមានការកើនឡើងខ្លាំងមែនទែន បន្ទាប់ពីលេចវត្តមាន«អូនលំផាត់» ដែលគេប្រសិទ្ធនាមថាជា កូនដំរីនាំសំណាង។ ទន្ទឹមនឹងនេះ បើក្រឡេកទៅកាន់សួនសត្វមួយកន្លែងនៅឯប្រទេសថៃវិញ ក៏ទទួលបានការគាំទ្រខ្លាំងដូចគ្នាដោយសារតែវត្តមានរបស់កូនដំរីទឹក«មូឌែង»។

ប្រិយមិត្តភាគច្រើនប្រាកដជាបានជ្រាបយ៉ាងច្បាស់ អូនលំផាត់ បច្ចុប្បន្នកំពុងតែស្នាក់នៅនិងទទួលការព្យាបាលនៅឯសួនសត្វភ្នំតាម៉ៅ លើទឹកដីខេត្តតាកែវ។ កូនដំរីញីមួយក្បាលនេះមានអាយុប្រហែលនឹង ៦ ខែហើយ និងទម្ងន់ប្រមាណ ១៤០ គីឡូក្រាម។ ដោយសង្កេតឃើញថា អូនលំផាត់ហាក់ទទួលបានការគាំទ្រយ៉ាងខ្លាំងក្លាក្នុងចំណោមភ្ញៀវទេសចរទាំងជាតិនិងអន្តរជាតិ ទៅទស្សនាកម្សាន្តមិនដែលលស់មួយថ្ងៃទេ ដោយសារតែភាពឆ្លាតវៃ ចេះស្តាប់បង្គាប់ និងរូបរាងដ៏ខ្ជូតគួរឲ្យស្រលាញ់។

ថ្មីៗនេះ តារាងពេលវេលាចូលជួបអូនលំផាត់ ក៏បានលេចចេញមក ខណៈក៏បានសាយភាយនូវភាពភាពល្បីល្បាញកាន់តែខ្លាំងឡើង រហូតដល់មានអ្នកជួយឧបត្ថម្ភកូនដំរីមួយក្បាលនេះជាថវិការផង ក៏ដូចជាម្សៅទឹកដៅគោផងដែរ។ យ៉ាងណា សព្វថ្ងៃនេះ អូនក៏នូវមានរបួសជើងមុខខាងស្តំាដោយសារតែការដាក់អន្ទាក់របស់ព្រានព្រៃ ដែលត្រូវសម្រាកព្យាបាលជាច្រើនខែទៀត។

បើក្រឡេកទៅកាន់ប្រទេសថៃវិញ សួនសត្វ Khao Kheow Open ក្នុងខេត្តឈុនបុរី ហាក់ទទួលបានប្រជាប្រិយភាពយ៉ាងខ្លាំង ព្រោះតែវត្តមានរបស់កូនដំរីទឹក មូឌែង។ មូឌែង កើតអំឡុងខែកក្កដាឆ្នាំ ២០២៤ ខណៈទទួលបានភាពល្បីល្បាញខ្លាំងពេលវាមានអាយុ ២ ខែ ពោលគឺអំឡុងខែកញ្ញា។ បច្ចុប្បន្ន មូឌែងមានអាយុប្រហែល ៦ខែហើយ។

កូនដំរីទឹកមួយក្បាលនេះមានរូបរាងតូចច្រឡឹង ពណ៌ប្រផេះ និងមានសំណើមជាប់ជានិច្ច។ជាមួយនឹងរូបរាងដ៏គួរឲ្យស្រលាញ់ និងអាកប្បកិរិយាកំប្លែងៗ, មូឌែង ហាក់ទទួលបានការចាប់អារម្មណ៍យ៉ាងខ្លាំងនៅលើ Tik Tok និងហ្វេសបុក ខណៈភ្ញៀវទេសទេសចរទាំងជាតិនិងអន្តរជាតិសម្រុកយ៉ាងភ្លុកទឹកភ្លុកដី ទៅទស្សនាកូនដំរីទឹកមូឌែង។

