ប្រទេសជប៉ុន៖ Onsen គឺជាប្រពៃណីនៃការងូតទឹកក្តៅធម្មជាតិដែលមានអាយុកាលរាប់សតវត្សមកហើយនៅក្នុងប្រទេសជប៉ុន។ វាត្រូវបានបង្កើតឡើងពីប្រភពទឹកក្តៅក្រោមដីនៅជិតតំបន់ភ្នំភ្លើងដែលនៅតែសកម្ម ការងូតទឹកក្តៅគឺជាបទពិសោធន៍ដែលមិនអាចខ្វះបានសម្រាប់អ្នកមកលេងប្រទេសជប៉ុន។ សម្រាប់ជនជាតិដើមភាគតិច ការងូតទឹកក្តៅមិនត្រឹមតែជាអនាម័យរាងកាយប៉ុណ្ណោះទេ ថែមទាំងជាវប្បធម៌ ពិធីសម្អាតព្រលឹង វិធីសាស្រ្តនៃការព្យាបាល និងការថែទាំរាងកាយផងដែរ។

ដូច្នេះប្រទេសជប៉ុនគ្រោងដាក់បញ្ចូលវប្បធម៌នេះ ជាបេតិកភណ្ឌវប្បធម៌អរូបីរបស់អង្គការយូណេស្កូនៅឆ្នាំ ២០២៨ ដោយបច្ចុប្បន្នអភិបាលមួយក្រុមតំណាងឱ្យខេត្តចំនួន ៤៤ កំពុងធ្វើយុទ្ធនាការដើម្បីធ្វើឱ្យវប្បធម៌ងូតទឹក Onsen ក្លាយជាបេតិកភណ្ឌវប្បធម៌អរូបីរបស់អង្គការយូណេស្កូនៅពេលខាងមុខ។ លោក Shinji Hirai អភិបាលខេត្ត Tottori បាននិយាយថា វប្បធម៌ងូតទឹកក្តៅធម្មជាតិនេះសមនឹងទទួលបានការទទួលស្គាល់ស្មើនឹងសិល្បៈនៃការធ្វើស្រា និង shochu កាលពីខែធ្នូផងដែរ។

យោងតាមសារព័ត៌មានបទេសចុះផ្សាយថា Onsen មិនត្រឹមតែជាសកម្មភាពសម្រាកលំហែកាយប៉ុណ្ណោះទេ ប៉ុន្តែក៏ជារបៀបរស់នៅដ៏ទាក់ទាញមួយរបស់ជប៉ុនផងដែរ ដែលជាប់ទាក់ទងយ៉ាងជិតស្និទ្ធជាមួយនឹងជីវិតប្រចាំថ្ងៃរបស់មនុស្ស។ បច្ចុប្បន្នប្រទេសជប៉ុនមានរមណីយដ្ឋានទឹកក្ដៅប្រហែល ៣,០០០ ដែលជនជាតិដើមភាគតិចចាត់ទុកថាជាអំណោយពីធម្មជាតិ។ កាលពីមុន ប្រជាជនជប៉ុនតែងតែស្នាក់នៅតំបន់ Onsen យ៉ាងហោចណាស់មួយសប្តាហ៍ ឬយូរជាងនេះដើម្បីជាវិធីព្យាបាលជំងឺ ដោយងូតទឹកច្រើនដងក្នុងមួយថ្ងៃ។

ទោះជាយ៉ាងណាដោយសារពលរដ្ឋឥឡូវមានការងាររវល់ច្រើន ដូច្នេះពួកគេមកងូតទឹកក្តៅត្រឹមតែមួយ ឬពីរថ្ងៃប៉ុណ្ណោះ។ គួរបញ្ជាក់ដែរថា កិច្ចខិតខំប្រឹងប្រែងដើម្បីធ្វើឱ្យ onsen ក្លាយជាបេតិកភណ្ឌវប្បធម៌អរូបីពិភពលោក គឺទទួលបានសន្ទុះចាប់តាំងពីអង្គការយូណេស្កូបានទទួលស្គាល់វប្បធម៌សូណារបស់ប្រទេសហ្វាំងឡង់ក្នុងឆ្នាំ ២០២០។ សូណាត្រូវបានណែនាំជាផ្នែកមួយដែលមិនអាចខ្វះបាននៃជីវិតរបស់មនុស្សភាគច្រើន។ ហេតុនេះប្រទេសជប៉ុនក៏មានវប្បធម៌ងូតទឹកក្តៅ ដែលស្រដៀងនឹងសូណាដែរ ដែលវប្បធម៌នេះ គ្រោងនឹងដាក់បញ្ចូលជាបេតិកភណ្ឌវប្បធម៌អរូបីរបស់អង្គការយូណេស្កូនៅឆ្នាំ ២០២៨៕

