សារព័ត៌មានអន្តរជាតិជាច្រើនបានចុះផ្សាយអំពីពាក្យទំនាយរបស់លោកយាយ Baba Vanga ដែលបានទស្សន៍ទាយអំពីឆ្នាំ ២០២៥ ថាជាឆ្នាំមួយដ៏កាចសា.ហាវ ដែលសង្កត់ធ្ងន់លើទ្វីបអ៊ឺរ៉ុប នឹងកើតមាននូវវិបត្តិផ្សេងៗ។ យ៉ាងណា ត្រឹមរយៈ ២ សប្តាហ៍ដំបូងនៃឆ្នាំ ២០២៥ សភាពការណ៍ពិភពលោកហាក់មិនសូវជាស្រួលប៉ុន្មានទេ ដូចជាការផ្ទុះ..មេ.រោគថ្មី HMPV ពីចិន និងហេតុការណ៍ភ្លើង.ឆេះព្រៃនៅអាមេរិកផងដែរ។

ជឿជាក់ថាប្រិយមិត្តភាគច្រើនប្រាកដជាបានជ្រាបហើយ លោកយាយ Baba Vanga ជាស្រ្តីពិការភ្នែកជនជាតិប៊ុលការី ដែលត្រូវបានចាត់ទុកថាជាហោរាសាស្រ្តដ៏ល្បីល្បាញប្រចាំសតវត្សទី ២០។ នាពេលកន្លងមក លោកយាយបានទស្សន៍ទាយហេតុការណ៍នាអនាគតកាលជាច្រើន ខណៈហេតុការណ៍ខ្លះក៏បានឈុតតាមពាក្យទំនាយមែន។

ក្នុងឆ្នាំ ២០២៥នេះលោកយាយ Baba Vanga បានទស្សន៍ទាយ អំពីសេណារីយ៉ូសង្រ្គាមលោកលើកទី ៣ ,ការកើនឡើងនូវភាពតានតឹងភូមិសាស្រ្តនយោបាយ វិបត្តិហិរញ្ញវត្ថុ ការបញ្ចប់សង្រ្គាមរវាងរុស្សីនិងអុយក្រែន តែបែរជាកើតសង្រ្គាមយោធានៅអង់គ្លេសវិញ។ លោកយាយក៏បានលើកឡើងពីគ្រោះមហន្តរាយធម្មជាតិដ៏កាចសាហាវ និងវិបត្តិអាកាសធាតុធ្ងន់ធ្ងរក្នុងឆ្នាំនេះផងដែរ។

ជាក់ស្តែង នៅសប្តាហ៍ដំបូង ក្នុងឆ្នាំ ២០២៥ នៅឯប្រទេសចិនគឺផ្ទុះឡើងនូវមេរោគថ្មីមួយ ដែលត្រូវបានគេស្គាល់ថាជា HMPV ស្រដៀងផ្តាសាយធំផង និងកូវីដ ១៩ ផង បានធ្វើឲ្យពិភពលោកមានការភ្ញាក់ផ្អើល ក៏ដូចជាទប់ស្កាត់ការរីករាលដាល។ យ៉ាងណា បើក្រឡេកទៅកាន់ក្រុង Los Angeles រដ្ឋកាលីហ្វញ៉ា សហរដ្ឋអាមេរិកវិញ គឺបានកើតមានហេតុការណ៍ភ្លើងឆេះព្រៃដ៏គួរឲ្យរន្ធត់ តំាងពីថ្ងៃទី ៧ ខែមករា រហូតទល់នឹងថ្ងៃទី ១៤ ខែមករានេះក៏នូវតែមិនទាន់រលត់ឡើយ។

តាមរយៈហេតុការណ៍ទំាងនេះគឺបានបណ្តាលឲ្យមនុស្សម្នាជុំវិញពិភពលោកសង្ស័យនេះថា នេះគឺបណ្តាលមកពីពាក្យទំនាយរបស់លោកយាយ Baba Vanga ឬក៏យ៉ាងណា? បើតាមការលើកឡើងពីអ្នកជំនាញ លោកយាយ Baba Vanga គ្រាន់តែគូសបញ្ជាក់ពីហេតុការណ៍គ្រោះធម្មជាតិដ៏កាចសាហាវក្នុងឆ្នាំ ២០២៥នេះដោយប្រយោលប៉ុណ្ណោះ។ តាមពិតទៅលោកយាយមិនបានលម្អិតថារឿងរ៉ាវនេះកើតឡើងនៅឯ Los Angeles នោះទេ តែយ៉ាងណានេះទំនងជាហេតុការណ៍បំផ្លិចបំផ្លាញមួយដែលគាត់ចង់សម្តៅដល់ផងដែរ៕