រូបភាព Meme កំប្លែងៗរបស់មូឌែងបានសាយភាពពេញបណ្តាញសង្គមថៃ ខណៈដែលសម្ភារៈប្រើប្រាស់ផ្សេងៗ ដូចជាសម្លៀកបំពាក់ជាដើម បានបោះពុម្ពជារូបភាពមូឌែងជាបន្តបន្ទាប់ផងដែរ៕

យុគសម័យថ្មី ប្រទេសនានាលើសកលលោកកំពុងតែប្រកួតប្រជែងគ្នា ក្នុងការអភិវឌ្ឍទីក្រុងឲ្យកាន់តែទំនើបនិងឈានមុខគេ ខណៈក៏បានលេចឡើងនូវគម្រោងស្ថាបត្យកម្មធំៗជាបន្តបន្ទាប់។ យ៉ាងណា ក្នុងឆ្នាំ ២០២៥នេះ គឺមានតែប្រទេសចំនួន ១១ ប៉ុណ្ណោះ ដែលនឹងដាក់សម្ភោធស្ថាបត្យកម្មកំពូលរបស់ខ្លួន ហើយអ្វីដែលជាមោទនភាពក្នុងនោះក៏មានកម្ពុជាដែរ។

សារព័ត៌មានអាមេរិក CNN បានចុះផ្សាយអំពីគម្រោងអាកាសយាន្តដ្ឋានយក្ស ធំជាងគេនៅអាស៊ី គឺអាកាសយាន្តដ្ឋានអន្តរជាតិតេជោ របស់កម្ពុជា ដែលនឹងបើកឲ្យដំណើរការនៅដំណាក់កាលទី ១ អំឡុងខែកក្កដា ឆ្នាំ២០២៥ខាងមុខនេះ។ ទន្ទឹមនឹងនេះ ប្រភពដដែលក៏បានគូសបញ្ជាក់អំពីគម្រោងស្ថាបត្យកម្មធំៗចំនួន ១០ ផ្សេងទៀតដែលនឹងលេចរូបរាងក្នុងឆ្នាំ ២០២៥ នេះ៖

១ New Sydney Fish Market នៅក្រុង Sydney របស់អូស្ត្រាលី
២ Grand Ring នៅក្រុង Osaka របស់ជប៉ុន
៣ Life and Mind Building នៅក្រុង Oxford របស់ចក្រភពអង់គ្លេស
៤ Canadian School នៅក្រុង Cholula របស់ម៉ិចស៉ិច
៥ អាកាសយានដ្ឋានអន្តរជាតិតេជោ ក្នុងខេត្តកណ្តាល ចម្ងាយ ១៩ គីឡូម៉ែត្រពីរាជធានីភ្នំពេញ ប្រទេសកម្ពុជា
៦ South Station redevelopment នៅក្រុង Boston របស់សហរដ្ឋអាមេរិក
៧ Goethe-Institut នៅក្រុង Dakar របស់សេណេហ្កាល់
៨ Urban Glen នៅក្រុង Hangzhou របស់ចិន
៩ Riyadh Metro នៅក្រុង Riyadh របស់អារ៉ាប៊ីសាអូឌីត
១០ Skypark Business Center នៅក្រុង Luxembourg របស់លុច្សសំបួរ
១១ Danjiang Bridge ក្រុង Taipei របស់ចិន-តៃវ៉ាន់៕

សហរដ្ឋអាមេរិក៖ រដ្ឋធំៗចំនួន ៧ របស់សហរដ្ឋអាមេរិកដូចជា Maryland, Missouri, Arkansas, Kansas, Virginia, West Virginia និង Kentucky បានប្រកាសអាសន្នភ្លាមៗដោយសារឥទ្ធិពលព្យុះព្រិលទឹកកកដ៏អាក្រក់បំផុតមិនធ្លាប់មាន ដោយបង្កើតនូវព្រិលធ្លាក់ខ្លាំង និងសីតុណ្ហភាពត្រជាក់បំផុតក្នុងរយៈពេលជាង ១០ ឆ្នាំធ្វើឱ្យស្ថានភាពផ្លូវកាន់តែមានគ្រោះ.ថ្នាក់។