ពិធីបុណ្យពិពណ៌ព្រិលទឹកកកដ៏ធំមួយប្រចាំឆ្នាំ ២០២៥ នៅឯប្រទេសចិន ដែលបានបើកសម្ពោធជាផ្លូវការ កាលពីថ្ងៃទី៥ ខែមករានេះ ខណៈទទួលបានការចាប់អារម្មណ៍ជុំវិញពិភពលោក។ យ៉ាងណាថ្មីៗនេះ ក៏បានលេចវត្តមានយុវតីជូរី ល្អហួស សម្តែងរបាំអប្សរា ដើម្បីផ្សព្វផ្សាយវប្បធម៌ខ្មែរទីនោះផងដែរ។

បុណ្យពិពណ៌ព្រិលទឹកកកអន្តរជាតិហាប៊ីន លើកទី ៤១ បានប្រារព្ធឡើងនៅឯទីក្រុងហាប៊ីន ខេត្ត Heilongjiang ប្រទេសចិន។ វាត្រូវបានចាត់ទុកថាពិធីបុណ្យដ៏ធំបំផុតរបស់ពិភពលោក ដែលបានធ្វើឡើងនៅលើផ្ទៃដី ១លានម៉ែត្រការ៉េ។ នៅទីនោះគឺមានការតាំងពិពណ៌ចម្លាក់ ដែលធ្វើចេញពីព្រិលនិងទឹកកកយ៉ាងមានភាពទាក់ទាញ ដែលរួមមានទាំងអគារ ប្រាសាទ គោមយក្ស សួនកម្សាន្តនិងរូបសត្វផ្សេងៗជាដើម ដែលច្នៃចេញពីទឹកកកទីនោះទាំងអស់។

អ្នកទាំងអស់គ្នាក៏អាចរីករាយជាមួយនឹងសកម្មភាពទឹកកកជាច្រើនទៀត ដូចជាជិះស្គីលើទឹកកក ស្ទូចត្រី និងបាល់ទាត់ទឹកកក។ល។ បន្ថែមពីនេះក៏រួមមានការសម្តែងសិល្បៈ ភាពយន្ត ខណៈនាពេលរាត្រីការតំាងលម្អជាមួយនឹងភ្លើងចម្រុះពណ៌យ៉ាងស្រស់ស្អាតបំផុត។

សូមជម្រាបថា បុណ្យព្រិលទឹកកកនេះត្រូវបានរៀបចំឡើងតាំងពីអំឡុងដើមខែធ្នូមកម្លេះ ស្របពេលដែលរដូវរងារ ខណៈនឹងបន្តបើកដំណើរការដល់ចុងខែកុម្ភៈ ឬទម្រាំតែចូលដល់រដូវក្តៅវិញ។ យ៉ាងណា នៅទីនោះគឺមានអាកាសធាតុត្រជាក់ខ្លាំង រហូតដល់ទៅ -៣៥ អង្សាសេឯណ្ណោះ ដូច្នេះហើយប្រសិនបើលោកអ្នកមានបំណងទៅកម្សាន្ត ត្រូវតែមានការត្រៀមខ្លួនជាមុន ដូចជាត្រៀមសម្លៀកបំពាក់ក្រាស់ៗ ស្រោមដៃ ស្រោមជើងជាដើម។

គួរឲ្យកត់សម្គាល់ថា ពិធីបុណ្យព្រិលទឹកកកនេះ គឺជាវប្បធម៌របស់ជនជាតិចិន ដែលបានប្រារព្ធធ្វើឡើងដំបូងតាំងពីឆ្នាំ ១៩៦៣ មកម្លេះ តែក៏ខកខានជាច្រើនឆ្នាំវិញអំឡុងបដិវត្តន៍វប្បធម៌។ យ៉ាងណា ចាប់ពីឆ្នាំ ១៩៨៥ មក បុណ្យនេះក៏បានប្រារព្ធយ៉ាងជាប់លាប់វិញរហូតមកដល់បច្ចុប្បន្ន៕