Manila North Cemetery ដែលជាទីបញ្ចុះសពចំណាស់ជាងគេ និងធំជាងគេមួយនៅក្នុងប្រទេសហ្វីលីពីន កំពុងក្លាយជាទីជម្រករបស់ប្រជាជនក្រីក្ររាប់រយនាក់។
កន្លែងនេះគឺជាទីបញ្ចុះសពសម្រាប់អ្នកមានៗ ចាប់ពីអតីតប្រធានាធិបតី រហូតដល់តារាភាពយន្តល្បី និងក្រុមអភិជនជាច្រើននាក់ទៀត។ បច្ចុប្បន្នគឺបានក្លាយជាទីជម្រកដ៏សំខាន់មួយរបស់ប្រជាជនក្រីក្រដែលកំពុងស្វែងរកកន្លែងរស់នៅឥតគិតថ្លៃ។

De Los Santos អាយុ ៤០ ឆ្នាំបានធំឡើងនៅទីបញ្ចុះសពនេះ បាននិយាយថា ទោះបីជាទីបញ្ចុះសពងងឹត ក្តៅខ្លាំង និងត្រជាក់ខ្លាំងនៅពេលយប់ក៏ដោយ ក៏នាងនៅតែអាចទ្រាំបាន។ De Los Santos បានបន្តថា គ្រួសាររបស់ម្ចាស់ផ្នូ បានអនុញ្ញាតឱ្យពួកគេរស់នៅទីនេះ ដើម្បីសម្អាតផ្នូរ និងការពារផ្នូរពីពពួកចោរ។ សព្វថ្ងៃជីវភាពរស់នៅរបស់ប្រជាពលរដ្ឋរាប់រយនាក់ ដែលរស់នៅក្នុងទីបញ្ចុះសព Manila North Cemetery គឺប្រកបរបរឆ្លាក់ផ្នូរ ធ្វើសេវាកម្មជីកផ្នូរ និងសម្អាតផ្នូរ ដោយទទួលបានប្រាក់បៀវត្សរ៍ប្រហែល ០.៨៥ ដុល្លារ ក្នុងមួយខែសម្រាប់ផ្នូរមួយ។

អ្នកខ្លះទៀតក៏ជ្រើសរើសសម្អាតផ្នូរដោយឥតគិតថ្លៃ ដើម្បីត្រូវបានអនុញ្ញាតឱ្យសាងសង់ខ្ទមនៅលើដីនោះ។ អ្នកស្រុកនៅទីនេះបានដំឡើងខ្សែភ្លើងពេញផ្លូវក្នុងទីបញ្ចុះសព ដើម្បីផ្តល់ពន្លឺដល់មនុស្សខ្លះទៅលេងផ្នូរនៅពេលយប់។ គ្រួសារនីមួយៗក៏មានអគ្គិសនីប្រើប្រាស់ដែរ ប៉ុន្តែត្រូវបង់ថ្លៃអគ្គិសនីលើសពីទីផ្សារពីរដង។ ដោយសារការខ្វះថវិការ ប្រជាជនក្រីក្រជាច្រើនក៏សម្រេចរស់នៅបែបនេះ ដោយពួកគេជឿថា នៅទីបញ្ចុះសព Manila North Cemetery គ្មានខ្មោច ឬបិសាចអ្វីនោះទេ ដូច្នេះពួកគេមិនមានភាពភ័យខ្លាចឡើយ។

នៅថ្ងៃឈប់សម្រាកនាដើមខែវិច្ឆិកា អ្នកកាន់សាសនាកាតូលិករាប់លាននាក់នៅប្រទេសហ្វីលីពីនបាននាំគ្នាទៅទីបញ្ចុះសពទាំងនោះ ដើម្បីរំលឹកការចងចាំរបស់ពួកគេជាមួយអ្នកស្លាប់ ក្នុងពេលនោះដែរអ្នករស់នៅទីបញ្ចុះសពក៏មានការមមាញឹកខ្លាំង ដោយពួកគេបានសម្អាតផ្នូរទាំងអស់ ហើយលក់អាហារសម្រន់ពីតូប ដែលជួយឱ្យពួកគេរកប្រាក់បានច្រើន។ ដូច្នេះក្រៅពី Manila North Cemetery កន្លែងបញ្ចុះសពផ្សេងទៀត ក៏កំពុងមានប្រជាប្រិយភាពខ្លាំងសម្រាប់ប្រជាជនក្រីក្រក្នុងទីក្រុងម៉ានីល ប្រទេសហ្វីលីពីនផងដែរ៕