យោងតាមសេវាអាកាសធាតុជាតិរបស់សហរដ្ឋអាមេរិក ព្យុះនេះបានចាប់ផ្តើមវាយប្រហារមកលើសហរដ្ឋអាមេរិកតាំងពីថ្ងៃទី ៤ ខែមករា បណ្តាលឱ្យមនុស្សរាប់លាននាក់ជាប់គាំងនៅនឹងមួយកន្លែង ក៏ដូចជាបង្កឱ្យមានការកកស្ទះ និងរំខានដល់ដំណើរកម្សាន្តរបស់ភ្ញៀវទេសចរ។ នៅថ្ងៃទី៦ ខែមករារដ្ឋចំនួនប្រាំពីររបស់សហរដ្ឋអាមេរិកក៏បានប្រកាសដាក់រដ្ឋក្នុងភាពអាសន្ន ខណៈដែលព្យុះរដូវរងានៅតែបន្តវាយប្រហារឥតឈប់ឈរ។

មនុស្សជាង ៦០ លាននាក់នៅទូទាំងរដ្ឋចំនួន ៣០ ផ្សេងទៀតក៏ស្ថិតនៅក្រោមការជូនដំណឹងអំពីអាកាសធាតុផងដែរ ខណៈតំបន់មួយចំនួននៅក្នុងសហរដ្ឋអាមេរិកដែលមិនធ្លាប់មានអាកាសធាតុត្រជាក់ រួមទាំងរដ្ឋ Mississippi និង Florida ក៏ត្រូវបានព្រមានថានឹងរងផលប៉ះពាល់ដោយរលកត្រជាក់នាពេលខាងមុខផងដែរ។ បច្ចុប្បន្នសាលារៀន និងអគារសហព័ន្ធជាច្រើនបានបិទ ហើយក្រុមហ៊ុនអាកាសចរណ៍ជាច្រើនរបស់សហរដ្ឋអាមេរិករួមមាន American, Delta, Southwest និង United ក៏កំពុងពន្យាពេលហោះហើរ ដោយសារលក្ខខណ្ឌអាកាសធាតុដ៏អាក្រក់ទាំងនេះ។

អ្នកជំនាញអាកាសធាតុបាននិយាយថា អាកាសធាតុខ្លាំងគឺជាលទ្ធផលនៃ vortex តំបន់ប៉ូល ដែលជារចនាសម្ព័ន្ធបរិយាកាសដ៏ធំមួយ ដែលជារឿយៗលេចឡើងក្នុងរដូវរងារនៅក្នុងតំបន់ប៉ូលរបស់ផែនដី រួមទាំងតំបន់អាក់ទិក និងអង់តាក់ទិក។ អ្នកព្យាករណ៍អាកាសធាតុអាមេរិកបាននិយាយថា នេះអាចជាព្រិលធ្លាក់ខ្លាំងបំផុត និងកត់ត្រាសីតុណ្ហភាពទាបក្នុងរយៈពេលជាងមួយទសវត្សរ៍៕

ប្រទេសថៃ ៖ ពលរដ្ឋរស់នៅបរិវេណក្រោយវត្តថាឆាង ស្ថិតក្នុងឃុំខោថាព្រះ ស្រុកមឿង ខេត្តឆៃណាត ប្រទេសថៃ បានបង្ហាញក្តីបារម្ភពីជំងឺឆ្លងរាតត្បាត ក្រោយពេលសត្វស្លាបរាប់ពាន់ក្បាលធ្វើសំបុកនៅតាមដើមឈើក្បែរភូមិ ។ លើសពីនេះ ថែមទាំងមានក្លិនលាមកសត្វស្អុយសាយភាយប៉ះពាល់ដល់សុខភាពទៀតផង ។ នេះបើតាមការចុះផ្សាយរបស់សារព័ត៌មានថៃ កាលពីថ្ងៃទី៥ ខែមករា ឆ្នាំ២០២៥ ។