ប្រទេសកូរ៉េខាងជើង ៖ មេដឹកនាំប្រទេសកូរ៉េខាងជើង លោក គីម ជុងអ៊ុន បានហាមឃាត់ពលរដ្ឋលក់ និងបរិភោគហតដក និងអាហារជាច្រើនមុខ ។ បើអ្នកណាម្នាក់ល្មើសនឹងបម្រាមនេះចាត់ទុកថា គឺជាអ្នកបះបោរ ពុំស្តាប់បង្គាប់ ហើយអាជ្ញាធរនឹងចា.ប់ ខ្លួនបញ្ជូនទៅធ្វើការធ្ងន់ ។ នេះបើតាមការចុះផ្សាយរបស់គេហទំព័រ nypost (របស់សារព័ត៌មាន New York Post) កាលពីថ្ងៃទី៦ ខែមករា ឆ្នាំ២០២៥ ។

ការហាមឃាត់ពលរដ្ឋបរិភោគទាំងនេះ គឺមេដឹកនាំកូរ៉េខាងជើងមានគោលបំណងទប់ស្កាត់វប្បធម៌បរិភោគអាហារតាមបណ្តាប្រទេសលោកខាងលិច កុំឱ្យជ្រៀតចូលកូរ៉េខាងជើង ។ លោក គីម ជុងអ៊ុន ប្រកាសថា ការបរិភោគហតដក គឺជាទង្វើក្បត់ជាតិ ស្របពេលការចូលចិត្តបរិភោគអាហារកូរ៉េខាងត្បូងកើនឡើងនៅអាមេរិក ។ បើអាជ្ញាធររកឃើញថា អ្នកណាម្នាក់លក់ ឬធ្វើហតដកបរិភោគ អាជ្ញាធរនឹងចាប់បញ្ជូនពួកគេទៅធ្វើការនៅកន្លែងឃុំឃាំង ។

វាជាការព្យាយាមរបស់មេដឹកនាំកូរ៉េខាងជើង ដើម្បីកុំឱ្យពលរដ្ឋបរិភោគអាហារតាមបណ្តាប្រទេសខាងលិច ហើយក្រៅពីហតដក រដ្ឋាភិបាលក៏បានហាមឃាត់ពលរដ្ឋលក់ ឬបរិភោគអាហារជាច្រើនទៀត ដូចជា ៖ Budae-jjigae និង Tteokbokki ពីព្រោះជាអាហារដ៏ពេញនិយមទទួលឥទ្ធិពលពីកូរ៉េខាងត្បូង ខណៈកូរ៉េខាងត្បូង ជាមិត្តភក្តិជិតស្និទ្ធជាមួយបណ្តាប្រទេសលោកខាងលិច ។

Budae-jjigae គឺជាអាហារចម្រុះរវាងកូរ៉េខាងត្បូង និងអាមេរិក ដែលដាក់សាច់ក្រក ឬសាច់បន្ទះ Ham ធ្វើជាគ្រឿងផ្សំ ។ រីឯ Tteokbokki ជាអាហារដ៏ល្បីរបស់កូរ៉េខាងត្បូង ក៏ត្រូវកូរ៉េខាងជើងហាមឃាត់ដែរ ។ កាលពីខែវិច្ឆិកា ឆ្នាំ២០២៤ ផ្សារនានាក្នុងខេត្តរ៉ាយ៉ាកាំង ស្ថិតនៅភាគខាងជើងប្រទេសកូរ៉េខាងជើង បានបញ្ឈប់ការលក់ហតដក និង Budae-jjigae ។

ដោយឡែក រដ្ឋាភិបាលក្រុងព្យុងយ៉ាងចាត់ទុកថា ការលែងលះប្តី-ប្រពន្ធ ក៏ខុសច្បាប់ដែរ និងជាទង្វើប្រឆាំងរបបសង្គមនិយម ។ កាលពីខែធ្នូ ឆ្នាំ២០២៤ អ្នកលែងលះប្តី-ប្រពន្ធជាច្រើននាក់ត្រូវបានអាជ្ញាធរបញ្ជូនឱ្យទៅធ្វើការចាប់ពី១ខែ ទៅ៦ខែ ។ ស្ត្រីម្នាក់ប្រាប់ថា នាងបានធ្វើការរយៈពេល៣ខែ នៅខេត្ត South Pyongan ក្រោយលែងលះ ហើយបុរស និងស្ត្រី ប្រមាណ៣០នាក់បានជាប់ពន្ធនាគារដោយសារលះលែង គឺស្ត្រីទទួលទោសធ្ងន់ជាងបុរស ៕

