តើលោកអ្នកជ្រាបទេថា ការចាក់ទឹកកកចូលក្នុងចានបង្គន់ ក្រៅពីអាចជួយបំបាត់ក្លិនស្អុយហើយ វានឹងផ្តល់ផលប្រយោជន៍យ៉ាងច្រើន ។ ទឹកកកអាចបំបាត់ក្លិនស្អុយក្នុងបន្ទប់ទឹកបានល្អ និងជួយទប់ស្កាត់ការកកស្ទះយ៉ាងមានប្រសិទ្ធភាព ជាពិសេស បន្ទប់ទឹកមានអ្នកប្រើប្រាស់ច្រើន និងពុំអាចសម្អាតភ្លាមៗ ។
ការចាក់ទឹកកកចូលចានបង្គន់ នឹងជួយបណ្តេញមេរោគទៅក្នុងបំពង់បង្ហូរទឹកយ៉ាងឆាប់រហ័ស ។ ក្រៅពីនេះ វានឹងជួយបំបាត់ក្លិនស្អុយផងដែរ ករណីអ្នកណាម្នាក់ភ្លេចចុចទឹកចានបង្គន់ ។ វាថែមទាំងជួយកាត់បន្ថយសីតុណ្ហភាពឱ្យធ្លាក់ចុះ, ទប់ស្កាត់ការរីកធំធាត់របស់មេរោគ, ការពារកុំឱ្យលាមកជាប់ចានបង្គន់ និងងាយស្រួលលាងសម្អាត ។

ផលប្រយោជន៍ចុងក្រោយរបស់ទឹកកក គឺជួយកម្ចាត់កំទេចកំទីកកស្ទះក្នុងបន្ទប់ទឹក ។ ចូរចាក់ទឹកកកក្នុងចានបង្គន់ដើម្បីជំរុញឱ្យកំទេចកំទីតូចៗធ្លាក់ចុះក្រោម ដូចជា ៖ កំទេចក្រដាសអាចធ្លាក់ចុះក្រោមតាមបំពង់បង្ហូរទឹកយ៉ាងឆាប់រហ័ស ។
លោកអ្នកពុំចាំបាច់បារម្ភពីបញ្ហាទឹកកកធ្វើឱ្យចានបង្គន់កាន់តែស្ទះខ្លាំងជាងមុនទេ ពីព្រោះវានឹងរលាយបន្តិចម្តងៗក្លាយជាទឹក ។ បើចង់ប្រើប្រាស់បង្គន់ភ្លាមៗ លោកអ្នកគ្រាន់តែចាក់ទឹកធម្មតាចូលដើម្បីឱ្យទឹកកកឆាប់រលាយ ។
ក្រៅពីនេះ នៅមានវិធីមានប្រសិទ្ធភាពផ្សេងទៀតដើម្បីបំបាត់ក្លិនស្អុយក្នុងបន្ទប់ទឹក ដូចជា ៖
-ចាក់ទឹកខ្មេះនៅចំណុចកខ្វក់ មុនពេលលាងសម្អាតចានបង្គន់
-ហាន់ក្រូចឆ្មារជាចំណិតដាក់ចូលចានបង្គន់ រួចហើយទុកចោលមួយរយៈមុនពេលចុចទឹក និង
-ប្រើប្រាស់កាកកាហ្វេ ឬកាកតែ ដើម្បីបំបាត់ក្លិនស្អុយ ។
ហេតុនេះ ទឹកកក ពិតជាផ្តល់ផលប្រយោជន៍យ៉ាងច្រើនសម្រាប់បន្ទប់ទឹក ដែលលោកអ្នកអាចសាកល្បងអនុវត្តវិធីទាំងនេះនៅផ្ទះបាន និងធានាថា មានប្រសិទ្ធភាពហួសពីការស្មាន ៕