ក្រៅពីសត្វស្លាបយំឮខ្លាំងតាំងពីព្រឹកព្រលឹម រហូតដល់ក្បាលព្រលប់ គឺនៅពេលមានខ្យល់បក់ម្តងៗ លាមកស្ងួតរបស់វានៅតាមមែកឈើ ក៏បានក្លាយជាកម្ទេចតូចៗសាយភាយទៅជាប់បរិវេណផ្ទះអ្នកស្រុក ។ ពលរដ្ឋបារម្ភថា កម្ទេចលាមកសត្វស្លាបនឹងបង្កជាជំងឺឆ្លងរាតត្បាតដល់សត្វស្លាបផ្សេងទៀត ហើយធ្វើឱ្យសត្វចិញ្ចឹមរបស់ពួកគេងាប់ ។ ម្យ៉ាងទៀត លាមកសត្វស្លាបនឹងប៉ះពាល់ដល់សុខភាពមនុស្សផងដែរ ជាពិសេស មនុស្សចាស់ និងក្មេងតូចៗ ។

លោក សាន់ទិ អាយុ៤៥ឆ្នាំ ជាអ្នកស្រុករស់នៅស្រុកមឿង ខេត្តឆៃណាត និយាយថា ផ្ទះរបស់លោកនៅឆ្ងាយពីដើមឈើដែលសត្វស្លាបធ្វើសំបុក ក្នុងចម្ងាយត្រឹមតែ៣០ម៉ែត្រប៉ុណ្ណោះ ហើយធ្វើឱ្យលោក និងក្រុមគ្រួសារធុំក្លិនស្អុយលាមកសត្វគ្រប់ពេលវេលា ។ លាមកសត្វនឹងស្អុយកាន់តែខ្លាំងឡើងនៅពេលយប់ រហូតដល់កូនចៅរបស់លោកសម្រាកលែងលក់ ។

លោកបារម្ភខ្លាចកូនស្រីឆ្លងមេរោគតាមខ្យល់ ពីព្រោះកូនរបស់លោក កំពុងមានបញ្ហាសុខភាព ។ ហេតុនេះ សូមឱ្យស្ថាប័នពាក់ព័ន្ធចុះមកត្រួតពិនិត្យ និងដោះស្រាយបញ្ហាឱ្យពលរដ្ឋជាបន្ទាន់ ដូចជា ៖ បាញ់ថ្នាំសម្លាប់មេរោគ ។

រីឯពលរដ្ឋម្នាក់ទៀតនិយាយថា វាអាចនឹងមានជំងឺឆ្លងរាតត្បាតផ្សេងទៀត ពីព្រោះនៅសុខៗ សត្វស្លាបទាំងនេះបែរជានាំកូនចៅមកធ្វើសំបុកក្បែរភូមិអ្នកស្រុក ។ ខ្លួនពុំធ្លាប់ឃើញពួកវាមករស់នៅបរិវេណនេះទេ នាពេលកន្លងមក ៕

សហរដ្ឋអាមេរិក ៖ ផលប៉ះពាល់បរិស្ថានដោយសារកាកសំណល់ផ្លាស្ទិក នៅតែជាបញ្ហាមួយដែលប្រទេសនានាពិបាកដោះស្រាយ ដូចជា ៖ បំណែកផ្លាស្ទិករាប់លានបានអណ្តែតក្នុងមហាសមុទ្រ និងប្រភពទឹកផ្សេងៗ ។ រីឯផ្លាស្ទិកដែលត្រូវគេកប់ក្នុងដី ឬកន្លែងចាក់សំរាម វាមិនងាយរលាយក្នុងរយៈពេលខ្លីទេ ហើយសូម្បីតែក្នុងខ្លួនមនុស្ស ក៏មានមីក្រូផ្លាស្ទិកដែរ ។