សហរដ្ឋអាមេរិក៖ យន្តហោះអគ្គិសនីដែលមានរាងដូច UFO ត្រូវបានគេស្គាល់ថាជា Invo Moon គ្រោងនឹងដាក់ដំណើរការទូទាំងពិភពលោកនៅឆ្នាំ ២០២៨ ជាមួយល្បឿន ៤៨០ គីឡូម៉ែត្រក្នុងមួយម៉ោង អាចដឹកអ្នកដំណើរបាន ៣ នាក់។

ជាការពិតណាស់យន្តហោះអគ្គិសនីគឺមានច្រើនហើយនៅទូទាំងពិភពលោក ប៉ុន្តែយន្តហោះដែលមានរាងដូច UFO គឺទើបតែមាននោះទេ។ យន្តហោះនេះមានឈ្មោះថា Invo Moon អាចផ្ទុកអ្នកដំណើរបាន ៣ នាក់ ដោយផ្តល់នូវទិដ្ឋភាព ៣៦០ ដឺក្រេ ពីលើនិងខាងក្រោម ខណៈពេលដែលធ្វើដំណើរក្នុងល្បឿនរហូតដល់ជាង ៤០០ គីឡូម៉ែត្រក្នុងមួយម៉ោង។

គំរូ Invo Moon ត្រូវបានបង្កើតឡើងដោយអតីតវិស្វករ Tesla លោក Leo Kayali រចនាឡើងដើម្បីឱ្យមានភាពស្ងៀមស្ងាត់ ដោយប្រើប្រព័ន្ធហោះហើរដែលលាក់នៅខាងក្នុងសំបករបស់វា ជាជាងពឹងផ្អែកលើម៉ាស៊ីនរុញដែលបញ្ចេញសម្លេងរំខានដូចជាយន្តហោះផ្សេងទៀត។

Invo Moon មានអង្កត់ផ្ចិត ៤.៩ ម៉ែត្រ និងទម្ងន់ ១,១៣៤ គីឡូក្រាម ដែលយន្តហោះនេះអាចផ្លាស់ទីក្នុងទិសដៅណាមួយ ស្រដៀងទៅនឹងយន្តហោះគ្មានមនុស្សបើកផងដែរ។ នៅខាងក្នុងកាប៊ីនមានកៅអីបង្វិលចំនួន ៣ ជាមួយនឹងមុខងារកំដៅ និងមុខងារដែលអាចឱ្យអ្នកដំណើររីករាយជាមួយទេសភាពពីលើ និងខាងក្រោមតាមរយៈកញ្ចក់ថ្លា។

យានជំនិះនេះក៏មានភ្លើងបំភ្លឺអារម្មណ៍ ម៉ាស៊ីនផលិតការ៉េម និងទូរទស្សន៍ឆ្លាតវៃផងដែរ។ វាមានចម្ងាយលើសពី ៤៨០ គីឡូម៉ែត្រ ចំណាយពេលមិនលើសពី ៣០ នាទីដើម្បីសាកពី ២០% ទៅ ៨០% ។ យន្តហោះអគ្គិសនី Invo Moon ត្រូវបានបំផុសគំនិតដោយគំនូររបស់លោក Leonardo Da Vinci កាលពីជាងប្រាំសតវត្សមុន ដែលគំនូនេះនិយាយអំពី UFO ហោះនៅលើភពផែនដី។

UFO គឺជាយានជំនិះរបស់មនុស្សក្រៅភព ឬអេលាន។ គោលដៅដែលលោក Leo Kayali បង្កើតយន្តហោះនេះមកគឺដើម្បីឱ្យប្លែក និងពិសេសជាងគេ ហើយលោកគ្រោងនឹងដាក់ដំណើរការយន្តហោះនេះទូទាំងពិភពលោកនៅឆ្នាំ ២០២៨ ក្នុងតម្លៃជិត ៣៥១,០០០ ដុល្លារអាមេរិក៕