កូរ៉េខាងត្បូង៖ អាកាសធាតុត្រជាក់ខ្លាំង រដ្ឋាភិបាលទីក្រុងសេអ៊ូលរបស់ប្រទេសកូរ៉េខាងត្បូងថ្មីៗនេះ បានប្រកាសចាប់ផ្តើមយុទ្ធនាការមួយ ដើម្បីលើកទឹកចិត្តប្រជាជនឱ្យពាក់ម៉ាស់គ្រប់គ្នា នៅពេលដែលជំងឺគ្រុនផ្តាសាយកំពុងរីករាលដាលយ៉ាងឆាប់រហ័ស។

យោងតាមសារព័ត៌មានបរទេស YTN មេរោគគ្រុនផ្តាសាយក្នុងរយៈពេលប៉ុន្មានឆ្នាំចុងក្រោយនេះ ហាក់ដូចជារីករាលដាលលឿនជាងមុន ហើយក៏មានភាពធ្ងន់ធ្ងរជាងមុនផងដែរ ដោយសារគ្រុនផ្តាសាយពីរប្រភេទគឺ A-H1N1 និង A-H3N2 កើតមានក្នុងពេលដំណាលគ្នា។

ខណៈការកើនឡើងភាពខុសគ្នានៃសីតុណ្ហភាព និងការប្រែប្រួលអាកាសធាតុភ្លាមៗ ក៏បណ្តាលឱ្យមេរោគគ្រុនផ្តាសាយរីករាលដាលយ៉ាងឆាប់រហ័សផងដែរ។ បច្ចុប្បន្នចំនួនអ្នកជំងឺគ្រុនផ្តាសាយកំពុងឡើងដល់កម្រិតខ្ពស់ថ្មីជារៀងរាល់ថ្ងៃក្នុងរយៈពេលប្រាំបីឆ្នាំ។ ចំនួនអ្នកជំងឺដែលមានរោគសញ្ញាគ្រុនផ្តាសាយក្នុងសប្តាហ៍ដំបូងនៃខែមករាឆ្នាំនេះមានចំនួន ៩៩ នាក់ក្នុងចំណោមអ្នកជំងឺ ១,០០០ នាក់ កើនឡើង ១៣.៧ ដងធៀបនឹងរយៈពេលបួនសប្តាហ៍មុន។ ក្មេងជំទង់កំពុងនាំមុខគេដោយ ១៧៧ នាក់ និងកុមារ ១៦១ នាក់ ក្នុងចំណោម ១,០០០ នាក់។

លើសពីនេះចំនួនអ្នកជំងឺឆ្លងតាមផ្លូវដង្ហើមផ្សេងទៀតក៏កំពុងកើនឡើងខ្លាំងផងដែរ។ ទោះបីជាយ៉ាងនេះក្តីទីក្រុងសេអ៊ូលបច្ចុប្បន្នបានពង្រីកវិសាលភាពនៃការចាក់វ៉ាក់សាំងដោយឥតគិតថ្លៃដើម្បីការពារជំងឺគ្រុនផ្តាសាយសម្រាប់ប្រជាជននៅក្នុងទីក្រុង ជាពិសេសអ្នកដែលស្ថិតក្នុងក្រុមដែលមានហានិភ័យខ្ពស់នៃជំងឺផ្តាសាយ។ ដូច្នេះមារអាយុចាប់ពី ៦ខែ ដល់អាយុក្រោម ១៣ឆ្នាំ ស្ត្រីមានផ្ទៃពោះ និងមនុស្សដែលមានអាយុចាប់ពី ៦៥ឆ្នាំឡើងទៅ នឹងទទួលបានវ៉ាក់សាំងការពារជំងឺគ្រុនផ្តាសាយដោយឥតគិតថ្លៃ។

បុគ្គលិកដែលធ្វើការនៅសាលាមត្តេយ្យ កន្លែងថែទាំមនុស្សចាស់ និងគ្រូពេទ្យឆ្មបក៏នឹងទទួលបានវ៉ាក់សាំងការពារជំងឺគ្រុនផ្តាសាយដោយឥតគិតថ្លៃចាប់ពីពេលនេះរហូតដល់ថ្ងៃទី ៣០ ខែមេសា ឆ្នាំ២០២៥ ផងដែរ។ បន្ទាប់ពីចាក់វ៉ាក់សាំងរួច រដ្ឋាភិបាលកូរ៉េខាងត្បូងក៏ស្នើឱ្យប្រជាជនពាក់ម៉ាស់គ្រប់គ្នា និងរក្សាអនាម័យជានិច្ច៕