ប្រទេសមហាអំណាចនានា ដូចជា សហរដ្ឋអាមេរិកមានបញ្ហាក្នុងការកែច្នៃផ្លាស្ទិក ហើយក្នុង១ឆ្នាំៗ អាមេរិកបានយកផ្លាស្ទិកមកកែច្នៃឡើងវិញសម្រាប់ប្រើប្រាស់ជាប្រយោជន៍ ត្រឹមតែ១០% ប៉ុណ្ណោះ ។ ហេតុនេះ កាកសំណល់ផ្លាស្ទិកជាច្រើនទៀតដែលត្រូវបានកប់ចោលក្នុងដី គឺវានឹងចំណាយពេលរលាយជាច្រើនឆ្នាំ ។

លោក Jason Bara សាស្ត្រាចារ្យ និងជាអ្នកស្រាវជ្រាវនៅសាកលវិទ្យាល័យ Alabama សហរដ្ឋអាមេរិក បានរកឃើញវិធីកម្ទេចផ្លាស្ទិកទាំងស្រុងយ៉ាងមានប្រសិទ្ធភាព ហើយវិធីនេះនឹងជួយឱ្យពិភពលោក អាចដោះស្រាយបញ្ហាកាកសំណល់ផ្លាស្ទិកប៉ះពាល់បរិស្ថាន ។ ការស្រាវជ្រាវរបស់លោកទទួលបានការគាំទ្រពីមូលនិធិវិទ្យាសាស្ត្រជាតិ ក្នុងគោលបំណងកាត់បន្ថយកាកសំណល់ផ្លាស្ទិក ។

លោកបានសាកល្បងសារធាតុម្យ៉ាងឈ្មោះថា «Imidazole» ដែលសម្រាប់ប្រើប្រាស់ក្នុងថ្នាំលាប និងការបោះពុម្ភ ដោយសារលោកចង់ដឹងថា តើសារធាតុនេះអាចកម្ទេចផ្លាស្ទិកដោយរបៀបណា? ក្រោយមក លោករកឃើញថា ផ្លាស្ទិកក្នុងបន្ទប់ពិសោធន៍ ដែលលោកបានសាកល្បងជាមួយសារធាតុ Imidazole បានរលាយបាត់អស់គ្មានសល់ ។

ការប្រើប្រាស់សារធាតុ Imidazole ដើម្បីកម្ទេចកាកសំណល់ផ្លាស្ទិក គឺមានប្រសិទ្ធភាពជាងវិធីកម្ទេចផ្លាស្ទិកនាពេលបច្ចុប្បន្ន និងអាចកាត់បន្ថយការចំណាយដើមទុនទៀតផង ។ លោកសង្ឃឹមថា ប្រទេសនានានឹងអាចកាត់បន្ថយកាកសំណល់ផ្លាស្ទិកយ៉ាងច្រើន នាថ្ងៃអនាគត ។

លោក Jason នឹងពុំបញ្ឈប់ការស្រាវជ្រាវត្រឹមនេះទេ គឺលោកមានគោលដៅស្រាវជ្រាវពីវិធីកម្ទេចវត្ថុពិបាករលាយផ្សេងទៀត ដូចជា ៖ សំបកវេចខ្ចប់ផលិតពីស្នោ ដោយសារវាក្លាយជាសំរាមដ៏ច្រើនលើសលប់ ។ បើការស្រាវជ្រាវរបស់លោកទទួលបានជោគជ័យ វានឹងអាចជួយគ្រប់គ្រងបរិមាណកាកសំណល់លើពិភពលោក ៕

ប្រទេសឡាវ៖ បន្ទាប់ពីសាងសង់អស់រយៈពេលជាច្រើនឆ្នាំ ឥឡូវនេះសារមន្ទីរសិល្បៈឡាវ ដែលជាសារមន្ទីរថ្មីដំបូងគេ និងមានតែមួយគត់នៅទីក្រុងវៀងចន្ទន៍បានបើកដំណើរការជាផ្លូវការហើយ ដើម្បីស្វាគមន៍ភ្ញៀវទេសចរគ្រប់ជាតិសាសន៍។
សារៈមន្ទីនេះបានបើកនៅថ្ងៃទី ៥ ខែមករាក្នុងភូមិ Nonsaart សង្កាត់ Xaythany ទីក្រុងវៀងចន្ទន៍ ប្រទេសឡាវ ដោយមានទំហំ ៨០ ហិចតា និងមានសម្ភារៈបរិក្ខារជាច្រើន រួមទាំងអគារព័ត៌មាន សារមន្ទី កន្លែងទទួលភ្ញៀវ សាលតាំងពិពណ៌សិល្បៈ និងវប្បធម៌សម្រាប់ពិធីបុណ្យផ្សេងៗ ក៏ដូចជាប៉មសង្កេត និងអគារពហុគោលបំណងជាច្រើនផ្សេងទៀត។

នៅទីនេះមានការប្រមូលផ្ដុំដ៏ធំនៃសិប្បកម្មឈើប្រណីតជាង ៣០០០ និងគំនូរពីប្រវត្តិសាស្ត្រឡាវ រួមជាមួយក្រុមជនជាតិភាគតិចផ្សេងៗគ្នា ដែលបានឆ្លុះបញ្ចាំងពីវប្បធម៌ប្រទេសឡាវ និងបណ្តាប្រទេសអាស៊ីអាគ្នេយ៍ដទៃទៀត។ អ្នកទស្សនាអាចស្វែងយល់ពីចម្លាក់ឈើ និងគំនូរ គយគន់ទិដ្ឋភាពដ៏ស្រស់ស្អាតនៃសារៈមន្ទី ក៏ដូចជាស្វែងយល់អំពីផលិតផលឡាវនៅក្នុងអគារតាំងពិពណ៌ ទិញវត្ថុអនុស្សាវរីយ៍ និងអាចរីករាយជាមួយសណ្ឋាគារ រមណីយដ្ឋាន និងភោជនីយដ្ឋាននៅក្នុងនោះផងដែរ។

លើសពីនេះនៅខាងក្រៅសារមន្ទីរក៏មានទឹកជ្រោះសិប្បនិម្មិតដ៏គួរឱ្យចាប់អារម្មណ៍មួយ ព្រមទាំងកន្លែងដ៏ទាក់ទាញជាច្រើនទៀតផងដែរ។ នៅទីនេះបើជារៀងរាល់ថ្ងៃចាប់ពីម៉ោង ៩:០០ ព្រឹកដល់ម៉ោង ៥:០០ ល្ងាច ជាមួយសំបុត្រ ១០ ដុល្លារក្នុងម្នាក់ ប៉ុន្តែសម្រាប់កុមារដែលមានអាយុ ១២ ឆ្នាំចុះក្រោមគឺចូលទស្សនាដោយឥតគិតថ្លៃ។ ដូច្នេះលោកអ្នកនឹងទទួលបានចំណេះដឹងជាច្រើននៅពេលមកដល់សារមន្ទីរសិល្បៈឡាវ ដែលបង្ហាញពីភាពអស្ចារ្យនៃវប្បធម៌ទូទៅ ក៏ដូចជាផ្តល់កន្លែងសម្រាប់សិក្សាប្រវត្តិសាស្ត្រថ្មីៗ និងអភិរក្សផងដែរ។ យោងតាមសារព័ត៌មាន Vientiane Times សារមន្ទីរសិល្បៈមួយនេះត្រូវបានកំណត់ឱ្យក្លាយជាគោលដៅទេសចរណ៍ដ៏សំខាន់មួយរបស់ប្រទេសឡាវ៕

ប្រទេសអាល្លឺម៉ង់ ៖ កំណើនពលរដ្ឋអាយុច្រើនបានធ្វើឱ្យប្រទេសអាល្លឺម៉ង់ប្រឈមនឹងបញ្ហាខ្វះខាតអ្នកជំនាញថែទាំមនុស្សចាស់ ហើយបច្ចុប្បន្ន មនុស្សចាស់ជាច្រើនបានរស់នៅតែម្នាក់ឯង និងឯកោ ។ ហេតុនេះ ក្រុមហ៊ុនមួយរបស់អាល្លឺម៉ង់ឈ្មោះ Devanthro បានផលិតមនុស្សយន្ត Robody សម្រាប់ថែទាំមនុស្សចាស់យ៉ាងយកចិត្តទុកដាក់ពេញ២៤ម៉ោង ។

មនុស្សយន្ត Robody អាចជួយធ្វើការងារប្រចាំថ្ងៃ ដូចជា ៖ រៀបចំម្ហូបអាហារ, ថ្នាំពេទ្យ និងអាចធ្វើជាមិត្តភក្តិជជែកបំបាត់ការអផ្សុករបស់មនុស្សចាស់ផងដែរ ។ មនុស្សយន្តនេះធ្វើការតាមរយៈការបញ្ជាពីចម្ងាយ និងបំពាក់បច្ចេកវិទ្យាទំនើបៗ មិនថាប្រព័ន្ធបច្ចេកវិទ្យា AI និងបច្ចេកវិទ្យា 5G ហើយអ្នកប្រើប្រាស់អាចគ្រប់គ្រងមនុស្សយន្តយ៉ាងងាយស្រួលពីចម្ងាយ ឬហាក់ដូចជាកំពុងស្ថិតនៅជាមួយមនុស្សយន្តពិតប្រាកដ ។

អ្នកប្រើប្រាស់អាចមើលឃើញអ្វីៗដែលមនុស្សយន្តមើលឃើញ និងឮសំឡេងនៅជុំវិញខ្លួនមនុស្សយន្ត ដែលធ្វើឱ្យអ្នកប្រើប្រាស់មានអារម្មណ៍ថា ពួកគេកំពុងនៅជាមួយឪពុក-ម្តាយចាស់ជរា ។ ក្រៅពីនេះ មនុស្សយន្ត Robody អាចធ្វើត្រាប់តាមមនុស្ស ដូចជា ៖ លើកដៃ, ចាប់វត្ថុ និងឱប ។ មនុស្សយន្តត្រូវបានផលិតឡើងឱ្យមានភាពរស់រវើក ហើយដៃរបស់វាអាចធ្វើការងារផ្សេងៗ ដូចជា ៖ យកម្ហូបអាហារចេញពីទូរទឹកកក និងយកសម្លៀកបំពាក់ពីក្នុងទូរ ។

ក្រុមហ៊ុន Devanthro ជឿជាក់ថា មនុស្សយន្តនេះនឹងជំរុញដល់ការផ្លាស់ប្តូរវិធីទំនាក់ទំនង, ការគ្រប់គ្រងពីចម្ងាយ និងបំពេញតម្រូវការរបស់អ្នកប្រើប្រាស់ តាមរយៈការបំពាក់បច្ចេកវិទ្យាដ៏ទំនើប ។ មនុស្សយន្តនឹងក្លាយជាការតភ្ជាប់ទំនាក់ទំនងរវាងមនុស្ស និងមនុស្ស ដើម្បីកាត់បន្ថយគម្លាតគ្នា និងបង្កើតភាពជិតស្និទ្ធកាន់តែខ្លាំង ។

នាថ្ងៃអនាគត យើងនឹងបានឃើញមនុស្សយន្តមកជួយថែទាំមនុស្សចាស់កាន់តែច្រើនឡើង ហើយជួយឱ្យមនុស្សចាស់រស់នៅយ៉ាងមានសេចក្តីសុខ និងមានគុណភាពជីវិតល្អប្រសើរក្នុងវ័យជរា ៕

ប្រាសាទគឺជាទីតំកល់ព្រះអទិទេពសម្រាប់ធ្វើកិច្ចពិធីសាសនាណាមួយ និងជាសំណង់បុរាណដែលមានអាយុកាលរាប់ពាន់ឆ្នាំមកហើយ សាងសង់ឡើងដោយបុព្វបុរសនាសម័យមុនៗ។ ប្រាសាទត្រូវបានមនុស្សជាច្រើនគិតថា ជាលំនៅដ្ឋានរបស់ស្តេច ឬព្រះរាជា ប៉ុន្តែតាមពិតទៅប្រាសាទគឺគេសាងសង់ឡើងដើម្បីរំលឹកដល់ព្រះអាទិទេពប៉ុណ្ណោះ មិនមែនជាលំនៅដ្ឋានរបស់ស្តេចនោះទេ។ ទោះជាយ៉ាងណាតើលោកអ្នកដឹងទេថា នៅលើពិភពលោកយើងនេះ ប្រទេសណាដែលសម្បូរមានប្រាសាទច្រើនជាងគេបំផុត?

ច្បាស់ណាស់គឺប្រទេសឥណ្ឌា ឥណ្ឌាគឺជាប្រទេសចំណាស់ជាងគេទីពីរនៅលើពិភពលោកបន្ទាប់ពីអេហ្ស៊ីប។ ប្រទេសឥណ្ឌាមានវប្បធម៌ចម្រុះជាច្រើន រួមទាំងសាសនាហិណ្ឌូ ព្រះពុទ្ធសាសនា សាសនាចេន និងសាសនាស៊ីក ដោយក្នុងចំណោមសាសនាទាំងនោះ សុទ្ធតែបានសាងសង់នូវប្រាសាទដ៏សម្បូរបែបជាច្រើន។ បច្ចុប្បន្នប្រទេសអាស៊ីមួយនេះមានប្រាសាទសរុបទាំងអស់ចំនួន ៦៤៩,០០០ ដែលស្ថិតនៅរដ្ឋកំពូលទាំង ១២ នៃប្រទេសឥណ្ឌា។ ខណៈប្រាសាទដែលចំណាស់ជាងគេគឺ ប្រាសាទ Gavimath ត្រូវបានគេប៉ាន់ស្មានថាមានអាយុកាលរហូតដល់ ១០,០០០ ឆ្នាំឯណោះ។

ក្រៅពីឥណ្ឌាប្រទេសនេប៉ាល់ ស្រីលង្កា បង់ក្លាដែស និងប៉ាគីស្ថានក៏ជាប្រទេសមួយដែលសម្បូរមានប្រាសាទបុរាណច្រើនជាងគេផងដែរ។ ចំណែកប្រទេសកម្ពុជាយើងវិញទោះបីមិនស្ថិតក្នុងបញ្ជីប្រទេសដែលមានប្រាសាទច្រើនជាងគេលើពិភពលោកក៏ដោយ ក៏ស្ថិតក្នុងបញ្ជីប្រទេសដែលមានប្រាសាទច្រើនជាងគេនៅអាស៊ីអាគ្នេយ៍ផងដែរ ដោយមានប្រមាណ ៤០០០ ប្រាសាទ ហើយខេត្តដែលមានប្រាសាទច្រើនជាងគេគឺខេត្តសៀមរាប ជាមួយប្រាសាទជាង ៣៦០ ប្រាសាទ។ នៅខេត្តសៀមរាប ប្រាសាទបុរាណដែលទាក់ទាញទេសចរណ៍ជាងគេគឺ ប្រាសាទអង្គរវត្ត ប្រាសាទបាយ័ន ប្រាសាទតាព្រហ្ម ប្រាសាទភ្នំបាខែង និងប្រាសាទបាពួន រួមទាំងប្រាសាទជាច្រើនផ្សេងទៀត។

នៅលំដាប់ទី ២ គឺខេត្តព្រះវិហារ ដែលខេត្តនេះក៏មានប្រាសាទច្រើនជាងគេផងដែរសរុបចំនួន ២១៥ ខណៈចំណាត់ថ្នាក់ទី ៣ គឺខេត្តបន្ទាយមានជ័យមានប្រាសាទចំនួន ១០២ រីឯខេត្តកំពង់ធំ ឈរនៅលំដាប់ទី ៤ ដោយមានប្រាសាទ ១០០ ចំណែកឯខេត្តឧត្ដរមានជ័យមាន ៤៧ ប្រាសាទឈរនៅលំដាប់លេខ ៥ និងខេត្តខ្មែរជាច្រើនទៀតក៏ពោរពេញទៅដោយប្រាសាទបុរាណផងដែរ៕